| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
5. மிக³ஸாலாஸுத்தவண்ணனா
5. Migasālāsuttavaṇṇanā
75. பஞ்சமஸ்ஸ ஆதி³ம்ஹி தாவ யங் வத்தப்³ப³ங், தங் ச²க்கனிபாதே வுத்தமேவ. து³ஸ்ஸீலோ ஹோதீதிஆதீ³ஸு பன து³ஸ்ஸீலோதி நிஸ்ஸீலோ. சேதோவிமுத்திந்தி ப²லஸமாதி⁴ங். பஞ்ஞாவிமுத்திந்தி ப²லஞாணங். நப்பஜானாதீதி உக்³க³ஹபரிபுச்சா²வஸேன ந ஜானாதி. து³ஸ்ஸீல்யங் அபரிஸேஸங் நிருஜ்ஜ²தீதி எத்த² பஞ்ச து³ஸ்ஸீல்யானி தாவ ஸோதாபத்திமக்³கே³ன பஹீயந்தி, த³ஸ அரஹத்தமக்³கே³ன. ப²லக்க²ணே தானி பஹீனானி நாம ஹொந்தி. ப²லக்க²ணங் ஸந்தா⁴ய இத⁴ ‘‘நிருஜ்ஜ²தீ’’தி வுத்தங். புது²ஜ்ஜனஸ்ஸ ஸீலங் பஞ்சஹி காரணேஹி பி⁴ஜ்ஜதி பாராஜிகாபஜ்ஜனேன ஸிக்கா²பச்சக்கா²னேன தித்தி²யபக்க²ந்த³னேன அரஹத்தேன மரணேனாதி. தத்த² புரிமா தயோ பா⁴வனாபரிஹானாய ஸங்வத்தந்தி, சதுத்தோ² வட்³டி⁴யா, பஞ்சமோ நேவ ஹானாய ந வட்³டி⁴யா. கத²ங் பனேதங் அரஹத்தேன ஸீலங் பி⁴ஜ்ஜதீதி? புது²ஜ்ஜனஸ்ஸ ஹி ஸீலங் அச்சந்தகுஸலமேவ ஹோதி, அரஹத்தமக்³கோ³ ச குஸலாகுஸலகம்மக்க²யாய ஸங்வத்ததீதி ஏவங் தேன தங் பி⁴ஜ்ஜதி. ஸவனேனபி அகதங் ஹோதீதி ஸோதப்³ப³யுத்தகங் அஸ்ஸுதங் ஹோதி. பா³ஹுஸச்சேனபி அகதங் ஹோதீதி எத்த² பா³ஹுஸச்சந்தி வீரியங். வீரியேன கத்தப்³ப³யுத்தகங் அகதங் ஹோதி, தஸ்ஸ அகதத்தா ஸக்³க³தோபி மக்³க³தோபி பரிஹாயதி. தி³ட்டி²யாபி அப்படிவித்³த⁴ங் ஹோதீதி தி³ட்டி²யா படிவிஜ்ஜி²தப்³ப³ங் அப்படிவித்³த⁴ங் ஹோதி அபச்சக்க²கதங். ஸாமயிகம்பி விமுத்திங் ந லப⁴தீதி காலானுகாலங் த⁴ம்மஸ்ஸவனங் நிஸ்ஸாய பீதிபாமோஜ்ஜங் ந லப⁴தி. ஹானாய பரேதீதி ஹானாய பவத்ததி.
75. Pañcamassa ādimhi tāva yaṃ vattabbaṃ, taṃ chakkanipāte vuttameva. Dussīlo hotītiādīsu pana dussīloti nissīlo. Cetovimuttinti phalasamādhiṃ. Paññāvimuttinti phalañāṇaṃ. Nappajānātīti uggahaparipucchāvasena na jānāti. Dussīlyaṃ aparisesaṃ nirujjhatīti ettha pañca dussīlyāni tāva sotāpattimaggena pahīyanti, dasa arahattamaggena. Phalakkhaṇe tāni pahīnāni nāma honti. Phalakkhaṇaṃ sandhāya idha ‘‘nirujjhatī’’ti vuttaṃ. Puthujjanassa sīlaṃ pañcahi kāraṇehi bhijjati pārājikāpajjanena sikkhāpaccakkhānena titthiyapakkhandanena arahattena maraṇenāti. Tattha purimā tayo bhāvanāparihānāya saṃvattanti, catuttho vaḍḍhiyā, pañcamo neva hānāya na vaḍḍhiyā. Kathaṃ panetaṃ arahattena sīlaṃ bhijjatīti? Puthujjanassa hi sīlaṃ accantakusalameva hoti, arahattamaggo ca kusalākusalakammakkhayāya saṃvattatīti evaṃ tena taṃ bhijjati. Savanenapiakataṃ hotīti sotabbayuttakaṃ assutaṃ hoti. Bāhusaccenapi akataṃ hotīti ettha bāhusaccanti vīriyaṃ. Vīriyena kattabbayuttakaṃ akataṃ hoti, tassa akatattā saggatopi maggatopi parihāyati. Diṭṭhiyāpi appaṭividdhaṃ hotīti diṭṭhiyā paṭivijjhitabbaṃ appaṭividdhaṃ hoti apaccakkhakataṃ. Sāmayikampi vimuttiṃ na labhatīti kālānukālaṃ dhammassavanaṃ nissāya pītipāmojjaṃ na labhati. Hānāya paretīti hānāya pavattati.
யதா²பூ⁴தங் பஜானாதீதி ‘‘ஸோதாபத்திப²லங் பத்வா பஞ்சவித⁴ங் து³ஸ்ஸீல்யங் அபரிஸேஸங் நிருஜ்ஜ²தீ’’தி உக்³க³ஹபரிபுச்சா²வஸேன ஜானாதி. தஸ்ஸ ஸவனேனபி கதங் ஹோதீதி ஸோதப்³ப³யுத்தகங் ஸுதங் ஹோதி. பா³ஹுஸச்சேனபி கதங் ஹோதீதி வீரியேன கத்தப்³ப³யுத்தகங் அந்தமஸோ து³ப்³ப³லவிபஸ்ஸனாமத்தகம்பி கதங் ஹோதி. தி³ட்டி²யாபி ஸுப்படிவித்³த⁴ங் ஹோதீதி அந்தமஸோ லோகியபஞ்ஞாயபி பச்சயபடிவேதோ⁴ கதோ ஹோதி. இமஸ்ஸ ஹி புக்³க³லஸ்ஸ பஞ்ஞா ஸீலங் பரிதோ⁴வதி, ஸோ பஞ்ஞாபரிதோ⁴தேன விஸேஸங் பாபுணாதி.
Yathābhūtaṃ pajānātīti ‘‘sotāpattiphalaṃ patvā pañcavidhaṃ dussīlyaṃ aparisesaṃ nirujjhatī’’ti uggahaparipucchāvasena jānāti. Tassa savanenapi kataṃ hotīti sotabbayuttakaṃ sutaṃ hoti. Bāhusaccenapi kataṃ hotīti vīriyena kattabbayuttakaṃ antamaso dubbalavipassanāmattakampi kataṃ hoti. Diṭṭhiyāpi suppaṭividdhaṃ hotīti antamaso lokiyapaññāyapi paccayapaṭivedho kato hoti. Imassa hi puggalassa paññā sīlaṃ paridhovati, so paññāparidhotena visesaṃ pāpuṇāti.
பமாணிகாதி புக்³க³லேஸு பமாணக்³கா³ஹகா. பமிணந்தீதி பமேதுங் துலேதுங் அரஹந்தி. ஏகோ ஹீனோதி ஏகோ கு³ணேஹி ஹீனோ. பணீதோதி ஏகோ கு³ணேஹி பணீதோ உத்தமோ. தங் ஹீதி தங் பமாணகரணங். அபி⁴க்கந்ததரோதி ஸுந்த³ரதரோ. பணீததரோதி உத்தமதரோ. த⁴ம்மஸோதோ நிப்³ப³ஹதீதி ஸூரங் ஹுத்வா பவத்தமானங் விபஸ்ஸனாஞாணங் நிப்³ப³ஹதி, அரியபூ⁴மிங் பாபேதி. தத³ந்தரங் கோ ஜானெய்யாதி தங் ஏவங் காரணங் கோ ஜானெய்ய. ஸீலவா ஹோதீதி லோகியஸீலேன ஸீலவா ஹோதி. யத்த²ஸ்ஸ தங் ஸீலந்தி அரஹத்தவிமுத்திங் பத்வா ஸீலங் அபரிஸேஸம்பி நிருஜ்ஜ²தி நாம, தத்த² யுத்தி வுத்தாயேவ. இதோ பரேஸு த்³வீஸு அங்கே³ஸு அனாகா³மிப²லங் விமுத்தி நாம, பஞ்சமே அரஹத்தமேவ. ஸேஸமெத்த² வுத்தனயானுஸாரேனேவ வேதி³தப்³ப³ங். ச²ட்ட²ங் உத்தானத்த²மேவ.
Pamāṇikāti puggalesu pamāṇaggāhakā. Pamiṇantīti pametuṃ tuletuṃ arahanti. Eko hīnoti eko guṇehi hīno. Paṇītoti eko guṇehi paṇīto uttamo. Taṃ hīti taṃ pamāṇakaraṇaṃ. Abhikkantataroti sundarataro. Paṇītataroti uttamataro. Dhammasoto nibbahatīti sūraṃ hutvā pavattamānaṃ vipassanāñāṇaṃ nibbahati, ariyabhūmiṃ pāpeti. Tadantaraṃko jāneyyāti taṃ evaṃ kāraṇaṃ ko jāneyya. Sīlavā hotīti lokiyasīlena sīlavā hoti. Yatthassa taṃ sīlanti arahattavimuttiṃ patvā sīlaṃ aparisesampi nirujjhati nāma, tattha yutti vuttāyeva. Ito paresu dvīsu aṅgesu anāgāmiphalaṃ vimutti nāma, pañcame arahattameva. Sesamettha vuttanayānusāreneva veditabbaṃ. Chaṭṭhaṃ uttānatthameva.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. மிக³ஸாலாஸுத்தங் • 5. Migasālāsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 5-10. மிக³ஸாலாஸுத்தாதி³வண்ணனா • 5-10. Migasālāsuttādivaṇṇanā
