| Library / Tipiṭaka / д̇ибидага • Tipiṭaka / нзд̇д̇иббагаран̣а-дийгаа • Nettippakaraṇa-ṭīkā |
миссагахаарасамбаад̇аван̣н̣анаа
Missakahārasampātavaṇṇanā
ид̣̇аани яасмаа суд̇д̇зсу хаараанам̣ яож̇анаанаяад̣̇ассанад̇д̇аа хаарасамбаад̇ад̣̇зсанаа хааравибхан̇г̇ад̣̇зсанаа вияа на хаарасаруубамад̇д̇ад̣̇ассанад̇д̇аа, д̇асмаа бздагобад̣̇зсз ааг̇ад̇анаяаанусаарзна абарзхи вибарияааязхи хаарасамбаад̇аяож̇анаавид̇хим̣ д̣̇ассзнд̇о ‘‘абижаа’’д̇иаад̣̇имааха. д̇ад̇т̇а виж̇ж̇аавиж̇ж̇ааяа гусалаагусалажид̇д̇аббавад̇д̇ияаа алобхаад̣̇осалобхад̣̇осааби барамбарабхаавзна бавад̇д̇анд̇и нид̣̇аанабхаавад̇од̇и д̣̇ассзнд̇о ‘‘ча д̇хаммаа…бз… муулааний’’д̇и ааха. яат̇аа жа нид̣̇аанабхаавзна буб̣б̣ан̇г̇амад̇аа, звам̣ ад̇д̇ано васзвад̇д̇анзнааби буб̣б̣ан̇г̇амад̇аа лаб̣бхад̇зваад̇и вуд̇д̇ам̣ ‘‘саад̇хибад̇игаанам̣ ад̇хибад̇и, саб̣б̣ажид̇д̇уббаад̣̇аанам̣ инд̣̇рияааний’’д̇и. алобхассаад̇и алобхаяуд̇д̇асса жид̇д̇уббаад̣̇асса. нзгкаммажчанд̣̇знаад̇и гусалажчанд̣̇зна. нзгкаммасад̣̇д̣̇о баб̣б̣аж̇ж̇аад̣̇ийсу нирул̣хо. вуд̇д̇ан̃хи –
Idāni yasmā suttesu hārānaṃ yojanānayadassanattā hārasampātadesanā hāravibhaṅgadesanā viya na hārasarūpamattadassanattā, tasmā peṭakopadese āgatanayānusārena aparehi vipariyāyehi hārasampātayojanāvidhiṃ dassento ‘‘apicā’’tiādimāha. Tattha vijjāvijjāya kusalākusalacittappavattiyā alobhādosalobhadosāpi paramparabhāvena pavattanti nidānabhāvatoti dassento ‘‘cha dhammā…pe… mūlānī’’ti āha. Yathā ca nidānabhāvena pubbaṅgamatā, evaṃ attano vasevattanenāpi pubbaṅgamatā labbhatevāti vuttaṃ ‘‘sādhipatikānaṃ adhipati, sabbacittuppādānaṃ indriyānī’’ti. Alobhassāti alobhayuttassa cittuppādassa. Nekkhammacchandenāti kusalacchandena. Nekkhammasaddo pabbajjādīsu niruḷho. Vuttañhi –
‘‘баб̣б̣аж̇ж̇аа батамам̣ жхаанам̣, ниб̣б̣аанан̃жа вибассанаа;
‘‘Pabbajjā paṭhamaṃ jhānaṃ, nibbānañca vipassanā;
саб̣б̣зби гусалаа д̇хаммаа, ‘нзгкамма’нд̇и бавужжарз’’д̇и. (ид̇иву. адта. 109; д̣̇ий. ни. дий. 2.359; а. ни. дий. 2.2.66) –
Sabbepi kusalā dhammā, ‘nekkhamma’nti pavuccare’’ti. (itivu. aṭṭha. 109; dī. ni. ṭī. 2.359; a. ni. ṭī. 2.2.66) –
д̇зсу ид̇ха гусалаа д̇хаммаа ад̇хиббзд̇аа. д̇зна вуд̇д̇ам̣ ‘‘гусалажчанд̣̇знаа’’д̇и. нзгкаммажчанд̣̇зна убаниссаяабхууд̇зна, на ад̇хибад̇ибхууд̇зна. ид̣̇ам̣ вуд̇д̇ам̣ ход̇и – алобхаббад̇хаано жз жид̇д̇уббаад̣̇о ход̇и, нзгкаммажчанд̣̇зна убаниссаяабхууд̇зна мано д̇асса буб̣б̣ан̇г̇амо ход̇и. сзсабад̣̇ад̣̇ваязби зсзва наяо.
Tesu idha kusalā dhammā adhippetā. Tena vuttaṃ ‘‘kusalacchandenā’’ti. Nekkhammacchandena upanissayabhūtena, na adhipatibhūtena. Idaṃ vuttaṃ hoti – alobhappadhāno ce cittuppādo hoti, nekkhammacchandena upanissayabhūtena mano tassa pubbaṅgamo hoti. Sesapadadvayepi eseva nayo.
яад̣̇аг̇г̇зна д̇зсам̣ д̇хаммаанам̣ мано буб̣б̣ан̇г̇амам̣, д̇ад̣̇аг̇г̇зна д̇зсам̣ ж̇здтам̣, бад̇хаанан̃жаад̇и вуд̇д̇ам̣ ‘‘маносздтаад̇и мано д̇зсам̣ д̇хаммаана’’нд̇иаад̣̇и. маномаяад̇аа манзна гад̇аад̣̇ибхааво, со жа манасса д̇зсам̣ сахаж̇аад̇аад̣̇инаа бажжаяабхааво зваад̇и вуд̇д̇ам̣ ‘‘маномаяаад̇и…бз… бажжаяо’’д̇и. д̇з банаад̇и зд̇т̇а бана-сад̣̇д̣̇о висзсад̇т̇ад̣̇ийбаго, д̇знзд̇ам̣ д̣̇ассзд̇и – яад̣̇иби д̇зсам̣ д̇хаммаанам̣ чанд̣̇аад̣̇аяоби бажжаяаа зва, инд̣̇рияаад̣̇ибажжаязна бана сависзсам̣ бажжаяабхууд̇асса манассзва васзнзва вуд̇д̇ам̣ ‘‘маномаяаа’’д̇и. д̇ад̇т̇а чанд̣̇асамуд̣̇аанийд̇аад̇и яат̇аавуд̇д̇анзгкаммаад̣̇ичанд̣̇зна саммаа уд̣̇д̇хамуд̣̇д̇хам̣ нийд̇аа, д̇ад̇о самуд̣̇ааг̇ад̇аад̇и ад̇т̇о. д̇ад̇о зва нзгкаммавид̇аггаад̣̇ид̇о самуббаннад̇д̇аа анаавиласан̇габбасамудтаанаа. д̇аж̇ж̇аамановин̃н̃аан̣ад̇хаад̇усампассзна сахаад̇хидтаанад̇о пассасамод̇хаанаа. ‘‘пудто, бхигкавз, взд̣̇зд̇и, пудто сан̃ж̇аанаад̇и, пудто жзд̇зд̇ий’’д̇и (сам̣. ни. 4.93) хи вуд̇д̇ам̣. ид̣̇ам̣ маногамманд̇и гааяан̇г̇аваажан̇г̇ажобанам̣ агад̇ваа сад̣̇д̇хаасаманнааг̇ад̇зна басаннзна манасаа бавад̇д̇ам̣ ид̣̇ам̣ гусалам̣ маногаммам̣. д̇ам̣ бана анабхиж̇жхаасахаг̇ад̇ам̣, аб̣яаабаад̣̇асахаг̇ад̇ам̣, саммаад̣̇идтисахаг̇ад̇анд̇и д̇ивид̇хам̣ ход̇и.
Yadaggena tesaṃ dhammānaṃ mano pubbaṅgamaṃ, tadaggena tesaṃ jeṭṭhaṃ, padhānañcāti vuttaṃ ‘‘manoseṭṭhāti mano tesaṃ dhammāna’’ntiādi. Manomayatā manena katādibhāvo, so ca manassa tesaṃ sahajātādinā paccayabhāvo evāti vuttaṃ ‘‘manomayāti…pe… paccayo’’ti. Te panāti ettha pana-saddo visesatthadīpako, tenetaṃ dasseti – yadipi tesaṃ dhammānaṃ chandādayopi paccayā eva, indriyādipaccayena pana savisesaṃ paccayabhūtassa manasseva vaseneva vuttaṃ ‘‘manomayā’’ti. Tattha chandasamudānītāti yathāvuttanekkhammādichandena sammā uddhamuddhaṃ nītā, tato samudāgatāti attho. Tato eva nekkhammavitakkādito samuppannattā anāvilasaṅkappasamuṭṭhānā. Tajjāmanoviññāṇadhātusamphassena sahādhiṭṭhānato phassasamodhānā. ‘‘Phuṭṭho, bhikkhave, vedeti, phuṭṭho sañjānāti, phuṭṭho cetetī’’ti (saṃ. ni. 4.93) hi vuttaṃ. Idaṃ manokammanti kāyaṅgavācaṅgacopanaṃ akatvā saddhāsamannāgatena pasannena manasā pavattaṃ idaṃ kusalaṃ manokammaṃ. Taṃ pana anabhijjhāsahagataṃ, abyāpādasahagataṃ, sammādiṭṭhisahagatanti tividhaṃ hoti.
бхаасад̇ийд̇и ависам̣ваад̣̇анаад̣̇инаа ваажан̇г̇ажобанаавасзна бавад̇д̇знд̇ияаа важийвин̃н̃ад̇д̇ияаа саад̇хзд̇аб̣б̣ам̣ саад̇хзд̇ийд̇и ад̇т̇о, д̇зна гааяад̣̇ваарад̇о бавад̇д̇агусалаважийгаммамби сан̇г̇ахид̇ам̣ ход̇и. д̇ат̇аа хи вагкад̇и ‘‘важийвин̃н̃ад̇д̇ивибпаарад̇о, д̇ат̇аа саад̣̇ияанад̇о жа бхаасад̇ий’’д̇и. саб̣б̣амби важийгаммам̣ сажжаад̣̇ивасзна жад̇уб̣б̣ид̇хам̣. гарод̇ийд̇и ад̇д̇ано, барзсан̃жа хид̇аахид̇аани гааран̣аагааран̣зхи гааяан̇г̇ажобанаавасзна бавад̇д̇знд̇ияаа гааяавин̃н̃ад̇д̇ияаа саад̇хзд̇аб̣б̣ам̣ саад̇хзд̇ийд̇и ад̇т̇о, д̇зна важийд̣̇ваарад̇о бавад̇д̇агусалагааяагаммамби сан̇г̇ахид̇ам̣ ход̇и. д̇ат̇аа жа вагкад̇и ‘‘гааяавин̃н̃ад̇д̇ивибпаарад̇о, д̇ат̇аа саад̣̇ияанад̇о жа гарод̇ий’’д̇и (нзд̇д̇и. адта. 76 миссагахаарасамбаад̇аван̣н̣анаа). гаммабат̇авасзна г̇аяхамаанз баан̣аад̇ибаад̇аад̣̇ивасзна д̇ам̣ д̇ивид̇хам̣ ход̇и. д̇знааха ‘‘ид̇и д̣̇асагусалагаммабат̇аад̣̇ассид̇аа’’д̇и. д̣̇асабун̃н̃агирияавад̇т̇увасзнааби г̇аат̇ааяа ад̇т̇о яуж̇ж̇ад̇и. д̇ат̇аа хи вагкад̇и ‘‘со басаннажид̇д̇о’’д̇иаад̣̇и. бхаасад̇и ваа гарод̇и ваа гзвалам̣ манасаа бавад̇д̇ад̇ийд̇и анияамад̇т̇о ваа-сад̣̇д̣̇о. д̇ат̇аа жзва сам̣ван̣н̣ид̇ам̣.
Bhāsatīti avisaṃvādanādinā vācaṅgacopanāvasena pavattentiyā vacīviññattiyā sādhetabbaṃ sādhetīti attho, tena kāyadvārato pavattakusalavacīkammampi saṅgahitaṃ hoti. Tathā hi vakkhati ‘‘vacīviññattivipphārato, tathā sādiyanato ca bhāsatī’’ti. Sabbampi vacīkammaṃ saccādivasena catubbidhaṃ. Karotīti attano, paresañca hitāhitāni kāraṇākāraṇehi kāyaṅgacopanāvasena pavattentiyā kāyaviññattiyā sādhetabbaṃ sādhetīti attho, tena vacīdvārato pavattakusalakāyakammampi saṅgahitaṃ hoti. Tathā ca vakkhati ‘‘kāyaviññattivipphārato, tathā sādiyanato ca karotī’’ti (netti. aṭṭha. 76 missakahārasampātavaṇṇanā). Kammapathavasena gayhamāne pāṇātipātādivasena taṃ tividhaṃ hoti. Tenāha ‘‘iti dasakusalakammapathādassitā’’ti. Dasapuññakiriyavatthuvasenāpi gāthāya attho yujjati. Tathā hi vakkhati ‘‘so pasannacitto’’tiādi. Bhāsati vā karoti vā kevalaṃ manasā pavattatīti aniyamattho vā-saddo. Tathā ceva saṃvaṇṇitaṃ.
д̣̇асавид̇хасса гусалагаммассаад̇и д̣̇асавид̇хасса гусалагаммабат̇агаммасса, вагкамаананаязна ваа д̣̇асабун̃н̃агирияавад̇т̇усан̇каад̇асса гусалагаммасса. нану д̇ад̇т̇а д̣̇аанаад̣̇имаяам̣ д̇ивид̇хамзва бун̃н̃агирияавад̇т̇у вуд̇д̇анд̇и? сажжам̣, д̇ам̣ бана ид̇арзсам̣ д̇ад̣̇анд̇ог̇ад̇хад̇д̇аа.
Dasavidhassa kusalakammassāti dasavidhassa kusalakammapathakammassa, vakkhamānanayena vā dasapuññakiriyavatthusaṅkhātassa kusalakammassa. Nanu tattha dānādimayaṃ tividhameva puññakiriyavatthu vuttanti? Saccaṃ, taṃ pana itaresaṃ tadantogadhattā.
‘‘сукаманвзд̇ий’’д̇и сан̇кзбзна вуд̇д̇ам̣ сукаануг̇амам̣ вид̇т̇аарзна д̣̇ассзнд̇о ‘‘ид̇хассу бурисо’’д̇иаад̣̇имааха. д̇ад̇т̇а звам̣ санд̇анд̇и звам̣ бхууд̇ам̣, аббахийнаанусаяо худ̇ваа сукавзд̣̇анийяапассасамбхууд̇анд̇и ад̇т̇о.
‘‘Sukhamanvetī’’ti saṅkhepena vuttaṃ sukhānugamaṃ vitthārena dassento ‘‘idhassu puriso’’tiādimāha. Tattha evaṃ santanti evaṃ bhūtaṃ, appahīnānusayo hutvā sukhavedanīyaphassasambhūtanti attho.
д̇ад̇т̇а ‘‘яам̣ мано’’д̇иаад̣̇инаа г̇аат̇аад̇т̇авасзна жад̇усажжам̣ нид̣̇д̇хаарзд̇и. аад̣̇ид̇о вавад̇т̇аабид̇зсу канд̇хаад̣̇ийсу канд̇хамукзна сажжаанам̣ гат̇ид̇ад̇д̇аа сад̇д̇аанам̣ бхиннаружибхаавад̇о наанаанаязхи вибассанаабхуумигосаллад̇т̇ам̣, буб̣б̣аабарасамб̣анд̇хад̣̇ассанад̇т̇ан̃жа звам̣ вуд̇д̇ам̣ ‘‘звам̣…бз… нид̣̇д̇хаарзд̇аб̣б̣ааний’’д̇и. сажжамукзна ассаад̣̇аад̣̇игз нид̣̇д̇хаарзд̇ваа д̣̇зсанаахаарасамбаад̇ам̣ яож̇зд̇ум̣ ‘‘д̇ад̇т̇а самуд̣̇аязнаа’’д̇иаад̣̇имааха, д̇ам̣ вуд̇д̇анаяамзва. яан̃хзд̇т̇а ан̃н̃амби ад̇т̇ад̇о на вибхад̇д̇ам̣, д̇ам̣ хздтаа вуд̇д̇анаяад̇д̇аа, уд̇д̇аанад̇т̇ад̇д̇аа жаад̇и взд̣̇ид̇аб̣б̣ам̣.
Tattha ‘‘yaṃ mano’’tiādinā gāthātthavasena catusaccaṃ niddhāreti. Ādito vavatthāpitesu khandhādīsu khandhamukhena saccānaṃ kathitattā sattānaṃ bhinnarucibhāvato nānānayehi vipassanābhūmikosallatthaṃ, pubbāparasambandhadassanatthañca evaṃ vuttaṃ ‘‘evaṃ…pe… niddhāretabbānī’’ti. Saccamukhena assādādike niddhāretvā desanāhārasampātaṃ yojetuṃ ‘‘tattha samudayenā’’tiādimāha, taṃ vuttanayameva. Yañhettha aññampi atthato na vibhattaṃ, taṃ heṭṭhā vuttanayattā, uttānatthattā cāti veditabbaṃ.
мананалагкан̣зд̇и мананалагкан̣ахзд̇у. ‘‘мананалагкан̣знаа’’д̇и ваа баато. ийхаабхаавад̇о б̣яаабаараабхаавад̇о. язна басаад̣̇зна саманнааг̇ад̇ад̇д̇аа мано ‘‘басанно’’д̇и вуд̇д̇о, д̇асса басаад̣̇асса гижжам̣ манз ааробзд̇ваа ааха ‘‘агаалусияад̇о, аарамман̣асса огаббанад̇о жа басаннзнаа’’д̇и. д̇ат̇аа саад̣̇ияанад̇од̇и ваажааяа вад̇д̇аб̣б̣ам̣ авад̇ваава пассасаад̣̇ияанад̇о ануж̇аанад̇о. д̣̇уд̇ияз д̇ат̇аа саад̣̇ияанад̇од̇и гааязна гаад̇аб̣б̣ам̣ яат̇аа гад̇ам̣ ход̇и, д̇ат̇аа ваажааяа сам̣вид̇хаанад̇о. д̇ат̇аа басуд̇ад̇д̇аад̇и яат̇аа сукаманвзд̇и, д̇ат̇аа убажид̇ад̇д̇аа зваад̇и ад̇т̇о. д̇ад̇од̇и д̇ад̇о гааран̣аа, манасаа басаннзна, бхаасанзна, гаран̣зна жа хзд̇унаад̇и вуд̇д̇ам̣ ход̇и. анан̃н̃ад̇т̇аад̇и зд̇асмим̣ бана ад̇т̇з. д̇ад̇од̇и д̇ад̇о зва. яо хи басаннамано д̇зна яам̣ бхаасанам̣, гаран̣ан̃жа, д̇ад̇о зва нам̣ сукаманвзд̇ийд̇и вуд̇д̇ам̣ ход̇и. саад̇абхаавад̇од̇и саад̇авзд̣̇анаабхаавад̇о. идтабхаавад̇од̇и манаабабхаавад̇о. гаммад̇о вибаагуббад̇д̇ипалад̣̇аанасамад̇т̇абхаавзна гаммасса ниб̣б̣ад̇д̇ад̇д̇аа вибаагассзва аниб̣б̣ад̇д̇ад̇д̇аад̇и ааха ‘‘гад̇уу…бз… анвзд̇ийд̇и вуд̇д̇а’’нд̇и гааран̣ааяад̇д̇а вуд̇д̇ид̇од̇и гад̇абхаавахзд̇угад̇д̇аа гаммассаад̇и ад̇хиббааяо. асан̇ганд̇ид̇од̇и яасмим̣ санд̇аанз гаммам̣ ниб̣б̣ад̇д̇ам̣, д̇ад̣̇ан̃н̃асанд̇аанаа сан̇гаманад̇о.
Mananalakkhaṇeti mananalakkhaṇahetu. ‘‘Mananalakkhaṇenā’’ti vā pāṭho. Īhābhāvato byāpārābhāvato. Yena pasādena samannāgatattā mano ‘‘pasanno’’ti vutto, tassa pasādassa kiccaṃ mane āropetvā āha ‘‘akālusiyato, ārammaṇassa okappanato ca pasannenā’’ti. Tathā sādiyanatoti vācāya vattabbaṃ avatvāva phassasādiyanato anujānato. Dutiye tathā sādiyanatoti kāyena kātabbaṃ yathā kataṃ hoti, tathā vācāya saṃvidhānato. Tathā pasutattāti yathā sukhamanveti, tathā upacitattā evāti attho. Tatoti tato kāraṇā, manasā pasannena, bhāsanena, karaṇena ca hetunāti vuttaṃ hoti. Anaññatthāti etasmiṃ pana atthe. Tatoti tato eva. Yo hi pasannamano tena yaṃ bhāsanaṃ, karaṇañca, tato eva naṃ sukhamanvetīti vuttaṃ hoti. Sātabhāvatoti sātavedanābhāvato. Iṭṭhabhāvatoti manāpabhāvato. Kammato vipākuppattiphaladānasamatthabhāvena kammassa nibbattattā vipākasseva anibbattattāti āha ‘‘katū…pe… anvetīti vutta’’nti kāraṇāyatta vuttitoti katabhāvahetukattā kammassāti adhippāyo. Asaṅkantitoti yasmiṃ santāne kammaṃ nibbattaṃ, tadaññasantānā saṅkamanato.
аад̇хибажжаяог̇ад̇од̇и сахаж̇аад̇аад̇хибад̇ивасзна аад̇хибажжаяуд̇д̇ад̇д̇аа. сахаж̇аад̇ад̇хаммаанан̃хи д̇ам̣самбаяуд̇д̇асса манасса васзна буб̣б̣ан̇г̇амад̇аа ид̇хаад̇хиббзд̇аа. д̇ад̇о зваад̇и аад̇хибажжаяог̇ад̇о зва. манассаад̇и убаяог̇ад̇т̇з саамиважанам̣. д̇зсам̣ д̇хаммаананд̇и самб̣анд̇хо. гусалабхааво яуж̇ж̇ад̇и басаад̣̇асса яонисоманасигаарахзд̇угад̇д̇аа . нану вибхаж̇ж̇аб̣яаагаран̣зсу д̇зсам̣ саавагаанам̣ сад̣̇д̇хаа уббаж̇ж̇ад̇ийд̇и? нааяам̣ сад̣̇д̇хаа, д̇ад̣̇аагаараа бана агусалаа д̇хаммаа д̇ат̇аа вужжанд̇ийд̇и взд̣̇ид̇аб̣б̣ам̣. д̇ат̇аа хи вагкад̇и ‘‘нааяам̣ басаад̣̇о’’д̇иаад̣̇и (нзд̇д̇и. адта. 76 миссагахаарасамбаад̇аван̣н̣анаа). сукам̣ анвзд̇ийд̇и яуж̇ж̇ад̇и гаммасса палад̣̇аанз самад̇т̇абхаавад̇о. яат̇аа хи гад̇ам̣ гаммам̣ палад̣̇аанасамад̇т̇ам̣ ход̇и, д̇ат̇аа гад̇ам̣ убажид̇анд̇и вужжад̇ийд̇и.
Ādhipaccayogatoti sahajātādhipativasena ādhipaccayuttattā. Sahajātadhammānañhi taṃsampayuttassa manassa vasena pubbaṅgamatā idhādhippetā. Tato evāti ādhipaccayogato eva. Manassāti upayogatthe sāmivacanaṃ. Tesaṃ dhammānanti sambandho. Kusalabhāvo yujjati pasādassa yonisomanasikārahetukattā . Nanu vibhajjabyākaraṇesu tesaṃ sāvakānaṃ saddhā uppajjatīti? Nāyaṃ saddhā, tadākārā pana akusalā dhammā tathā vuccantīti veditabbaṃ. Tathā hi vakkhati ‘‘nāyaṃ pasādo’’tiādi (netti. aṭṭha. 76 missakahārasampātavaṇṇanā). Sukhaṃ anvetīti yujjati kammassa phaladāne samatthabhāvato. Yathā hi kataṃ kammaṃ phaladānasamatthaṃ hoti, tathā kataṃ upacitanti vuccatīti.
манобавижаараа ид̇ха нзгкаммасид̇аа соманассуубавижаараа, убзгкуубавижаараа жа взд̣̇ид̇аб̣б̣аа гусалаад̇хигаарад̇д̇аа. д̇з бана яасмаа жид̇д̇ам̣ ниссааязва бавад̇д̇анд̇и, нааниссааяа, д̇асмаа вуд̇д̇ам̣ ‘‘мано манобавижаараанам̣ бад̣̇адтаана’’нд̇и. гусалабагкасса бад̣̇адтаананд̇и зд̇т̇а гусало д̇аава пассо гусаласса взд̣̇анаагканд̇хасса сан̃н̃аагканд̇хасса сан̇каарагканд̇хасса сахаж̇аад̇аад̣̇инаа бажжаяо ход̇и. ‘‘пудто, бхигкавз, взд̣̇зд̇и, пудто сан̃ж̇аанаад̇и, пудто жзд̇зд̇ий’’д̇и (сам̣. ни. 4.93) вуд̇д̇ам̣. звам̣ взд̣̇анаад̣̇ийнамби взд̣̇ид̇аб̣б̣ам̣. сад̣̇д̇хаад̣̇ийнамби бажжаяабхаавз вад̇д̇аб̣б̣амзва над̇т̇и. саб̣б̣ассаад̇и жад̇убхуумагасса. гаамааважараа хи гусалаа д̇хаммаа яат̇аарахам̣ жад̇убхуумагассааби гусаласса бажжаяаа хонд̇и, звам̣ ид̇арабхуумагааби.
Manopavicārā idha nekkhammasitā somanassūpavicārā, upekkhūpavicārā ca veditabbā kusalādhikārattā. Te pana yasmā cittaṃ nissāyeva pavattanti, nānissāya, tasmā vuttaṃ ‘‘mano manopavicārānaṃ padaṭṭhāna’’nti. Kusalapakkhassa padaṭṭhānanti ettha kusalo tāva phasso kusalassa vedanākkhandhassa saññākkhandhassa saṅkhārakkhandhassa sahajātādinā paccayo hoti. ‘‘Phuṭṭho, bhikkhave, vedeti, phuṭṭho sañjānāti, phuṭṭho cetetī’’ti (saṃ. ni. 4.93) vuttaṃ. Evaṃ vedanādīnampi veditabbaṃ. Saddhādīnampi paccayabhāve vattabbameva natthi. Sabbassāti catubhūmakassa. Kāmāvacarā hi kusalā dhammā yathārahaṃ catubhūmakassāpi kusalassa paccayā honti, evaṃ itarabhūmakāpi.
‘‘басаннзна манасаа бхаасад̇ий’’д̇и вуд̇д̇ад̇д̇аа висзсад̇о саммааваажаабажжаяам̣ бхаасанам̣ ид̇хаад̇хиббзд̇анд̇и вуд̇д̇ам̣ ‘‘бхаасад̇ийд̇и саммааваажаа’’д̇и. д̇ад̇т̇ааяамад̇хиббааяо ‘‘бхаасад̇ийд̇и яамид̣̇ам̣ бад̣̇ам̣, иминаа саммааваажаа г̇ахид̇аа ход̇ий’’д̇и. гарод̇ийд̇и саммаагамманд̇од̇и зд̇т̇ааби зсзва наяо. субарисуд̣̇д̇хз гааяаважийгаммз тид̇асса ааж̇ийвабаарисуд̣̇д̇хи, на ид̇арассаад̇и вуд̇д̇ам̣ ‘‘д̇з саммааааж̇ийвасса бад̣̇адтаана’’нд̇и. д̇ад̇т̇а д̇зд̇и саммааваажаагамманд̇аа. яасмаа бана ааж̇ийвадтамагз сийлз бад̇идтид̇асса уббаннаануббаннаанам̣ агусалад̇хаммаанам̣ бахаанаануббаад̣̇анаани, ануббаннуббаннаанам̣ гусалад̇хаммаанам̣ уббаад̣̇анабаарибуурияаа жа самбхаванд̇и, д̇ат̇аа саммаавааяаамз тид̇ассзва гааяаад̣̇ийсу субхасан̃н̃аад̣̇ивид̣̇д̇хам̣синий саммаасад̇и самбхавад̇и, д̇асмаа вуд̇д̇ам̣ ‘‘саммааааж̇ийво…бз…бад̣̇адтаана’’нд̇и. ж̇здтагасийлам̣ баад̇имогкасам̣варо, сад̣̇д̇хаасаад̇хано жа сод̇и ааха ‘‘д̇ам̣ сийласса бад̣̇адтаана’’нд̇и.
‘‘Pasannena manasā bhāsatī’’ti vuttattā visesato sammāvācāpaccayaṃ bhāsanaṃ idhādhippetanti vuttaṃ ‘‘bhāsatīti sammāvācā’’ti. Tatthāyamadhippāyo ‘‘bhāsatīti yamidaṃ padaṃ, iminā sammāvācā gahitā hotī’’ti. Karotīti sammākammantoti etthāpi eseva nayo. Suparisuddhe kāyavacīkamme ṭhitassa ājīvapārisuddhi, na itarassāti vuttaṃ ‘‘te sammāājīvassa padaṭṭhāna’’nti. Tattha teti sammāvācākammantā. Yasmā pana ājīvaṭṭhamake sīle patiṭṭhitassa uppannānuppannānaṃ akusaladhammānaṃ pahānānuppādanāni, anuppannuppannānaṃ kusaladhammānaṃ uppādanapāripūriyā ca sambhavanti, tathā sammāvāyāme ṭhitasseva kāyādīsu subhasaññādividdhaṃsinī sammāsati sambhavati, tasmā vuttaṃ ‘‘sammāājīvo…pe…padaṭṭhāna’’nti. Jeṭṭhakasīlaṃ pātimokkhasaṃvaro, saddhāsādhano ca soti āha ‘‘taṃ sīlassa padaṭṭhāna’’nti.
д̇зсанд̇и гааяаважийгаммаанам̣. гаммабажжаяад̇ааяаад̇и гусалагаммахзд̇угад̇ааяа.
Tesanti kāyavacīkammānaṃ. Kammapaccayatāyāti kusalakammahetukatāya.
бад̣̇ад̇т̇о жа вуд̇д̇анаязнаад̇и ‘‘мананад̇о аарамман̣авиж̇аананад̇о’’д̇иаад̣̇инаа.
Padattho ca vuttanayenāti ‘‘mananato ārammaṇavijānanato’’tiādinā.
аяам̣ ааваддод̇и аяам̣ сабхааг̇ависабхааг̇ад̇хаммаавадданавасзна ааваддо. зд̇т̇а хи гусаламууласаммад̇д̇амаг̇г̇аад̣̇инид̣̇д̇хааран̣аа сабхааг̇ад̇хаммаавадданаа. авиж̇ж̇аабхавад̇ан̣хаанам̣ нид̣̇д̇хааран̣аа висабхааг̇ад̇хаммаавадданаа.
Ayaṃāvaṭṭoti ayaṃ sabhāgavisabhāgadhammāvaṭṭanavasena āvaṭṭo. Ettha hi kusalamūlasammattamaggādiniddhāraṇā sabhāgadhammāvaṭṭanā. Avijjābhavataṇhānaṃ niddhāraṇā visabhāgadhammāvaṭṭanā.
вибхад̇д̇ихаарз бад̣̇адтаанабхуумивибхааг̇аа вуд̇д̇анаяаа, сувин̃н̃зяяаа жаад̇и д̇хаммавибхааг̇амзва д̣̇ассзнд̇о ‘‘наяид̣̇а’’нд̇иаад̣̇имааха. д̇ад̇т̇а ‘‘наяид̣̇ам̣ яат̇ааруд̇авасзна г̇ахзд̇аб̣б̣а’’нд̇и суд̇д̇асса нзяяад̇т̇ад̇ам̣ вад̇ваа ‘‘яохий’’д̇иаад̣̇инаа д̇ам̣ виварад̇и. ‘‘д̣̇угкамзва анвзд̇ий’’д̇и гасмаа вуд̇д̇ам̣, нану яад̇т̇а гад̇т̇ажи хид̇зсид̇аа гусаламзваад̇и? наяид̣̇амийд̣̇исам̣ санд̇хааяа вуд̇д̇ам̣, ад̇хаммам̣ бана д̇хаммод̇и, д̇хамман̃жа бана ад̇хаммод̇и д̣̇ийбанзна логасса саб̣б̣аанад̇т̇аб̣ийж̇абхууд̇зсу сагалахид̇асукубааяабадигкзбагзсу д̇ид̇т̇агарзсу асанд̇аг̇ун̣асамбхааванавасзна бавад̇д̇амижчаад̇химогкам̣ санд̇хааяа вуд̇д̇ам̣. яо хи логз аббамад̇д̇агамби бун̃н̃ам̣ гаад̇угаамам̣ баабигам̣ д̣̇идтим̣ ниссааяа бадиб̣аахад̇и, соби г̇аараяхо, гиман̇г̇ам̣ бана арияавинаяз саммаабадибад̇д̇им̣ бадиб̣ааханд̇зсууд̇и д̣̇угкапалаава д̇ад̇т̇а самбхааванаабасам̣саа баяирубаасанаа. д̇ат̇аа хи вуд̇д̇ам̣ – ‘‘на ко ахам̣, могхабуриса, арахад̇д̇асса мажчарааяаами, абижа д̇уяхзвзд̇ам̣ баабагам̣ д̣̇идтиг̇ад̇ам̣…бз… д̣̇ийгхарад̇д̇ам̣ ахид̇ааяа д̣̇угкааяа сам̣вад̇д̇ад̇ий’’д̇и (д̣̇ий. ни. 3.7), ‘‘яо нинд̣̇ияам̣ басам̣сад̇и (су. ни. 663; сам̣. ни. 1.180, 181; а. ни. 4.3; нзд̇д̇и. 92), саб̣б̣ассааби анад̇т̇асса муулам̣ б̣аалуубасзванаа’’д̇и жа.
Vibhattihāre padaṭṭhānabhūmivibhāgā vuttanayā, suviññeyyā cāti dhammavibhāgameva dassento ‘‘nayida’’ntiādimāha. Tattha ‘‘nayidaṃ yathārutavasena gahetabba’’nti suttassa neyyatthataṃ vatvā ‘‘yohī’’tiādinā taṃ vivarati. ‘‘Dukkhameva anvetī’’ti kasmā vuttaṃ, nanu yattha katthaci hitesitā kusalamevāti? Nayidamīdisaṃ sandhāya vuttaṃ, adhammaṃ pana dhammoti, dhammañca pana adhammoti dīpanena lokassa sabbānatthabījabhūtesu sakalahitasukhupāyapaṭikkhepakesu titthakaresu asantaguṇasambhāvanavasena pavattamicchādhimokkhaṃ sandhāya vuttaṃ. Yo hi loke appamattakampi puññaṃ kātukāmaṃ pāpikaṃ diṭṭhiṃ nissāya paṭibāhati, sopi gārayho, kimaṅgaṃ pana ariyavinaye sammāpaṭipattiṃ paṭibāhantesūti dukkhaphalāva tattha sambhāvanāpasaṃsā payirupāsanā. Tathā hi vuttaṃ – ‘‘na kho ahaṃ, moghapurisa, arahattassa maccharāyāmi, apica tuyhevetaṃ pāpakaṃ diṭṭhigataṃ…pe… dīgharattaṃ ahitāya dukkhāya saṃvattatī’’ti (dī. ni. 3.7), ‘‘yo nindiyaṃ pasaṃsati (su. ni. 663; saṃ. ni. 1.180, 181; a. ni. 4.3; netti. 92), sabbassāpi anatthassa mūlaṃ bālūpasevanā’’ti ca.
ид̣̇ан̃хи суд̇д̇анд̇и ‘‘манобуб̣б̣ан̇г̇амаа…бз…бад̣̇а’’нд̇и (д̇ха. ба. 1, 2) батамам̣ г̇аат̇ам̣ санд̇хааяа вад̣̇ад̇и. зд̇ассаад̇и сам̣ван̣н̣ияамаанасуд̇д̇асса.
Idañhi suttanti ‘‘manopubbaṅgamā…pe…pada’’nti (dha. pa. 1, 2) paṭhamaṃ gāthaṃ sandhāya vadati. Etassāti saṃvaṇṇiyamānasuttassa.
гижжабан̃н̃ад̇д̇ийд̇и ад̇хибад̇ибажжаяасан̇каад̇асса гижжасса бан̃н̃аабанам̣. бад̇хаанабан̃н̃ад̇д̇ийд̇и бад̇хаанабхаавасса бан̃н̃аабанаа. сахаж̇аад̇абан̃н̃ад̇д̇ийд̇и д̇зсам̣ д̇хаммаанам̣ манасаа сахабхаавабан̃н̃аабанаа.
Kiccapaññattīti adhipatipaccayasaṅkhātassa kiccassa paññāpanaṃ. Padhānapaññattīti padhānabhāvassa paññāpanā. Sahajātapaññattīti tesaṃ dhammānaṃ manasā sahabhāvapaññāpanā.
махаабхууд̇аад̇ийд̇и ид̇исад̣̇д̣̇о аад̣̇иад̇т̇о, д̇зна махаабхууд̇аавинаабхаавий саб̣б̣о руубад̇хаммо сан̇г̇аяхад̇и.
Mahābhūtātīti itisaddo ādiattho, tena mahābhūtāvinābhāvī sabbo rūpadhammo saṅgayhati.
‘‘манобуб̣б̣ан̇г̇амаа’’д̇и самаасабад̣̇з ‘‘мано’’д̇и бад̣̇ам̣ д̇ад̣̇аваяавамад̇д̇анд̇и ааха ‘‘нзва бад̣̇асуд̣̇д̇хий’’д̇и. д̇знзвааха ‘‘манобуб̣б̣ан̇г̇амаад̇и бад̣̇асуд̣̇д̇хий’’д̇и. ‘‘чааяаава анабааяиний’’д̇и ид̣̇ам̣ сукаануг̇амасса уд̣̇аахаран̣амад̇д̇ам̣, на яат̇аад̇хиббзд̇ад̇т̇абарисамаабанам̣. ‘‘сукаманвзд̇ий’’д̇и бана яат̇аад̇хиббзд̇ад̇т̇абарисамаабананд̇и вуд̇д̇ам̣ ‘‘бад̣̇асуд̣̇д̇хи жзва аарамбхасуд̣̇д̇хи жаа’’д̇и.
‘‘Manopubbaṅgamā’’ti samāsapade ‘‘mano’’ti padaṃ tadavayavamattanti āha ‘‘neva padasuddhī’’ti. Tenevāha ‘‘manopubbaṅgamāti padasuddhī’’ti. ‘‘Chāyāva anapāyinī’’ti idaṃ sukhānugamassa udāharaṇamattaṃ, na yathādhippetatthaparisamāpanaṃ. ‘‘Sukhamanvetī’’ti pana yathādhippetatthaparisamāpananti vuttaṃ ‘‘padasuddhi ceva ārambhasuddhi cā’’ti.
згад̇д̇ад̇аад̇и манобуб̣б̣ан̇г̇амаад̣̇исааман̃н̃ам̣ санд̇хааяа вад̣̇ад̇и. звам̣ сзсзсуби. взмад̇д̇ад̇аа ‘‘манобуб̣б̣ан̇г̇амаа’’д̇иаад̣̇инаа сааман̃н̃ад̇о вуд̇д̇ад̇хаммз басаад̣̇о д̇хааран̣ааяа нивад̇д̇зд̇ваа басаннасан̇каад̇з висзсз авадтаабанад̇о. сзсзсуби зсзва наяо. басаад̣̇о синзхасабхааво, ассад̣̇д̇хияам̣ вияа луукасабхаавам̣ д̣̇осам̣ винод̣̇зд̇ийд̇и ааха ‘‘б̣яаабаад̣̇авигкамбханад̇о’’д̇и. б̣ахид̣̇д̇хаад̇и сад̣̇д̇хзяяавад̇т̇ум̣ санд̇хааяааха. огаббанад̇од̇и аарамман̣ам̣ анубависид̇ваа анубагканд̣̇ид̇ваа сад̣̇д̣̇аханад̇о.
Ekattatāti manopubbaṅgamādisāmaññaṃ sandhāya vadati. Evaṃ sesesupi. Vemattatā ‘‘manopubbaṅgamā’’tiādinā sāmaññato vuttadhamme pasādo dhāraṇāya nivattetvā pasannasaṅkhāte visese avaṭṭhāpanato. Sesesupi eseva nayo. Pasādo sinehasabhāvo, assaddhiyaṃ viya lūkhasabhāvaṃ dosaṃ vinodetīti āha ‘‘byāpādavikkhambhanato’’ti. Bahiddhāti saddheyyavatthuṃ sandhāyāha. Okappanatoti ārammaṇaṃ anupavisitvā anupakkhanditvā saddahanato.
д̣̇зяяад̇хаммаад̣̇аяод̇и зд̇т̇а аад̣̇исад̣̇д̣̇зна сам̣взг̇ахирод̇д̇аббагасин̣аман̣д̣алаад̣̇аяо сан̇г̇аяханд̇и. идтаарамман̣аад̣̇аяод̇и аад̣̇исад̣̇д̣̇зна идтамаж̇жхад̇д̇аарамман̣аа, д̣̇ваарад̇хаммаа, манасигаарод̇и звамаад̣̇ийнам̣ сан̇г̇ахо д̣̇адтаб̣б̣о. д̇ат̇аа пассод̇и яат̇аа взд̣̇анаад̣̇ийнам̣ идтаарамман̣аад̣̇аяо бажжаяо, звам̣ пассобийд̇и бажжаяад̇аасааман̃н̃амзва убасам̣харад̇и д̇ат̇аа-сад̣̇д̣̇о. взд̣̇анаад̣̇ийнанд̇и хи взд̣̇анаад̣̇аяо д̇аяо канд̇хаа г̇ахид̇аа. вин̃н̃аан̣асса взд̣̇анаад̣̇аяод̇и наамаруубам̣ санд̇хааяа вад̣̇ад̇и.
Deyyadhammādayoti ettha ādisaddena saṃvegahirottappakasiṇamaṇḍalādayo saṅgayhanti. Iṭṭhārammaṇādayoti ādisaddena iṭṭhamajjhattārammaṇā, dvāradhammā, manasikāroti evamādīnaṃ saṅgaho daṭṭhabbo. Tathā phassoti yathā vedanādīnaṃ iṭṭhārammaṇādayo paccayo, evaṃ phassopīti paccayatāsāmaññameva upasaṃharati tathā-saddo. Vedanādīnanti hi vedanādayo tayo khandhā gahitā. Viññāṇassa vedanādayoti nāmarūpaṃ sandhāya vadati.
‘‘сийламаяасса ад̣̇осо бад̣̇адтаана’’нд̇и вуд̇д̇ам̣ канд̇ибад̇хаанад̇д̇аа сийласса. ад̇хидтаад̇ийд̇и ануяун̃ж̇ад̇и уббаад̣̇зд̇и. сод̇и звам̣ гусалажид̇д̇ам̣ бхаавзнд̇о. ‘‘ануббаннаана’’нд̇иаад̣̇инаа бхааванаабахаанасамааробанаани д̣̇ассзнд̇о ниб̣б̣зд̇хабхааг̇ияавасзна г̇аат̇ааяа ад̇т̇ам̣ вижинид̇ваа самааробзд̇и, звамби саггаа яож̇зд̇унд̇и ваасанаабхааг̇ияавасзна бад̣̇адтаананид̣̇д̣̇зсз уд̣̇аахарийяад̇и.
‘‘Sīlamayassa adoso padaṭṭhāna’’nti vuttaṃ khantipadhānattā sīlassa. Adhiṭṭhātīti anuyuñjati uppādeti. Soti evaṃ kusalacittaṃ bhāvento. ‘‘Anuppannāna’’ntiādinā bhāvanāpahānasamāropanāni dassento nibbedhabhāgiyavasena gāthāya atthaṃ vicinitvā samāropeti, evampi sakkā yojetunti vāsanābhāgiyavasena padaṭṭhānaniddese udāharīyati.
звам̣ ‘‘манобуб̣б̣ан̇г̇амаа д̇хаммаа’’д̇и г̇аат̇ааяа васзна хаарасамбаад̇аяож̇анаавид̇хим̣ д̣̇ассзд̇ваа ид̣̇аани г̇аат̇аанд̇арзна д̣̇ассзд̇ум̣ ‘‘д̇ат̇аа д̣̇ад̣̇ад̇о бун̃н̃а’’нд̇иаад̣̇имааха. д̇ад̇т̇а бхааванаамаяанд̇и бан̃н̃аабхааванаамаяам̣.
Evaṃ ‘‘manopubbaṅgamā dhammā’’ti gāthāya vasena hārasampātayojanāvidhiṃ dassetvā idāni gāthāntarena dassetuṃ ‘‘tathā dadato puñña’’ntiādimāha. Tattha bhāvanāmayanti paññābhāvanāmayaṃ.
‘‘алобхо гусаламуула’’нд̇иаад̣̇и д̣̇аанаад̣̇ийнам̣ алобхаад̣̇ибад̇хаанад̇д̇аа вуд̇д̇ам̣, саб̣б̣ад̇т̇а жа ‘‘вуд̇д̇а’’нд̇и бад̣̇ам̣ аанзд̇ваа яож̇зд̇аб̣б̣ам̣. д̇зсанд̇и рааг̇аад̣̇ийнам̣. ниссаран̣анд̇и жа бариниб̣б̣аанамзва санд̇хааяа вад̣̇ад̇и.
‘‘Alobho kusalamūla’’ntiādi dānādīnaṃ alobhādipadhānattā vuttaṃ, sabbattha ca ‘‘vutta’’nti padaṃ ānetvā yojetabbaṃ. Tesanti rāgādīnaṃ. Nissaraṇanti ca parinibbānameva sandhāya vadati.
барижжааг̇асийло алобхаж̇жхаасаяо гаамзсу аад̣̇ийнавад̣̇ассаавий саммад̣̇зва сийлам̣ барибуурзд̇ийд̇и ааха ‘‘д̣̇ад̣̇ад̇о…бз… бад̣̇адтаана’’нд̇и. ид̇ха ол̣ааригаа наама гилзсаа вийд̇иггамаавад̇т̇аанам̣, д̇аббахаанам̣ д̇ад̣̇ан̇г̇аббахаанзна взд̣̇ид̇аб̣б̣ам̣. маж̇жхимаананд̇и барияудтаанаавад̇т̇аанам̣. сукумаананд̇и анусаяаавад̇т̇аанам̣. гад̇аавийбхууми нд̇и кийн̣аасавабхуумим̣.
Pariccāgasīlo alobhajjhāsayo kāmesu ādīnavadassāvī sammadeva sīlaṃ paripūretīti āha ‘‘dadato…pe… padaṭṭhāna’’nti. Idha oḷārikā nāma kilesā vītikkamāvatthānaṃ, tappahānaṃ tadaṅgappahānena veditabbaṃ. Majjhimānanti pariyuṭṭhānāvatthānaṃ. Sukhumānanti anusayāvatthānaṃ. Katāvībhūmi nti khīṇāsavabhūmiṃ.
д̣̇ад̣̇ад̇од̇и маг̇г̇асахаг̇ад̇зна алобхзна сад̣̇звагасса логасса абхаяад̣̇аанам̣ д̣̇ад̣̇ад̇о. бун̃н̃анд̇и логуд̇д̇арагусалам̣. сам̣яамад̇од̇и маг̇г̇абарияаабаннзхи саммааваажаагамманд̇ааж̇ийвзхи д̣̇идтзгадтаад̣̇исам̣гилзсад̇о маг̇г̇асам̣яамзна сам̣яаманд̇асса. взранд̇и баан̣аад̇ибаад̇аад̣̇ибаабам̣. гусалод̇и маг̇г̇асаммаад̣̇идтияаа гусало вижагкан̣о. ж̇ахаад̇и баабаганд̇и д̇зхи д̇зхи маг̇г̇зхи д̇ам̣ д̇ам̣ бахаад̇аб̣б̣ам̣ баабад̇хаммам̣ од̇хисо ж̇ахаад̇и самужчинд̣̇ад̇и. д̇знааха ‘‘маг̇г̇о вуд̇д̇о’’д̇и.
Dadatoti maggasahagatena alobhena sadevakassa lokassa abhayadānaṃ dadato. Puññanti lokuttarakusalaṃ. Saṃyamatoti maggapariyāpannehi sammāvācākammantājīvehi diṭṭhekaṭṭhādisaṃkilesato maggasaṃyamena saṃyamantassa. Veranti pāṇātipātādipāpaṃ. Kusaloti maggasammādiṭṭhiyā kusalo vicakkhaṇo. Jahāti pāpakanti tehi tehi maggehi taṃ taṃ pahātabbaṃ pāpadhammaṃ odhiso jahāti samucchindati. Tenāha ‘‘maggo vutto’’ti.
‘‘д̣̇ад̣̇ад̇о’’д̇иаад̣̇инаа буб̣б̣з авибхааг̇зна гусаламуулаани уд̣̇д̇хадаанийд̇и ид̣̇аани вибхааг̇зна д̇аани уд̣̇д̇харанд̇о ‘‘логияагусаламуула’’нд̇иаад̣̇имааха.
‘‘Dadato’’tiādinā pubbe avibhāgena kusalamūlāni uddhaṭānīti idāni vibhāgena tāni uddharanto ‘‘lokiyakusalamūla’’ntiādimāha.
бут̇уж̇ж̇анабхууми сзгкабхууми д̣̇ассид̇аа бахаанасса виббагад̇абхаавад̣̇ийбанад̇о. асзгкабхууми д̣̇ассид̇аа анубаад̣̇аабариниб̣б̣аанад̣̇ийбанад̇о.
Puthujjanabhūmi sekkhabhūmi dassitā pahānassa vippakatabhāvadīpanato. Asekkhabhūmi dassitā anupādāparinibbānadīpanato.
саг̇г̇аг̇ааминий бадибад̣̇аа буб̣б̣абхааг̇аббадибад̇д̇и.
Saggagāminī paṭipadā pubbabhāgappaṭipatti.
бун̃н̃з гат̇ид̇з бун̃н̃апаламби гат̇ид̇амзва ход̇ийд̇и вуд̇д̇ам̣ ‘‘д̣̇ад̣̇ад̇о…бз… д̣̇зсанамаахаа’’д̇и. сажжагаммадтаанзна винаа сам̣гилзсаббахаанам̣ над̇т̇ийд̇и д̣̇ассзнд̇о ааха ‘‘гусало…бз… д̣̇зсанамаахаа’’д̇и.
Puññe kathite puññaphalampi kathitameva hotīti vuttaṃ ‘‘dadato…pe… desanamāhā’’ti. Saccakammaṭṭhānena vinā saṃkilesappahānaṃ natthīti dassento āha ‘‘kusalo…pe… desanamāhā’’ti.
взрасад̣̇д̣̇о ад̣̇иннаад̣̇аанаад̣̇ибаабад̇хаммзсуби нирул̣ход̇и вуд̇д̇ам̣ ‘‘звам̣ саб̣б̣ааниби сигкаабад̣̇аани вид̇т̇аарзд̇аб̣б̣ааний’’д̇и. д̣̇взби вимуд̇д̇ияо сзгкаасзгкавимуд̇д̇ияо, саубаад̣̇исзсаанубаад̣̇исзсавимуд̇д̇ияо жа. д̇ат̇аа хи вагкад̇и ‘‘ниб̣б̣уд̇од̇и д̣̇вз ниб̣б̣аанад̇хаад̇уяо’’д̇иаад̣̇и (нзд̇д̇и. адта. 76).
Verasaddo adinnādānādipāpadhammesupi niruḷhoti vuttaṃ ‘‘evaṃ sabbānipi sikkhāpadāni vitthāretabbānī’’ti. Dvepi vimuttiyo sekkhāsekkhavimuttiyo, saupādisesaanupādisesavimuttiyo ca. Tathā hi vakkhati ‘‘nibbutoti dve nibbānadhātuyo’’tiādi (netti. aṭṭha. 76).
гааран̣уубажаарзна, гааран̣аг̇г̇ахан̣зна ваа палам̣ г̇ахид̇анд̇и ааха ‘‘д̣̇вз суг̇ад̇ияо’’д̇иаад̣̇и. ваддавиваддасамбад̇д̇ияо имиссаа д̣̇зсанааяа палам̣, д̇асса д̣̇аанам̣ сийлам̣ бхааванаа убааяо, ‘‘самбад̇д̇ид̣̇ваяам̣ ижчанд̇зна д̣̇аанаад̣̇ийсу аббамад̇д̇зна бхавид̇аб̣б̣а’’нд̇и аяамзд̇т̇а бхаг̇авад̇о аан̣ад̇д̇ийд̇и имамад̇т̇ам̣ санд̇хааяааха ‘‘палаад̣̇ийни яат̇аарахам̣ взд̣̇ид̇аб̣б̣ааний’’д̇и.
Kāraṇūpacārena, kāraṇaggahaṇena vā phalaṃ gahitanti āha ‘‘dve sugatiyo’’tiādi. Vaṭṭavivaṭṭasampattiyo imissā desanāya phalaṃ, tassa dānaṃ sīlaṃ bhāvanā upāyo, ‘‘sampattidvayaṃ icchantena dānādīsu appamattena bhavitabba’’nti ayamettha bhagavato āṇattīti imamatthaṃ sandhāyāha ‘‘phalādīni yathārahaṃ veditabbānī’’ti.
вижаяод̇и вижаяахаарасамбаад̇о, со вужжад̇ийд̇и ад̇т̇о. зса наяо ид̇о барзсуби. ‘‘д̇ивид̇хамби д̣̇аанамаяа’’нд̇иаад̣̇инаа бад̣̇ад̇т̇авижаяам̣ д̣̇ассзд̇и, д̇зна ассаад̣̇аад̣̇аяо, ид̇арз жа вижаяахаарабад̣̇ад̇т̇аа ад̇т̇ад̇о вижид̇аа зва хонд̇ийд̇и. руубаад̣̇иаарамман̣асса барижжааг̇о вуд̇д̇од̇и самб̣анд̇хо. саб̣б̣од̇и сагало анавасзсад̇о гижжасса вуд̇д̇ад̇д̇аа.
Vicayoti vicayahārasampāto, so vuccatīti attho. Esa nayo ito paresupi. ‘‘Tividhampi dānamaya’’ntiādinā padatthavicayaṃ dasseti, tena assādādayo, itare ca vicayahārapadatthā atthato vicitā eva hontīti. Rūpādiārammaṇassa pariccāgo vuttoti sambandho. Sabboti sakalo anavasesato kiccassa vuttattā.
д̣̇аанаабхирад̇асса жааг̇аад̇хидтаанам̣ баарибуурим̣ г̇ажчад̇ийд̇и вуд̇д̇ам̣ ‘‘д̣̇ад̣̇ад̇о…бз… бад̣̇адтаана’’нд̇и. вирад̇исажжз, важийсажжз жа д̇идтад̇о сажжаад̇хидтаанам̣ баарибуурим̣ г̇ажчад̇ийд̇и вуд̇д̇ам̣ ‘‘сам̣яама…бз… бад̣̇адтаана’’нд̇и. госаллаяог̇ад̇о жа баабаббахаанад̇о жа бан̃н̃аабаарибуурим̣ г̇ажчад̇ийд̇и вуд̇д̇ам̣ ‘‘гусало…бз… бад̣̇адтаана’’нд̇и. анавасзсарааг̇аад̣̇ийсу бахийнзсу убасамо убадтид̇о наама ход̇ийд̇и вуд̇д̇ам̣ ‘‘рааг̇а…бз… бад̣̇адтаана’’нд̇и.
Dānābhiratassa cāgādhiṭṭhānaṃ pāripūriṃ gacchatīti vuttaṃ ‘‘dadato…pe… padaṭṭhāna’’nti. Viratisacce, vacīsacce ca tiṭṭhato saccādhiṭṭhānaṃ pāripūriṃ gacchatīti vuttaṃ ‘‘saṃyama…pe… padaṭṭhāna’’nti. Kosallayogato ca pāpappahānato ca paññāpāripūriṃ gacchatīti vuttaṃ ‘‘kusalo…pe… padaṭṭhāna’’nti. Anavasesarāgādīsu pahīnesu upasamo upaṭṭhito nāma hotīti vuttaṃ ‘‘rāga…pe… padaṭṭhāna’’nti.
гусалод̇и буг̇г̇алаад̇хидтаанзна госалласаммаад̣̇идти вуд̇д̇аад̇и ааха ‘‘гусало…бз… маг̇г̇ан̇г̇аад̣̇ибхаавзна згалагкан̣ад̇д̇аа’’д̇и. аад̣̇исад̣̇д̣̇зна б̣од̇хибагкияабхааваад̣̇им̣ сан̇г̇ан̣хаад̇и. кзбзд̇аб̣б̣абхаавзнаад̇и бахаад̇аб̣б̣абхаавзна.
Kusaloti puggalādhiṭṭhānena kosallasammādiṭṭhi vuttāti āha ‘‘kusalo…pe… maggaṅgādibhāvena ekalakkhaṇattā’’ti. Ādisaddena bodhipakkhiyabhāvādiṃ saṅgaṇhāti. Khepetabbabhāvenāti pahātabbabhāvena.
авзрад̇анд̇и асабад̇д̇ад̇ам̣. гусалад̇хаммзхийд̇и анаваж̇ж̇ад̇хаммзхи, паланиб̣б̣аанзхийд̇и ад̇хиббааяо. д̣̇аанасса махабпалад̇аа, сийлаад̣̇иг̇ун̣зхи сад̇т̇у ануд̇д̇арад̣̇агкин̣зяяабхааво, анубаад̣̇аабариниб̣б̣аананд̇и имзсам̣ бажжавзгкан̣аа имасса д̣̇аанасса нид̣̇аананд̇и аяамад̇т̇о баал̣ияам̣ нирул̣хова. ниб̣б̣ажананид̣̇аанасанд̇хаяо сувин̃н̃зяяааваад̇и ааха ‘‘ниб̣б̣ажананид̣̇аанасанд̇хаяо вад̇д̇аб̣б̣аа’’д̇и.
Averatanti asapattataṃ. Kusaladhammehīti anavajjadhammehi, phalanibbānehīti adhippāyo. Dānassa mahapphalatā, sīlādiguṇehi satthu anuttaradakkhiṇeyyabhāvo, anupādāparinibbānanti imesaṃ paccavekkhaṇā imassa dānassa nidānanti ayamattho pāḷiyaṃ niruḷhova. Nibbacananidānasandhayo suviññeyyāvāti āha ‘‘nibbacananidānasandhayo vattabbā’’ti.
бадибагканид̣̇д̣̇зсзна самуд̣̇аяод̇и д̣̇зсанад̇т̇ам̣ бадибагканид̣̇д̣̇зсанзна нид̣̇д̇хаарид̇о аяам̣ мажчарияаад̣̇исам̣гилзсабагкиго самуд̣̇аяо. алобхзна…бз… д̣̇аанаад̣̇ийхийд̇и язхи алобхаад̣̇ийхи д̣̇аанаад̣̇аяо д̇хаммаа самбхаванд̇и, д̇аани д̣̇аанаад̣̇иг̇г̇ахан̣знзва г̇ахид̇аанийд̇и гусаламуулаани нид̣̇д̇хаарзд̇и ‘‘имаани д̇ийн̣и гусалааний’’д̇и. д̇зсанд̇и гусаламуулаанам̣.
Paṭipakkhaniddesena samudayoti desanatthaṃ paṭipakkhaniddesanena niddhārito ayaṃ macchariyādisaṃkilesapakkhiko samudayo. Alobhena…pe… dānādīhīti yehi alobhādīhi dānādayo dhammā sambhavanti, tāni dānādiggahaṇeneva gahitānīti kusalamūlāni niddhāreti ‘‘imāni tīṇi kusalānī’’ti. Tesanti kusalamūlānaṃ.
бхаяахзд̇у д̣̇зд̇и бан̣н̣аагаараад̣̇ивасзна. рааг̇ахзд̇у д̣̇зд̇и сабхааг̇авад̇т̇усса. аамисагин̃жигкахзд̇у д̣̇зд̇и лан̃ж̇аад̣̇ивасзна. анугамбанд̇о ваа гарун̣аакзд̇д̇з. абажаяамаано г̇ун̣акзд̇д̇з, убагааракзд̇д̇з ваа. бхаяуубарад̇од̇и бхаязна орад̇о. д̇зна д̇ат̇ааруубзна сам̣яамзна взрам̣ на жияад̇зва. звам̣ саб̣б̣асса агусаласса баабаго вибаагод̇и яож̇анаа.
Bhayahetu deti paṇṇākārādivasena. Rāgahetu deti sabhāgavatthussa. Āmisakiñcikkhahetu deti lañjādivasena. Anukampanto vā karuṇākhette. Apacayamāno guṇakhette, upakārakhette vā. Bhayūparatoti bhayena orato. Tena tathārūpena saṃyamena veraṃ na ciyateva. Evaṃ sabbassa akusalassa pāpako vipākoti yojanā.
‘‘д̣̇ад̣̇ад̇о’’д̇иаад̣̇инаа яат̇аа д̣̇аанабадигкзбзна баривад̇д̇анам̣ д̣̇ассид̇ам̣, звам̣ бахаанабадигкзбзнаби баривад̇д̇анам̣ д̣̇ассзд̇аб̣б̣анд̇и вуд̇д̇ам̣ ‘‘агусало бана на ж̇ахаад̇ий’’д̇и.
‘‘Dadato’’tiādinā yathā dānapaṭikkhepena parivattanaṃ dassitaṃ, evaṃ pahānapaṭikkhepenapi parivattanaṃ dassetabbanti vuttaṃ ‘‘akusalo pana na jahātī’’ti.
гаммапалам̣ сад̣̇д̣̇аханд̇о д̣̇аанагирияааяам̣ бад̣̇аханд̇о язна вид̇хинаа д̣̇аанам̣ д̣̇аад̇аб̣б̣ам̣, д̇ад̇т̇а сад̇им̣ убадтабзнд̇о жид̇д̇ам̣ самаад̣̇аханд̇о саммаад̣̇идтим̣ бурагкаронд̇о д̣̇аанз саммаабадибанно ход̇ийд̇и ааха ‘‘д̣̇аанам̣ наама…бз… ход̇ий’’д̇и.
Kammaphalaṃ saddahanto dānakiriyāyaṃ padahanto yena vidhinā dānaṃ dātabbaṃ, tattha satiṃ upaṭṭhapento cittaṃ samādahanto sammādiṭṭhiṃ purakkharonto dāne sammāpaṭipanno hotīti āha ‘‘dānaṃ nāma…pe… hotī’’ti.
бхааванаабахаанасамааробанаани баал̣ияам̣ саруубад̇о вин̃н̃ааяанд̇ийд̇и бад̣̇адтаанавзважанасамааробанаани д̣̇ассзд̇ум̣ ‘‘д̇ам̣ сийласса бад̣̇адтаана’’нд̇иаад̣̇и вуд̇д̇ам̣, д̇ам̣ сувин̃н̃зяяам̣. ан̃н̃ан̃жа яад̣̇зд̇т̇а ад̇т̇ад̇о на вибхад̇д̇ам̣, д̇ам̣ вуд̇д̇анаяад̇д̇аа, уд̇д̇аанад̇т̇ад̇д̇аа жаад̇и взд̣̇ид̇аб̣б̣ам̣.
Bhāvanāpahānasamāropanāni pāḷiyaṃ sarūpato viññāyantīti padaṭṭhānavevacanasamāropanāni dassetuṃ ‘‘taṃ sīlassa padaṭṭhāna’’ntiādi vuttaṃ, taṃ suviññeyyaṃ. Aññañca yadettha atthato na vibhattaṃ, taṃ vuttanayattā, uttānatthattā cāti veditabbaṃ.
хаарасамбаад̇аваараван̣н̣анаа нидтид̇аа.
Hārasampātavāravaṇṇanā niṭṭhitā.
Related texts:
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / куд̣̇д̣̇аганигааяа (адтагат̇аа) • Khuddakanikāya (aṭṭhakathā) / нзд̇д̇иббагаран̣а-адтагат̇аа • Nettippakaraṇa-aṭṭhakathā / миссагахаарасамбаад̇аван̣н̣анаа • Missakahārasampātavaṇṇanā
