| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೩. ಮಿತ್ತಸುತ್ತವಣ್ಣನಾ
3. Mittasuttavaṇṇanā
೫೩. ಸಹ ಅತ್ಥೇನ ವತ್ತತೀತಿ ಸತ್ಥೋ, ಭಣ್ಡಮೂಲಂ ಗಹೇತ್ವಾ ವಾಣಿಜ್ಜವಸೇನ ದೇಸನ್ತರಾದೀಸು ವಿಚರಣಕಜನಸಮೂಹೋ। ತೇನಾಹ ‘‘ಸದ್ಧಿಂಚರೋ’’ತಿ, ಸಹಚರಣಕೋತಿ ಅತ್ಥೋ। ಮಿತ್ತನ್ತಿ ಸಿನೇಹಯೋಗೇನ ಮಿತ್ತಕಿಚ್ಚಯುತ್ತಂ । ಇಧಾಧಿಪ್ಪೇತಪ್ಪಕಾರಂ ದಸ್ಸೇತುಂ ‘‘ರೋಗೇ ಉಪ್ಪನ್ನೇ’’ತಿಆದಿ ವುತ್ತಂ। ತಥಾರೂಪೇತಿ ಜಿಗುಚ್ಛನೀಯೇ, ದುತ್ತಿಕಿಚ್ಛೇ ವಾ। ಯಥಾ ಅಸಣ್ಠಿತಾನಂ ಸಣ್ಠಾಪನವಸೇನ ಪವಸತೋ ಪುರಿಸಸ್ಸ ಭೋಗಬ್ಯಸನೇ ನಾಥತಾ, ಏವಂ ಪುತ್ತಸಿನೇಹವಸೇನ ಪುತ್ತಸ್ಸ ಮಾತುಯಾ ಅನ್ತೋಗೇಹೇ ನಾಥತಾತಿ ವುತ್ತಂ ‘‘ಮಾತಾ ಮಿತ್ತಂ ಸಕೇ ಘರೇ’’ತಿ। ಅತ್ಥಜಾತಸ್ಸಾತಿ ಉಪಟ್ಠಿತಪಯೋಜನಸ್ಸಾತಿ ಅತ್ಥೋತಿ ಆಹ ‘‘ಉಪ್ಪನ್ನಕಿಚ್ಚಸ್ಸಾ’’ತಿ। ಸಮ್ಪರಾಯಹಿತನ್ತಿ ಸಮ್ಪರಾಯೇ ಹಿತಾವಹಂ।
53. Saha atthena vattatīti sattho, bhaṇḍamūlaṃ gahetvā vāṇijjavasena desantarādīsu vicaraṇakajanasamūho. Tenāha ‘‘saddhiṃcaro’’ti, sahacaraṇakoti attho. Mittanti sinehayogena mittakiccayuttaṃ . Idhādhippetappakāraṃ dassetuṃ ‘‘roge uppanne’’tiādi vuttaṃ. Tathārūpeti jigucchanīye, duttikicche vā. Yathā asaṇṭhitānaṃ saṇṭhāpanavasena pavasato purisassa bhogabyasane nāthatā, evaṃ puttasinehavasena puttassa mātuyā antogehe nāthatāti vuttaṃ ‘‘mātā mittaṃ sake ghare’’ti. Atthajātassāti upaṭṭhitapayojanassāti atthoti āha ‘‘uppannakiccassā’’ti. Samparāyahitanti samparāye hitāvahaṃ.
ಮಿತ್ತಸುತ್ತವಣ್ಣನಾ ನಿಟ್ಠಿತಾ।
Mittasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೩. ಮಿತ್ತಸುತ್ತಂ • 3. Mittasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೩. ಮಿತ್ತಸುತ್ತವಣ್ಣನಾ • 3. Mittasuttavaṇṇanā
