| Library / Tipiṭaka / તિપિટક • Tipiṭaka / મહાવિભઙ્ગ-અટ્ઠકથા • Mahāvibhaṅga-aṭṭhakathā |
૩. મોહનસિક્ખાપદવણ્ણના
3. Mohanasikkhāpadavaṇṇanā
૪૪૪. તતિયે – અન્વદ્ધમાસન્તિ અનુપટિપાટિયા અદ્ધમાસે અદ્ધમાસે; યસ્મા પન સો ઉપોસથદિવસે ઉદ્દિસિયતિ, તસ્મા ‘‘અનુપોસથિક’’ન્તિ પદભાજને વુત્તં. ઉદ્દિસ્સમાનેતિ ઉદ્દિસિયમાને . યસ્મા પન સો પાતિમોક્ખુદ્દેસકે ઉદ્દિસન્તે ઉદ્દિસિયમાનો નામ હોતિ, તસ્મા ‘‘ઉદ્દિસન્તે’’તિ પદભાજને વુત્તં. યઞ્ચ તત્થ આપત્તિં આપન્નોતિ તસ્મિં અનાચારે ચિણ્ણે યં આપત્તિં આપન્નો. યથાધમ્મો કારેતબ્બોતિ અઞ્ઞાણેન આપન્નત્તા તસ્સા આપત્તિયા મોક્ખો નત્થિ, યથા પન ધમ્મો ચ વિનયો ચ ઠિતો, તથા કારેતબ્બો. દેસનાગામિનિઞ્ચે આપન્નો હોતિ, દેસાપેતબ્બો, વુટ્ઠાનગામિનિઞ્ચે, વુટ્ઠાપેતબ્બોતિ અત્થો. સાધુકન્તિ સુટ્ઠુ. અટ્ઠિંકત્વાતિ અત્થિકભાવં કત્વા; અત્થિકો હુત્વાતિ વુત્તં હોતિ.
444. Tatiye – anvaddhamāsanti anupaṭipāṭiyā addhamāse addhamāse; yasmā pana so uposathadivase uddisiyati, tasmā ‘‘anuposathika’’nti padabhājane vuttaṃ. Uddissamāneti uddisiyamāne . Yasmā pana so pātimokkhuddesake uddisante uddisiyamāno nāma hoti, tasmā ‘‘uddisante’’ti padabhājane vuttaṃ. Yañca tattha āpattiṃ āpannoti tasmiṃ anācāre ciṇṇe yaṃ āpattiṃ āpanno. Yathādhammo kāretabboti aññāṇena āpannattā tassā āpattiyā mokkho natthi, yathā pana dhammo ca vinayo ca ṭhito, tathā kāretabbo. Desanāgāminiñce āpanno hoti, desāpetabbo, vuṭṭhānagāminiñce, vuṭṭhāpetabboti attho. Sādhukanti suṭṭhu. Aṭṭhiṃkatvāti atthikabhāvaṃ katvā; atthiko hutvāti vuttaṃ hoti.
૪૪૭. ધમ્મકમ્મેતિઆદીસુ મોહારોપનકમ્મં અધિપ્પેતં. સેસમેત્થ ઉત્તાનમેવ. તિસમુટ્ઠાનં – કિરિયં, સઞ્ઞાવિમોક્ખં, સચિત્તકં, લોકવજ્જં, કાયકમ્મં, વચીકમ્મં, અકુસલચિત્તં, દુક્ખવેદનન્તિ.
447.Dhammakammetiādīsu mohāropanakammaṃ adhippetaṃ. Sesamettha uttānameva. Tisamuṭṭhānaṃ – kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dukkhavedananti.
મોહનસિક્ખાપદં તતિયં.
Mohanasikkhāpadaṃ tatiyaṃ.
Related texts:
તિપિટક (મૂલ) • Tipiṭaka (Mūla) / વિનયપિટક • Vinayapiṭaka / મહાવિભઙ્ગ • Mahāvibhaṅga / ૮. સહધમ્મિકવગ્ગો • 8. Sahadhammikavaggo
ટીકા • Tīkā / વિનયપિટક (ટીકા) • Vinayapiṭaka (ṭīkā) / વજિરબુદ્ધિ-ટીકા • Vajirabuddhi-ṭīkā / ૩. મોહનસિક્ખાપદવણ્ણના • 3. Mohanasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વિમતિવિનોદની-ટીકા • Vimativinodanī-ṭīkā / ૩. મોહનસિક્ખાપદવણ્ણના • 3. Mohanasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / પાચિત્યાદિયોજનાપાળિ • Pācityādiyojanāpāḷi / ૩. મોહનસિક્ખાપદં • 3. Mohanasikkhāpadaṃ
