| Library / Tipiṭaka / ཏིཔིཊཀ • Tipiṭaka / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā |
༣. མོཧནསིཀྑཱཔདཝཎྞནཱ
3. Mohanasikkhāpadavaṇṇanā
༤༤༤. ཏཏིཡེ – ཨནྭདྡྷམཱསནྟི ཨནུཔཊིཔཱཊིཡཱ ཨདྡྷམཱསེ ཨདྡྷམཱསེ; ཡསྨཱ པན སོ ཨུཔོསཐདིཝསེ ཨུདྡིསིཡཏི, ཏསྨཱ ‘‘ཨནུཔོསཐིཀ’’ནྟི པདབྷཱཛནེ ཝུཏྟཾ། ཨུདྡིསྶམཱནེཏི ཨུདྡིསིཡམཱནེ ། ཡསྨཱ པན སོ པཱཏིམོཀྑུདྡེསཀེ ཨུདྡིསནྟེ ཨུདྡིསིཡམཱནོ ནཱམ ཧོཏི, ཏསྨཱ ‘‘ཨུདྡིསནྟེ’’ཏི པདབྷཱཛནེ ཝུཏྟཾ། ཡཉྩ ཏཏྠ ཨཱཔཏྟིཾ ཨཱཔནྣོཏི ཏསྨིཾ ཨནཱཙཱརེ ཙིཎྞེ ཡཾ ཨཱཔཏྟིཾ ཨཱཔནྣོ། ཡཐཱདྷམྨོ ཀཱརེཏབྦོཏི ཨཉྙཱཎེན ཨཱཔནྣཏྟཱ ཏསྶཱ ཨཱཔཏྟིཡཱ མོཀྑོ ནཏྠི, ཡཐཱ པན དྷམྨོ ཙ ཝིནཡོ ཙ ཋིཏོ, ཏཐཱ ཀཱརེཏབྦོ། དེསནཱགཱམིནིཉྩེ ཨཱཔནྣོ ཧོཏི, དེསཱཔེཏབྦོ, ཝུཊྛཱནགཱམིནིཉྩེ, ཝུཊྛཱཔེཏབྦོཏི ཨཏྠོ། སཱདྷུཀནྟི སུཊྛུ། ཨཊྛིཾཀཏྭཱཏི ཨཏྠིཀབྷཱཝཾ ཀཏྭཱ; ཨཏྠིཀོ ཧུཏྭཱཏི ཝུཏྟཾ ཧོཏི།
444. Tatiye – anvaddhamāsanti anupaṭipāṭiyā addhamāse addhamāse; yasmā pana so uposathadivase uddisiyati, tasmā ‘‘anuposathika’’nti padabhājane vuttaṃ. Uddissamāneti uddisiyamāne . Yasmā pana so pātimokkhuddesake uddisante uddisiyamāno nāma hoti, tasmā ‘‘uddisante’’ti padabhājane vuttaṃ. Yañca tattha āpattiṃ āpannoti tasmiṃ anācāre ciṇṇe yaṃ āpattiṃ āpanno. Yathādhammo kāretabboti aññāṇena āpannattā tassā āpattiyā mokkho natthi, yathā pana dhammo ca vinayo ca ṭhito, tathā kāretabbo. Desanāgāminiñce āpanno hoti, desāpetabbo, vuṭṭhānagāminiñce, vuṭṭhāpetabboti attho. Sādhukanti suṭṭhu. Aṭṭhiṃkatvāti atthikabhāvaṃ katvā; atthiko hutvāti vuttaṃ hoti.
༤༤༧. དྷམྨཀམྨེཏིཨཱདཱིསུ མོཧཱརོཔནཀམྨཾ ཨདྷིཔྤེཏཾ། སེསམེཏྠ ཨུཏྟཱནམེཝ། ཏིསམུཊྛཱནཾ – ཀིརིཡཾ, སཉྙཱཝིམོཀྑཾ, སཙིཏྟཀཾ, ལོཀཝཛྫཾ, ཀཱཡཀམྨཾ, ཝཙཱིཀམྨཾ, ཨཀུསལཙིཏྟཾ, དུཀྑཝེདནནྟི།
447.Dhammakammetiādīsu mohāropanakammaṃ adhippetaṃ. Sesamettha uttānameva. Tisamuṭṭhānaṃ – kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dukkhavedananti.
མོཧནསིཀྑཱཔདཾ ཏཏིཡཾ།
Mohanasikkhāpadaṃ tatiyaṃ.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / མཧཱཝིབྷངྒ • Mahāvibhaṅga / ༨. སཧདྷམྨིཀཝགྒོ • 8. Sahadhammikavaggo
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༣. མོཧནསིཀྑཱཔདཝཎྞནཱ • 3. Mohanasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༣. མོཧནསིཀྑཱཔདཝཎྞནཱ • 3. Mohanasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༣. མོཧནསིཀྑཱཔདཾ • 3. Mohanasikkhāpadaṃ
