| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
༢. མོལི༹ཡཕགྒུནསུཏྟཝཎྞནཱ
2. Moḷiyaphaggunasuttavaṇṇanā
༡༢. ཨིམསྨིཾཡེཝ ཋཱནེཏི ‘‘ཙཏྟཱརོམེ བྷིཀྑུ…པེ॰… ཨཱཧཱརཱ’’ཏི ཨེཝཾ ཙཏྟཱརོ ཨཱཧཱརེ སརཱུཔཏོ དསྶེཏྭཱ ‘‘ཨིམེ ཁོ བྷིཀྑཝེ…པེ॰… ཨནུགྒཧཱཡཱ’’ཏི ནིགམནཝསེན དསྶིཏེ ཨིམསྨིཾཡེཝ ཋཱནེ། དེསནཾ ནིཊྛཱཔེསི ཙཏུཨཱཧཱརཝིབྷཱགདཱིཔཀཾ དེསནཾ ཨུདྡེསཝསེནེཝ ནིཊྛཱཔེསི, ཨུཔརི ཨཱཝཛྫེཏྭཱ ཏུཎྷཱི ནིསཱིདི། དིཊྛིགཏིཀོཏི ཨཏྟདིཊྛིཝསེན དིཊྛིགཏིཀོ། ཝརགནྡྷཝཱསིཏནྟི སབྷཱཝསིདྡྷེན ཙནྡནགནྡྷེན ཙེཝ ཏདཉྙནཱནཱགནྡྷེན ཙ པརིབྷཱཝིཏཏྟཱ ཝརགནྡྷཝཱསིཏཾ ། རཏནཙངྐོཊཝརེནཱཏི རཏནམཡེན ཨུཏྟམཙངྐོཊཀེན། དེསནཱནུསནྡྷིཾ གྷཊེནྟོཏི ཡཐཱདེསིཏཱཡ དེསནཱཡ ཨནུསནྡྷིཾ གྷཊེནྟོ, ཡཐཱ ཨུཔརིདེསནཱ ཝདྡྷེཡྻ, ཨེཝཾ ཨུསྶཱཧཾ ཀརོནྟོ། ཝིཉྙཱཎཱཧཱརཾ ཨཱཧཱརེཏཱིཏི ཏསྶ ཨཱཧཱརཎཀིརིཡཱཡ ཝུཏྟཔུཙྪཱཡ ཏཾ དིཊྛིགཏཾ ཨུཔྤཱཊེནྟོ ‘‘ཡོ ཨེཏཾ…པེ॰… བྷུཉྫཏི ཝཱ’’ཏི ཨཱཧ།
12.Imasmiṃyeva ṭhāneti ‘‘cattārome bhikkhu…pe… āhārā’’ti evaṃ cattāro āhāre sarūpato dassetvā ‘‘ime kho bhikkhave…pe… anuggahāyā’’ti nigamanavasena dassite imasmiṃyeva ṭhāne. Desanaṃ niṭṭhāpesi catuāhāravibhāgadīpakaṃ desanaṃ uddesavaseneva niṭṭhāpesi, upari āvajjetvā tuṇhī nisīdi. Diṭṭhigatikoti attadiṭṭhivasena diṭṭhigatiko. Varagandhavāsitanti sabhāvasiddhena candanagandhena ceva tadaññanānāgandhena ca paribhāvitattā varagandhavāsitaṃ . Ratanacaṅkoṭavarenāti ratanamayena uttamacaṅkoṭakena. Desanānusandhiṃ ghaṭentoti yathādesitāya desanāya anusandhiṃ ghaṭento, yathā uparidesanā vaddheyya, evaṃ ussāhaṃ karonto. Viññāṇāhāraṃ āhāretīti tassa āhāraṇakiriyāya vuttapucchāya taṃ diṭṭhigataṃ uppāṭento ‘‘yo etaṃ…pe… bhuñjati vā’’ti āha.
ཝིཉྙཱཎཱཧཱརེ ནཱམ ཨིཙྪིཏེ ཏསྶ ཨུཔབྷུཉྫཀེནཔི བྷཝིཏབྦཾ, སོ ‘‘ཀོ ནུ ཁོ’’ཏི ཨཡཾ པུཙྪཱཡ ཨདྷིཔྤཱཡོ། ཨུཏུསམཡེཏི གབྦྷཝུཊྛཱནསམཡེ། སོ ཧི ཨུཏུསམཡསྶ མཏྟཀསམཡཏྟཱ ཏཐཱ ཝུཏྟོ། ‘‘ཨུདཀེན ཨཎྜཱནི མཱ ནསྶནྟཱུ’’ཏི མཧཱསམུདྡཏོ ནིཀྑམིཏྭཱ། གིཛ྄ཛྷཔོཏཀཱ ཝིཡ ཨཱཧཱརསཉྩེཏནཱཡ ཏཱནི ཀཙྪཔཎྜཱནི མནོསཉྩེཏནཱཧཱརེན ཡཱཔེནྟཱིཏི ཨཡཾ ཏསྶ ཐེརསྶ ལདྡྷི། ཀིཉྩཱཔི ཨཡཾ ལདྡྷཱིཏི ཕསྶམནོསཉྩེཏནཱཧཱརེསུ ཀིཉྩཱཔི ཐེརསྶ ཡུཏྟཱ ཨཡུཏྟཱ ཝཱ ཨཡཾ ལདྡྷི། ཨིམཾ པཉྷནྟི ‘‘ཀོ ནུ ཁོ, བྷནྟེ, ཝིཉྙཱཎཱཧཱརཾ ཨཱཧཱརེཏཱི’’ཏི ཨིམཾ པཉྷཾ ཨེཏཱཡ ཡཐཱཝུཏྟཱཡ ལདྡྷིཡཱ ན པན པུཙྪཏི, ཨཐ ཁོ སཏྟུཔལདྡྷིཡཱ པུཙྪཏཱིཏི ཨདྷིཔྤཱཡོ། སོཏི དིཊྛིགཏིཀོ། ན ནིགྒཧེཏབྦོ ཨུམྨཏྟཀསདིསཏྟཱ ཨདྷིཔྤཱཡཾ ཨཛཱནིཏྭཱ པུཙྪཱཡ ཀཏཏྟཱ། ཏེནཱཧ ‘‘ཨཱཧཱརེཏཱིཏི ནཱཧཾ ཝདཱམཱི’’ཏིཨཱདི།
Viññāṇāhāre nāma icchite tassa upabhuñjakenapi bhavitabbaṃ, so ‘‘ko nu kho’’ti ayaṃ pucchāya adhippāyo. Utusamayeti gabbhavuṭṭhānasamaye. So hi utusamayassa mattakasamayattā tathā vutto. ‘‘Udakena aṇḍāni mā nassantū’’ti mahāsamuddato nikkhamitvā. Gijjhapotakā viya āhārasañcetanāya tāni kacchapaṇḍāni manosañcetanāhārena yāpentīti ayaṃ tassa therassa laddhi. Kiñcāpi ayaṃ laddhīti phassamanosañcetanāhāresu kiñcāpi therassa yuttā ayuttā vā ayaṃ laddhi. Imaṃ pañhanti ‘‘ko nu kho, bhante, viññāṇāhāraṃ āhāretī’’ti imaṃ pañhaṃ etāya yathāvuttāya laddhiyā na pana pucchati, atha kho sattupaladdhiyā pucchatīti adhippāyo. Soti diṭṭhigatiko. Na niggahetabbo ummattakasadisattā adhippāyaṃ ajānitvā pucchāya katattā. Tenāha ‘‘āhāretīti nāhaṃ vadāmī’’tiādi.
ཏསྨིཾ མཡཱ ཨེཝཾ ཝུཏྟེཏི ཏསྨིཾ ཝཙནེ མཡཱ ‘‘ཨཱཧཱརེཏཱི’’ཏི ཨེཝཾ ཝུཏྟེ སཏི། ཨཡཾ པཉྷོཏི ‘‘ཀོ ནུ ཁོ, བྷནྟེ, ཝིཉྙཱཎཱཧཱརཾ ཨཱཧཱརེཏཱི’’ཏི ཨཡཾ པཉྷོ ཡུཏྟོ བྷཝེཡྻ། ཨེཝཾ པུཙྪིཏེ པཉྷེཏི སཏྟུཔལདྡྷིཾ ཨནཱདཱཡ ‘‘ཀཏམསྶ དྷམྨསྶ པཙྩཡོ’’ཏི ཨེཝཾ དྷམྨཔཝཏྟཝསེནེཝ པཉྷེ པུཙྪིཏེ། ཏེནེཝ ཝིཉྙཱཎེནཱཏི ཏེནེཝ པཊིསནྡྷིཝིཉྙཱཎེན སཧ ཨུཔྤནྣཾ ནཱམཉྩ རཱུཔཉྩ ཨཏཱིཏབྷཝེ དིཊྛིགཏིཀསྶ ཝསེན ཨཱཡཏིཾ པུནབྦྷཝཱབྷིནིབྦཏྟཱིཏི ཨིདྷཱདྷིཔྤེཏཾ། ནཱམརཱུཔེ ཛཱཏེ སཏཱིཏི ནཱམརཱུཔེ ནིབྦཏྟེ ཏཔྤཙྩཡབྷཱུཏཾ བྷིནྡིཏྭཱ སལཱ༹ཡཏནཾ ཧོཏི།
Tasmiṃ mayā evaṃ vutteti tasmiṃ vacane mayā ‘‘āhāretī’’ti evaṃ vutte sati. Ayaṃ pañhoti ‘‘ko nu kho, bhante, viññāṇāhāraṃ āhāretī’’ti ayaṃ pañho yutto bhaveyya. Evaṃ pucchite pañheti sattupaladdhiṃ anādāya ‘‘katamassa dhammassa paccayo’’ti evaṃ dhammapavattavaseneva pañhe pucchite. Teneva viññāṇenāti teneva paṭisandhiviññāṇena saha uppannaṃ nāmañca rūpañca atītabhave diṭṭhigatikassa vasena āyatiṃ punabbhavābhinibbattīti idhādhippetaṃ. Nāmarūpe jāte satīti nāmarūpe nibbatte tappaccayabhūtaṃ bhinditvā saḷāyatanaṃ hoti.
ཏཏྲཱཡཾ པཙྩཡཝིབྷཱགོ – ནཱམནྟི ཝེདནཱདིཁནྡྷཏྟཡཾ ཨིདྷཱདྷིཔྤེཏཾ, རཱུཔཾ པན སཏྟསནྟཏིཔརིཡཱཔནྣཾ, ནིཡམཏོ ཙཏྟཱརི བྷཱུཏཱནི ཚ ཝཏྠཱུནི ཛཱིཝིཏིནྡྲིཡཾ ཨཱཧཱརོ ཙ། ཏཏྠ ཝིཔཱཀནཱམཾ པཊིསནྡྷིཀྑཎེ ཧདཡཝཏྠུནོ སཧཱཡོ ཧུཏྭཱ ཚཊྛསྶ མནཱཡཏནསྶ སཧཛཱཏཨཉྙམཉྙནིསྶཡསམྤཡུཏྟཝིཔཱཀཨཏྠིཨཝིགཏཔཙྩཡེཧི སཏྟདྷཱ པཙྩཡོ ཧོཏི། ཀིཉྩི པནེཏྠ ཧེཏུཔཙྩཡེན ཀིཉྩི ཨཱཧཱརཔཙྩཡེནཱཏི ཨེཝཾ ཨུཀྐཾསཱཝཀཾསོ ཝེདིཏབྦོ། ཨིཏརེསཾ པན པཉྩཱཡཏནཱནཾ ཙཏུནྣཾ མཧཱབྷཱུཏཱནཾ སཧཱཡོ ཧུཏྭཱ སཧཛཱཏནིསྶཡཝིཔཱཀཝིཔྤཡུཏྟཨཏྠིཨཝིགཏཝསེན ཚདྷཱ པཙྩཡོ ཧོཏི། ཀིཉྩི པནེཏྠ ཧེཏུཔཙྩཡེན ཀིཉྩི ཨཱཧཱརཔཙྩཡེནཱཏི སབྦཾ པུརིམསདིསཾ། པཝཏྟེ ཝིཔཱཀནཱམཾ ཝིཔཱཀསྶ ཚཊྛཱཡཏནསྶ ཝུཏྟནཡེན སཏྟདྷཱ པཙྩཡོ ཧོཏི, ཨཝིཔཱཀཾ པན ཨཝིཔཱཀསྶ ཚཊྛསྶ ཏཏོ ཝིཔཱཀཔཙྩཡཾ ཨཔནེཏྭཱ པཙྩཡོ ཧོཏི། ཙཀྑཱཡཏནཱདཱིནཾ པན པཙྩུཔྤནྣཾ ཙཀྑུཔསཱདཱདིཝཏྠུཀམྤི ཨིཏརམྤི ཝིཔཱཀནཱམཾ པཙྪཱཛཱཏཝིཔྤཡུཏྟཨཏྠིཨཝིགཏཔཙྩཡེཧི ཙཏུདྷཱ པཙྩཡོ ཧོཏི, ཏཐཱ ཨཝིཔཱཀམྤི ཝེདིཏབྦཾ། རཱུཔཏོ པན ཝཏྠུརཱུཔཾ པཊིསནྡྷིཡཾ ཚཊྛསྶ སཧཛཱཏཨཉྙམཉྙནིསྶཡཝིཔྤཡུཏྟཨཏྠིཨཝིགཏཔཙྩཡེཧི ཚདྷཱ པཙྩཡོ ཧོཏི། ཙཏྟཱརི པན བྷཱུཏཱནི ཙཀྑཱཡཏནཱདཱིནཾ པཉྩནྣཾ སཧཛཱཏནིསྶཡཨཏྠིཨཝིགཏཔཙྩཡེཧི ཙཏུདྷཱ པཙྩཡོ ཧོཏི། རཱུཔཛཱིཝིཏཾ ཨཏྠིཨཝིགཏིནྡྲིཡཝསེན ཏིདྷཱ པཙྩཡོ ཧོཏཱིཏི ཨཡཉྷེཏྠ སངྑེཔོ, ཝིཏྠཱརོ པན ཝིསུདྡྷིམགྒཏོ (ཝིསུདྡྷི॰ ༢.༥༩༤) གཧེཏབྦོ།
Tatrāyaṃ paccayavibhāgo – nāmanti vedanādikhandhattayaṃ idhādhippetaṃ, rūpaṃ pana sattasantatipariyāpannaṃ, niyamato cattāri bhūtāni cha vatthūni jīvitindriyaṃ āhāro ca. Tattha vipākanāmaṃ paṭisandhikkhaṇe hadayavatthuno sahāyo hutvā chaṭṭhassa manāyatanassa sahajātaaññamaññanissayasampayuttavipākaatthiavigatapaccayehi sattadhā paccayo hoti. Kiñci panettha hetupaccayena kiñci āhārapaccayenāti evaṃ ukkaṃsāvakaṃso veditabbo. Itaresaṃ pana pañcāyatanānaṃ catunnaṃ mahābhūtānaṃ sahāyo hutvā sahajātanissayavipākavippayuttaatthiavigatavasena chadhā paccayo hoti. Kiñci panettha hetupaccayena kiñci āhārapaccayenāti sabbaṃ purimasadisaṃ. Pavatte vipākanāmaṃ vipākassa chaṭṭhāyatanassa vuttanayena sattadhā paccayo hoti, avipākaṃ pana avipākassa chaṭṭhassa tato vipākapaccayaṃ apanetvā paccayo hoti. Cakkhāyatanādīnaṃ pana paccuppannaṃ cakkhupasādādivatthukampi itarampi vipākanāmaṃ pacchājātavippayuttaatthiavigatapaccayehi catudhā paccayo hoti, tathā avipākampi veditabbaṃ. Rūpato pana vatthurūpaṃ paṭisandhiyaṃ chaṭṭhassa sahajātaaññamaññanissayavippayuttaatthiavigatapaccayehi chadhā paccayo hoti. Cattāri pana bhūtāni cakkhāyatanādīnaṃ pañcannaṃ sahajātanissayaatthiavigatapaccayehi catudhā paccayo hoti. Rūpajīvitaṃ atthiavigatindriyavasena tidhā paccayo hotīti ayañhettha saṅkhepo, vitthāro pana visuddhimaggato (visuddhi. 2.594) gahetabbo.
པཉྷསྶ ཨོཀཱསཾ དེནྟོཏི ‘‘ཀོ ནུ ཁོ, བྷནྟེ, ཕུསཏཱི’’ཏི ཨིམསྶ དིཊྛིགཏིཀཔཉྷསྶ ཨོཀཱསཾ དེནྟོ། ཏཏོ ཝིཝེཙེཏུཀཱམོཏི ཨདྷིཔྤཱཡོ། སབྦཔདེསཱུཏི དིཊྛིགཏིཀེན བྷགཝཏཱ ཙ ཝུཏྟཔདེསུ། སཏྟོཏི ཨཏྟཱ། སོ པན ཨུཙྪེདཝཱདིནོཔི ཡཱཝ ན ཨུཙྪིཛྫཏི, ཏཱཝ ཨཏྠེཝཱཏི ལདྡྷི, པགེཝ སསྶཏཝཱདིནོ། བྷཱུཏོཏི ཝིཛྫམཱནོ། ནིཔྥཏྟོཏི ནིཔྥནྣོ། ན ཏསྶ དཱནི ནིཔྥཱདེཏབྦཾ ཀིཉྩི ཨཏྠཱིཏི ལདྡྷི། ཨིདཔྤཙྩཡཱ ཨིདནྟི ཨིམསྨཱ ཝིཉྙཱཎཱཧཱརཔཙྩཡཱ ཨིདཾ ནཱམརཱུཔཾ། པུན ཨིདཔྤཙྩཡཱ ཨིདནྟི ཨིམསྨཱ ནཱམརཱུཔཔཙྩཡཱ ཨིདཾ སལཱ༹ཡཏནནྟི ཨེཝཾ བཧཱུསུ ཋཱནེསུ བྷགཝཏཱ ཀཐིཏཏྟཱ ཡཐཱ པཙྩཡཏོ ནིབྦཏྟཾ སངྑཱརམཏྟམིདནྟི སཉྙཏྟིཾ ཨུཔགཏོ། ཏེནཱཔཱིཏི སཉྙཏྟུཔགཏེནཱཔི། ཨེཀཱབདྡྷཾ ཀཏྭཱཏི ཡཐཱ པུཙྪཱཡ ཨཝསརོ ན ཧོཏི, ཏཐཱ ཨེཀཱབདྡྷཾ ཀཏྭཱ། དེསནཱརུལ༹ྷནྟི ཡཏོ སལཱ༹ཡཏནཔདཏོ པཊྛཱཡ ‘‘སལཱ༹ཡཏནཔཙྩཡཱ ཕསྶོ’’ཏིཨཱདིནཱ དེསནཱ པཊིཙྩསམུཔྤཱདཝཱིཐིཾ ཨཱརུལ༹ྷམེཝ། ཏམེཝཱཏི སལཱ༹ཡཏནཔདམེཝ གཧེཏྭཱ། ཝིཝཛྫེནྟོཏི ཝིཝཊྚེནྟོ། ཨེཝམཱཧཱཏི ‘‘ཚནྣཾཏྭེཝཱ’’ཏིཨཱདིཨཱཀཱརེན ཨེཝཾ དེསིཏེ, ‘‘ཝིནེཡྻཛནོ པཊིཝིཛ྄ཛྷཏཱི’’ཏི ཨེཝམཱཧ། ཝིཉྙཱཎཱཧཱརོ ཨཱཡཏིཾ པུནབྦྷཝཱབྷིནིབྦཏྟིཡཱཏི ཨེཝཾ པུརིམབྷཝཏོ ཨཱཡཏིབྷཝསྶ པཙྩཡཝསེན མཱུལཀཱརཎཝསེན ཙ དེསིཏཏྟཱ ‘‘ཝིཉྙཱཎནཱམརཱུཔཱནཾ ཨནྟརེ ཨེཀོ སནྡྷཱི’’ཏི ཝུཏྟཾ། ཏདམིནཱ ཝིཉྙཱཎགྒཧཎེན ཨབྷིསངྑཱརཝིཉྙཱཎསྶཱཔི གཧཎཾ ཀཏནྟི དཊྛབྦཾ།
Pañhassa okāsaṃ dentoti ‘‘ko nu kho, bhante, phusatī’’ti imassa diṭṭhigatikapañhassa okāsaṃ dento. Tato vivecetukāmoti adhippāyo. Sabbapadesūti diṭṭhigatikena bhagavatā ca vuttapadesu. Sattoti attā. So pana ucchedavādinopi yāva na ucchijjati, tāva atthevāti laddhi, pageva sassatavādino. Bhūtoti vijjamāno. Nipphattoti nipphanno. Na tassa dāni nipphādetabbaṃ kiñci atthīti laddhi. Idappaccayā idanti imasmā viññāṇāhārapaccayā idaṃ nāmarūpaṃ. Puna idappaccayā idanti imasmā nāmarūpapaccayā idaṃ saḷāyatananti evaṃ bahūsu ṭhānesu bhagavatā kathitattā yathā paccayato nibbattaṃ saṅkhāramattamidanti saññattiṃ upagato. Tenāpīti saññattupagatenāpi. Ekābaddhaṃ katvāti yathā pucchāya avasaro na hoti, tathā ekābaddhaṃ katvā. Desanāruḷhanti yato saḷāyatanapadato paṭṭhāya ‘‘saḷāyatanapaccayā phasso’’tiādinā desanā paṭiccasamuppādavīthiṃ āruḷhameva. Tamevāti saḷāyatanapadameva gahetvā. Vivajjentoti vivaṭṭento. Evamāhāti ‘‘channaṃtvevā’’tiādiākārena evaṃ desite, ‘‘vineyyajano paṭivijjhatī’’ti evamāha. Viññāṇāhāro āyatiṃ punabbhavābhinibbattiyāti evaṃ purimabhavato āyatibhavassa paccayavasena mūlakāraṇavasena ca desitattā ‘‘viññāṇanāmarūpānaṃ antare eko sandhī’’ti vuttaṃ. Tadaminā viññāṇaggahaṇena abhisaṅkhāraviññāṇassāpi gahaṇaṃ katanti daṭṭhabbaṃ.
མོལི༹ཡཕགྒུནསུཏྟཝཎྞནཱ ནིཊྛིཏཱ།
Moḷiyaphaggunasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༢. མོལི༹ཡཕགྒུནསུཏྟཾ • 2. Moḷiyaphaggunasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༢. མོལི༹ཡཕགྒུནསུཏྟཝཎྞནཱ • 2. Moḷiyaphaggunasuttavaṇṇanā
