| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
10. மோனெய்யஸுத்தவண்ணனா
10. Moneyyasuttavaṇṇanā
123. த³ஸமே மோனெய்யானீதி முனிபா⁴வா. காயமோனெய்யந்தி காயத்³வாரே முனிபா⁴வோ ஸாது⁴பா⁴வோ பண்டி³தபா⁴வோ. ஸேஸத்³வயேபி ஏஸேவ நயோ. இத³ங் வுச்சதி, பி⁴க்க²வே, காயமோனெய்யந்தி இத³ங் திவித⁴காயது³ச்சரிதப்பஹானங் காயமோனெய்யங் நாம. அபிச திவித⁴ங் காயஸுசரிதம்பி காயமோனெய்யங், ததா² காயாரம்மணங் ஞாணங் காயமோனெய்யங், காயபரிஞ்ஞா காயமோனெய்யங், பரிஞ்ஞாஸஹக³தோ மக்³கோ³ காயமோனெய்யங், காயே ச²ந்த³ராக³ஸ்ஸ பஹானங் காயமோனெய்யங், காயஸங்கா²ரனிரோதோ⁴ சதுத்த²ஜ்ஜா²னஸமாபத்தி காயமோனெய்யங். வசீமோனெய்யேபி ஏஸேவ நயோ.
123. Dasame moneyyānīti munibhāvā. Kāyamoneyyanti kāyadvāre munibhāvo sādhubhāvo paṇḍitabhāvo. Sesadvayepi eseva nayo. Idaṃ vuccati, bhikkhave, kāyamoneyyanti idaṃ tividhakāyaduccaritappahānaṃ kāyamoneyyaṃ nāma. Apica tividhaṃ kāyasucaritampi kāyamoneyyaṃ, tathā kāyārammaṇaṃ ñāṇaṃ kāyamoneyyaṃ, kāyapariññā kāyamoneyyaṃ, pariññāsahagato maggo kāyamoneyyaṃ, kāye chandarāgassa pahānaṃ kāyamoneyyaṃ, kāyasaṅkhāranirodho catutthajjhānasamāpatti kāyamoneyyaṃ. Vacīmoneyyepi eseva nayo.
அயங் பனெத்த² விஸேஸோ – யதா² இத⁴ சதுத்த²ஜ்ஜா²னஸமாபத்தி, ஏவங் தத்த² வசீஸங்கா²ரனிரோதோ⁴ து³தியஜ்ஜா²னஸமாபத்தி வசீமோனெய்யந்தி வேதி³தப்³பா³. மனோமோனெய்யம்பி இமினாவ நயேன அத்த²ங் ஞத்வா சித்தஸங்கா²ரனிரோதோ⁴ ஸஞ்ஞாவேத³யிதனிரோத⁴ஸமாபத்தி மனோமோனெய்யந்தி வேதி³தப்³பா³. காயமுனிந்தி காயத்³வாரே முனிங் உத்தமங் பரிஸுத்³த⁴ங், காயேன வா முனிங். ஸேஸத்³வயேபி ஏஸேவ நயோ. ஸப்³ப³ப்பஹாயினந்தி கீ²ணாஸவங். கீ²ணாஸவோ ஹி ஸப்³ப³ப்பஹாயீ நாமாதி.
Ayaṃ panettha viseso – yathā idha catutthajjhānasamāpatti, evaṃ tattha vacīsaṅkhāranirodho dutiyajjhānasamāpatti vacīmoneyyanti veditabbā. Manomoneyyampi imināva nayena atthaṃ ñatvā cittasaṅkhāranirodho saññāvedayitanirodhasamāpatti manomoneyyanti veditabbā. Kāyamuninti kāyadvāre muniṃ uttamaṃ parisuddhaṃ, kāyena vā muniṃ. Sesadvayepi eseva nayo. Sabbappahāyinanti khīṇāsavaṃ. Khīṇāsavo hi sabbappahāyī nāmāti.
ஆபாயிகவக்³கோ³ து³தியோ.
Āpāyikavaggo dutiyo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. மோனெய்யஸுத்தங் • 10. Moneyyasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 10. மோனெய்யஸுத்தவண்ணனா • 10. Moneyyasuttavaṇṇanā
