| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
மூலபஞ்ஞத்திவண்ணனா
Mūlapaññattivaṇṇanā
55. நித்³தி³ஸிதப்³ப³ஸ்ஸாதி விவரிதப்³ப³ஸ்ஸ பகாஸேதப்³ப³ஸ்ஸ. கிலேஸேஹீதி அஹிரிகாதீ³ஹி கிலேஸேஹி. இதோ பட்டா²யாதி து³ட்டு²ல்ல-பத³தோ பட்டா²ய. தஸ்ஸ கம்மஸ்ஸாதி மேது²னத⁴ம்மபடிஸேவனஸங்கா²தஸ்ஸ கம்மஸ்ஸ. த³ஸ்ஸனந்திஆதி³ வுத்தனயமேவ. அஸ்ஸாதி மேது²னத⁴ம்மஸ்ஸ.
55.Niddisitabbassāti vivaritabbassa pakāsetabbassa. Kilesehīti ahirikādīhi kilesehi. Ito paṭṭhāyāti duṭṭhulla-padato paṭṭhāya. Tassa kammassāti methunadhammapaṭisevanasaṅkhātassa kammassa. Dassanantiādi vuttanayameva. Assāti methunadhammassa.
த்³வீஹி த்³வீஹி ஸமாபஜ்ஜிதப்³பா³ த்³வயங்த்³வயஸமாபத்தீதி ஆஹ ‘‘த்³வயேன த்³வயேன ஸமாபஜ்ஜிதப்³ப³தோ’’தி. ராக³பரியுட்டா²னேன ஸதி³ஸபா⁴வப்பத்தியா மிது²னானங் இத³ங் மேது²னங், மேது²னமேவ த⁴ம்மோ மேது²னத⁴ம்மோதி ஆஹ ‘‘உபி⁴ன்னங் ரத்தான’’ந்திஆதி³. தத்த² ரத்தானந்தி மேது²னராகே³ன ரத்தானங். ஸாரத்தானந்தி தேனேவ ராகே³ன அதிவிய ரத்தானங். அவஸ்ஸுதானந்தி லோகஸ்ஸாத³மித்தஸந்த²வவஸேன உப்பன்னமேது²னராகே³ன திந்தானங். பரியுட்டி²தானந்தி மேது²னராகு³ப்பத்தியா பரியோனத்³த⁴சித்தானங். ஸதி³ஸானந்தி ரத்ததாதீ³ஹி ஸதி³ஸானங்.
Dvīhi dvīhi samāpajjitabbā dvayaṃdvayasamāpattīti āha ‘‘dvayena dvayena samāpajjitabbato’’ti. Rāgapariyuṭṭhānena sadisabhāvappattiyā mithunānaṃ idaṃ methunaṃ, methunameva dhammo methunadhammoti āha ‘‘ubhinnaṃ rattāna’’ntiādi. Tattha rattānanti methunarāgena rattānaṃ. Sārattānanti teneva rāgena ativiya rattānaṃ. Avassutānanti lokassādamittasanthavavasena uppannamethunarāgena tintānaṃ. Pariyuṭṭhitānanti methunarāguppattiyā pariyonaddhacittānaṃ. Sadisānanti rattatādīhi sadisānaṃ.
யஸ்மா ‘‘படிஸேவதி நாமா’’தி பத³ங் மாதிகாய நத்தி², தஸ்மா ‘‘படிஸேவதி நாமாதி கஸ்மா உத்³த⁴ட’’ந்தி யோ மஞ்ஞதி, தஸ்ஸ காரணங் த³ஸ்ஸெந்தோ ‘‘படிஸேவெய்யாதி எத்த²…பே॰… மாதிகாபத³’’ந்தி ஆஹ. இத்தி²யா நிமித்தேனாதி இத³ங் ‘‘மக்³கே³ன க³ச்ச²தீ’’திஆதி³ விய த³ட்ட²ப்³ப³ங். யதா² ஹி ‘‘மக்³கே³ன க³ச்ச²தீ’’தி வுத்தே ‘‘மக்³க³ங் க³ச்ச²தி, மக்³கே³ வா க³ச்ச²தீ’’தி அயமத்தோ² லப்³ப⁴தி, ஏவங் ‘‘இத்தி²யா நிமித்தேன பவேஸேதீ’’தி வுத்தே ‘‘இத்தி²யா நிமித்தங் பவேஸேதி, நிமித்தே வா பவேஸேதீ’’தி அயமத்தோ² லப்³ப⁴தி. இத³ஞ்ச யேபு⁴ய்யேன புரிஸபயோக³த³ஸ்ஸனத்த²ங் வுத்தங். நிமித்தங் அங்க³ஜாதந்தி அத்த²தோ ஏகங். பவேஸனங் நாம ந ப³ஹி சு²பனமத்தந்தி ஆஹ ‘‘வாதேன அஸம்பு²ட்டே² அல்லோகாஸே’’தி. அப்³ப⁴ந்தரஞ்ஹி பவேஸெந்தோ ‘‘பவேஸேதீ’’தி வுச்சதி, ந ப³ஹி சு²பந்தோ. அப்³ப⁴ந்தரந்தி ச பகதியா ஸப்³ப³ஸோ பிஹிதஸ்ஸ நிமித்தஸ்ஸ வாதேன அஸம்பு²ட்டோ²காஸோ வுச்சதீதி.
Yasmā ‘‘paṭisevati nāmā’’ti padaṃ mātikāya natthi, tasmā ‘‘paṭisevati nāmāti kasmā uddhaṭa’’nti yo maññati, tassa kāraṇaṃ dassento ‘‘paṭiseveyyāti ettha…pe… mātikāpada’’nti āha. Itthiyā nimittenāti idaṃ ‘‘maggena gacchatī’’tiādi viya daṭṭhabbaṃ. Yathā hi ‘‘maggena gacchatī’’ti vutte ‘‘maggaṃ gacchati, magge vā gacchatī’’ti ayamattho labbhati, evaṃ ‘‘itthiyā nimittena pavesetī’’ti vutte ‘‘itthiyā nimittaṃ paveseti, nimitte vā pavesetī’’ti ayamattho labbhati. Idañca yebhuyyena purisapayogadassanatthaṃ vuttaṃ. Nimittaṃ aṅgajātanti atthato ekaṃ. Pavesanaṃ nāma na bahi chupanamattanti āha ‘‘vātena asamphuṭṭhe allokāse’’ti. Abbhantarañhi pavesento ‘‘pavesetī’’ti vuccati, na bahi chupanto. Abbhantaranti ca pakatiyā sabbaso pihitassa nimittassa vātena asamphuṭṭhokāso vuccatīti.
இதா³னி ஸப்³ப³தா² லேஸோகாஸபித³ஹனத்த²ங் இத்தி²னிமித்தே புரிஸனிமித்தே ச லப்³ப⁴மானங் பவேஸகாலே அஞ்ஞமஞ்ஞங் ப²ஸ்ஸாரஹங் பதே³ஸவிஸேஸங் விப⁴ஜித்வா த³ஸ்ஸெந்தோ ‘‘இத்தி²னிமித்தே சத்தாரி பஸ்ஸானீ’’திஆதி³மாஹ. வாதேன ஹி அஸம்பு²ட்டே² அல்லோகாஸே யத்த² கத்த²சி ஏகேனபி பதே³ஸேன சு²பித்வா பவேஸெந்தோ ‘‘பவேஸேதீ’’தி வுச்சதி. வேமஜ்ஜ²ந்தி யதா² சத்தாரி பஸ்ஸானி அஸம்பு²ஸந்தோ பவேஸேதி, ஏவங் கதவிவரஸ்ஸ இத்தி²னிமித்தஸ்ஸ ஹெட்டி²மதலங் வுச்சதி , புரிஸனிமித்தே பன மஜ்ஜ²ந்தி அக்³க³கோடிங் ஸந்தா⁴ய வத³தி. உபரீதி அக்³க³கோடிதோ உபரிபா⁴க³ப்பதே³ஸோ. இத³ஞ்ச மஜ்ஜே²ன ஸமிஞ்ஜித்வா பவேஸெந்தஸ்ஸ மஜ்ஜி²மபப்³ப³ஸமிஞ்ஜிதங்கு³லிங் கத்த²சி பவேஸெந்தஸ்ஸ அங்கு³லியா மஜ்ஜி²மபப்³ப³பிட்டி²ஸதி³ஸங் அங்க³ஜாதஸ்ஸ உபரிபா⁴க³வேமஜ்ஜ²ங் ஸந்தா⁴ய வுத்தங். ஹெட்டா² பவேஸெந்தோதி இத்தி²னிமித்தஸ்ஸ ஹெட்டி²மபா⁴கே³ன சு²பந்தங் பவேஸெந்தோ. மஜ்ஜே²ன பவேஸெந்தோதி அப்³ப⁴ந்தரதலங் சு²பித்வா மஜ்ஜே²ன பவேஸெந்தோ. கத்த²சி அச்சு²பந்தங் பவேஸெத்வா நீஹரந்தஸ்ஸ ஹி நத்தி² பாராஜிகங், து³க்கடங் பன ஹோதி சி²ன்னஸீஸவத்து²ஸ்மிங் வட்டகதே முகே² அச்சு²பந்தங் பவேஸெத்வா நீஹரந்தஸ்ஸ விய. மஜ்ஜே²னேவ சு²பந்தங் பவேஸெந்தோதி அக்³க³கோடியா சு²பந்தங் பவேஸெந்தோ. மஜ்ஜி²மபப்³ப³பிட்டி²யா ஸமிஞ்ஜிதங்கு³லிந்தி ஸம்ப³ந்தோ⁴. அத² வா ஸமிஞ்ஜிதங்கு³லிங் மஜ்ஜி²மபப்³ப³பிட்டி²யா பவேஸெந்தோ வியாதி யோஜேதப்³ப³ங். ஸங்கோசெத்வாதி நிமித்தமஜ்ஜே²ன பி⁴ந்தி³த்வா. உபரிபா⁴கே³னாதி ஸங்கோசிதஸ்ஸ உபரிபா⁴க³கோடியா. இதா³னி புரிஸனிமித்தஸ்ஸ ஹெட்டா² வுத்தேஸு ச²ஸு டா²னேஸு உபரீதி வுத்தட்டா²னந்தரஸ்ஸ வஸேன விஸுங் சத்தாரி பஸ்ஸானி க³ஹெத்வா புரிஸனிமித்தே த³ஸதா⁴ டா²னபே⁴த³ங் த³ஸ்ஸெந்தோ ‘‘தத்தா²’’திஆதி³மாஹ. ஹெட்டா² பன விஸுங் தானி அக்³க³ஹெத்வா ‘‘சத்தாரி பஸ்ஸானீ’’தி வசனஸாமஞ்ஞதோபி விஸுங் விஸுங் லப்³ப⁴மானானி ஏகச்சங் க³ஹெத்வா ச² டா²னானி வுத்தானி. துலாத³ண்ட³ஸதி³ஸங் பவேஸெந்தஸ்ஸாதி உஜுகங் பவேஸெந்தஸ்ஸ.
Idāni sabbathā lesokāsapidahanatthaṃ itthinimitte purisanimitte ca labbhamānaṃ pavesakāle aññamaññaṃ phassārahaṃ padesavisesaṃ vibhajitvā dassento ‘‘itthinimitte cattāri passānī’’tiādimāha. Vātena hi asamphuṭṭhe allokāse yattha katthaci ekenapi padesena chupitvā pavesento ‘‘pavesetī’’ti vuccati. Vemajjhanti yathā cattāri passāni asamphusanto paveseti, evaṃ katavivarassa itthinimittassa heṭṭhimatalaṃ vuccati , purisanimitte pana majjhanti aggakoṭiṃ sandhāya vadati. Uparīti aggakoṭito uparibhāgappadeso. Idañca majjhena samiñjitvā pavesentassa majjhimapabbasamiñjitaṅguliṃ katthaci pavesentassa aṅguliyā majjhimapabbapiṭṭhisadisaṃ aṅgajātassa uparibhāgavemajjhaṃ sandhāya vuttaṃ. Heṭṭhā pavesentoti itthinimittassa heṭṭhimabhāgena chupantaṃ pavesento. Majjhena pavesentoti abbhantaratalaṃ chupitvā majjhena pavesento. Katthaci acchupantaṃ pavesetvā nīharantassa hi natthi pārājikaṃ, dukkaṭaṃ pana hoti chinnasīsavatthusmiṃ vaṭṭakate mukhe acchupantaṃ pavesetvā nīharantassa viya. Majjheneva chupantaṃ pavesentoti aggakoṭiyā chupantaṃ pavesento. Majjhimapabbapiṭṭhiyā samiñjitaṅgulinti sambandho. Atha vā samiñjitaṅguliṃ majjhimapabbapiṭṭhiyā pavesento viyāti yojetabbaṃ. Saṅkocetvāti nimittamajjhena bhinditvā. Uparibhāgenāti saṅkocitassa uparibhāgakoṭiyā. Idāni purisanimittassa heṭṭhā vuttesu chasu ṭhānesu uparīti vuttaṭṭhānantarassa vasena visuṃ cattāri passāni gahetvā purisanimitte dasadhā ṭhānabhedaṃ dassento ‘‘tatthā’’tiādimāha. Heṭṭhā pana visuṃ tāni aggahetvā ‘‘cattāri passānī’’ti vacanasāmaññatopi visuṃ visuṃ labbhamānāni ekaccaṃ gahetvā cha ṭhānāni vuttāni. Tulādaṇḍasadisaṃ pavesentassāti ujukaṃ pavesentassa.
நிமித்தே ஜாதந்தி அத்தனோ நிமித்தே ஜாதங். சம்மகீ²லந்தி நிமித்தே உட்டி²தங் சம்மமேவ. ‘‘உண்ணிக³ண்டோ³’’திபி வத³ந்தி. நிமித்தே ஜாதம்பி சம்மகீ²லாதி³ நிமித்தமேவாதி ஆஹ ‘‘ஆபத்தி பாராஜிகஸ்ஸா’’தி. ‘‘உபஹதகாயப்பஸாத³’’ந்தி அவத்வா ‘‘நட்ட²காயப்பஸாத³’’ந்தி வசனங் உபாதி³ன்னபா⁴வஸ்ஸ நத்தி²தாத³ஸ்ஸனத்த²ங். தேனேவாஹ – ‘‘மதசம்மங் வா ஸுக்க²பீளகங் வா’’தி. ஸதி ஹி உபாதி³ன்னபா⁴வே உபஹதேபி காயப்பஸாதே³ உபஹதிந்த்³ரியவத்து²ஸ்மிங் விய பாராஜிகாபத்தியேவ ஸியா, மதசம்மங் பன ஸுக்க²பீளகஞ்ச அனுபாதி³ன்னகங் உபாதி³ன்னகேயேவ ச பாராஜிகாபத்தி. தேனேவாஹ ‘‘ஆபத்தி து³க்கடஸ்ஸா’’தி. ந ச ஏவங் கரொந்தஸ்ஸ அனாபத்தி ஸக்கா வத்துந்தி து³க்கடங் வுத்தங், இத்தி²னிமித்தஸ்ஸ பன நட்டே²பி உபாதி³ன்னபா⁴வே பாராஜிகாபத்தியேவ. மதே அக்கா²யிதே யேபு⁴ய்யேன அக்கா²யிதே பாராஜிகாபத்திவசனதோ மேது²னஸ்ஸாதே³னாதி இமினா காயஸங்ஸக்³க³ராக³ங் நிவத்தேதி. ஸதி ஹி காயஸங்ஸக்³க³ராகே³ ஸங்கா⁴தி³ஸேஸோவ ஸியா, பீ³ஜானிபி நிமித்தஸங்க்²யங் ந க³ச்ச²ந்தீதி து³க்கடமேவ வுத்தங். ‘‘நிமித்தேன நிமித்தங் பவேஸேதீ’’தி ஹி வுத்தங்.
Nimitte jātanti attano nimitte jātaṃ. Cammakhīlanti nimitte uṭṭhitaṃ cammameva. ‘‘Uṇṇigaṇḍo’’tipi vadanti. Nimitte jātampi cammakhīlādi nimittamevāti āha ‘‘āpatti pārājikassā’’ti. ‘‘Upahatakāyappasāda’’nti avatvā ‘‘naṭṭhakāyappasāda’’nti vacanaṃ upādinnabhāvassa natthitādassanatthaṃ. Tenevāha – ‘‘matacammaṃ vā sukkhapīḷakaṃ vā’’ti. Sati hi upādinnabhāve upahatepi kāyappasāde upahatindriyavatthusmiṃ viya pārājikāpattiyeva siyā, matacammaṃ pana sukkhapīḷakañca anupādinnakaṃ upādinnakeyeva ca pārājikāpatti. Tenevāha ‘‘āpatti dukkaṭassā’’ti. Na ca evaṃ karontassa anāpatti sakkā vattunti dukkaṭaṃ vuttaṃ, itthinimittassa pana naṭṭhepi upādinnabhāve pārājikāpattiyeva. Mate akkhāyite yebhuyyena akkhāyite pārājikāpattivacanato methunassādenāti iminā kāyasaṃsaggarāgaṃ nivatteti. Sati hi kāyasaṃsaggarāge saṅghādisesova siyā, bījānipi nimittasaṅkhyaṃ na gacchantīti dukkaṭameva vuttaṃ. ‘‘Nimittena nimittaṃ pavesetī’’ti hi vuttaṃ.
இதா³னி இமிஸ்ஸா மேது²னகதா²ய அஸப்³பி⁴ரூபத்தா ‘‘ஈதி³ஸங் டா²னங் கதெ²ந்தேஹி ஸுணந்தேஹி ச ஏவங் படிபஜ்ஜிதப்³ப³’’ந்தி அனுஸாஸந்தோ ‘‘அயஞ்ச மேது²னகதா² நாமா’’திஆதி³மாஹ. மேது²னகதா²ய ராக³வுத்³தி⁴ஹேதுத்தா ஹாஸவிஸயத்தா ச தது³ப⁴யனிவத்தனத்த²ங் படிகூலமனஸிகாராதீ³ஸு நியோஜேதி. படிகூலமனஸிகாரேன ஹி ராகோ³ நிவத்ததி, ஸமணஸஞ்ஞாதீ³ஸு பச்சுபட்டி²தேஸு ஹாஸோ நிவத்ததி. ஸத்தானுத்³த³யாயாதி ஸத்தானங் அபாயது³க்கா²தீ³ஹி அனுரக்க²ணத்த²ங். லோகானுகம்பாயாதி ஸத்தலோகவிஸயாய அனுகம்பாய.
Idāni imissā methunakathāya asabbhirūpattā ‘‘īdisaṃ ṭhānaṃ kathentehi suṇantehi ca evaṃ paṭipajjitabba’’nti anusāsanto ‘‘ayañca methunakathā nāmā’’tiādimāha. Methunakathāya rāgavuddhihetuttā hāsavisayattā ca tadubhayanivattanatthaṃ paṭikūlamanasikārādīsu niyojeti. Paṭikūlamanasikārena hi rāgo nivattati, samaṇasaññādīsu paccupaṭṭhitesu hāso nivattati. Sattānuddayāyāti sattānaṃ apāyadukkhādīhi anurakkhaṇatthaṃ. Lokānukampāyāti sattalokavisayāya anukampāya.
முக²ங் அபிதா⁴யாதி முக²ங் அபித³ஹித்வா, யேன கேனசி பமாதே³ன கதா³சி மந்த³ஹாஸோ ப⁴வெய்ய, ததா³ க³ருத்தங் குப்பெய்ய, தஸ்மா தாதி³ஸே காலே க³ருபா⁴வஸ்ஸ அவிகோபனத்த²ங் பீ³ஜகேன முக²ங் படிச்சா²தெ³த்வா நிஸீதி³தப்³ப³ந்தி அதி⁴ப்பாயோ. அத² வா முக²ங் அபிதா⁴யாதி முக²ங் பித³ஹித்வாதி அத்தோ². பீ³ஜகேன முக²ங் படிச்சா²தெ³த்வா ஹஸமானேன ந நிஸீதி³தப்³ப³ந்தி அயமெத்த² அதி⁴ப்பாயோ. த³ந்தவித³ங்ஸகந்தி த³ந்தே த³ஸ்ஸெத்வா விவரித்வா சாதி அத்தோ². க³ப்³பி⁴தேனாதி ஸங்கோசங் அனாபஜ்ஜந்தேன, உஸ்ஸாஹஜாதேனாதி அத்தோ². யதி³ ஹி ‘‘ஈதி³ஸங் நாம அஸப்³பி⁴ங் கதே²மீ’’தி ஸங்கோசங் ஆபஜ்ஜெய்ய, அத்த²விபா⁴வனங் ந ஸியா, தஸ்மா ‘‘தாதி³ஸேன ஸம்மாஸம்பு³த்³தே⁴னபி தாவ ஈதி³ஸங் கதி²தங், கிமங்க³ங் பனாஹங் கதே²மீ’’தி ஏவங் உஸ்ஸாஹஜாதேன கதே²தப்³ப³ந்தி அதி⁴ப்பாயோ. ஸத்து²படிபா⁴கே³னாதி ஸத்து²கப்பேன, ஸத்து²ஸதி³ஸேனாதி அத்தோ².
Mukhaṃ apidhāyāti mukhaṃ apidahitvā, yena kenaci pamādena kadāci mandahāso bhaveyya, tadā garuttaṃ kuppeyya, tasmā tādise kāle garubhāvassa avikopanatthaṃ bījakena mukhaṃ paṭicchādetvā nisīditabbanti adhippāyo. Atha vā mukhaṃ apidhāyāti mukhaṃ pidahitvāti attho. Bījakena mukhaṃ paṭicchādetvā hasamānena na nisīditabbanti ayamettha adhippāyo. Dantavidaṃsakanti dante dassetvā vivaritvā cāti attho. Gabbhitenāti saṅkocaṃ anāpajjantena, ussāhajātenāti attho. Yadi hi ‘‘īdisaṃ nāma asabbhiṃ kathemī’’ti saṅkocaṃ āpajjeyya, atthavibhāvanaṃ na siyā, tasmā ‘‘tādisena sammāsambuddhenapi tāva īdisaṃ kathitaṃ, kimaṅgaṃ panāhaṃ kathemī’’ti evaṃ ussāhajātena kathetabbanti adhippāyo. Satthupaṭibhāgenāti satthukappena, satthusadisenāti attho.
மூலபஞ்ஞத்திவண்ணனா நிட்டி²தா.
Mūlapaññattivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. பட²மபாராஜிகங் • 1. Paṭhamapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 1. பட²மபாராஜிகங் • 1. Paṭhamapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / மூலபஞ்ஞத்திகதா²வண்ணனா • Mūlapaññattikathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / மூலபஞ்ஞத்திவண்ணனா • Mūlapaññattivaṇṇanā
