Library / Tipiṭaka / တိပိဋက • Tipiṭaka / မဟာဝိဘင္ဂ • Mahāvibhaṅga

။ နမော တသ္သ ဘဂဝတော အရဟတော သမ္မာသမ္ဗုဒ္ဓသ္သ။

Namo tassa bhagavato arahato sammāsambuddhassa

ဝိနယပိဋကေ

Vinayapiṭake

ပာစိတ္တိယပာဠိ

Pācittiyapāḷi

၅. ပာစိတ္တိယကဏ္ဍံ

5. Pācittiyakaṇḍaṃ

၁. မုသာဝာဒဝဂ္ဂော

1. Musāvādavaggo

၁. မုသာဝာဒသိက္ခာပဒံ

1. Musāvādasikkhāpadaṃ

ဣမေ ခော ပနာယသ္မန္တော ဒ္ဝေနဝုတိ ပာစိတ္တိယာ

Ime kho panāyasmanto dvenavuti pācittiyā

ဓမ္မာ ဥဒ္ဒေသံ အာဂစ္ဆန္တိ။

Dhammā uddesaṃ āgacchanti.

၁. တေန သမယေန ဗုဒ္ဓော ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ တေန ခော ပန သမယေန ဟတ္ထကော သက္ယပုတ္တော ဝာဒက္ခိတ္တော ဟောတိ။ သော တိတ္ထိယေဟိ သဒ္ဓိံ သလ္လပန္တော အဝဇာနိတ္ဝာ ပဋိဇာနာတိ, ပဋိဇာနိတ္ဝာ အဝဇာနာတိ, အညေနညံ ပဋိစရတိ, သမ္ပဇာနမုသာ ဘာသတိ, သင္ကေတံ ကတ္ဝာ ဝိသံဝာဒေတိ။ တိတ္ထိယာ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ ဟတ္ထကော သက္ယပုတ္တော အမ္ဟေဟိ သဒ္ဓိံ သလ္လပန္တော အဝဇာနိတ္ဝာ ပဋိဇာနိသ္သတိ, ပဋိဇာနိတ္ဝာ အဝဇာနိသ္သတိ, အညေနညံ ပဋိစရိသ္သတိ, သမ္ပဇာနမုသာ ဘာသိသ္သတိ, သင္ကေတံ ကတ္ဝာ ဝိသံဝာဒေသ္သတီ’’တိ!

1. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena hatthako sakyaputto vādakkhitto hoti. So titthiyehi saddhiṃ sallapanto avajānitvā paṭijānāti, paṭijānitvā avajānāti, aññenaññaṃ paṭicarati, sampajānamusā bhāsati, saṅketaṃ katvā visaṃvādeti. Titthiyā ujjhāyanti khiyyanti vipācenti – ‘‘kathañhi nāma hatthako sakyaputto amhehi saddhiṃ sallapanto avajānitvā paṭijānissati, paṭijānitvā avajānissati, aññenaññaṃ paṭicarissati, sampajānamusā bhāsissati, saṅketaṃ katvā visaṃvādessatī’’ti!

အသ္သောသုံ ခော ဘိက္ခူ တေသံ တိတ္ထိယာနံ ဥဇ္ဈာယန္တာနံ ခိယ္ယန္တာနံ ဝိပာစေန္တာနံ။ အထ ခော တေ ဘိက္ခူ ယေန ဟတ္ထကော သက္ယပုတ္တော တေနုပသင္ကမိံသု; ဥပသင္ကမိတ္ဝာ ဟတ္ထကံ သက္ယပုတ္တံ ဧတဒဝောစုံ – ‘‘သစ္စံ ကိရ တ္ဝံ, အာဝုသော ဟတ္ထက, တိတ္ထိယေဟိ သဒ္ဓိံ သလ္လပန္တော အဝဇာနိတ္ဝာ ပဋိဇာနာသိ, ပဋိဇာနိတ္ဝာ အဝဇာနာသိ, အညေနညံ ပဋိစရသိ, သမ္ပဇာနမုသာ ဘာသသိ, သင္ကေတံ ကတ္ဝာ ဝိသံဝာဒေသီ’’တိ? ‘‘ဧတေ ခော, အာဝုသော, တိတ္ထိယာ နာမ ယေန ကေနစိ ဇေတဗ္ဗာ; နေဝ တေသံ ဇယော ဒာတဗ္ဗော’’တိ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ ဟတ္ထကော သက္ယပုတ္တော တိတ္ထိယေဟိ သဒ္ဓိံ သလ္လပန္တော အဝဇာနိတ္ဝာ ပဋိဇာနိသ္သတိ, ပဋိဇာနိတ္ဝာ အဝဇာနိသ္သတိ, အညေနညံ ပဋိစရိသ္သတိ, သမ္ပဇာနမုသာ ဘာသိသ္သတိ, သင္ကေတံ ကတ္ဝာ ဝိသံဝာဒေသ္သတီ’’တိ!

Assosuṃ kho bhikkhū tesaṃ titthiyānaṃ ujjhāyantānaṃ khiyyantānaṃ vipācentānaṃ. Atha kho te bhikkhū yena hatthako sakyaputto tenupasaṅkamiṃsu; upasaṅkamitvā hatthakaṃ sakyaputtaṃ etadavocuṃ – ‘‘saccaṃ kira tvaṃ, āvuso hatthaka, titthiyehi saddhiṃ sallapanto avajānitvā paṭijānāsi, paṭijānitvā avajānāsi, aññenaññaṃ paṭicarasi, sampajānamusā bhāsasi, saṅketaṃ katvā visaṃvādesī’’ti? ‘‘Ete kho, āvuso, titthiyā nāma yena kenaci jetabbā; neva tesaṃ jayo dātabbo’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma hatthako sakyaputto titthiyehi saddhiṃ sallapanto avajānitvā paṭijānissati, paṭijānitvā avajānissati, aññenaññaṃ paṭicarissati, sampajānamusā bhāsissati, saṅketaṃ katvā visaṃvādessatī’’ti!

အထ ခော တေ ဘိက္ခူ ဟတ္ထကံ သက္ယပုတ္တံ အနေကပရိယာယေန ဝိဂရဟိတ္ဝာ ဘဂဝတော ဧတမတ္ထံ အာရောစေသုံ။ အထ ခော ဘဂဝာ ဧတသ္မိံ နိဒာနေ ဧတသ္မိံ ပကရဏေ ဘိက္ခုသင္ဃံ သန္နိပာတာပေတ္ဝာ ဟတ္ထကံ သက္ယပုတ္တံ ပဋိပုစ္ဆိ – ‘‘သစ္စံ ကိရ တ္ဝံ, ဟတ္ထက, တိတ္ထိယေဟိ သဒ္ဓိံ သလ္လပန္တော အဝဇာနိတ္ဝာ ပဋိဇာနာသိ, ပဋိဇာနိတ္ဝာ အဝဇာနာသိ, အညေနညံ ပဋိစရသိ, သမ္ပဇာနမုသာ ဘာသသိ, သင္ကေတံ ကတ္ဝာ ဝိသံဝာဒေသီ’’တိ? ‘‘သစ္စံ, ဘဂဝာ’’တိ။ ဝိဂရဟိ ဗုဒ္ဓော ဘဂဝာ။ပေ.။ ကထဉ္ဟိ နာမ တ္ဝံ, မောဃပုရိသ, တိတ္ထိယေဟိ သဒ္ဓိံ သလ္လပန္တော အဝဇာနိတ္ဝာ ပဋိဇာနိသ္သသိ, ပဋိဇာနိတ္ဝာ အဝဇာနိသ္သသိ, အညေနညံ ပဋိစရိသ္သသိ, သမ္ပဇာနမုသာ ဘာသိသ္သသိ, သင္ကေတံ ကတ္ဝာ ဝိသံဝာဒေသ္သသိ! နေတံ, မောဃပုရိသ, အပ္ပသန္နာနံ ဝာ ပသာဒာယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခာပဒံ ဥဒ္ဒိသေယ္ယာထ –

Atha kho te bhikkhū hatthakaṃ sakyaputtaṃ anekapariyāyena vigarahitvā bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā hatthakaṃ sakyaputtaṃ paṭipucchi – ‘‘saccaṃ kira tvaṃ, hatthaka, titthiyehi saddhiṃ sallapanto avajānitvā paṭijānāsi, paṭijānitvā avajānāsi, aññenaññaṃ paṭicarasi, sampajānamusā bhāsasi, saṅketaṃ katvā visaṃvādesī’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tvaṃ, moghapurisa, titthiyehi saddhiṃ sallapanto avajānitvā paṭijānissasi, paṭijānitvā avajānissasi, aññenaññaṃ paṭicarissasi, sampajānamusā bhāsissasi, saṅketaṃ katvā visaṃvādessasi! Netaṃ, moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –

၂. ‘‘သမ္ပဇာနမုသာဝာဒေ ပာစိတ္တိယ’’န္တိ။

2.‘‘Sampajānamusāvāde pācittiya’’nti.

၃. သမ္ပဇာနမုသာဝာဒော နာမ ဝိသံဝာဒနပုရေက္ခာရသ္သ ဝာစာ, ဂိရာ, ဗ္ယပ္ပထော, ဝစီဘေဒော, ဝာစသိကာ ဝိညတ္တိ, အဋ္ဌ အနရိယဝောဟာရာ – အဒိဋ္ဌံ ဒိဋ္ဌံ မေတိ, အသ္သုတံ သုတံ မေတိ, အမုတံ မုတံ မေတိ, အဝိညာတံ ဝိညာတံ မေတိ, ဒိဋ္ဌံ အဒိဋ္ဌံ မေတိ, သုတံ အသ္သုတံ မေတိ , မုတံ အမုတံ မေတိ, ဝိညာတံ အဝိညာတံ မေတိ။

3.Sampajānamusāvādo nāma visaṃvādanapurekkhārassa vācā, girā, byappatho, vacībhedo, vācasikā viññatti, aṭṭha anariyavohārā – adiṭṭhaṃ diṭṭhaṃ meti, assutaṃ sutaṃ meti, amutaṃ mutaṃ meti, aviññātaṃ viññātaṃ meti, diṭṭhaṃ adiṭṭhaṃ meti, sutaṃ assutaṃ meti , mutaṃ amutaṃ meti, viññātaṃ aviññātaṃ meti.

အဒိဋ္ဌံ နာမ န စက္ခုနာ ဒိဋ္ဌံ။ အသ္သုတံ နာမ န သောတေန သုတံ။ အမုတံ နာမ န ဃာနေန ဃာယိတံ, န ဇိဝ္ဟာယ သာယိတံ, န ကာယေန ဖုဋ္ဌံ။ အဝိညာတံ နာမ န မနသာ ဝိညာတံ။ ဒိဋ္ဌံ နာမ စက္ခုနာ ဒိဋ္ဌံ။ သုတံ နာမ သောတေန သုတံ။ မုတံ နာမ ဃာနေန ဃာယိတံ, ဇိဝ္ဟာယ သာယိတံ, ကာယေန ဖုဋ္ဌံ။ ဝိညာတံ နာမ မနသာ ဝိညာတံ။

Adiṭṭhaṃ nāma na cakkhunā diṭṭhaṃ. Assutaṃ nāma na sotena sutaṃ. Amutaṃ nāma na ghānena ghāyitaṃ, na jivhāya sāyitaṃ, na kāyena phuṭṭhaṃ. Aviññātaṃ nāma na manasā viññātaṃ. Diṭṭhaṃ nāma cakkhunā diṭṭhaṃ. Sutaṃ nāma sotena sutaṃ. Mutaṃ nāma ghānena ghāyitaṃ, jivhāya sāyitaṃ, kāyena phuṭṭhaṃ. Viññātaṃ nāma manasā viññātaṃ.

၄. တီဟာကာရေဟိ ‘‘အဒိဋ္ဌံ ဒိဋ္ဌံ မေ’’တိ သမ္ပဇာနမုသာ ဘဏန္တသ္သ အာပတ္တိ ပာစိတ္တိယသ္သ – ပုဗ္ဗေဝသ္သ ဟောတိ ‘‘မုသာ ဘဏိသ္သ’’န္တိ, ဘဏန္တသ္သ ဟောတိ ‘‘မုသာ ဘဏာမီ’’တိ, ဘဏိတသ္သ ဟောတိ ‘‘မုသာ မယာ ဘဏိတ’’န္တိ။

4. Tīhākārehi ‘‘adiṭṭhaṃ diṭṭhaṃ me’’ti sampajānamusā bhaṇantassa āpatti pācittiyassa – pubbevassa hoti ‘‘musā bhaṇissa’’nti, bhaṇantassa hoti ‘‘musā bhaṇāmī’’ti, bhaṇitassa hoti ‘‘musā mayā bhaṇita’’nti.

စတူဟာကာရေဟိ ‘‘အဒိဋ္ဌံ ဒိဋ္ဌံ မေ’’တိ သမ္ပဇာနမုသာ ဘဏန္တသ္သ အာပတ္တိ ပာစိတ္တိယသ္သ – ပုဗ္ဗေဝသ္သ ဟောတိ ‘‘မုသာ ဘဏိသ္သ’’န္တိ, ဘဏန္တသ္သ ဟောတိ ‘‘မုသာ ဘဏာမီ’’တိ, ဘဏိတသ္သ ဟောတိ ‘‘မုသာ မယာ ဘဏိတ’’န္တိ, ဝိနိဓာယ ဒိဋ္ဌိံ။

Catūhākārehi ‘‘adiṭṭhaṃ diṭṭhaṃ me’’ti sampajānamusā bhaṇantassa āpatti pācittiyassa – pubbevassa hoti ‘‘musā bhaṇissa’’nti, bhaṇantassa hoti ‘‘musā bhaṇāmī’’ti, bhaṇitassa hoti ‘‘musā mayā bhaṇita’’nti, vinidhāya diṭṭhiṃ.

ပဉ္စဟာကာရေဟိ ‘‘အဒိဋ္ဌံ ဒိဋ္ဌံ မေ’’တိ သမ္ပဇာနမုသာ ဘဏန္တသ္သ အာပတ္တိ ပာစိတ္တိယသ္သ – ပုဗ္ဗေဝသ္သ ဟောတိ ‘‘မုသာ ဘဏိသ္သ’’န္တိ, ဘဏန္တသ္သ ဟောတိ ‘‘မုသာ ဘဏာမီ’’တိ, ဘဏိတသ္သ ဟောတိ ‘‘မုသာ မယာ ဘဏိတ’’န္တိ, ဝိနိဓာယ ဒိဋ္ဌိံ, ဝိနိဓာယ ခန္တိံ။

Pañcahākārehi ‘‘adiṭṭhaṃ diṭṭhaṃ me’’ti sampajānamusā bhaṇantassa āpatti pācittiyassa – pubbevassa hoti ‘‘musā bhaṇissa’’nti, bhaṇantassa hoti ‘‘musā bhaṇāmī’’ti, bhaṇitassa hoti ‘‘musā mayā bhaṇita’’nti, vinidhāya diṭṭhiṃ, vinidhāya khantiṃ.

ဆဟာကာရေဟိ ‘‘အဒိဋ္ဌံ ဒိဋ္ဌံ မေ’’တိ သမ္ပဇာနမုသာ ဘဏန္တသ္သ အာပတ္တိ ပာစိတ္တိယသ္သ – ပုဗ္ဗေဝသ္သ ဟောတိ ‘‘မုသာ ဘဏိသ္သ’’န္တိ, ဘဏန္တသ္သ ဟောတိ ‘‘မုသာ ဘဏာမီ’’တိ, ဘဏိတသ္သ ဟောတိ ‘‘မုသာ မယာ ဘဏိတ’’န္တိ , ဝိနိဓာယ ဒိဋ္ဌိံ, ဝိနိဓာယ ခန္တိံ, ဝိနိဓာယ ရုစိံ။

Chahākārehi ‘‘adiṭṭhaṃ diṭṭhaṃ me’’ti sampajānamusā bhaṇantassa āpatti pācittiyassa – pubbevassa hoti ‘‘musā bhaṇissa’’nti, bhaṇantassa hoti ‘‘musā bhaṇāmī’’ti, bhaṇitassa hoti ‘‘musā mayā bhaṇita’’nti , vinidhāya diṭṭhiṃ, vinidhāya khantiṃ, vinidhāya ruciṃ.

သတ္တဟာကာရေဟိ ‘‘အဒိဋ္ဌံ ဒိဋ္ဌံ မေ’’တိ သမ္ပဇာနမုသာ ဘဏန္တသ္သ အာပတ္တိ ပာစိတ္တိယသ္သ’’ – ပုဗ္ဗေဝသ္သ ဟောတိ ‘‘မုသာ ဘဏိသ္သ’’န္တိ, ဘဏန္တသ္သ ဟောတိ ‘‘မုသာ ဘဏာမီ’’တိ, ဘဏိတသ္သ ဟောတိ ‘‘မုသာ မယာ ဘဏိတ’’န္တိ, ဝိနိဓာယ ဒိဋ္ဌိံ, ဝိနိဓာယ ခန္တိံ, ဝိနိဓာယ ရုစိံ, ဝိနိဓာယ ဘာဝံ။

Sattahākārehi ‘‘adiṭṭhaṃ diṭṭhaṃ me’’ti sampajānamusā bhaṇantassa āpatti pācittiyassa’’ – pubbevassa hoti ‘‘musā bhaṇissa’’nti, bhaṇantassa hoti ‘‘musā bhaṇāmī’’ti, bhaṇitassa hoti ‘‘musā mayā bhaṇita’’nti, vinidhāya diṭṭhiṃ, vinidhāya khantiṃ, vinidhāya ruciṃ, vinidhāya bhāvaṃ.

၅. တီဟာကာရေဟိ ‘‘အသ္သုတံ သုတံ မေ’’တိ။ပေ.။ အမုတံ မုတံ မေတိ။ပေ.။ အဝိညာတံ ဝိညာတံ မေတိ သမ္ပဇာနမုသာ ဘဏန္တသ္သ အာပတ္တိ ပာစိတ္တိယသ္သ – ပုဗ္ဗေဝသ္သ ဟောတိ ‘‘မုသာ ဘဏိသ္သ’’န္တိ, ဘဏန္တသ္သ ဟောတိ ‘‘မုသာ ဘဏာမီ’’တိ, ဘဏိတသ္သ ဟောတိ ‘‘မုသာ မယာ ဘဏိတ’’န္တိ။

5. Tīhākārehi ‘‘assutaṃ sutaṃ me’’ti…pe… amutaṃ mutaṃ meti…pe… aviññātaṃ viññātaṃ meti sampajānamusā bhaṇantassa āpatti pācittiyassa – pubbevassa hoti ‘‘musā bhaṇissa’’nti, bhaṇantassa hoti ‘‘musā bhaṇāmī’’ti, bhaṇitassa hoti ‘‘musā mayā bhaṇita’’nti.

စတူဟာကာရေဟိ။ပေ.။ ပဉ္စဟာကာရေဟိ။ပေ.။ ဆဟာကာရေဟိ။ပေ.။ သတ္တဟာကာရေဟိ ‘‘အဝိညာတံ ဝိညာတံ မေ’’တိ သမ္ပဇာနမုသာ ဘဏန္တသ္သ အာပတ္တိ ပာစိတ္တိယသ္သ – ပုဗ္ဗေဝသ္သ ဟောတိ ‘‘မုသာ ဘဏိသ္သ’’န္တိ, ဘဏန္တသ္သ ဟောတိ ‘‘မုသာ ဘဏာမီ’’တိ, ဘဏိတသ္သ ဟောတိ ‘‘မုသာ မယာ ဘဏိတန္တိ, ဝိနိဓာယ ဒိဋ္ဌိံ, ဝိနိဓာယ ခန္တိံ, ဝိနိဓာယ ရုစိံ, ဝိနိဓာယ ဘာဝံ။

Catūhākārehi…pe… pañcahākārehi…pe… chahākārehi…pe… sattahākārehi ‘‘aviññātaṃ viññātaṃ me’’ti sampajānamusā bhaṇantassa āpatti pācittiyassa – pubbevassa hoti ‘‘musā bhaṇissa’’nti, bhaṇantassa hoti ‘‘musā bhaṇāmī’’ti, bhaṇitassa hoti ‘‘musā mayā bhaṇitanti, vinidhāya diṭṭhiṃ, vinidhāya khantiṃ, vinidhāya ruciṃ, vinidhāya bhāvaṃ.

၆. တီဟာကာရေဟိ ‘‘အဒိဋ္ဌံ ဒိဋ္ဌဉ္စ မေ သုတဉ္စာ’’တိ သမ္ပဇာနမုသာ ဘဏန္တသ္သ အာပတ္တိ ပာစိတ္တိယသ္သ။ပေ.။ တီဟာကာရေဟိ ‘‘အဒိဋ္ဌံ ဒိဋ္ဌဉ္စ မေ မုတဉ္စာ’’တိ သမ္ပဇာနမုသာ ဘဏန္တသ္သ အာပတ္တိ ပာစိတ္တိယသ္သ။ပေ.။ တီဟာကာရေဟိ ‘‘အဒိဋ္ဌံ ဒိဋ္ဌဉ္စ မေ ဝိညာတဉ္စာ’’တိ သမ္ပဇာနမုသာ ဘဏန္တသ္သ အာပတ္တိ ပာစိတ္တိယသ္သ ။ပေ.။ တီဟာကာရေဟိ အဒိဋ္ဌံ ‘‘ဒိဋ္ဌဉ္စ မေ သုတဉ္စ မုတဉ္စာ’’တိ။ပေ.။ တီဟာကာရေဟိ အဒိဋ္ဌံ ‘‘ဒိဋ္ဌဉ္စ မေ သုတဉ္စ ဝိညာတဉ္စာ’’တိ။ပေ.။ တီဟာကာရေဟိ အဒိဋ္ဌံ ‘‘ဒိဋ္ဌဉ္စ မေ သုတဉ္စ မုတဉ္စ ဝိညာတဉ္စာ’’တိ သမ္ပဇာနမုသာ ဘဏန္တသ္သ အာပတ္တိ ပာစိတ္တိယသ္သ။ပေ.။။

6. Tīhākārehi ‘‘adiṭṭhaṃ diṭṭhañca me sutañcā’’ti sampajānamusā bhaṇantassa āpatti pācittiyassa…pe… tīhākārehi ‘‘adiṭṭhaṃ diṭṭhañca me mutañcā’’ti sampajānamusā bhaṇantassa āpatti pācittiyassa…pe… tīhākārehi ‘‘adiṭṭhaṃ diṭṭhañca me viññātañcā’’ti sampajānamusā bhaṇantassa āpatti pācittiyassa …pe… tīhākārehi adiṭṭhaṃ ‘‘diṭṭhañca me sutañca mutañcā’’ti…pe… tīhākārehi adiṭṭhaṃ ‘‘diṭṭhañca me sutañca viññātañcā’’ti…pe… tīhākārehi adiṭṭhaṃ ‘‘diṭṭhañca me sutañca mutañca viññātañcā’’ti sampajānamusā bhaṇantassa āpatti pācittiyassa…pe….

တီဟာကာရေဟိ အသ္သုတံ ‘‘သုတဉ္စ မေ မုတဉ္စာ’’တိ။ပေ.။ တီဟာကာရေဟိ အသ္သုတံ ‘‘သုတဉ္စ မေ ဝိညာတဉ္စာ’’တိ။ပေ.။ တီဟာကာရေဟိ အသ္သုတံ ‘‘သုတဉ္စ မေ ဒိဋ္ဌဉ္စာ’’တိ သမ္ပဇာနမုသာ ဘဏန္တသ္သ အာပတ္တိ ပာစိတ္တိယသ္သ။ပေ.။ တီဟာကာရေဟိ အသ္သုတံ ‘‘သုတဉ္စ မေ မုတဉ္စ ဝိညာတဉ္စာ’’တိ။ပေ.။ တီဟာကာရေဟိ အသ္သုတံ ‘‘သုတဉ္စ မေ မုတဉ္စ ဒိဋ္ဌဉ္စာ’’တိ။ပေ.။ တီဟာကာရေဟိ အသ္သုတံ ‘‘သုတဉ္စ မေ မုတဉ္စ ဝိညာတဉ္စ ဒိဋ္ဌဉ္စာ’’တိ သမ္ပဇာနမုသာ ဘဏန္တသ္သ အာပတ္တိ ပာစိတ္တိယသ္သ။ပေ.။။

Tīhākārehi assutaṃ ‘‘sutañca me mutañcā’’ti…pe… tīhākārehi assutaṃ ‘‘sutañca me viññātañcā’’ti…pe… tīhākārehi assutaṃ ‘‘sutañca me diṭṭhañcā’’ti sampajānamusā bhaṇantassa āpatti pācittiyassa…pe… tīhākārehi assutaṃ ‘‘sutañca me mutañca viññātañcā’’ti…pe… tīhākārehi assutaṃ ‘‘sutañca me mutañca diṭṭhañcā’’ti…pe… tīhākārehi assutaṃ ‘‘sutañca me mutañca viññātañca diṭṭhañcā’’ti sampajānamusā bhaṇantassa āpatti pācittiyassa…pe….

တီဟာကာရေဟိ အမုတံ ‘‘မုတဉ္စ မေ ဝိညာတဉ္စာ’’တိ။ပေ.။ တီဟာကာရေဟိ အမုတံ ‘‘မုတဉ္စ မေ ဒိဋ္ဌဉ္စာ’’တိ။ပေ.။ တီဟာကာရေဟိ အမုတံ ‘‘မုတဉ္စ မေ သုတဉ္စာ’’တိ သမ္ပဇာနမုသာ ဘဏန္တသ္သ အာပတ္တိ ပာစိတ္တိယသ္သ။ပေ.။ တီဟာကာရေဟိ အမုတံ ‘‘မုတဉ္စ မေ ဝိညာတဉ္စ ဒိဋ္ဌဉ္စာ’’တိ။ပေ.။ တီဟာကာရေဟိ အမုတံ ‘‘မုတဉ္စ မေ ဝိညာတဉ္စ သုတဉ္စာ’’တိ။ပေ.။ တီဟာကာရေဟိ အမုတံ ‘‘မုတဉ္စ မေ ဝိညာတဉ္စ ဒိဋ္ဌဉ္စ သုတဉ္စာ’’တိ သမ္ပဇာနမုသာ ဘဏန္တသ္သ အာပတ္တိ ပာစိတ္တိယသ္သ။ပေ.။။

Tīhākārehi amutaṃ ‘‘mutañca me viññātañcā’’ti…pe… tīhākārehi amutaṃ ‘‘mutañca me diṭṭhañcā’’ti…pe… tīhākārehi amutaṃ ‘‘mutañca me sutañcā’’ti sampajānamusā bhaṇantassa āpatti pācittiyassa…pe… tīhākārehi amutaṃ ‘‘mutañca me viññātañca diṭṭhañcā’’ti…pe… tīhākārehi amutaṃ ‘‘mutañca me viññātañca sutañcā’’ti…pe… tīhākārehi amutaṃ ‘‘mutañca me viññātañca diṭṭhañca sutañcā’’ti sampajānamusā bhaṇantassa āpatti pācittiyassa…pe….

တီဟာကာရေဟိ အဝိညာတံ ‘‘ဝိညာတဉ္စ မေ ဒိဋ္ဌဉ္စာ’’တိ။ပေ.။ တီဟာကာရေဟိ အဝိညာတံ ‘‘ဝိညာတဉ္စ မေ သုတဉ္စာ’’တိ။ပေ.။ တီဟာကာရေဟိ အဝိညာတံ ‘‘ဝိညာတဉ္စ မေ မုတဉ္စာ’’တိ သမ္ပဇာနမုသာ ဘဏန္တသ္သ အာပတ္တိ ပာစိတ္တိယသ္သ။ပေ.။ တီဟာကာရေဟိ အဝိညာတံ ‘‘ဝိညာတဉ္စ မေ ဒိဋ္ဌဉ္စ သုတဉ္စာ’’တိ။ပေ.။ တီဟာကာရေဟိ အဝိညာတံ ‘‘ဝိညာတဉ္စ မေ ဒိဋ္ဌဉ္စ မုတဉ္စာ’’တိ။ပေ.။ တီဟာကာရေဟိ အဝိညာတံ ‘‘ဝိညာတဉ္စ မေ ဒိဋ္ဌဉ္စ သုတဉ္စ မုတဉ္စာ’’တိ သမ္ပဇာနမုသာ ဘဏန္တသ္သ အာပတ္တိ ပာစိတ္တိယသ္သ။ပေ.။။

Tīhākārehi aviññātaṃ ‘‘viññātañca me diṭṭhañcā’’ti…pe… tīhākārehi aviññātaṃ ‘‘viññātañca me sutañcā’’ti…pe… tīhākārehi aviññātaṃ ‘‘viññātañca me mutañcā’’ti sampajānamusā bhaṇantassa āpatti pācittiyassa…pe… tīhākārehi aviññātaṃ ‘‘viññātañca me diṭṭhañca sutañcā’’ti…pe… tīhākārehi aviññātaṃ ‘‘viññātañca me diṭṭhañca mutañcā’’ti…pe… tīhākārehi aviññātaṃ ‘‘viññātañca me diṭṭhañca sutañca mutañcā’’ti sampajānamusā bhaṇantassa āpatti pācittiyassa…pe….

၇. တီဟာကာရေဟိ ဒိဋ္ဌံ ‘‘အဒိဋ္ဌံ မေ’’တိ။ပေ.။ သုတံ ‘‘အသ္သုတံ မေ’’တိ။ပေ.။ မုတံ ‘‘အမုတံ မေ’’တိ။ပေ.။ ဝိညာတံ ‘‘အဝိညာတံ မေ’’တိ သမ္ပဇာနမုသာ ဘဏန္တသ္သ အာပတ္တိ ပာစိတ္တိယသ္သ။ပေ.။။

7. Tīhākārehi diṭṭhaṃ ‘‘adiṭṭhaṃ me’’ti…pe… sutaṃ ‘‘assutaṃ me’’ti…pe… mutaṃ ‘‘amutaṃ me’’ti…pe… viññātaṃ ‘‘aviññātaṃ me’’ti sampajānamusā bhaṇantassa āpatti pācittiyassa…pe….

၈. တီဟာကာရေဟိ ဒိဋ္ဌံ ‘‘သုတံ မေ’’တိ။ပေ.။ တီဟာကာရေဟိ ဒိဋ္ဌံ ‘‘မုတံ မေ’’တိ။ပေ.။ တီဟာကာရေဟိ ဒိဋ္ဌံ ‘‘ဝိညာတံ မေ’’တိ သမ္ပဇာနမုသာ ဘဏန္တသ္သ အာပတ္တိ ပာစိတ္တိယသ္သ။ပေ.။ တီဟာကာရေဟိ ဒိဋ္ဌံ ‘‘သုတဉ္စ မေ မုတဉ္စာ’’တိ။ပေ.။ တီဟာကာရေဟိ ဒိဋ္ဌံ ‘‘သုတဉ္စ မေ ဝိညာတဉ္စာ’’တိ။ပေ.။ တီဟာကာရေဟိ ဒိဋ္ဌံ ‘‘သုတဉ္စ မေ မုတဉ္စ ဝိညာတဉ္စာ’’တိ သမ္ပဇာနမုသာ ဘဏန္တသ္သ အာပတ္တိ ပာစိတ္တိယသ္သ။ပေ.။။

8. Tīhākārehi diṭṭhaṃ ‘‘sutaṃ me’’ti…pe… tīhākārehi diṭṭhaṃ ‘‘mutaṃ me’’ti…pe… tīhākārehi diṭṭhaṃ ‘‘viññātaṃ me’’ti sampajānamusā bhaṇantassa āpatti pācittiyassa…pe… tīhākārehi diṭṭhaṃ ‘‘sutañca me mutañcā’’ti…pe… tīhākārehi diṭṭhaṃ ‘‘sutañca me viññātañcā’’ti…pe… tīhākārehi diṭṭhaṃ ‘‘sutañca me mutañca viññātañcā’’ti sampajānamusā bhaṇantassa āpatti pācittiyassa…pe….

တီဟာကာရေဟိ သုတံ ‘‘မုတံ မေ’’တိ။ပေ.။ တီဟာကာရေဟိ သုတံ ‘‘ဝိညာတံ မေ’’တိ။ပေ.။ တီဟာကာရေဟိ သုတံ ‘‘ဒိဋ္ဌံ မေ’’တိ သမ္ပဇာနမုသာ ဘဏန္တသ္သ အာပတ္တိ ပာစိတ္တိယသ္သ။ပေ.။ တီဟာကာရေဟိ သုတံ ‘‘မုတဉ္စ မေ ဝိညာတဉ္စာ’’တိ။ပေ.။ တီဟာကာရေဟိ သုတံ ‘‘မုတဉ္စ မေ ဒိဋ္ဌဉ္စာ’’တိ။ပေ.။ တီဟာကာရေဟိ သုတံ ‘‘မုတဉ္စ မေ ဝိညာတဉ္စ ဒိဋ္ဌဉ္စာ’’တိ သမ္ပဇာနမုသာ ဘဏန္တသ္သ အာပတ္တိ ပာစိတ္တိယသ္သ။ပေ.။။

Tīhākārehi sutaṃ ‘‘mutaṃ me’’ti…pe… tīhākārehi sutaṃ ‘‘viññātaṃ me’’ti…pe… tīhākārehi sutaṃ ‘‘diṭṭhaṃ me’’ti sampajānamusā bhaṇantassa āpatti pācittiyassa…pe… tīhākārehi sutaṃ ‘‘mutañca me viññātañcā’’ti…pe… tīhākārehi sutaṃ ‘‘mutañca me diṭṭhañcā’’ti…pe… tīhākārehi sutaṃ ‘‘mutañca me viññātañca diṭṭhañcā’’ti sampajānamusā bhaṇantassa āpatti pācittiyassa…pe….

တီဟာကာရေဟိ မုတံ ‘‘ဝိညာတံ မေ’’တိ။ပေ.။ တီဟာကာရေဟိ မုတံ ‘‘ဒိဋ္ဌံ မေ’’တိ။ပေ.။ တီဟာကာရေဟိ မုတံ ‘‘သုတံ မေ’’တိ သမ္ပဇာနမုသာ ဘဏန္တသ္သ အာပတ္တိ ပာစိတ္တိယသ္သ။ပေ.။ တီဟာကာရေဟိ မုတံ ‘‘ဝိညာတဉ္စ မေ ဒိဋ္ဌဉ္စာ’’တိ။ပေ.။ တီဟာကာရေဟိ မုတံ ‘‘ဝိညာတဉ္စ မေ သုတဉ္စာ’’တိ။ပေ.။ တီဟာကာရေဟိ မုတံ ‘‘ဝိညာတဉ္စ မေ ဒိဋ္ဌဉ္စ သုတဉ္စာ’’တိ သမ္ပဇာနမုသာ ဘဏန္တသ္သ အာပတ္တိ ပာစိတ္တိယသ္သ။ပေ.။။

Tīhākārehi mutaṃ ‘‘viññātaṃ me’’ti…pe… tīhākārehi mutaṃ ‘‘diṭṭhaṃ me’’ti…pe… tīhākārehi mutaṃ ‘‘sutaṃ me’’ti sampajānamusā bhaṇantassa āpatti pācittiyassa…pe… tīhākārehi mutaṃ ‘‘viññātañca me diṭṭhañcā’’ti…pe… tīhākārehi mutaṃ ‘‘viññātañca me sutañcā’’ti…pe… tīhākārehi mutaṃ ‘‘viññātañca me diṭṭhañca sutañcā’’ti sampajānamusā bhaṇantassa āpatti pācittiyassa…pe….

တီဟာကာရေဟိ ဝိညာတံ ‘‘ဒိဋ္ဌံ မေ’’တိ။ပေ.။ တီဟာကာရေဟိ ဝိညာတံ ‘‘သုတံ မေ’’တိ ။ပေ.။ တီဟာကာရေဟိ ဝိညာတံ ‘‘မုတံ မေ’’တိ သမ္ပဇာနမုသာ ဘဏန္တသ္သ အာပတ္တိ ပာစိတ္တိယသ္သ။ပေ.။ တီဟာကာရေဟိ ဝိညာတံ ‘‘ဒိဋ္ဌဉ္စ မေ သုတဉ္စာ’’တိ။ပေ.။ တီဟာကာရေဟိ ဝိညာတံ ‘‘ဒိဋ္ဌဉ္စ မေ မုတဉ္စာ’’တိ။ပေ.။ တီဟာကာရေဟိ ဝိညာတံ ‘‘ဒိဋ္ဌဉ္စ မေ သုတဉ္စ မုတဉ္စာ’’တိ သမ္ပဇာနမုသာ ဘဏန္တသ္သ အာပတ္တိ ပာစိတ္တိယသ္သ။ပေ.။။

Tīhākārehi viññātaṃ ‘‘diṭṭhaṃ me’’ti…pe… tīhākārehi viññātaṃ ‘‘sutaṃ me’’ti …pe… tīhākārehi viññātaṃ ‘‘mutaṃ me’’ti sampajānamusā bhaṇantassa āpatti pācittiyassa…pe… tīhākārehi viññātaṃ ‘‘diṭṭhañca me sutañcā’’ti…pe… tīhākārehi viññātaṃ ‘‘diṭṭhañca me mutañcā’’ti…pe… tīhākārehi viññātaṃ ‘‘diṭṭhañca me sutañca mutañcā’’ti sampajānamusā bhaṇantassa āpatti pācittiyassa…pe….

၉. တီဟာကာရေဟိ ဒိဋ္ဌေ ဝေမတိကော ဒိဋ္ဌံ နောကပ္ပေတိ, ဒိဋ္ဌံ နသ္သရတိ , ဒိဋ္ဌံ ပမုဋ္ဌော ဟောတိ။ပေ.။ သုတေ ဝေမတိကော သုတံ နောကပ္ပေတိ, သုတံ နသ္သရတိ, သုတံ ပမုဋ္ဌော ဟောတိ။ပေ.။ မုတေ ဝေမတိကော မုတံ နောကပ္ပေတိ, မုတံ နသ္သရတိ, မုတံ ပမုဋ္ဌော ဟောတိ။ပေ.။ ဝိညာတေ ဝေမတိကော ဝိညာတံ နောကပ္ပေတိ, ဝိညာတံ နသ္သရတိ, ဝိညာတံ ပမုဋ္ဌော ဟောတိ။ ဝိညာတဉ္စ မေ ဒိဋ္ဌဉ္စာတိ။ပေ.။ ဝိညာတံ ပမုဋ္ဌော ဟောတိ ဝိညာတဉ္စ မေ သုတဉ္စာတိ။ပေ.။ ဝိညာတံ ပမုဋ္ဌော ဟောတိ; ဝိညာတဉ္စ မေ မုတဉ္စာတိ။ပေ.။ ဝိညာတံ ပမုဋ္ဌော ဟောတိ; ဝိညာတဉ္စ မေ ဒိဋ္ဌဉ္စ သုတဉ္စာတိ။ပေ.။ ဝိညာတံ ပမုဋ္ဌော ဟောတိ; ဝိညာတဉ္စ မေ ဒိဋ္ဌဉ္စ မုတဉ္စာတိ။ပေ.။ ဝိညာတံ ပမုဋ္ဌော ဟောတိ; ဝိညာတဉ္စ မေ ဒိဋ္ဌဉ္စ သုတဉ္စ မုတဉ္စာတိ သမ္ပဇာနမုသာ ဘဏန္တသ္သ အာပတ္တိ ပာစိတ္တိယသ္သ။

9. Tīhākārehi diṭṭhe vematiko diṭṭhaṃ nokappeti, diṭṭhaṃ nassarati , diṭṭhaṃ pamuṭṭho hoti…pe… sute vematiko sutaṃ nokappeti, sutaṃ nassarati, sutaṃ pamuṭṭho hoti…pe… mute vematiko mutaṃ nokappeti, mutaṃ nassarati, mutaṃ pamuṭṭho hoti…pe… viññāte vematiko viññātaṃ nokappeti, viññātaṃ nassarati, viññātaṃ pamuṭṭho hoti… viññātañca me diṭṭhañcāti…pe… viññātaṃ pamuṭṭho hoti viññātañca me sutañcāti…pe… viññātaṃ pamuṭṭho hoti; viññātañca me mutañcāti…pe… viññātaṃ pamuṭṭho hoti; viññātañca me diṭṭhañca sutañcāti…pe… viññātaṃ pamuṭṭho hoti; viññātañca me diṭṭhañca mutañcāti…pe… viññātaṃ pamuṭṭho hoti; viññātañca me diṭṭhañca sutañca mutañcāti sampajānamusā bhaṇantassa āpatti pācittiyassa.

၁၀. စတူဟာကာရေဟိ။ပေ.။ ပဉ္စဟာကာရေဟိ။ပေ.။ ဆဟာကာရေဟိ။ပေ.။ သတ္တဟာကာရေဟိ။ပေ.။ ဝိညာတံ ပမုဋ္ဌော ဟောတိ, ဝိညာတဉ္စ မေ ဒိဋ္ဌဉ္စ သုတဉ္စ မုတဉ္စာတိ သမ္ပဇာနမုသာ ဘဏန္တသ္သ အာပတ္တိ ပာစိတ္တိယသ္သ – ပုဗ္ဗေဝသ္သ ဟောတိ ‘‘မုသာ ဘဏိသ္သ’’န္တိ, ဘဏန္တသ္သ ဟောတိ ‘‘မုသာ ဘဏာမီ’’တိ, ဘဏိတသ္သ ဟောတိ ‘‘မုသာ မယာ ဘဏိတ’’န္တိ, ဝိနိဓာယ ဒိဋ္ဌိံ, ဝိနိဓာယ ခန္တိံ, ဝိနိဓာယ ရုစိံ, ဝိနိဓာယ ဘာဝံ။

10. Catūhākārehi…pe… pañcahākārehi…pe… chahākārehi…pe… sattahākārehi…pe… viññātaṃ pamuṭṭho hoti, viññātañca me diṭṭhañca sutañca mutañcāti sampajānamusā bhaṇantassa āpatti pācittiyassa – pubbevassa hoti ‘‘musā bhaṇissa’’nti, bhaṇantassa hoti ‘‘musā bhaṇāmī’’ti, bhaṇitassa hoti ‘‘musā mayā bhaṇita’’nti, vinidhāya diṭṭhiṃ, vinidhāya khantiṃ, vinidhāya ruciṃ, vinidhāya bhāvaṃ.

၁၁. အနာပတ္တိ ဒဝာ ဘဏတိ, ရဝာ ဘဏတိ ¹။ ‘‘ဒဝာ ဘဏတိ နာမ သဟသာ ဘဏတိ။ ရဝာ ဘဏတိ နာမ ‘အညံ ဘဏိသ္သာမီ’တိ အညံ ဘဏတိ’’။ ဥမ္မတ္တကသ္သ, အာဒိကမ္မိကသ္သာတိ။

11. Anāpatti davā bhaṇati, ravā bhaṇati ². ‘‘Davā bhaṇati nāma sahasā bhaṇati. Ravā bhaṇati nāma ‘aññaṃ bhaṇissāmī’ti aññaṃ bhaṇati’’. Ummattakassa, ādikammikassāti.

မုသာဝာဒသိက္ခာပဒံ နိဋ္ဌိတံ ပဌမံ။

Musāvādasikkhāpadaṃ niṭṭhitaṃ paṭhamaṃ.

၂. ဩမသဝာဒသိက္ခာပဒံ

2. Omasavādasikkhāpadaṃ

၁၂. တေန သမယေန ဗုဒ္ဓော ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ ။ တေန ခော ပန သမယေန ဆဗ္ဗဂ္ဂိယာ ဘိက္ခူ ပေသလေဟိ ဘိက္ခူဟိ သဒ္ဓိံ ဘဏ္ဍန္တာ ³ ပေသလေ ဘိက္ခူ ဩမသန္တိ – ဇာတိယာပိ, နာမေနပိ, ဂောတ္တေနပိ, ကမ္မေနပိ, သိပ္ပေနပိ, အာဗာဓေနပိ, လိင္ဂေနပိ, ကိလေသေနပိ, အာပတ္တိယာပိ; ဟီနေနပိ အက္ကောသေန ခုံသေန္တိ ဝမ္ဘေန္တိ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ ဆဗ္ဗဂ္ဂိယာ ဘိက္ခူ ပေသလေဟိ ဘိက္ခူဟိ သဒ္ဓိံ ဘဏ္ဍန္တာ ပေသလေ ဘိက္ခူ ဩမသိသ္သန္တိ – ဇာတိယာပိ, နာမေနပိ, ဂောတ္တေနပိ, ကမ္မေနပိ, သိပ္ပေနပိ, အာဗာဓေနပိ, လိင္ဂေနပိ, ကိလေသေနပိ, အာပတ္တိယာပိ; ဟီနေနပိ အက္ကောသေန ခုံသေသ္သန္တိ ဝမ္ဘေသ္သန္တီ’’တိ!

12. Tena samayena buddho bhagavā sāvatthiyaṃ viharati jetavane anāthapiṇḍikassa ārāme . Tena kho pana samayena chabbaggiyā bhikkhū pesalehi bhikkhūhi saddhiṃ bhaṇḍantā ⁴ pesale bhikkhū omasanti – jātiyāpi, nāmenapi, gottenapi, kammenapi, sippenapi, ābādhenapi, liṅgenapi, kilesenapi, āpattiyāpi; hīnenapi akkosena khuṃsenti vambhenti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū pesalehi bhikkhūhi saddhiṃ bhaṇḍantā pesale bhikkhū omasissanti – jātiyāpi, nāmenapi, gottenapi, kammenapi, sippenapi, ābādhenapi, liṅgenapi, kilesenapi, āpattiyāpi; hīnenapi akkosena khuṃsessanti vambhessantī’’ti!

အထ ခော တေ ဘိက္ခူ ဆဗ္ဗဂ္ဂိယေ ဘိက္ခူ အနေကပရိယာယေန ဝိဂရဟိတ္ဝာ ဘဂဝတော ဧတမတ္ထံ အာရောစေသုံ။ပေ.။ သစ္စံ ကိရ တုမ္ဟေ, ဘိက္ခဝေ, ပေသလေဟိ ဘိက္ခူဟိ သဒ္ဓိံ ဘဏ္ဍန္တာ ပေသလေ ဘိက္ခူ ဩမသထ – ဇာတိယာပိ။ပေ.။ ဟီနေနပိ အက္ကောသေန ခုံသေထ ဝမ္ဘေထာတိ? ‘‘သစ္စံ, ဘဂဝာ’’တိ။ ဝိဂရဟိ ဗုဒ္ဓော ဘဂဝာ။ပေ.။ ကထဉ္ဟိ နာမ တုမ္ဟေ, မောဃပုရိသာ, ပေသလေဟိ ဘိက္ခူဟိ သဒ္ဓိံ ဘဏ္ဍန္တာ ပေသလေ ဘိက္ခူ ဩမသိသ္သထ – ဇာတိယာပိ။ပေ.။ ဟီနေနပိ အက္ကောသေန ခုံသေသ္သထ ဝမ္ဘေသ္သထ ! နေတံ, မောဃပုရိသာ, အပ္ပသန္နာနံ ဝာ ပသာဒာယ။ပေ.။ ဝိဂရဟိတ္ဝာ။ပေ.။ ဓမ္မိံ ကထံ ကတ္ဝာ ဘိက္ခူ အာမန္တေသိ –

Atha kho te bhikkhū chabbaggiye bhikkhū anekapariyāyena vigarahitvā bhagavato etamatthaṃ ārocesuṃ…pe… saccaṃ kira tumhe, bhikkhave, pesalehi bhikkhūhi saddhiṃ bhaṇḍantā pesale bhikkhū omasatha – jātiyāpi…pe… hīnenapi akkosena khuṃsetha vambhethāti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, pesalehi bhikkhūhi saddhiṃ bhaṇḍantā pesale bhikkhū omasissatha – jātiyāpi…pe… hīnenapi akkosena khuṃsessatha vambhessatha ! Netaṃ, moghapurisā, appasannānaṃ vā pasādāya…pe… vigarahitvā…pe… dhammiṃ kathaṃ katvā bhikkhū āmantesi –

၁၃. ‘‘ဘူတပုဗ္ဗံ, ဘိက္ခဝေ, တက္ကသိလာယံ ⁵ အညတရသ္သ ဗ္ရာဟ္မဏသ္သ နန္ဒိဝိသာလော နာမ ဗလီဗဒ္ဒော ⁶ အဟောသိ။ အထ ခော, ဘိက္ခဝေ, နန္ဒိဝိသာလော ဗလီဗဒ္ဒော တံ ဗ္ရာဟ္မဏံ ဧတဒဝောစ – ‘‘ဂစ္ဆ တ္ဝံ, ဗ္ရာဟ္မဏ, သေဋ္ဌိနာ သဒ္ဓိံ သဟသ္သေန အဗ္ဘုတံ ကရောဟိ – မယ္ဟံ ဗလီဗဒ္ဒော သကဋသတံ အတိဗဒ္ဓံ ပဝဋ္ဋေသ္သတီ’’တိ။ အထ ခော, ဘိက္ခဝေ, သော ဗ္ရာဟ္မဏော သေဋ္ဌိနာ သဒ္ဓိံ သဟသ္သေန အဗ္ဘုတံ အကာသိ – မယ္ဟံ ဗလီဗဒ္ဒော သကဋသတံ အတိဗဒ္ဓံ ပဝဋ္ဋေသ္သတီတိ။ အထ ခော, ဘိက္ခဝေ, သော ဗ္ရာဟ္မဏော သကဋသတံ အတိဗန္ဓိတ္ဝာ နန္ဒိဝိသာလံ ဗလီဗဒ္ဒံ ယုဉ္ဇိတ္ဝာ ဧတဒဝောစ – ‘‘ဂစ္ဆ, ကူဋ ⁷, ဝဟသ္သု, ကူဋာ’တိ။ အထ ခော, ဘိက္ခဝေ, နန္ဒိဝိသာလော ဗလီဗဒ္ဒော တတ္ထေဝ အဋ္ဌာသိ။ အထ ခော, ဘိက္ခဝေ, သော ဗ္ရာဟ္မဏော သဟသ္သေန ပရာဇိတော ပဇ္ဈာယိ။ အထ ခော, ဘိက္ခဝေ, နန္ဒိဝိသာလော ဗလီဗဒ္ဒော တံ ဗ္ရာဟ္မဏံ ဧတဒဝောစ – ‘‘ကိသ္သ တ္ဝံ, ဗ္ရာဟ္မဏ, ပဇ္ဈာယသီ’’တိ? ‘တထာ ဟိ ပနာဟံ, ဘော, တယာ သဟသ္သေန ပရာဇိတော’’တိ။ ‘ကိသ္သ ပန မံ တ္ဝံ, ဗ္ရာဟ္မဏ, အကူဋံ ကူဋဝာဒေန ပာပေသိ? ဂစ္ဆ တ္ဝံ, ဗ္ရာဟ္မဏ, သေဋ္ဌိနာ သဒ္ဓိံ ဒ္ဝီဟိ သဟသ္သေဟိ အဗ္ဘုတံ ကရောဟိ – ‘‘မယ္ဟံ ဗလီဗဒ္ဒော သကဋသတံ အတိဗဒ္ဓံ ပဝဋ္ဋေသ္သတီ’’တိ။ ‘‘မာ စ မံ အကူဋံ ကူဋဝာဒေန ပာပေသီ’’တိ။ အထ ခော, ဘိက္ခဝေ, သော ဗ္ရာဟ္မဏော သေဋ္ဌိနာ သဒ္ဓိံ ဒ္ဝီဟိ သဟသ္သေဟိ အဗ္ဘုတံ အကာသိ – ‘‘မယ္ဟံ ဗလီဗဒ္ဒော သကဋသတံ အတိဗဒ္ဓံ ပဝဋ္ဋေသ္သတီ’’တိ။ အထ ခော, ဘိက္ခဝေ, သော ဗ္ရာဟ္မဏော သကဋသတံ အတိဗန္ဓိတ္ဝာ နန္ဒိဝိသာလံ ဗလီဗဒ္ဒံ ယုဉ္ဇိတ္ဝာ ဧတဒဝောစ – ‘‘အစ္ဆ, ဘဒ္ရ, ဝဟသ္သု, ဘဒ္ရာ’’တိ။ အထ ခော, ဘိက္ခဝေ, နန္ဒိဝိသာလော ဗလီဗဒ္ဒော သကဋသတံ အတိဗဒ္ဓံ ပဝဋ္ဋေသိ။

13. ‘‘Bhūtapubbaṃ, bhikkhave, takkasilāyaṃ ⁸ aññatarassa brāhmaṇassa nandivisālo nāma balībaddo ⁹ ahosi. Atha kho, bhikkhave, nandivisālo balībaddo taṃ brāhmaṇaṃ etadavoca – ‘‘gaccha tvaṃ, brāhmaṇa, seṭṭhinā saddhiṃ sahassena abbhutaṃ karohi – mayhaṃ balībaddo sakaṭasataṃ atibaddhaṃ pavaṭṭessatī’’ti. Atha kho, bhikkhave, so brāhmaṇo seṭṭhinā saddhiṃ sahassena abbhutaṃ akāsi – mayhaṃ balībaddo sakaṭasataṃ atibaddhaṃ pavaṭṭessatīti. Atha kho, bhikkhave, so brāhmaṇo sakaṭasataṃ atibandhitvā nandivisālaṃ balībaddaṃ yuñjitvā etadavoca – ‘‘gaccha, kūṭa ¹⁰, vahassu, kūṭā’ti. Atha kho, bhikkhave, nandivisālo balībaddo tattheva aṭṭhāsi. Atha kho, bhikkhave, so brāhmaṇo sahassena parājito pajjhāyi. Atha kho, bhikkhave, nandivisālo balībaddo taṃ brāhmaṇaṃ etadavoca – ‘‘kissa tvaṃ, brāhmaṇa, pajjhāyasī’’ti? ‘Tathā hi panāhaṃ, bho, tayā sahassena parājito’’ti. ‘Kissa pana maṃ tvaṃ, brāhmaṇa, akūṭaṃ kūṭavādena pāpesi? Gaccha tvaṃ, brāhmaṇa, seṭṭhinā saddhiṃ dvīhi sahassehi abbhutaṃ karohi – ‘‘mayhaṃ balībaddo sakaṭasataṃ atibaddhaṃ pavaṭṭessatī’’ti. ‘‘Mā ca maṃ akūṭaṃ kūṭavādena pāpesī’’ti. Atha kho, bhikkhave, so brāhmaṇo seṭṭhinā saddhiṃ dvīhi sahassehi abbhutaṃ akāsi – ‘‘mayhaṃ balībaddo sakaṭasataṃ atibaddhaṃ pavaṭṭessatī’’ti. Atha kho, bhikkhave, so brāhmaṇo sakaṭasataṃ atibandhitvā nandivisālaṃ balībaddaṃ yuñjitvā etadavoca – ‘‘accha, bhadra, vahassu, bhadrā’’ti. Atha kho, bhikkhave, nandivisālo balībaddo sakaṭasataṃ atibaddhaṃ pavaṭṭesi.

¹¹ ‘‘မနာပမေဝ ဘာသေယ္ယ၊ နာ၊ မနာပံ ကုဒာစနံ။

¹² ‘‘Manāpameva bhāseyya, nā, manāpaṃ kudācanaṃ;

မနာပံ ဘာသမာနသ္သ၊ ဂရုံ ဘာရံ ဥဒဗ္ဗဟိ။

Manāpaṃ bhāsamānassa, garuṃ bhāraṃ udabbahi;

ဓနဉ္စ နံ အလာဘေသိ၊ တေန စ၊ တ္တမနော အဟူတိ။

Dhanañca naṃ alābhesi, tena ca, ttamano ahūti.

‘‘တဒာပိ မေ, ဘိက္ခဝေ, အမနာပာ ခုံသနာ ဝမ္ဘနာ။ ကိမင္ဂံ ပန ဧတရဟိ မနာပာ ဘဝိသ္သတိ ခုံသနာ ဝမ္ဘနာ? နေတံ, ဘိက္ခဝေ, အပ္ပသန္နာနံ ဝာ ပသာဒာယ။ပေ.။။ ‘‘ဧဝဉ္စ ပန, ဘိက္ခဝေ, ဣမံ သိက္ခာပဒံ ဥဒ္ဒိသေယ္ယာထ –

‘‘Tadāpi me, bhikkhave, amanāpā khuṃsanā vambhanā. Kimaṅgaṃ pana etarahi manāpā bhavissati khuṃsanā vambhanā? Netaṃ, bhikkhave, appasannānaṃ vā pasādāya…pe…. ‘‘Evañca pana, bhikkhave, imaṃ sikkhāpadaṃ uddiseyyātha –

၁၄. ‘‘ဩမသဝာဒေ ပာစိတ္တိယ’’န္တိ။

14.‘‘Omasavāde pācittiya’’nti.

၁၅. ဩမသဝာဒော နာမ ဒသဟိ အာကာရေဟိ ဩမသတိ – ဇာတိယာပိ, နာမေနပိ, ဂောတ္တေနပိ, ကမ္မေနပိ, သိပ္ပေနပိ, အာဗာဓေနပိ, လိင္ဂေနပိ, ကိလေသေနပိ, အာပတ္တိယာပိ, အက္ကောသေနပိ။

15.Omasavādo nāma dasahi ākārehi omasati – jātiyāpi, nāmenapi, gottenapi, kammenapi, sippenapi, ābādhenapi, liṅgenapi, kilesenapi, āpattiyāpi, akkosenapi.

ဇာတိ နာမ ဒ္ဝေ ဇာတိယော – ဟီနာ စ ဇာတိ ဥက္ကဋ္ဌာ စ ဇာတိ။ ဟီနာ နာမ ဇာတိ – စဏ္ဍာလဇာတိ, ဝေနဇာတိ, နေသာဒဇာတိ, ရထကာရဇာတိ, ပုက္ကုသဇာတိ။ ဧသာ ဟီနာ နာမ ဇာတိ။ ဥက္ကဋ္ဌာ နာမ ဇာတိ – ခတ္တိယဇာတိ, ဗ္ရာဟ္မဏဇာတိ။ ဧသာ ဥက္ကဋ္ဌာ နာမ ဇာတိ။

Jāti nāma dve jātiyo – hīnā ca jāti ukkaṭṭhā ca jāti. Hīnā nāma jāti – caṇḍālajāti, venajāti, nesādajāti, rathakārajāti, pukkusajāti. Esā hīnā nāma jāti. Ukkaṭṭhā nāma jāti – khattiyajāti, brāhmaṇajāti. Esā ukkaṭṭhā nāma jāti.

နာမံ နာမ ဒ္ဝေ နာမာနိ – ဟီနဉ္စ နာမံ ဥက္ကဋ္ဌဉ္စ နာမံ ။ ဟီနံ နာမ နာမံ – အဝကဏ္ဏကံ, ဇဝကဏ္ဏကံ, ဓနိဋ္ဌကံ, သဝိဋ္ဌကံ, ကုလဝဍ္ဎကံ, တေသု တေသု ဝာ ပန ဇနပဒေသု ဩညာတံ အဝညာတံ ဟီဠိတံ ပရိဘူတံ အစိတ္တီကတံ, ဧတံ ဟီနံ နာမ နာမံ။ ဥက္ကဋ္ဌံ နာမ နာမံ – ဗုဒ္ဓပ္ပဋိသံယုတ္တံ, ဓမ္မပ္ပဋိသံယုတ္တံ, သင္ဃပ္ပဋိသံယုတ္တံ, တေသု တေသု ဝာ ပန ဇနပဒေသု အနောညာတံ အနဝညာတံ အဟီဠိတံ အပရိဘူတံ စိတ္တီကတံ, ဧတံ ဥက္ကဋ္ဌံ နာမ နာမံ။

Nāmaṃ nāma dve nāmāni – hīnañca nāmaṃ ukkaṭṭhañca nāmaṃ . Hīnaṃ nāma nāmaṃ – avakaṇṇakaṃ, javakaṇṇakaṃ, dhaniṭṭhakaṃ, saviṭṭhakaṃ, kulavaḍḍhakaṃ, tesu tesu vā pana janapadesu oññātaṃ avaññātaṃ hīḷitaṃ paribhūtaṃ acittīkataṃ, etaṃ hīnaṃ nāma nāmaṃ. Ukkaṭṭhaṃ nāma nāmaṃ – buddhappaṭisaṃyuttaṃ, dhammappaṭisaṃyuttaṃ, saṅghappaṭisaṃyuttaṃ, tesu tesu vā pana janapadesu anoññātaṃ anavaññātaṃ ahīḷitaṃ aparibhūtaṃ cittīkataṃ, etaṃ ukkaṭṭhaṃ nāma nāmaṃ.

ဂောတ္တံ နာမ ဒ္ဝေ ဂောတ္တာနိ – ဟီနဉ္စ ဂောတ္တံ ဥက္ကဋ္ဌဉ္စ ဂောတ္တံ။ ဟီနံ နာမ ဂောတ္တံ – ကောသိယဂောတ္တံ, ဘာရဒ္ဝာဇဂောတ္တံ, တေသု တေသု ဝာ ပန ဇနပဒေသု ဩညာတံ အဝညာတံ ဟီဠိတံ ပရိဘူတံ အစိတ္တီကတံ, ဧတံ ဟီနံ နာမ ဂောတ္တံ။ ဥက္ကဋ္ဌံ နာမ ဂောတ္တံ – ဂောတမဂောတ္တံ, မောဂ္ဂလ္လာနဂောတ္တံ, ကစ္စာနဂောတ္တံ, ဝာသိဋ္ဌဂောတ္တံ, တေသု တေသု ဝာ ပန ဇနပဒေသု အနောညာတံ အနဝညာတံ အဟီဠိတံ အပရိဘူတံ စိတ္တီကတံ, ဧတံ ဥက္ကဋ္ဌံ နာမ ဂောတ္တံ။

Gottaṃ nāma dve gottāni – hīnañca gottaṃ ukkaṭṭhañca gottaṃ. Hīnaṃ nāma gottaṃ – kosiyagottaṃ, bhāradvājagottaṃ, tesu tesu vā pana janapadesu oññātaṃ avaññātaṃ hīḷitaṃ paribhūtaṃ acittīkataṃ, etaṃ hīnaṃ nāma gottaṃ. Ukkaṭṭhaṃ nāma gottaṃ – gotamagottaṃ, moggallānagottaṃ, kaccānagottaṃ, vāsiṭṭhagottaṃ, tesu tesu vā pana janapadesu anoññātaṃ anavaññātaṃ ahīḷitaṃ aparibhūtaṃ cittīkataṃ, etaṃ ukkaṭṭhaṃ nāma gottaṃ.

ကမ္မံ နာမ ဒ္ဝေ ကမ္မာနိ – ဟီနဉ္စ ကမ္မံ ဥက္ကဋ္ဌဉ္စ ကမ္မံ။ ဟီနံ နာမ ကမ္မံ – ကောဋ္ဌကကမ္မံ, ပုပ္ဖဆဍ္ဍကကမ္မံ, တေသု တေသု ဝာ ပန ဇနပဒေသု ဩညာတံ အဝညာတံ ဟီဠိတံ ပရိဘူတံ အစိတ္တီကတံ, ဧတံ ဟီနံ နာမ ကမ္မံ။ ဥက္ကဋ္ဌံ နာမ ကမ္မံ – ကသိ, ဝဏိဇ္ဇာ, ဂောရက္ခာ, တေသု တေသု ဝာ ပန ဇနပဒေသု အနောညာတံ အနဝညာတံ အဟီဠိတံ အပရိဘူတံ စိတ္တီကတံ။ ဧတံ ဥက္ကဋ္ဌံ နာမ ကမ္မံ။

Kammaṃ nāma dve kammāni – hīnañca kammaṃ ukkaṭṭhañca kammaṃ. Hīnaṃ nāma kammaṃ – koṭṭhakakammaṃ, pupphachaḍḍakakammaṃ, tesu tesu vā pana janapadesu oññātaṃ avaññātaṃ hīḷitaṃ paribhūtaṃ acittīkataṃ, etaṃ hīnaṃ nāma kammaṃ. Ukkaṭṭhaṃ nāma kammaṃ – kasi, vaṇijjā, gorakkhā, tesu tesu vā pana janapadesu anoññātaṃ anavaññātaṃ ahīḷitaṃ aparibhūtaṃ cittīkataṃ. Etaṃ ukkaṭṭhaṃ nāma kammaṃ.

သိပ္ပံ နာမ ဒ္ဝေ သိပ္ပာနိ – ဟီနဉ္စ သိပ္ပံ ဥက္ကဋ္ဌဉ္စ သိပ္ပံ ။ ဟီနံ နာမ သိပ္ပံ – နဠကာရသိပ္ပံ, ကုမ္ဘကာရသိပ္ပံ, ပေသကာရသိပ္ပံ, စမ္မကာရသိပ္ပံ, နဟာပိတသိပ္ပံ, တေသု တေသု ဝာ ပန ဇနပဒေသု ဩညာတံ အဝညာတံ ဟီဠိတံ ပရိဘူတံ အစိတ္တီကတံ။ ဧတံ ဟီနံ နာမ သိပ္ပံ။ ဥက္ကဋ္ဌံ နာမ သိပ္ပံ – မုဒ္ဒာ, ဂဏနာ, လေခာ, တေသု တေသု ဝာ ပန ဇနပဒေသု အနောညာတံ အနဝညာတံ အဟီဠိတံ အပရိဘူတံ စိတ္တီကတံ, ဧတံ ဥက္ကဋ္ဌံ နာမ သိပ္ပံ။

Sippaṃ nāma dve sippāni – hīnañca sippaṃ ukkaṭṭhañca sippaṃ . Hīnaṃ nāma sippaṃ – naḷakārasippaṃ, kumbhakārasippaṃ, pesakārasippaṃ, cammakārasippaṃ, nahāpitasippaṃ, tesu tesu vā pana janapadesu oññātaṃ avaññātaṃ hīḷitaṃ paribhūtaṃ acittīkataṃ. Etaṃ hīnaṃ nāma sippaṃ. Ukkaṭṭhaṃ nāma sippaṃ – muddā, gaṇanā, lekhā, tesu tesu vā pana janapadesu anoññātaṃ anavaññātaṃ ahīḷitaṃ aparibhūtaṃ cittīkataṃ, etaṃ ukkaṭṭhaṃ nāma sippaṃ.

သဗ္ဗေပိ အာဗာဓာ ဟီနာ, အပိစ မဓုမေဟော အာဗာဓော ဥက္ကဋ္ဌော။

Sabbepi ābādhā hīnā, apica madhumeho ābādho ukkaṭṭho.

လိင္ဂံ နာမ ဒ္ဝေ လိင္ဂာနိ – ဟီနဉ္စ လိင္ဂံ ဥက္ကဋ္ဌဉ္စ လိင္ဂံ။ ဟီနံ နာမ လိင္ဂံ – အတိဒီဃံ, အတိရသ္သံ, အတိကဏ္ဟံ, အစ္စောဒာတံ, ဧတံ ဟီနံ နာမ လိင္ဂံ။ ဥက္ကဋ္ဌံ နာမ လိင္ဂံ – နာတိဒီဃံ, နာတိရသ္သံ, နာတိကဏ္ဟံ, နာစ္စောဒာတံ။ ဧတံ ဥက္ကဋ္ဌံ နာမ လိင္ဂံ။

Liṅgaṃ nāma dve liṅgāni – hīnañca liṅgaṃ ukkaṭṭhañca liṅgaṃ. Hīnaṃ nāma liṅgaṃ – atidīghaṃ, atirassaṃ, atikaṇhaṃ, accodātaṃ, etaṃ hīnaṃ nāma liṅgaṃ. Ukkaṭṭhaṃ nāma liṅgaṃ – nātidīghaṃ, nātirassaṃ, nātikaṇhaṃ, nāccodātaṃ. Etaṃ ukkaṭṭhaṃ nāma liṅgaṃ.

သဗ္ဗေပိ ကိလေသာ ဟီနာ။

Sabbepi kilesā hīnā.

သဗ္ဗာပိ အာပတ္တိယော ဟီနာ။ အပိစ, သောတာပတ္တိသမာပတ္တိ ဥက္ကဋ္ဌာ။

Sabbāpi āpattiyo hīnā. Apica, sotāpattisamāpatti ukkaṭṭhā.

အက္ကောသော နာမ ဒ္ဝေ အက္ကောသာ – ဟီနော စ အက္ကောသော ဥက္ကဋ္ဌော စ အက္ကောသော။ ဟီနော နာမ အက္ကောသော – ဩဋ္ဌောသိ, မေဏ္ဍောသိ, ဂောဏောသိ, ဂဒ္ရဘောသိ, တိရစ္ဆာနဂတောသိ, နေရယိကောသိ; နတ္ထိ တုယ္ဟံ သုဂတိ, ဒုဂ္ဂတိ ယေဝ တုယ္ဟံ ပာဋိကင္ခာတိ, ယကာရေန ဝာ ဘကာရေန ဝာ, ကာဋကောဋစိကာယ ဝာ, ဧသော ဟီနော နာမ အက္ကောသော။ ဥက္ကဋ္ဌော နာမ အက္ကောသော – ပဏ္ဍိတောသိ, ဗ္ယတ္တောသိ , မေဓာဝီသိ, ဗဟုသ္သုတောသိ, ဓမ္မကထိကောသိ, နတ္ထိ တုယ္ဟံ ဒုဂ္ဂတိ, သုဂတိယေဝ တုယ္ဟံ ပာဋိကင္ခာတိ, ဧသော ဥက္ကဋ္ဌော နာမ အက္ကောသော။

Akkoso nāma dve akkosā – hīno ca akkoso ukkaṭṭho ca akkoso. Hīno nāma akkoso – oṭṭhosi, meṇḍosi, goṇosi, gadrabhosi, tiracchānagatosi, nerayikosi; natthi tuyhaṃ sugati, duggati yeva tuyhaṃ pāṭikaṅkhāti, yakārena vā bhakārena vā, kāṭakoṭacikāya vā, eso hīno nāma akkoso. Ukkaṭṭho nāma akkoso – paṇḍitosi, byattosi , medhāvīsi, bahussutosi, dhammakathikosi, natthi tuyhaṃ duggati, sugatiyeva tuyhaṃ pāṭikaṅkhāti, eso ukkaṭṭho nāma akkoso.

၁၆. ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဟီနေန ဟီနံ ဝဒေတိ, စဏ္ဍာလံ ဝေနံ နေသာဒံ ရထကာရံ ပုက္ကုသံ – ‘‘စဏ္ဍာလောသိ, ဝေနောသိ, နေသာဒောသိ, ရထကာရောသိ, ပုက္ကုသောသီ’’တိ ဘဏတိ ¹³, အာပတ္တိ ဝာစာယ, ဝာစာယ ပာစိတ္တိယသ္သ။

16. Upasampanno upasampannaṃ khuṃsetukāmo vambhetukāmo maṅkukattukāmo hīnena hīnaṃ vadeti, caṇḍālaṃ venaṃ nesādaṃ rathakāraṃ pukkusaṃ – ‘‘caṇḍālosi, venosi, nesādosi, rathakārosi, pukkusosī’’ti bhaṇati ¹⁴, āpatti vācāya, vācāya pācittiyassa.

ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဟီနေန ဥက္ကဋ္ဌံ ဝဒေတိ, ခတ္တိယံ ဗ္ရာဟ္မဏံ – ‘‘စဏ္ဍာလောသိ, ဝေနောသိ, နေသာဒောသိ, ရထကာရောသိ, ပုက္ကုသောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannaṃ khuṃsetukāmo vambhetukāmo maṅkukattukāmo hīnena ukkaṭṭhaṃ vadeti, khattiyaṃ brāhmaṇaṃ – ‘‘caṇḍālosi, venosi, nesādosi, rathakārosi, pukkusosī’’ti bhaṇati, āpatti vācāya, vācāya pācittiyassa.

ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဥက္ကဋ္ဌေန ဟီနံ ဝဒေတိ, စဏ္ဍာလံ ဝေနံ နေသာဒံ ရထကာရံ ပုက္ကုသံ – ‘‘ခတ္တိယောသိ, ဗ္ရာဟ္မဏောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena hīnaṃ vadeti, caṇḍālaṃ venaṃ nesādaṃ rathakāraṃ pukkusaṃ – ‘‘khattiyosi, brāhmaṇosī’’ti bhaṇati, āpatti vācāya, vācāya pācittiyassa.

ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဥက္ကဋ္ဌေန ဥက္ကဋ္ဌံ ဝဒေတိ, ခတ္တိယံ ဗ္ရာဟ္မဏံ – ‘‘ခတ္တိယောသိ, ဗ္ရာဟ္မဏောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena ukkaṭṭhaṃ vadeti, khattiyaṃ brāhmaṇaṃ – ‘‘khattiyosi, brāhmaṇosī’’ti bhaṇati, āpatti vācāya, vācāya pācittiyassa.

၁၇. ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဟီနေန ဟီနံ ဝဒေတိ, အဝကဏ္ဏကံ ဇဝကဏ္ဏကံ ဓနိဋ္ဌကံ သဝိဋ္ဌကံ ကုလဝဍ္ဎကံ – ‘‘အဝကဏ္ဏကောသိ, ဇဝကဏ္ဏကောသိ, ဓနိဋ္ဌကောသိ, သဝိဋ္ဌကောသိ, ကုလဝဍ္ဎကောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

17. Upasampanno upasampannaṃ khuṃsetukāmo vambhetukāmo maṅkukattukāmo hīnena hīnaṃ vadeti, avakaṇṇakaṃ javakaṇṇakaṃ dhaniṭṭhakaṃ saviṭṭhakaṃ kulavaḍḍhakaṃ – ‘‘avakaṇṇakosi, javakaṇṇakosi, dhaniṭṭhakosi, saviṭṭhakosi, kulavaḍḍhakosī’’ti bhaṇati, āpatti vācāya, vācāya pācittiyassa.

ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဟီနေန ဥက္ကဋ္ဌံ ဝဒေတိ, ဗုဒ္ဓရက္ခိတံ ဓမ္မရက္ခိတံ သင္ဃရက္ခိတံ – ‘‘အဝကဏ္ဏကောသိ, ဇဝကဏ္ဏကောသိ, ဓနိဋ္ဌကောသိ, သဝိဋ္ဌကောသိ, ကုလဝဍ္ဎကောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannaṃ khuṃsetukāmo vambhetukāmo maṅkukattukāmo hīnena ukkaṭṭhaṃ vadeti, buddharakkhitaṃ dhammarakkhitaṃ saṅgharakkhitaṃ – ‘‘avakaṇṇakosi, javakaṇṇakosi, dhaniṭṭhakosi, saviṭṭhakosi, kulavaḍḍhakosī’’ti bhaṇati, āpatti vācāya, vācāya pācittiyassa.

ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဥက္ကဋ္ဌေန ဟီနံ ဝဒေတိ, အဝကဏ္ဏကံ ဇဝကဏ္ဏကံ ဓနိဋ္ဌကံ သဝိဋ္ဌကံ ကုလဝဍ္ဎကံ – ‘‘ဗုဒ္ဓရက္ခိတောသိ, ဓမ္မရက္ခိတောသိ, သင္ဃရက္ခိတောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena hīnaṃ vadeti, avakaṇṇakaṃ javakaṇṇakaṃ dhaniṭṭhakaṃ saviṭṭhakaṃ kulavaḍḍhakaṃ – ‘‘buddharakkhitosi, dhammarakkhitosi, saṅgharakkhitosī’’ti bhaṇati, āpatti vācāya, vācāya pācittiyassa.

ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဥက္ကဋ္ဌေန ဥကဋ္ဌံ ဝဒေတိ, ဗုဒ္ဓရက္ခိတံ ဓမ္မရက္ခိတံ သင္ဃရက္ခိတံ – ‘‘ဗုဒ္ဓရက္ခိတောသိ, ဓမ္မရက္ခိတောသိ, သင္ဃရက္ခိတောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena ukaṭṭhaṃ vadeti, buddharakkhitaṃ dhammarakkhitaṃ saṅgharakkhitaṃ – ‘‘buddharakkhitosi, dhammarakkhitosi, saṅgharakkhitosī’’ti bhaṇati, āpatti vācāya, vācāya pācittiyassa.

၁၈. ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဟီနေန ဟီနံ ဝဒေတိ, ကောသိယံ ဘာရဒ္ဝာဇံ – ‘‘ကောသိယောသိ, ဘာရဒ္ဝာဇောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

18. Upasampanno upasampannaṃ khuṃsetukāmo vambhetukāmo maṅkukattukāmo hīnena hīnaṃ vadeti, kosiyaṃ bhāradvājaṃ – ‘‘kosiyosi, bhāradvājosī’’ti bhaṇati, āpatti vācāya, vācāya pācittiyassa.

ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဟီနေန ဥက္ကဋ္ဌံ ဝဒေတိ, ဂောတမံ မောဂ္ဂလ္လာနံ ကစ္စာနံ ဝာသိဋ္ဌံ – ‘‘ကောသိယောသိ, ဘာရဒ္ဝာဇောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannaṃ khuṃsetukāmo vambhetukāmo maṅkukattukāmo hīnena ukkaṭṭhaṃ vadeti, gotamaṃ moggallānaṃ kaccānaṃ vāsiṭṭhaṃ – ‘‘kosiyosi, bhāradvājosī’’ti bhaṇati, āpatti vācāya, vācāya pācittiyassa.

ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဥက္ကဋ္ဌေန ဟီနံ ဝဒေတိ, ကောသိယံ ဘာရဒ္ဝာဇံ – ‘‘ဂောတမောသိ, မောဂ္ဂလ္လာနောသိ, ကစ္စာနောသိ, ဝာသိဋ္ဌောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena hīnaṃ vadeti, kosiyaṃ bhāradvājaṃ – ‘‘gotamosi, moggallānosi, kaccānosi, vāsiṭṭhosī’’ti bhaṇati, āpatti vācāya, vācāya pācittiyassa.

ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဥက္ကဋ္ဌေန ဥက္ကဋ္ဌံ ဝဒေတိ, ဂောတမံ မောဂ္ဂလ္လာနံ ကစ္စာနံ ဝာသိဋ္ဌံ – ‘‘ဂောတမောသိ, မောဂ္ဂလ္လာနောသိ, ကစ္စာနောသိ, ဝာသိဋ္ဌောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena ukkaṭṭhaṃ vadeti, gotamaṃ moggallānaṃ kaccānaṃ vāsiṭṭhaṃ – ‘‘gotamosi, moggallānosi, kaccānosi, vāsiṭṭhosī’’ti bhaṇati, āpatti vācāya, vācāya pācittiyassa.

၁၉. ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဟီနေန ဟီနံ ဝဒေတိ, ကောဋ္ဌကံ ပုပ္ဖဆဍ္ဍကံ – ‘‘ကောဋ္ဌကောသိ, ပုပ္ဖဆဍ္ဍကောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

19. Upasampanno upasampannaṃ khuṃsetukāmo vambhetukāmo maṅkukattukāmo hīnena hīnaṃ vadeti, koṭṭhakaṃ pupphachaḍḍakaṃ – ‘‘koṭṭhakosi, pupphachaḍḍakosī’’ti bhaṇati, āpatti vācāya, vācāya pācittiyassa.

ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဟီနေန ဥက္ကဋ္ဌံ ဝဒေတိ, ကသ္သကံ ဝာဏိဇံ ဂောရက္ခံ – ‘‘ကောဋ္ဌကောသိ, ပုပ္ဖဆဍ္ဍကောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannaṃ khuṃsetukāmo vambhetukāmo maṅkukattukāmo hīnena ukkaṭṭhaṃ vadeti, kassakaṃ vāṇijaṃ gorakkhaṃ – ‘‘koṭṭhakosi, pupphachaḍḍakosī’’ti bhaṇati, āpatti vācāya, vācāya pācittiyassa.

ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဥက္ကဋ္ဌေန ဟီနံ ဝဒေတိ, ကောဋ္ဌကံ ပုပ္ဖဆဍ္ဍကံ – ‘‘ကသ္သကောသိ, ဝာဏိဇောသိ, ဂောရက္ခောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena hīnaṃ vadeti, koṭṭhakaṃ pupphachaḍḍakaṃ – ‘‘kassakosi, vāṇijosi, gorakkhosī’’ti bhaṇati, āpatti vācāya, vācāya pācittiyassa.

ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဥက္ကဋ္ဌေန ဥက္ကဋ္ဌံ ဝဒေတိ, ကသ္သကံ ဝာဏိဇံ ဂောရက္ခံ – ‘‘ကသ္သကောသိ, ဝာဏိဇောသိ, ဂောရက္ခောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena ukkaṭṭhaṃ vadeti, kassakaṃ vāṇijaṃ gorakkhaṃ – ‘‘kassakosi, vāṇijosi, gorakkhosī’’ti bhaṇati, āpatti vācāya, vācāya pācittiyassa.

၂၀. ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဟီနေန ဟီနံ ဝဒေတိ, နဠကာရံ ကုမ္ဘကာရံ ပေသကာရံ စမ္မကာရံ နဟာပိတံ – ‘‘နဠကာရောသိ, ကုမ္ဘကာရောသိ, ပေသကာရောသိ, စမ္မကာရောသိ, နဟာပိတောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

20. Upasampanno upasampannaṃ khuṃsetukāmo vambhetukāmo maṅkukattukāmo hīnena hīnaṃ vadeti, naḷakāraṃ kumbhakāraṃ pesakāraṃ cammakāraṃ nahāpitaṃ – ‘‘naḷakārosi, kumbhakārosi, pesakārosi, cammakārosi, nahāpitosī’’ti bhaṇati, āpatti vācāya, vācāya pācittiyassa.

ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဟီနေန ဥက္ကဋ္ဌံ ဝဒေတိ, မုဒ္ဒိကံ ဂဏကံ လေခကံ – ‘‘နဠကာရောသိ, ကုမ္ဘကာရောသိ, ပေသကာရောသိ, စမ္မကာရောသိ, နဟာပိတောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannaṃ khuṃsetukāmo vambhetukāmo maṅkukattukāmo hīnena ukkaṭṭhaṃ vadeti, muddikaṃ gaṇakaṃ lekhakaṃ – ‘‘naḷakārosi, kumbhakārosi, pesakārosi, cammakārosi, nahāpitosī’’ti bhaṇati, āpatti vācāya, vācāya pācittiyassa.

ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဥက္ကဋ္ဌေန ဟီနံ ဝဒေတိ, နဠကာရံ ကုမ္ဘကာရံ ပေသကာရံ စမ္မကာရံ နဟာပိတံ – ‘‘မုဒ္ဒိကောသိ, ဂဏကောသိ, လေခကောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena hīnaṃ vadeti, naḷakāraṃ kumbhakāraṃ pesakāraṃ cammakāraṃ nahāpitaṃ – ‘‘muddikosi, gaṇakosi, lekhakosī’’ti bhaṇati, āpatti vācāya, vācāya pācittiyassa.

ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဥက္ကဋ္ဌေန ဥက္ကဋ္ဌံ ဝဒေတိ, မုဒ္ဒိကံ ဂဏကံ လေခကံ – ‘‘မုဒ္ဒိကောသိ, ဂဏကောသိ, လေခကောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena ukkaṭṭhaṃ vadeti, muddikaṃ gaṇakaṃ lekhakaṃ – ‘‘muddikosi, gaṇakosi, lekhakosī’’ti bhaṇati, āpatti vācāya, vācāya pācittiyassa.

၂၁. ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဟီနေန ဟီနံ ဝဒေတိ, ကုဋ္ဌိကံ ဂဏ္ဍိကံ ကိလာသိကံ သောသိကံ အပမာရိကံ – ‘‘ကုဋ္ဌိကောသိ, ဂဏ္ဍိကောသိ, ကိလာသိကောသိ, သောသိကောသိ, အပမာရိကောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

21. Upasampanno upasampannaṃ khuṃsetukāmo vambhetukāmo maṅkukattukāmo hīnena hīnaṃ vadeti, kuṭṭhikaṃ gaṇḍikaṃ kilāsikaṃ sosikaṃ apamārikaṃ – ‘‘kuṭṭhikosi, gaṇḍikosi, kilāsikosi, sosikosi, apamārikosī’’ti bhaṇati, āpatti vācāya, vācāya pācittiyassa.

ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဟီနေန ဥက္ကဋ္ဌံ ဝဒေတိ, မဓုမေဟိကံ – ‘‘ကုဋ္ဌိကောသိ, ဂဏ္ဍိကောသိ, ကိလာသိကောသိ, သောသိကောသိ, အပမာရိကောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannaṃ khuṃsetukāmo vambhetukāmo maṅkukattukāmo hīnena ukkaṭṭhaṃ vadeti, madhumehikaṃ – ‘‘kuṭṭhikosi, gaṇḍikosi, kilāsikosi, sosikosi, apamārikosī’’ti bhaṇati, āpatti vācāya, vācāya pācittiyassa.

ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဥက္ကဋ္ဌေန ဟီနံ ဝဒေတိ, ကုဋ္ဌိကံ ဂဏ္ဍိကံ ကိလာသိကံ သောသိကံ အပမာရိကံ – ‘‘မဓုမေဟိကောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena hīnaṃ vadeti, kuṭṭhikaṃ gaṇḍikaṃ kilāsikaṃ sosikaṃ apamārikaṃ – ‘‘madhumehikosī’’ti bhaṇati, āpatti vācāya, vācāya pācittiyassa.

ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဥက္ကဋ္ဌေန ဥက္ကဋ္ဌံ ဝဒေတိ, မဓုမေဟိကံ – ‘‘မဓုမေဟိကောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena ukkaṭṭhaṃ vadeti, madhumehikaṃ – ‘‘madhumehikosī’’ti bhaṇati, āpatti vācāya, vācāya pācittiyassa.

၂၂. ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဟီနေန ဟီနံ ဝဒေတိ, အတိဒီဃံ အတိရသ္သံ အတိကဏ္ဟံ အစ္စောဒာတံ – ‘‘အတိဒီဃောသိ, အတိရသ္သောသိ, အတိကဏ္ဟောသိ, အစ္စောဒာတောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

22. Upasampanno upasampannaṃ khuṃsetukāmo vambhetukāmo maṅkukattukāmo hīnena hīnaṃ vadeti, atidīghaṃ atirassaṃ atikaṇhaṃ accodātaṃ – ‘‘atidīghosi, atirassosi, atikaṇhosi, accodātosī’’ti bhaṇati, āpatti vācāya, vācāya pācittiyassa.

ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဟီနေန ဥက္ကဋ္ဌံ ဝဒေတိ, နာတိဒီဃံ နာတိရသ္သံ နာတိကဏ္ဟံ နာစ္စောဒာတံ – ‘‘အတိဒီဃောသိ, အတိရသ္သောသိ, အတိကဏ္ဟောသိ, အစ္စောဒာတောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannaṃ khuṃsetukāmo vambhetukāmo maṅkukattukāmo hīnena ukkaṭṭhaṃ vadeti, nātidīghaṃ nātirassaṃ nātikaṇhaṃ nāccodātaṃ – ‘‘atidīghosi, atirassosi, atikaṇhosi, accodātosī’’ti bhaṇati, āpatti vācāya, vācāya pācittiyassa.

ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဥက္ကဋ္ဌေန ဟီနံ ဝဒေတိ, အတိဒီဃံ အတိရသ္သံ အတိကဏ္ဟံ အစ္စောဒာတံ – ‘‘နာတိဒီဃောသိ, နာတိရသ္သောသိ, နာတိကဏ္ဟောသိ, နာစ္စောဒာတောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena hīnaṃ vadeti, atidīghaṃ atirassaṃ atikaṇhaṃ accodātaṃ – ‘‘nātidīghosi, nātirassosi, nātikaṇhosi, nāccodātosī’’ti bhaṇati, āpatti vācāya, vācāya pācittiyassa.

ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဥက္ကဋ္ဌေန ဥက္ကဋ္ဌံ ဝဒေတိ, နာတိဒီဃံ နာတိရသ္သံ နာတိကဏ္ဟံ နာစ္စောဒာတံ – ‘‘နာတိဒီဃောသိ, နာတိရသ္သောသိ, နာတိကဏ္ဟောသိ, နာစ္စောဒာတောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena ukkaṭṭhaṃ vadeti, nātidīghaṃ nātirassaṃ nātikaṇhaṃ nāccodātaṃ – ‘‘nātidīghosi, nātirassosi, nātikaṇhosi, nāccodātosī’’ti bhaṇati, āpatti vācāya, vācāya pācittiyassa.

၂၃. ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဟီနေန ဟီနံ ဝဒေတိ, ရာဂပရိယုဋ္ဌိတံ ဒောသပရိယုဋ္ဌိတံ မောဟပရိယုဋ္ဌိတံ – ‘‘ရာဂပရိယုဋ္ဌိတောသိ, ဒောသပရိယုဋ္ဌိတောသိ, မောဟပရိယုဋ္ဌိတောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

23. Upasampanno upasampannaṃ khuṃsetukāmo vambhetukāmo maṅkukattukāmo hīnena hīnaṃ vadeti, rāgapariyuṭṭhitaṃ dosapariyuṭṭhitaṃ mohapariyuṭṭhitaṃ – ‘‘rāgapariyuṭṭhitosi, dosapariyuṭṭhitosi, mohapariyuṭṭhitosī’’ti bhaṇati, āpatti vācāya, vācāya pācittiyassa.

ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဟီနေန ဥက္ကဋ္ဌံ ဝဒေတိ, ဝီတရာဂံ ဝီတဒောသံ ဝီတမောဟံ – ‘‘ရာဂပရိယုဋ္ဌိတောသိ , ဒောသပရိယုဋ္ဌိတောသိ, မောဟပရိယုဋ္ဌိတောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannaṃ khuṃsetukāmo vambhetukāmo maṅkukattukāmo hīnena ukkaṭṭhaṃ vadeti, vītarāgaṃ vītadosaṃ vītamohaṃ – ‘‘rāgapariyuṭṭhitosi , dosapariyuṭṭhitosi, mohapariyuṭṭhitosī’’ti bhaṇati, āpatti vācāya, vācāya pācittiyassa.

ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဥက္ကဋ္ဌေန ဟီနံ ဝဒေတိ, ရာဂပရိယုဋ္ဌိတံ ဒောသပရိယုဋ္ဌိတံ မောဟပရိယုဋ္ဌိတံ – ‘‘ဝီတရာဂောသိ, ဝီတဒောသောသိ, ဝီတမောဟောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena hīnaṃ vadeti, rāgapariyuṭṭhitaṃ dosapariyuṭṭhitaṃ mohapariyuṭṭhitaṃ – ‘‘vītarāgosi, vītadososi, vītamohosī’’ti bhaṇati, āpatti vācāya, vācāya pācittiyassa.

ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဥက္ကဋ္ဌေန ဥက္ကဋ္ဌံ ဝဒေတိ, ဝီတရာဂံ ဝီတဒောသံ ဝီတမောဟံ – ‘‘ဝီတရာဂောသိ, ဝီတဒောသောသိ, ဝီတမောဟောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena ukkaṭṭhaṃ vadeti, vītarāgaṃ vītadosaṃ vītamohaṃ – ‘‘vītarāgosi, vītadososi, vītamohosī’’ti bhaṇati, āpatti vācāya, vācāya pācittiyassa.

၂၄. ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဟီနေန ဟီနံ ဝဒေတိ, ပာရာဇိကံ အဇ္ဈာပန္နံ သင္ဃာဒိသေသံ အဇ္ဈာပန္နံ ထုလ္လစ္စယံ အဇ္ဈာပန္နံ ပာစိတ္တိယံ အဇ္ဈာပန္နံ ပာဋိဒေသနီယံ အဇ္ဈာပန္နံ ဒုက္ကဋံ အဇ္ဈာပန္နံ ဒုဗ္ဘာသိတံ အဇ္ဈာပန္နံ – ‘‘ပာရာဇိကံ အဇ္ဈာပန္နောသိ, သင္ဃာဒိသေသံ အဇ္ဈာပန္နောသိ, ထုလ္လစ္စယံ အဇ္ဈာပန္နောသိ, ပာစိတ္တိယံ အဇ္ဈာပန္နောသိ, ပာဋိဒေသနီယံ အဇ္ဈာပန္နောသိ, ဒုက္ကဋံ အဇ္ဈာပန္နောသိ, ဒုဗ္ဘာသိတံ အဇ္ဈာပန္နောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

24. Upasampanno upasampannaṃ khuṃsetukāmo vambhetukāmo maṅkukattukāmo hīnena hīnaṃ vadeti, pārājikaṃ ajjhāpannaṃ saṅghādisesaṃ ajjhāpannaṃ thullaccayaṃ ajjhāpannaṃ pācittiyaṃ ajjhāpannaṃ pāṭidesanīyaṃ ajjhāpannaṃ dukkaṭaṃ ajjhāpannaṃ dubbhāsitaṃ ajjhāpannaṃ – ‘‘pārājikaṃ ajjhāpannosi, saṅghādisesaṃ ajjhāpannosi, thullaccayaṃ ajjhāpannosi, pācittiyaṃ ajjhāpannosi, pāṭidesanīyaṃ ajjhāpannosi, dukkaṭaṃ ajjhāpannosi, dubbhāsitaṃ ajjhāpannosī’’ti bhaṇati, āpatti vācāya, vācāya pācittiyassa.

ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဟီနေန ဥက္ကဋ္ဌံ ဝဒေတိ, သောတာပန္နံ – ‘‘ပာရာဇိကံ အဇ္ဈာပန္နောသိ။ပေ.။ ဒုဗ္ဘာသိတံ အဇ္ဈာပန္နောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannaṃ khuṃsetukāmo vambhetukāmo maṅkukattukāmo hīnena ukkaṭṭhaṃ vadeti, sotāpannaṃ – ‘‘pārājikaṃ ajjhāpannosi…pe… dubbhāsitaṃ ajjhāpannosī’’ti bhaṇati, āpatti vācāya, vācāya pācittiyassa.

ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဥက္ကဋ္ဌေန ဟီနံ ဝဒေတိ, ပာရာဇိကံ အဇ္ဈာပန္နံ။ပေ.။ ဒုဗ္ဘာသိတံ အဇ္ဈာပန္နံ – ‘‘သောတာပန္နောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena hīnaṃ vadeti, pārājikaṃ ajjhāpannaṃ…pe… dubbhāsitaṃ ajjhāpannaṃ – ‘‘sotāpannosī’’ti bhaṇati, āpatti vācāya, vācāya pācittiyassa.

ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဥက္ကဋ္ဌေန ဥက္ကဋ္ဌံ ဝဒေတိ, သောတာပန္နံ – ‘‘သောတာပန္နောသီ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena ukkaṭṭhaṃ vadeti, sotāpannaṃ – ‘‘sotāpannosī’’ti bhaṇati, āpatti vācāya, vācāya pācittiyassa.

၂၅. ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဟီနေန ဟီနံ ဝဒေတိ, ဩဋ္ဌံ မေဏ္ဍံ ဂောဏံ ဂဒ္ရဘံ တိရစ္ဆာနဂတံ နေရယိကံ – ‘‘ဩဋ္ဌောသိ, မေဏ္ဍောသိ, ဂောဏောသိ, ဂဒ္ရဘောသိ, တိရစ္ဆာနဂတောသိ, နေရယိကောသိ, နတ္ထိ တုယ္ဟံ သုဂတိ, ဒုဂ္ဂတိ ယေဝ တုယ္ဟံ ပာဋိကင္ခာ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

25. Upasampanno upasampannaṃ khuṃsetukāmo vambhetukāmo maṅkukattukāmo hīnena hīnaṃ vadeti, oṭṭhaṃ meṇḍaṃ goṇaṃ gadrabhaṃ tiracchānagataṃ nerayikaṃ – ‘‘oṭṭhosi, meṇḍosi, goṇosi, gadrabhosi, tiracchānagatosi, nerayikosi, natthi tuyhaṃ sugati, duggati yeva tuyhaṃ pāṭikaṅkhā’’ti bhaṇati, āpatti vācāya, vācāya pācittiyassa.

ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဟီနေန ဥက္ကဋ္ဌံ ဝဒေတိ, ပဏ္ဍိတံ ဗ္ယတ္တံ မေဓာဝိ ဗဟုသ္သုတံ ဓမ္မကထိကံ – ‘‘ဩဋ္ဌောသိ, မေဏ္ဍောသိ, ဂောဏောသိ, ဂဒ္ရဘောသိ, တိရစ္ဆာနဂတောသိ, နေရယိကောသိ; နတ္ထိ တုယ္ဟံ သုဂတိ, ဒုဂ္ဂတိ ယေဝ တုယ္ဟံ ပာဋိကင္ခာ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannaṃ khuṃsetukāmo vambhetukāmo maṅkukattukāmo hīnena ukkaṭṭhaṃ vadeti, paṇḍitaṃ byattaṃ medhāvi bahussutaṃ dhammakathikaṃ – ‘‘oṭṭhosi, meṇḍosi, goṇosi, gadrabhosi, tiracchānagatosi, nerayikosi; natthi tuyhaṃ sugati, duggati yeva tuyhaṃ pāṭikaṅkhā’’ti bhaṇati, āpatti vācāya, vācāya pācittiyassa.

ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဥက္ကဋ္ဌေန ဟီနံ ဝဒေတိ, ဩဋ္ဌံ မေဏ္ဍံ ဂောဏံ ဂဒ္ရဘံ တိရစ္ဆာနဂတံ နေရယိကံ – ‘‘ပဏ္ဍိတောသိ, ဗ္ယတ္တောသိ, မေဓာဝီသိ, ဗဟုသ္သုတောသိ, ဓမ္မကထိကောသိ, နတ္ထိ တုယ္ဟံ ဒုဂ္ဂတိ, သုဂတိ ယေဝ တုယ္ဟံ ပာဋိကင္ခာ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena hīnaṃ vadeti, oṭṭhaṃ meṇḍaṃ goṇaṃ gadrabhaṃ tiracchānagataṃ nerayikaṃ – ‘‘paṇḍitosi, byattosi, medhāvīsi, bahussutosi, dhammakathikosi, natthi tuyhaṃ duggati, sugati yeva tuyhaṃ pāṭikaṅkhā’’ti bhaṇati, āpatti vācāya, vācāya pācittiyassa.

ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဥက္ကဋ္ဌေန ဥက္ကဋ္ဌံ ဝဒေတိ, ပဏ္ဍိတံ ဗ္ယတ္တံ မေဓာဝိံ ဗဟုသ္သုတံ ဓမ္မကထိကံ – ‘‘ပဏ္ဍိတောသိ, ဗ္ယတ္တောသိ, မေဓာဝီသိ, ဗဟုသ္သုတောသိ, ဓမ္မကထိကောသိ, နတ္ထိ တုယ္ဟံ ဒုဂ္ဂတိ, သုဂတိ ယေဝ တုယ္ဟံ ပာဋိကင္ခာ’’တိ ဘဏတိ, အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannaṃ khuṃsetukāmo vambhetukāmo maṅkukattukāmo ukkaṭṭhena ukkaṭṭhaṃ vadeti, paṇḍitaṃ byattaṃ medhāviṃ bahussutaṃ dhammakathikaṃ – ‘‘paṇḍitosi, byattosi, medhāvīsi, bahussutosi, dhammakathikosi, natthi tuyhaṃ duggati, sugati yeva tuyhaṃ pāṭikaṅkhā’’ti bhaṇati, āpatti vācāya, vācāya pācittiyassa.

၂၆. ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဧဝံ ဝဒေတိ, ‘‘သန္တိ ဣဓေကစ္စေ စဏ္ဍာလာ ဝေနာ နေသာဒာ ရထကာရာ ပုက္ကုသာ’’တိ ဘဏတိ, အာပတ္တိ ဝာစာယ, ဝာစာယ ဒုက္ကဋသ္သ။

26. Upasampanno upasampannaṃ khuṃsetukāmo vambhetukāmo maṅkukattukāmo evaṃ vadeti, ‘‘santi idhekacce caṇḍālā venā nesādā rathakārā pukkusā’’ti bhaṇati, āpatti vācāya, vācāya dukkaṭassa.

ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဧဝံ ဝဒေတိ, ‘‘သန္တိ ဣဓေကစ္စေ ခတ္တိယာ, ဗ္ရာဟ္မဏာ’’တိ ဘဏတိ, အာပတ္တိ ဝာစာယ, ဝာစာယ ဒုက္ကဋသ္သ။

Upasampanno upasampannaṃ khuṃsetukāmo vambhetukāmo maṅkukattukāmo evaṃ vadeti, ‘‘santi idhekacce khattiyā, brāhmaṇā’’ti bhaṇati, āpatti vācāya, vācāya dukkaṭassa.

၂၇. ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဧဝံ ဝဒေတိ, ‘‘သန္တိ ဣဓေကစ္စေ အဝကဏ္ဏကာ ဇဝကဏ္ဏကာ ဓနိဋ္ဌကာ သဝိဋ္ဌကာ ကုလဝဍ္ဎကာ’’တိ ဘဏတိ။ပေ.။။ ‘‘သန္တိ ဣဓေကစ္စေ ဗုဒ္ဓရက္ခိတာ ဓမ္မရက္ခိတာ သင္ဃရက္ခိတာ’’တိ ဘဏတိ ။ပေ.။။ ‘‘သန္တိ ဣဓေကစ္စေ ကောသိယာ ဘာရဒ္ဝာဇာ’’တိ ဘဏတိ။ပေ.။။ ‘‘သန္တိ ဣဓေကစ္စေ ဂောတမာ မောဂ္ဂလ္လာနာ ကစ္စာနာ ဝာသိဋ္ဌာ’’တိ ဘဏတိ။ပေ.။။ ‘‘သန္တိ ဣဓေကစ္စေ ကောဋ္ဌကာ ပုပ္ဖဆဍ္ဍကာ’’တိ ဘဏတိ။ပေ.။။ ‘‘သန္တိ ဣဓေကစ္စေ ကသ္သကာ ဝာဏိဇာ ဂောရက္ခာ’’တိ ဘဏတိ။ပေ.။။ ‘‘သန္တိ ဣဓေကစ္စေ နဠကာရာ ကုမ္ဘကာရာ ပေသကာရာ စမ္မကာရာ နဟာပိတာ’’တိ ဘဏတိ။ပေ.။။ ‘‘သန္တိ ဣဓေကစ္စေ မုဒ္ဒိကာ ဂဏကာ လေခကာ’’တိ ဘဏတိ။ပေ.။။ ‘‘သန္တိ ဣဓေကစ္စေ ကုဋ္ဌိကာ ဂဏ္ဍိကာ ကိလာသိကာ သောသိကာ အပမာရိကာ’’တိ ဘဏတိ။ပေ.။။ ‘‘သန္တိ ဣဓေကစ္စေ မဓုမေဟိကာ’’တိ ဘဏတိ။ပေ.။။ ‘‘သန္တိ ဣဓေကစ္စေ အတိဒီဃာ အတိရသ္သာ အတိကဏ္ဟာ အစ္စောဒာတာ’’တိ ဘဏတိ။ပေ.။။ ‘‘သန္တိ ဣဓေကစ္စေ နာတိဒီဃာ နာတိရသ္သာ နာတိကဏ္ဟာ နာစ္စောဒာတာ’’တိ ဘဏတိ။ပေ.။။ ‘‘သန္တိ ဣဓေကစ္စေ ရာဂပရိယုဋ္ဌိတာ ဒောသပရိယုဋ္ဌိတာ မောဟပရိယုဋ္ဌိတာ’’တိ ဘဏတိ။ပေ.။။ ‘‘သန္တိ ဣဓေကစ္စေ ဝီတရာဂာ ဝီတဒောသာ ဝီတမောဟာ’’တိ ဘဏတိ။ပေ.။။ ‘‘သန္တိ ဣဓေကစ္စေ ပာရာဇိကံ အဇ္ဈာပန္နာ။ပေ.။ ဒုဗ္ဘာသိတံ အဇ္ဈာပန္နာ’’တိ ဘဏတိ။ပေ.။။ ‘‘သန္တိ ဣဓေကစ္စေ သောတာပန္နာ’’တိ ဘဏတိ။ပေ.။။ ‘‘သန္တိ ဣဓေကစ္စေ ဩဋ္ဌာ မေဏ္ဍာ ဂောဏာ ဂဒ္ရဘာ တိရစ္ဆာနဂတာ နေရယိကာ, နတ္ထိ တေသံ သုဂတိ, ဒုဂ္ဂတိယေဝ တေသံ ပာဋိကင္ခာ’’တိ ဘဏတိ, အာပတ္တိ ဝာစာယ, ဝာစာယ ဒုက္ကဋသ္သ။

27. Upasampanno upasampannaṃ khuṃsetukāmo vambhetukāmo maṅkukattukāmo evaṃ vadeti, ‘‘santi idhekacce avakaṇṇakā javakaṇṇakā dhaniṭṭhakā saviṭṭhakā kulavaḍḍhakā’’ti bhaṇati…pe…. ‘‘Santi idhekacce buddharakkhitā dhammarakkhitā saṅgharakkhitā’’ti bhaṇati …pe…. ‘‘Santi idhekacce kosiyā bhāradvājā’’ti bhaṇati…pe…. ‘‘Santi idhekacce gotamā moggallānā kaccānā vāsiṭṭhā’’ti bhaṇati…pe…. ‘‘Santi idhekacce koṭṭhakā pupphachaḍḍakā’’ti bhaṇati…pe…. ‘‘Santi idhekacce kassakā vāṇijā gorakkhā’’ti bhaṇati…pe…. ‘‘Santi idhekacce naḷakārā kumbhakārā pesakārā cammakārā nahāpitā’’ti bhaṇati…pe…. ‘‘Santi idhekacce muddikā gaṇakā lekhakā’’ti bhaṇati…pe…. ‘‘Santi idhekacce kuṭṭhikā gaṇḍikā kilāsikā sosikā apamārikā’’ti bhaṇati…pe…. ‘‘Santi idhekacce madhumehikā’’ti bhaṇati…pe…. ‘‘Santi idhekacce atidīghā atirassā atikaṇhā accodātā’’ti bhaṇati…pe…. ‘‘Santi idhekacce nātidīghā nātirassā nātikaṇhā nāccodātā’’ti bhaṇati…pe…. ‘‘Santi idhekacce rāgapariyuṭṭhitā dosapariyuṭṭhitā mohapariyuṭṭhitā’’ti bhaṇati…pe…. ‘‘Santi idhekacce vītarāgā vītadosā vītamohā’’ti bhaṇati…pe…. ‘‘Santi idhekacce pārājikaṃ ajjhāpannā…pe… dubbhāsitaṃ ajjhāpannā’’ti bhaṇati…pe…. ‘‘Santi idhekacce sotāpannā’’ti bhaṇati…pe…. ‘‘Santi idhekacce oṭṭhā meṇḍā goṇā gadrabhā tiracchānagatā nerayikā, natthi tesaṃ sugati, duggatiyeva tesaṃ pāṭikaṅkhā’’ti bhaṇati, āpatti vācāya, vācāya dukkaṭassa.

၂၈. ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဧဝံ ဝဒေတိ, ‘‘သန္တိ ဣဓေကစ္စေ ပဏ္ဍိတာ ဗ္ယတ္တာ, မေဓာဝီ ဗဟုသ္သုတာ ဓမ္မကထိကာ, နတ္ထိ တေသံ ဒုဂ္ဂတိ, သုဂတိယေဝ တေသံ ပာဋိကင္ခာ’’တိ ဘဏတိ, အာပတ္တိ ဝာစာယ, ဝာစာယ ဒုက္ကဋသ္သ။

28. Upasampanno upasampannaṃ khuṃsetukāmo vambhetukāmo maṅkukattukāmo evaṃ vadeti, ‘‘santi idhekacce paṇḍitā byattā, medhāvī bahussutā dhammakathikā, natthi tesaṃ duggati, sugatiyeva tesaṃ pāṭikaṅkhā’’ti bhaṇati, āpatti vācāya, vācāya dukkaṭassa.

၂၉. ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဧဝံ ဝဒေတိ, ‘‘ယေ နူန စဏ္ဍာလာ ဝေနာ နေသာဒာ ရထကာရာ ပုက္ကုသာ’’တိ ဘဏတိ, အာပတ္တိ ဝာစာယ, ဝာစာယ ဒုက္ကဋသ္သ။ပေ.။။

29. Upasampanno upasampannaṃ khuṃsetukāmo vambhetukāmo maṅkukattukāmo evaṃ vadeti, ‘‘ye nūna caṇḍālā venā nesādā rathakārā pukkusā’’ti bhaṇati, āpatti vācāya, vācāya dukkaṭassa…pe….

ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဧဝံ ဝဒေတိ, ‘‘ယေ နူန ပဏ္ဍိတာ ဗ္ယတ္တာ မေဓာဝီ ဗဟုသ္သုတာ ဓမ္မကထိကာ’’တိ ဘဏတိ, အာပတ္တိ ဝာစာယ, ဝာစာယ ဒုက္ကဋသ္သ။

Upasampanno upasampannaṃ khuṃsetukāmo vambhetukāmo maṅkukattukāmo evaṃ vadeti, ‘‘ye nūna paṇḍitā byattā medhāvī bahussutā dhammakathikā’’ti bhaṇati, āpatti vācāya, vācāya dukkaṭassa.

၃၀. ဥပသမ္ပန္နော ဥပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဧဝံ ဝဒေတိ, ‘‘န မယံ စဏ္ဍာလာ ဝေနာ နေသာဒာ ရထကာရာ ပုက္ကုသာ’’တိ ဘဏတိ။ပေ.။။ ‘‘န မယံ ပဏ္ဍိတာ ဗ္ယတ္တာ မေဓာဝီ ဗဟုသ္သုတာ ဓမ္မကထိကာ, နတ္ထမ္ဟာကံ ဒုဂ္ဂတိ, သုဂတိယေဝ အမ္ဟာကံ ပာဋိကင္ခာ’’တိ ဘဏတိ။ အာပတ္တိ ဝာစာယ, ဝာစာယ ဒုက္ကဋသ္သ။

30. Upasampanno upasampannaṃ khuṃsetukāmo vambhetukāmo maṅkukattukāmo evaṃ vadeti, ‘‘na mayaṃ caṇḍālā venā nesādā rathakārā pukkusā’’ti bhaṇati…pe…. ‘‘Na mayaṃ paṇḍitā byattā medhāvī bahussutā dhammakathikā, natthamhākaṃ duggati, sugatiyeva amhākaṃ pāṭikaṅkhā’’ti bhaṇati. Āpatti vācāya, vācāya dukkaṭassa.

၃၁. ဥပသမ္ပန္နော အနုပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဟီနေန ဟီနံ ဝဒေတိ,။ပေ.။ ဟီနေန ဥက္ကဋ္ဌံ ဝဒေတိ။ပေ.။ ဥက္ကဋ္ဌေန ဟီနံ ဝဒေတိ။ပေ.။ ဥက္ကဋ္ဌေန ဥက္ကဋ္ဌံ ဝဒေတိ, ပဏ္ဍိတံ ဗ္ယတ္တံ မေဓာဝိံ ဗဟုသ္သုတံ ဓမ္မကထိကံ – ‘‘ပဏ္ဍိတောသိ, ဗ္ယတ္တောသိ, မေဓာဝီသိ, ဗဟုသ္သုတောသိ, ဓမ္မကထိကောသိ, နတ္ထိ တုယ္ဟံ ဒုဂ္ဂတိ, သုဂတိယေဝ တုယ္ဟံ ပာဋိကင္ခာ’’တိ ဘဏတိ, အာပတ္တိ ဝာစာယ, ဝာစာယ ဒုက္ကဋသ္သ။

31. Upasampanno anupasampannaṃ khuṃsetukāmo vambhetukāmo maṅkukattukāmo hīnena hīnaṃ vadeti,…pe… hīnena ukkaṭṭhaṃ vadeti…pe… ukkaṭṭhena hīnaṃ vadeti…pe… ukkaṭṭhena ukkaṭṭhaṃ vadeti, paṇḍitaṃ byattaṃ medhāviṃ bahussutaṃ dhammakathikaṃ – ‘‘paṇḍitosi, byattosi, medhāvīsi, bahussutosi, dhammakathikosi, natthi tuyhaṃ duggati, sugatiyeva tuyhaṃ pāṭikaṅkhā’’ti bhaṇati, āpatti vācāya, vācāya dukkaṭassa.

ဥပသမ္ပန္နော အနုပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဧဝံ ဝဒေတိ, ‘‘သန္တိ ဣဓေကစ္စေ စဏ္ဍာလာ ဝေနာ နေသာဒာ ရထကာရာ ပုက္ကုသာ’’တိ ဘဏတိ။ပေ.။။ ‘‘သန္တိ ဣဓေကစ္စေ ပဏ္ဍိတာ ဗ္ယတ္တာ မေဓာဝီ ဗဟုသ္သုတာ ဓမ္မကထိကာ, နတ္ထိ တေသံ ဒုဂ္ဂတိ, သုဂတိယေဝ တေသံ ပာဋိကင္ခာ’’တိ ဘဏတိ, အာပတ္တိ ဝာစာယ, ဝာစာယ ဒုက္ကဋသ္သ။

Upasampanno anupasampannaṃ khuṃsetukāmo vambhetukāmo maṅkukattukāmo evaṃ vadeti, ‘‘santi idhekacce caṇḍālā venā nesādā rathakārā pukkusā’’ti bhaṇati…pe…. ‘‘Santi idhekacce paṇḍitā byattā medhāvī bahussutā dhammakathikā, natthi tesaṃ duggati, sugatiyeva tesaṃ pāṭikaṅkhā’’ti bhaṇati, āpatti vācāya, vācāya dukkaṭassa.

ဥပသမ္ပန္နော အနုပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဧဝံ ဝဒေတိ, ‘‘ယေ နူန စဏ္ဍာလာ ဝေနာ နေသာဒာ ရထကာရာ ပုက္ကုသာ’’တိ ဘဏတိ။ပေ.။။ ‘‘ယေ နူန ပဏ္ဍိတာ ဗ္ယတ္တာ မေဓာဝီ ဗဟုသ္သုတာ ဓမ္မကထိကာ’’တိ ဘဏတိ, အာပတ္တိ ဝာစာယ, ဝာစာယ ဒုက္ကဋသ္သ။

Upasampanno anupasampannaṃ khuṃsetukāmo vambhetukāmo maṅkukattukāmo evaṃ vadeti, ‘‘ye nūna caṇḍālā venā nesādā rathakārā pukkusā’’ti bhaṇati…pe…. ‘‘Ye nūna paṇḍitā byattā medhāvī bahussutā dhammakathikā’’ti bhaṇati, āpatti vācāya, vācāya dukkaṭassa.

ဥပသမ္ပန္နော အနုပသမ္ပန္နံ ခုံသေတုကာမော ဝမ္ဘေတုကာမော မင္ကုကတ္တုကာမော ဧဝံ ဝဒေတိ, ‘‘န မယံ စဏ္ဍာလာ ဝေနာ နေသာဒာ ရထကာရာ ပုက္ကုသာ’’တိ ဘဏတိ။ပေ.။။ ‘‘န မယံ ပဏ္ဍိတာ ဗ္ယတ္တာ မေဓာဝီ ဗဟုသ္သုတာ ဓမ္မကထိကာ, နတ္ထမ္ဟာကံ ဒုဂ္ဂတိ, သုဂတိယေဝ အမ္ဟာကံ ပာဋိကင္ခာ’’တိ ဘဏတိ။ အာပတ္တိ ဝာစာယ, ဝာစာယ ဒုက္ကဋသ္သ။

Upasampanno anupasampannaṃ khuṃsetukāmo vambhetukāmo maṅkukattukāmo evaṃ vadeti, ‘‘na mayaṃ caṇḍālā venā nesādā rathakārā pukkusā’’ti bhaṇati…pe…. ‘‘Na mayaṃ paṇḍitā byattā medhāvī bahussutā dhammakathikā, natthamhākaṃ duggati, sugatiyeva amhākaṃ pāṭikaṅkhā’’ti bhaṇati. Āpatti vācāya, vācāya dukkaṭassa.

၃၂. ဥပသမ္ပန္နော ဥပသမ္ပန္နံ န ခုံသေတုကာမော န ဝမ္ဘေတုကာမော န မင္ကုကတ္တုကာမော, ဒဝကမ္ယတာ ဟီနေန ဟီနံ ဝဒေတိ, စဏ္ဍာလံ ဝေနံ နေသာဒံ ရထကာရံ ပုက္ကုသံ – ‘‘စဏ္ဍာလောသိ, ဝေနောသိ, နေသာဒောသိ, ရထကာရောသိ , ပုက္ကုသောသီ’’တိ ဘဏတိ, အာပတ္တိ ဝာစာယ, ဝာစာယ ဒုဗ္ဘာသိတသ္သ။

32. Upasampanno upasampannaṃ na khuṃsetukāmo na vambhetukāmo na maṅkukattukāmo, davakamyatā hīnena hīnaṃ vadeti, caṇḍālaṃ venaṃ nesādaṃ rathakāraṃ pukkusaṃ – ‘‘caṇḍālosi, venosi, nesādosi, rathakārosi , pukkusosī’’ti bhaṇati, āpatti vācāya, vācāya dubbhāsitassa.

ဥပသမ္ပန္နော ဥပသမ္ပန္နံ န ခုံသေတုကာမော န ဝမ္ဘေတုကာမော န မင္ကုကတ္တုကာမော, ဒဝကမ္ယတာ ဟီနေန ဥက္ကဋ္ဌံ ဝဒေတိ, ခတ္တိယံ ဗ္ရာဟ္မဏံ – ‘‘စဏ္ဍာလောသိ, ဝေနောသိ, နေသာဒောသိ, ရထကာရောသိ, ပုက္ကုသောသီ’’တိ ဘဏတိ, အာပတ္တိ ဝာစာယ, ဝာစာယ ဒုဗ္ဘာသိတသ္သ။

Upasampanno upasampannaṃ na khuṃsetukāmo na vambhetukāmo na maṅkukattukāmo, davakamyatā hīnena ukkaṭṭhaṃ vadeti, khattiyaṃ brāhmaṇaṃ – ‘‘caṇḍālosi, venosi, nesādosi, rathakārosi, pukkusosī’’ti bhaṇati, āpatti vācāya, vācāya dubbhāsitassa.

ဥပသမ္ပန္နော ဥပသမ္ပန္နံ န ခုံသေတုကာမော န ဝမ္ဘေတုကာမော န မင္ကုကတ္တုကာမော, ဒဝကမ္ယတာ ဥက္ကဋ္ဌေန ဟီနံ ဝဒေတိ, စဏ္ဍာလံ ဝေနံ နေသာဒံ ရထကာရံ ပုက္ကုသံ – ‘‘ခတ္တိယောသိ, ဗ္ရာဟ္မဏောသီ’’တိ ဘဏတိ, အာပတ္တိ ဝာစာယ, ဝာစာယ ဒုဗ္ဘာသိတသ္သ။

Upasampanno upasampannaṃ na khuṃsetukāmo na vambhetukāmo na maṅkukattukāmo, davakamyatā ukkaṭṭhena hīnaṃ vadeti, caṇḍālaṃ venaṃ nesādaṃ rathakāraṃ pukkusaṃ – ‘‘khattiyosi, brāhmaṇosī’’ti bhaṇati, āpatti vācāya, vācāya dubbhāsitassa.

ဥပသမ္ပန္နော ဥပသမ္ပန္နံ န ခုံသေတုကာမော န ဝမ္ဘေတုကာမော န မင္ကုကတ္တုကာမော, ဒဝကမ္ယတာ ဥက္ကဋ္ဌေန ဥက္ကဋ္ဌံ ဝဒေတိ, ခတ္တိယံ ဗ္ရာဟ္မဏံ – ‘‘ခတ္တိယောသိ, ဗ္ရာဟ္မဏောသီ’’တိ ဘဏတိ, အာပတ္တိ ဝာစာယ, ဝာစာယ ဒုဗ္ဘာသိတသ္သ။

Upasampanno upasampannaṃ na khuṃsetukāmo na vambhetukāmo na maṅkukattukāmo, davakamyatā ukkaṭṭhena ukkaṭṭhaṃ vadeti, khattiyaṃ brāhmaṇaṃ – ‘‘khattiyosi, brāhmaṇosī’’ti bhaṇati, āpatti vācāya, vācāya dubbhāsitassa.

ဥပသမ္ပန္နော ဥပသမ္ပန္နံ န ခုံသေတုကာမော န ဝမ္ဘေတုကာမော န မင္ကုကတ္တုကာမော, ဒဝကမ္ယတာ ဟီနေန ဟီနံ ဝဒေတိ။ပေ.။ ဟီနေန ဥက္ကဋ္ဌံ ဝဒေတိ။ပေ.။ ဥက္ကဋ္ဌေန ဟီနံ ဝဒေတိ။ပေ.။ ဥက္ကဋ္ဌေန ဥက္ကဋ္ဌံ ဝဒေတိ, ပဏ္ဍိတံ ဗ္ယတ္တံ မေဓာဝိံ ဗဟုသ္သုတံ ဓမ္မကထိကံ – ‘‘ပဏ္ဍိတောသိ, ဗ္ယတ္တောသိ, မေဓာဝီသိ, ဗဟုသ္သုတောသိ, ဓမ္မကထိကောသိ, နတ္ထိ တုယ္ဟံ ဒုဂ္ဂတိ, သုဂတိ ယေဝ တုယ္ဟံ ပာဋိကင္ခာ’’တိ ဘဏတိ, အာပတ္တိ ဝာစာယ, ဝာစာယ ဒုဗ္ဘာသိတသ္သ။

Upasampanno upasampannaṃ na khuṃsetukāmo na vambhetukāmo na maṅkukattukāmo, davakamyatā hīnena hīnaṃ vadeti…pe… hīnena ukkaṭṭhaṃ vadeti…pe… ukkaṭṭhena hīnaṃ vadeti…pe… ukkaṭṭhena ukkaṭṭhaṃ vadeti, paṇḍitaṃ byattaṃ medhāviṃ bahussutaṃ dhammakathikaṃ – ‘‘paṇḍitosi, byattosi, medhāvīsi, bahussutosi, dhammakathikosi, natthi tuyhaṃ duggati, sugati yeva tuyhaṃ pāṭikaṅkhā’’ti bhaṇati, āpatti vācāya, vācāya dubbhāsitassa.

၃၃. ဥပသမ္ပန္နော ဥပသမ္ပန္နံ န ခုံသေတုကာမော န ဝမ္ဘေတုကာမော န မင္ကုကတ္တုကာမော, ဒဝကမ္ယတာ ဧဝံ ဝဒေတိ, ‘‘သန္တိ ဣဓေကစ္စေ စဏ္ဍာလာ ဝေနာ နေသာဒာ ရထကာရာ ပုက္ကုသာ’’တိ ဘဏတိ။ပေ.။။ ‘‘သန္တိ ဣဓေကစ္စေ ပဏ္ဍိတာ ဗ္ယတ္တာ မေဓာဝီ ဗဟုသ္သုတာ ဓမ္မကထိကာ, နတ္ထိ တေသံ ဒုဂ္ဂတိ, သုဂတိ ယေဝ တေသံ ပာဋိကင္ခာ’’တိ ဘဏတိ, အာပတ္တိ ဝာစာယ, ဝာစာယ ဒုဗ္ဘာသိတသ္သ။

33. Upasampanno upasampannaṃ na khuṃsetukāmo na vambhetukāmo na maṅkukattukāmo, davakamyatā evaṃ vadeti, ‘‘santi idhekacce caṇḍālā venā nesādā rathakārā pukkusā’’ti bhaṇati…pe…. ‘‘Santi idhekacce paṇḍitā byattā medhāvī bahussutā dhammakathikā, natthi tesaṃ duggati, sugati yeva tesaṃ pāṭikaṅkhā’’ti bhaṇati, āpatti vācāya, vācāya dubbhāsitassa.

ဥပသမ္ပန္နော ဥပသမ္ပန္နံ န ခုံသေတုကာမော န ဝမ္ဘေတုကာမော န မင္ကုကတ္တုကာမော, ဒဝကမ္ယတာ ဧဝံ ဝဒေတိ, ‘‘ယေ နူန စဏ္ဍာလာ ဝေနာ နေသာဒာ ရထကာရာ ပုက္ကုသာ’’တိ ဘဏတိ။ပေ.။။ ‘‘ယေ နူန ပဏ္ဍိတာ ဗ္ယတ္တာ မေဓာဝီ ဗဟုသ္သုတာ ဓမ္မကထိကာ’’တိ ဘဏတိ, အာပတ္တိ ဝာစာယ, ဝာစာယ ဒုဗ္ဘာသိတသ္သ။

Upasampanno upasampannaṃ na khuṃsetukāmo na vambhetukāmo na maṅkukattukāmo, davakamyatā evaṃ vadeti, ‘‘ye nūna caṇḍālā venā nesādā rathakārā pukkusā’’ti bhaṇati…pe…. ‘‘Ye nūna paṇḍitā byattā medhāvī bahussutā dhammakathikā’’ti bhaṇati, āpatti vācāya, vācāya dubbhāsitassa.

ဥပသမ္ပန္နော ဥပသမ္ပန္နံ န ခုံသေတုကာမော န ဝမ္ဘေတုကာမော န မင္ကုကတ္တုကာမော, ဒဝကမ္ယတာ ဧဝံ ဝဒေတိ, ‘‘န မယံ စဏ္ဍာလာ ဝေနာ နေသာဒာ ရထကာရာ ပုက္ကုသာ’’တိ ဘဏတိ။ပေ.။။ ‘‘န မယံ ပဏ္ဍိတာ ဗ္ယတ္တာ မေဓာဝီ ဗဟုသ္သုတာ ဓမ္မကထိကာ, နတ္ထမ္ဟာကံ ဒုဂ္ဂတိ, သုဂတိယေဝ အမ္ဟာကံ ပာဋိကင္ခာ’’တိ ဘဏတိ။ အာပတ္တိ ဝာစာယ, ဝာစာယ ဒုဗ္ဘာသိတသ္သ။

Upasampanno upasampannaṃ na khuṃsetukāmo na vambhetukāmo na maṅkukattukāmo, davakamyatā evaṃ vadeti, ‘‘na mayaṃ caṇḍālā venā nesādā rathakārā pukkusā’’ti bhaṇati…pe…. ‘‘Na mayaṃ paṇḍitā byattā medhāvī bahussutā dhammakathikā, natthamhākaṃ duggati, sugatiyeva amhākaṃ pāṭikaṅkhā’’ti bhaṇati. Āpatti vācāya, vācāya dubbhāsitassa.

၃၄. ဥပသမ္ပန္နော အနုပသမ္ပန္နံ န ခုံသေတုကာမော န ဝမ္ဘေတုကာမော န မင္ကုကတ္တုကာမော, ဒဝကမ္ယတာ ဟီနေန ဟီနံ ဝဒေတိ။ပေ.။ ဟီနေန ဥက္ကဋ္ဌံ ဝဒေတိ။ပေ.။ ဥက္ကဋ္ဌေန ဟီနံ ဝဒေတိ။ပေ.။ ဥက္ကဋ္ဌေန ဥက္ကဋ္ဌံ ဝဒေတိ, ပဏ္ဍိတံ ဗ္ယတ္တံ မေဓာဝိံ ဗဟုသ္သုတံ ဓမ္မကထိကံ – ‘‘ပဏ္ဍိတောသိ , ဗ္ယတ္တောသိ, မေဓာဝီသိ, ဗဟုသ္သုတောသိ ဓမ္မကထိကောသိ, နတ္ထိ တုယ္ဟံ ဒုဂ္ဂတိ; သုဂတိ ယေဝ တုယ္ဟံ ပာဋိကင္ခာ’’တိ ဘဏတိ, အာပတ္တိ ဝာစာယ, ဝာစာယ ဒုဗ္ဘာသိတသ္သ။

34. Upasampanno anupasampannaṃ na khuṃsetukāmo na vambhetukāmo na maṅkukattukāmo, davakamyatā hīnena hīnaṃ vadeti…pe… hīnena ukkaṭṭhaṃ vadeti…pe… ukkaṭṭhena hīnaṃ vadeti…pe… ukkaṭṭhena ukkaṭṭhaṃ vadeti, paṇḍitaṃ byattaṃ medhāviṃ bahussutaṃ dhammakathikaṃ – ‘‘paṇḍitosi , byattosi, medhāvīsi, bahussutosi dhammakathikosi, natthi tuyhaṃ duggati; sugati yeva tuyhaṃ pāṭikaṅkhā’’ti bhaṇati, āpatti vācāya, vācāya dubbhāsitassa.

ဥပသမ္ပန္နော အနုပသမ္ပန္နံ န ခုံသေတုကာမော န ဝမ္ဘေတုကာမော န မင္ကုကတ္တုကာမော, ဒဝကမ္ယတာ ဧဝံ ဝဒေတိ, ‘‘သန္တိ ဣဓေကစ္စေ စဏ္ဍာလာ ဝေနာ နေသာဒာ ရထကာရာ ပုက္ကုသာ’’တိ ဘဏတိ။ပေ.။။ ‘‘သန္တိ ဣဓေကစ္စေ ပဏ္ဍိတာ ဗ္ယတ္တာ မေဓာဝီ ဗဟုသ္သုတာ ဓမ္မကထိကာ, နတ္ထိ တေသံ ဒုဂ္ဂတိ, သုဂတိ ယေဝ တေသံ ပာဋိကင္ခာ’’တိ ဘဏတိ, အာပတ္တိ ဝာစာယ, ဝာစာယ ဒုဗ္ဘာသိတသ္သ။

Upasampanno anupasampannaṃ na khuṃsetukāmo na vambhetukāmo na maṅkukattukāmo, davakamyatā evaṃ vadeti, ‘‘santi idhekacce caṇḍālā venā nesādā rathakārā pukkusā’’ti bhaṇati…pe…. ‘‘Santi idhekacce paṇḍitā byattā medhāvī bahussutā dhammakathikā, natthi tesaṃ duggati, sugati yeva tesaṃ pāṭikaṅkhā’’ti bhaṇati, āpatti vācāya, vācāya dubbhāsitassa.

ဥပသမ္ပန္နော အနုပသမ္ပန္နံ န ခုံသေတုကာမော န ဝမ္ဘေတုကာမော န မင္ကုကတ္တုကာမော, ဒဝကမ္ယတာ ဧဝံ ဝဒေတိ, ‘‘ယေ နူန စဏ္ဍာလာ ဝေနာ နေသာဒာ ရထကာရာ ပုက္ကုသာ’’တိ ဘဏတိ။ပေ.။။ ‘‘ယေ နူန ပဏ္ဍိတာ ဗ္ယတ္တာ မေဓာဝီ ဗဟုသ္သုတာ ဓမ္မကထိကာ’’တိ ဘဏတိ, အာပတ္တိ ဝာစာယ, ဝာစာယ ဒုဗ္ဘာသိတသ္သ။

Upasampanno anupasampannaṃ na khuṃsetukāmo na vambhetukāmo na maṅkukattukāmo, davakamyatā evaṃ vadeti, ‘‘ye nūna caṇḍālā venā nesādā rathakārā pukkusā’’ti bhaṇati…pe…. ‘‘Ye nūna paṇḍitā byattā medhāvī bahussutā dhammakathikā’’ti bhaṇati, āpatti vācāya, vācāya dubbhāsitassa.

ဥပသမ္ပန္နော အနုပသမ္ပန္နံ န ခုံသေတုကာမော န ဝမ္ဘေတုကာမော န မင္ကုကတ္တုကာမော, ဒဝကမ္ယတာ ဧဝံ ဝဒေတိ, ‘‘န မယံ စဏ္ဍာလာ ဝေနာ နေသာဒာ ရထကာရာ ပုက္ကုသာ’’တိ ဘဏတိ။ပေ.။။ ‘‘န မယံ ပဏ္ဍိတာ ဗ္ယတ္တာ မေဓာဝီ ဗဟုသ္သုတာ ဓမ္မကထိကာ, နတ္ထမ္ဟာကံ ဒုဂ္ဂတိ, သုဂတိ ယေဝ အမ္ဟာကံ ပာဋိကင္ခာ’’တိ ဘဏတိ, အာပတ္တိ ဝာစာယ, ဝာစာယ ဒုဗ္ဘာသိတသ္သ။

Upasampanno anupasampannaṃ na khuṃsetukāmo na vambhetukāmo na maṅkukattukāmo, davakamyatā evaṃ vadeti, ‘‘na mayaṃ caṇḍālā venā nesādā rathakārā pukkusā’’ti bhaṇati…pe…. ‘‘Na mayaṃ paṇḍitā byattā medhāvī bahussutā dhammakathikā, natthamhākaṃ duggati, sugati yeva amhākaṃ pāṭikaṅkhā’’ti bhaṇati, āpatti vācāya, vācāya dubbhāsitassa.

၃၅. အနာပတ္တိ အတ္ထပုရေက္ခာရသ္သ, ဓမ္မပုရေက္ခာရသ္သ, အနုသာသနိပုရေက္ခာရသ္သ, ဥမ္မတ္တကသ္သ, ခိတ္တစိတ္တသ္သ, ဝေဒနာဋ္ဋသ္သ, အာဒိကမ္မိကသ္သာတိ။

35. Anāpatti atthapurekkhārassa, dhammapurekkhārassa, anusāsanipurekkhārassa, ummattakassa, khittacittassa, vedanāṭṭassa, ādikammikassāti.

ဩမသဝာဒသိက္ခာပဒံ နိဋ္ဌိတံ ဒုတိယံ။

Omasavādasikkhāpadaṃ niṭṭhitaṃ dutiyaṃ.

၃. ပေသုညသိက္ခာပဒံ

3. Pesuññasikkhāpadaṃ

၃၆. တေန သမယေန ဗုဒ္ဓော ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ တေန ခော ပန သမယေန ဆဗ္ဗဂ္ဂိယာ ဘိက္ခူ ဘိက္ခူနံ ဘဏ္ဍနဇာတာနံ ကလဟဇာတာနံ ဝိဝာဒာပန္နာနံ ပေသုညံ ဥပသံဟရန္တိ; ဣမသ္သ သုတ္ဝာ အမုသ္သ အက္ခာယန္တိ, ဣမသ္သ ဘေဒာယ; အမုသ္သ သုတ္ဝာ ဣမသ္သ အက္ခာယန္တိ, အမုသ္သ ဘေဒာယ။ တေန အနုပ္ပန္နာနိ စေဝ ဘဏ္ဍနာနိ ဥပ္ပဇ္ဇန္တိ, ဥပ္ပန္နာနိ စ ဘဏ္ဍနာနိ ဘိယ္ယောဘာဝာယ ဝေပုလ္လာယ သံဝတ္တန္တိ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ ဆဗ္ဗဂ္ဂိယာ ဘိက္ခူ ဘိက္ခူနံ ဘဏ္ဍနဇာတာနံ ကလဟဇာတာနံ ဝိဝာဒာပန္နာနံ ပေသုညံ ဥပသံဟရိသ္သန္တိ, ဣမသ္သ သုတ္ဝာ အမုသ္သ အက္ခာယိသ္သန္တိ, ဣမသ္သ ဘေဒာယ; အမုသ္သ သုတ္ဝာ ဣမသ္သ အက္ခာယိသ္သန္တိ, အမုသ္သ ဘေဒာယ! တေန အနုပ္ပန္နာနိ စေဝ ဘဏ္ဍနာနိ ဥပ္ပဇ္ဇန္တိ, ဥပ္ပန္နာနိ စ ဘဏ္ဍနာနိ ဘိယ္ယောဘာဝာယ ဝေပုလ္လာယ သံဝတ္တန္တီ’’တိ။ အထ ခော တေ ဘိက္ခူ ဆဗ္ဗဂ္ဂိယေ ဘိက္ခူ အနေကပရိယာယေန ဝိဂရဟိတ္ဝာ ဘဂဝတော ဧတမတ္ထံ အာရောစေသုံ။ပေ.။ ‘‘သစ္စံ ကိရ တုမ္ဟေ, ဘိက္ခဝေ, ဘိက္ခူနံ ဘဏ္ဍနဇာတာနံ ကလဟဇာတာနံ ဝိဝာဒာပန္နာနံ ပေသုညံ ဥပသံဟရထ, ဣမသ္သ သုတ္ဝာ အမုသ္သ အက္ခာယထ, ဣမသ္သ ဘေဒာယ, အမုသ္သ သုတ္ဝာ ဣမသ္သ အက္ခာယထ, အမုသ္သ ဘေဒာယ? တေန အနုပ္ပန္နာနိ စေဝ ဘဏ္ဍနာနိ ဥပ္ပဇ္ဇန္တိ, ဥပ္ပန္နာနိ စ ဘဏ္ဍနာနိ ဘိယ္ယောဘာဝာယ ဝေပုလ္လာယ သံဝတ္တန္တီ’’တိ? ‘‘သစ္စံ , ဘဂဝာ’’တိ။ ဝိဂရဟိ ဗုဒ္ဓော ဘဂဝာ။ပေ.။ ကထဉ္ဟိ နာမ တုမ္ဟေ, မောဃပုရိသာ, ဘိက္ခူနံ ဘဏ္ဍနဇာတာနံ ကလဟဇာတာနံ ဝိဝာဒာပန္နာနံ ပေသုညံ ဥပသံဟရိသ္သထ! ဣမသ္သ သုတ္ဝာ အမုသ္သ အက္ခာယိသ္သထ, ဣမသ္သ ဘေဒာယ! အမုသ္သ သုတ္ဝာ ဣမသ္သ အက္ခာယိသ္သထ, အမုသ္သ ဘေဒာယ! တေန အနုပ္ပန္နာနိ စေဝ ဘဏ္ဍနာနိ ဥပ္ပဇ္ဇန္တိ, ဥပ္ပန္နာနိ စ ဘဏ္ဍနာနိ ဘိယ္ယောဘာဝာယ ဝေပုလ္လာယ သံဝတ္တန္တိ။ နေတံ, မောဃပုရိသာ, အပ္ပသန္နာနံ ဝာ ပသာဒာယ။ ပသန္နာနံ ဝာ ဘိယ္ယောဘာဝာယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခာပဒံ ဥဒ္ဒိသေယ္ယာထ –

36. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena chabbaggiyā bhikkhū bhikkhūnaṃ bhaṇḍanajātānaṃ kalahajātānaṃ vivādāpannānaṃ pesuññaṃ upasaṃharanti; imassa sutvā amussa akkhāyanti, imassa bhedāya; amussa sutvā imassa akkhāyanti, amussa bhedāya. Tena anuppannāni ceva bhaṇḍanāni uppajjanti, uppannāni ca bhaṇḍanāni bhiyyobhāvāya vepullāya saṃvattanti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū bhikkhūnaṃ bhaṇḍanajātānaṃ kalahajātānaṃ vivādāpannānaṃ pesuññaṃ upasaṃharissanti, imassa sutvā amussa akkhāyissanti, imassa bhedāya; amussa sutvā imassa akkhāyissanti, amussa bhedāya! Tena anuppannāni ceva bhaṇḍanāni uppajjanti, uppannāni ca bhaṇḍanāni bhiyyobhāvāya vepullāya saṃvattantī’’ti. Atha kho te bhikkhū chabbaggiye bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tumhe, bhikkhave, bhikkhūnaṃ bhaṇḍanajātānaṃ kalahajātānaṃ vivādāpannānaṃ pesuññaṃ upasaṃharatha, imassa sutvā amussa akkhāyatha, imassa bhedāya, amussa sutvā imassa akkhāyatha, amussa bhedāya? Tena anuppannāni ceva bhaṇḍanāni uppajjanti, uppannāni ca bhaṇḍanāni bhiyyobhāvāya vepullāya saṃvattantī’’ti? ‘‘Saccaṃ , bhagavā’’ti. Vigarahi buddho bhagavā…pe… kathañhi nāma tumhe, moghapurisā, bhikkhūnaṃ bhaṇḍanajātānaṃ kalahajātānaṃ vivādāpannānaṃ pesuññaṃ upasaṃharissatha! Imassa sutvā amussa akkhāyissatha, imassa bhedāya! Amussa sutvā imassa akkhāyissatha, amussa bhedāya! Tena anuppannāni ceva bhaṇḍanāni uppajjanti, uppannāni ca bhaṇḍanāni bhiyyobhāvāya vepullāya saṃvattanti. Netaṃ, moghapurisā, appasannānaṃ vā pasādāya. Pasannānaṃ vā bhiyyobhāvāya…pe… evañca pana, bhikkhave, imaṃ sikkhāpadaṃ uddiseyyātha –

၃၇. ‘‘ဘိက္ခုပေသုညေ ပာစိတ္တိယ’’န္တိ။

37.‘‘Bhikkhupesuññe pācittiya’’nti.

၃၈. ပေသုညံ နာမ ဒ္ဝီဟာကာရေဟိ ပေသုညံ ဟောတိ – ပိယကမ္ယသ္သ ဝာ ဘေဒာဓိပ္ပာယသ္သ ဝာ။ ဒသဟာကာရေဟိ ပေသုညံ ဥပသံဟရတိ – ဇာတိတောပိ, နာမတောပိ, ဂောတ္တတောပိ, ကမ္မတောပိ, သိပ္ပတောပိ, အာဗာဓတောပိ, လိင္ဂတောပိ, ကိလေသတောပိ, အာပတ္တိတောပိ, အက္ကောသတောပိ။

38.Pesuññaṃ nāma dvīhākārehi pesuññaṃ hoti – piyakamyassa vā bhedādhippāyassa vā. Dasahākārehi pesuññaṃ upasaṃharati – jātitopi, nāmatopi, gottatopi, kammatopi, sippatopi, ābādhatopi, liṅgatopi, kilesatopi, āpattitopi, akkosatopi.

ဇာတိ နာမ ဒ္ဝေ ဇာတိယော – ဟီနာ စ ဇာတိ ဥက္ကဋ္ဌာ စ ဇာတိ။ ဟီနာ နာမ ဇာတိ – စဏ္ဍာလဇာတိ ဝေနဇာတိ နေသာဒဇာတိ ရထကာရဇာတိ ပုက္ကုသဇာတိ ။ ဧသာ ဟီနာ နာမ ဇာတိ။ ဥက္ကဋ္ဌာ နာမ ဇာတိ – ခတ္တိယဇာတိ ဗ္ရာဟ္မဏဇာတိ။ ဧသာ ဥက္ကဋ္ဌာ နာမ ဇာတိ။ပေ.။။

Jāti nāma dve jātiyo – hīnā ca jāti ukkaṭṭhā ca jāti. Hīnā nāma jāti – caṇḍālajāti venajāti nesādajāti rathakārajāti pukkusajāti . Esā hīnā nāma jāti. Ukkaṭṭhā nāma jāti – khattiyajāti brāhmaṇajāti. Esā ukkaṭṭhā nāma jāti…pe….

အက္ကောသော နာမ ဒ္ဝေ အက္ကောသာ – ဟီနော စ အက္ကောသော ဥက္ကဋ္ဌော စ အက္ကောသော။ ဟီနော နာမ အက္ကောသော – ဩဋ္ဌောသိ, မေဏ္ဍောသိ, ဂောဏောသိ, ဂဒ္ရဘောသိ, တိရစ္ဆာနဂတောသိ, နေရယိကောသိ; နတ္ထိ တုယ္ဟံ သုဂတိ; ဒုဂ္ဂတိ ယေဝ တုယ္ဟံ ပာဋိကင္ခာတိ, ယကာရေန ဝာ ဘကာရေန ဝာ ကာဋကောဋစိကာယ ဝာ။ ဧသော ဟီနော နာမ အက္ကောသော။ ဥက္ကဋ္ဌော နာမ အက္ကောသော – ပဏ္ဍိတောသိ, ဗ္ယတ္တောသိ, မေဓာဝီသိ, ဗဟုသ္သုတောသိ, ဓမ္မကထိကောသိ; နတ္ထိ တုယ္ဟံ ဒုဂ္ဂတိ; သုဂတိ ယေဝ တုယ္ဟံ ပာဋိကင္ခာတိ။ ဧသော ဥက္ကဋ္ဌော နာမ အက္ကောသော။

Akkoso nāma dve akkosā – hīno ca akkoso ukkaṭṭho ca akkoso. Hīno nāma akkoso – oṭṭhosi, meṇḍosi, goṇosi, gadrabhosi, tiracchānagatosi, nerayikosi; natthi tuyhaṃ sugati; duggati yeva tuyhaṃ pāṭikaṅkhāti, yakārena vā bhakārena vā kāṭakoṭacikāya vā. Eso hīno nāma akkoso. Ukkaṭṭho nāma akkoso – paṇḍitosi, byattosi, medhāvīsi, bahussutosi, dhammakathikosi; natthi tuyhaṃ duggati; sugati yeva tuyhaṃ pāṭikaṅkhāti. Eso ukkaṭṭho nāma akkoso.

၃၉. ဥပသမ္ပန္နော ဥပသမ္ပန္နသ္သ သုတ္ဝာ ဥပသမ္ပန္နသ္သ ပေသုညံ ဥပသံဟရတိ – ‘‘ဣတ္ထန္နာမော တံ ‘စဏ္ဍာလော ဝေနော နေသာဒော ရထကာရော ပုက္ကုသော’တိ ဘဏတီ’’တိ။ အာပတ္တိ ဝာစာယ, ဝာစာယ ပာစိတ္တိယသ္သ။

39. Upasampanno upasampannassa sutvā upasampannassa pesuññaṃ upasaṃharati – ‘‘itthannāmo taṃ ‘caṇḍālo veno nesādo rathakāro pukkuso’ti bhaṇatī’’ti. Āpatti vācāya, vācāya pācittiyassa.

ဥပသမ္ပန္နော ဥပသမ္ပန္နသ္သ သုတ္ဝာ ဥပသမ္ပန္နသ္သ ပေသုညံ ဥပသံဟရတိ – ‘‘ဣတ္ထန္နာမော တံ ‘ခတ္တိယော ဗ္ရာဟ္မဏော’တိ ဘဏတီ’’တိ။ အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannassa sutvā upasampannassa pesuññaṃ upasaṃharati – ‘‘itthannāmo taṃ ‘khattiyo brāhmaṇo’ti bhaṇatī’’ti. Āpatti vācāya, vācāya pācittiyassa.

ဥပသမ္ပန္နော ဥပသမ္ပန္နသ္သ သုတ္ဝာ ဥပသမ္ပန္နသ္သ ပေသုညံ ဥပသံဟရတိ – ‘‘ဣတ္ထန္နာမော တံ ‘အဝကဏ္ဏကော ဇဝကဏ္ဏကော ဓနိဋ္ဌကော သဝိဋ္ဌကော ကုလဝဍ္ဎကော’တိ ဘဏတီ’’တိ။ အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannassa sutvā upasampannassa pesuññaṃ upasaṃharati – ‘‘itthannāmo taṃ ‘avakaṇṇako javakaṇṇako dhaniṭṭhako saviṭṭhako kulavaḍḍhako’ti bhaṇatī’’ti. Āpatti vācāya, vācāya pācittiyassa.

ဥပသမ္ပန္နော ဥပသမ္ပန္နသ္သ သုတ္ဝာ ဥပသမ္ပန္နသ္သ ပေသုညံ ဥပသံဟရတိ – ‘‘ဣတ္ထန္နာမော တံ ‘ဗုဒ္ဓရက္ခိတော ဓမ္မရက္ခိတော သင္ဃရက္ခိတော’တိ ဘဏတီ’’တိ။ အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannassa sutvā upasampannassa pesuññaṃ upasaṃharati – ‘‘itthannāmo taṃ ‘buddharakkhito dhammarakkhito saṅgharakkhito’ti bhaṇatī’’ti. Āpatti vācāya, vācāya pācittiyassa.

ဥပသမ္ပန္နော ဥပသမ္ပန္နသ္သ သုတ္ဝာ ဥပသမ္ပန္နသ္သ ပေသုညံ ဥပသံဟရတိ – ‘‘ဣတ္ထန္နာမော တံ ‘ကောသိယော ဘာရဒ္ဝာဇော’တိ ဘဏတီ’’တိ။ အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannassa sutvā upasampannassa pesuññaṃ upasaṃharati – ‘‘itthannāmo taṃ ‘kosiyo bhāradvājo’ti bhaṇatī’’ti. Āpatti vācāya, vācāya pācittiyassa.

ဥပသမ္ပန္နော ဥပသမ္ပန္နသ္သ သုတ္ဝာ ဥပသမ္ပန္နသ္သ ပေသုညံ ဥပသံဟရတိ – ‘‘ဣတ္ထန္နာမော တံ ‘ဂောတမော မောဂ္ဂလ္လာနော ကစ္စာနော ဝာသိဋ္ဌော’တိ ဘဏတီ’’တိ။ အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannassa sutvā upasampannassa pesuññaṃ upasaṃharati – ‘‘itthannāmo taṃ ‘gotamo moggallāno kaccāno vāsiṭṭho’ti bhaṇatī’’ti. Āpatti vācāya, vācāya pācittiyassa.

ဥပသမ္ပန္နော ဥပသမ္ပန္နသ္သ သုတ္ဝာ ဥပသမ္ပန္နသ္သ ပေသုညံ ဥပသံဟရတိ – ‘‘ဣတ္ထန္နာမော တံ ‘ကောဋ္ဌကော ပုပ္ဖဆဍ္ဍကော’တိ ဘဏတီ’’တိ။ အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannassa sutvā upasampannassa pesuññaṃ upasaṃharati – ‘‘itthannāmo taṃ ‘koṭṭhako pupphachaḍḍako’ti bhaṇatī’’ti. Āpatti vācāya, vācāya pācittiyassa.

ဥပသမ္ပန္နော ဥပသမ္ပန္နသ္သ သုတ္ဝာ ဥပသမ္ပန္နသ္သ ပေသုညံ ဥပသံဟရတိ – ‘‘ဣတ္ထန္နာမော တံ ‘ကသ္သကော ဝာဏိဇော ဂောရက္ခော’တိ ဘဏတီ’’တိ။ အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannassa sutvā upasampannassa pesuññaṃ upasaṃharati – ‘‘itthannāmo taṃ ‘kassako vāṇijo gorakkho’ti bhaṇatī’’ti. Āpatti vācāya, vācāya pācittiyassa.

ဥပသမ္ပန္နော ဥပသမ္ပန္နသ္သ သုတ္ဝာ ဥပသမ္ပန္နသ္သ ပေသုညံ ဥပသံဟရတိ – ‘‘ဣတ္ထန္နာမော တံ ‘နဠကာရော ကုမ္ဘကာရော ပေသကာရော စမ္မကာရော နဟာပိတော’တိ ဘဏတီ’’တိ။ အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannassa sutvā upasampannassa pesuññaṃ upasaṃharati – ‘‘itthannāmo taṃ ‘naḷakāro kumbhakāro pesakāro cammakāro nahāpito’ti bhaṇatī’’ti. Āpatti vācāya, vācāya pācittiyassa.

ဥပသမ္ပန္နော ဥပသမ္ပန္နသ္သ သုတ္ဝာ ဥပသမ္ပန္နသ္သ ပေသုညံ ဥပသံဟရတိ – ‘‘ဣတ္ထန္နာမော တံ ‘မုဒ္ဒိကော ဂဏကော လေခကော’တိ ဘဏတီ’’တိ။ အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannassa sutvā upasampannassa pesuññaṃ upasaṃharati – ‘‘itthannāmo taṃ ‘muddiko gaṇako lekhako’ti bhaṇatī’’ti. Āpatti vācāya, vācāya pācittiyassa.

၄၀. ဥပသမ္ပန္နော ဥပသမ္ပန္နသ္သ သုတ္ဝာ ဥပသမ္ပန္နသ္သ ပေသုညံ ဥပသံဟရတိ – ‘‘ဣတ္ထန္နာမော တံ ‘ကုဋ္ဌိကော ဂဏ္ဍိကော ကိလာသိကော သောသိကော အပမာရိကော’တိ ဘဏတီ’’တိ။ အာပတ္တိ ဝာစာယ, ဝာစာယ ပာစိတ္တိယသ္သ။

40. Upasampanno upasampannassa sutvā upasampannassa pesuññaṃ upasaṃharati – ‘‘itthannāmo taṃ ‘kuṭṭhiko gaṇḍiko kilāsiko sosiko apamāriko’ti bhaṇatī’’ti. Āpatti vācāya, vācāya pācittiyassa.

ဥပသမ္ပန္နော ဥပသမ္ပန္နသ္သ သုတ္ဝာ ဥပသမ္ပန္နသ္သ ပေသုညံ ဥပသံဟရတိ – ‘‘ဣတ္ထန္နာမော တံ ‘မဓုမေဟိကော’တိ ဘဏတီ’’တိ။ အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannassa sutvā upasampannassa pesuññaṃ upasaṃharati – ‘‘itthannāmo taṃ ‘madhumehiko’ti bhaṇatī’’ti. Āpatti vācāya, vācāya pācittiyassa.

ဥပသမ္ပန္နော ဥပသမ္ပန္နသ္သ သုတ္ဝာ ဥပသမ္ပန္နသ္သ ပေသုညံ ဥပသံဟရတိ – ‘‘ဣတ္ထန္နာမော တံ ‘အတိဒီဃော အတိရသ္သော အတိကဏ္ဟော အစ္စောဒာတော’တိ ဘဏတီ’’တိ။ အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannassa sutvā upasampannassa pesuññaṃ upasaṃharati – ‘‘itthannāmo taṃ ‘atidīgho atirasso atikaṇho accodāto’ti bhaṇatī’’ti. Āpatti vācāya, vācāya pācittiyassa.

ဥပသမ္ပန္နော ဥပသမ္ပန္နသ္သ သုတ္ဝာ ဥပသမ္ပန္နသ္သ ပေသုညံ ဥပသံဟရတိ – ‘‘ဣတ္ထန္နာမော တံ ‘နာတိဒီဃော နာတိရသ္သော နာတိကဏ္ဟော နာစ္စောဒာတော’တိ ဘဏတီ’’တိ။ အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannassa sutvā upasampannassa pesuññaṃ upasaṃharati – ‘‘itthannāmo taṃ ‘nātidīgho nātirasso nātikaṇho nāccodāto’ti bhaṇatī’’ti. Āpatti vācāya, vācāya pācittiyassa.

ဥပသမ္ပန္နော ဥပသမ္ပန္နသ္သ သုတ္ဝာ ဥပသမ္ပန္နသ္သ ပေသုညံ ဥပသံဟရတိ – ‘‘ဣတ္ထန္နာမော တံ ‘ရာဂပရိယုဋ္ဌိတော ဒောသပရိယုဋ္ဌိတော မောဟပရိယုဋ္ဌိတော’တိ ဘဏတီ’’တိ။ အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannassa sutvā upasampannassa pesuññaṃ upasaṃharati – ‘‘itthannāmo taṃ ‘rāgapariyuṭṭhito dosapariyuṭṭhito mohapariyuṭṭhito’ti bhaṇatī’’ti. Āpatti vācāya, vācāya pācittiyassa.

ဥပသမ္ပန္နော ဥပသမ္ပန္နသ္သ သုတ္ဝာ ဥပသမ္ပန္နသ္သ ပေသုညံ ဥပသံဟရတိ – ‘‘ဣတ္ထန္နာမော တံ ‘ဝီတရာဂော ဝီတဒောသော ဝီတမောဟော’တိ ဘဏတီ’’တိ။ အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannassa sutvā upasampannassa pesuññaṃ upasaṃharati – ‘‘itthannāmo taṃ ‘vītarāgo vītadoso vītamoho’ti bhaṇatī’’ti. Āpatti vācāya, vācāya pācittiyassa.

ဥပသမ္ပန္နော ဥပသမ္ပန္နသ္သ သုတ္ဝာ ဥပသမ္ပန္နသ္သ ပေသုညံ ဥပသံဟရတိ – ‘‘ဣတ္ထန္နာမော တံ ‘ပာရာဇိကံ အဇ္ဈာပန္နော, သင္ဃာဒိသေသံ အဇ္ဈာပန္နော, ထုလ္လစ္စယံ အဇ္ဈာပန္နော, ပာစိတ္တိယံ အဇ္ဈာပန္နော , ပာဋိဒေသနီယံ အဇ္ဈာပန္နော, ဒုက္ကဋံ အဇ္ဈာပန္နော, ဒုဗ္ဘာသိတံ အဇ္ဈာပန္နော’တိ ဘဏတီ’’တိ။ အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannassa sutvā upasampannassa pesuññaṃ upasaṃharati – ‘‘itthannāmo taṃ ‘pārājikaṃ ajjhāpanno, saṅghādisesaṃ ajjhāpanno, thullaccayaṃ ajjhāpanno, pācittiyaṃ ajjhāpanno , pāṭidesanīyaṃ ajjhāpanno, dukkaṭaṃ ajjhāpanno, dubbhāsitaṃ ajjhāpanno’ti bhaṇatī’’ti. Āpatti vācāya, vācāya pācittiyassa.

ဥပသမ္ပန္နော ဥပသမ္ပန္နသ္သ သုတ္ဝာ ဥပသမ္ပန္နသ္သ ပေသုညံ ဥပသံဟရတိ – ‘‘ဣတ္ထန္နာမော တံ ‘သောတာပန္နော’တိ ဘဏတီ’’တိ။ အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannassa sutvā upasampannassa pesuññaṃ upasaṃharati – ‘‘itthannāmo taṃ ‘sotāpanno’ti bhaṇatī’’ti. Āpatti vācāya, vācāya pācittiyassa.

ဥပသမ္ပန္နော ဥပသမ္ပန္နသ္သ သုတ္ဝာ ဥပသမ္ပန္နသ္သ ပေသုညံ ဥပသံဟရတိ – ‘‘ဣတ္ထန္နာမော တံ ‘ဩဋ္ဌော မေဏ္ဍော ဂောဏော ဂဒ္ရဘော တိရစ္ဆာနဂတော နေရယိကော, နတ္ထိ တသ္သ သုဂတိ, ဒုဂ္ဂတိယေဝ တသ္သ ပာဋိကင္ခာ’တိ ဘဏတီ’’တိ။ အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannassa sutvā upasampannassa pesuññaṃ upasaṃharati – ‘‘itthannāmo taṃ ‘oṭṭho meṇḍo goṇo gadrabho tiracchānagato nerayiko, natthi tassa sugati, duggatiyeva tassa pāṭikaṅkhā’ti bhaṇatī’’ti. Āpatti vācāya, vācāya pācittiyassa.

ဥပသမ္ပန္နော ဥပသမ္ပန္နသ္သ သုတ္ဝာ ဥပသမ္ပန္နသ္သ ပေသုညံ ဥပသံဟရတိ – ‘‘ဣတ္ထန္နာမော တံ ‘ပဏ္ဍိတော ဗ္ယတ္တော မေဓာဝီ ဗဟုသ္သုတော ဓမ္မကထိကော, နတ္ထိ တသ္သ ဒုဂ္ဂတိ, သုဂတိ ယေဝ တသ္သ ပာဋိကင္ခာ’တိ ဘဏတီ’’တိ။ အာပတ္တိ ဝာစာယ, ဝာစာယ ပာစိတ္တိယသ္သ။

Upasampanno upasampannassa sutvā upasampannassa pesuññaṃ upasaṃharati – ‘‘itthannāmo taṃ ‘paṇḍito byatto medhāvī bahussuto dhammakathiko, natthi tassa duggati, sugati yeva tassa pāṭikaṅkhā’ti bhaṇatī’’ti. Āpatti vācāya, vācāya pācittiyassa.

၄၁. ဥပသမ္ပန္နော ဥပသမ္ပန္နသ္သ သုတ္ဝာ ဥပသမ္ပန္နသ္သ ပေသုညံ ဥပသံဟရတိ – ‘‘ဣတ္ထန္နာမော ‘သန္တိ ဣဓေကစ္စေ စဏ္ဍာလာ ဝေနာ နေသာဒာ ရထကာရာ, ပုက္ကုသာ’တိ ဘဏတိ, န သော အညံ ဘဏတိ, တညေဝ ဘဏတီ’’တိ။ အာပတ္တိ ဝာစာယ, ဝာစာယ ဒုက္ကဋသ္သ။

41. Upasampanno upasampannassa sutvā upasampannassa pesuññaṃ upasaṃharati – ‘‘itthannāmo ‘santi idhekacce caṇḍālā venā nesādā rathakārā, pukkusā’ti bhaṇati, na so aññaṃ bhaṇati, taññeva bhaṇatī’’ti. Āpatti vācāya, vācāya dukkaṭassa.

ဥပသမ္ပန္နော ဥပသမ္ပန္နသ္သ သုတ္ဝာ ဥပသမ္ပန္နသ္သ ပေသုညံ ဥပသံဟရတိ – ‘‘ဣတ္ထန္နာမော ‘သန္တိ ဣဓေကစ္စေ ခတ္တိယာ ဗ္ရာဟ္မဏာ’တိ ဘဏတိ, န သော အညံ ဘဏတိ, တညေဝ ဘဏတီ’တိ။ အာပတ္တိ ဝာစာယ, ဝာစာယ ဒုက္ကဋသ္သ။ပေ.။။

Upasampanno upasampannassa sutvā upasampannassa pesuññaṃ upasaṃharati – ‘‘itthannāmo ‘santi idhekacce khattiyā brāhmaṇā’ti bhaṇati, na so aññaṃ bhaṇati, taññeva bhaṇatī’ti. Āpatti vācāya, vācāya dukkaṭassa…pe….

ဥပသမ္ပန္နော ဥပသမ္ပန္နသ္သ သုတ္ဝာ ဥပသမ္ပန္နသ္သ ပေသုညံ ဥပသံဟရတိ – ‘‘ဣတ္ထန္နာမော ‘သန္တိ ဣဓေကစ္စေ ပဏ္ဍိတာ ဗ္ယတ္တာ မေဓာဝီ ဗဟုသ္သုတာ ဓမ္မကထိကာ, နတ္ထိ တေသံ ဒုဂ္ဂတိ, သုဂတိ ယေဝ တေသံ ပာဋိကင္ခာ’တိ ဘဏတိ, န သော အညံ ဘဏတိ, တညေဝ ဘဏတီ’’တိ။ အာပတ္တိ ဝာစာယ, ဝာစာယ ဒုက္ကဋသ္သ။

Upasampanno upasampannassa sutvā upasampannassa pesuññaṃ upasaṃharati – ‘‘itthannāmo ‘santi idhekacce paṇḍitā byattā medhāvī bahussutā dhammakathikā, natthi tesaṃ duggati, sugati yeva tesaṃ pāṭikaṅkhā’ti bhaṇati, na so aññaṃ bhaṇati, taññeva bhaṇatī’’ti. Āpatti vācāya, vācāya dukkaṭassa.

ဥပသမ္ပန္နော ဥပသမ္ပန္နသ္သ သုတ္ဝာ ဥပသမ္ပန္နသ္သ ပေသုညံ ဥပသံဟရတိ – ‘‘ဣတ္ထန္နာမော ‘ယေ နူန စဏ္ဍာလာ ဝေနာ နေသာဒာ ရထကာရာ ပုက္ကုသာ’တိ ဘဏတိ, န သော အညံ ဘဏတိ, တညေဝ ဘဏတီ’’တိ။ အာပတ္တိ ဝာစာယ, ဝာစာယ ဒုက္ကဋသ္သ။

Upasampanno upasampannassa sutvā upasampannassa pesuññaṃ upasaṃharati – ‘‘itthannāmo ‘ye nūna caṇḍālā venā nesādā rathakārā pukkusā’ti bhaṇati, na so aññaṃ bhaṇati, taññeva bhaṇatī’’ti. Āpatti vācāya, vācāya dukkaṭassa.

ဥပသမ္ပန္နော ဥပသမ္ပန္နသ္သ သုတ္ဝာ ဥပသမ္ပန္နသ္သ ပေသုညံ ဥပသံဟရတိ – ‘‘ဣတ္ထန္နာမော ‘ယေ နူန ပဏ္ဍိတာ ဗ္ယတ္တာ မေဓာဝီ ဗဟုသ္သုတာ ဓမ္မကထိကာ’တိ ဘဏတိ, န သော အညံ ဘဏတိ, တညေဝ ဘဏတီ’’တိ။ အာပတ္တိ ဝာစာယ, ဝာစာယ ဒုက္ကဋသ္သ။

Upasampanno upasampannassa sutvā upasampannassa pesuññaṃ upasaṃharati – ‘‘itthannāmo ‘ye nūna paṇḍitā byattā medhāvī bahussutā dhammakathikā’ti bhaṇati, na so aññaṃ bhaṇati, taññeva bhaṇatī’’ti. Āpatti vācāya, vācāya dukkaṭassa.

ဥပသမ္ပန္နော ဥပသမ္ပန္နသ္သ သုတ္ဝာ ဥပသမ္ပန္နသ္သ ပေသုညံ ဥပသံဟရတိ – ‘‘ဣတ္ထန္နာမော ‘န မယံ စဏ္ဍာလာ ဝေနာ နေသာဒာ ရထကာရာ ပုက္ကုသာ’တိ ဘဏတိ, န သော အညံ ဘဏတိ, တညေဝ ဘဏတီ’’တိ။ အာပတ္တိ ဝာစာယ, ဝာစာယ ဒုက္ကဋသ္သ။

Upasampanno upasampannassa sutvā upasampannassa pesuññaṃ upasaṃharati – ‘‘itthannāmo ‘na mayaṃ caṇḍālā venā nesādā rathakārā pukkusā’ti bhaṇati, na so aññaṃ bhaṇati, taññeva bhaṇatī’’ti. Āpatti vācāya, vācāya dukkaṭassa.

ဥပသမ္ပန္နော ဥပသမ္ပန္နသ္သ သုတ္ဝာ ဥပသမ္ပန္နသ္သ ပေသုညံ ဥပသံဟရတိ – ‘‘ဣတ္ထန္နာမော ‘န မယံ ပဏ္ဍိတာ ဗ္ယတ္တာ မေဓာဝီ ဗဟုသ္သုတာ ဓမ္မကထိကာ, နတ္ထမ္ဟာကံ ဒုဂ္ဂတိ, သုဂတိ ယေဝ အမ္ဟာကံ ပာဋိကင္ခာ’တိ ဘဏတိ, န သော အညံ ဘဏတိ, တညေဝ ဘဏတီ’’တိ။ အာပတ္တိ ဝာစာယ, ဝာစာယ ဒုက္ကဋသ္သ။

Upasampanno upasampannassa sutvā upasampannassa pesuññaṃ upasaṃharati – ‘‘itthannāmo ‘na mayaṃ paṇḍitā byattā medhāvī bahussutā dhammakathikā, natthamhākaṃ duggati, sugati yeva amhākaṃ pāṭikaṅkhā’ti bhaṇati, na so aññaṃ bhaṇati, taññeva bhaṇatī’’ti. Āpatti vācāya, vācāya dukkaṭassa.

၄၂. ဥပသမ္ပန္နော ဥပသမ္ပန္နသ္သ သုတ္ဝာ ဥပသမ္ပန္နသ္သ ပေသုညံ ဥပသံဟရတိ; အာပတ္တိ ဝာစာယ, ဝာစာယ ပာစိတ္တိယသ္သ။

42. Upasampanno upasampannassa sutvā upasampannassa pesuññaṃ upasaṃharati; āpatti vācāya, vācāya pācittiyassa.

ဥပသမ္ပန္နော ဥပသမ္ပန္နသ္သ သုတ္ဝာ အနုပသမ္ပန္နသ္သ ပေသုညံ ဥပသံဟရတိ, အာပတ္တိ ဒုက္ကဋသ္သ။

Upasampanno upasampannassa sutvā anupasampannassa pesuññaṃ upasaṃharati, āpatti dukkaṭassa.

ဥပသမ္ပန္နော အနုပသမ္ပန္နသ္သ သုတ္ဝာ ဥပသမ္ပန္နသ္သ ပေသုညံ ဥပသံဟရတိ, အာပတ္တိ ဒုက္ကဋသ္သ။

Upasampanno anupasampannassa sutvā upasampannassa pesuññaṃ upasaṃharati, āpatti dukkaṭassa.

ဥပသမ္ပန္နော အနုပသမ္ပန္နသ္သ သုတ္ဝာ အနုပသမ္ပန္နသ္သ ပေသုညံ ဥပသံဟရတိ, အာပတ္တိ ဒုက္ကဋသ္သ။

Upasampanno anupasampannassa sutvā anupasampannassa pesuññaṃ upasaṃharati, āpatti dukkaṭassa.

၄၃. အနာပတ္တိ နပိယကမ္ယသ္သ, နဘေဒာဓိပ္ပာယသ္သ, ဥမ္မတ္တကသ္သ, အာဒိကမ္မိကသ္သာတိ။

43. Anāpatti napiyakamyassa, nabhedādhippāyassa, ummattakassa, ādikammikassāti.

ပေသုညသိက္ခာပဒံ နိဋ္ဌိတံ တတိယံ။

Pesuññasikkhāpadaṃ niṭṭhitaṃ tatiyaṃ.

၄. ပဒသောဓမ္မသိက္ခာပဒံ

4. Padasodhammasikkhāpadaṃ

၄၄. တေန သမယေန ဗုဒ္ဓော ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ တေန ခော ပန သမယေန ဆဗ္ဗဂ္ဂိယာ ဘိက္ခူ ဥပာသကေ ပဒသော ဓမ္မံ ဝာစေန္တိ။ ဥပာသကာ ဘိက္ခူသု အဂာရဝာ အပ္ပတိသ္သာ အသဘာဂဝုတ္တိကာ ဝိဟရန္တိ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ ဆဗ္ဗဂ္ဂိယာ ဘိက္ခူ ဥပာသကေ ပဒသော ဓမ္မံ ဝာစေသ္သန္တိ! ဥပာသကာ ဘိက္ခူသု အဂာရဝာ အပ္ပတိသ္သာ အသဘာဂဝုတ္တိကာ ဝိဟရန္တီ’’တိ။ အထ ခော တေ ဘိက္ခူ ဆဗ္ဗဂ္ဂိယေ ဘိက္ခူ အနေကပရိယာယေန ဝိဂရဟိတ္ဝာ ဘဂဝတော ဧတမတ္ထံ အာရောစေသုံ။ပေ.။ ‘‘သစ္စံ ကိရ တုမ္ဟေ, ဘိက္ခဝေ, ဥပာသကေ ပဒသော ဓမ္မံ ဝာစေထ; ဥပာသကာ ဘိက္ခူသု အဂာရဝာ အပ္ပတိသ္သာ အသဘာဂဝုတ္တိကာ ဝိဟရန္တီ’’တိ? ‘‘သစ္စံ, ဘဂဝာ’’တိ။ ဝိဂရဟိ ဗုဒ္ဓော ဘဂဝာ။ပေ.။ ကထဉ္ဟိ နာမ တုမ္ဟေ, မောဃပုရိသာ, ဥပာသကေ ပဒသော ဓမ္မံ ဝာစေသ္သထ! ဥပာသကာ ဘိက္ခူသု အဂာရဝာ အပ္ပတိသ္သာ အသဘာဂဝုတ္တိကာ ဝိဟရန္တိ! နေတံ, မောဃပုရိသာ, အပ္ပသန္နာနံ ဝာ ပသာဒာယ ပသန္နာနံ ဝာ ဘိယ္ယောဘာဝာယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခာပဒံ ဥဒ္ဒိသေယ္ယာထ –

44. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena chabbaggiyā bhikkhū upāsake padaso dhammaṃ vācenti. Upāsakā bhikkhūsu agāravā appatissā asabhāgavuttikā viharanti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū upāsake padaso dhammaṃ vācessanti! Upāsakā bhikkhūsu agāravā appatissā asabhāgavuttikā viharantī’’ti. Atha kho te bhikkhū chabbaggiye bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tumhe, bhikkhave, upāsake padaso dhammaṃ vācetha; upāsakā bhikkhūsu agāravā appatissā asabhāgavuttikā viharantī’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, upāsake padaso dhammaṃ vācessatha! Upāsakā bhikkhūsu agāravā appatissā asabhāgavuttikā viharanti! Netaṃ, moghapurisā, appasannānaṃ vā pasādāya pasannānaṃ vā bhiyyobhāvāya…pe… evañca pana, bhikkhave, imaṃ sikkhāpadaṃ uddiseyyātha –

၄၅. ‘‘ယော ပန ဘိက္ခု အနုပသမ္ပန္နံ ပဒသော ဓမ္မံ ဝာစေယ္ယ ပာစိတ္တိယ’’န္တိ။

45.‘‘Yo pana bhikkhu anupasampannaṃ padaso dhammaṃ vāceyya pācittiya’’nti.

၄၆. ယော ပနာတိ ယော ယာဒိသော။ပေ.။ ဘိက္ခူတိ။ပေ.။ အယံ ဣမသ္မိံ အတ္ထေ အဓိပ္ပေတော ဘိက္ခူတိ။

46.Yopanāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.

အနုပသမ္ပန္နော နာမ ဘိက္ခုဉ္စ ဘိက္ခုနိဉ္စ ဌပေတ္ဝာ အဝသေသော အနုပသမ္ပန္နော နာမ။

Anupasampanno nāma bhikkhuñca bhikkhuniñca ṭhapetvā avaseso anupasampanno nāma.

ပဒသော နာမ ပဒံ, အနုပဒံ, အန္ဝက္ခရံ, အနုဗ္ယဉ္ဇနံ။

Padaso nāma padaṃ, anupadaṃ, anvakkharaṃ, anubyañjanaṃ.

ပဒံ နာမ ဧကတော ပဋ္ဌပေတ္ဝာ ဧကတော ဩသာပေန္တိ။ အနုပဒံ နာမ ပာဋေက္ကံ ပဋ္ဌပေတ္ဝာ ဧကတော ဩသာပေန္တိ။ အန္ဝက္ခရံ နာမ ‘‘ရူပံ အနိစ္စ’’န္တိ ဝုစ္စမာနော, ‘‘ရု’’န္တိ ဩပာတေတိ။ အနုဗ္ယဉ္ဇနံ နာမ ‘‘ရူပံ အနိစ္စ’’န္တိ ဝုစ္စမာနော, ‘‘ဝေဒနာ အနိစ္စာ’’တိ သဒ္ဒံ နိစ္ဆာရေတိ။

Padaṃ nāma ekato paṭṭhapetvā ekato osāpenti. Anupadaṃ nāma pāṭekkaṃ paṭṭhapetvā ekato osāpenti. Anvakkharaṃ nāma ‘‘rūpaṃ anicca’’nti vuccamāno, ‘‘ru’’nti opāteti. Anubyañjanaṃ nāma ‘‘rūpaṃ anicca’’nti vuccamāno, ‘‘vedanā aniccā’’ti saddaṃ nicchāreti.

ယဉ္စ ပဒံ, ယဉ္စ အနုပဒံ, ယဉ္စ အန္ဝက္ခရံ, ယဉ္စ အနုဗ္ယဉ္ဇနံ – သဗ္ဗမေတံ ပဒသော ¹⁵ နာမ။

Yañca padaṃ, yañca anupadaṃ, yañca anvakkharaṃ, yañca anubyañjanaṃ – sabbametaṃ padaso ¹⁶ nāma.

ဓမ္မော နာမ ဗုဒ္ဓဘာသိတော, သာဝကဘာသိတော, ဣသိဘာသိတော, ဒေဝတာဘာသိတော, အတ္ထူပသဉ္ဟိတော, ဓမ္မူပသဉ္ဟိတော။

Dhammo nāma buddhabhāsito, sāvakabhāsito, isibhāsito, devatābhāsito, atthūpasañhito, dhammūpasañhito.

ဝာစေယ္ယာတိ ပဒေန ဝာစေတိ, ပဒေ ပဒေ အာပတ္တိ ပာစိတ္တိယသ္သ။ အက္ခရာယ ဝာစေတိ, အက္ခရက္ခရာယ အာပတ္တိ ပာစိတ္တိယသ္သ။

Vāceyyāti padena vāceti, pade pade āpatti pācittiyassa. Akkharāya vāceti, akkharakkharāya āpatti pācittiyassa.

၄၇. အနုပသမ္ပန္နေ အနုပသမ္ပန္နသညီ ပဒသော ဓမ္မံ ဝာစေတိ, အာပတ္တိ ပာစိတ္တိယသ္သ။ အနုပသမ္ပန္နေ ဝေမတိကော ပဒသော ဓမ္မံ ဝာစေတိ, အာပတ္တိ ပာစိတ္တိယသ္သ။ အနုပသမ္ပန္နေ ဥပသမ္ပန္နသညီ ပဒသော ဓမ္မံ ဝာစေတိ, အာပတ္တိ ပာစိတ္တိယသ္သ။

47. Anupasampanne anupasampannasaññī padaso dhammaṃ vāceti, āpatti pācittiyassa. Anupasampanne vematiko padaso dhammaṃ vāceti, āpatti pācittiyassa. Anupasampanne upasampannasaññī padaso dhammaṃ vāceti, āpatti pācittiyassa.

ဥပသမ္ပန္နေ အနုပသမ္ပန္နသညီ, အာပတ္တိ ဒုက္ကဋသ္သ။ ဥပသမ္ပန္နေ ဝေမတိကော, အာပတ္တိ ဒုက္ကဋသ္သ။ ဥပသမ္ပန္နေ ဥပသမ္ပန္နသညီ, အနာပတ္တိ။

Upasampanne anupasampannasaññī, āpatti dukkaṭassa. Upasampanne vematiko, āpatti dukkaṭassa. Upasampanne upasampannasaññī, anāpatti.

၄၈. အနာပတ္တိ ဧကတော ဥဒ္ဒိသာပေန္တော, ဧကတော သဇ္ဈာယံ ကရောန္တော , ယေဘုယ္ယေန ပဂုဏံ ဂန္ထံ ဘဏန္တံ ဩပာတေတိ, ဩသာရေန္တံ ဩပာတေတိ, ဥမ္မတ္တကသ္သ, အာဒိကမ္မိကသ္သာတိ။

48. Anāpatti ekato uddisāpento, ekato sajjhāyaṃ karonto , yebhuyyena paguṇaṃ ganthaṃ bhaṇantaṃ opāteti, osārentaṃ opāteti, ummattakassa, ādikammikassāti.

ပဒသောဓမ္မသိက္ခာပဒံ နိဋ္ဌိတံ စတုတ္ထံ။

Padasodhammasikkhāpadaṃ niṭṭhitaṃ catutthaṃ.

၅. သဟသေယ္ယသိက္ခာပဒံ

5. Sahaseyyasikkhāpadaṃ

၄၉. တေန သမယေန ဗုဒ္ဓော ဘဂဝာ အာဠဝိယံ ဝိဟရတိ အဂ္ဂာဠဝေ စေတိယေ။ တေန ခော ပန သမယေန ဥပာသကာ အာရာမံ အာဂစ္ဆန္တိ ဓမ္မသ္သဝနာယ။ ဓမ္မေ ဘာသိတေ ထေရာ ဘိက္ခူ ယထာဝိဟာရံ ဂစ္ဆန္တိ။ နဝကာ ဘိက္ခူ တတ္ထေဝ ဥပဋ္ဌာနသာလာယံ ဥပာသကေဟိ သဒ္ဓိံ မုဋ္ဌသ္သတီ, အသမ္ပဇာနာ, နဂ္ဂာ, ဝိကူဇမာနာ, ကာကစ္ဆမာနာ သေယ္ယံ ကပ္ပေန္တိ။ ဥပာသကာ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ ဘဒန္တာ မုဋ္ဌသ္သတီ အသမ္ပဇာနာ နဂ္ဂာ ဝိကူဇမာနာ ကာကစ္ဆမာနာ သေယ္ယံ ကပ္ပေသ္သန္တီ’’တိ! အသ္သောသုံ ခော ဘိက္ခူ တေသံ ဥပာသကာနံ ဥဇ္ဈာယန္တာနံ ခိယ္ယန္တာနံ ဝိပာစေန္တာနံ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ ဘိက္ခူ အနုပသမ္ပန္နေန သဟသေယ္ယံ ကပ္ပေသ္သန္တီ’’တိ! အထ ခော တေ ဘိက္ခူ တေ နဝကေ ဘိက္ခူ အနေကပရိယာယေန ဝိဂရဟိတ္ဝာ ဘဂဝတော ဧတမတ္ထံ အာရောစေသုံ။ပေ.။ ‘‘သစ္စံ ကိရ, ဘိက္ခဝေ, ဘိက္ခူ အနုပသမ္ပန္နေန သဟသေယ္ယံ ကပ္ပေန္တီ’’တိ? ‘‘သစ္စံ, ဘဂဝာ’’တိ။ ဝိဂရဟိ ဗုဒ္ဓော ဘဂဝာ။ပေ.။ ကထဉ္ဟိ နာမ တေ, ဘိက္ခဝေ, မောဃပုရိသာ အနုပသမ္ပန္နေန သဟသေယ္ယံ ကပ္ပေသ္သန္တိ! နေတံ, ဘိက္ခဝေ, အပ္ပသန္နာနံ ဝာ ပသာဒာယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခာပဒံ ဥဒ္ဒိသေယ္ယာထ –

49. Tena samayena buddho bhagavā āḷaviyaṃ viharati aggāḷave cetiye. Tena kho pana samayena upāsakā ārāmaṃ āgacchanti dhammassavanāya. Dhamme bhāsite therā bhikkhū yathāvihāraṃ gacchanti. Navakā bhikkhū tattheva upaṭṭhānasālāyaṃ upāsakehi saddhiṃ muṭṭhassatī, asampajānā, naggā, vikūjamānā, kākacchamānā seyyaṃ kappenti. Upāsakā ujjhāyanti khiyyanti vipācenti – ‘‘kathañhi nāma bhadantā muṭṭhassatī asampajānā naggā vikūjamānā kākacchamānā seyyaṃ kappessantī’’ti! Assosuṃ kho bhikkhū tesaṃ upāsakānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma bhikkhū anupasampannena sahaseyyaṃ kappessantī’’ti! Atha kho te bhikkhū te navake bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira, bhikkhave, bhikkhū anupasampannena sahaseyyaṃ kappentī’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma te, bhikkhave, moghapurisā anupasampannena sahaseyyaṃ kappessanti! Netaṃ, bhikkhave, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –

‘‘ယော ပန ဘိက္ခု အနုပသမ္ပန္နေန သဟသေယ္ယံ ကပ္ပေယ္ယ ပာစိတ္တိယ’’န္တိ။

‘‘Yo pana bhikkhu anupasampannena sahaseyyaṃ kappeyya pācittiya’’nti.

ဧဝဉ္စိဒံ ဘဂဝတာ ဘိက္ခူနံ သိက္ခာပဒံ ပညတ္တံ ဟောတိ။

Evañcidaṃ bhagavatā bhikkhūnaṃ sikkhāpadaṃ paññattaṃ hoti.

၅၀. အထ ခော ဘဂဝာ အာဠဝိယံ ယထာဘိရန္တံ ဝိဟရိတ္ဝာ ယေန ကောသမ္ဗီ တေန စာရိကံ ပက္ကာမိ။ အနုပုဗ္ဗေန စာရိကံ စရမာနော ယေန ကောသမ္ဗီ တဒဝသရိ။ တတ္ရ သုဒံ ဘဂဝာ ကောသမ္ဗိယံ ဝိဟရတိ ဗဒရိကာရာမေ။ ဘိက္ခူ အာယသ္မန္တံ ရာဟုလံ ဧတဒဝောစုံ – ‘‘ဘဂဝတာ, အာဝုသော ရာဟုလ, သိက္ခာပဒံ ပညတ္တံ – ‘န အနုပသမ္ပန္နေန သဟသေယ္ယာ ကပ္ပေတဗ္ဗာ’တိ။ သေယ္ယံ, အာဝုသော ရာဟုလ, ဇာနာဟီ’’တိ။ အထ ခော အာယသ္မာ ရာဟုလော သေယ္ယံ အလဘမာနော ဝစ္စကုဋိယာ သေယ္ယံ ကပ္ပေသိ။ အထ ခော ဘဂဝာ ရတ္တိယာ ပစ္စူသသမယံ ပစ္စုဋ္ဌာယ ယေန ဝစ္စကုဋိ တေနုပသင္ကမိ; ဥပသင္ကမိတ္ဝာ ဥက္ကာသိ။ အာယသ္မာပိ ရာဟုလော ဥက္ကာသိ။ ‘‘ကော ဧတ္ထာ’’တိ? ‘‘အဟံ, ဘဂဝာ, ရာဟုလော’’တိ။ ‘‘ကိသ္သ တ္ဝံ, ရာဟုလ, ဣဓ နိသိန္နောသီ’’တိ? အထ ခော အာယသ္မာ ရာဟုလော ဘဂဝတော ဧတမတ္ထံ အာရောစေသိ။ အထ ခော ဘဂဝာ ဧတသ္မိံ နိဒာနေ ဧတသ္မိံ ပကရဏေ ဓမ္မိံ ကထံ ကတ္ဝာ ဘိက္ခူ အာမန္တေသိ – ‘‘အနုဇာနာမိ, ဘိက္ခဝေ, အနုပသမ္ပန္နေန ဒိရတ္တတိရတ္တံ သဟသေယ္ယံ ကပ္ပေတုံ။ ဧဝဉ္စ ပန, ဘိက္ခဝေ, ဣမံ သိက္ခာပဒံ ဥဒ္ဒိသေယ္ယာထ –

50. Atha kho bhagavā āḷaviyaṃ yathābhirantaṃ viharitvā yena kosambī tena cārikaṃ pakkāmi. Anupubbena cārikaṃ caramāno yena kosambī tadavasari. Tatra sudaṃ bhagavā kosambiyaṃ viharati badarikārāme. Bhikkhū āyasmantaṃ rāhulaṃ etadavocuṃ – ‘‘bhagavatā, āvuso rāhula, sikkhāpadaṃ paññattaṃ – ‘na anupasampannena sahaseyyā kappetabbā’ti. Seyyaṃ, āvuso rāhula, jānāhī’’ti. Atha kho āyasmā rāhulo seyyaṃ alabhamāno vaccakuṭiyā seyyaṃ kappesi. Atha kho bhagavā rattiyā paccūsasamayaṃ paccuṭṭhāya yena vaccakuṭi tenupasaṅkami; upasaṅkamitvā ukkāsi. Āyasmāpi rāhulo ukkāsi. ‘‘Ko etthā’’ti? ‘‘Ahaṃ, bhagavā, rāhulo’’ti. ‘‘Kissa tvaṃ, rāhula, idha nisinnosī’’ti? Atha kho āyasmā rāhulo bhagavato etamatthaṃ ārocesi. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, anupasampannena dirattatirattaṃ sahaseyyaṃ kappetuṃ. Evañca pana, bhikkhave, imaṃ sikkhāpadaṃ uddiseyyātha –

၅၁. ‘‘ယော ပန ဘိက္ခု အနုပသမ္ပန္နေန ဥတ္တရိဒိရတ္တတိရတ္တံ သဟသေယ္ယံ ကပ္ပေယ္ယ, ပာစိတ္တိယ’’န္တိ။

51.‘‘Yo pana bhikkhu anupasampannena uttaridirattatirattaṃ sahaseyyaṃ kappeyya, pācittiya’’nti.

၅၂. ယော ပနာတိ ယော ယာဒိသော။ပေ.။ ဘိက္ခူတိ။ပေ.။ အယံ ဣမသ္မိံ အတ္ထေ အဓိပ္ပေတော ဘိက္ခူတိ။

52.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.

အနုပသမ္ပန္နော နာမ ဘိက္ခုံ ဌပေတ္ဝာ အဝသေသော အနုပသမ္ပန္နော နာမ။

Anupasampanno nāma bhikkhuṃ ṭhapetvā avaseso anupasampanno nāma.

ဥတ္တရိဒိရတ္တတိရတ္တန္တိ အတိရေကဒိရတ္တတိရတ္တံ။

Uttaridirattatirattanti atirekadirattatirattaṃ.

သဟာတိ ဧကတော။

Sahāti ekato.

သေယ္ယာ နာမ သဗ္ဗစ္ဆန္နာ, သဗ္ဗပရိစ္ဆန္နာ, ယေဘုယ္ယေနစ္ဆန္နာ, ယေဘုယ္ယေန ပရိစ္ဆန္နာ။

Seyyā nāma sabbacchannā, sabbaparicchannā, yebhuyyenacchannā, yebhuyyena paricchannā.

သေယ္ယံ ကပ္ပေယ္ယာတိ စတုတ္ထေ ဒိဝသေ အတ္ထင္ဂတေ သူရိယေ, အနုပသမ္ပန္နေ နိပန္နေ, ဘိက္ခု နိပဇ္ဇတိ, အာပတ္တိ ပာစိတ္တိယသ္သ။ ဘိက္ခု နိပန္နေ, အနုပသမ္ပန္နော နိပဇ္ဇတိ, အာပတ္တိ ပာစိတ္တိယသ္သ။ ဥဘော ဝာ နိပဇ္ဇန္တိ, အာပတ္တိ ပာစိတ္တိယသ္သ။ ဥဋ္ဌဟိတ္ဝာ ပုနပ္ပုနံ နိပဇ္ဇန္တိ, အာပတ္တိ ပာစိတ္တိယသ္သ။

Seyyaṃ kappeyyāti catutthe divase atthaṅgate sūriye, anupasampanne nipanne, bhikkhu nipajjati, āpatti pācittiyassa. Bhikkhu nipanne, anupasampanno nipajjati, āpatti pācittiyassa. Ubho vā nipajjanti, āpatti pācittiyassa. Uṭṭhahitvā punappunaṃ nipajjanti, āpatti pācittiyassa.

၅၃. အနုပသမ္ပန္နေ အနုပသမ္ပန္နသညီ ဥတ္တရိဒိရတ္တတိရတ္တံ သဟသေယ္ယံ ကပ္ပေတိ, အာပတ္တိ ပာစိတ္တိယသ္သ။ အနုပသမ္ပန္နေ ဝေမတိကော ဥတ္တရိဒိရတ္တတိရတ္တံ သဟသေယ္ယံ ကပ္ပေတိ, အာပတ္တိ ပာစိတ္တိယသ္သ။ အနုပသမ္ပန္နေ ဥပသမ္ပန္နသညီ ဥတ္တရိဒိရတ္တတိရတ္တံ သဟသေယ္ယံ ကပ္ပေတိ, အာပတ္တိ ပာစိတ္တိယသ္သ။

53. Anupasampanne anupasampannasaññī uttaridirattatirattaṃ sahaseyyaṃ kappeti, āpatti pācittiyassa. Anupasampanne vematiko uttaridirattatirattaṃ sahaseyyaṃ kappeti, āpatti pācittiyassa. Anupasampanne upasampannasaññī uttaridirattatirattaṃ sahaseyyaṃ kappeti, āpatti pācittiyassa.

ဥပဍ္ဎစ္ဆန္နေ ဥပဍ္ဎပရိစ္ဆန္နေ, အာပတ္တိ ဒုက္ကဋသ္သ။ ဥပသမ္ပန္နေ အနုပသမ္ပန္နသညီ, အာပတ္တိ ဒုက္ကဋသ္သ။ ဥပသမ္ပန္နေ ဝေမတိကော, အာပတ္တိ ဒုက္ကဋသ္သ။ ဥပသမ္ပန္နေ ဥပသမ္ပန္နသညီ, အနာပတ္တိ။

Upaḍḍhacchanne upaḍḍhaparicchanne, āpatti dukkaṭassa. Upasampanne anupasampannasaññī, āpatti dukkaṭassa. Upasampanne vematiko, āpatti dukkaṭassa. Upasampanne upasampannasaññī, anāpatti.

၅၄. အနာပတ္တိ ဒ္ဝေတိသ္သော ရတ္တိယော ဝသတိ, ဦနကဒ္ဝေတိသ္သော ရတ္တိယော ဝသတိ, ဒ္ဝေ ရတ္တိယော ဝသိတ္ဝာ တတိယာယ ရတ္တိယာ ပုရာရုဏာ နိက္ခမိတ္ဝာ ပုန ဝသတိ, သဗ္ဗစ္ဆန္နေ, သဗ္ဗအပရိစ္ဆန္နေ, သဗ္ဗပရိစ္ဆန္နေ သဗ္ဗအစ္ဆန္နေ ¹⁷, ယေဘုယ္ယေန အစ္ဆန္နေ, ယေဘုယ္ယေန အပရိစ္ဆန္နေ, အနုပသမ္ပန္နေ နိပန္နေ ဘိက္ခု နိသီဒတိ, ဘိက္ခု နိပန္နေ အနုပသမ္ပန္နော နိသီဒတိ, ဥဘော ဝာ နိသီဒန္တိ, ဥမ္မတ္တကသ္သ, အာဒိကမ္မိကသ္သာတိ။

54. Anāpatti dvetisso rattiyo vasati, ūnakadvetisso rattiyo vasati, dve rattiyo vasitvā tatiyāya rattiyā purāruṇā nikkhamitvā puna vasati, sabbacchanne, sabbaaparicchanne, sabbaparicchanne sabbaacchanne ¹⁸, yebhuyyena acchanne, yebhuyyena aparicchanne, anupasampanne nipanne bhikkhu nisīdati, bhikkhu nipanne anupasampanno nisīdati, ubho vā nisīdanti, ummattakassa, ādikammikassāti.

သဟသေယ္ယသိက္ခာပဒံ နိဋ္ဌိတံ ပဉ္စမံ။

Sahaseyyasikkhāpadaṃ niṭṭhitaṃ pañcamaṃ.

၆. ဒုတိယသဟသေယ္ယသိက္ခာပဒံ

6. Dutiyasahaseyyasikkhāpadaṃ

၅၅. တေန သမယေန ဗုဒ္ဓော ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ တေန ခော ပန သမယေန အာယသ္မာ အနုရုဒ္ဓော ကောသလေသု ဇနပဒေ ¹⁹ သာဝတ္ထိံ ဂစ္ဆန္တော သာယံ အညတရံ ဂာမံ ဥပဂစ္ဆိ။ တေန ခော ပန သမယေန တသ္မိံ ဂာမေ အညတရိသ္သာ ဣတ္ထိယာ အာဝသထာဂာရံ ပညတ္တံ ဟောတိ။ အထ ခော အာယသ္မာ အနုရုဒ္ဓော ယေန သာ ဣတ္ထီ တေနုပသင္ကမိ; ဥပသင္ကမိတ္ဝာ တံ ဣတ္ထိံ ဧတဒဝောစ – ‘‘သစေ တေ, ဘဂိနိ, အဂရု, ဝသေယ္ယာမ ဧကရတ္တံ အာဝသထာဂာရေ’’တိ။ ‘‘ဝသေယ္ယာထ, ဘန္တေ’’တိ။ အညေပိ အဒ္ဓိကာ ယေန သာ ဣတ္ထီ တေနုပသင္ကမိံသု; ဥပသင္ကမိတ္ဝာ တံ ဣတ္ထိံ ဧတဒဝောစုံ – ‘‘သစေ တေ, အယ္ယေ, အဂရု ဝသေယ္ယာမ ဧကရတ္တံ အာဝသထာဂာရေ’’တိ ။ ‘‘ဧသော ခော အယ္ယော သမဏော ပဌမံ ဥပဂတော; သစေ သော အနုဇာနာတိ, ဝသေယ္ယာထာ’’တိ။ အထ ခော တေ အဒ္ဓိကာ ယေနာယသ္မာ အနုရုဒ္ဓော တေနုပသင္ကမိံသု; ဥပသင္ကမိတ္ဝာ အာယသ္မန္တံ အနုရုဒ္ဓံ ဧတဒဝောစုံ – ‘‘သစေ တေ, ဘန္တေ, အဂရု, ဝသေယ္ယာမ ဧကရတ္တံ အာဝသထာဂာရေ’’တိ။ ‘‘ဝသေယ္ယာထ, အာဝုသော’’တိ။ အထ ခော သာ ဣတ္ထီ အာယသ္မန္တေ အနုရုဒ္ဓေ သဟ ဒသ္သနေန ပဋိဗဒ္ဓစိတ္တာ အဟောသိ။ အထ ခော သာ ဣတ္ထီ ယေနာယသ္မာ အနုရုဒ္ဓော တေနုပသင္ကမိ; ဥပသင္ကမိတ္ဝာ အာယသ္မန္တံ အနုရုဒ္ဓံ ဧတဒဝောစ – ‘‘အယ္ယော, ဘန္တေ, ဣမေဟိ မနုသ္သေဟိ အာကိဏ္ဏော န ဖာသု ဝိဟရိသ္သတိ။ သာဓာဟံ, ဘန္တေ, အယ္ယသ္သ မဉ္စကံ အဗ္ဘန္တရံ ပညပေယ္ယ’’န္တိ။ အဓိဝာသေသိ ခော အာယသ္မာ အနုရုဒ္ဓော တုဏ္ဟီဘာဝေန။ အထ ခော သာ ဣတ္ထီ အာယသ္မတော အနုရုဒ္ဓသ္သ မဉ္စကံ အဗ္ဘန္တရံ ပညပေတ္ဝာ အလင္ကတပ္ပဋိယတ္တာ ဂန္ဓဂန္ဓိနီ ယေနာယသ္မာ အနုရုဒ္ဓော တေနုပသင္ကမိ; ဥပသင္ကမိတ္ဝာ အာယသ္မန္တံ အနုရုဒ္ဓံ ဧတဒဝောစ – ‘‘အယ္ယော, ဘန္တေ, အဘိရူပော ဒသ္သနီယော ပာသာဒိကော, အဟံ စမ္ဟိ အဘိရူပာ ဒသ္သနီယာ ပာသာဒိကာ။ သာဓာဟံ, ဘန္တေ, အယ္ယသ္သ ပဇာပတိ ဘဝေယ္ယ’’န္တိ။ ဧဝံ ဝုတ္တေ အာယသ္မာ အနုရုဒ္ဓော တုဏ္ဟီ အဟောသိ။ ဒုတိယမ္ပိ ခော။ပေ.။ တတိယမ္ပိ ခော သာ ဣတ္ထီ အာယသ္မန္တံ အနုရုဒ္ဓံ ဧတဒဝောစ – ‘‘အယ္ယော, ဘန္တေ, အဘိရူပော ဒသ္သနီယော ပာသာဒိကော, အဟဉ္စမ္ဟိ အဘိရူပာ ဒသ္သနီယာ ပာသာဒိကာ။ သာဓု, ဘန္တေ, အယ္ယော မဉ္စေဝ ပဋိစ္ဆတု ²⁰ သဗ္ဗဉ္စ သာပတေယ္ယ’’န္တိ။ တတိယမ္ပိ ခော အာယသ္မာ အနုရုဒ္ဓော တုဏ္ဟီ အဟောသိ။ အထ ခော သာ ဣတ္ထီ သာဋကံ နိက္ခိပိတ္ဝာ အာယသ္မတော အနုရုဒ္ဓသ္သ ပုရတော စင္ကမတိပိ တိဋ္ဌတိပိ နိသီဒတိပိ သေယ္ယမ္ပိ ကပ္ပေတိ။ အထ ခော အာယသ္မာ အနုရုဒ္ဓော ဣန္ဒ္ရိယာနိ ဩက္ခိပိတ္ဝာ တံ ဣတ္ထိံ နေဝ ဩလောကေသိ နပိ အာလပိ။ အထ ခော သာ ဣတ္ထီ – ‘‘အစ္ဆရိယံ ဝတ ဘော, အဗ္ဘုတံ ဝတ ဘော! ဗဟူ မေ မနုသ္သာ သတေနပိ သဟသ္သေနပိ ပဟိဏန္တိ။ အယံ ပန သမဏော – မယာ သာမံ ယာစိယမာနော – န ဣစ္ဆတိ မဉ္စေဝ ပဋိစ္ဆိတုံ သဗ္ဗဉ္စ သာပတေယ္ယ’’န္တိ သာဋကံ နိဝာသေတ္ဝာ အာယသ္မတော အနုရုဒ္ဓသ္သ ပာဒေသု သိရသာ နိပတိတ္ဝာ အာယသ္မန္တံ အနုရုဒ္ဓံ ဧတဒဝောစ – ‘‘အစ္စယော မံ, ဘန္တေ, အစ္စဂမာ ယထာဗာလံ ယထာမူဠ္ဟံ ယထာအကုသလံ ယာဟံ ဧဝမကာသိံ။ တသ္သာ မေ, ဘန္တေ, အယ္ယော အစ္စယံ အစ္စယတော ပဋိဂ္ဂဏ္ဟာတု အာယတိံ သံဝရာယာ’’တိ။ ‘‘တဂ္ဃ တ္ဝံ, ဘဂိနိ, အစ္စယော အစ္စဂမာ ယထာဗာလံ ယထာမူဠ္ဟံ ယထာအကုသလံ ယာ တ္ဝံ ဧဝမကာသိ။ ယတော စ ခော တ္ဝံ, ဘဂိနိ, အစ္စယံ အစ္စယတော ဒိသ္ဝာ ယထာဓမ္မံ ပဋိကရောသိ, တံ တေ မယံ ပဋိဂ္ဂဏ္ဟာမ။ ဝုဒ္ဓိ ဟေသာ, ဘဂိနိ, အရိယသ္သ ဝိနယေ ယော အစ္စယံ အစ္စယတော ဒိသ္ဝာ ယထာဓမ္မံ ပဋိကရောတိ အာယတိဉ္စ သံဝရံ အာပဇ္ဇတီ’’တိ။

55. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā anuruddho kosalesu janapade ²¹ sāvatthiṃ gacchanto sāyaṃ aññataraṃ gāmaṃ upagacchi. Tena kho pana samayena tasmiṃ gāme aññatarissā itthiyā āvasathāgāraṃ paññattaṃ hoti. Atha kho āyasmā anuruddho yena sā itthī tenupasaṅkami; upasaṅkamitvā taṃ itthiṃ etadavoca – ‘‘sace te, bhagini, agaru, vaseyyāma ekarattaṃ āvasathāgāre’’ti. ‘‘Vaseyyātha, bhante’’ti. Aññepi addhikā yena sā itthī tenupasaṅkamiṃsu; upasaṅkamitvā taṃ itthiṃ etadavocuṃ – ‘‘sace te, ayye, agaru vaseyyāma ekarattaṃ āvasathāgāre’’ti . ‘‘Eso kho ayyo samaṇo paṭhamaṃ upagato; sace so anujānāti, vaseyyāthā’’ti. Atha kho te addhikā yenāyasmā anuruddho tenupasaṅkamiṃsu; upasaṅkamitvā āyasmantaṃ anuruddhaṃ etadavocuṃ – ‘‘sace te, bhante, agaru, vaseyyāma ekarattaṃ āvasathāgāre’’ti. ‘‘Vaseyyātha, āvuso’’ti. Atha kho sā itthī āyasmante anuruddhe saha dassanena paṭibaddhacittā ahosi. Atha kho sā itthī yenāyasmā anuruddho tenupasaṅkami; upasaṅkamitvā āyasmantaṃ anuruddhaṃ etadavoca – ‘‘ayyo, bhante, imehi manussehi ākiṇṇo na phāsu viharissati. Sādhāhaṃ, bhante, ayyassa mañcakaṃ abbhantaraṃ paññapeyya’’nti. Adhivāsesi kho āyasmā anuruddho tuṇhībhāvena. Atha kho sā itthī āyasmato anuruddhassa mañcakaṃ abbhantaraṃ paññapetvā alaṅkatappaṭiyattā gandhagandhinī yenāyasmā anuruddho tenupasaṅkami; upasaṅkamitvā āyasmantaṃ anuruddhaṃ etadavoca – ‘‘ayyo, bhante, abhirūpo dassanīyo pāsādiko, ahaṃ camhi abhirūpā dassanīyā pāsādikā. Sādhāhaṃ, bhante, ayyassa pajāpati bhaveyya’’nti. Evaṃ vutte āyasmā anuruddho tuṇhī ahosi. Dutiyampi kho…pe… tatiyampi kho sā itthī āyasmantaṃ anuruddhaṃ etadavoca – ‘‘ayyo, bhante, abhirūpo dassanīyo pāsādiko, ahañcamhi abhirūpā dassanīyā pāsādikā. Sādhu, bhante, ayyo mañceva paṭicchatu ²² sabbañca sāpateyya’’nti. Tatiyampi kho āyasmā anuruddho tuṇhī ahosi. Atha kho sā itthī sāṭakaṃ nikkhipitvā āyasmato anuruddhassa purato caṅkamatipi tiṭṭhatipi nisīdatipi seyyampi kappeti. Atha kho āyasmā anuruddho indriyāni okkhipitvā taṃ itthiṃ neva olokesi napi ālapi. Atha kho sā itthī – ‘‘acchariyaṃ vata bho, abbhutaṃ vata bho! Bahū me manussā satenapi sahassenapi pahiṇanti. Ayaṃ pana samaṇo – mayā sāmaṃ yāciyamāno – na icchati mañceva paṭicchituṃ sabbañca sāpateyya’’nti sāṭakaṃ nivāsetvā āyasmato anuruddhassa pādesu sirasā nipatitvā āyasmantaṃ anuruddhaṃ etadavoca – ‘‘accayo maṃ, bhante, accagamā yathābālaṃ yathāmūḷhaṃ yathāakusalaṃ yāhaṃ evamakāsiṃ. Tassā me, bhante, ayyo accayaṃ accayato paṭiggaṇhātu āyatiṃ saṃvarāyā’’ti. ‘‘Taggha tvaṃ, bhagini, accayo accagamā yathābālaṃ yathāmūḷhaṃ yathāakusalaṃ yā tvaṃ evamakāsi. Yato ca kho tvaṃ, bhagini, accayaṃ accayato disvā yathādhammaṃ paṭikarosi, taṃ te mayaṃ paṭiggaṇhāma. Vuddhi hesā, bhagini, ariyassa vinaye yo accayaṃ accayato disvā yathādhammaṃ paṭikaroti āyatiñca saṃvaraṃ āpajjatī’’ti.

အထ ခော သာ ဣတ္ထီ တသ္သာ ရတ္တိယာ အစ္စယေန အာယသ္မန္တံ အနုရုဒ္ဓံ ပဏီတေန ခာဒနီယေန ဘောဇနီယေန သဟတ္ထာ သန္တပ္ပေတ္ဝာ သမ္ပဝာရေတ္ဝာ, အာယသ္မန္တံ အနုရုဒ္ဓံ ဘုတ္တာဝိံ ဩနီတပတ္တပာဏိံ အဘိဝာဒေတ္ဝာ ဧကမန္တံ နိသီဒိ။ ဧကမန္တံ နိသိန္နံ ခော တံ ဣတ္ထိံ အာယသ္မာ အနုရုဒ္ဓော ဓမ္မိယာ ကထာယ သန္ဒသ္သေသိ သမာဒပေသိ သမုတ္တေဇေသိ သမ္ပဟံသေသိ။ အထ ခော သာ ဣတ္ထီ – အာယသ္မတာ အနုရုဒ္ဓေန ဓမ္မိယာ ကထာယ သန္ဒသ္သိတာ သမာဒပိတာ သမုတ္တေဇိတာ သမ္ပဟံသိတာ – အာယသ္မန္တံ အနုရုဒ္ဓံ ဧတဒဝောစ – ‘‘အဘိက္ကန္တံ, ဘန္တေ, အဘိက္ကန္တံ, ဘန္တေ! သေယ္ယထာပိ, ဘန္တေ, နိက္ကုဇ္ဇိတံ ဝာ ဥက္ကုဇ္ဇေယ္ယ, ပဋိစ္ဆန္နံ ဝာ ဝိဝရေယ္ယ, မူဠ္ဟသ္သ ဝာ မဂ္ဂံ အာစိက္ခေယ္ယ, အန္ဓကာရေ ဝာ တေလပဇ္ဇောတံ ဓာရေယ္ယ – စက္ခုမန္တော ရူပာနိ ဒက္ခန္တီတိ, ဧဝမေဝံ အယ္ယေန အနုရုဒ္ဓေန အနေကပရိယာယေန ဓမ္မော ပကာသိတော။ ဧသာဟံ, ဘန္တေ, တံ ဘဂဝန္တံ သရဏံ ဂစ္ဆာမိ ဓမ္မဉ္စ ဘိက္ခုသင္ဃဉ္စ။ ဥပာသိကံ မံ အယ္ယော ဓာရေတု အဇ္ဇတဂ္ဂေ ပာဏုပေတံ သရဏံ ဂတ’’န္တိ။

Atha kho sā itthī tassā rattiyā accayena āyasmantaṃ anuruddhaṃ paṇītena khādanīyena bhojanīyena sahatthā santappetvā sampavāretvā, āyasmantaṃ anuruddhaṃ bhuttāviṃ onītapattapāṇiṃ abhivādetvā ekamantaṃ nisīdi. Ekamantaṃ nisinnaṃ kho taṃ itthiṃ āyasmā anuruddho dhammiyā kathāya sandassesi samādapesi samuttejesi sampahaṃsesi. Atha kho sā itthī – āyasmatā anuruddhena dhammiyā kathāya sandassitā samādapitā samuttejitā sampahaṃsitā – āyasmantaṃ anuruddhaṃ etadavoca – ‘‘abhikkantaṃ, bhante, abhikkantaṃ, bhante! Seyyathāpi, bhante, nikkujjitaṃ vā ukkujjeyya, paṭicchannaṃ vā vivareyya, mūḷhassa vā maggaṃ ācikkheyya, andhakāre vā telapajjotaṃ dhāreyya – cakkhumanto rūpāni dakkhantīti, evamevaṃ ayyena anuruddhena anekapariyāyena dhammo pakāsito. Esāhaṃ, bhante, taṃ bhagavantaṃ saraṇaṃ gacchāmi dhammañca bhikkhusaṅghañca. Upāsikaṃ maṃ ayyo dhāretu ajjatagge pāṇupetaṃ saraṇaṃ gata’’nti.

အထ ခော အာယသ္မာ အနုရုဒ္ဓော သာဝတ္ထိယံ ဂန္တ္ဝာ ဘိက္ခူနံ ဧတမတ္ထံ အာရောစေသိ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ အာယသ္မာ အနုရုဒ္ဓော မာတုဂာမေန သဟသေယ္ယံ ကပ္ပေသ္သတီ’’တိ! အထ ခော တေ ဘိက္ခူ အာယသ္မန္တံ အနုရုဒ္ဓံ အနေကပရိယာယေန ဝိဂရဟိတ္ဝာ ဘဂဝတော ဧတမတ္ထံ အာရောစေသုံ။ပေ.။ ‘‘သစ္စံ ကိရ တ္ဝံ, အနုရုဒ္ဓ, မာတုဂာမေန သဟသေယ္ယံ ကပ္ပေသီ’’တိ? ‘‘သစ္စံ, ဘဂဝာ’’တိ ။ ဝိဂရဟိ ဗုဒ္ဓော ဘဂဝာ။ပေ.။ ကထဉ္ဟိ နာမ တ္ဝံ, အနုရုဒ္ဓ, မာတုဂာမေန သဟသေယ္ယံ ကပ္ပေသ္သသိ! နေတံ, အနုရုဒ္ဓ, အပ္ပသန္နာနံ ဝာ ပသာဒာယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခာပဒံ ဥဒ္ဒိသေယ္ယာထ –

Atha kho āyasmā anuruddho sāvatthiyaṃ gantvā bhikkhūnaṃ etamatthaṃ ārocesi. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā anuruddho mātugāmena sahaseyyaṃ kappessatī’’ti! Atha kho te bhikkhū āyasmantaṃ anuruddhaṃ anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tvaṃ, anuruddha, mātugāmena sahaseyyaṃ kappesī’’ti? ‘‘Saccaṃ, bhagavā’’ti . Vigarahi buddho bhagavā…pe… kathañhi nāma tvaṃ, anuruddha, mātugāmena sahaseyyaṃ kappessasi! Netaṃ, anuruddha, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –

၅၆. ‘‘ယော ပန ဘိက္ခု မာတုဂာမေန သဟသေယ္ယံ ကပ္ပေယ္ယ ပာစိတ္တိယ’’န္တိ။

56.‘‘Yo pana bhikkhu mātugāmena sahaseyyaṃ kappeyya pācittiya’’nti.

၅၇. ယော ပနာတိ ယော ယာဒိသော။ပေ.။ ဘိက္ခူတိ။ပေ.။ အယံ ဣမသ္မိံ အတ္ထေ အဓိပ္ပေတော ဘိက္ခူတိ။

57.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.

မာတုဂာမော နာမ မနုသ္သိတ္ထီ, န ယက္ခီ ²³, န ပေတီ, န တိရစ္ဆာနဂတာ; အန္တမသော တဒဟုဇာတာပိ ဒာရိကာ, ပဂေဝ မဟတ္တရီ။

Mātugāmo nāma manussitthī, na yakkhī ²⁴, na petī, na tiracchānagatā; antamaso tadahujātāpi dārikā, pageva mahattarī.

သဟာတိ ဧကတော။

Sahāti ekato.

Seyyā nāma sabbacchannā, sabbaparicchannā, yebhuyyenacchannā, yebhuyyena paricchannā.

သေယ္ယံ ကပ္ပေယ္ယာတိ အတ္ထင္ဂတေ သူရိယေ, မာတုဂာမေ နိပန္နေ ဘိက္ခု နိပဇ္ဇတိ, အာပတ္တိ ပာစိတ္တိယသ္သ။ ဘိက္ခု နိပန္နေ မာတုဂာမော နိပဇ္ဇတိ, အာပတ္တိ ပာစိတ္တိယသ္သ။ ဥဘော ဝာ နိပဇ္ဇန္တိ, အာပတ္တိ ပာစိတ္တိယသ္သ။ ဥဋ္ဌဟိတ္ဝာ ပုနပ္ပုနံ နိပဇ္ဇန္တိ, အာပတ္တိ ပာစိတ္တိယသ္သ။

Seyyaṃ kappeyyāti atthaṅgate sūriye, mātugāme nipanne bhikkhu nipajjati, āpatti pācittiyassa. Bhikkhu nipanne mātugāmo nipajjati, āpatti pācittiyassa. Ubho vā nipajjanti, āpatti pācittiyassa. Uṭṭhahitvā punappunaṃ nipajjanti, āpatti pācittiyassa.

၅၈. မာတုဂာမေ မာတုဂာမသညီ သဟသေယ္ယံ ကပ္ပေတိ, အာပတ္တိ ပာစိတ္တိယသ္သ။ မာတုဂာမေ ဝေမတိကော သဟသေယ္ယံ ကပ္ပေတိ, အာပတ္တိ ပာစိတ္တိယသ္သ။ မာတုဂာမေ အမာတုဂာမသညီ သဟသေယ္ယံ ကပ္ပေတိ, အာပတ္တိ ပာစိတ္တိယသ္သ။

58. Mātugāme mātugāmasaññī sahaseyyaṃ kappeti, āpatti pācittiyassa. Mātugāme vematiko sahaseyyaṃ kappeti, āpatti pācittiyassa. Mātugāme amātugāmasaññī sahaseyyaṃ kappeti, āpatti pācittiyassa.

ဥပဍ္ဎစ္ဆန္နေ ဥပဍ္ဎပရိစ္ဆန္နေ, အာပတ္တိ ဒုက္ကဋသ္သ။ ယက္ခိယာ ဝာ ပေတိယာ ဝာ ပဏ္ဍကေန ဝာ တိရစ္ဆာနဂတိတ္ထိယာ ဝာ သဟသေယ္ယံ ကပ္ပေတိ, အာပတ္တိ ဒုက္ကဋသ္သ။ အမာတုဂာမေ မာတုဂာမသညီ, အာပတ္တိ ဒုက္ကဋသ္သ။ အမာတုဂာမေ ဝေမတိကော, အာပတ္တိ ဒုက္ကဋသ္သ။ အမာတုဂာမေ အမာတုဂာမသညီ, အနာပတ္တိ။

Upaḍḍhacchanne upaḍḍhaparicchanne, āpatti dukkaṭassa. Yakkhiyā vā petiyā vā paṇḍakena vā tiracchānagatitthiyā vā sahaseyyaṃ kappeti, āpatti dukkaṭassa. Amātugāme mātugāmasaññī, āpatti dukkaṭassa. Amātugāme vematiko, āpatti dukkaṭassa. Amātugāme amātugāmasaññī, anāpatti.

၅၉. အနာပတ္တိ သဗ္ဗစ္ဆန္နေ သဗ္ဗအပရိစ္ဆန္နေ, သဗ္ဗပရိစ္ဆန္နေ သဗ္ဗအစ္ဆန္နေ ²⁵, ယေဘုယ္ယေန အစ္ဆန္နေ, ယေဘုယ္ယေန အပရိစ္ဆန္နေ, မာတုဂာမေ နိပန္နေ ဘိက္ခု နိသီဒတိ , ဘိက္ခု နိပန္နေ မာတုဂာမော နိသီဒတိ, ဥဘော ဝာ နိသီဒန္တိ, ဥမ္မတ္တကသ္သ, အာဒိကမ္မိကသ္သာတိ။

59. Anāpatti sabbacchanne sabbaaparicchanne, sabbaparicchanne sabbaacchanne ²⁶, yebhuyyena acchanne, yebhuyyena aparicchanne, mātugāme nipanne bhikkhu nisīdati , bhikkhu nipanne mātugāmo nisīdati, ubho vā nisīdanti, ummattakassa, ādikammikassāti.

ဒုတိယသဟသေယ္ယသိက္ခာပဒံ နိဋ္ဌိတံ ဆဋ္ဌံ။

Dutiyasahaseyyasikkhāpadaṃ niṭṭhitaṃ chaṭṭhaṃ.

၇. ဓမ္မဒေသနာသိက္ခာပဒံ

7. Dhammadesanāsikkhāpadaṃ

၆၀. တေန သမယေန ဗုဒ္ဓော ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ တေန ခော ပန သမယေန အာယသ္မာ ဥဒာယီ သာဝတ္ထိယံ ကုလူပကော ဟောတိ, ဗဟုကာနိ ကုလာနိ ဥပသင္ကမတိ။ အထ ခော အာယသ္မာ ဥဒာယီ ပုဗ္ဗဏ္ဟသမယံ နိဝာသေတ္ဝာ ပတ္တစီဝရမာဒာယ ယေန အညတရံ ကုလံ တေနုပသင္ကမိ။ တေန ခော ပန သမယေန ဃရဏီ နိဝေသနဒ္ဝာရေ နိသိန္နာ ဟောတိ, ဃရသုဏ္ဟာ အာဝသထဒ္ဝာရေ နိသိန္နာ ဟောတိ။ အထ ခော အာယသ္မာ ဥဒာယီ ယေန ဃရဏီ တေနုပသင္ကမိ; ဥပသင္ကမိတ္ဝာ ဃရဏိယာ ဥပကဏ္ဏကေ ဓမ္မံ ဒေသေသိ။ အထ ခော ဃရသုဏ္ဟာယ ဧတဒဟောသိ – ‘‘ကိ နု ခော သော သမဏော သသ္သုယာ ဇာရော ဥဒာဟု ဩဘာသတီ’’တိ?

60. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā udāyī sāvatthiyaṃ kulūpako hoti, bahukāni kulāni upasaṅkamati. Atha kho āyasmā udāyī pubbaṇhasamayaṃ nivāsetvā pattacīvaramādāya yena aññataraṃ kulaṃ tenupasaṅkami. Tena kho pana samayena gharaṇī nivesanadvāre nisinnā hoti, gharasuṇhā āvasathadvāre nisinnā hoti. Atha kho āyasmā udāyī yena gharaṇī tenupasaṅkami; upasaṅkamitvā gharaṇiyā upakaṇṇake dhammaṃ desesi. Atha kho gharasuṇhāya etadahosi – ‘‘ki nu kho so samaṇo sassuyā jāro udāhu obhāsatī’’ti?

အထ ခော အာယသ္မာ ဥဒာယီ ဃရဏိယာ ဥပကဏ္ဏကေ ဓမ္မံ ဒေသေတ္ဝာ ယေန ဃရသုဏ္ဟာ တေနုပသင္ကမိ; ဥပသင္ကမိတ္ဝာ ဃရသုဏ္ဟာယ ဥပကဏ္ဏကေ ဓမ္မံ ဒေသေသိ။ အထ ခော ဃရဏိယာ ဧတဒဟောသိ – ‘‘ကိံ နု ခော သော သမဏော ဃရသုဏ္ဟာယ ဇာရော ဥဒာဟု ဩဘာသတီ’’တိ ? အထ ခော အာယသ္မာ ဥဒာယီ ဃရသုဏ္ဟာယ ဥပကဏ္ဏကေ ဓမ္မံ ဒေသေတ္ဝာ ပက္ကာမိ။ အထ ခော ဃရဏီ ဃရသုဏ္ဟံ ဧတဒဝောစ – ‘‘ဟေ ဇေ, ကိံ တေ ဧသော သမဏော အဝောစာ’’တိ? ‘‘ဓမ္မံ မေ, အယ္ယေ, ဒေသေသိ’’။ ‘‘အယ္ယာယ ပန ကိံ အဝောစာ’’တိ? ‘‘မယ္ဟမ္ပိ ဓမ္မံ ဒေသေသီ’’တိ။ တာ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ အယ္ယော ဥဒာယီ မာတုဂာမသ္သ ဥပကဏ္ဏကေ ဓမ္မံ ဒေသေသ္သတိ! နနု နာမ ဝိသ္သဋ္ဌေန ဝိဝဋေန ဓမ္မော ဒေသေတဗ္ဗော’’တိ?

Atha kho āyasmā udāyī gharaṇiyā upakaṇṇake dhammaṃ desetvā yena gharasuṇhā tenupasaṅkami; upasaṅkamitvā gharasuṇhāya upakaṇṇake dhammaṃ desesi. Atha kho gharaṇiyā etadahosi – ‘‘kiṃ nu kho so samaṇo gharasuṇhāya jāro udāhu obhāsatī’’ti ? Atha kho āyasmā udāyī gharasuṇhāya upakaṇṇake dhammaṃ desetvā pakkāmi. Atha kho gharaṇī gharasuṇhaṃ etadavoca – ‘‘he je, kiṃ te eso samaṇo avocā’’ti? ‘‘Dhammaṃ me, ayye, desesi’’. ‘‘Ayyāya pana kiṃ avocā’’ti? ‘‘Mayhampi dhammaṃ desesī’’ti. Tā ujjhāyanti khiyyanti vipācenti – ‘‘kathañhi nāma ayyo udāyī mātugāmassa upakaṇṇake dhammaṃ desessati! Nanu nāma vissaṭṭhena vivaṭena dhammo desetabbo’’ti?

အသ္သောသုံ ခော ဘိက္ခူ တာသံ ဣတ္ထီနံ ဥဇ္ဈာယန္တီနံ ခိယ္ယန္တီနံ ဝိပာစေန္တီနံ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ အာယသ္မာ ဥဒာယီ မာတုဂာမသ္သ ဓမ္မံ ဒေသေသ္သတီ’’တိ! အထ ခော တေ ဘိက္ခူ အာယသ္မန္တံ ဥဒာယိံ အနေကပရိယာယေန ဝိဂရဟိတ္ဝာ ဘဂဝတော ဧတမတ္ထံ အာရောစေသုံ။ပေ.။ ‘‘သစ္စံ ကိရ တ္ဝံ, ဥဒာယိ, မာတုဂာမသ္သ ဓမ္မံ ဒေသေသီ’’တိ? ‘‘သစ္စံ, ဘဂဝာ’’တိ။ ဝိဂရဟိ ဗုဒ္ဓော ဘဂဝာ။ပေ.။ ကထဉ္ဟိ နာမ တ္ဝံ, မောဃပုရိသ, မာတုဂာမသ္သ ဓမ္မံ ဒေသေသ္သသိ။ နေတံ မောဃပုရိသ, အပ္ပသန္နာနံ ဝာ ပသာဒာယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခာပဒံ ဥဒ္ဒိသေယ္ယာထ –

Assosuṃ kho bhikkhū tāsaṃ itthīnaṃ ujjhāyantīnaṃ khiyyantīnaṃ vipācentīnaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā udāyī mātugāmassa dhammaṃ desessatī’’ti! Atha kho te bhikkhū āyasmantaṃ udāyiṃ anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tvaṃ, udāyi, mātugāmassa dhammaṃ desesī’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tvaṃ, moghapurisa, mātugāmassa dhammaṃ desessasi. Netaṃ moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –

‘‘ယော ပန ဘိက္ခု မာတုဂာမသ္သ ဓမ္မံ ဒေသေယ္ယ ပာစိတ္တိယ’’န္တိ။

‘‘Yo pana bhikkhu mātugāmassa dhammaṃ deseyya pācittiya’’nti.

ဧဝဉ္စိဒံ ဘဂဝတာ ဘိက္ခူနံ သိက္ခာပဒံ ပညတ္တံ ဟောတိ။

Evañcidaṃ bhagavatā bhikkhūnaṃ sikkhāpadaṃ paññattaṃ hoti.

၆၁. တေန ခော ပန သမယေန ဥပာသိကာ ဘိက္ခူ ပသ္သိတ္ဝာ ဧတဒဝောစုံ – ‘‘ဣင္ဃာယ္ယာ ဓမ္မံ ဒေသေထာ’’တိ။ ‘‘န, ဘဂိနီ, ကပ္ပတိ မာတုဂာမသ္သ ဓမ္မံ ဒေသေတု’’န္တိ။ ‘‘ဣင္ဃာယ္ယာ ဆပ္ပဉ္စဝာစာဟိ ဓမ္မံ ဒေသေထ, သက္ကာ ဧတ္တကေနပိ ဓမ္မော အညာတု’’န္တိ။ ‘‘န, ဘဂိနီ, ကပ္ပတိ မာတုဂာမသ္သ ဓမ္မံ ဒေသေတု’’န္တိ။ ကုက္ကုစ္စာယန္တာ န ဒေသေသုံ။ ဥပာသိကာ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ အယ္ယာ အမ္ဟေဟိ ယာစိယမာနာ ဓမ္မံ န ဒေသေသ္သန္တီ’’တိ! အသ္သောသုံ ခော ဘိက္ခူ တာသံ ဥပာသိကာနံ ဥဇ္ဈာယန္တီနံ ခိယ္ယန္တီနံ ဝိပာစေန္တီနံ။ အထ ခော တေ ဘိက္ခူ ဘဂဝတော ဧတမတ္ထံ အာရောစေသုံ။ အထ ခော ဘဂဝာ ဧတသ္မိံ နိဒာနေ ဧတသ္မိံ ပကရဏေ ဓမ္မိံ ကထံ ကတ္ဝာ ဘိက္ခူ အာမန္တေသိ – ‘‘အနုဇာနာမိ, ဘိက္ခဝေ, မာတုဂာမသ္သ ဆပ္ပဉ္စဝာစာဟိ ဓမ္မံ ဒေသေတုံ။ ဧဝဉ္စ ပန, ဘိက္ခဝေ, ဣမံ သိက္ခာပဒံ ဥဒ္ဒိသေယ္ယာထ –

61. Tena kho pana samayena upāsikā bhikkhū passitvā etadavocuṃ – ‘‘iṅghāyyā dhammaṃ desethā’’ti. ‘‘Na, bhaginī, kappati mātugāmassa dhammaṃ desetu’’nti. ‘‘Iṅghāyyā chappañcavācāhi dhammaṃ desetha, sakkā ettakenapi dhammo aññātu’’nti. ‘‘Na, bhaginī, kappati mātugāmassa dhammaṃ desetu’’nti. Kukkuccāyantā na desesuṃ. Upāsikā ujjhāyanti khiyyanti vipācenti – ‘‘kathañhi nāma ayyā amhehi yāciyamānā dhammaṃ na desessantī’’ti! Assosuṃ kho bhikkhū tāsaṃ upāsikānaṃ ujjhāyantīnaṃ khiyyantīnaṃ vipācentīnaṃ. Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, mātugāmassa chappañcavācāhi dhammaṃ desetuṃ. Evañca pana, bhikkhave, imaṃ sikkhāpadaṃ uddiseyyātha –

‘‘ယော ပန ဘိက္ခူ မာတုဂာမသ္သ ဥတ္တရိဆပ္ပဉ္စဝာစာဟိ ဓမ္မံ ဒေသေယ္ယ, ပာစိတ္တိယ’’န္တိ။

‘‘Yo pana bhikkhū mātugāmassa uttarichappañcavācāhi dhammaṃ deseyya, pācittiya’’nti.

ဧဝဉ္စိဒံ ဘဂဝတာ ဘိက္ခူနံ သိက္ခာပဒံ ပညတ္တံ ဟောတိ။

Evañcidaṃ bhagavatā bhikkhūnaṃ sikkhāpadaṃ paññattaṃ hoti.

၆၂. တေန ခော ပန သမယေန ဆဗ္ဗဂ္ဂိယာ ဘိက္ခူ – ‘‘ဘဂဝတာ အနုညာတံ မာတုဂာမသ္သ ဆပ္ပဉ္စဝာစာဟိ ဓမ္မံ ဒေသေတု’’န္တိ တေ အဝိညုံ ပုရိသဝိဂ္ဂဟံ ဥပနိသီဒာပေတ္ဝာ မာတုဂာမသ္သ ဥတ္တရိဆပ္ပဉ္စဝာစာဟိ ဓမ္မံ ဒေသေန္တိ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ ဆဗ္ဗဂ္ဂိယာ ဘိက္ခူ အဝိညုံ ပုရိသဝိဂ္ဂဟံ ဥပနိသီဒာပေတ္ဝာ မာတုဂာမသ္သ ဥတ္တရိဆပ္ပဉ္စဝာစာဟိ ဓမ္မံ ဒေသေသ္သန္တီ’’တိ!

62. Tena kho pana samayena chabbaggiyā bhikkhū – ‘‘bhagavatā anuññātaṃ mātugāmassa chappañcavācāhi dhammaṃ desetu’’nti te aviññuṃ purisaviggahaṃ upanisīdāpetvā mātugāmassa uttarichappañcavācāhi dhammaṃ desenti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū aviññuṃ purisaviggahaṃ upanisīdāpetvā mātugāmassa uttarichappañcavācāhi dhammaṃ desessantī’’ti!

အထ ခော တေ ဘိက္ခူ ဆဗ္ဗဂ္ဂိယေ ဘိက္ခူ အနေကပရိယာယေန ဝိဂရဟိတ္ဝာ ဘဂဝတော ဧတမတ္ထံ အာရောစေသုံ။ပေ.။ ‘‘သစ္စံ ကိရ တုမ္ဟေ, ဘိက္ခဝေ, အဝိညုံ ပုရိသဝိဂ္ဂဟံ ဥပနိသီဒာပေတ္ဝာ မာတုဂာမသ္သ ဥတ္တရိဆပ္ပဉ္စဝာစာဟိ ဓမ္မံ ဒေသေထာ’’တိ? ‘‘သစ္စံ, ဘဂဝာ’’တိ။ ဝိဂရဟိ ဗုဒ္ဓော ဘဂဝာ။ပေ.။ ကထဉ္ဟိ နာမ တုမ္ဟေ, မောဃပုရိသာ, အဝိညုံ ပုရိသဝိဂ္ဂဟံ ဥပနိသီဒာပေတ္ဝာ မာတုဂာမသ္သ ဥတ္တရိဆပ္ပဉ္စဝာစာဟိ ဓမ္မံ ဒေသေသ္သထ! နေတံ, မောဃပုရိသာ, အပ္ပသန္နာနံ ဝာ ပသာဒာယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခာပဒံ ဥဒ္ဒိသေယ္ယာထ –

Atha kho te bhikkhū chabbaggiye bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tumhe, bhikkhave, aviññuṃ purisaviggahaṃ upanisīdāpetvā mātugāmassa uttarichappañcavācāhi dhammaṃ desethā’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, aviññuṃ purisaviggahaṃ upanisīdāpetvā mātugāmassa uttarichappañcavācāhi dhammaṃ desessatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –

၆၃. ‘‘ယော ပန ဘိက္ခု မာတုဂာမသ္သ ဥတ္တရိဆပ္ပဉ္စဝာစာဟိ ဓမ္မံ ဒေသေယ္ယ, အညတ္ရ ဝိညုနာ ပုရိသဝိဂ္ဂဟေန, ပာစိတ္တိယ’’န္တိ။

63.‘‘Yo pana bhikkhu mātugāmassa uttarichappañcavācāhi dhammaṃ deseyya, aññatra viññunā purisaviggahena, pācittiya’’nti.

၆၄. ယော ပနာတိ ယော ယာဒိသော။ပေ.။ ဘိက္ခူတိ။ပေ.။ အယံ ဣမသ္မိံ အတ္ထေ အဓိပ္ပေတော ဘိက္ခူတိ။

64.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.

မာတုဂာမော နာမ မနုသ္သိတ္ထီ; န ယက္ခီ န ပေတီ န တိရစ္ဆာနဂတာ; ဝိညူ, ပဋိဗလာ သုဘာသိတဒုဗ္ဘာသိတံ ဒုဋ္ဌုလ္လာဒုဋ္ဌုလ္လံ အာဇာနိတုံ။

Mātugāmo nāma manussitthī; na yakkhī na petī na tiracchānagatā; viññū, paṭibalā subhāsitadubbhāsitaṃ duṭṭhullāduṭṭhullaṃ ājānituṃ.

ဥတ္တရိဆပ္ပဉ္စဝာစာဟီတိ အတိရေကဆပ္ပဉ္စဝာစာဟိ။

Uttarichappañcavācāhīti atirekachappañcavācāhi.

Dhammo nāma buddhabhāsito, sāvakabhāsito, isibhāsito, devatābhāsito, atthūpasañhito, dhammūpasañhito.

ဒေသေယ္ယာတိ ပဒေန ဒေသေတိ, ပဒေ ပဒေ အာပတ္တိ ပာစိတ္တိယသ္သ။ အက္ခရာယ ဒေသေတိ, အက္ခရက္ခရာယ အာပတ္တိ ပာစိတ္တိယသ္သ။

Deseyyāti padena deseti, pade pade āpatti pācittiyassa. Akkharāya deseti, akkharakkharāya āpatti pācittiyassa.

အညတ္ရ ဝိညုနာ ပုရိသဝိဂ္ဂဟေနာတိ ဌပေတ္ဝာ ဝိညုံ ပုရိသဝိဂ္ဂဟံ။ ဝိညူ နာမ ပုရိသဝိဂ္ဂဟော, ပဋိဗလော ဟောတိ သုဘာသိတဒုဗ္ဘာသိတံ ဒုဋ္ဌုလ္လာဒုဋ္ဌုလ္လံ အာဇာနိတုံ။

Aññatra viññunā purisaviggahenāti ṭhapetvā viññuṃ purisaviggahaṃ. Viññū nāma purisaviggaho, paṭibalo hoti subhāsitadubbhāsitaṃ duṭṭhullāduṭṭhullaṃ ājānituṃ.

၆၅. မာတုဂာမေ မာတုဂာမသညီ ဥတ္တရိဆပ္ပဉ္စဝာစာဟိ ဓမ္မံ ဒေသေတိ, အညတ္ရ ဝိညုနာ ပုရိသဝိဂ္ဂဟေန, အာပတ္တိ ပာစိတ္တိယသ္သ။ မာတုဂာမေ ဝေမတိကော ဥတ္တရိဆပ္ပဉ္စဝာစာဟိ ဓမ္မံ ဒေသေတိ, အညတ္ရ ဝိညုနာ ပုရိသဝိဂ္ဂဟေန, အာပတ္တိ ပာစိတ္တိယသ္သ။ မာတုဂာမေ အမာတုဂာမသညီ ဥတ္တရိဆပ္ပဉ္စဝာစာဟိ ဓမ္မံ ဒေသေတိ, အညတ္ရ ဝိညုနာ ပုရိသဝိဂ္ဂဟေန, အာပတ္တိ ပာစိတ္တိယသ္သ။

65. Mātugāme mātugāmasaññī uttarichappañcavācāhi dhammaṃ deseti, aññatra viññunā purisaviggahena, āpatti pācittiyassa. Mātugāme vematiko uttarichappañcavācāhi dhammaṃ deseti, aññatra viññunā purisaviggahena, āpatti pācittiyassa. Mātugāme amātugāmasaññī uttarichappañcavācāhi dhammaṃ deseti, aññatra viññunā purisaviggahena, āpatti pācittiyassa.

ယက္ခိယာ ဝာ ပေတိယာ ဝာ ပဏ္ဍကသ္သ ဝာ တိရစ္ဆာနဂတမနုသ္သဝိဂ္ဂဟိတ္ထိယာ ဝာ ဥတ္တရိဆပ္ပဉ္စဝာစာဟိ ဓမ္မံ ဒေသေတိ, အညတ္ရ ဝိညုနာ ပုရိသဝိဂ္ဂဟေန, အာပတ္တိ ဒုက္ကဋသ္သ။ အမာတုဂာမေ မာတုဂာမသညီ, အာပတ္တိ ဒုက္ကဋသ္သ။ အမာတုဂာမေ ဝေမတိကော, အာပတ္တိ ဒုက္ကဋသ္သ။ အမာတုဂာမေ အမာတုဂာမသညီ, အနာပတ္တိ။

Yakkhiyā vā petiyā vā paṇḍakassa vā tiracchānagatamanussaviggahitthiyā vā uttarichappañcavācāhi dhammaṃ deseti, aññatra viññunā purisaviggahena, āpatti dukkaṭassa. Amātugāme mātugāmasaññī, āpatti dukkaṭassa. Amātugāme vematiko, āpatti dukkaṭassa. Amātugāme amātugāmasaññī, anāpatti.

၆၆. အနာပတ္တိ ဝိညုနာ ပုရိသဝိဂ္ဂဟေန, ဆပ္ပဉ္စဝာစာဟိ ဓမ္မံ ဒေသေတိ, ဦနကဆပ္ပဉ္စဝာစာဟိ ဓမ္မံ ဒေသေတိ, ဥဋ္ဌဟိတ္ဝာ ပုန နိသီဒိတ္ဝာ ဒေသေတိ, မာတုဂာမော ဥဋ္ဌဟိတ္ဝာ ပုန နိသီဒတိ တသ္မိံ ဒေသေတိ, အညသ္သ မာတုဂာမသ္သ ဒေသေတိ, ပဉ္ဟံ ပုစ္ဆတိ, ပဉ္ဟံ ပုဋ္ဌော ကထေတိ, အညသ္သတ္ထာယ ဘဏန္တံ မာတုဂာမော သုဏာတိ, ဥမ္မတ္တကသ္သ, အာဒိကမ္မိကသ္သာတိ။

66. Anāpatti viññunā purisaviggahena, chappañcavācāhi dhammaṃ deseti, ūnakachappañcavācāhi dhammaṃ deseti, uṭṭhahitvā puna nisīditvā deseti, mātugāmo uṭṭhahitvā puna nisīdati tasmiṃ deseti, aññassa mātugāmassa deseti, pañhaṃ pucchati, pañhaṃ puṭṭho katheti, aññassatthāya bhaṇantaṃ mātugāmo suṇāti, ummattakassa, ādikammikassāti.

ဓမ္မဒေသနာသိက္ခာပဒံ နိဋ္ဌိတံ သတ္တမံ။

Dhammadesanāsikkhāpadaṃ niṭṭhitaṃ sattamaṃ.

၈. ဘူတာရောစနသိက္ခာပဒံ

8. Bhūtārocanasikkhāpadaṃ

၆၇. ²⁷ တေန သမယေန ဗုဒ္ဓော ဘဂဝာ ဝေသာလိယံ ဝိဟရတိ မဟာဝနေ ကူဋာဂာရသာလာယံ။ တေန ခော ပန သမယေန သမ္ဗဟုလာ သန္ဒိဋ္ဌာ သမ္ဘတ္တာ ဘိက္ခူ ဝဂ္ဂုမုဒာယ နဒိယာ တီရေ ဝသ္သံ ဥပဂစ္ဆိံသု။ တေန ခော ပန သမယေန ဝဇ္ဇီ ဒုဗ္ဘိက္ခာ ဟောတိ – ဒ္ဝီဟိတိကာ သေတဋ္ဌိကာ သလာကာဝုတ္တာ, န သုကရာ ဥဉ္ဆေန ပဂ္ဂဟေန ယာပေတုံ။ အထ ခော တေသံ ဘိက္ခူနံ ဧတဒဟောသိ – ‘‘ဧတရဟိ ခော ဝဇ္ဇီ ဒုဗ္ဘိက္ခာ – ဒ္ဝီဟိတိကာ သေတဋ္ဌိကာ သလာကာဝုတ္တာ, န သုကရာ ဥဉ္ဆေန ပဂ္ဂဟေန ယာပေတုံ။ ကေန နု ခော မယံ ဥပာယေန သမဂ္ဂာ သမ္မောဒမာနာ အဝိဝဒမာနာ ဖာသုကံ ဝသ္သံ ဝသေယ္ယာမ, န စ ပိဏ္ဍကေန ကိလမေယ္ယာမာ’’တိ? ဧကစ္စေ ဧဝမာဟံသု – ‘‘ဟန္ဒ မယံ, အာဝုသော, ဂိဟီနံ ကမ္မန္တံ အဓိဋ္ဌေမ။ ဧဝံ တေ အမ္ဟာကံ ဒာတုံ မညိသ္သန္တိ။ ဧဝံ မယံ သမဂ္ဂာ သမ္မောဒမာနာ အဝိဝဒမာနာ ဖာသုကံ ဝသ္သံ ဝသိသ္သာမ, န စ ပိဏ္ဍကေန ကိလမိသ္သာမာ’’တိ။ ဧကစ္စေ ဧဝမာဟံသု – ‘‘အလံ, အာဝုသော, ကိံ ဂိဟီနံ ကမ္မန္တံ အဓိဋ္ဌိတေန? ဟန္ဒ မယံ, အာဝုသော, ဂိဟီနံ ဒူတေယ္ယံ ဟရာမ။ ဧဝံ တေ အမ္ဟာကံ ဒာတုံ မညိသ္သန္တိ။ ဧဝံ မယံ သမဂ္ဂာ သမ္မောဒမာနာ အဝိဝဒမာနာ ဖာသုကံ ဝသ္သံ ဝသိသ္သာမ, န စ ပိဏ္ဍကေန ကိလမိသ္သာမာ’’တိ။ ဧကစ္စေ ဧဝမာဟံသု – ‘‘အလံ, အာဝုသော; ကိံ ဂိဟီနံ ကမ္မန္တံ အဓိဋ္ဌိတေန! ကိံ ဂိဟီနံ ဒူတေယ္ယံ ဟဋေန! ဟန္ဒ မယံ, အာဝုသော, ဂိဟီနံ အညမညသ္သ ဥတ္တရိမနုသ္သဓမ္မသ္သ ဝဏ္ဏံ ဘာသိသ္သာမ – ‘အသုကော ဘိက္ခု ပဌမသ္သ ဈာနသ္သ လာဘီ, အသုကော ဘိက္ခု ဒုတိယသ္သ ဈာနသ္သ လာဘီ, အသုကော ဘိက္ခု တတိယသ္သ ဈာနသ္သ လာဘီ, အသုကော ဘိက္ခု စတုတ္ထသ္သ ဈာနသ္သ လာဘီ, အသုကော ဘိက္ခု သောတာပန္နော, အသုကော ဘိက္ခု သကဒာဂာမီ, အသုကော ဘိက္ခု အနာဂာမီ, အသုကော ဘိက္ခု အရဟာ, အသုကော ဘိက္ခု တေဝိဇ္ဇော, အသုကော ဘိက္ခု ဆဠဘိညောတိ။ ဧဝံ တေ အမ္ဟာကံ ဒာတုံ မညိသ္သန္တိ။ ဧဝံ မယံ သမဂ္ဂာ သမ္မောဒမာနာ အဝိဝဒမာနာ ဖာသုကံ ဝသ္သံ ဝသိသ္သာမ, န စ ပိဏ္ဍကေန ကိလမိသ္သာမာ’’တိ။ ဧသော ယေဝ ခော, အာဝုသော, သေယ္ယော, ယော အမ္ဟာကံ ဂိဟီနံ အညမညသ္သ ဥတ္တရိမနုသ္သဓမ္မသ္သ ဝဏ္ဏော ဘာသိတော’’တိ။

67.²⁸ Tena samayena buddho bhagavā vesāliyaṃ viharati mahāvane kūṭāgārasālāyaṃ. Tena kho pana samayena sambahulā sandiṭṭhā sambhattā bhikkhū vaggumudāya nadiyā tīre vassaṃ upagacchiṃsu. Tena kho pana samayena vajjī dubbhikkhā hoti – dvīhitikā setaṭṭhikā salākāvuttā, na sukarā uñchena paggahena yāpetuṃ. Atha kho tesaṃ bhikkhūnaṃ etadahosi – ‘‘etarahi kho vajjī dubbhikkhā – dvīhitikā setaṭṭhikā salākāvuttā, na sukarā uñchena paggahena yāpetuṃ. Kena nu kho mayaṃ upāyena samaggā sammodamānā avivadamānā phāsukaṃ vassaṃ vaseyyāma, na ca piṇḍakena kilameyyāmā’’ti? Ekacce evamāhaṃsu – ‘‘handa mayaṃ, āvuso, gihīnaṃ kammantaṃ adhiṭṭhema. Evaṃ te amhākaṃ dātuṃ maññissanti. Evaṃ mayaṃ samaggā sammodamānā avivadamānā phāsukaṃ vassaṃ vasissāma, na ca piṇḍakena kilamissāmā’’ti. Ekacce evamāhaṃsu – ‘‘alaṃ, āvuso, kiṃ gihīnaṃ kammantaṃ adhiṭṭhitena? Handa mayaṃ, āvuso, gihīnaṃ dūteyyaṃ harāma. Evaṃ te amhākaṃ dātuṃ maññissanti. Evaṃ mayaṃ samaggā sammodamānā avivadamānā phāsukaṃ vassaṃ vasissāma, na ca piṇḍakena kilamissāmā’’ti. Ekacce evamāhaṃsu – ‘‘alaṃ, āvuso; kiṃ gihīnaṃ kammantaṃ adhiṭṭhitena! Kiṃ gihīnaṃ dūteyyaṃ haṭena! Handa mayaṃ, āvuso, gihīnaṃ aññamaññassa uttarimanussadhammassa vaṇṇaṃ bhāsissāma – ‘asuko bhikkhu paṭhamassa jhānassa lābhī, asuko bhikkhu dutiyassa jhānassa lābhī, asuko bhikkhu tatiyassa jhānassa lābhī, asuko bhikkhu catutthassa jhānassa lābhī, asuko bhikkhu sotāpanno, asuko bhikkhu sakadāgāmī, asuko bhikkhu anāgāmī, asuko bhikkhu arahā, asuko bhikkhu tevijjo, asuko bhikkhu chaḷabhiññoti. Evaṃ te amhākaṃ dātuṃ maññissanti. Evaṃ mayaṃ samaggā sammodamānā avivadamānā phāsukaṃ vassaṃ vasissāma, na ca piṇḍakena kilamissāmā’’ti. Eso yeva kho, āvuso, seyyo, yo amhākaṃ gihīnaṃ aññamaññassa uttarimanussadhammassa vaṇṇo bhāsito’’ti.

အထ ခော တေ ဘိက္ခူ ဂိဟီနံ အညမညသ္သ ဥတ္တရိမနုသ္သဓမ္မသ္သ ဝဏ္ဏံ ဘာသိံသု – ‘‘အသုကော ဘိက္ခု ပဌမသ္သ ဈာနသ္သ လာဘီ။ပေ.။ အသုကော ဘိက္ခု ဆဠဘိညော’’တိ။ အထ ခော တေ မနုသ္သာ – ‘‘လာဘာ ဝတ နော, သုလဒ္ဓံ ဝတ နော, ယေသံ နော ဧဝရူပာ ဘိက္ခူ ဝသ္သံ ဥပဂတာ, န ဝတ နော ဣတော ပုဗ္ဗေ ဧဝရူပာ ဘိက္ခူ ဝသ္သံ ဥပဂတာ, ယထယိမေ ဘိက္ခူ သီလဝန္တော ကလ္ယာဏဓမ္မာ’’တိ။ တေ န တာဒိသာနိ ဘောဇနာနိ အတ္တနာ ဘုဉ္ဇန္တိ, မာတာပိတူနံ ဒေန္တိ ပုတ္တဒာရသ္သ ဒေန္တိ ဒာသကမ္မကရပောရိသသ္သ ဒေန္တိ မိတ္တာမစ္စာနံ ဒေန္တိ ဉာတိသာလောဟိတာနံ ဒေန္တိ ယာဒိသာနိ ဘိက္ခူနံ ဒေန္တိ။ န တာဒိသာနိ ခာဒနီယာနိ သာယနီယာနိ ပာနာနိ အတ္တနာ ခာဒန္တိ သာယန္တိ ပိဝန္တိ ²⁹ မာတာပိတူနံ ဒေန္တိ ပုတ္တဒာရသ္သ ဒေန္တိ ဒာသကမ္မကရပောရိသသ္သ ဒေန္တိ မိတ္တာမစ္စာနံ ဒေန္တိ ဉာတိသာလောဟိတာနံ ဒေန္တိ , ယာဒိသာနိ ဘိက္ခူနံ ဒေန္တိ။ အထ ခော တေ ဘိက္ခူ ဝဏ္ဏဝာ အဟေသုံ ပီဏိန္ဒ္ရိယာ ပသန္နမုခဝဏ္ဏာ ဝိပ္ပသန္နဆဝိဝဏ္ဏာ။

Atha kho te bhikkhū gihīnaṃ aññamaññassa uttarimanussadhammassa vaṇṇaṃ bhāsiṃsu – ‘‘asuko bhikkhu paṭhamassa jhānassa lābhī…pe… asuko bhikkhu chaḷabhiñño’’ti. Atha kho te manussā – ‘‘lābhā vata no, suladdhaṃ vata no, yesaṃ no evarūpā bhikkhū vassaṃ upagatā, na vata no ito pubbe evarūpā bhikkhū vassaṃ upagatā, yathayime bhikkhū sīlavanto kalyāṇadhammā’’ti. Te na tādisāni bhojanāni attanā bhuñjanti, mātāpitūnaṃ denti puttadārassa denti dāsakammakaraporisassa denti mittāmaccānaṃ denti ñātisālohitānaṃ denti yādisāni bhikkhūnaṃ denti. Na tādisāni khādanīyāni sāyanīyāni pānāni attanā khādanti sāyanti pivanti ³⁰ mātāpitūnaṃ denti puttadārassa denti dāsakammakaraporisassa denti mittāmaccānaṃ denti ñātisālohitānaṃ denti , yādisāni bhikkhūnaṃ denti. Atha kho te bhikkhū vaṇṇavā ahesuṃ pīṇindriyā pasannamukhavaṇṇā vippasannachavivaṇṇā.

၆၈. အာစိဏ္ဏံ ခော ပနေတံ ဝသ္သံဝုဋ္ဌာနံ ဘိက္ခူနံ ဘဂဝန္တံ ဒသ္သနာယ ဥပသင္ကမိတုံ။ အထ ခော တေ ဘိက္ခူ ဝသ္သံဝုဋ္ဌာ တေမာသစ္စယေန သေနာသနံ သံသာမေတ္ဝာ ပတ္တစီဝရမာဒာယ ယေန ဝေသာလီ တေန ပက္ကမိံသု။ အနုပုဗ္ဗေန ယေန ဝေသာလီ မဟာဝနံ ကူဋာဂာရသာလာ ယေန ဘဂဝာ တေနုပသင္ကမိံသု; ဥပသင္ကမိတ္ဝာ ဘဂဝန္တံ အဘိဝာဒေတ္ဝာ ဧကမန္တံ နိသီဒိံသု။ တေန ခော ပန သမယေန ဒိသာသု ဝသ္သံဝုဋ္ဌာ ဘိက္ခူ ကိသာ ဟောန္တိ လူခာ ဒုဗ္ဗဏ္ဏာ ဥပ္ပဏ္ဍုပ္ပဏ္ဍုကဇာတာ ဓမနိသန္ထတဂတ္တာ။ ဝဂ္ဂုမုဒာတီရိယာ ပန ဘိက္ခူ ဝဏ္ဏဝာ ဟောန္တိ ပီဏိန္ဒ္ရိယာ ပသန္နမုခဝဏ္ဏာ ဝိပ္ပသန္နဆဝိဝဏ္ဏာ။ အာစိဏ္ဏံ ခော ပနေတံ ဗုဒ္ဓာနံ ဘဂဝန္တာနံ အာဂန္တုကေဟိ ဘိက္ခူဟိ သဒ္ဓိံ ပဋိသမ္မောဒိတုံ။ အထ ခော ဘဂဝာ ဝဂ္ဂုမုဒာတီရိယေ ဘိက္ခူ ဧတဒဝောစ – ‘‘ကစ္စိ, ဘိက္ခဝေ, ခမနီယံ, ကစ္စိ ယာပနီယံ, ကစ္စိ သမဂ္ဂာ သမ္မောဒမာနာ အဝိဝဒမာနာ ဖာသုကံ ဝသ္သံ ဝသိတ္ထ, န စ ပိဏ္ဍကေန ကိလမိတ္ထာ’’တိ? ‘‘ခမနီယံ ဘဂဝာ, ယာပနီယံ ဘဂဝာ။ သမဂ္ဂာ စ မယံ, ဘန္တေ, သမ္မောဒမာနာ အဝိဝဒမာနာ ဖာသုကံ ဝသ္သံ ဝသိမ္ဟာ, န စ ပိဏ္ဍကေန ကိလမိမ္ဟာ’’တိ။ ဇာနန္တာပိ တထာဂတာ ပုစ္ဆန္တိ, ဇာနန္တာပိ န ပုစ္ဆန္တိ။ ကာလံ ဝိဒိတ္ဝာ ပုစ္ဆန္တိ , ကာလံ ဝိဒိတ္ဝာ န ပုစ္ဆန္တိ။ အတ္ထသဉ္ဟိတံ တထာဂတာ ပုစ္ဆန္တိ, နော အနတ္ထသဉ္ဟိတံ။ အနတ္ထသဉ္ဟိတေ သေတုဃာတော တထာဂတာနံ။ ဒ္ဝီဟာကာရေဟိ ဗုဒ္ဓာ ဘဂဝန္တော ဘိက္ခူ ပဋိပုစ္ဆန္တိ – ဓမ္မံ ဝာ ဒေသေသ္သာမ, သာဝကာနံ ဝာ သိက္ခာပဒံ ပညပေသ္သာမာတိ။

68. Āciṇṇaṃ kho panetaṃ vassaṃvuṭṭhānaṃ bhikkhūnaṃ bhagavantaṃ dassanāya upasaṅkamituṃ. Atha kho te bhikkhū vassaṃvuṭṭhā temāsaccayena senāsanaṃ saṃsāmetvā pattacīvaramādāya yena vesālī tena pakkamiṃsu. Anupubbena yena vesālī mahāvanaṃ kūṭāgārasālā yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Tena kho pana samayena disāsu vassaṃvuṭṭhā bhikkhū kisā honti lūkhā dubbaṇṇā uppaṇḍuppaṇḍukajātā dhamanisanthatagattā. Vaggumudātīriyā pana bhikkhū vaṇṇavā honti pīṇindriyā pasannamukhavaṇṇā vippasannachavivaṇṇā. Āciṇṇaṃ kho panetaṃ buddhānaṃ bhagavantānaṃ āgantukehi bhikkhūhi saddhiṃ paṭisammodituṃ. Atha kho bhagavā vaggumudātīriye bhikkhū etadavoca – ‘‘kacci, bhikkhave, khamanīyaṃ, kacci yāpanīyaṃ, kacci samaggā sammodamānā avivadamānā phāsukaṃ vassaṃ vasittha, na ca piṇḍakena kilamitthā’’ti? ‘‘Khamanīyaṃ bhagavā, yāpanīyaṃ bhagavā. Samaggā ca mayaṃ, bhante, sammodamānā avivadamānā phāsukaṃ vassaṃ vasimhā, na ca piṇḍakena kilamimhā’’ti. Jānantāpi tathāgatā pucchanti, jānantāpi na pucchanti. Kālaṃ viditvā pucchanti , kālaṃ viditvā na pucchanti. Atthasañhitaṃ tathāgatā pucchanti, no anatthasañhitaṃ. Anatthasañhite setughāto tathāgatānaṃ. Dvīhākārehi buddhā bhagavanto bhikkhū paṭipucchanti – dhammaṃ vā desessāma, sāvakānaṃ vā sikkhāpadaṃ paññapessāmāti.

အထ ခော ဘဂဝာ ဝဂ္ဂုမုဒာတီရိယေ ဘိက္ခူ ဧတဒဝောစ – ‘‘ယထာ ကထံ ပန တုမ္ဟေ, ဘိက္ခဝေ, သမဂ္ဂာ သမ္မောဒမာနာ အဝိဝဒမာနာ ဖာသုကံ ဝသ္သံ ဝသိတ္ထ, န စ ပိဏ္ဍကေန ကိလမိတ္ထာ’’တိ? အထ ခော တေ ဘိက္ခူ ဘဂဝတော ဧတမတ္ထံ အာရောစေသုံ။ ‘‘ကစ္စိ ပန ဝော, ဘိက္ခဝေ, ဘူတ’’န္တိ? ‘‘ဘူတံ, ဘဂဝာ’’တိ။ ဝိဂရဟိ ဗုဒ္ဓော ဘဂဝာ။ပေ.။ ကထဉ္ဟိ နာမ တုမ္ဟေ, ဘိက္ခဝေ, ဥဒရသ္သ ကာရဏာ ဂိဟီနံ အညမညသ္သ ဥတ္တရိမနုသ္သဓမ္မသ္သ ဝဏ္ဏံ ဘာသိသ္သထ! နေတံ, ဘိက္ခဝေ, အပ္ပသန္နာနံ ဝာ ပသာဒာယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခာပဒံ ဥဒ္ဒိသေယ္ယာထ –

Atha kho bhagavā vaggumudātīriye bhikkhū etadavoca – ‘‘yathā kathaṃ pana tumhe, bhikkhave, samaggā sammodamānā avivadamānā phāsukaṃ vassaṃ vasittha, na ca piṇḍakena kilamitthā’’ti? Atha kho te bhikkhū bhagavato etamatthaṃ ārocesuṃ. ‘‘Kacci pana vo, bhikkhave, bhūta’’nti? ‘‘Bhūtaṃ, bhagavā’’ti. Vigarahi buddho bhagavā…pe… kathañhi nāma tumhe, bhikkhave, udarassa kāraṇā gihīnaṃ aññamaññassa uttarimanussadhammassa vaṇṇaṃ bhāsissatha! Netaṃ, bhikkhave, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –

၆၉. ‘‘ယော ပန ဘိက္ခု အနုပသမ္ပန္နသ္သ ဥတ္တရိမနုသ္သဓမ္မံ အာရောစေယ္ယ ဘူတသ္မိံ, ပာစိတ္တိယ’’န္တိ။

69.‘‘Yo pana bhikkhu anupasampannassa uttarimanussadhammaṃ āroceyya bhūtasmiṃ, pācittiya’’nti.

၇၀. ယော ပနာတိ ယော ယာဒိသော။ပေ.။ ဘိက္ခူတိ။ပေ.။ အယံ ဣမသ္မိံ အတ္ထေ အဓိပ္ပေတော ဘိက္ခူတိ။

70.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.

အနုပသမ္ပန္နော နာမ ဘိက္ခုဉ္စ ဘိက္ခုနိဉ္စ ဌပေတ္ဝာ, အဝသေသော အနုပသမ္ပန္နော နာမ။

Anupasampanno nāma bhikkhuñca bhikkhuniñca ṭhapetvā, avaseso anupasampanno nāma.

³¹ ဥတ္တရိမနုသ္သဓမ္မော နာမ ဈာနံ, ဝိမောက္ခော, သမာဓိ, သမာပတ္တိ, ဉာဏဒသ္သနံ, မဂ္ဂဘာဝနာ, ဖလသစ္ဆိကိရိယာ, ကိလေသပ္ပဟာနံ, ဝိနီဝရဏတာ စိတ္တသ္သ, သုညာဂာရေ အဘိရတိ။

³²Uttarimanussadhammo nāma jhānaṃ, vimokkho, samādhi, samāpatti, ñāṇadassanaṃ, maggabhāvanā, phalasacchikiriyā, kilesappahānaṃ, vinīvaraṇatā cittassa, suññāgāre abhirati.

³³ ဈာနန္တိ ပဌမံ ဈာနံ, ဒုတိယံ ဈာနံ, တတိယံ ဈာနံ, စတုတ္ထံ ဈာနံ။

³⁴Jhānanti paṭhamaṃ jhānaṃ, dutiyaṃ jhānaṃ, tatiyaṃ jhānaṃ, catutthaṃ jhānaṃ.

³⁵ ဝိမောက္ခောတိ သုညတော ဝိမောက္ခော, အနိမိတ္တော ဝိမောက္ခော, အပ္ပဏိဟိတော ဝိမောက္ခော။

³⁶Vimokkhoti suññato vimokkho, animitto vimokkho, appaṇihito vimokkho.

³⁷ သမာဓီတိ သုညတော သမာဓိ, အနိမိတ္တော သမာဓိ, အပ္ပဏိဟိတော သမာဓိ။

³⁸Samādhīti suññato samādhi, animitto samādhi, appaṇihito samādhi.

³⁹ သမာပတ္တီတိ သုညတာ သမာပတ္တိ, အနိမိတ္တာ သမာပတ္တိ, အပ္ပဏိဟိတာ သမာပတ္တိ။

⁴⁰Samāpattīti suññatā samāpatti, animittā samāpatti, appaṇihitā samāpatti.

⁴¹ ဉာဏဒသ္သနန္တိ တိသ္သော ဝိဇ္ဇာ။

⁴²Ñāṇadassananti tisso vijjā.

⁴³ မဂ္ဂဘာဝနာတိ စတ္တာရော သတိပဋ္ဌာနာ, စတ္တာရော သမ္မပ္ပဓာနာ, စတ္တာရော ဣဒ္ဓိပာဒာ, ပဉ္စိန္ဒ္ရိယာနိ, ပဉ္စ ဗလာနိ, သတ္တ ဗောဇ္ဈင္ဂာ, အရိယော အဋ္ဌင္ဂိကော မဂ္ဂော။

⁴⁴Maggabhāvanāti cattāro satipaṭṭhānā, cattāro sammappadhānā, cattāro iddhipādā, pañcindriyāni, pañca balāni, satta bojjhaṅgā, ariyo aṭṭhaṅgiko maggo.

⁴⁵ ဖလသစ္ဆိကိရိယာတိ သောတာပတ္တိဖလသ္သ သစ္ဆိကိရိယာ, သကဒာဂာမိဖလသ္သ သစ္ဆိကိရိယာ, အနာဂာမိဖလသ္သ သစ္ဆိကိရိယာ, အရဟတ္တသ္သ ⁴⁶ သစ္ဆိကိရိယာ။

⁴⁷Phalasacchikiriyāti sotāpattiphalassa sacchikiriyā, sakadāgāmiphalassa sacchikiriyā, anāgāmiphalassa sacchikiriyā, arahattassa ⁴⁸ sacchikiriyā.

⁴⁹ ကိလေသပ္ပဟာနန္တိ ရာဂသ္သ ပဟာနံ, ဒောသသ္သ ပဟာနံ, မောဟသ္သ ပဟာနံ။

⁵⁰Kilesappahānanti rāgassa pahānaṃ, dosassa pahānaṃ, mohassa pahānaṃ.

⁵¹ ဝိနီဝရဏတာ စိတ္တသ္သာတိ ရာဂာ စိတ္တံ ဝိနီဝရဏတာ, ဒောသာ စိတ္တံ ဝိနီဝရဏတာ, မောဟာ စိတ္တံ ဝိနီဝရဏတာ။

⁵²Vinīvaraṇatā cittassāti rāgā cittaṃ vinīvaraṇatā, dosā cittaṃ vinīvaraṇatā, mohā cittaṃ vinīvaraṇatā.

⁵³ သုညာဂာရေ အဘိရတီတိ ပဌမေန ဈာနေန သုညာဂာရေ အဘိရတိ, ဒုတိယေန ဈာနေန သုညာဂာရေ အဘိရတိ, တတိယေန ဈာနေန သုညာဂာရေ အဘိရတိ, စတုတ္ထေန ဈာနေန သုညာဂာရေ အဘိရတိ။

⁵⁴Suññāgāre abhiratīti paṭhamena jhānena suññāgāre abhirati, dutiyena jhānena suññāgāre abhirati, tatiyena jhānena suññāgāre abhirati, catutthena jhānena suññāgāre abhirati.

၇၁. အာရောစေယ္ယာတိ အနုပသမ္ပန္နသ္သ – ‘‘ပဌမံ ဈာနံ သမာပဇ္ဇိ’’န္တိ ဘဏန္တသ္သ အာပတ္တိ ပာစိတ္တိယသ္သ။

71.Āroceyyāti anupasampannassa – ‘‘paṭhamaṃ jhānaṃ samāpajji’’nti bhaṇantassa āpatti pācittiyassa.

အာရောစေယ္ယာတိ အနုပသမ္ပန္နသ္သ – ‘‘ပဌမံ ဈာနံ သမာပဇ္ဇာမီ’’တိ ဘဏန္တသ္သ အာပတ္တိ ပာစိတ္တိယသ္သ။

Āroceyyāti anupasampannassa – ‘‘paṭhamaṃ jhānaṃ samāpajjāmī’’ti bhaṇantassa āpatti pācittiyassa.

အာရောစေယ္ယာတိ အနုပသမ္ပန္နသ္သ – ‘‘ပဌမံ ဈာနံ သမာပန္နော’’တိ ဘဏန္တသ္သ အာပတ္တိ ပာစိတ္တိယသ္သ။

Āroceyyāti anupasampannassa – ‘‘paṭhamaṃ jhānaṃ samāpanno’’ti bhaṇantassa āpatti pācittiyassa.

အာရောစေယ္ယာတိ အနုပသမ္ပန္နသ္သ – ‘‘ပဌမသ္သ ဈာနသ္သ လာဘိမ္ဟီ’’တိ ဘဏန္တသ္သ အာပတ္တိ ပာစိတ္တိယသ္သ။

Āroceyyāti anupasampannassa – ‘‘paṭhamassa jhānassa lābhimhī’’ti bhaṇantassa āpatti pācittiyassa.

အာရောစေယ္ယာတိ အနုပသမ္ပန္နသ္သ – ‘‘ပဌမသ္သ ဈာနသ္သ ဝသိမ္ဟီ’’တိ ဘဏန္တသ္သ အာပတ္တိ ပာစိတ္တိယသ္သ။

Āroceyyāti anupasampannassa – ‘‘paṭhamassa jhānassa vasimhī’’ti bhaṇantassa āpatti pācittiyassa.

အာရောစေယ္ယာတိ အနုပသမ္ပန္နသ္သ – ‘‘ပဌမံ ဈာနံ သစ္ဆိကတံ မယာ’’တိ ဘဏန္တသ္သ အာပတ္တိ ပာစိတ္တိယသ္သ။

Āroceyyāti anupasampannassa – ‘‘paṭhamaṃ jhānaṃ sacchikataṃ mayā’’ti bhaṇantassa āpatti pācittiyassa.

အာရောစေယ္ယာတိ အနုပသမ္ပန္နသ္သ – ‘‘ဒုတိယံ ဈာနံ။ တတိယံ ဈာနံ။ စတုတ္ထံ ဈာနံ သမာပဇ္ဇိံ, သမာပဇ္ဇာမိ, သမာပန္နော; စတုတ္ထသ္သ ဈာနသ္သ လာဘိမ္ဟိ, ဝသိမ္ဟိ; စတုတ္ထံ ဈာနံ သစ္ဆိကတံ မယာ’’တိ ဘဏန္တသ္သ အာပတ္တိ ပာစိတ္တိယသ္သ။

Āroceyyāti anupasampannassa – ‘‘dutiyaṃ jhānaṃ… tatiyaṃ jhānaṃ… catutthaṃ jhānaṃ samāpajjiṃ, samāpajjāmi, samāpanno; catutthassa jhānassa lābhimhi, vasimhi; catutthaṃ jhānaṃ sacchikataṃ mayā’’ti bhaṇantassa āpatti pācittiyassa.

အာရောစေယ္ယာတိ အနုပသမ္ပန္နသ္သ – ‘‘သုညတံ ဝိမောက္ခံ။ အနိမိတ္တံ ဝိမောက္ခံ။ အပ္ပဏိဟိတံ ဝိမောက္ခံ။ သုညတံ သမာဓိံ။ အနိမိတ္တံ သမာဓိံ။ အပ္ပဏိဟိတံ သမာဓိံ သမာပဇ္ဇိံ, သမာပဇ္ဇာမိ, သမာပန္နော; အပ္ပဏိဟိတသ္သ သမာဓိသ္သ လာဘိမ္ဟိ, ဝသိမ္ဟိ; အပ္ပဏိဟိတော သမာဓိ သစ္ဆိကတော မယာ’’တိ ဘဏန္တသ္သ အာပတ္တိ ပာစိတ္တိယသ္သ။

Āroceyyāti anupasampannassa – ‘‘suññataṃ vimokkhaṃ… animittaṃ vimokkhaṃ… appaṇihitaṃ vimokkhaṃ… suññataṃ samādhiṃ… animittaṃ samādhiṃ… appaṇihitaṃ samādhiṃ samāpajjiṃ, samāpajjāmi, samāpanno; appaṇihitassa samādhissa lābhimhi, vasimhi; appaṇihito samādhi sacchikato mayā’’ti bhaṇantassa āpatti pācittiyassa.

အာရောစေယ္ယာတိ အနုပသမ္ပန္နသ္သ – ‘‘သုညတံ သမာပတ္တိံ။ အနိမိတ္တံ သမာပတ္တိံ။ အပ္ပဏိဟိတံ သမာပတ္တိံ သမာပဇ္ဇိံ, သမာပဇ္ဇာမိ, သမာပန္နော; အပ္ပဏိဟိတာယ သမာပတ္တိယာ လာဘိမ္ဟိ, ဝသိမ္ဟိ; အပ္ပဏိဟိတာ သမာပတ္တိ သစ္ဆိကတာ မယာ’’တိ ဘဏန္တသ္သ အာပတ္တိ ပာစိတ္တိယသ္သ။

Āroceyyāti anupasampannassa – ‘‘suññataṃ samāpattiṃ… animittaṃ samāpattiṃ… appaṇihitaṃ samāpattiṃ samāpajjiṃ, samāpajjāmi, samāpanno; appaṇihitāya samāpattiyā lābhimhi, vasimhi; appaṇihitā samāpatti sacchikatā mayā’’ti bhaṇantassa āpatti pācittiyassa.

အာရောစေယ္ယာတိ အနုပသမ္ပန္နသ္သ – ‘‘တိသ္သော ဝိဇ္ဇာ သမာပဇ္ဇိံ, သမာပဇ္ဇာမိ, သမာပန္နော; တိသ္သန္နံ ဝိဇ္ဇာနံ လာဘိမ္ဟိ, ဝသိမ္ဟိ; တိသ္သော ဝိဇ္ဇာ သစ္ဆိကတာ မယာ’’တိ ဘဏန္တသ္သ အာပတ္တိ ပာစိတ္တိယသ္သ။

Āroceyyāti anupasampannassa – ‘‘tisso vijjā samāpajjiṃ, samāpajjāmi, samāpanno; tissannaṃ vijjānaṃ lābhimhi, vasimhi; tisso vijjā sacchikatā mayā’’ti bhaṇantassa āpatti pācittiyassa.

အာရောစေယ္ယာတိ အနုပသမ္ပန္နသ္သ – ‘‘စတ္တာရော သတိပဋ္ဌာနေ။ စတ္တာရော သမ္မပ္ပဓာနေ။ စတ္တာရော ဣဒ္ဓိပာဒေ သမာပဇ္ဇိံ, သမာပဇ္ဇာမိ, သမာပန္နော; စတုန္နံ ဣဒ္ဓိပာဒာနံ လာဘိမ္ဟိ, ဝသိမ္ဟိ; စတ္တာရော ဣဒ္ဓိပာဒာ သစ္ဆိကတာ မယာ’’တိ ဘဏန္တသ္သ အာပတ္တိ ပာစိတ္တိယသ္သ။

Āroceyyāti anupasampannassa – ‘‘cattāro satipaṭṭhāne… cattāro sammappadhāne… cattāro iddhipāde samāpajjiṃ, samāpajjāmi, samāpanno; catunnaṃ iddhipādānaṃ lābhimhi, vasimhi; cattāro iddhipādā sacchikatā mayā’’ti bhaṇantassa āpatti pācittiyassa.

အာရောစေယ္ယာတိ အနုပသမ္ပန္နသ္သ – ‘‘ပဉ္စိန္ဒ္ရိယာနိ။ ပဉ္စ ဗလာနိ သမာပဇ္ဇိံ, သမာပဇ္ဇာမိ , သမာပန္နော; ပဉ္စန္နံ ဗလာနံ လာဘိမ္ဟိ, ဝသိမ္ဟိ; ပဉ္စ ဗလာနိ သစ္ဆိကတာနိ မယာ’’တိ ဘဏန္တသ္သ အာပတ္တိ ပာစိတ္တိယသ္သ။

Āroceyyāti anupasampannassa – ‘‘pañcindriyāni… pañca balāni samāpajjiṃ, samāpajjāmi , samāpanno; pañcannaṃ balānaṃ lābhimhi, vasimhi; pañca balāni sacchikatāni mayā’’ti bhaṇantassa āpatti pācittiyassa.

အာရောစေယ္ယာတိ အနုပသမ္ပန္နသ္သ – ‘‘သတ္တ ဗောဇ္ဈင္ဂေ သမာပဇ္ဇိံ, သမာပဇ္ဇာမိ, သမာပန္နော; သတ္တန္နံ ဗောဇ္ဈင္ဂာနံ လာဘိမ္ဟိ, ဝသိမ္ဟိ; သတ္တ ဗောဇ္ဈင္ဂာ သစ္ဆိကတာ မယာ’’တိ ဘဏန္တသ္သ အာပတ္တိ ပာစိတ္တိယသ္သ။

Āroceyyāti anupasampannassa – ‘‘satta bojjhaṅge samāpajjiṃ, samāpajjāmi, samāpanno; sattannaṃ bojjhaṅgānaṃ lābhimhi, vasimhi; satta bojjhaṅgā sacchikatā mayā’’ti bhaṇantassa āpatti pācittiyassa.

အာရောစေယ္ယာတိ အနုပသမ္ပန္နသ္သ – ‘‘အရိယံ အဋ္ဌင္ဂိကံ မဂ္ဂံ သမာပဇ္ဇိံ, သမာပဇ္ဇာမိ, သမာပန္နော; အရိယသ္သ အဋ္ဌင္ဂိကသ္သ မဂ္ဂသ္သ လာဘိမ္ဟိ, ဝသိမ္ဟိ; အရိယော အဋ္ဌင္ဂိကော မဂ္ဂော သစ္ဆိကတော မယာ’’တိ ဘဏန္တသ္သ အာပတ္တိ ပာစိတ္တိယသ္သ။

Āroceyyāti anupasampannassa – ‘‘ariyaṃ aṭṭhaṅgikaṃ maggaṃ samāpajjiṃ, samāpajjāmi, samāpanno; ariyassa aṭṭhaṅgikassa maggassa lābhimhi, vasimhi; ariyo aṭṭhaṅgiko maggo sacchikato mayā’’ti bhaṇantassa āpatti pācittiyassa.

အာရောစေယ္ယာတိ အနုပသမ္ပန္နသ္သ – ‘‘သောတာပတ္တိဖလံ။ သကဒာဂာမိဖလံ။ အနာဂာမိဖလံ။ အရဟတ္တံ သမာပဇ္ဇိံ, သမာပဇ္ဇာမိ, သမာပန္နော; အရဟတ္တသ္သ လာဘိမ္ဟိ, ဝသိမ္ဟိ; အရဟတ္တံ ⁵⁵ သစ္ဆိကတံ မယာ’’တိ ဘဏန္တသ္သ အာပတ္တိ ပာစိတ္တိယသ္သ။

Āroceyyāti anupasampannassa – ‘‘sotāpattiphalaṃ… sakadāgāmiphalaṃ… anāgāmiphalaṃ… arahattaṃ samāpajjiṃ, samāpajjāmi, samāpanno; arahattassa lābhimhi, vasimhi; arahattaṃ ⁵⁶ sacchikataṃ mayā’’ti bhaṇantassa āpatti pācittiyassa.

အာရောစေယ္ယာတိ အနုပသမ္ပန္နသ္သ – ‘‘ရာဂော မေ စတ္တော။ ဒောသော မေ စတ္တော။ မောဟော မေ စတ္တော, ဝန္တော, မုတ္တော, ပဟီနော, ပဋိနိသ္သဋ္ဌော, ဥက္ခေဋိတော , သမုက္ခေဋိတော’’တိ ဘဏန္တသ္သ အာပတ္တိ ပာစိတ္တိယသ္သ။

Āroceyyāti anupasampannassa – ‘‘rāgo me catto… doso me catto… moho me catto, vanto, mutto, pahīno, paṭinissaṭṭho, ukkheṭito , samukkheṭito’’ti bhaṇantassa āpatti pācittiyassa.

အာရောစေယ္ယာတိ အနုပသမ္ပန္နသ္သ – ‘‘ရာဂာ မေ စိတ္တံ ဝိနီဝရဏံ။ ဒောသာ မေ စိတ္တ ဝိနီဝရဏံ။ မောဟာ မေ စိတ္တံ ဝိနီဝရဏ’’န္တိ ဘဏန္တသ္သ အာပတ္တိ ပာစိတ္တိယသ္သ။

Āroceyyāti anupasampannassa – ‘‘rāgā me cittaṃ vinīvaraṇaṃ… dosā me citta vinīvaraṇaṃ… mohā me cittaṃ vinīvaraṇa’’nti bhaṇantassa āpatti pācittiyassa.

အာရောစေယ္ယာတိ အနုပသမ္ပန္နသ္သ – ‘‘သုညာဂာရေ ပဌမံ ဈာနံ။ ဒုတိယံ ဈာနံ။ တတိယံ ဈာနံ။ စတုတ္ထံ ဈာနံ သမာပဇ္ဇိံ, သမာပဇ္ဇာမိ, သမာပန္နော; သုညာဂာရေ စတုတ္ထသ္သ ဈာနသ္သ လာဘိမ္ဟိ, ဝသိမ္ဟိ; သုညာဂာရေ စတုတ္ထံ ဈာနံ သစ္ဆိကတံ မယာ’’တိ ဘဏန္တသ္သ အာပတ္တိ ပာစိတ္တိယသ္သ။

Āroceyyāti anupasampannassa – ‘‘suññāgāre paṭhamaṃ jhānaṃ… dutiyaṃ jhānaṃ… tatiyaṃ jhānaṃ… catutthaṃ jhānaṃ samāpajjiṃ, samāpajjāmi, samāpanno; suññāgāre catutthassa jhānassa lābhimhi, vasimhi; suññāgāre catutthaṃ jhānaṃ sacchikataṃ mayā’’ti bhaṇantassa āpatti pācittiyassa.

၇၂. အာရောစေယ္ယာတိ အနုပသမ္ပန္နသ္သ – ‘‘ပဌမဉ္စ ဈာနံ ဒုတိယဉ္စ ဈာနံ သမာပဇ္ဇိံ, သမာပဇ္ဇာမိ, သမာပန္နော; ပဌမသ္သ စ ဈာနသ္သ ဒုတိယသ္သ စ ဈာနသ္သ လာဘိမ္ဟိ, ဝသိမ္ဟိ; ပဌမဉ္စ ဈာနံ ဒုတိယဉ္စ ဈာနံ သစ္ဆိကတံ မယာ’’တိ ဘဏန္တသ္သ အာပတ္တိ ပာစိတ္တိယသ္သ။

72.Āroceyyāti anupasampannassa – ‘‘paṭhamañca jhānaṃ dutiyañca jhānaṃ samāpajjiṃ, samāpajjāmi, samāpanno; paṭhamassa ca jhānassa dutiyassa ca jhānassa lābhimhi, vasimhi; paṭhamañca jhānaṃ dutiyañca jhānaṃ sacchikataṃ mayā’’ti bhaṇantassa āpatti pācittiyassa.

အာရောစေယ္ယာတိ အနုပသမ္ပန္နသ္သ – ‘‘ပဌမဉ္စ ဈာနံ တတိယဉ္စ ဈာနံ။ ပဌမဉ္စ ဈာနံ စတုတ္ထဉ္စ ဈာနံ သမာပဇ္ဇိံ, သမာပဇ္ဇာမိ, သမာပန္နော; ပဌမသ္သ စ ဈာနသ္သ စတုတ္ထသ္သ စ ဈာနသ္သ လာဘိမ္ဟိ, ဝသိမ္ဟိ; ပဌမဉ္စ ဈာနံ စတုတ္ထဉ္စ ဈာနံ သစ္ဆိကတံ မယာ’’တိ ဘဏန္တသ္သ အာပတ္တိ ပာစိတ္တိယသ္သ။

Āroceyyāti anupasampannassa – ‘‘paṭhamañca jhānaṃ tatiyañca jhānaṃ… paṭhamañca jhānaṃ catutthañca jhānaṃ samāpajjiṃ, samāpajjāmi, samāpanno; paṭhamassa ca jhānassa catutthassa ca jhānassa lābhimhi, vasimhi; paṭhamañca jhānaṃ catutthañca jhānaṃ sacchikataṃ mayā’’ti bhaṇantassa āpatti pācittiyassa.

အာရောစေယ္ယာတိ အနုပသမ္ပန္နသ္သ – ‘‘ပဌမဉ္စ ဈာနံ သုညတဉ္စ ဝိမောက္ခံ။ အနိမိတ္တဉ္စ ဝိမောက္ခံ။ အပ္ပဏိဟိတဉ္စ ဝိမောက္ခံ။ သုညတဉ္စ သမာဓိံ။ အနိမိတ္တဉ္စ သမာဓိံ။ အပ္ပဏိဟိတဉ္စ သမာဓိံ သမာပဇ္ဇိံ, သမာပဇ္ဇာမိ, သမာပန္နော; ပဌမသ္သ စ ဈာနသ္သ အပ္ပဏိဟိတသ္သ စ သမာဓိသ္သ လာဘိမ္ဟိ, ဝသိမ္ဟိ; ပဌမဉ္စ ဈာနံ အပ္ပဏိဟိတော စ သမာဓိ သစ္ဆိကတော မယာ’’တိ ဘဏန္တသ္သ အာပတ္တိ ပာစိတ္တိယသ္သ။

Āroceyyāti anupasampannassa – ‘‘paṭhamañca jhānaṃ suññatañca vimokkhaṃ… animittañca vimokkhaṃ… appaṇihitañca vimokkhaṃ… suññatañca samādhiṃ… animittañca samādhiṃ… appaṇihitañca samādhiṃ samāpajjiṃ, samāpajjāmi, samāpanno; paṭhamassa ca jhānassa appaṇihitassa ca samādhissa lābhimhi, vasimhi; paṭhamañca jhānaṃ appaṇihito ca samādhi sacchikato mayā’’ti bhaṇantassa āpatti pācittiyassa.

အာရောစေယ္ယာတိ အနုပသမ္ပန္နသ္သ – ‘‘ပဌမဉ္စ ဈာနံ သုညတဉ္စ သမာပတ္တိံ။ အနိမိတ္တဉ္စ သမာပတ္တိံ။ အပ္ပဏိဟိတဉ္စ သမာပတ္တိံ သမာပဇ္ဇိံ, သမာပဇ္ဇာမိ, သမာပန္နော; ပဌမသ္သ စ ဈာနသ္သ အပ္ပဏိဟိတာယ စ သမာပတ္တိယာ လာဘိမ္ဟိ, ဝသိမ္ဟိ; ပဌမဉ္စ ဈာနံ အပ္ပဏိဟိတာ စ သမာပတ္တိ သစ္ဆိကတာ မယာ’’တိ ဘဏန္တသ္သ အာပတ္တိ ပာစိတ္တိယသ္သ။

Āroceyyāti anupasampannassa – ‘‘paṭhamañca jhānaṃ suññatañca samāpattiṃ… animittañca samāpattiṃ… appaṇihitañca samāpattiṃ samāpajjiṃ, samāpajjāmi, samāpanno; paṭhamassa ca jhānassa appaṇihitāya ca samāpattiyā lābhimhi, vasimhi; paṭhamañca jhānaṃ appaṇihitā ca samāpatti sacchikatā mayā’’ti bhaṇantassa āpatti pācittiyassa.

အာရောစေယ္ယာတိ အနုပသမ္ပန္နသ္သ – ‘‘ပဌမဉ္စ ဈာနံ တိသ္သော စ ဝိဇ္ဇာ သမာပဇ္ဇိံ, သမာပဇ္ဇာမိ, သမာပန္နော; ပဌမသ္သ စ ဈာနသ္သ တိသ္သန္နဉ္စ ဝိဇ္ဇာနံ လာဘိမ္ဟိ, ဝသိမ္ဟိ; ပဌမဉ္စ ဈာနံ တိသ္သော စ ဝိဇ္ဇာ သစ္ဆိကတာ မယာ’’တိ ဘဏန္တသ္သ အာပတ္တိ ပာစိတ္တိယသ္သ။

Āroceyyāti anupasampannassa – ‘‘paṭhamañca jhānaṃ tisso ca vijjā samāpajjiṃ, samāpajjāmi, samāpanno; paṭhamassa ca jhānassa tissannañca vijjānaṃ lābhimhi, vasimhi; paṭhamañca jhānaṃ tisso ca vijjā sacchikatā mayā’’ti bhaṇantassa āpatti pācittiyassa.

အာရောစေယ္ယာတိ အနုပသမ္ပန္နသ္သ – ‘‘ပဌမဉ္စ ဈာနံ စတ္တာရော စ သတိပဋ္ဌာနေ။ပေ.။ စတ္တာရော စ သမ္မပ္ပဓာနေ။ စတ္တာရော စ ဣဒ္ဓိပာဒေ သမာပဇ္ဇိံ, သမာပဇ္ဇာမိ, သမာပန္နော; ပဌမသ္သ စ ဈာနသ္သ စတုန္နဉ္စ ဣဒ္ဓိပာဒာနံ လာဘိမ္ဟိ, ဝသိမ္ဟိ; ပဌမဉ္စ ဈာနံ စတ္တာရော စ ဣဒ္ဓိပာဒာ သစ္ဆိကတာ မယာ’’တိ ဘဏန္တသ္သ အာပတ္တိ ပာစိတ္တိယသ္သ။

Āroceyyāti anupasampannassa – ‘‘paṭhamañca jhānaṃ cattāro ca satipaṭṭhāne…pe… cattāro ca sammappadhāne… cattāro ca iddhipāde samāpajjiṃ, samāpajjāmi, samāpanno; paṭhamassa ca jhānassa catunnañca iddhipādānaṃ lābhimhi, vasimhi; paṭhamañca jhānaṃ cattāro ca iddhipādā sacchikatā mayā’’ti bhaṇantassa āpatti pācittiyassa.

အာရောစေယ္ယာတိ အနုပသမ္ပန္နသ္သ – ‘‘ပဌမဉ္စ ဈာနံ, ပဉ္စ စ ဣန္ဒ္ရိယာနိ။ ပဉ္စ စ ဗလာနိ သမာပဇ္ဇိံ, သမာပဇ္ဇာမိ, သမာပန္နော; ပဌမသ္သ စ ဈာနသ္သ ပဉ္စန္နဉ္စ ဗလာနံ လာဘိမ္ဟိ, ဝသိမ္ဟိ; ပဌမဉ္စ ဈာနံ ပဉ္စ စ ဗလာနိ သစ္ဆိကတာနိ မယာ’’တိ ဘဏန္တသ္သ အာပတ္တိ ပာစိတ္တိယသ္သ။

Āroceyyāti anupasampannassa – ‘‘paṭhamañca jhānaṃ, pañca ca indriyāni… pañca ca balāni samāpajjiṃ, samāpajjāmi, samāpanno; paṭhamassa ca jhānassa pañcannañca balānaṃ lābhimhi, vasimhi; paṭhamañca jhānaṃ pañca ca balāni sacchikatāni mayā’’ti bhaṇantassa āpatti pācittiyassa.

အာရောစေယ္ယာတိ အနုပသမ္ပန္နသ္သ – ‘‘ပဌမဉ္စ ဈာနံ သတ္တ စ ဗောဇ္ဈင္ဂေ သမာပဇ္ဇိံ, သမာပဇ္ဇာမိ, သမာပန္နော; ပဌမသ္သ စ ဈာနသ္သ သတ္တန္နဉ္စ ဗောဇ္ဈင္ဂာနံ လာဘိမ္ဟိ, ဝသိမ္ဟိ; ပဌမဉ္စ ဈာနံ သတ္တ စ ဗောဇ္ဈင္ဂာ သစ္ဆိကတာ မယာ’’တိ ဘဏန္တသ္သ အာပတ္တိ ပာစိတ္တိယသ္သ။

Āroceyyāti anupasampannassa – ‘‘paṭhamañca jhānaṃ satta ca bojjhaṅge samāpajjiṃ, samāpajjāmi, samāpanno; paṭhamassa ca jhānassa sattannañca bojjhaṅgānaṃ lābhimhi, vasimhi; paṭhamañca jhānaṃ satta ca bojjhaṅgā sacchikatā mayā’’ti bhaṇantassa āpatti pācittiyassa.

အာရောစေယ္ယာတိ အနုပသမ္ပန္နသ္သ – ‘‘ပဌမဉ္စ ဈာနံ အရိယဉ္စ အဋ္ဌင္ဂိကံ မဂ္ဂံ သမာပဇ္ဇိံ, သမာပဇ္ဇာမိ, သမာပန္နော; ပဌမသ္သ စ ဈာနသ္သ အရိယသ္သ စ အဋ္ဌင္ဂိကသ္သ မဂ္ဂသ္သ လာဘိမ္ဟိ, ဝသိမ္ဟိ; ပဌမဉ္စ ဈာနံ အရိယော စ အဋ္ဌင္ဂိကော မဂ္ဂော သစ္ဆိကတော မယာ’’တိ ဘဏန္တသ္သ အာပတ္တိ ပာစိတ္တိယသ္သ။

Āroceyyāti anupasampannassa – ‘‘paṭhamañca jhānaṃ ariyañca aṭṭhaṅgikaṃ maggaṃ samāpajjiṃ, samāpajjāmi, samāpanno; paṭhamassa ca jhānassa ariyassa ca aṭṭhaṅgikassa maggassa lābhimhi, vasimhi; paṭhamañca jhānaṃ ariyo ca aṭṭhaṅgiko maggo sacchikato mayā’’ti bhaṇantassa āpatti pācittiyassa.

အာရောစေယ္ယာတိ အနုပသမ္ပန္နသ္သ – ‘‘ပဌမဉ္စ ဈာနံ သောတာပတ္တိဖလဉ္စ။ သကဒာဂာမိဖလဉ္စ။ အနာဂာမိဖလဉ္စ။ အရဟတ္တဉ္စ ⁵⁷ သမာပဇ္ဇိံ, သမာပဇ္ဇာမိ, သမာပန္နော; ပဌမသ္သ စ ဈာနသ္သ အရဟတ္တသ္သ ⁵⁸ စ လာဘိမ္ဟိ, ဝသိမ္ဟိ; ပဌမဉ္စ ဈာနံ အရဟတ္တဉ္စ သစ္ဆိကတံ မယာ’’တိ ဘဏန္တသ္သ အာပတ္တိ ပာစိတ္တိယသ္သ။

Āroceyyāti anupasampannassa – ‘‘paṭhamañca jhānaṃ sotāpattiphalañca… sakadāgāmiphalañca… anāgāmiphalañca… arahattañca ⁵⁹ samāpajjiṃ, samāpajjāmi, samāpanno; paṭhamassa ca jhānassa arahattassa ⁶⁰ ca lābhimhi, vasimhi; paṭhamañca jhānaṃ arahattañca sacchikataṃ mayā’’ti bhaṇantassa āpatti pācittiyassa.

အာရောစေယ္ယာတိ အနုပသမ္ပန္နသ္သ – ‘‘ပဌမဉ္စ ဈာနံ သမာပဇ္ဇိံ, သမာပဇ္ဇာမိ, သမာပန္နော။ ရာဂော စ မေ စတ္တော။ ဒောသော စ မေ စတ္တော။ မောဟော စ မေ စတ္တော, ဝန္တော, မုတ္တော, ပဟီနော, ပဋိနိသ္သဋ္ဌော, ဥက္ခေဋိတော, သမုက္ခေဋိတော’’တိ ဘဏန္တသ္သ အာပတ္တိ ပာစိတ္တိယသ္သ။

Āroceyyāti anupasampannassa – ‘‘paṭhamañca jhānaṃ samāpajjiṃ, samāpajjāmi, samāpanno… rāgo ca me catto… doso ca me catto… moho ca me catto, vanto, mutto, pahīno, paṭinissaṭṭho, ukkheṭito, samukkheṭito’’ti bhaṇantassa āpatti pācittiyassa.

အာရောစေယ္ယာတိ အနုပသမ္ပန္နသ္သ – ‘‘ပဌမဉ္စ ဈာနံ သမာပဇ္ဇိံ, သမာပဇ္ဇာမိ, သမာပန္နော။ ရာဂာ စ မေ စိတ္တံ ဝိနီဝရဏံ။ ဒောသာ စ မေ စိတ္တံ ဝိနီဝရဏံ။ မောဟာ စ မေ စိတ္တံ ဝိနီဝရဏ’’န္တိ ဘဏန္တသ္သ အာပတ္တိ ပာစိတ္တိယသ္သ။

Āroceyyāti anupasampannassa – ‘‘paṭhamañca jhānaṃ samāpajjiṃ, samāpajjāmi, samāpanno… rāgā ca me cittaṃ vinīvaraṇaṃ… dosā ca me cittaṃ vinīvaraṇaṃ… mohā ca me cittaṃ vinīvaraṇa’’nti bhaṇantassa āpatti pācittiyassa.

၇၃. အာရောစေယ္ယာတိ အနုပသမ္ပန္နသ္သ – ‘‘ဒုတိယဉ္စ ဈာနံ တတိယဉ္စ ဈာနံ။ ဒုတိယဉ္စ ဈာနံ စတုတ္ထဉ္စ ဈာနံ သမာပဇ္ဇိံ, သမာပဇ္ဇာမိ, သမာပန္နော; ဒုတိယသ္သ စ ဈာနသ္သ စတုတ္ထသ္သ စ ဈာနသ္သ လာဘိမ္ဟိ, ဝသိမ္ဟိ; ဒုတိယဉ္စ ဈာနံ စတုတ္ထဉ္စ ဈာနံ သစ္ဆိကတံ မယာ’’တိ ဘဏန္တသ္သ အာပတ္တိ ပာစိတ္တိယသ္သ။

73.Āroceyyāti anupasampannassa – ‘‘dutiyañca jhānaṃ tatiyañca jhānaṃ… dutiyañca jhānaṃ catutthañca jhānaṃ samāpajjiṃ, samāpajjāmi, samāpanno; dutiyassa ca jhānassa catutthassa ca jhānassa lābhimhi, vasimhi; dutiyañca jhānaṃ catutthañca jhānaṃ sacchikataṃ mayā’’ti bhaṇantassa āpatti pācittiyassa.

အာရောစေယ္ယာတိ အနုပသမ္ပန္နသ္သ – ‘‘ဒုတိယဉ္စ ဈာနံ သုညတဉ္စ ဝိမောက္ခံ။ပေ.။ မောဟာ စ မေ စိတ္တံ ဝိနီဝရဏ’’န္တိ ဘဏန္တသ္သ အာပတ္တိ ပာစိတ္တိယသ္သ။

Āroceyyāti anupasampannassa – ‘‘dutiyañca jhānaṃ suññatañca vimokkhaṃ…pe… mohā ca me cittaṃ vinīvaraṇa’’nti bhaṇantassa āpatti pācittiyassa.

အာရောစေယ္ယာတိ အနုပသမ္ပန္နသ္သ – ‘‘ဒုတိယဉ္စ ဈာနံ ပဌမဉ္စ ဈာနံ သမာပဇ္ဇိံ, သမာပဇ္ဇာမိ, သမာပန္နော; ဒုတိယသ္သ စ ဈာနသ္သ ပဌမသ္သ စ ဈာနသ္သ လာဘိမ္ဟိ, ဝသိမ္ဟိ; ဒုတိယဉ္စ ဈာနံ ပဌမဉ္စ ဈာနံ သစ္ဆိကတံ မယာ’’တိ ဘဏန္တသ္သ အာပတ္တိ ပာစိတ္တိယသ္သ။ပေ.။။

Āroceyyāti anupasampannassa – ‘‘dutiyañca jhānaṃ paṭhamañca jhānaṃ samāpajjiṃ, samāpajjāmi, samāpanno; dutiyassa ca jhānassa paṭhamassa ca jhānassa lābhimhi, vasimhi; dutiyañca jhānaṃ paṭhamañca jhānaṃ sacchikataṃ mayā’’ti bhaṇantassa āpatti pācittiyassa…pe….

မူလံ သံခိတ္တံ။

Mūlaṃ saṃkhittaṃ.

အာရောစေယ္ယာတိ အနုပသမ္ပန္နသ္သ – ‘‘မောဟာ စ မေ စိတ္တံ ဝိနီဝရဏံ, ပဌမဉ္စ ဈာနံ သမာပဇ္ဇိံ, သမာပဇ္ဇာမိ, သမာပန္နော; မောဟာ စ မေ စိတ္တံ ဝိနီဝရဏံ, ပဌမသ္သ စ ဈာနသ္သ လာဘိမ္ဟိ, ဝသိမ္ဟိ; မောဟာ စ မေ စိတ္တံ ဝိနီဝရဏံ, ပဌမဉ္စ ဈာနံ သစ္ဆိကတံ မယာ’’တိ ဘဏန္တသ္သ အာပတ္တိ ပာစိတ္တိယသ္သ။ပေ.။။

Āroceyyāti anupasampannassa – ‘‘mohā ca me cittaṃ vinīvaraṇaṃ, paṭhamañca jhānaṃ samāpajjiṃ, samāpajjāmi, samāpanno; mohā ca me cittaṃ vinīvaraṇaṃ, paṭhamassa ca jhānassa lābhimhi, vasimhi; mohā ca me cittaṃ vinīvaraṇaṃ, paṭhamañca jhānaṃ sacchikataṃ mayā’’ti bhaṇantassa āpatti pācittiyassa…pe….

အာရောစေယ္ယာတိ အနုပသမ္ပန္နသ္သ – ‘‘မောဟာ စ မေ စိတ္တံ ဝိနီဝရဏံ, ဒောသာ စ မေ စိတ္တံ ဝိနီဝရဏ’’န္တိ ဘဏန္တသ္သ အာပတ္တိ ပာစိတ္တိယသ္သ။ပေ.။။

Āroceyyāti anupasampannassa – ‘‘mohā ca me cittaṃ vinīvaraṇaṃ, dosā ca me cittaṃ vinīvaraṇa’’nti bhaṇantassa āpatti pācittiyassa…pe….

အာရောစေယ္ယာတိ အနုပသမ္ပန္နသ္သ – ‘‘ပဌမဉ္စ ဈာနံ ဒုတိယဉ္စ ဈာနံ တတိယဉ္စ ဈာနံ စတုတ္ထဉ္စ ဈာနံ သုညတဉ္စ ဝိမောက္ခံ အနိမိတ္တဉ္စ ဝိမောက္ခံ အပ္ပဏိဟိတဉ္စ ဝိမောက္ခံ သုညတဉ္စ သမာဓိံ အနိမိတ္တဉ္စ သမာဓိံ အပ္ပဏိဟိတဉ္စ သမာဓိံ သုညတဉ္စ သမာပတ္တိံ အနိမိတ္တဉ္စ သမာပတ္တိံ အပ္ပဏိဟိတဉ္စ သမာပတ္တိံ တိသ္သော စ ဝိဇ္ဇာ စတ္တာရော စ သတိပဋ္ဌာနေ စတ္တာရော စ သမ္မပ္ပဓာနေ စတ္တာရော စ ဣဒ္ဓိပာဒေ ပဉ္စ စ ဣန္ဒ္ရိယာနိ ပဉ္စ စ ဗလာနိ သတ္တ စ ဗောဇ္ဈင္ဂေ အရိယဉ္စ အဋ္ဌင္ဂိကံ မဂ္ဂံ သောတာပတ္တိဖလဉ္စ သကဒာဂာမိဖလဉ္စ အနာဂာမိဖလဉ္စ အရဟတ္တဉ္စ ⁶¹ သမာပဇ္ဇိံ။ပေ.။ ရာဂော စ မေ စတ္တော, ဒောသော စ မေ စတ္တော, မောဟော စ မေ စတ္တော, ဝန္တော, မုတ္တော, ပဟီနော, ပဋိနိသ္သဋ္ဌော, ဥက္ခေဋိတော သမုက္ခေဋိတော, ရာဂာ စ မေ စိတ္တံ ဝိနီဝရဏံ, ဒောသာ စ မေ စိတ္တံ ဝိနီဝရဏံ, မောဟာ စ မေ စိတ္တံ ဝိနီဝရဏ’’န္တိ ဘဏန္တသ္သ အာပတ္တိ ပာစိတ္တိယသ္သ။

Āroceyyāti anupasampannassa – ‘‘paṭhamañca jhānaṃ dutiyañca jhānaṃ tatiyañca jhānaṃ catutthañca jhānaṃ suññatañca vimokkhaṃ animittañca vimokkhaṃ appaṇihitañca vimokkhaṃ suññatañca samādhiṃ animittañca samādhiṃ appaṇihitañca samādhiṃ suññatañca samāpattiṃ animittañca samāpattiṃ appaṇihitañca samāpattiṃ tisso ca vijjā cattāro ca satipaṭṭhāne cattāro ca sammappadhāne cattāro ca iddhipāde pañca ca indriyāni pañca ca balāni satta ca bojjhaṅge ariyañca aṭṭhaṅgikaṃ maggaṃ sotāpattiphalañca sakadāgāmiphalañca anāgāmiphalañca arahattañca ⁶² samāpajjiṃ…pe… rāgo ca me catto, doso ca me catto, moho ca me catto, vanto, mutto, pahīno, paṭinissaṭṭho, ukkheṭito samukkheṭito, rāgā ca me cittaṃ vinīvaraṇaṃ, dosā ca me cittaṃ vinīvaraṇaṃ, mohā ca me cittaṃ vinīvaraṇa’’nti bhaṇantassa āpatti pācittiyassa.

၇၄. အာရောစေယ္ယာတိ အနုပသမ္ပန္နသ္သ – ‘‘ပဌမံ ဈာနံ သမာပဇ္ဇိ’’န္တိ ဝတ္တုကာမော ‘‘ဒုတိယံ ဈာနံ သမာပဇ္ဇိ’’န္တိ ဘဏန္တသ္သ ပဋိဝိဇာနန္တသ္သ အာပတ္တိ ပာစိတ္တိယသ္သ, န ပဋိဝိဇာနန္တသ္သ အာပတ္တိ ဒုက္ကဋသ္သ။

74.Āroceyyāti anupasampannassa – ‘‘paṭhamaṃ jhānaṃ samāpajji’’nti vattukāmo ‘‘dutiyaṃ jhānaṃ samāpajji’’nti bhaṇantassa paṭivijānantassa āpatti pācittiyassa, na paṭivijānantassa āpatti dukkaṭassa.

အာရောစေယ္ယာတိ အနုပသမ္ပန္နသ္သ – ‘‘ပဌမံ ဈာနံ သမာပဇ္ဇိ’’န္တိ ဝတ္တုကာမော ‘‘တတိယံ ဈာနံ။ပေ.။ စတုတ္ထံ ဈာနံ, သုညတံ ဝိမောက္ခံ, အနိမိတ္တံ ဝိမောက္ခံ, အပ္ပဏိဟိတံ ဝိမောက္ခံ, သုညတံ သမာဓိံ, အနိမိတ္တံ သမာဓိံ, အပ္ပဏိဟိတံ သမာဓိံ, သုညတံ သမာပတ္တိံ, အနိမိတ္တံ သမာပတ္တိံ, အပ္ပဏိဟိတံ သမာပတ္တိံ, တိသ္သော ဝိဇ္ဇာ, စတ္တာရော သတိပဋ္ဌာနေ, စတ္တာရော သမ္မပ္ပဓာနေ, စတ္တာရော ဣဒ္ဓိပာဒေ, ပဉ္စိန္ဒ္ရိယာနိ, ပဉ္စ ဗလာနိ, သတ္တ ဗောဇ္ဈင္ဂေ, အရိယံ အဋ္ဌင္ဂိကံ မဂ္ဂံ, သောတာပတ္တိဖလံ, သကဒာဂာမိဖလံ, အနာဂာမိဖလံ, အရဟတ္တံ ⁶³ သမာပဇ္ဇိံ။ပေ.။ ရာဂော မေ စတ္တော, ဒောသော မေ စတ္တော, မောဟော မေ စတ္တော, ဝန္တော, မုတ္တော, ပဟီနော; ပဋိနိသ္သဋ္ဌော, ဥက္ခေဋိတော, သမုက္ခေဋိတော; ရာဂာ မေ စိတ္တံ ဝိနီဝရဏံ, ဒောသာ မေ စိတ္တံ ဝိနီဝရဏံ, မောဟာ မေ စိတ္တံ ဝိနီဝရဏ’’န္တိ ဘဏန္တသ္သ ပဋိဝိဇာနန္တသ္သ အာပတ္တိ ပာစိတ္တိယသ္သ, န ပဋိဝိဇာနန္တသ္သ အာပတ္တိ ဒုက္ကဋသ္သ။

Āroceyyāti anupasampannassa – ‘‘paṭhamaṃ jhānaṃ samāpajji’’nti vattukāmo ‘‘tatiyaṃ jhānaṃ…pe… catutthaṃ jhānaṃ, suññataṃ vimokkhaṃ, animittaṃ vimokkhaṃ, appaṇihitaṃ vimokkhaṃ, suññataṃ samādhiṃ, animittaṃ samādhiṃ, appaṇihitaṃ samādhiṃ, suññataṃ samāpattiṃ, animittaṃ samāpattiṃ, appaṇihitaṃ samāpattiṃ, tisso vijjā, cattāro satipaṭṭhāne, cattāro sammappadhāne, cattāro iddhipāde, pañcindriyāni, pañca balāni, satta bojjhaṅge, ariyaṃ aṭṭhaṅgikaṃ maggaṃ, sotāpattiphalaṃ, sakadāgāmiphalaṃ, anāgāmiphalaṃ, arahattaṃ ⁶⁴ samāpajjiṃ…pe… rāgo me catto, doso me catto, moho me catto, vanto, mutto, pahīno; paṭinissaṭṭho, ukkheṭito, samukkheṭito; rāgā me cittaṃ vinīvaraṇaṃ, dosā me cittaṃ vinīvaraṇaṃ, mohā me cittaṃ vinīvaraṇa’’nti bhaṇantassa paṭivijānantassa āpatti pācittiyassa, na paṭivijānantassa āpatti dukkaṭassa.

အာရောစေယ္ယာတိ အနုပသမ္ပန္နသ္သ – ‘‘ဒုတိယံ ဈာနံ သမာပဇ္ဇိ’’န္တိ ဝတ္တုကာမော။ပေ.။ ‘‘မောဟာ မေ စိတ္တံ ဝိနီဝရဏ’’န္တိ ဘဏန္တသ္သ ပဋိဝိဇာနန္တသ္သ အာပတ္တိ ပာစိတ္တိယသ္သ, န ပဋိဝိဇာနန္တသ္သ အာပတ္တိ ဒုက္ကဋသ္သ။ပေ.။။

Āroceyyāti anupasampannassa – ‘‘dutiyaṃ jhānaṃ samāpajji’’nti vattukāmo…pe… ‘‘mohā me cittaṃ vinīvaraṇa’’nti bhaṇantassa paṭivijānantassa āpatti pācittiyassa, na paṭivijānantassa āpatti dukkaṭassa…pe….

အာရောစေယ္ယာတိ အနုပသမ္ပန္နသ္သ – ‘‘ဒုတိယံ ဈာနံ သမာပဇ္ဇိ’’န္တိ ဝတ္တုကာမော – ‘‘ပဌမံ ဈာနံ သမာပဇ္ဇိ’’န္တိ ဘဏန္တသ္သ ပဋိဝိဇာနန္တသ္သ အာပတ္တိ ပာစိတ္တိယသ္သ, န ပဋိဝိဇာနန္တသ္သ အာပတ္တိ ဒုက္ကဋသ္သ။ပေ.။။

Āroceyyāti anupasampannassa – ‘‘dutiyaṃ jhānaṃ samāpajji’’nti vattukāmo – ‘‘paṭhamaṃ jhānaṃ samāpajji’’nti bhaṇantassa paṭivijānantassa āpatti pācittiyassa, na paṭivijānantassa āpatti dukkaṭassa…pe….

မူလံ သံခိတ္တံ။

Mūlaṃ saṃkhittaṃ.

အာရောစေယ္ယာတိ အနုပသမ္ပန္နသ္သ – ‘‘မောဟာ မေ စိတ္တံ ဝိနီဝရဏ’’န္တိ ဝတ္တုကာမော – ‘‘ပဌမံ ဈာနံ သမာပဇ္ဇိ’’န္တိ ဘဏန္တသ္သ ပဋိဝိဇာနန္တသ္သ အာပတ္တိ ပာစိတ္တိယသ္သ, န ပဋိဝိဇာနန္တသ္သ အာပတ္တိ ဒုက္ကဋသ္သ။ပေ.။။

Āroceyyāti anupasampannassa – ‘‘mohā me cittaṃ vinīvaraṇa’’nti vattukāmo – ‘‘paṭhamaṃ jhānaṃ samāpajji’’nti bhaṇantassa paṭivijānantassa āpatti pācittiyassa, na paṭivijānantassa āpatti dukkaṭassa…pe….

အာရောစေယ္ယာတိ အနုပသမ္ပန္နသ္သ – ‘‘မောဟာ မေ စိတ္တံ ဝိနီဝရဏ’’န္တိ ဝတ္တုကာမော – ‘‘ဒောသာ မေ စိတ္တံ ဝိနီဝရဏ’’န္တိ ဘဏန္တသ္သ ပဋိဝိဇာနန္တသ္သ အာပတ္တိ ပာစိတ္တိယသ္သ, န ပဋိဝိဇာနန္တသ္သ အာပတ္တိ ဒုက္ကဋသ္သ။ပေ.။။

Āroceyyāti anupasampannassa – ‘‘mohā me cittaṃ vinīvaraṇa’’nti vattukāmo – ‘‘dosā me cittaṃ vinīvaraṇa’’nti bhaṇantassa paṭivijānantassa āpatti pācittiyassa, na paṭivijānantassa āpatti dukkaṭassa…pe….

အာရောစေယ္ယာတိ အနုပသမ္ပန္နသ္သ – ‘‘ပဌမဉ္စ ဈာနံ ဒုတိယဉ္စ ဈာနံ တတိယဉ္စ ဈာနံ စတုတ္ထဉ္စ ဈာနံ ။ပေ.။ ဒောသာ စ မေ စိတ္တံ ဝိနီဝရဏ’’န္တိ ဝတ္တုကာမော – ‘‘မောဟာ မေ စိတ္တံ ဝိနီဝရဏ’’န္တိ ဘဏန္တသ္သ ပဋိဝိဇာနန္တသ္သ အာပတ္တိ ပာစိတ္တိယသ္သ, န ပဋိဝိဇာနန္တသ္သ အာပတ္တိ ဒုက္ကဋသ္သ။

Āroceyyāti anupasampannassa – ‘‘paṭhamañca jhānaṃ dutiyañca jhānaṃ tatiyañca jhānaṃ catutthañca jhānaṃ …pe… dosā ca me cittaṃ vinīvaraṇa’’nti vattukāmo – ‘‘mohā me cittaṃ vinīvaraṇa’’nti bhaṇantassa paṭivijānantassa āpatti pācittiyassa, na paṭivijānantassa āpatti dukkaṭassa.

အာရောစေယ္ယာတိ အနုပသမ္ပန္နသ္သ – ‘‘ဒုတိယဉ္စ ဈာနံ တတိယဉ္စ ဈာနံ စတုတ္ထဉ္စ ဈာနံ။ပေ.။ မောဟာ စ မေ စိတ္တံ ဝိနီဝရဏ’’န္တိ ဝတ္တုကာမော – ‘‘ပဌမံ ဈာနံ သမာပဇ္ဇိ’’န္တိ ဘဏန္တသ္သ ပဋိဝိဇာနန္တသ္သ အာပတ္တိ ပာစိတ္တိယသ္သ, န ပဋိဝိဇာနန္တသ္သ အာပတ္တိ ဒုက္ကဋသ္သ။ပေ.။။

Āroceyyāti anupasampannassa – ‘‘dutiyañca jhānaṃ tatiyañca jhānaṃ catutthañca jhānaṃ…pe… mohā ca me cittaṃ vinīvaraṇa’’nti vattukāmo – ‘‘paṭhamaṃ jhānaṃ samāpajji’’nti bhaṇantassa paṭivijānantassa āpatti pācittiyassa, na paṭivijānantassa āpatti dukkaṭassa…pe….

၇၅. အာရောစေယ္ယာတိ အနုပသမ္ပန္နသ္သ – ‘‘ယော တေ ဝိဟာရေ ဝသိ သော ဘိက္ခု ပဌမံ ဈာနံ သမာပဇ္ဇိ, သမာပဇ္ဇတိ, သမာပန္နော; သော ဘိက္ခု ပဌမသ္သ ဈာနသ္သ လာဘီ, ဝသီ; တေန ဘိက္ခုနာ ပဌမံ ဈာနံ သစ္ဆိကတ’’န္တိ ဘဏန္တသ္သ အာပတ္တိ ဒုက္ကဋသ္သ။

75.Āroceyyāti anupasampannassa – ‘‘yo te vihāre vasi so bhikkhu paṭhamaṃ jhānaṃ samāpajji, samāpajjati, samāpanno; so bhikkhu paṭhamassa jhānassa lābhī, vasī; tena bhikkhunā paṭhamaṃ jhānaṃ sacchikata’’nti bhaṇantassa āpatti dukkaṭassa.

အာရောစေယ္ယာတိ အနုပသမ္ပန္နသ္သ – ‘‘ယော တေ ဝိဟာရေ ဝသိ သော ဘိက္ခု ဒုတိယံ ဈာနံ။ပေ.။ တတိယံ ဈာနံ စတုတ္ထံ ဈာနံ သမာပဇ္ဇိ, သမာပဇ္ဇတိ, သမာပန္နော; သော ဘိက္ခု စတုတ္ထသ္သ ဈာနသ္သ လာဘီ, ဝသီ; တေန ဘိက္ခုနာ စတုတ္ထံ ဈာနံ သစ္ဆိကတ’’န္တိ ဘဏန္တသ္သ အာပတ္တိ ဒုက္ကဋသ္သ။

Āroceyyāti anupasampannassa – ‘‘yo te vihāre vasi so bhikkhu dutiyaṃ jhānaṃ…pe… tatiyaṃ jhānaṃ catutthaṃ jhānaṃ samāpajji, samāpajjati, samāpanno; so bhikkhu catutthassa jhānassa lābhī, vasī; tena bhikkhunā catutthaṃ jhānaṃ sacchikata’’nti bhaṇantassa āpatti dukkaṭassa.

အာရောစေယ္ယာတိ အနုပသမ္ပန္နသ္သ – ‘‘ယော တေ ဝိဟာရေ ဝသိ သော ဘိက္ခု သုညတံ ဝိမောက္ခံ။ပေ.။ အနိမိတ္တံ ဝိမောက္ခံ အပ္ပဏိဟိတံ ဝိမောက္ခံ သုညတံ သမာဓိံ အနိမိတ္တံ သမာဓိံ အပ္ပဏိဟိတံ သမာဓိံ သမာပဇ္ဇိ, သမာပဇ္ဇတိ, သမာပန္နော; သော ဘိက္ခု အပ္ပဏိဟိတသ္သ သမာဓိသ္သ လာဘီ, ဝသီ; တေန ဘိက္ခုနာ အပ္ပဏိဟိတော သမာဓိ သစ္ဆိကတော’’တိ ဘဏန္တသ္သ အာပတ္တိ ဒုက္ကဋသ္သ။

Āroceyyāti anupasampannassa – ‘‘yo te vihāre vasi so bhikkhu suññataṃ vimokkhaṃ…pe… animittaṃ vimokkhaṃ appaṇihitaṃ vimokkhaṃ suññataṃ samādhiṃ animittaṃ samādhiṃ appaṇihitaṃ samādhiṃ samāpajji, samāpajjati, samāpanno; so bhikkhu appaṇihitassa samādhissa lābhī, vasī; tena bhikkhunā appaṇihito samādhi sacchikato’’ti bhaṇantassa āpatti dukkaṭassa.

အာရောစေယ္ယာတိ အနုပသမ္ပန္နသ္သ – ‘‘ယော တေ ဝိဟာရေ ဝသိ သော ဘိက္ခု သုညတံ သမာပတ္တိံ။ပေ.။ အနိမိတ္တံ သမာပတ္တိံ အပ္ပဏိဟိတံ သမာပတ္တိံ သမာပဇ္ဇိ, သမာပဇ္ဇတိ, သမာပန္နော; အပ္ပဏိဟိတာယ သမာပတ္တိယာ လာဘီ, ဝသီ; တေန ဘိက္ခုနာ အပ္ပဏိဟိတာ သမာပတ္တိ သစ္ဆိကတာ’’တိ ဘဏန္တသ္သ အာပတ္တိ ဒုက္ကဋသ္သ။

Āroceyyāti anupasampannassa – ‘‘yo te vihāre vasi so bhikkhu suññataṃ samāpattiṃ…pe… animittaṃ samāpattiṃ appaṇihitaṃ samāpattiṃ samāpajji, samāpajjati, samāpanno; appaṇihitāya samāpattiyā lābhī, vasī; tena bhikkhunā appaṇihitā samāpatti sacchikatā’’ti bhaṇantassa āpatti dukkaṭassa.

အာရောစေယ္ယာတိ အနုပသမ္ပန္နသ္သ – ‘‘ယော တေ ဝိဟာရေ ဝသိ သော ဘိက္ခု တိသ္သော ဝိဇ္ဇာ ။ပေ.။ စတ္တာရော သတိပဋ္ဌာနေ, စတ္တာရော သမ္မပ္ပဓာနေ, စတ္တာရော ဣဒ္ဓိပာဒေ, ပဉ္စိန္ဒ္ရိယာနိ, ပဉ္စ ဗလာနိ, သတ္တ ဗောဈင္ဂေ, အရိယံ အဋ္ဌင္ဂိကံ မဂ္ဂံ, သောတာပတ္တိဖလံ, သကဒာဂာမိဖလံ, အနာဂာမိဖလံ, အရဟတ္တံ ⁶⁵ သမာပဇ္ဇိ။ပေ.။ သမာပဇ္ဇတိ, သမာပန္နော။ပေ.။ တသ္သ ဘိက္ခုနော ရာဂော စတ္တော, ဒောသော စတ္တော, မောဟော စတ္တော, ဝန္တော, မုတ္တော, ပဟီနော, ပဋိနိသ္သဋ္ဌော, ဥက္ခေဋိတော, သမုက္ခေဋိတော; တသ္သ ဘိက္ခုနော ရာဂာ စိတ္တံ ဝိနီဝရဏံ, ဒောသာ စိတ္တံ ဝိနီဝရဏံ, မောဟာ စိတ္တံ ဝိနီဝရဏ’’န္တိ ဘဏန္တသ္သ အာပတ္တိ ဒုက္ကဋသ္သ။

Āroceyyāti anupasampannassa – ‘‘yo te vihāre vasi so bhikkhu tisso vijjā …pe… cattāro satipaṭṭhāne, cattāro sammappadhāne, cattāro iddhipāde, pañcindriyāni, pañca balāni, satta bojhaṅge, ariyaṃ aṭṭhaṅgikaṃ maggaṃ, sotāpattiphalaṃ, sakadāgāmiphalaṃ, anāgāmiphalaṃ, arahattaṃ ⁶⁶ samāpajji…pe… samāpajjati, samāpanno…pe… tassa bhikkhuno rāgo catto, doso catto, moho catto, vanto, mutto, pahīno, paṭinissaṭṭho, ukkheṭito, samukkheṭito; tassa bhikkhuno rāgā cittaṃ vinīvaraṇaṃ, dosā cittaṃ vinīvaraṇaṃ, mohā cittaṃ vinīvaraṇa’’nti bhaṇantassa āpatti dukkaṭassa.

အာရောစေယ္ယာတိ အနုပသမ္ပန္နသ္သ – ‘‘ယော တေ ဝိဟာရေ ဝသိ သော ဘိက္ခု သုညာဂာရေ ပဌမံ ဈာနံ။ပေ.။ ဒုတိယံ ဈာနံ တတိယံ ဈာနံ စတုတ္ထံ ဈာနံ သမာပဇ္ဇိ, သမာပဇ္ဇတိ, သမာပန္နော; သော ဘိက္ခု သုညာဂာရေ စတုတ္ထသ္သ ဈာနသ္သ လာဘီ, ဝသီ; တေန ဘိက္ခုနာ သုညာဂာရေ စတုတ္ထံ ဈာနံ သစ္ဆိကတ’’န္တိ ဘဏန္တသ္သ အာပတ္တိ ဒုက္ကဋသ္သ။

Āroceyyāti anupasampannassa – ‘‘yo te vihāre vasi so bhikkhu suññāgāre paṭhamaṃ jhānaṃ…pe… dutiyaṃ jhānaṃ tatiyaṃ jhānaṃ catutthaṃ jhānaṃ samāpajji, samāpajjati, samāpanno; so bhikkhu suññāgāre catutthassa jhānassa lābhī, vasī; tena bhikkhunā suññāgāre catutthaṃ jhānaṃ sacchikata’’nti bhaṇantassa āpatti dukkaṭassa.

အာရောစေယ္ယာတိ အနုပသမ္ပန္နသ္သ – ‘‘ယော တေ စီဝရံ ပရိဘုဉ္ဇိ, ယော တေ ပိဏ္ဍပာတံ ပရိဘုဉ္ဇိ, ယော တေ သေနာသနံ ပရိဘုဉ္ဇိ, ယော တေ ဂိလာနပ္ပစ္စယဘေသဇ္ဇပရိက္ခာရံ ပရိဘုဉ္ဇိ သော ဘိက္ခု သုညာဂာရေ စတုတ္ထံ ဈာနံ သမာပဇ္ဇိ, သမာပဇ္ဇတိ, သမာပန္နော; သော ဘိက္ခု သုညာဂာရေ စတုတ္ထသ္သ ဈာနသ္သ လာဘီ, ဝသီ; တေန ဘိက္ခုနာ သုညာဂာရေ စတုတ္ထံ ဈာနံ သစ္ဆိကတ’’န္တိ ဘဏန္တသ္သ အာပတ္တိ ဒုက္ကဋသ္သ။

Āroceyyāti anupasampannassa – ‘‘yo te cīvaraṃ paribhuñji, yo te piṇḍapātaṃ paribhuñji, yo te senāsanaṃ paribhuñji, yo te gilānappaccayabhesajjaparikkhāraṃ paribhuñji so bhikkhu suññāgāre catutthaṃ jhānaṃ samāpajji, samāpajjati, samāpanno; so bhikkhu suññāgāre catutthassa jhānassa lābhī, vasī; tena bhikkhunā suññāgāre catutthaṃ jhānaṃ sacchikata’’nti bhaṇantassa āpatti dukkaṭassa.

၇၆. အာရောစေယ္ယာတိ အနုပသမ္ပန္နသ္သ – ‘‘ယေန တေ ဝိဟာရော ပရိဘုတ္တော။ပေ.။ ယေန တေ စီဝရံ ပရိဘုတ္တံ, ယေန တေ ပိဏ္ဍပာတော ပရိဘုတ္တော, ယေန တေ သေနာသနံ ပရိဘုတ္တံ, ယေန တေ ဂိလာနပ္ပစ္စယဘေသဇ္ဇပရိက္ခာရော ပရိဘုတ္တော သော ဘိက္ခု သုညာဂာရေ စတုတ္ထံ ဈာနံ သမာပဇ္ဇိ, သမာပဇ္ဇတိ, သမာပန္နော; သော ဘိက္ခု သုညာဂာရေ စတုတ္ထသ္သ ဈာနသ္သ လာဘီ, ဝသီ; တေန ဘိက္ခုနာ သုညာဂာရေ စတုတ္ထံ ဈာနံ သစ္ဆိကတ’’န္တိ ဘဏန္တသ္သ အာပတ္တိ ဒုက္ကဋသ္သ။

76.Āroceyyāti anupasampannassa – ‘‘yena te vihāro paribhutto…pe… yena te cīvaraṃ paribhuttaṃ, yena te piṇḍapāto paribhutto, yena te senāsanaṃ paribhuttaṃ, yena te gilānappaccayabhesajjaparikkhāro paribhutto so bhikkhu suññāgāre catutthaṃ jhānaṃ samāpajji, samāpajjati, samāpanno; so bhikkhu suññāgāre catutthassa jhānassa lābhī, vasī; tena bhikkhunā suññāgāre catutthaṃ jhānaṃ sacchikata’’nti bhaṇantassa āpatti dukkaṭassa.

အာရောစေယ္ယာတိ အနုပသမ္ပန္နသ္သ – ‘‘ယံ တ္ဝံ အာဂမ္မ ဝိဟာရံ အဒာသိ။ပေ.။ စီဝရံ အဒာသိ, ပိဏ္ဍပာတံ အဒာသိ, သေနာသနံ အဒာသိ, ဂိလာနပ္ပစ္စယဘေသဇ္ဇပရိက္ခာရံ အဒာသိ သော ဘိက္ခု သုညာဂာရေ စတုတ္ထံ ဈာနံ သမာပဇ္ဇိ, သမာပဇ္ဇတိ, သမာပန္နော; သော ဘိက္ခု သုညာဂာရေ စတုတ္ထသ္သ ဈာနသ္သ လာဘီ, ဝသီ; တေန ဘိက္ခုနာ သုညာဂာရေ စတုတ္ထံ ဈာနံ သစ္ဆိကတ’’န္တိ ဘဏန္တသ္သ အာပတ္တိ ဒုက္ကဋသ္သ။

Āroceyyāti anupasampannassa – ‘‘yaṃ tvaṃ āgamma vihāraṃ adāsi…pe… cīvaraṃ adāsi, piṇḍapātaṃ adāsi, senāsanaṃ adāsi, gilānappaccayabhesajjaparikkhāraṃ adāsi so bhikkhu suññāgāre catutthaṃ jhānaṃ samāpajji, samāpajjati, samāpanno; so bhikkhu suññāgāre catutthassa jhānassa lābhī, vasī; tena bhikkhunā suññāgāre catutthaṃ jhānaṃ sacchikata’’nti bhaṇantassa āpatti dukkaṭassa.

၇၇. အနာပတ္တိ ဥပသမ္ပန္နသ္သ, ဘူတံ အာရောစေတိ, အာဒိကမ္မိကသ္သာတိ။

77. Anāpatti upasampannassa, bhūtaṃ āroceti, ādikammikassāti.

ဘူတာရောစနသိက္ခာပဒံ နိဋ္ဌိတံ အဋ္ဌမံ။

Bhūtārocanasikkhāpadaṃ niṭṭhitaṃ aṭṭhamaṃ.

၉. ဒုဋ္ဌုလ္လာရောစနသိက္ခာပဒံ

9. Duṭṭhullārocanasikkhāpadaṃ

၇၈. တေန သမယေန ဗုဒ္ဓော ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ တေန ခော ပန သမယေန အာယသ္မာ ဥပနန္ဒော သက္ယပုတ္တော ဆဗ္ဗဂ္ဂိယေဟိ ဘိက္ခူဟိ သဒ္ဓိံ ဘဏ္ဍနကတော ဟောတိ။ သော သဉ္စေတနိကံ သုက္ကဝိသ္သဋ္ဌိံ အာပတ္တိံ အာပဇ္ဇိတ္ဝာ သင္ဃံ တသ္သာ အာပတ္တိယာ ပရိဝာသံ ယာစိ။ တသ္သ သင္ဃော တသ္သာ အာပတ္တိယာ ပရိဝာသံ အဒာသိ။ တေန ခော ပန သမယေန သာဝတ္ထိယံ အညတရသ္သ ပူဂသ္သ သင္ဃဘတ္တံ ဟောတိ။ သော ပရိဝသန္တော ဘတ္တဂ္ဂေ အာသနပရိယန္တေ နိသီဒိ။ ဆဗ္ဗဂ္ဂိယာ ဘိက္ခူ တေ ဥပာသကေ ဧတဒဝောစုံ – ‘‘ဧသော, အာဝုသော, အာယသ္မာ ဥပနန္ဒော သက္ယပုတ္တော တုမ္ဟာကံ သမ္ဘာဝိတော ကုလူပကော; ယေနေဝ ဟတ္ထေန သဒ္ဓာဒေယ္ယံ ဘုဉ္ဇတိ တေနေဝ ဟတ္ထေန ဥပက္ကမိတ္ဝာ အသုစိံ မောစေသိ။ သော သဉ္စေတနိကံ သုက္ကဝိသ္သဋ္ဌိံ အာပတ္တိံ အာပဇ္ဇိတ္ဝာ သင္ဃံ တသ္သာ အာပတ္တိယာ ပရိဝာသံ ယာစိ။ တသ္သ သင္ဃော တသ္သာ အာပတ္တိယာ ပရိဝာသံ အဒာသိ ။ သော ပရိဝသန္တော အာသနပရိယန္တေ နိသိန္နော’’တိ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ ဆဗ္ဗဂ္ဂိယာ ဘိက္ခူ ဘိက္ခုသ္သ ဒုဋ္ဌုလ္လံ အာပတ္တိံ အနုပသမ္ပန္နသ္သ အာရောစေသ္သန္တီ’’တိ။ပေ.။ ‘‘သစ္စံ ကိရ တုမ္ဟေ, ဘိက္ခဝေ, ဘိက္ခုသ္သ ဒုဋ္ဌုလ္လံ အာပတ္တိံ အနုပသမ္ပန္နသ္သ အာရောစေထာ’’တိ? ‘‘သစ္စံ , ဘဂဝာ’’တိ။ ဝိဂရဟိ ဗုဒ္ဓော ဘဂဝာ။ပေ.။ ကထဉ္ဟိ နာမ တုမ္ဟေ, မောဃပုရိသာ, ဘိက္ခုသ္သ ဒုဋ္ဌုလ္လံ အာပတ္တိံ အနုပသမ္ပန္နသ္သ အာရောစေသ္သထ! နေတံ, မောဃပုရိသာ, အပ္ပသန္နာနံ ဝာ ပသာဒာယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခာပဒံ ဥဒ္ဒိသေယ္ယာထ –

78. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmā upanando sakyaputto chabbaggiyehi bhikkhūhi saddhiṃ bhaṇḍanakato hoti. So sañcetanikaṃ sukkavissaṭṭhiṃ āpattiṃ āpajjitvā saṅghaṃ tassā āpattiyā parivāsaṃ yāci. Tassa saṅgho tassā āpattiyā parivāsaṃ adāsi. Tena kho pana samayena sāvatthiyaṃ aññatarassa pūgassa saṅghabhattaṃ hoti. So parivasanto bhattagge āsanapariyante nisīdi. Chabbaggiyā bhikkhū te upāsake etadavocuṃ – ‘‘eso, āvuso, āyasmā upanando sakyaputto tumhākaṃ sambhāvito kulūpako; yeneva hatthena saddhādeyyaṃ bhuñjati teneva hatthena upakkamitvā asuciṃ mocesi. So sañcetanikaṃ sukkavissaṭṭhiṃ āpattiṃ āpajjitvā saṅghaṃ tassā āpattiyā parivāsaṃ yāci. Tassa saṅgho tassā āpattiyā parivāsaṃ adāsi . So parivasanto āsanapariyante nisinno’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū bhikkhussa duṭṭhullaṃ āpattiṃ anupasampannassa ārocessantī’’ti…pe… ‘‘saccaṃ kira tumhe, bhikkhave, bhikkhussa duṭṭhullaṃ āpattiṃ anupasampannassa ārocethā’’ti? ‘‘Saccaṃ , bhagavā’’ti. Vigarahi buddho bhagavā…pe… kathañhi nāma tumhe, moghapurisā, bhikkhussa duṭṭhullaṃ āpattiṃ anupasampannassa ārocessatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –

၇၉. ‘‘ယော ပန ဘိက္ခု ဘိက္ခုသ္သ ဒုဋ္ဌုလ္လံ အာပတ္တိံ အနုပသမ္ပန္နသ္သ အာရောစေယ္ယ, အညတ္ရ ဘိက္ခုသမ္မုတိယာ ⁶⁷, ပာစိတ္တိယ’’န္တိ။

79.‘‘Yo pana bhikkhu bhikkhussa duṭṭhullaṃ āpattiṃ anupasampannassa āroceyya, aññatra bhikkhusammutiyā ⁶⁸, pācittiya’’nti.

၈၀. ယော ပနာတိ ယော ယာဒိသော။ပေ.။ ဘိက္ခူတိ။ပေ.။ အယံ ဣမသ္မိံ အတ္ထေ အဓိပ္ပေတော ဘိက္ခူတိ။

80.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.

ဘိက္ခုသ္သာတိ အညသ္သ ဘိက္ခုသ္သ။

Bhikkhussāti aññassa bhikkhussa.

ဒုဋ္ဌုလ္လာ နာမ အာပတ္တိ – စတ္တာရိ စ ပာရာဇိကာနိ, တေရသ စ သင္ဃာဒိသေသာ။

Duṭṭhullā nāma āpatti – cattāri ca pārājikāni, terasa ca saṅghādisesā.

Anupasampanno nāma bhikkhuñca bhikkhuniñca ṭhapetvā avaseso anupasampanno nāma.

အာရောစေယ္ယာတိ အာရောစေယ္ယ ဣတ္ထိယာ ဝာ ပုရိသသ္သ ဝာ ဂဟဋ္ဌသ္သ ဝာ ပဗ္ဗဇိတသ္သ ဝာ။

Āroceyyāti āroceyya itthiyā vā purisassa vā gahaṭṭhassa vā pabbajitassa vā.

အညတ္ရ ဘိက္ခုသမ္မုတိယာတိ ဌပေတ္ဝာ ဘိက္ခုသမ္မုတိံ။

Aññatra bhikkhusammutiyāti ṭhapetvā bhikkhusammutiṃ.

အတ္ထိ ဘိက္ခုသမ္မုတိ အာပတ္တိပရိယန္တာ, န ကုလပရိယန္တာ။ အတ္ထိ ဘိက္ခုသမ္မုတိ ကုလပရိယန္တာ, န အာပတ္တိပရိယန္တာ, အတ္ထိ ဘိက္ခုသမ္မုတိ အာပတ္တိပရိယန္တာ စ ကုလပရိယန္တာ စ, အတ္ထိ ဘိက္ခုသမ္မုတိ နေဝ အာပတ္တိပရိယန္တာ န ကုလပရိယန္တာ။

Atthi bhikkhusammuti āpattipariyantā, na kulapariyantā. Atthi bhikkhusammuti kulapariyantā, na āpattipariyantā, atthi bhikkhusammuti āpattipariyantā ca kulapariyantā ca, atthi bhikkhusammuti neva āpattipariyantā na kulapariyantā.

အာပတ္တိပရိယန္တာ နာမ အာပတ္တိယော ပရိဂ္ဂဟိတာယော ဟောန္တိ – ‘‘ဧတ္တကာဟိ အာပတ္တီဟိ အာရောစေတဗ္ဗော’’တိ။

Āpattipariyantā nāma āpattiyo pariggahitāyo honti – ‘‘ettakāhi āpattīhi ārocetabbo’’ti.

ကုလပရိယန္တာ နာမ ကုလာနိ ပရိဂ္ဂဟိတာနိ ဟောန္တိ – ‘‘ဧတ္တကေသု ကုလေသု အာရောစေတဗ္ဗော’’တိ။ အာပတ္တိပရိယန္တာ စ ကုလပရိယန္တာ စ နာမ အာပတ္တိယော စ ပရိဂ္ဂဟိတာယော ဟောန္တိ, ကုလာနိ စ ပရိဂ္ဂဟိတာနိ ဟောန္တိ – ‘‘ဧတ္တကာဟိ အာပတ္တီဟိ ဧတ္တကေသု ကုလေသု အာရောစေတဗ္ဗော’’တိ။ နေဝ အာပတ္တိပရိယန္တာ န ကုလပရိယန္တာ နာမ အာပတ္တိယော စ အပရိဂ္ဂဟိတာယော ဟောန္တိ, ကုလာနိ စ အပရိဂ္ဂဟိတာနိ ဟောန္တိ – ‘‘ဧတ္တကာဟိ အာပတ္တီဟိ ဧတ္တကေသု ကုလေသု အာရောစေတဗ္ဗော’’တိ။

Kulapariyantā nāma kulāni pariggahitāni honti – ‘‘ettakesu kulesu ārocetabbo’’ti. Āpattipariyantā ca kulapariyantā ca nāma āpattiyo ca pariggahitāyo honti, kulāni ca pariggahitāni honti – ‘‘ettakāhi āpattīhi ettakesu kulesu ārocetabbo’’ti. Neva āpattipariyantā na kulapariyantā nāma āpattiyo ca apariggahitāyo honti, kulāni ca apariggahitāni honti – ‘‘ettakāhi āpattīhi ettakesu kulesu ārocetabbo’’ti.

၈၁. အာပတ္တိပရိယန္တေ ယာ အာပတ္တိယော ပရိဂ္ဂဟိတာယော ဟောန္တိ, တာ အာပတ္တိယော ဌပေတ္ဝာ အညာဟိ အာပတ္တီဟိ အာရောစေတိ, အာပတ္တိ ပာစိတ္တိယသ္သ။

81. Āpattipariyante yā āpattiyo pariggahitāyo honti, tā āpattiyo ṭhapetvā aññāhi āpattīhi āroceti, āpatti pācittiyassa.

ကုလပရိယန္တေ ယာနိ ကုလာနိ ပရိဂ္ဂဟိတာနိ ဟောန္တိ, တာနိ ကုလာနိ ဌပေတ္ဝာ အညေသု ကုလေသု အာရောစေတိ, အာပတ္တိ ပာစိတ္တိယသ္သ။

Kulapariyante yāni kulāni pariggahitāni honti, tāni kulāni ṭhapetvā aññesu kulesu āroceti, āpatti pācittiyassa.

အာပတ္တိပရိယန္တေ စ ကုလပရိယန္တေ စ ယာ အာပတ္တိယော ပရိဂ္ဂဟိတာယော ဟောန္တိ, တာ အာပတ္တိယော ဌပေတ္ဝာ ယာနိ ကုလာနိ ပရိဂ္ဂဟိတာနိ ဟောန္တိ, တာနိ ကုလာနိ ဌပေတ္ဝာ အညာဟိ အာပတ္တီဟိ အညေသု ကုလေသု အာရောစေတိ, အာပတ္တိ ပာစိတ္တိယသ္သ။

Āpattipariyante ca kulapariyante ca yā āpattiyo pariggahitāyo honti, tā āpattiyo ṭhapetvā yāni kulāni pariggahitāni honti, tāni kulāni ṭhapetvā aññāhi āpattīhi aññesu kulesu āroceti, āpatti pācittiyassa.

နေဝ အာပတ္တိပရိယန္တေ န ကုလပရိယန္တေ, အနာပတ္တိ။

Neva āpattipariyante na kulapariyante, anāpatti.

၈၂. ဒုဋ္ဌုလ္လာယ အာပတ္တိယာ ဒုဋ္ဌုလ္လာပတ္တိသညီ အနုပသမ္ပန္နသ္သ အာရောစေတိ, အညတ္ရ ဘိက္ခုသမ္မုတိယာ, အာပတ္တိ ပာစိတ္တိယသ္သ။

82. Duṭṭhullāya āpattiyā duṭṭhullāpattisaññī anupasampannassa āroceti, aññatra bhikkhusammutiyā, āpatti pācittiyassa.

ဒုဋ္ဌုလ္လာယ အာပတ္တိယာ ဝေမတိကော အနုပသမ္ပန္နသ္သ အာရောစေတိ, အညတ္ရ ဘိက္ခုသမ္မုတိယာ, အာပတ္တိ ပာစိတ္တိယသ္သ။

Duṭṭhullāya āpattiyā vematiko anupasampannassa āroceti, aññatra bhikkhusammutiyā, āpatti pācittiyassa.

ဒုဋ္ဌုလ္လာယ အာပတ္တိယာ အဒုဋ္ဌုလ္လာပတ္တိသညီ အနုပသမ္ပန္နသ္သ အာရောစေတိ, အညတ္ရ ဘိက္ခုသမ္မုတိယာ, အာပတ္တိ ပာစိတ္တိယသ္သ။

Duṭṭhullāya āpattiyā aduṭṭhullāpattisaññī anupasampannassa āroceti, aññatra bhikkhusammutiyā, āpatti pācittiyassa.

အဒုဋ္ဌုလ္လံ အာပတ္တိံ အာရောစေတိ, အာပတ္တိ ဒုက္ကဋသ္သ။

Aduṭṭhullaṃ āpattiṃ āroceti, āpatti dukkaṭassa.

အနုပသမ္ပန္နသ္သ ဒုဋ္ဌုလ္လံ ဝာ အဒုဋ္ဌုလ္လံ ဝာ အဇ္ဈာစာရံ အာရောစေတိ, အာပတ္တိ ဒုက္ကဋသ္သ။

Anupasampannassa duṭṭhullaṃ vā aduṭṭhullaṃ vā ajjhācāraṃ āroceti, āpatti dukkaṭassa.

အဒုဋ္ဌုလ္လာယ အာပတ္တိယာ ဒုဋ္ဌုလ္လာပတ္တိသညီ, အာပတ္တိ ဒုက္ကဋသ္သ။

Aduṭṭhullāya āpattiyā duṭṭhullāpattisaññī, āpatti dukkaṭassa.

အဒုဋ္ဌုလ္လာယ အာပတ္တိယာ ဝေမတိကော, အာပတ္တိ ဒုက္ကဋသ္သ။

Aduṭṭhullāya āpattiyā vematiko, āpatti dukkaṭassa.

အဒုဋ္ဌုလ္လာယ အာပတ္တိယာ အဒုဋ္ဌုလ္လာပတ္တိသညီ, အာပတ္တိ ဒုက္ကဋသ္သ။

Aduṭṭhullāya āpattiyā aduṭṭhullāpattisaññī, āpatti dukkaṭassa.

၈၃. အနာပတ္တိ ဝတ္ထုံ အာရောစေတိ နော အာပတ္တိံ, အာပတ္တိံ အာရောစေတိ နော ဝတ္ထုံ, ဘိက္ခုသမ္မုတိယာ, ဥမ္မတ္တကသ္သ, အာဒိကမ္မိကသ္သာတိ။

83. Anāpatti vatthuṃ āroceti no āpattiṃ, āpattiṃ āroceti no vatthuṃ, bhikkhusammutiyā, ummattakassa, ādikammikassāti.

ဒုဋ္ဌုလ္လာရောစနသိက္ခာပဒံ နိဋ္ဌိတံ နဝမံ။

Duṭṭhullārocanasikkhāpadaṃ niṭṭhitaṃ navamaṃ.

၁၀. ပထဝီခဏနသိက္ခာပဒံ

10. Pathavīkhaṇanasikkhāpadaṃ

၈၄. တေန သမယေန ဗုဒ္ဓော ဘဂဝာ အာဠဝိယံ ဝိဟရတိ အဂ္ဂာဠဝေ စေတိယေ။ တေန ခော ပန သမယေန အာဠဝကာ ⁶⁹ ဘိက္ခူ နဝကမ္မံ ကရောန္တာ ပထဝိံ ခဏန္တိပိ ခဏာပေန္တိပိ။ မနုသ္သာ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ သမဏာ သက္ယပုတ္တိယာ ပထဝိံ ခဏိသ္သန္တိပိ ခဏာပေသ္သန္တိပိ! ဧကိန္ဒ္ရိယံ သမဏာ သက္ယပုတ္တိယာ ဇီဝံ ဝိဟေဌေန္တီ’’တိ! အသ္သောသုံ ခော ဘိက္ခူ တေသံ မနုသ္သာနံ ဥဇ္ဈာယန္တာနံ ခိယ္ယန္တာနံ ဝိပာစေန္တာနံ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ အာဠဝကာ ဘိက္ခူ ပထဝိံ ခဏိသ္သန္တိပိ ခဏာပေသ္သန္တိပီ’’တိ။ပေ.။ ‘‘သစ္စံ ကိရ တုမ္ဟေ, ဘိက္ခဝေ, ပထဝိံ ခဏထပိ ခဏာပေထပီ’’တိ? ‘‘သစ္စံ, ဘဂဝာ’’တိ။ ဝိဂရဟိ ဗုဒ္ဓော ဘဂဝာ။ပေ.။ ကထဉ္ဟိ နာမ တုမ္ဟေ, မောဃပုရိသာ, ပထဝိံ ခဏိသ္သထပိ ခဏာပေသ္သထပိ! ဇီဝသညိနော ဟိ, မောဃပုရိသာ, မနုသ္သာ ပထဝိယာ။ နေတံ, မောဃပုရိသာ, အပ္ပသန္နာနံ ဝာ ပသာဒာယ။ပေ.။ ဧဝဉ္စ ပန, ဘိက္ခဝေ, ဣမံ သိက္ခာပဒံ ဥဒ္ဒိသေယ္ယာထ –

84. Tena samayena buddho bhagavā āḷaviyaṃ viharati aggāḷave cetiye. Tena kho pana samayena āḷavakā ⁷⁰ bhikkhū navakammaṃ karontā pathaviṃ khaṇantipi khaṇāpentipi. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā pathaviṃ khaṇissantipi khaṇāpessantipi! Ekindriyaṃ samaṇā sakyaputtiyā jīvaṃ viheṭhentī’’ti! Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āḷavakā bhikkhū pathaviṃ khaṇissantipi khaṇāpessantipī’’ti…pe… ‘‘saccaṃ kira tumhe, bhikkhave, pathaviṃ khaṇathapi khaṇāpethapī’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, pathaviṃ khaṇissathapi khaṇāpessathapi! Jīvasaññino hi, moghapurisā, manussā pathaviyā. Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –

၈၅. ‘‘ယော ပန ဘိက္ခု ပထဝိံ ခဏေယ္ယ ဝာ ခဏာပေယ္ယ ဝာ, ပာစိတ္တိယ’’န္တိ။

85.‘‘Yo pana bhikkhu pathaviṃ khaṇeyya vā khaṇāpeyya vā, pācittiya’’nti.

၈၆. ယော ပနာတိ ယော ယာဒိသော။ပေ.။ ဘိက္ခူတိ။ပေ.။ အယံ ဣမသ္မိံ အတ္ထေ အဓိပ္ပေတော ဘိက္ခူတိ။

86.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.

ပထဝီ နာမ ဒ္ဝေ ပထဝိယော – ဇာတာ စ ပထဝီ အဇာတာ စ ပထဝီ။

Pathavī nāma dve pathaviyo – jātā ca pathavī ajātā ca pathavī.

ဇာတာ နာမ ပထဝီ – သုဒ္ဓပံသု သုဒ္ဓမတ္တိကာ အပ္ပပာသာဏာ အပ္ပသက္ခရာ အပ္ပကဌလာ အပ္ပမရုမ္ဗာ အပ္ပဝာလိကာ, ယေဘုယ္ယေနပံသုကာ, ယေဘုယ္ယေနမတ္တိကာ။ အဒဍ္ဎာပိ ဝုစ္စတိ ဇာတာ ပထဝီ။ ယောပိ ပံသုပုဉ္ဇော ဝာ မတ္တိကာပုဉ္ဇော ဝာ အတိရေကစာတုမာသံ ဩဝဋ္ဌော, အယမ္ပိ ဝုစ္စတိ ဇာတာ ပထဝီ။

Jātā nāma pathavī – suddhapaṃsu suddhamattikā appapāsāṇā appasakkharā appakaṭhalā appamarumbā appavālikā, yebhuyyenapaṃsukā, yebhuyyenamattikā. Adaḍḍhāpi vuccati jātā pathavī. Yopi paṃsupuñjo vā mattikāpuñjo vā atirekacātumāsaṃ ovaṭṭho, ayampi vuccati jātā pathavī.

အဇာတာ နာမ ပထဝီ – သုဒ္ဓပာသာဏာ သုဒ္ဓသက္ခရာ သုဒ္ဓကဌလာ သုဒ္ဓမရုမ္ဗာ သုဒ္ဓဝာလိကာ အပ္ပပံသုကာ အပ္ပမတ္တိကာ, ယေဘုယ္ယေနပာသာဏာ, ယေဘုယ္ယေနသက္ခရာ, ယေဘုယ္ယေနကဌလာ, ယေဘုယ္ယေနမရုမ္ဗာ, ယေဘုယ္ယေနဝာလိကာ။ ဒဍ္ဎာပိ ဝုစ္စတိ အဇာတာ ပထဝီ။ ယောပိ ပံသုပုဉ္ဇော ဝာ မတ္တိကာပုဉ္ဇော ဝာ ဩမကစာတုမာသံ ဩဝဋ္ဌော, အယမ္ပိ ဝုစ္စတိ အဇာတာ ပထဝီ။

Ajātā nāma pathavī – suddhapāsāṇā suddhasakkharā suddhakaṭhalā suddhamarumbā suddhavālikā appapaṃsukā appamattikā, yebhuyyenapāsāṇā, yebhuyyenasakkharā, yebhuyyenakaṭhalā, yebhuyyenamarumbā, yebhuyyenavālikā. Daḍḍhāpi vuccati ajātā pathavī. Yopi paṃsupuñjo vā mattikāpuñjo vā omakacātumāsaṃ ovaṭṭho, ayampi vuccati ajātā pathavī.

ခဏေယ္ယာတိ သယံ ခဏတိ, အာပတ္တိ ပာစိတ္တိယသ္သ။

Khaṇeyyāti sayaṃ khaṇati, āpatti pācittiyassa.

ခဏာပေယ္ယာတိ အညံ အာဏာပေတိ, အာပတ္တိ ပာစိတ္တိယသ္သ။ သကိံ အာဏတ္တော ဗဟုကမ္ပိ ခဏတိ, အာပတ္တိ ပာစိတ္တိယသ္သ။

Khaṇāpeyyāti aññaṃ āṇāpeti, āpatti pācittiyassa. Sakiṃ āṇatto bahukampi khaṇati, āpatti pācittiyassa.

၈၇. ပထဝိယာ ပထဝိသညီ ခဏတိ ဝာ ခဏာပေတိ ဝာ, ဘိန္ဒတိ ဝာ ဘေဒာပေတိ ဝာ, ဒဟတိ ဝာ ဒဟာပေတိ ဝာ, အာပတ္တိ ပာစိတ္တိယသ္သ။

87. Pathaviyā pathavisaññī khaṇati vā khaṇāpeti vā, bhindati vā bhedāpeti vā, dahati vā dahāpeti vā, āpatti pācittiyassa.

ပထဝိယာ ဝေမတိကော ခဏတိ ဝာ ခဏာပေတိ ဝာ, ဘိန္ဒတိ ဝာ ဘေဒာပေတိ ဝာ, ဒဟတိ ဝာ ဒဟာပေတိ ဝာ, အာပတ္တိ ဒုက္ကဋသ္သ။

Pathaviyā vematiko khaṇati vā khaṇāpeti vā, bhindati vā bhedāpeti vā, dahati vā dahāpeti vā, āpatti dukkaṭassa.

ပထဝိယာ အပထဝိသညီ ခဏတိ ဝာ ခဏာပေတိ ဝာ, ဘိန္ဒတိ ဝာ ဘေဒာပေတိ ဝာ, ဒဟတိ ဝာ ဒဟာပေတိ ဝာ, အနာပတ္တိ။

Pathaviyā apathavisaññī khaṇati vā khaṇāpeti vā, bhindati vā bhedāpeti vā, dahati vā dahāpeti vā, anāpatti.

အပထဝိယာ ပထဝိသညီ, အာပတ္တိ ဒုက္ကဋသ္သ။ အပထဝိယာ ဝေမတိကော, အာပတ္တိ ဒုက္ကဋသ္သ။ အပထဝိယာ အပထဝိသညီ, အနာပတ္တိ။

Apathaviyā pathavisaññī, āpatti dukkaṭassa. Apathaviyā vematiko, āpatti dukkaṭassa. Apathaviyā apathavisaññī, anāpatti.

၈၈. အနာပတ္တိ – ‘‘ဣမံ ဇာန, ဣမံ ဒေဟိ, ဣမံ အာဟရ, ဣမိနာ အတ္ထော, ဣမံ ကပ္ပိယံ ကရောဟီ’’တိ ဘဏတိ, အသဉ္စိစ္စ, အသတိယာ, အဇာနန္တသ္သ, ဥမ္မတ္တကသ္သ, အာဒိကမ္မိကသ္သာတိ။

88. Anāpatti – ‘‘imaṃ jāna, imaṃ dehi, imaṃ āhara, iminā attho, imaṃ kappiyaṃ karohī’’ti bhaṇati, asañcicca, asatiyā, ajānantassa, ummattakassa, ādikammikassāti.

ပထဝီခဏနသိက္ခာပဒံ နိဋ္ဌိတံ ဒသမံ။

Pathavīkhaṇanasikkhāpadaṃ niṭṭhitaṃ dasamaṃ.

မုသာဝာဒဝဂ္ဂော ပဌမော။

Musāvādavaggo paṭhamo.

တသ္သုဒ္ဒာနံ –

Tassuddānaṃ –

မုသာ ဩမသပေသုညံ၊ ပဒသေယ္ယာယ ဝေ ဒုဝေ။

Musā omasapesuññaṃ, padaseyyāya ve duve;

အညတ္ရ ဝိညုနာ ဘူတာ၊ ဒုဋ္ဌုလ္လာပတ္တိ ခဏနာတိ။

Aññatra viññunā bhūtā, duṭṭhullāpatti khaṇanāti.

Next: ၂. ဘူတဂာမဝဂ္ဂော • 2. Bhūtagāmavaggo

Footnotes:

1. ဒဝာယ ဘဏတိ, ရဝာယ ဘဏတိ (သ္ယာ.)

2. davāya bhaṇati, ravāya bhaṇati (syā.)

3. ဘဏ္ဍေန္တာ (ဣတိပိ)

4. bhaṇḍentā (itipi)

5. တက္ကသီလာယံ (က.)

6. ဗလိဝဒ္ဒော (သီ.), ဗလိဗဒ္ဒော (သ္ယာ.)

7. အဉ္ဆ ကူဋ (သီ. သ္ယာ.)

8. takkasīlāyaṃ (ka.)

9. balivaddo (sī.), balibaddo (syā.)

10. añcha kūṭa (sī. syā.)

11. ဇာ. ၁.၁.၂၈ နန္ဒိဝိသာလဇာတကေပိ၊ တတ္ထ ပန မနုညသဒ္ဒော ဒိသ္သတိ

12. jā. 1.1.28 nandivisālajātakepi, tattha pana manuññasaddo dissati

13. ဝဒေတီတိ ဥဒ္ဒေသော။ ဘဏတီတိ ဝိတ္ထာရော (ဝဇိရဗုဒ္ဓိ)

14. vadetīti uddeso. bhaṇatīti vitthāro (vajirabuddhi)

15. ပဒသော ဓမ္မော (ဣတိပိ)

16. padaso dhammo (itipi)

17. ဝသတိ, သဗ္ဗအစ္ဆန္နေ သဗ္ဗအပရိစ္ဆန္နေ, (သီ.)

18. vasati, sabbaacchanne sabbaaparicchanne, (sī.)

19. ဧတ္ထ အမ္ဗဋ္ဌသုတ္တာဒိဋီကာ ဩလောကေတဗ္ဗာ

20. သမ္ပဋိစ္ဆတု (သ္ယာ.)

21. ettha ambaṭṭhasuttādiṭīkā oloketabbā

22. sampaṭicchatu (syā.)

23. ယက္ခိနီ (က.)

24. yakkhinī (ka.)

25. အနာပတ္တိ သဗ္ဗအစ္ဆန္နေ သဗ္ဗအပရိစ္ဆန္နေ, (သီ.)

26. anāpatti sabbaacchanne sabbaaparicchanne, (sī.)

27. ပာရာ. ၁၉၃

28. pārā. 193

29. အတ္တနာ ပိဝန္တိ (သ္ယာ. က.)

30. attanā pivanti (syā. ka.)

31. ပာရာ. ၁၉၈

32. pārā. 198

33. ပာရာ. ၁၉၉

34. pārā. 199

35. ပာရာ. ၁၉၉

36. pārā. 199

37. ပာရာ. ၁၉၉

38. pārā. 199

39. ပာရာ. ၁၉၉

40. pārā. 199

41. ပာရာ. ၁၉၉

42. pārā. 199

43. ပာရာ. ၁၉၉

44. pārā. 199

45. ပာရာ. ၁၉၉

46. အရဟတ္တဖလသ္သ (သ္ယာ.)

47. pārā. 199

48. arahattaphalassa (syā.)

49. ပာရာ. ၁၉၉

50. pārā. 199

51. ပာရာ. ၁၉၉

52. pārā. 199

53. ပာရာ. ၁၉၉

54. pārā. 199

55. အရဟတ္တဖလံ (သ္ယာ.)

56. arahattaphalaṃ (syā.)

57. အရဟတ္တဖလဉ္စ (သ္ယာ.)

58. အရဟတ္တဖလသ္သ (သ္ယာ.)

59. arahattaphalañca (syā.)

60. arahattaphalassa (syā.)

61. အရဟတ္တဖလဉ္စ (သ္ယာ.)

62. arahattaphalañca (syā.)

63. အရဟတ္တဖလံ (သ္ယာ.)

64. arahattaphalaṃ (syā.)

65. အရဟတ္တဖလံ (သ္ယာ.)

66. arahattaphalaṃ (syā.)

67. ဘိက္ခုသမ္မတိယာ (သ္ယာ.)

68. bhikkhusammatiyā (syā.)

69. အာဠဝိကာ (သ္ယာ.)

70. āḷavikā (syā.)

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact