| Library / Tipiṭaka / तिपिटक • Tipiṭaka / अपदानपाळि • Apadānapāḷi |
८. मुट्ठिपूजकत्थेरअपदानं
8. Muṭṭhipūjakattheraapadānaṃ
४२.
42.
‘‘सुमेधो नाम भगवा, लोकजेट्ठो नरासभो।
‘‘Sumedho nāma bhagavā, lokajeṭṭho narāsabho;
पच्छिमे अनुकम्पाय, पधानं पदही जिनो॥
Pacchime anukampāya, padhānaṃ padahī jino.
४३.
43.
‘‘तस्स चङ्कममानस्स, द्विपदिन्दस्स तादिनो।
‘‘Tassa caṅkamamānassa, dvipadindassa tādino;
गिरिनेलस्स पुप्फानं, मुट्ठिं बुद्धस्स रोपयिं॥
Girinelassa pupphānaṃ, muṭṭhiṃ buddhassa ropayiṃ.
४४.
44.
‘‘तेन चित्तप्पसादेन, सुक्कमूलेन चोदितो।
‘‘Tena cittappasādena, sukkamūlena codito;
तिंसकप्पसहस्सानि, दुग्गतिं नुपपज्जहं॥
Tiṃsakappasahassāni, duggatiṃ nupapajjahaṃ.
४५.
45.
‘‘तेवीसतिकप्पसते, सुनेलो नाम खत्तियो।
‘‘Tevīsatikappasate, sunelo nāma khattiyo;
सत्तरतनसम्पन्नो, एको आसिं महब्बलो॥
Sattaratanasampanno, eko āsiṃ mahabbalo.
४६.
46.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा मुट्ठिपूजको थेरो इमा गाथायो अभासित्थाति।
Itthaṃ sudaṃ āyasmā muṭṭhipūjako thero imā gāthāyo abhāsitthāti.
मुट्ठिपूजकत्थेरस्सापदानं अट्ठमं।
Muṭṭhipūjakattherassāpadānaṃ aṭṭhamaṃ.
