| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၁၀. ပုပ္ဖဝဂ္ဂော
10. Pupphavaggo
၁. နဒီသုတ္တံ
1. Nadīsuttaṃ
၉၃. သာဝတ္ထိနိဒာနံ ။ ‘‘သေယ္ယထာပိ, ဘိက္ခဝေ, နဒီ ပဗ္ဗတေယ္ယာ ဩဟာရိနီ ဒူရင္ဂမာ သီဃသောတာ။ တသ္သာ ဥဘောသု တီရေသု 1 ကာသာ စေပိ ဇာတာ အသ္သု, တေ နံ အဇ္ဈောလမ္ဗေယ္ယုံ; ကုသာ စေပိ ဇာတာ အသ္သု, တေ နံ အဇ္ဈောလမ္ဗေယ္ယုံ; ပဗ္ဗဇာ 2 စေပိ ဇာတာ အသ္သု, တေ နံ အဇ္ဈောလမ္ဗေယ္ယုံ; ဗီရဏာ စေပိ ဇာတာ အသ္သု, တေ နံ အဇ္ဈောလမ္ဗေယ္ယုံ; ရုက္ခာ စေပိ ဇာတာ အသ္သု, တေ နံ အဇ္ဈောလမ္ဗေယ္ယုံ။ တသ္သာ ပုရိသော သောတေန ဝုယ္ဟမာနော ကာသေ စေပိ ဂဏ္ဟေယ္ယ, တေ ပလုဇ္ဇေယ္ယုံ။ သော တတောနိဒာနံ အနယဗ္ယသနံ အာပဇ္ဇေယ္ယ။ ကုသေ စေပိ ဂဏ္ဟေယ္ယ, ပဗ္ဗဇေ စေပိ ဂဏ္ဟေယ္ယ, ဗီရဏေ စေပိ ဂဏ္ဟေယ္ယ, ရုက္ခေ စေပိ ဂဏ္ဟေယ္ယ, တေ ပလုဇ္ဇေယ္ယုံ ။ သော တတောနိဒာနံ အနယဗ္ယသနံ အာပဇ္ဇေယ္ယ။ ဧဝမေဝ ခော, ဘိက္ခဝေ, အသ္သုတဝာ ပုထုဇ္ဇနော အရိယာနံ အဒသ္သာဝီ အရိယဓမ္မသ္သ အကောဝိဒော အရိယဓမ္မေ အဝိနီတော, သပ္ပုရိသာနံ အဒသ္သာဝီ သပ္ပုရိသဓမ္မသ္သ အကောဝိဒော သပ္ပုရိသဓမ္မေ အဝိနီတော ရူပံ အတ္တတော သမနုပသ္သတိ, ရူပဝန္တံ ဝာ အတ္တာနံ; အတ္တနိ ဝာ ရူပံ, ရူပသ္မိံ ဝာ အတ္တာနံ။ တသ္သ တံ ရူပံ ပလုဇ္ဇတိ။ သော တတောနိဒာနံ အနယဗ္ယသနံ အာပဇ္ဇတိ။ ဝေဒနံ။ သညံ။ သင္ခာရေ။ ဝိညာဏံ အတ္တတော သမနုပသ္သတိ, ဝိညာဏဝန္တံ ဝာ အတ္တာနံ ; အတ္တနိ ဝာ ဝိညာဏံ , ဝိညာဏသ္မိံ ဝာ အတ္တာနံ။ တသ္သ တံ ဝိညာဏံ ပလုဇ္ဇတိ။ သော တတောနိဒာနံ အနယဗ္ယသနံ အာပဇ္ဇတိ။ တံ ကိံ မညထ, ဘိက္ခဝေ, ရူပံ နိစ္စံ ဝာ အနိစ္စံ ဝာ’’တိ? ‘‘အနိစ္စံ ဘန္တေ’’။ ‘‘ဝေဒနာ။ သညာ။ သင္ခာရာ။ ဝိညာဏံ နိစ္စံ ဝာ အနိစ္စံ ဝာ’’တိ? ‘‘အနိစ္စံ ဘန္တေ’’။ ‘‘တသ္မာတိဟ။ပေ.။ ဧဝံ ပသ္သံ။ပေ.။ နာပရံ ဣတ္ထတ္တာယာတိ ပဇာနာတီ’’တိ။ ပဌမံ။
93. Sāvatthinidānaṃ . ‘‘Seyyathāpi, bhikkhave, nadī pabbateyyā ohārinī dūraṅgamā sīghasotā. Tassā ubhosu tīresu 3 kāsā cepi jātā assu, te naṃ ajjholambeyyuṃ; kusā cepi jātā assu, te naṃ ajjholambeyyuṃ; pabbajā 4 cepi jātā assu, te naṃ ajjholambeyyuṃ; bīraṇā cepi jātā assu, te naṃ ajjholambeyyuṃ; rukkhā cepi jātā assu, te naṃ ajjholambeyyuṃ. Tassā puriso sotena vuyhamāno kāse cepi gaṇheyya, te palujjeyyuṃ. So tatonidānaṃ anayabyasanaṃ āpajjeyya. Kuse cepi gaṇheyya, pabbaje cepi gaṇheyya, bīraṇe cepi gaṇheyya, rukkhe cepi gaṇheyya, te palujjeyyuṃ . So tatonidānaṃ anayabyasanaṃ āpajjeyya. Evameva kho, bhikkhave, assutavā puthujjano ariyānaṃ adassāvī ariyadhammassa akovido ariyadhamme avinīto, sappurisānaṃ adassāvī sappurisadhammassa akovido sappurisadhamme avinīto rūpaṃ attato samanupassati, rūpavantaṃ vā attānaṃ; attani vā rūpaṃ, rūpasmiṃ vā attānaṃ. Tassa taṃ rūpaṃ palujjati. So tatonidānaṃ anayabyasanaṃ āpajjati. Vedanaṃ… saññaṃ… saṅkhāre… viññāṇaṃ attato samanupassati, viññāṇavantaṃ vā attānaṃ ; attani vā viññāṇaṃ , viññāṇasmiṃ vā attānaṃ. Tassa taṃ viññāṇaṃ palujjati. So tatonidānaṃ anayabyasanaṃ āpajjati. Taṃ kiṃ maññatha, bhikkhave, rūpaṃ niccaṃ vā aniccaṃ vā’’ti? ‘‘Aniccaṃ bhante’’. ‘‘Vedanā… saññā… saṅkhārā… viññāṇaṃ niccaṃ vā aniccaṃ vā’’ti? ‘‘Aniccaṃ bhante’’. ‘‘Tasmātiha…pe… evaṃ passaṃ…pe… nāparaṃ itthattāyāti pajānātī’’ti. Paṭhamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁. နဒီသုတ္တဝဏ္ဏနာ • 1. Nadīsuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁. နဒီသုတ္တဝဏ္ဏနာ • 1. Nadīsuttavaṇṇanā
