| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ • Saṃyuttanikāya |
೭. ನಾಗದತ್ತಸುತ್ತಂ
7. Nāgadattasuttaṃ
೨೨೭. ಏಕಂ ಸಮಯಂ ಆಯಸ್ಮಾ ನಾಗದತ್ತೋ ಕೋಸಲೇಸು ವಿಹರತಿ ಅಞ್ಞತರಸ್ಮಿಂ ವನಸಣ್ಡೇ। ತೇನ ಖೋ ಪನ ಸಮಯೇನ ಆಯಸ್ಮಾ ನಾಗದತ್ತೋ ಅತಿಕಾಲೇನ ಗಾಮಂ ಪವಿಸತಿ, ಅತಿದಿವಾ ಪಟಿಕ್ಕಮತಿ। ಅಥ ಖೋ ಯಾ ತಸ್ಮಿಂ ವನಸಣ್ಡೇ ಅಧಿವತ್ಥಾ ದೇವತಾ ಆಯಸ್ಮತೋ ನಾಗದತ್ತಸ್ಸ ಅನುಕಮ್ಪಿಕಾ ಅತ್ಥಕಾಮಾ ಆಯಸ್ಮನ್ತಂ ನಾಗದತ್ತಂ ಸಂವೇಜೇತುಕಾಮಾ ಯೇನಾಯಸ್ಮಾ ನಾಗದತ್ತೋ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಆಯಸ್ಮನ್ತಂ ನಾಗದತ್ತಂ ಗಾಥಾಹಿ ಅಜ್ಝಭಾಸಿ –
227. Ekaṃ samayaṃ āyasmā nāgadatto kosalesu viharati aññatarasmiṃ vanasaṇḍe. Tena kho pana samayena āyasmā nāgadatto atikālena gāmaṃ pavisati, atidivā paṭikkamati. Atha kho yā tasmiṃ vanasaṇḍe adhivatthā devatā āyasmato nāgadattassa anukampikā atthakāmā āyasmantaṃ nāgadattaṃ saṃvejetukāmā yenāyasmā nāgadatto tenupasaṅkami; upasaṅkamitvā āyasmantaṃ nāgadattaṃ gāthāhi ajjhabhāsi –
‘‘ಕಾಲೇ ಪವಿಸ ನಾಗದತ್ತ, ದಿವಾ ಚ ಆಗನ್ತ್ವಾ ಅತಿವೇಲಚಾರೀ।
‘‘Kāle pavisa nāgadatta, divā ca āgantvā ativelacārī;
ಸಂಸಟ್ಠೋ ಗಹಟ್ಠೇಹಿ, ಸಮಾನಸುಖದುಕ್ಖೋ॥
Saṃsaṭṭho gahaṭṭhehi, samānasukhadukkho.
‘‘ಭಾಯಾಮಿ ನಾಗದತ್ತಂ ಸುಪ್ಪಗಬ್ಭಂ, ಕುಲೇಸು ವಿನಿಬದ್ಧಂ।
‘‘Bhāyāmi nāgadattaṃ suppagabbhaṃ, kulesu vinibaddhaṃ;
ಮಾ ಹೇವ ಮಚ್ಚುರಞ್ಞೋ ಬಲವತೋ, ಅನ್ತಕಸ್ಸ ವಸಂ ಉಪೇಸೀ’’ತಿ 1॥
Mā heva maccurañño balavato, antakassa vasaṃ upesī’’ti 2.
ಅಥ ಖೋ ಆಯಸ್ಮಾ ನಾಗದತ್ತೋ ತಾಯ ದೇವತಾಯ ಸಂವೇಜಿತೋ ಸಂವೇಗಮಾಪಾದೀತಿ।
Atha kho āyasmā nāgadatto tāya devatāya saṃvejito saṃvegamāpādīti.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೭. ನಾಗದತ್ತಸುತ್ತವಣ್ಣನಾ • 7. Nāgadattasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೭. ನಾಗದತ್ತಸುತ್ತವಣ್ಣನಾ • 7. Nāgadattasuttavaṇṇanā
