| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
8. நாக³புப்பி²யத்தே²ரஅபதா³னவண்ணனா
8. Nāgapupphiyattheraapadānavaṇṇanā
ஸுவச்சோ² நாம நாமேனாதிஆதி³கங் ஆயஸ்மதோ நாக³புப்பி²யத்தே²ரஸ்ஸ அபதா³னங். அயம்பி தே²ரோ புரிமஜினநிஸபே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பது³முத்தரப⁴க³வதோ காலே ப்³ராஹ்மணகுலே நிப்³ப³த்தோ வுத்³தி⁴ப்பத்தோ வேத³த்தயாதீ³ஸு ஸகஸிப்பேஸு நிப்ப²த்திங் பத்வா தத்த² ஸாரங் அதி³ஸ்வா ஹிமவந்தங் பவிஸித்வா தாபஸபப்³ப³ஜ்ஜங் பப்³ப³ஜித்வா ஜா²னஸமாபத்திஸுகே²ன வீதினாமேஸி. தஸ்மிங் ஸமயே பது³முத்தரோ ப⁴க³வா தஸ்ஸானுகம்பாய தத்த² அக³மாஸி. ஸோ தாபஸோ தங் ப⁴க³வந்தங் தி³ஸ்வா லக்க²ணஸத்தே²ஸு சே²கத்தா ப⁴க³வதோ லக்க²ணரூபஸம்பத்தியா பஸன்னோ வந்தி³த்வா அஞ்ஜலிங் பக்³க³ய்ஹ அட்டா²ஸி. ஆகாஸதோ அனோதிண்ணத்தா பூஜாஸக்காரே அகதேயேவ ஆகாஸேனேவ பக்காமி. அத² ஸோ தாபஸோ ஸஸிஸ்ஸோ நாக³புப்ப²ங் ஓசினித்வா தேன புப்பே²ன ப⁴க³வதோ க³ததி³ஸாபா⁴க³மக்³க³ங் பூஜேஸி.
Suvaccho nāma nāmenātiādikaṃ āyasmato nāgapupphiyattherassa apadānaṃ. Ayampi thero purimajinanisabhesu katādhikāro tattha tattha bhave vivaṭṭūpanissayāni puññāni upacinanto padumuttarabhagavato kāle brāhmaṇakule nibbatto vuddhippatto vedattayādīsu sakasippesu nipphattiṃ patvā tattha sāraṃ adisvā himavantaṃ pavisitvā tāpasapabbajjaṃ pabbajitvā jhānasamāpattisukhena vītināmesi. Tasmiṃ samaye padumuttaro bhagavā tassānukampāya tattha agamāsi. So tāpaso taṃ bhagavantaṃ disvā lakkhaṇasatthesu chekattā bhagavato lakkhaṇarūpasampattiyā pasanno vanditvā añjaliṃ paggayha aṭṭhāsi. Ākāsato anotiṇṇattā pūjāsakkāre akateyeva ākāseneva pakkāmi. Atha so tāpaso sasisso nāgapupphaṃ ocinitvā tena pupphena bhagavato gatadisābhāgamaggaṃ pūjesi.
39. ஸோ தேன புஞ்ஞேன தே³வமனுஸ்ஸேஸு ஸங்ஸரந்தோ உப⁴யஸம்பத்தியோ அனுப⁴வந்தோ ஸப்³ப³த்த² பூஜிதோ இமஸ்மிங் பு³த்³து⁴ப்பாதே³ ஸாவத்தி²யங் குலகே³ஹே நிப்³ப³த்தோ வுத்³தி⁴மன்வாய ஸத்³தா⁴ஸம்பன்னோ பப்³ப³ஜித்வா வத்தபடிபத்தியா ஸாஸனங் ஸோப⁴யமானோ நசிரஸ்ஸேவ அரஹா ஹுத்வா ‘‘கேன நு கோ² குஸலகம்மேன மயா அயங் லோகுத்தரஸம்பத்தி லத்³தா⁴’’தி அதீதகம்மங் ஸரந்தோ புப்³ப³கம்மங் பச்சக்க²தோ ஞத்வா ஸஞ்ஜாதஸோமனஸ்ஸோ புப்³ப³சரிதாபதா³னங் பகாஸெந்தோ ஸுவச்சோ² நாம நாமேனாதிஆதி³மாஹ. தத்த² வச்ச²கொ³த்தே ஜாதத்தா வச்சோ², ஸுந்த³ரோ ச ஸோ வச்சோ² சேதி ஸுவச்சோ². நாமேன ஸுவச்சோ² நாம ப்³ராஹ்மணோ மந்தபாரகூ³ வேத³த்தயாதி³ஸகலமந்தஸத்தே² கோடிப்பத்தோதி அத்தோ². ஸேஸங் ஹெட்டா² வுத்தனயத்தா உத்தானத்த²மேவாதி.
39. So tena puññena devamanussesu saṃsaranto ubhayasampattiyo anubhavanto sabbattha pūjito imasmiṃ buddhuppāde sāvatthiyaṃ kulagehe nibbatto vuddhimanvāya saddhāsampanno pabbajitvā vattapaṭipattiyā sāsanaṃ sobhayamāno nacirasseva arahā hutvā ‘‘kena nu kho kusalakammena mayā ayaṃ lokuttarasampatti laddhā’’ti atītakammaṃ saranto pubbakammaṃ paccakkhato ñatvā sañjātasomanasso pubbacaritāpadānaṃ pakāsento suvaccho nāma nāmenātiādimāha. Tattha vacchagotte jātattā vaccho, sundaro ca so vaccho ceti suvaccho. Nāmena suvaccho nāma brāhmaṇo mantapāragū vedattayādisakalamantasatthe koṭippattoti attho. Sesaṃ heṭṭhā vuttanayattā uttānatthamevāti.
நாக³புப்பி²யத்தே²ரஅபதா³னவண்ணனா ஸமத்தா.
Nāgapupphiyattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 8. நாக³புப்பி²யத்தே²ரஅபதா³னங் • 8. Nāgapupphiyattheraapadānaṃ
