| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
5. த⁴ம்மிகவக்³கோ³
5. Dhammikavaggo
1. நாக³ஸுத்தவண்ணனா
1. Nāgasuttavaṇṇanā
43. பஞ்சமஸ்ஸ பட²மே ஆயஸ்மதா ஆனந்தே³ன ஸத்³தி⁴ந்தி இத³ங் ‘‘ஆயாமானந்தா³’’தி தே²ரங் ஆமந்தெத்வா க³தத்தா வுத்தங், ஸத்தா² பன அனூனேஹி பஞ்சஹி பி⁴க்கு²ஸதேஹி பரிவுதோ தத்த² அக³மாஸீதி வேதி³தப்³போ³. தேனுபஸங்கமீதி தேஹேவ பஞ்சஹி பி⁴க்கு²ஸதேஹி பரிவுதோ உபஸங்கமி. பரிஸிஞ்சித்வாதி வோஹாரவசனமேதங், ந்ஹாயித்வாதி அத்தோ². புப்³பா³பயமானோதி ரத்தது³பட்டங் நிவாஸெத்வா உத்தராஸங்க³சீவரங் த்³வீஹி ஹத்தே²ஹி க³ஹெத்வா பச்சி²மலோகதா⁴துங் பிட்டி²தோ கத்வா புரத்தி²மலோகதா⁴துங் அபி⁴முகோ² வோத³கபா⁴வேன க³த்தானி புப்³ப³ஸதி³ஸானி குருமானோ அட்டா²ஸீதி அத்தோ². பி⁴க்கு²ஸங்கோ⁴பி தேன தேன டா²னேன ஓதரித்வா ந்ஹத்வா பச்சுத்தரித்வா ஸத்தா²ரங்யேவ பரிவாரெத்வா அட்டா²ஸி. இதி தஸ்மிங் ஸமயே ஆகாஸதோ பதமானங் ரத்தஸுவண்ணகுண்ட³லங் விய ஸூரியோ பச்சி²மலோகதா⁴துங் படிபஜ்ஜி, பரிஸுத்³த⁴ரஜதமண்ட³லோ விய பாசீனலோகதா⁴துதோ சந்தோ³ அப்³பு⁴க்³க³ஞ்சி², மஜ்ஜ²ட்டா²னேபி பஞ்சபி⁴க்கு²ஸதபரிவாரோ ஸம்மாஸம்பு³த்³தோ⁴ ச²ப்³ப³ண்ணபு³த்³த⁴ரஸ்மியோ விஸ்ஸஜ்ஜெத்வா புப்³ப³கொட்ட²கனதீ³தீரே லோகங் அலங்குருமானோ அட்டா²ஸி.
43. Pañcamassa paṭhame āyasmatā ānandena saddhinti idaṃ ‘‘āyāmānandā’’ti theraṃ āmantetvā gatattā vuttaṃ, satthā pana anūnehi pañcahi bhikkhusatehi parivuto tattha agamāsīti veditabbo. Tenupasaṅkamīti teheva pañcahi bhikkhusatehi parivuto upasaṅkami. Parisiñcitvāti vohāravacanametaṃ, nhāyitvāti attho. Pubbāpayamānoti rattadupaṭṭaṃ nivāsetvā uttarāsaṅgacīvaraṃ dvīhi hatthehi gahetvā pacchimalokadhātuṃ piṭṭhito katvā puratthimalokadhātuṃ abhimukho vodakabhāvena gattāni pubbasadisāni kurumāno aṭṭhāsīti attho. Bhikkhusaṅghopi tena tena ṭhānena otaritvā nhatvā paccuttaritvā satthāraṃyeva parivāretvā aṭṭhāsi. Iti tasmiṃ samaye ākāsato patamānaṃ rattasuvaṇṇakuṇḍalaṃ viya sūriyo pacchimalokadhātuṃ paṭipajji, parisuddharajatamaṇḍalo viya pācīnalokadhātuto cando abbhuggañchi, majjhaṭṭhānepi pañcabhikkhusataparivāro sammāsambuddho chabbaṇṇabuddharasmiyo vissajjetvā pubbakoṭṭhakanadītīre lokaṃ alaṅkurumāno aṭṭhāsi.
தேன கோ² பன ஸமயேன…பே॰… ஸேதோ நாம நாகோ³தி ஸேதவண்ணதாய ஏவங் லத்³த⁴னாமோ ஹத்தி²னாகோ³. மஹாதூரியதாளிதவாதி³தேனாதி மஹந்தேன தூரியதாளிதவாதி³தேன. தத்த² பட²மங் ஸங்க⁴ட்டனங் தாளிதங் நாம ஹோதி, ததோ பரங் வாதி³தங். ஜனோதி ஹத்தி²த³ஸ்ஸனத்த²ங் ஸன்னிபதிதமஹாஜனோ. தி³ஸ்வா ஏவமாஹாதி அங்க³பச்சங்கா³னி க⁴ங்ஸித்வா ந்ஹாபெத்வா உத்தாரெத்வா ப³ஹிதீரே ட²பெத்வா க³த்தானி வோத³கானி கத்வா ஹத்தா²லங்காரேன அலங்கதங் தங் மஹானாக³ங் தி³ஸ்வா இத³ங் ‘‘அபி⁴ரூபோ வத, போ⁴’’தி பஸங்ஸாவசனமாஹ. காயுபபன்னோதி ஸரீரஸம்பத்தியா உபபன்னோ, பரிபுண்ணங்க³பச்சங்கோ³தி அத்தோ². ஆயஸ்மா உதா³யீதி படிஸம்பி⁴தா³ப்பத்தோ காளுதா³யித்தே²ரோ. ஏதத³வோசாதி தங் மஹாஜனங் ஹத்தி²ஸ்ஸ வண்ணங் ப⁴ணந்தங் தி³ஸ்வா ‘‘அயங் ஜனோ அஹேதுகபடிஸந்தி⁴யங் நிப்³ப³த்தஹத்தி²னோ வண்ணங் கதே²தி, ந பு³த்³த⁴ஹத்தி²ஸ்ஸ. அஹங் தா³னி இமினா ஹத்தி²னாகே³ன உபமங் கத்வா பு³த்³த⁴னாக³ஸ்ஸ வண்ணங் கதெ²ஸ்ஸாமீ’’தி சிந்தெத்வா ஏதங் ‘‘ஹத்தி²மேவ நு கோ², ப⁴ந்தே’’திஆதி³வசனங் அவோச. தத்த² மஹந்தந்தி ஆரோஹஸம்பன்னங். ப்³ரஹந்தந்தி பரிணாஹஸம்பன்னங். ஏவமாஹாதி ஏவங் வத³தி. அத² ப⁴க³வா யஸ்மா அயங் நாக³ஸத்³தோ³ ஹத்தி²ம்ஹிசேவ அஸ்ஸகோ³ணஉரக³ருக்க²மனுஸ்ஸேஸு சாபி பவத்ததி, தஸ்மா ஹத்தி²ம்பி கோ²திஆதி³மாஹ.
Tena kho pana samayena…pe… seto nāma nāgoti setavaṇṇatāya evaṃ laddhanāmo hatthināgo. Mahātūriyatāḷitavāditenāti mahantena tūriyatāḷitavāditena. Tattha paṭhamaṃ saṅghaṭṭanaṃ tāḷitaṃ nāma hoti, tato paraṃ vāditaṃ. Janoti hatthidassanatthaṃ sannipatitamahājano. Disvā evamāhāti aṅgapaccaṅgāni ghaṃsitvā nhāpetvā uttāretvā bahitīre ṭhapetvā gattāni vodakāni katvā hatthālaṅkārena alaṅkataṃ taṃ mahānāgaṃ disvā idaṃ ‘‘abhirūpo vata, bho’’ti pasaṃsāvacanamāha. Kāyupapannoti sarīrasampattiyā upapanno, paripuṇṇaṅgapaccaṅgoti attho. Āyasmā udāyīti paṭisambhidāppatto kāḷudāyitthero. Etadavocāti taṃ mahājanaṃ hatthissa vaṇṇaṃ bhaṇantaṃ disvā ‘‘ayaṃ jano ahetukapaṭisandhiyaṃ nibbattahatthino vaṇṇaṃ katheti, na buddhahatthissa. Ahaṃ dāni iminā hatthināgena upamaṃ katvā buddhanāgassa vaṇṇaṃ kathessāmī’’ti cintetvā etaṃ ‘‘hatthimeva nu kho, bhante’’tiādivacanaṃ avoca. Tattha mahantanti ārohasampannaṃ. Brahantanti pariṇāhasampannaṃ. Evamāhāti evaṃ vadati. Atha bhagavā yasmā ayaṃ nāgasaddo hatthimhiceva assagoṇauragarukkhamanussesu cāpi pavattati, tasmā hatthimpi khotiādimāha.
ஆகு³ந்தி பாபகங் லாமகங் அகுஸலத⁴ம்மங். தமஹங் நாகோ³தி ப்³ரூமீதி தங் அஹங் இமேஹி தீஹி த்³வாரேஹி த³ஸன்னங் அகுஸலகம்மபதா²னங் த்³வாத³ஸன்னஞ்ச அகுஸலசித்தானங் அகரணதோ நாகோ³தி வதா³மி. அயஞ்ஹி ந ஆகு³ங் கரோதீதி இமினா அத்தே²ன நாகோ³. இமாஹி கா³தா²ஹி அனுமோதா³மீதி இமாஹி சதுஸட்டி²பதா³ஹி ஸோளஸஹி கா³தா²ஹி அனுமோதா³மி அபி⁴னந்தா³மி.
Āgunti pāpakaṃ lāmakaṃ akusaladhammaṃ. Tamahaṃ nāgoti brūmīti taṃ ahaṃ imehi tīhi dvārehi dasannaṃ akusalakammapathānaṃ dvādasannañca akusalacittānaṃ akaraṇato nāgoti vadāmi. Ayañhi na āguṃ karotīti iminā atthena nāgo. Imāhi gāthāhi anumodāmīti imāhi catusaṭṭhipadāhi soḷasahi gāthāhi anumodāmi abhinandāmi.
மனுஸ்ஸபூ⁴தந்தி தே³வாதி³பா⁴வங் அனுபக³ந்த்வா மனுஸ்ஸமேவ பூ⁴தங். அத்தத³ந்தந்தி அத்தனாயேவ த³ந்தங், ந அஞ்ஞேஹி த³மத²ங் உபனீதங். ப⁴க³வா ஹி அத்தனா உப்பாதி³தேனேவ மக்³க³த³மதே²ன சக்கு²தோபி த³ந்தோ, ஸோததோபி, கா⁴னதோபி, ஜிவ்ஹாதோபி, காயதோபி, மனதோபீதி இமேஸு ச²ஸு டா²னேஸு த³ந்தோ ஸந்தோ நிப்³பு³தோ பரினிப்³பு³தோ. தேனாஹ – ‘‘அத்தத³ந்த’’ந்தி. ஸமாஹிதந்தி து³விதே⁴னாபி ஸமாதி⁴னா ஸமாஹிதங். இரியமானந்தி விஹரமானங். ப்³ரஹ்மபதே²தி ஸெட்ட²பதே², அமதபதே², நிப்³பா³னபதே². சித்தஸ்ஸூபஸமே ரதந்தி பட²மஜ்ஜா²னேன பஞ்ச நீவரணானி வூபஸமெத்வா, து³தியஜ்ஜா²னேன விதக்கவிசாரே, ததியஜ்ஜா²னேன பீதிங், சதுத்த²ஜ்ஜா²னேன ஸுக²து³க்க²ங் வூபஸமெத்வா தஸ்மிங் சித்தஸ்ஸூபஸமே ரதங் அபி⁴ரதங்.
Manussabhūtanti devādibhāvaṃ anupagantvā manussameva bhūtaṃ. Attadantanti attanāyeva dantaṃ, na aññehi damathaṃ upanītaṃ. Bhagavā hi attanā uppāditeneva maggadamathena cakkhutopi danto, sotatopi, ghānatopi, jivhātopi, kāyatopi, manatopīti imesu chasu ṭhānesu danto santo nibbuto parinibbuto. Tenāha – ‘‘attadanta’’nti. Samāhitanti duvidhenāpi samādhinā samāhitaṃ. Iriyamānanti viharamānaṃ. Brahmapatheti seṭṭhapathe, amatapathe, nibbānapathe. Cittassūpasame ratanti paṭhamajjhānena pañca nīvaraṇāni vūpasametvā, dutiyajjhānena vitakkavicāre, tatiyajjhānena pītiṃ, catutthajjhānena sukhadukkhaṃ vūpasametvā tasmiṃ cittassūpasame rataṃ abhirataṃ.
நமஸ்ஸந்தீதி காயேன நமஸ்ஸந்தி, வாசாய நமஸ்ஸந்தி, மனஸா நமஸ்ஸந்தி, த⁴ம்மானுத⁴ம்மபடிபத்தியா நமஸ்ஸந்தி, ஸக்கரொந்தி க³ருங் கரொந்தி. ஸப்³ப³த⁴ம்மானபாரகு³ந்தி ஸப்³பே³ஸங் க²ந்தா⁴யதனதா⁴துத⁴ம்மானங் அபி⁴ஞ்ஞாபாரகூ³, பரிஞ்ஞாபாரகூ³, பஹானபாரகூ³, பா⁴வனாபாரகூ³, ஸச்சி²கிரியாபாரகூ³, ஸமாபத்திபாரகூ³தி ச²ப்³பி³தே⁴ன பாரக³மனேன பாரக³தங் பாரப்பத்தங் மத்த²கப்பத்தங். தே³வாபி தங் நமஸ்ஸந்தீதி து³க்க²ப்பத்தா ஸுப்³ரஹ்மதே³வபுத்தாத³யோ ஸுக²ப்பத்தா ச ஸப்³பே³வ த³ஸஸஹஸ்ஸசக்கவாளவாஸினோ தே³வாபி தும்ஹே நமஸ்ஸந்தி. இதி மே அரஹதோ ஸுதந்தி இதி மயா சதூஹி காரணேஹி அரஹாதி லத்³த⁴வோஹாரானங் தும்ஹாகங்யேவ ஸந்திகே ஸுதந்தி தீ³பேதி.
Namassantīti kāyena namassanti, vācāya namassanti, manasā namassanti, dhammānudhammapaṭipattiyā namassanti, sakkaronti garuṃ karonti. Sabbadhammānapāragunti sabbesaṃ khandhāyatanadhātudhammānaṃ abhiññāpāragū, pariññāpāragū, pahānapāragū, bhāvanāpāragū, sacchikiriyāpāragū, samāpattipāragūti chabbidhena pāragamanena pāragataṃ pārappattaṃ matthakappattaṃ. Devāpi taṃ namassantīti dukkhappattā subrahmadevaputtādayo sukhappattā ca sabbeva dasasahassacakkavāḷavāsino devāpi tumhe namassanti. Iti me arahato sutanti iti mayā catūhi kāraṇehi arahāti laddhavohārānaṃ tumhākaṃyeva santike sutanti dīpeti.
ஸப்³ப³ஸங்யோஜனாதீதந்தி ஸப்³பா³னி த³ஸவித⁴ஸங்யோஜனானி அதிக்கந்தங். வனா நிப்³ப³னமாக³தந்தி கிலேஸவனதோ நிப்³ப³னங் கிலேஸவனரஹிதங் நிப்³பா³னங் ஆக³தங் ஸம்பத்தங். காமேஹி நெக்க²ம்மரதந்தி து³விதே⁴ஹி காமேஹி நிக்க²ந்தத்தா பப்³ப³ஜ்ஜா அட்ட² ஸமாபத்தியோ சத்தாரோ ச அரியமக்³கா³ காமேஹி நெக்க²ம்மங் நாம, தத்த² ரதங் அபி⁴ரதங். முத்தங் ஸேலாவ கஞ்சனந்தி ஸேலதா⁴துதோ முத்தங் கஞ்சனஸதி³ஸங்.
Sabbasaṃyojanātītanti sabbāni dasavidhasaṃyojanāni atikkantaṃ. Vanā nibbanamāgatanti kilesavanato nibbanaṃ kilesavanarahitaṃ nibbānaṃ āgataṃ sampattaṃ. Kāmehi nekkhammaratanti duvidhehi kāmehi nikkhantattā pabbajjā aṭṭha samāpattiyo cattāro ca ariyamaggā kāmehi nekkhammaṃ nāma, tattha rataṃ abhirataṃ. Muttaṃ selāva kañcananti seladhātuto muttaṃ kañcanasadisaṃ.
ஸப்³பே³ அச்சருசீதி ஸப்³ப³ஸத்தே அதிக்கமித்வா பவத்தருசி. அட்ட²மகஞ்ஹி அதிக்கமித்வா பவத்தருசிதாய ஸோதாபன்னோ அச்சருசி நாம, ஸோதாபன்னங் அதிக்கமித்வா பவத்தருசிதாய ஸகதா³கா³மீ…பே॰… கீ²ணாஸவங் அதிக்கமித்வா பவத்தருசிதாய பச்சேகஸம்பு³த்³தோ⁴, பச்சேகஸம்பு³த்³த⁴ங் அதிக்கமித்வா பவத்தருசிதாய ஸம்மாஸம்பு³த்³தோ⁴ அச்சருசி நாம. ஹிமவாவஞ்ஞே ஸிலுச்சயேதி யதா² ஹிமவா பப்³ப³தராஜா அஞ்ஞே பப்³ப³தே அதிரோசதி, ஏவங் அதிரோசதீதி அத்தோ². ஸச்சனாமோதி தச்ச²னாமோ பூ⁴தனாமோ ஆகு³ங் அகரணேனேவ நாகோ³தி ஏவங் அவிதத²னாமோ.
Sabbe accarucīti sabbasatte atikkamitvā pavattaruci. Aṭṭhamakañhi atikkamitvā pavattarucitāya sotāpanno accaruci nāma, sotāpannaṃ atikkamitvā pavattarucitāya sakadāgāmī…pe… khīṇāsavaṃ atikkamitvā pavattarucitāya paccekasambuddho, paccekasambuddhaṃ atikkamitvā pavattarucitāya sammāsambuddho accaruci nāma. Himavāvaññe siluccayeti yathā himavā pabbatarājā aññe pabbate atirocati, evaṃ atirocatīti attho. Saccanāmoti tacchanāmo bhūtanāmo āguṃ akaraṇeneva nāgoti evaṃ avitathanāmo.
ஸோரச்சந்தி ஸுசிஸீலங். அவிஹிங்ஸாதி கருணா ச கருணாபுப்³ப³பா⁴கோ³ ச. பாதா³ நாக³ஸ்ஸ தே து³வேதி தே பு³த்³த⁴னாக³ஸ்ஸ து³வே புரிமபாதா³.
Soraccanti sucisīlaṃ. Avihiṃsāti karuṇā ca karuṇāpubbabhāgo ca. Pādā nāgassa te duveti te buddhanāgassa duve purimapādā.
தபோதி து⁴தஸமாதா³னங். ப்³ரஹ்மசரியந்தி அரியமக்³க³ஸீலங். சரணா நாக³ஸ்ஸ த்யாபரேதி தே பு³த்³த⁴னாக³ஸ்ஸ அபரே த்³வே பச்சி²மபாதா³. ஸத்³தா⁴ஹத்தோ²தி ஸத்³தா⁴மயாய ஸொண்டா³ய ஸமன்னாக³தோ. உபெக்கா²ஸேதத³ந்தவாதி ச²ளங்கு³பெக்கா²மயேஹி ஸேதத³ந்தேஹி ஸமன்னாக³தோ.
Tapoti dhutasamādānaṃ. Brahmacariyanti ariyamaggasīlaṃ. Caraṇā nāgassa tyāpareti te buddhanāgassa apare dve pacchimapādā. Saddhāhatthoti saddhāmayāya soṇḍāya samannāgato. Upekkhāsetadantavāti chaḷaṅgupekkhāmayehi setadantehi samannāgato.
ஸதி கீ³வாதி யதா² நாக³ஸ்ஸ அங்க³பச்சங்க³ஸ்மிங் ஸிராஜாலானங் கீ³வா பதிட்டா², ஏவங் பு³த்³த⁴னாக³ஸ்ஸ ஸோரச்சாதீ³னங் த⁴ம்மானங் ஸதி. தேன வுத்தங் – ‘‘ஸதி கீ³வா’’தி. ஸிரோ பஞ்ஞாதி யதா² ஹத்தி²னாக³ஸ்ஸ ஸிரோ உத்தமங்கோ³, ஏவங் பு³த்³த⁴னாக³ஸ்ஸ ஸப்³ப³ஞ்ஞுதஞாணங். தேன ஹி ஸோ ஸப்³ப³த⁴ம்மே ஜானாதி. தேன வுத்தங் – ‘‘ஸிரோ பஞ்ஞா’’தி. வீமங்ஸா த⁴ம்மசிந்தனாதி யதா² ஹத்தி²னாக³ஸ்ஸ அக்³க³ஸொண்டோ³ வீமங்ஸா நாம ஹோதி. ஸோ தாய த²த்³த⁴முது³கங் கா²தி³தப்³பா³கா²தி³தப்³ப³ஞ்ச வீமங்ஸதி, ததோ பஹாதப்³ப³ங் பஜஹதி, ஆதா³தப்³ப³ங் ஆதி³யதி, ஏவமேவ பு³த்³த⁴னாக³ஸ்ஸ த⁴ம்மகொட்டா²ஸபரிச்சே²த³கஞாணஸங்கா²தா த⁴ம்மசிந்தனா வீமங்ஸா. தேன ஹி ஞாணேன ஸோ ப⁴ப்³பா³ப⁴ப்³பே³ ஜானாதி. தேன வுத்தங் – ‘‘வீமங்ஸா த⁴ம்மசிந்தனா’’தி . த⁴ம்மகுச்சி²ஸமாதபோதி த⁴ம்மோ வுச்சதி சதுத்த²ஜ்ஜா²னஸமாதி⁴, குச்சி²யேவ ஸமாதபோ குச்சி²ஸமாதபோ. ஸமாதபோ நாம ஸமாதபனட்டா²னங். த⁴ம்மோ குச்சி²ஸமாதபோ அஸ்ஸாதி த⁴ம்மகுச்சி²ஸமாதபோ. சதுத்த²ஜ்ஜா²னஸமாதி⁴ஸ்மிங் டி²தஸ்ஸ ஹி தே தே இத்³தி⁴விதா⁴தி³த⁴ம்மா இஜ்ஜ²ந்தி, தஸ்மா ஸோ குச்சி²ஸமாதபோதி வுத்தோ. விவேகோதி காயசித்தஉபதி⁴விவேகோ. யதா² நாக³ஸ்ஸ வாலதி⁴ மக்கி²கா வாரேதி, ஏவங் ததா²க³தஸ்ஸ விவேகோ க³ஹட்ட²பப்³ப³ஜிதே வாரேதி. தஸ்மா ஸோ வாலதீ⁴தி வுத்தோ.
Sati gīvāti yathā nāgassa aṅgapaccaṅgasmiṃ sirājālānaṃ gīvā patiṭṭhā, evaṃ buddhanāgassa soraccādīnaṃ dhammānaṃ sati. Tena vuttaṃ – ‘‘sati gīvā’’ti. Siro paññāti yathā hatthināgassa siro uttamaṅgo, evaṃ buddhanāgassa sabbaññutañāṇaṃ. Tena hi so sabbadhamme jānāti. Tena vuttaṃ – ‘‘siro paññā’’ti. Vīmaṃsā dhammacintanāti yathā hatthināgassa aggasoṇḍo vīmaṃsā nāma hoti. So tāya thaddhamudukaṃ khāditabbākhāditabbañca vīmaṃsati, tato pahātabbaṃ pajahati, ādātabbaṃ ādiyati, evameva buddhanāgassa dhammakoṭṭhāsaparicchedakañāṇasaṅkhātā dhammacintanā vīmaṃsā. Tena hi ñāṇena so bhabbābhabbe jānāti. Tena vuttaṃ – ‘‘vīmaṃsā dhammacintanā’’ti . Dhammakucchisamātapoti dhammo vuccati catutthajjhānasamādhi, kucchiyeva samātapo kucchisamātapo. Samātapo nāma samātapanaṭṭhānaṃ. Dhammo kucchisamātapo assāti dhammakucchisamātapo. Catutthajjhānasamādhismiṃ ṭhitassa hi te te iddhividhādidhammā ijjhanti, tasmā so kucchisamātapoti vutto. Vivekoti kāyacittaupadhiviveko. Yathā nāgassa vāladhi makkhikā vāreti, evaṃ tathāgatassa viveko gahaṭṭhapabbajite vāreti. Tasmā so vāladhīti vutto.
ஜா²யீதி து³விதே⁴ன ஜா²னேன ஜா²யீ. அஸ்ஸாஸரதோதி நாக³ஸ்ஸ ஹி அஸ்ஸாஸபஸ்ஸாஸா விய பு³த்³த⁴னாக³ஸ்ஸ ப²லஸமாபத்தி, தத்த² ரதோ, அஸ்ஸாஸபஸ்ஸாஸேஹி விய தாய வினா ந வத்ததீதி அத்தோ². ஸப்³ப³த்த² ஸங்வுதோதி ஸப்³ப³த்³வாரேஸு ஸங்வுதோ. அனவஜ்ஜானீதி ஸம்மாஆஜீவேன உப்பன்னபோ⁴ஜனானி. ஸாவஜ்ஜானீதி பஞ்சவித⁴மிச்சா²ஜீவவஸேன உப்பன்னபோ⁴ஜனானி.
Jhāyīti duvidhena jhānena jhāyī. Assāsaratoti nāgassa hi assāsapassāsā viya buddhanāgassa phalasamāpatti, tattha rato, assāsapassāsehi viya tāya vinā na vattatīti attho. Sabbattha saṃvutoti sabbadvāresu saṃvuto. Anavajjānīti sammāājīvena uppannabhojanāni. Sāvajjānīti pañcavidhamicchājīvavasena uppannabhojanāni.
அணுங்தூ²லந்தி கு²த்³த³கஞ்ச மஹந்தஞ்ச. ஸப்³ப³ங் செ²த்வான ப³ந்த⁴னந்தி ஸப்³ப³ங் த³ஸவித⁴ம்பி ஸங்யோஜனங் சி²ந்தி³த்வான. நுபலிப்பதி லோகேனாதி லோகேன ஸத்³தி⁴ங் தண்ஹாமானதி³ட்டி²லேபேஹி ந லிப்பதி. மஹாகி³னீதி மஹாஅக்³கி³. விஞ்ஞூஹி தே³ஸிதாதி இத⁴ படிஸம்பி⁴தா³ப்பத்தோ காளுதா³யித்தே²ரோவ விஞ்ஞூ பண்டி³தோ, தேன தே³ஸிதாதி அத்தோ². விஞ்ஞஸ்ஸந்தி மஹானாகா³, நாக³ங் நாகே³ன தே³ஸிதந்தி உதா³யித்தே²ரனாகே³ன தே³ஸிதங் பு³த்³த⁴னாக³ங் இதரே கீ²ணாஸவா நாகா³ விஜானிஸ்ஸந்தி.
Aṇuṃthūlanti khuddakañca mahantañca. Sabbaṃ chetvāna bandhananti sabbaṃ dasavidhampi saṃyojanaṃ chinditvāna. Nupalippati lokenāti lokena saddhiṃ taṇhāmānadiṭṭhilepehi na lippati. Mahāginīti mahāaggi. Viññūhi desitāti idha paṭisambhidāppatto kāḷudāyittherova viññū paṇḍito, tena desitāti attho. Viññassanti mahānāgā, nāgaṃ nāgena desitanti udāyittheranāgena desitaṃ buddhanāgaṃ itare khīṇāsavā nāgā vijānissanti.
ஸரீரங் விஜஹங் நாகோ³, பரினிப்³பி³ஸ்ஸதீதி போ³தி⁴பல்லங்கே கிலேஸபரினிப்³பா³னேன பரினிப்³பு³தோ, யமகஸாலந்தரே அனுபாதி³ஸேஸாய நிப்³பா³னதா⁴துயா பரினிப்³பா³யிஸ்ஸதி. ஏவங் படிஸம்பி⁴தா³ப்பத்தோ உதா³யித்தே²ரோ ஸோளஸஹி கா³தா²ஹி சதுஸட்டி²யா பதே³ஹி த³ஸப³லஸ்ஸ வண்ணங் கதெ²ந்தோ தே³ஸனங் நிட்டா²பேஸி . ப⁴க³வா அனுமோதி³. தே³ஸனாவஸானே சதுராஸீதிபாணஸஹஸ்ஸானி அமதபானங் பிவிங்ஸூதி.
Sarīraṃvijahaṃ nāgo, parinibbissatīti bodhipallaṅke kilesaparinibbānena parinibbuto, yamakasālantare anupādisesāya nibbānadhātuyā parinibbāyissati. Evaṃ paṭisambhidāppatto udāyitthero soḷasahi gāthāhi catusaṭṭhiyā padehi dasabalassa vaṇṇaṃ kathento desanaṃ niṭṭhāpesi . Bhagavā anumodi. Desanāvasāne caturāsītipāṇasahassāni amatapānaṃ piviṃsūti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 1. நாக³ஸுத்தங் • 1. Nāgasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1. நாக³ஸுத்தவண்ணனா • 1. Nāgasuttavaṇṇanā
