| Library / Tipiṭaka / д̇ибидага • Tipiṭaka / вимаанавад̇т̇у-адтагат̇аа • Vimānavatthu-aṭṭhakathā |
3. нааг̇авимаанаван̣н̣анаа
3. Nāgavimānavaṇṇanā
алан̇гад̇аа ман̣иган̃жанаажид̇анд̇и нааг̇авимаанам̣. д̇асса гаа уббад̇д̇и? бхаг̇аваа б̣аараан̣асияам̣ вихарад̇и исибад̇анз миг̇ад̣̇ааяз. д̇зна самаязна б̣аараан̣асиваасиний згаа убаасигаа сад̣̇д̇хаа басаннаа сийлаажаарасамбаннаа бхаг̇аванд̇ам̣ уд̣̇д̣̇исса вад̇т̇аяуг̇ам̣ вааяаабзд̇ваа субарид̇ход̇ам̣ гаараабзд̇ваа убасан̇гамид̇ваа бхаг̇авад̇о баад̣̇амуулз табзд̇ваа звамааха ‘‘бадиг̇г̇ан̣хаад̇у, бханд̇з бхаг̇аваа, имам̣ вад̇т̇аяуг̇ам̣ анугамбам̣ убаад̣̇ааяа яам̣ мама асса д̣̇ийгхарад̇д̇ам̣ хид̇ааяа сукааяаа’’д̇и. бхаг̇аваа д̇ам̣ бадиг̇г̇ахзд̇ваа д̇ассаа убаниссаяасамбад̇д̇им̣ д̣̇исваа д̇хаммам̣ д̣̇зсзси, саа д̣̇зсанаавасаанз сод̇аабад̇д̇ипалз бад̇идтахид̇ваа бхаг̇аванд̇ам̣ ванд̣̇ид̇ваа бад̣̇агкин̣ам̣ гад̇ваа г̇зхам̣ аг̇амааси. саа на жирассзва гаалам̣ гад̇ваа д̇аавад̇им̣сзсу уббаннаа саггасса д̣̇зварааж̇асса бияаа ахоси валлабхаа яасуд̇д̇араа наама наамзна. д̇ассаа бун̃н̃аанубхаавзна хзмаж̇ааласан̃чанно гун̃ж̇араваро ниб̣б̣ад̇д̇и, д̇асса жа канд̇хз ман̣имаяо ман̣д̣або, маж̇жхз субан̃н̃ад̇д̇арад̇анабаллан̇го ниб̣б̣ад̇д̇и, д̣̇вийсу д̣̇анд̇зсу жасса гамалагувалаяуж̇ж̇алаа раман̣ийяаа д̣̇вз богкаран̣ияо баад̇урахзсум̣. д̇ад̇т̇а бад̣̇умаган̣н̣игаасу тид̇аа д̣̇звад̇хийд̇аа баг̇г̇ахид̇абан̃жан̇г̇игад̇уурияаа нажжанд̇и жзва г̇ааяанд̇и жа.
Alaṅkatā maṇikañcanācitanti nāgavimānaṃ. Tassa kā uppatti? Bhagavā bārāṇasiyaṃ viharati isipatane migadāye. Tena samayena bārāṇasivāsinī ekā upāsikā saddhā pasannā sīlācārasampannā bhagavantaṃ uddissa vatthayugaṃ vāyāpetvā suparidhotaṃ kārāpetvā upasaṅkamitvā bhagavato pādamūle ṭhapetvā evamāha ‘‘paṭiggaṇhātu, bhante bhagavā, imaṃ vatthayugaṃ anukampaṃ upādāya yaṃ mama assa dīgharattaṃ hitāya sukhāyā’’ti. Bhagavā taṃ paṭiggahetvā tassā upanissayasampattiṃ disvā dhammaṃ desesi, sā desanāvasāne sotāpattiphale patiṭṭhahitvā bhagavantaṃ vanditvā padakkhiṇaṃ katvā gehaṃ agamāsi. Sā na cirasseva kālaṃ katvā tāvatiṃsesu uppannā sakkassa devarājassa piyā ahosi vallabhā yasuttarā nāma nāmena. Tassā puññānubhāvena hemajālasañchanno kuñjaravaro nibbatti, tassa ca khandhe maṇimayo maṇḍapo, majjhe supaññattaratanapallaṅko nibbatti, dvīsu dantesu cassa kamalakuvalayujjalā ramaṇīyā dve pokkharaṇiyo pāturahesuṃ. Tattha padumakaṇṇikāsu ṭhitā devadhītā paggahitapañcaṅgikatūriyā naccanti ceva gāyanti ca.
сад̇т̇аа б̣аараан̣асияам̣ яат̇аабхиранд̇ам̣ вихарид̇ваа язна саавад̇т̇и д̇зна жааригам̣ баггаами. анубуб̣б̣зна саавад̇т̇им̣ бад̇ваа д̇ад̇ра суд̣̇ам̣ бхаг̇аваа саавад̇т̇ияам̣ вихарад̇и ж̇зд̇аванз анаат̇абин̣д̣игасса аараамз. ат̇а саа д̣̇звад̇аа ад̇д̇анаа анубхуяяамаанам̣ д̣̇иб̣б̣асамбад̇д̇им̣ ологзд̇ваа д̇ассаа гааран̣ам̣ убад̇хаарзнд̇ий ‘‘сад̇т̇у вад̇т̇аяуг̇ад̣̇аанагааран̣а’’нд̇и н̃ад̇ваа сан̃ж̇аад̇асоманассаа бхаг̇авад̇и басаад̣̇аб̣ахумаанаа ванд̣̇ид̇угаамаа абхигганд̇ааяа рад̇д̇ияаа хад̇т̇игканд̇хавараг̇ад̇аа аагаасзна ааг̇анд̇ваа д̇ад̇о од̇арид̇ваа бхаг̇аванд̇ам̣ ванд̣̇ид̇ваа ан̃ж̇алим̣ баг̇г̇аяха згаманд̇ам̣ адтааси. д̇ам̣ ааяасмаа ван̇г̇ийсо бхаг̇авад̇о анун̃н̃ааяа имаахи г̇аат̇аахи бужчи –
Satthā bārāṇasiyaṃ yathābhirantaṃ viharitvā yena sāvatthi tena cārikaṃ pakkāmi. Anupubbena sāvatthiṃ patvā tatra sudaṃ bhagavā sāvatthiyaṃ viharati jetavane anāthapiṇḍikassa ārāme. Atha sā devatā attanā anubhuyyamānaṃ dibbasampattiṃ oloketvā tassā kāraṇaṃ upadhārentī ‘‘satthu vatthayugadānakāraṇa’’nti ñatvā sañjātasomanassā bhagavati pasādabahumānā vanditukāmā abhikkantāya rattiyā hatthikkhandhavaragatā ākāsena āgantvā tato otaritvā bhagavantaṃ vanditvā añjaliṃ paggayha ekamantaṃ aṭṭhāsi. Taṃ āyasmā vaṅgīso bhagavato anuññāya imāhi gāthāhi pucchi –
705.
705.
‘‘алан̇гад̇аа ман̣иган̃жанаажид̇ам̣, сован̣н̣аж̇аалажид̇ам̣ маханд̇ам̣;
‘‘Alaṅkatā maṇikañcanācitaṃ, sovaṇṇajālacitaṃ mahantaṃ;
абхируяха г̇аж̇аварам̣ сугаббид̇ам̣, ид̇хааг̇амаа взхааяасам̣ анд̇алигкз.
Abhiruyha gajavaraṃ sukappitaṃ, idhāgamā vehāyasaṃ antalikkhe.
706.
706.
‘‘нааг̇асса д̣̇анд̇зсу д̣̇увзсу ниммид̇аа, ажчод̣̇агаа бад̣̇уминияо супуллаа;
‘‘Nāgassa dantesu duvesu nimmitā, acchodakā paduminiyo suphullā;
бад̣̇умзсу жа д̇уурияаг̇ан̣аа бабхиж̇ж̇арз, имаа жа нажжанд̇и манохарааяо.
Padumesu ca tūriyagaṇā pabhijjare, imā ca naccanti manoharāyo.
707.
707.
‘‘д̣̇звид̣̇д̇хибад̇д̇ааси махаанубхаавз, мануссабхууд̇аа гимагааси бун̃н̃ам̣;
‘‘Deviddhipattāsi mahānubhāve, manussabhūtā kimakāsi puññaṃ;
гзнааси звам̣ ж̇алид̇аанубхааваа, ван̣н̣о жа д̇з саб̣б̣ад̣̇исаа бабхаасад̇ий’’д̇и.
Kenāsi evaṃ jalitānubhāvā, vaṇṇo ca te sabbadisā pabhāsatī’’ti.
705. д̇ад̇т̇а алан̇гад̇аад̇и саб̣б̣аабхаран̣авибхуусид̇аа. ман̣иган̃жанаажид̇анд̇и д̇зхи д̣̇иб̣б̣амаанзхи ман̣исуван̣н̣зхи аажид̇ам̣. сован̣н̣аж̇аалажид̇анд̇и хзмаж̇ааласан̃чаннам̣. маханд̇анд̇и вибулам̣. сугаббид̇анд̇и г̇аманасаннаахавасзна судту саннад̣̇д̇хам̣. взхааяасанд̇и взхааяасабхууд̇з хад̇т̇ибидтз. анд̇алигкзд̇и аагаасз, ‘‘алан̇гад̇аман̣иган̃жанаажид̇а’’нд̇иби баато. аяан̃хзд̇т̇а сан̇кзбад̇т̇о – д̣̇звад̇з, д̇вам̣ саб̣б̣аалан̇гаарзхи алан̇гад̇аа алан̇гад̇аман̣иган̃жанаажид̇ам̣, ад̇ивияа д̣̇иб̣б̣амаанзхи ман̣ийхи ган̃жанзхи жа алан̇гаран̣авасзна кажид̇ам̣, хзмаж̇аалзхи гумбхаалан̇гаараад̣̇ибхзд̣̇зхи хад̇т̇аалан̇гаарзхи жид̇ам̣ аамуд̇д̇ам̣ маханд̇ам̣ ад̇ивияа б̣раханд̇ам̣ уд̇д̇амам̣ г̇аж̇ам̣ ааруяха хад̇т̇ибидтияаа нисиннаа аагаасзнзва ид̇ха амхаагам̣ санд̇игам̣ ааг̇ад̇аад̇и.
705. Tattha alaṅkatāti sabbābharaṇavibhūsitā. Maṇikañcanācitanti tehi dibbamānehi maṇisuvaṇṇehi ācitaṃ. Sovaṇṇajālacitanti hemajālasañchannaṃ. Mahantanti vipulaṃ. Sukappitanti gamanasannāhavasena suṭṭhu sannaddhaṃ. Vehāyasanti vehāyasabhūte hatthipiṭṭhe. Antalikkheti ākāse, ‘‘alaṅkatamaṇikañcanācita’’ntipi pāṭho. Ayañhettha saṅkhepattho – devate, tvaṃ sabbālaṅkārehi alaṅkatā alaṅkatamaṇikañcanācitaṃ, ativiya dibbamānehi maṇīhi kañcanehi ca alaṅkaraṇavasena khacitaṃ, hemajālehi kumbhālaṅkārādibhedehi hatthālaṅkārehi citaṃ āmuttaṃ mahantaṃ ativiya brahantaṃ uttamaṃ gajaṃ āruyha hatthipiṭṭhiyā nisinnā ākāseneva idha amhākaṃ santikaṃ āgatāti.
706. нааг̇асса д̣̇анд̇зсу д̣̇увзсу ниммид̇аад̇и зрааван̣асса вияа нааг̇арааж̇асса имасса д̣̇вийсу д̣̇анд̇зсу д̣̇вз богкаран̣ияо сужарид̇асиббинаа судту виражид̇аа. д̇уурияаг̇ан̣аад̇и бан̃жан̇г̇игад̇уурияасамуухаа. бабхиж̇ж̇арзд̇и д̣̇ваад̣̇асаннам̣ лаяабхзд̣̇аанам̣ васзна бабхзд̣̇ам̣ г̇ажчанд̇и. ‘‘баваж̇ж̇арз’’д̇и жа батанд̇и, багаарзхи ваад̣̇ийяанд̇ийд̇и ад̇т̇о.
706.Nāgassa dantesu duvesu nimmitāti erāvaṇassa viya nāgarājassa imassa dvīsu dantesu dve pokkharaṇiyo sucaritasippinā suṭṭhu viracitā. Tūriyagaṇāti pañcaṅgikatūriyasamūhā. Pabhijjareti dvādasannaṃ layabhedānaṃ vasena pabhedaṃ gacchanti. ‘‘Pavajjare’’ti ca paṭhanti, pakārehi vādīyantīti attho.
звам̣ т̇зрзна будтаа д̣̇звад̇аа имаахи г̇аат̇аахи виссаж̇ж̇зси –
Evaṃ therena puṭṭhā devatā imāhi gāthāhi vissajjesi –
708.
708.
‘‘б̣аараан̣асияам̣ убасан̇гамид̇ваа, б̣уд̣̇д̇хассахам̣ вад̇т̇аяуг̇ам̣ ад̣̇аасим̣;
‘‘Bārāṇasiyaṃ upasaṅkamitvā, buddhassahaṃ vatthayugaṃ adāsiṃ;
баад̣̇аани ванд̣̇ид̇ваа чамаа нисийд̣̇им̣, вид̇д̇аа жахам̣ ан̃ж̇алигам̣ агаасим̣.
Pādāni vanditvā chamā nisīdiṃ, vittā cahaṃ añjalikaṃ akāsiṃ.
709.
709.
‘‘б̣уд̣̇д̇хо жа мз ган̃жанасаннибхад̇д̇ажо, ад̣̇зсаяи самуд̣̇аяад̣̇угканижжад̇ам̣;
‘‘Buddho ca me kañcanasannibhattaco, adesayi samudayadukkhaniccataṃ;
асан̇кад̇ам̣ д̣̇угканирод̇хасассад̇ам̣, маг̇г̇ам̣ ад̣̇зсаяи яад̇о виж̇аанисам̣.
Asaṅkhataṃ dukkhanirodhasassataṃ, maggaṃ adesayi yato vijānisaṃ.
710.
710.
‘‘аббааяугий гаалагад̇аа д̇ад̇о жуд̇аа, убабаннаа д̇ид̣̇асаг̇ан̣ам̣ яасассиний;
‘‘Appāyukī kālakatā tato cutā, upapannā tidasagaṇaṃ yasassinī;
саггассахам̣ ан̃н̃ад̇араа баж̇аабад̇и, яасуд̇д̇араа наама д̣̇исаасу виссуд̇аа’’д̇и.
Sakkassahaṃ aññatarā pajāpati, yasuttarā nāma disāsu vissutā’’ti.
708-9. д̇ад̇т̇а чамаад̇и бхуумияам̣. бхуммад̇т̇з хи ид̣̇ам̣ бажжад̇д̇аважанам̣. вид̇д̇аад̇и д̇удтаа. яад̇од̇и яад̇о сад̇т̇у саамуггам̣сигад̇хаммад̣̇зсанад̇о. виж̇аанисанд̇и жад̇д̇аари арияасажжаани бадивиж̇жхим̣.
708-9. Tattha chamāti bhūmiyaṃ. Bhummatthe hi idaṃ paccattavacanaṃ. Vittāti tuṭṭhā. Yatoti yato satthu sāmukkaṃsikadhammadesanato. Vijānisanti cattāri ariyasaccāni paṭivijjhiṃ.
710. аббааяугийд̇и ‘‘ийд̣̇исам̣ наама ул̣аарам̣ бун̃н̃ам̣ гад̇ваа на д̇аяаа зд̇асмим̣ д̣̇угкаб̣ахулз мануссад̇д̇абхаавз звам̣ таад̇аб̣б̣а’’нд̇и сан̃ж̇аад̇аабхисанд̇хинаа вияа баригкаяам̣ г̇ад̇зна гаммунаа аббааяугаа самаанаа. ан̃н̃ад̇араа баж̇аабад̇ийд̇и сол̣асасахассаанам̣ махзсийнам̣ ан̃н̃ад̇араа. д̣̇исаасу виссуд̇аад̇и д̣̇вийсу д̣̇звалогзсу саб̣б̣ад̣̇исаасу баагадаа бан̃н̃аад̇аа. сзсам̣ вуд̇д̇анаяамзва.
710.Appāyukīti ‘‘īdisaṃ nāma uḷāraṃ puññaṃ katvā na tayā etasmiṃ dukkhabahule manussattabhāve evaṃ ṭhātabba’’nti sañjātābhisandhinā viya parikkhayaṃ gatena kammunā appāyukā samānā. Aññatarā pajāpatīti soḷasasahassānaṃ mahesīnaṃ aññatarā. Disāsu vissutāti dvīsu devalokesu sabbadisāsu pākaṭā paññātā. Sesaṃ vuttanayameva.
нааг̇авимаанаван̣н̣анаа нидтид̇аа.
Nāgavimānavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / вимаанавад̇т̇убаал̣и • Vimānavatthupāḷi / 3. нааг̇авимаанавад̇т̇у • 3. Nāgavimānavatthu
