| Library / Tipiṭaka / તિપિટક • Tipiṭaka / પરિવારપાળિ • Parivārapāḷi |
૩. નહાનવગ્ગો
3. Nahānavaggo
૨૩૩. નગ્ગા નહાયન્તી દ્વે આપત્તિયો આપજ્જતિ. નહાયતિ, પયોગે દુક્કટં; નહાનપરિયોસાને આપત્તિ પાચિત્તિયસ્સ.
233. Naggā nahāyantī dve āpattiyo āpajjati. Nahāyati, payoge dukkaṭaṃ; nahānapariyosāne āpatti pācittiyassa.
પમાણાતિક્કન્તં ઉદકસાટિકં કારાપેન્તી દ્વે આપત્તિયો આપજ્જતિ. કારાપેતિ, પયોગે દુક્કટં; કારાપિતે, આપત્તિ પાચિત્તિયસ્સ.
Pamāṇātikkantaṃ udakasāṭikaṃ kārāpentī dve āpattiyo āpajjati. Kārāpeti, payoge dukkaṭaṃ; kārāpite, āpatti pācittiyassa.
ભિક્ખુનિયા ચીવરં વિસિબ્બેત્વા વા વિસિબ્બાપેત્વા વા નેવ સિબ્બેન્તી ન સિબ્બાપનાય ઉસ્સુક્કં કરોન્તી એકં આપત્તિં આપજ્જતિ. પાચિત્તિયં.
Bhikkhuniyā cīvaraṃ visibbetvā vā visibbāpetvā vā neva sibbentī na sibbāpanāya ussukkaṃ karontī ekaṃ āpattiṃ āpajjati. Pācittiyaṃ.
પઞ્ચાહિકં સઙ્ઘાટિચારં અતિક્કામેન્તી એકં આપત્તિં આપજ્જતિ. પાચિત્તિયં. ચીવરસઙ્કમનીયં ધારેન્તી દ્વે આપત્તિયો આપજ્જતિ. ધારેતિ, પયોગે દુક્કટં; ધારિતે, આપત્તિ પાચિત્તિયસ્સ.
Pañcāhikaṃ saṅghāṭicāraṃ atikkāmentī ekaṃ āpattiṃ āpajjati. Pācittiyaṃ. Cīvarasaṅkamanīyaṃ dhārentī dve āpattiyo āpajjati. Dhāreti, payoge dukkaṭaṃ; dhārite, āpatti pācittiyassa.
ગણસ્સ ચીવરલાભં અન્તરાયં કરોન્તી દ્વે આપત્તિયો આપજ્જતિ. કરોતિ, પયોગે દુક્કટં; કતે, આપત્તિ પાચિત્તિયસ્સ.
Gaṇassa cīvaralābhaṃ antarāyaṃ karontī dve āpattiyo āpajjati. Karoti, payoge dukkaṭaṃ; kate, āpatti pācittiyassa.
ધમ્મિકં ચીવરવિભઙ્ગં પટિબાહન્તી દ્વે આપત્તિયો આપજ્જતિ. પટિબાહતિ, પયોગે દુક્કટં; પટિબાહિતે, આપત્તિ પાચિત્તિયસ્સ.
Dhammikaṃ cīvaravibhaṅgaṃ paṭibāhantī dve āpattiyo āpajjati. Paṭibāhati, payoge dukkaṭaṃ; paṭibāhite, āpatti pācittiyassa.
અગારિકસ્સ વા પરિબ્બાજકસ્સ વા પરિબ્બાજિકાય વા સમણચીવરં દેન્તી દ્વે આપત્તિયો આપજ્જતિ. દેતિ, પયોગે દુક્કટં; દિન્ને, આપત્તિ પાચિત્તિયસ્સ.
Agārikassa vā paribbājakassa vā paribbājikāya vā samaṇacīvaraṃ dentī dve āpattiyo āpajjati. Deti, payoge dukkaṭaṃ; dinne, āpatti pācittiyassa.
દુબ્બલચીવરપચ્ચાસા ચીવરકાલસમયં અતિક્કામેન્તી દ્વે આપત્તિયો આપજ્જતિ. અતિક્કામેતિ, પયોગે દુક્કટં; અતિક્કામિતે, આપત્તિ પાચિત્તિયસ્સ.
Dubbalacīvarapaccāsā cīvarakālasamayaṃ atikkāmentī dve āpattiyo āpajjati. Atikkāmeti, payoge dukkaṭaṃ; atikkāmite, āpatti pācittiyassa.
ધમ્મિકં કથિનુદ્ધારં પટિબાહન્તી દ્વે આપત્તિયો આપજ્જતિ. પટિબાહતિ, પયોગે દુક્કટં; પટિબાહિતે, આપત્તિ પાચિત્તિયસ્સ.
Dhammikaṃ kathinuddhāraṃ paṭibāhantī dve āpattiyo āpajjati. Paṭibāhati, payoge dukkaṭaṃ; paṭibāhite, āpatti pācittiyassa.
નહાનવગ્ગો તતિયો.
Nahānavaggo tatiyo.
