| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၅. နခသိခာသုတ္တံ
5. Nakhasikhāsuttaṃ
၉၇. သာဝတ္ထိနိဒာနံ ။ ဧကမန္တံ နိသိန္နော ခော သော ဘိက္ခု ဘဂဝန္တံ ဧတဒဝောစ – ‘‘အတ္ထိ နု ခော, ဘန္တေ, ကိဉ္စိ ရူပံ ယံ ရူပံ နိစ္စံ ဓုဝံ သသ္သတံ အဝိပရိဏာမဓမ္မံ သသ္သတိသမံ တထေဝ ဌသ္သတိ? အတ္ထိ နု ခော, ဘန္တေ, ကာစိ ဝေဒနာ ယာ ဝေဒနာ နိစ္စာ ဓုဝာ သသ္သတာ အဝိပရိဏာမဓမ္မာ သသ္သတိသမံ တထေဝ ဌသ္သတိ? အတ္ထိ နု ခော, ဘန္တေ, ကာစိ သညာ။ပေ.။ ကေစိ သင္ခာရာ, ယေ သင္ခာရာ နိစ္စာ ဓုဝာ သသ္သတာ အဝိပရိဏာမဓမ္မာ သသ္သတိသမံ တထေဝ ဌသ္သန္တိ? အတ္ထိ နု ခော, ဘန္တေ, ကိဉ္စိ ဝိညာဏံ, ယံ ဝိညာဏံ နိစ္စံ ဓုဝံ သသ္သတံ အဝိပရိဏာမဓမ္မံ သသ္သတိသမံ တထေဝ ဌသ္သတီ’’တိ? ‘‘နတ္ထိ ခော, ဘိက္ခု, ကိဉ္စိ ရူပံ, ယံ ရူပံ နိစ္စံ ဓုဝံ သသ္သတံ အဝိပရိဏာမဓမ္မံ သသ္သတိသမံ တထေဝ ဌသ္သတိ။ နတ္ထိ ခော, ဘိက္ခု, ကာစိ ဝေဒနာ။ ကာစိ သညာ။ ကေစိ သင္ခာရာ။ပေ.။ ကိဉ္စိ ဝိညာဏံ, ယံ ဝိညာဏံ နိစ္စံ ဓုဝံ သသ္သတံ အဝိပရိဏာမဓမ္မံ သသ္သတိသမံ တထေဝ ဌသ္သတီ’’တိ။
97. Sāvatthinidānaṃ . Ekamantaṃ nisinno kho so bhikkhu bhagavantaṃ etadavoca – ‘‘atthi nu kho, bhante, kiñci rūpaṃ yaṃ rūpaṃ niccaṃ dhuvaṃ sassataṃ avipariṇāmadhammaṃ sassatisamaṃ tatheva ṭhassati? Atthi nu kho, bhante, kāci vedanā yā vedanā niccā dhuvā sassatā avipariṇāmadhammā sassatisamaṃ tatheva ṭhassati? Atthi nu kho, bhante, kāci saññā…pe… keci saṅkhārā, ye saṅkhārā niccā dhuvā sassatā avipariṇāmadhammā sassatisamaṃ tatheva ṭhassanti? Atthi nu kho, bhante, kiñci viññāṇaṃ, yaṃ viññāṇaṃ niccaṃ dhuvaṃ sassataṃ avipariṇāmadhammaṃ sassatisamaṃ tatheva ṭhassatī’’ti? ‘‘Natthi kho, bhikkhu, kiñci rūpaṃ, yaṃ rūpaṃ niccaṃ dhuvaṃ sassataṃ avipariṇāmadhammaṃ sassatisamaṃ tatheva ṭhassati. Natthi kho, bhikkhu, kāci vedanā… kāci saññā… keci saṅkhārā…pe… kiñci viññāṇaṃ, yaṃ viññāṇaṃ niccaṃ dhuvaṃ sassataṃ avipariṇāmadhammaṃ sassatisamaṃ tatheva ṭhassatī’’ti.
အထ ခော ဘဂဝာ ပရိတ္တံ နခသိခာယံ ပံသုံ အာရောပေတ္ဝာ တံ ဘိက္ခုံ ဧတဒဝောစ – ‘‘ဧတ္တကမ္ပိ ခော, ဘိက္ခု, ရူပံ နတ္ထိ နိစ္စံ ဓုဝံ သသ္သတံ အဝိပရိဏာမဓမ္မံ သသ္သတိသမံ တထေဝ ဌသ္သတိ။ ဧတ္တကံ စေပိ, ဘိက္ခု, ရူပံ အဘဝိသ္သ နိစ္စံ ဓုဝံ သသ္သတံ အဝိပရိဏာမဓမ္မံ, နယိဒံ ဗ္ရဟ္မစရိယဝာသော ပညာယေထ သမ္မာ ဒုက္ခက္ခယာယ။ ယသ္မာ စ ခော, ဘိက္ခု, ဧတ္တကမ္ပိ ရူပံ နတ္ထိ နိစ္စံ ဓုဝံ သသ္သတံ အဝိပရိဏာမဓမ္မံ, တသ္မာ ဗ္ရဟ္မစရိယဝာသော ပညာယတိ သမ္မာ ဒုက္ခက္ခယာယ’’။
Atha kho bhagavā parittaṃ nakhasikhāyaṃ paṃsuṃ āropetvā taṃ bhikkhuṃ etadavoca – ‘‘ettakampi kho, bhikkhu, rūpaṃ natthi niccaṃ dhuvaṃ sassataṃ avipariṇāmadhammaṃ sassatisamaṃ tatheva ṭhassati. Ettakaṃ cepi, bhikkhu, rūpaṃ abhavissa niccaṃ dhuvaṃ sassataṃ avipariṇāmadhammaṃ, nayidaṃ brahmacariyavāso paññāyetha sammā dukkhakkhayāya. Yasmā ca kho, bhikkhu, ettakampi rūpaṃ natthi niccaṃ dhuvaṃ sassataṃ avipariṇāmadhammaṃ, tasmā brahmacariyavāso paññāyati sammā dukkhakkhayāya’’.
‘‘ဧတ္တကာပိ ခော, ဘိက္ခု, ဝေဒနာ နတ္ထိ နိစ္စာ ဓုဝာ သသ္သတာ အဝိပရိဏာမဓမ္မာ သသ္သတိသမံ တထေဝ ဌသ္သတိ။ ဧတ္တကာ စေပိ, ဘိက္ခု, ဝေဒနာ အဘဝိသ္သ နိစ္စာ ဓုဝာ သသ္သတာ အဝိပရိဏာမဓမ္မာ, န ယိဒံ ဗ္ရဟ္မစရိယဝာသော ပညာယေထ သမ္မာ ဒုက္ခက္ခယာယ။ ယသ္မာ စ ခော, ဘိက္ခု, ဧတ္တကာပိ ဝေဒနာ နတ္ထိ နိစ္စာ ဓုဝာ သသ္သတာ အဝိပရိဏာမဓမ္မာ, တသ္မာ ဗ္ရဟ္မစရိယဝာသော ပညာယတိ သမ္မာ ဒုက္ခက္ခယာယ။
‘‘Ettakāpi kho, bhikkhu, vedanā natthi niccā dhuvā sassatā avipariṇāmadhammā sassatisamaṃ tatheva ṭhassati. Ettakā cepi, bhikkhu, vedanā abhavissa niccā dhuvā sassatā avipariṇāmadhammā, na yidaṃ brahmacariyavāso paññāyetha sammā dukkhakkhayāya. Yasmā ca kho, bhikkhu, ettakāpi vedanā natthi niccā dhuvā sassatā avipariṇāmadhammā, tasmā brahmacariyavāso paññāyati sammā dukkhakkhayāya.
‘‘ဧတ္တကာပိ ခော, ဘိက္ခု, သညာ နတ္ထိ။ပေ.။ ဧတ္တကာပိ ခော, ဘိက္ခု, သင္ခာရာ နတ္ထိ နိစ္စာ ဓုဝာ သသ္သတာ အဝိပရိဏာမဓမ္မာ သသ္သတိသမံ တထေဝ ဌသ္သန္တိ။ ဧတ္တကာ စေပိ, ဘိက္ခု, သင္ခာရာ အဘဝိသ္သံသု နိစ္စာ ဓုဝာ သသ္သတာ အဝိပရိဏာမဓမ္မာ, န ယိဒံ ဗ္ရဟ္မစရိယဝာသော ပညာယေထ သမ္မာ ဒုက္ခက္ခယာယ။ ယသ္မာ စ ခော, ဘိက္ခု, ဧတ္တကာပိ သင္ခာရာ နတ္ထိ နိစ္စာ ဓုဝာ သသ္သတာ အဝိပရိဏာမဓမ္မာ, တသ္မာ ဗ္ရဟ္မစရိယဝာသော ပညာယတိ သမ္မာ ဒုက္ခက္ခယာယ။
‘‘Ettakāpi kho, bhikkhu, saññā natthi…pe… ettakāpi kho, bhikkhu, saṅkhārā natthi niccā dhuvā sassatā avipariṇāmadhammā sassatisamaṃ tatheva ṭhassanti. Ettakā cepi, bhikkhu, saṅkhārā abhavissaṃsu niccā dhuvā sassatā avipariṇāmadhammā, na yidaṃ brahmacariyavāso paññāyetha sammā dukkhakkhayāya. Yasmā ca kho, bhikkhu, ettakāpi saṅkhārā natthi niccā dhuvā sassatā avipariṇāmadhammā, tasmā brahmacariyavāso paññāyati sammā dukkhakkhayāya.
‘‘ဧတ္တကမ္ပိ ခော, ဘိက္ခု, ဝိညာဏံ နတ္ထိ နိစ္စံ ဓုဝံ သသ္သတံ အဝိပရိဏာမဓမ္မံ သသ္သတိသမံ တထေဝ ဌသ္သတိ။ ဧတ္တကမ္ပိ ခော, ဘိက္ခု, ဝိညာဏံ အဘဝိသ္သ နိစ္စံ ဓုဝံ သသ္သတံ အဝိပရိဏာမဓမ္မံ, န ယိဒံ ဗ္ရဟ္မစရိယဝာသော ပညာယေထ သမ္မာ ဒုက္ခက္ခယာယ။ ယသ္မာ စ ခော, ဘိက္ခု, ဧတ္တကမ္ပိ ဝိညာဏံ နတ္ထိ နိစ္စံ ဓုဝံ သသ္သတံ အဝိပရိဏာမဓမ္မံ, တသ္မာ ဗ္ရဟ္မစရိယဝာသော ပညာယတိ သမ္မာ ဒုက္ခက္ခယာယ။
‘‘Ettakampi kho, bhikkhu, viññāṇaṃ natthi niccaṃ dhuvaṃ sassataṃ avipariṇāmadhammaṃ sassatisamaṃ tatheva ṭhassati. Ettakampi kho, bhikkhu, viññāṇaṃ abhavissa niccaṃ dhuvaṃ sassataṃ avipariṇāmadhammaṃ, na yidaṃ brahmacariyavāso paññāyetha sammā dukkhakkhayāya. Yasmā ca kho, bhikkhu, ettakampi viññāṇaṃ natthi niccaṃ dhuvaṃ sassataṃ avipariṇāmadhammaṃ, tasmā brahmacariyavāso paññāyati sammā dukkhakkhayāya.
‘‘တံ ကိံ မညသိ, ဘိက္ခု, ရူပံ နိစ္စံ ဝာ အနိစ္စံ ဝာ’’တိ? ‘‘အနိစ္စံ, ဘန္တေ’’။ ‘‘ဝေဒနာ။ သညာ။ သင္ခာရာ။ ဝိညာဏံ နိစ္စံ ဝာ အနိစ္စံ ဝာ’’တိ? ‘‘အနိစ္စံ ဘန္တေ’’။ပေ.။ ‘‘တသ္မာတိဟ။ပေ.။ ဧဝံ ပသ္သံ။ပေ.။ နာပရံ ဣတ္ထတ္တာယာတိ ပဇာနာတီ’’တိ။ ပဉ္စမံ။
‘‘Taṃ kiṃ maññasi, bhikkhu, rūpaṃ niccaṃ vā aniccaṃ vā’’ti? ‘‘Aniccaṃ, bhante’’. ‘‘Vedanā… saññā… saṅkhārā… viññāṇaṃ niccaṃ vā aniccaṃ vā’’ti? ‘‘Aniccaṃ bhante’’…pe… ‘‘tasmātiha…pe… evaṃ passaṃ…pe… nāparaṃ itthattāyāti pajānātī’’ti. Pañcamaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၄-၆. ဂောမယပိဏ္ဍသုတ္တာဒိဝဏ္ဏနာ • 4-6. Gomayapiṇḍasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၄-၆. ဂောမယပိဏ္ဍသုတ္တာဒိဝဏ္ဏနာ • 4-6. Gomayapiṇḍasuttādivaṇṇanā
