| Library / Tipiṭaka / તિપિટક • Tipiṭaka / અઙ્ગુત્તરનિકાય (ટીકા) • Aṅguttaranikāya (ṭīkā) |
૬. નકુલપિતુસુત્તવણ્ણના
6. Nakulapitusuttavaṇṇanā
૧૬. છટ્ઠે વિસભાગવેદનુપ્પત્તિયા કકચેનેવ ચતુઇરિયાપથં છિન્દન્તો આબાધયતીતિ આબાધો, સો યસ્સ અત્થીતિ આબાધિકો. તંસમુટ્ઠાનદુક્ખેન દુક્ખિતો. અધિમત્તગિલાનોતિ ધાતુસઙ્ખયેન પરિક્ખીણસરીરો.
16. Chaṭṭhe visabhāgavedanuppattiyā kakaceneva catuiriyāpathaṃ chindanto ābādhayatīti ābādho, so yassa atthīti ābādhiko. Taṃsamuṭṭhānadukkhena dukkhito. Adhimattagilānoti dhātusaṅkhayena parikkhīṇasarīro.
સપ્પટિભયકન્તારસદિસા સોળસવત્થુકા અટ્ઠવત્થુકા ચ વિચિકિચ્છા તિણ્ણા ઇમાયાતિ તિણ્ણવિચિકિચ્છા. વિગતા સમુચ્છિન્ના પવત્તિઆદીસુ ‘‘એવં નુ ખો ન નુ ખો’’તિ એવં પવત્તિકા કથંકથા અસ્સાતિ વિગતકથંકથા. સારજ્જકરાનં પાપધમ્માનં પહીનત્તા રાગવિક્ખેપેસુ સીલાદિગુણેસુ ચ તિટ્ઠકત્તા વેસારજ્જં, વિસારદભાવં વેય્યત્તિયં પત્તાતિ વેસારજ્જપ્પત્તા. અત્તના એવ પચ્ચક્ખતો દિટ્ઠત્તા ન પરં પચ્ચેતિ, નસ્સ પરો પચ્ચેતબ્બો અત્થીતિ અપરપ્પચ્ચયા.
Sappaṭibhayakantārasadisā soḷasavatthukā aṭṭhavatthukā ca vicikicchā tiṇṇā imāyāti tiṇṇavicikicchā. Vigatā samucchinnā pavattiādīsu ‘‘evaṃ nu kho na nu kho’’ti evaṃ pavattikā kathaṃkathā assāti vigatakathaṃkathā. Sārajjakarānaṃ pāpadhammānaṃ pahīnattā rāgavikkhepesu sīlādiguṇesu ca tiṭṭhakattā vesārajjaṃ, visāradabhāvaṃ veyyattiyaṃ pattāti vesārajjappattā. Attanā eva paccakkhato diṭṭhattā na paraṃ pacceti, nassa paro paccetabbo atthīti aparappaccayā.
ગિલાના વુટ્ઠિતોતિ ગિલાનભાવતો વુટ્ઠાય ઠિતો. ભાવપ્પધાનો હિ અયં નિદ્દેસો. ગિલાનો હુત્વા વુટ્ઠિતોતિ ઇદં પન અત્થમત્તનિદસ્સનં.
Gilānā vuṭṭhitoti gilānabhāvato vuṭṭhāya ṭhito. Bhāvappadhāno hi ayaṃ niddeso. Gilāno hutvā vuṭṭhitoti idaṃ pana atthamattanidassanaṃ.
નકુલપિતુસુત્તવણ્ણના નિટ્ઠિતા.
Nakulapitusuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / ૬. નકુલપિતુસુત્તં • 6. Nakulapitusuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૬. નકુલપિતુસુત્તવણ્ણના • 6. Nakulapitusuttavaṇṇanā
