| Library / Tipiṭaka / തിപിടക • Tipiṭaka / അപദാന-അട്ഠകഥാ • Apadāna-aṭṭhakathā |
൨. ഞാണസഞ്ഞികത്ഥേരഅപദാനവണ്ണനാ
2. Ñāṇasaññikattheraapadānavaṇṇanā
സുവണ്ണവണ്ണം സമ്ബുദ്ധന്തിആദികം ആയസ്മതോ ഞാണസഞ്ഞികത്ഥേരസ്സ അപദാനം. കാ ഉപ്പത്തി? അയമ്പി പുരിമബുദ്ധേസു കതാധികാരോ തത്ഥ തത്ഥ ഭവേ വിവട്ടൂപനിസ്സയാനി പുഞ്ഞാനി ഉപചിനന്തോ സിദ്ധത്ഥസ്സ ഭഗവതോ കാലേ കുലഗേഹേ നിബ്ബത്തോ വുദ്ധിമന്വായ സദ്ധാജാതോ സദ്ധമ്മസ്സവനേ സാദരോ സാലയോ ഭഗവതോ ധമ്മദേസനാനുസാരേന ഞാണം പേസേത്വാ ഘോസപമാണത്താ ഭഗവതോ ഞാണേ പസന്നോ പഞ്ചങ്ഗഅട്ഠങ്ഗനമക്കാരവസേന പണാമം കത്വാ പക്കാമി. സോ തതോ ചുതോ ദേവലോകേസു ഉപ്പന്നോ തത്ഥ ഛ കാമാവചരേ ദിബ്ബസമ്പത്തിമനുഭവന്തോ തതോ ചവിത്വാ മനുസ്സലോകേ ജാതോ തത്ഥഗ്ഗഭൂതാ ചക്കവത്തിസമ്പദാദയോ അനുഭവിത്വാ ഇമസ്മിം ബുദ്ധുപ്പാദേ വിഭവസമ്പന്നേ ഏകസ്മിം കുലഗേഹേ നിബ്ബത്തോ വുദ്ധിമന്വായ സത്ഥരി പസീദിത്വാ പബ്ബജിതോ നചിരസ്സേവ അരഹാ അഹോസി.
Suvaṇṇavaṇṇaṃsambuddhantiādikaṃ āyasmato ñāṇasaññikattherassa apadānaṃ. Kā uppatti? Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle kulagehe nibbatto vuddhimanvāya saddhājāto saddhammassavane sādaro sālayo bhagavato dhammadesanānusārena ñāṇaṃ pesetvā ghosapamāṇattā bhagavato ñāṇe pasanno pañcaṅgaaṭṭhaṅganamakkāravasena paṇāmaṃ katvā pakkāmi. So tato cuto devalokesu uppanno tattha cha kāmāvacare dibbasampattimanubhavanto tato cavitvā manussaloke jāto tatthaggabhūtā cakkavattisampadādayo anubhavitvā imasmiṃ buddhuppāde vibhavasampanne ekasmiṃ kulagehe nibbatto vuddhimanvāya satthari pasīditvā pabbajito nacirasseva arahā ahosi.
൭. സോ അപരഭാഗേ അത്തനോ പുബ്ബകമ്മം സരിത്വാ സോമനസ്സജാതോ പുബ്ബചരിതാപദാനം പകാസേന്തോ സുവണ്ണവണ്ണം സമ്ബുദ്ധന്തിആദിമാഹ. തം വുത്തത്ഥമേവ. നിസഭാജാനിയം യഥാതി ഗവസതസഹസ്സജേട്ഠോ നിസഭോ, നിസഭോ ച സോ ആജാനിയോ സേട്ഠോ ഉത്തമോ ചേതി നിസഭാജാനിയോ. യഥാ നിസഭാജാനിയോ, തഥേവ ഭഗവാതി അത്ഥോ. ലോകവിസയസഞ്ഞാതം പഞ്ഞത്തിവസേന ഏവം വുത്തം. അനുപമേയ്യോ ഹി ഭഗവാ. സേസം സബ്ബത്ഥ ഉത്താനത്ഥമേവാതി.
7. So aparabhāge attano pubbakammaṃ saritvā somanassajāto pubbacaritāpadānaṃ pakāsento suvaṇṇavaṇṇaṃ sambuddhantiādimāha. Taṃ vuttatthameva. Nisabhājāniyaṃ yathāti gavasatasahassajeṭṭho nisabho, nisabho ca so ājāniyo seṭṭho uttamo ceti nisabhājāniyo. Yathā nisabhājāniyo, tatheva bhagavāti attho. Lokavisayasaññātaṃ paññattivasena evaṃ vuttaṃ. Anupameyyo hi bhagavā. Sesaṃ sabbattha uttānatthamevāti.
ഞാണസഞ്ഞികത്ഥേരഅപദാനവണ്ണനാ സമത്താ.
Ñāṇasaññikattheraapadānavaṇṇanā samattā.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / ഖുദ്ദകനികായ • Khuddakanikāya / അപദാനപാളി • Apadānapāḷi / ൨. ഞാണസഞ്ഞികത്ഥേരഅപദാനം • 2. Ñāṇasaññikattheraapadānaṃ
