| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
༡༠. ནཱནཱཏིཏྠིཡསཱཝཀསུཏྟཝཎྞནཱ
10. Nānātitthiyasāvakasuttavaṇṇanā
༡༡༡. ནཱནཱཏིཏྠིཡསཱཝཀཱཏི པུཐུཏིཏྠིཡཱནཾ སཱཝཀཱ། ཚིནྡིཏེཏི ཧཏྠཙྪེདཱདིཝསེན ཚེདེ། མཱརིཏེཏི མཱརཎེ། ན པཱཔཾ སམནུཔསྶཏཱིཏི ཀིཉྩི པཱཔཾ ཨཏྠཱིཏི ན པསྶཏི, པརེསཉྩ ཏཐཱ པཝེདེཏི། ཝིསྶཱསནྟི ཝིསྶཏྠབྷཱཝཾ། ‘‘ཀཏཀམྨཱནམྤི ཝིཔཱཀོ ནཏྠཱི’’ཏི ཝདནྟོ ཀཏཔཱཔཱནཾ ཨཀཏཔུཉྙཱནཉྩ ཝིསྶཏྠཏཾ ནིརཱསངྐཏཾ ཛནེཏི།
111.Nānātitthiyasāvakāti puthutitthiyānaṃ sāvakā. Chinditeti hatthacchedādivasena chede. Māriteti māraṇe. Na pāpaṃ samanupassatīti kiñci pāpaṃ atthīti na passati, paresañca tathā pavedeti. Vissāsanti vissatthabhāvaṃ. ‘‘Katakammānampi vipāko natthī’’ti vadanto katapāpānaṃ akatapuññānañca vissatthataṃ nirāsaṅkataṃ janeti.
ཏཔོཛིགུཙྪཱཡཱཏི ཏཔསཱ ཨཙེལཝཏཱདིནཱ པཱཔཏོ ཛིགུཙྪནེན, ‘‘པཱཔཾ ཝིརཱཛཡཱམཱ’’ཏི ཨཙེལཝཏཱདིསམཱདཱནེནཱཏི ཨཏྠོ། ཏསྨིཉྷི སམཱདཱནེ ཋིཏེན སཾཝརེན སཾཝུཏཙིཏྟོ སམནྣཱགཏོ པིཧིཏོ ཙ ནཱམ ཧོཏཱིཏི ‘‘སུསཾཝུཏཏྟོ’’ཏིཨཱདི ཝུཏྟཾ། ཙཏྟཱརོ ཡཱམཱ བྷཱགཱ ཙཏུཡཱམཱ, ཙཏུཡཱམཱ ཨེཝ ཙཱཏུཡཱམཱ། བྷཱགཏྠོ ཧི ཨིདྷ ཡཱམ-སདྡོ ཡཐཱ ‘‘རཏྟིཡཾ པཋམོ ཡཱམོ’’ཏི། སོ པནེཏྠ བྷཱགོ སཾཝརལཀྑཎོཏི ཨཱཧ ‘‘ཙཱཏུཡཱམེན སུསཾཝུཏོ’’ཏི, ཙཏུཀོཊྛཱསེན སཾཝརེན སུཊྛུ སཾཝུཏོཏི ཨཏྠོ། པཊིཀྑིཏྟསབྦསཱིཏོདཀོཏི པཊིཀྑིཏྟསབྦསཱིཏུདཀཔརིབྷོགོ། སབྦེན པཱཔཝཱརཎེན ཡུཏྟོཏི སབྦཔྤཀཱརེན སཾཝརལཀྑཎེན པཱཔཝཱརཎེན སམནྣཱགཏོ། དྷུཏཔཱཔོཏི སབྦེན ནིཛྫརལཀྑཎེན པཱཔཝཱརཎེནཔི དྷུཏཔཱཔོ། ཕུཊྛོཏི ཨཊྛནྣམྤི ཀམྨཱནཾ ཁེཔནེན ཝིཀྑེཔཔྤཏྟིཡཱ ཀམྨཀྑཡལཀྑཎེན སབྦེན པཱཔཝཱརཎེན ཕུཊྛོ, ཏཾ ཕུསིཏྭཱ ཋིཏོ། ན ནིགུཧནྟོཏི ན ནིགུཧནཧེཏུ དིཊྛསུཏེ ཏཐེཝ ཀཐེནྟོ།
Tapojigucchāyāti tapasā acelavatādinā pāpato jigucchanena, ‘‘pāpaṃ virājayāmā’’ti acelavatādisamādānenāti attho. Tasmiñhi samādāne ṭhitena saṃvarena saṃvutacitto samannāgato pihito ca nāma hotīti ‘‘susaṃvutatto’’tiādi vuttaṃ. Cattāro yāmā bhāgā catuyāmā, catuyāmā eva cātuyāmā. Bhāgattho hi idha yāma-saddo yathā ‘‘rattiyaṃ paṭhamo yāmo’’ti. So panettha bhāgo saṃvaralakkhaṇoti āha ‘‘cātuyāmena susaṃvuto’’ti, catukoṭṭhāsena saṃvarena suṭṭhu saṃvutoti attho. Paṭikkhittasabbasītodakoti paṭikkhittasabbasītudakaparibhogo. Sabbena pāpavāraṇena yuttoti sabbappakārena saṃvaralakkhaṇena pāpavāraṇena samannāgato. Dhutapāpoti sabbena nijjaralakkhaṇena pāpavāraṇenapi dhutapāpo. Phuṭṭhoti aṭṭhannampi kammānaṃ khepanena vikkhepappattiyā kammakkhayalakkhaṇena sabbena pāpavāraṇena phuṭṭho, taṃ phusitvā ṭhito. Na niguhantoti na niguhanahetu diṭṭhasute tatheva kathento.
ནཱནཱཏིཏྠིཡཱནཾཡེཝ ཨུཔཊྛཱཀོཏི པརཝཱདཱིནཾ སབྦེསཾཡེཝ ཏིཏྠིཡཱནཾ ཨུཔཊྛཱཀོ, ཏེསུ སཱདྷཱརཎཝསེན ཨབྷིཔྤསནྣོ། ཀོཊིཔྤཏྟཱཏི མོཀྑཱདྷིགམེན སམཎདྷམྨེ པཏྟབྦམརིཡཱདཔྤཏྟཱ།
Nānātitthiyānaṃyevaupaṭṭhākoti paravādīnaṃ sabbesaṃyeva titthiyānaṃ upaṭṭhāko, tesu sādhāraṇavasena abhippasanno. Koṭippattāti mokkhādhigamena samaṇadhamme pattabbamariyādappattā.
སཧཙརིཏམཏྟེནཱཏི སཱིཧནཱདེན སཧ ཝསྶཀརཎམཏྟེན། སཱིཧེན སཱིཧནཱདཾ ནདནྟེན སཧེཝ སིངྒཱལེན ཨཏྟནོ སིངྒཱལརཝཀརཎམཏྟེན། ཀོཏྠུཀོཏི ཁུདྡཀཀོཏྠུ། ཨཱསངྐིཏསམཱཙཱརོཏི ཨཏྟནཱ ཙ པརེཧི ཙ ཨཱསངྐིཏབྦསམཱཙཱརོ། སཔྤུརིསཱནནྟི བུདྡྷཱདཱིནཾ།
Sahacaritamattenāti sīhanādena saha vassakaraṇamattena. Sīhena sīhanādaṃ nadantena saheva siṅgālena attano siṅgālaravakaraṇamattena. Kotthukoti khuddakakotthu. Āsaṅkitasamācāroti attanā ca parehi ca āsaṅkitabbasamācāro. Sappurisānanti buddhādīnaṃ.
ཏསྶཱཏི ཝེགབྦྷརིསྶ དེཝཔུཏྟསྶ། སརཱིརེ ཨནུཨཱཝིསཱིཏི སརཱིརེ ཨནུཔཝིསིཏྭཱ ཝིཡ ཨཱཝིསི། ཨདྷིམུཙྩཱིཏི ཡཐཱ གཧིཏསྶ ཝསེན ཙིཏྟཾ ན ཝཏྟཏི, ཨཏྟནོ ཨེཝ ཝསེ ཝཏྟཏི, ཨེཝཾ ཨདྷིཊྛཧི། ཨཱཡུཏྟཱཏི དསྶནེན སཾཡུཏྟཱ ། པཝིཝེཀིཡནྟི ཀཔྤཀཝཏྠབྷུཉྫནསེནཱསནེཧི པཝིཝིཏྟབྷཱཝཾ། ཏེནཱཧ ‘‘ཏེ ཀིརཱ’’ཏིཨཱདི། རཱུཔེ ནིཝིཊྛཱཏི ཙཀྑུརཱུཔདྷམྨེ ཨབྷིནིཝིཊྛཱ། ཏེནཱཧ ‘‘ཏཎྷཱདིཊྛཱིཧི པཏིཊྛིཏཱ’’ཏི། དེཝལོཀཔཏྠནཀཱམཱཏི དེཝལོཀསྶེཝ ཨབྷིཔཏྠནཀཱམཱ། མརཎདྷམྨཏཱཡ མཱཏིཡཱ། ཏེནཱཧ ‘‘མཱཏིཡཱཏི མཙྩཱ’’ཏི། པརལོཀཏྠཱཡཱཏི པརསམྤཏྟིབྷཱཝཱཡ ལོཀསྶ ཨཏྠཱཡ།
Tassāti vegabbharissa devaputtassa. Sarīre anuāvisīti sarīre anupavisitvā viya āvisi. Adhimuccīti yathā gahitassa vasena cittaṃ na vattati, attano eva vase vattati, evaṃ adhiṭṭhahi. Āyuttāti dassanena saṃyuttā . Pavivekiyanti kappakavatthabhuñjanasenāsanehi pavivittabhāvaṃ. Tenāha ‘‘te kirā’’tiādi. Rūpe niviṭṭhāti cakkhurūpadhamme abhiniviṭṭhā. Tenāha ‘‘taṇhādiṭṭhīhi patiṭṭhitā’’ti. Devalokapatthanakāmāti devalokasseva abhipatthanakāmā. Maraṇadhammatāya mātiyā. Tenāha ‘‘mātiyāti maccā’’ti. Paralokatthāyāti parasampattibhāvāya lokassa atthāya.
པབྷཱསཝཎྞཱཏི པབྷཱཡ སམཱནཝཎྞཱ། ཀེསཾ པབྷཱཡཱཏི ཨཱཧ ‘‘ཙནྡོབྷཱསཱ’’ཏིཨཱདི། སཛ྄ཛྷཱརཱགཔབྷཱསཝཎྞཱ ཨིནྡདྷནུཔབྷཱསཝཎྞཱཏི པཙྩེཀཾ ཡོཛནཱ། ཨཱམོ ཨཱམགནྡྷོ ཨེཏསྶ ཨཏྠཱིཏི ཨཱམིསཾ། ཝདྷཱཡཱཏི ཝིདྡྷཾསིཏུཾ། རཱུཔཱཏི རཱུཔཱཡཏནཱདིརཱུཔིདྷམྨཱ།
Pabhāsavaṇṇāti pabhāya samānavaṇṇā. Kesaṃ pabhāyāti āha ‘‘candobhāsā’’tiādi. Sajjhārāgapabhāsavaṇṇā indadhanupabhāsavaṇṇāti paccekaṃ yojanā. Āmo āmagandho etassa atthīti āmisaṃ. Vadhāyāti viddhaṃsituṃ. Rūpāti rūpāyatanādirūpidhammā.
རཱཛགཧསམཱིཔཔྤཝཏྟཱིནཾ རཱཛགཧིཡཱནཾ། ‘‘སེཏོ’’ཏི ཀེལཱསཀཱུཊོ ཨདྷིཔྤེཏོཏི ཨཱཧ ‘‘སེཏོཏི ཀེལཱསོ’’ཏི། ཀེནཙི ན གྷཊྚེཏཱིཏི ཨགྷཾ, ཨནྟལིཀྑནྟི ཨཱཧ ‘‘ཨགྷགཱམཱིནནྟི ཨཱཀཱསགཱམཱིན’’ནྟི། ཨུདཀཾ དྷཱིཡཏི ཨེཏྠཱཏི ཨུདདྷི, མཧོདདྷི། ཝིཔུལོཏི ཝེཔུལླཔབྦཏོ། ཧིམཝནྟཔབྦཏཱནནྟི ཧིམཝནྟཔབྦཏབྷཱགཱནཾ། བུདྡྷོ སེཊྛོ སཱིལསམཱདྷིཔཉྙཱཝིམུཏྟིཝིམུཏྟིཉཱཎདསྶནཱདཱིཧི སབྦགུཎེཧི།
Rājagahasamīpappavattīnaṃ rājagahiyānaṃ. ‘‘Seto’’ti kelāsakūṭo adhippetoti āha ‘‘setoti kelāso’’ti. Kenaci na ghaṭṭetīti aghaṃ, antalikkhanti āha ‘‘aghagāmīnanti ākāsagāmīna’’nti. Udakaṃ dhīyati etthāti udadhi, mahodadhi. Vipuloti vepullapabbato. Himavantapabbatānanti himavantapabbatabhāgānaṃ. Buddho seṭṭho sīlasamādhipaññāvimuttivimuttiñāṇadassanādīhi sabbaguṇehi.
ནཱནཱཏིཏྠིཡསཱཝཀསུཏྟཝཎྞནཱ ནིཊྛིཏཱ།
Nānātitthiyasāvakasuttavaṇṇanā niṭṭhitā.
ཏཏིཡཝགྒཝཎྞནཱ ནིཊྛིཏཱ།
Tatiyavaggavaṇṇanā niṭṭhitā.
སཱརཏྠཔྤཀཱསིནིཡཱ སཾཡུཏྟནིཀཱཡ-ཨཊྛཀཐཱཡ
Sāratthappakāsiniyā saṃyuttanikāya-aṭṭhakathāya
དེཝཔུཏྟསཾཡུཏྟཝཎྞནཱཡ ལཱིནཏྠཔྤཀཱསནཱ སམཏྟཱ།
Devaputtasaṃyuttavaṇṇanāya līnatthappakāsanā samattā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༡༠. ནཱནཱཏིཏྠིཡསཱཝཀསུཏྟཾ • 10. Nānātitthiyasāvakasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༡༠. ནཱནཱཏིཏྠིཡསཱཝཀསུཏྟཝཎྞནཱ • 10. Nānātitthiyasāvakasuttavaṇṇanā
