| Library / Tipiṭaka / तिपिटक • Tipiṭaka / अपदानपाळि • Apadānapāḷi |
५. नन्दकत्थेरअपदानं
5. Nandakattheraapadānaṃ
१४३.
143.
‘‘पदुमुत्तरो नाम जिनो, सब्बधम्मेसु चक्खुमा।
‘‘Padumuttaro nāma jino, sabbadhammesu cakkhumā;
इतो सतसहस्सम्हि, कप्पे उप्पज्जि नायको॥
Ito satasahassamhi, kappe uppajji nāyako.
१४४.
144.
‘‘हिताय सब्बसत्तानं, सुखाय वदतं वरो।
‘‘Hitāya sabbasattānaṃ, sukhāya vadataṃ varo;
अत्थाय पुरिसाजञ्ञो, पटिपन्नो सदेवके॥
Atthāya purisājañño, paṭipanno sadevake.
१४५.
145.
पूजितो सब्बलोकस्स, दिसा सब्बासु विस्सुतो॥
Pūjito sabbalokassa, disā sabbāsu vissuto.
१४६.
146.
‘‘उत्तिण्णविचिकिच्छो सो, वीतिवत्तकथंकथो।
‘‘Uttiṇṇavicikiccho so, vītivattakathaṃkatho;
परिपुण्णमनसङ्कप्पो, पत्तो सम्बोधिमुत्तमं॥
Paripuṇṇamanasaṅkappo, patto sambodhimuttamaṃ.
१४७.
147.
‘‘अनुप्पन्नस्स मग्गस्स, उप्पादेता नरुत्तमो।
‘‘Anuppannassa maggassa, uppādetā naruttamo;
अनक्खातञ्च अक्खासि, असञ्जातञ्च सञ्जनी॥
Anakkhātañca akkhāsi, asañjātañca sañjanī.
१४८.
148.
१४९.
149.
‘‘तदा महाकारुणिको, धम्मं देसेसि नायको।
‘‘Tadā mahākāruṇiko, dhammaṃ desesi nāyako;
१५०.
150.
‘‘भिक्खुनीनं ओवदने, सावकं सेट्ठसम्मतं।
‘‘Bhikkhunīnaṃ ovadane, sāvakaṃ seṭṭhasammataṃ;
वण्णयं एतदग्गम्हि, पञ्ञपेसि महामुनि॥
Vaṇṇayaṃ etadaggamhi, paññapesi mahāmuni.
१५१.
151.
‘‘तं सुत्वाहं पमुदितो, निमन्तेत्वा तथागतं।
‘‘Taṃ sutvāhaṃ pamudito, nimantetvā tathāgataṃ;
भोजयित्वा ससङ्घं तं, पत्थयिं ठानमुत्तमं॥
Bhojayitvā sasaṅghaṃ taṃ, patthayiṃ ṭhānamuttamaṃ.
१५२.
152.
‘‘तदा पमुदितो नाथो, मं अवोच महाइसि।
‘‘Tadā pamudito nātho, maṃ avoca mahāisi;
१५३.
153.
‘‘‘सतसहस्सितो कप्पे, ओक्काककुलसम्भवो।
‘‘‘Satasahassito kappe, okkākakulasambhavo;
गोतमो नाम गोत्तेन, सत्था लोके भविस्सति॥
Gotamo nāma gottena, satthā loke bhavissati.
१५४.
154.
‘‘‘तस्स धम्मेसु दायादो, ओरसो धम्मनिम्मितो।
‘‘‘Tassa dhammesu dāyādo, oraso dhammanimmito;
नन्दको नाम नामेन, हेस्सति सत्थु सावको’॥
Nandako nāma nāmena, hessati satthu sāvako’.
१५५.
155.
‘‘तेन कम्मेन सुकतेन, चेतनापणिधीहि च।
‘‘Tena kammena sukatena, cetanāpaṇidhīhi ca;
जहित्वा मानुसं देहं, तावतिंसूपगो अहं॥
Jahitvā mānusaṃ dehaṃ, tāvatiṃsūpago ahaṃ.
१५६.
156.
‘‘पच्छिमे च भवे दानि, जातो सेट्ठिकुले अहं।
‘‘Pacchime ca bhave dāni, jāto seṭṭhikule ahaṃ;
सावत्थियं पुरे वरे, इद्धे फीते महद्धने॥
Sāvatthiyaṃ pure vare, iddhe phīte mahaddhane.
१५७.
157.
‘‘पुरप्पवेसे सुगतं, दिस्वा विम्हितमानसो।
‘‘Purappavese sugataṃ, disvā vimhitamānaso;
जेतारामपटिग्गाहे, पब्बजिं अनगारियं॥
Jetārāmapaṭiggāhe, pabbajiṃ anagāriyaṃ.
१५८.
158.
‘‘नचिरेनेव कालेन, अरहत्तमपापुणिं।
‘‘Nacireneva kālena, arahattamapāpuṇiṃ;
ततोहं तिण्णसंसारो, सासितो सब्बदस्सिना॥
Tatohaṃ tiṇṇasaṃsāro, sāsito sabbadassinā.
१५९.
159.
‘‘भिक्खुनीनं धम्मकथं, पटिपुच्छाकरिं अहं।
‘‘Bhikkhunīnaṃ dhammakathaṃ, paṭipucchākariṃ ahaṃ;
सासिता ता मया सब्बा, अभविंसु अनासवा॥
Sāsitā tā mayā sabbā, abhaviṃsu anāsavā.
१६०.
160.
‘‘सतानि पञ्चनूनानि, तदा तुट्ठो महाहितो।
‘‘Satāni pañcanūnāni, tadā tuṭṭho mahāhito;
भिक्खुनीनं ओवदतं, अग्गट्ठाने ठपेसि मं॥
Bhikkhunīnaṃ ovadataṃ, aggaṭṭhāne ṭhapesi maṃ.
१६१.
161.
‘‘सतसहस्से कतं कम्मं, फलं दस्सेसि मे इध।
‘‘Satasahasse kataṃ kammaṃ, phalaṃ dassesi me idha;
सुमुत्तो सरवेगोव, किलेसे झापयिं मम॥
Sumutto saravegova, kilese jhāpayiṃ mama.
१६२.
162.
‘‘किलेसा झापिता मय्हं…पे॰… विहरामि अनासवो॥
‘‘Kilesā jhāpitā mayhaṃ…pe… viharāmi anāsavo.
१६३.
163.
‘‘स्वागतं वत मे आसि…पे॰… कतं बुद्धस्स सासनं॥
‘‘Svāgataṃ vata me āsi…pe… kataṃ buddhassa sāsanaṃ.
१६४.
164.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा नन्दको थेरो इमा गाथायो
Itthaṃ sudaṃ āyasmā nandako thero imā gāthāyo
अभासित्थाति।
Abhāsitthāti.
नन्दकत्थेरस्सापदानं पञ्चमं।
Nandakattherassāpadānaṃ pañcamaṃ.
Footnotes:
