| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೧೦. ನನ್ದಮಾತಾಸುತ್ತಂ
10. Nandamātāsuttaṃ
ತೇನ ಖೋ ಪನ ಸಮಯೇನ ವೇಸ್ಸವಣೋ ಮಹಾರಾಜಾ ಉತ್ತರಾಯ ದಿಸಾಯ ದಕ್ಖಿಣಂ ದಿಸಂ ಗಚ್ಛತಿ ಕೇನಚಿದೇವ ಕರಣೀಯೇನ। ಅಸ್ಸೋಸಿ ಖೋ ವೇಸ್ಸವಣೋ ಮಹಾರಾಜಾ ನನ್ದಮಾತಾಯ ಉಪಾಸಿಕಾಯ ಪಾರಾಯನಂ ಸರೇನ ಭಾಸನ್ತಿಯಾ, ಸುತ್ವಾ ಕಥಾಪರಿಯೋಸಾನಂ ಆಗಮಯಮಾನೋ ಅಟ್ಠಾಸಿ।
Tena kho pana samayena vessavaṇo mahārājā uttarāya disāya dakkhiṇaṃ disaṃ gacchati kenacideva karaṇīyena. Assosi kho vessavaṇo mahārājā nandamātāya upāsikāya pārāyanaṃ sarena bhāsantiyā, sutvā kathāpariyosānaṃ āgamayamāno aṭṭhāsi.
ಅಥ ಖೋ ನನ್ದಮಾತಾ ಉಪಾಸಿಕಾ ಪಾರಾಯನಂ ಸರೇನ ಭಾಸಿತ್ವಾ ತುಣ್ಹೀ ಅಹೋಸಿ। ಅಥ ಖೋ ವೇಸ್ಸವಣೋ ಮಹಾರಾಜಾ ನನ್ದಮಾತಾಯ ಉಪಾಸಿಕಾಯ ಕಥಾಪರಿಯೋಸಾನಂ ವಿದಿತ್ವಾ ಅಬ್ಭಾನುಮೋದಿ – ‘‘ಸಾಧು ಭಗಿನಿ, ಸಾಧು ಭಗಿನೀ’’ತಿ! ‘‘ಕೋ ಪನೇಸೋ, ಭದ್ರಮುಖಾ’’ತಿ? ‘‘ಅಹಂ ತೇ, ಭಗಿನಿ, ಭಾತಾ ವೇಸ್ಸವಣೋ, ಮಹಾರಾಜಾ’’ತಿ। ‘‘ಸಾಧು, ಭದ್ರಮುಖ, ತೇನ ಹಿ ಯೋ ಮೇ ಅಯಂ ಧಮ್ಮಪರಿಯಾಯೋ ಭಣಿತೋ ಇದಂ ತೇ ಹೋತು ಆತಿಥೇಯ್ಯ’’ನ್ತಿ। ‘‘ಸಾಧು, ಭಗಿನಿ, ಏತಞ್ಚೇವ ಮೇ ಹೋತು ಆತಿಥೇಯ್ಯಂ। ಸ್ವೇವ 5 ಸಾರಿಪುತ್ತಮೋಗ್ಗಲ್ಲಾನಪ್ಪಮುಖೋ ಭಿಕ್ಖುಸಙ್ಘೋ ಅಕತಪಾತರಾಸೋ ವೇಳುಕಣ್ಡಕಂ ಆಗಮಿಸ್ಸತಿ, ತಞ್ಚ ಭಿಕ್ಖುಸಙ್ಘಂ ಪರಿವಿಸಿತ್ವಾ ಮಮ ದಕ್ಖಿಣಂ ಆದಿಸೇಯ್ಯಾಸಿ। ಏತಞ್ಚೇವ 6 ಮೇ ಭವಿಸ್ಸತಿ ಆತಿಥೇಯ್ಯ’’ನ್ತಿ।
Atha kho nandamātā upāsikā pārāyanaṃ sarena bhāsitvā tuṇhī ahosi. Atha kho vessavaṇo mahārājā nandamātāya upāsikāya kathāpariyosānaṃ viditvā abbhānumodi – ‘‘sādhu bhagini, sādhu bhaginī’’ti! ‘‘Ko paneso, bhadramukhā’’ti? ‘‘Ahaṃ te, bhagini, bhātā vessavaṇo, mahārājā’’ti. ‘‘Sādhu, bhadramukha, tena hi yo me ayaṃ dhammapariyāyo bhaṇito idaṃ te hotu ātitheyya’’nti. ‘‘Sādhu, bhagini, etañceva me hotu ātitheyyaṃ. Sveva 7 sāriputtamoggallānappamukho bhikkhusaṅgho akatapātarāso veḷukaṇḍakaṃ āgamissati, tañca bhikkhusaṅghaṃ parivisitvā mama dakkhiṇaṃ ādiseyyāsi. Etañceva 8 me bhavissati ātitheyya’’nti.
ಅಥ ಖೋ ನನ್ದಮಾತಾ ಉಪಾಸಿಕಾ ತಸ್ಸಾ ರತ್ತಿಯಾ ಅಚ್ಚಯೇನ ಸಕೇ ನಿವೇಸನೇ ಪಣೀತಂ ಖಾದನೀಯಂ ಭೋಜನೀಯಂ ಪಟಿಯಾದಾಪೇಸಿ। ಅಥ ಖೋ ಸಾರಿಪುತ್ತಮೋಗ್ಗಲ್ಲಾನಪ್ಪಮುಖೋ ಭಿಕ್ಖುಸಙ್ಘೋ ಅಕತಪಾತರಾಸೋ ಯೇನ ವೇಳುಕಣ್ಡಕೋ ತದವಸರಿ। ಅಥ ಖೋ ನನ್ದಮಾತಾ ಉಪಾಸಿಕಾ ಅಞ್ಞತರಂ ಪುರಿಸಂ ಆಮನ್ತೇಸಿ – ‘‘ಏಹಿ ತ್ವಂ, ಅಮ್ಭೋ ಪುರಿಸ, ಆರಾಮಂ ಗನ್ತ್ವಾ ಭಿಕ್ಖುಸಙ್ಘಸ್ಸ ಕಾಲಂ ಆರೋಚೇಹಿ – ‘ಕಾಲೋ, ಭನ್ತೇ, ಅಯ್ಯಾಯ ನನ್ದಮಾತುಯಾ ನಿವೇಸನೇ ನಿಟ್ಠಿತಂ ಭತ್ತ’’’ನ್ತಿ। ‘‘ಏವಂ, ಅಯ್ಯೇ’’ತಿ ಖೋ ಸೋ ಪುರಿಸೋ ನನ್ದಮಾತಾಯ ಉಪಾಸಿಕಾಯ ಪಟಿಸ್ಸುತ್ವಾ ಆರಾಮಂ ಗನ್ತ್ವಾ ಭಿಕ್ಖುಸಙ್ಘಸ್ಸ ಕಾಲಂ ಆರೋಚೇಸಿ – ‘‘ಕಾಲೋ, ಭನ್ತೇ, ಅಯ್ಯಾಯ ನನ್ದಮಾತುಯಾ ನಿವೇಸನೇ ನಿಟ್ಠಿತಂ ಭತ್ತ’’ನ್ತಿ। ಅಥ ಖೋ ಸಾರಿಪುತ್ತಮೋಗ್ಗಲ್ಲಾನಪ್ಪಮುಖೋ ಭಿಕ್ಖುಸಙ್ಘೋ ಪುಬ್ಬಣ್ಹಸಮಯಂ ನಿವಾಸೇತ್ವಾ ಪತ್ತಚೀವರಮಾದಾಯ ಯೇನ ನನ್ದಮಾತಾಯ ಉಪಾಸಿಕಾಯ ನಿವೇಸನಂ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಪಞ್ಞತ್ತೇ ಆಸನೇ ನಿಸೀದಿ। ಅಥ ಖೋ ನನ್ದಮಾತಾ ಉಪಾಸಿಕಾ ಸಾರಿಪುತ್ತಮೋಗ್ಗಲ್ಲಾನಪ್ಪಮುಖಂ ಭಿಕ್ಖುಸಙ್ಘಂ ಪಣೀತೇನ ಖಾದನೀಯೇನ ಭೋಜನೀಯೇನ ಸಹತ್ಥಾ ಸನ್ತಪ್ಪೇಸಿ ಸಮ್ಪವಾರೇಸಿ।
Atha kho nandamātā upāsikā tassā rattiyā accayena sake nivesane paṇītaṃ khādanīyaṃ bhojanīyaṃ paṭiyādāpesi. Atha kho sāriputtamoggallānappamukho bhikkhusaṅgho akatapātarāso yena veḷukaṇḍako tadavasari. Atha kho nandamātā upāsikā aññataraṃ purisaṃ āmantesi – ‘‘ehi tvaṃ, ambho purisa, ārāmaṃ gantvā bhikkhusaṅghassa kālaṃ ārocehi – ‘kālo, bhante, ayyāya nandamātuyā nivesane niṭṭhitaṃ bhatta’’’nti. ‘‘Evaṃ, ayye’’ti kho so puriso nandamātāya upāsikāya paṭissutvā ārāmaṃ gantvā bhikkhusaṅghassa kālaṃ ārocesi – ‘‘kālo, bhante, ayyāya nandamātuyā nivesane niṭṭhitaṃ bhatta’’nti. Atha kho sāriputtamoggallānappamukho bhikkhusaṅgho pubbaṇhasamayaṃ nivāsetvā pattacīvaramādāya yena nandamātāya upāsikāya nivesanaṃ tenupasaṅkami; upasaṅkamitvā paññatte āsane nisīdi. Atha kho nandamātā upāsikā sāriputtamoggallānappamukhaṃ bhikkhusaṅghaṃ paṇītena khādanīyena bhojanīyena sahatthā santappesi sampavāresi.
ಅಥ ಖೋ ನನ್ದಮಾತಾ ಉಪಾಸಿಕಾ ಆಯಸ್ಮನ್ತಂ ಸಾರಿಪುತ್ತಂ ಭುತ್ತಾವಿಂ ಓನೀತಪತ್ತಪಾಣಿಂ ಏಕಮನ್ತಂ ನಿಸೀದಿ। ಏಕಮನ್ತಂ ನಿಸಿನ್ನಂ ಖೋ ನನ್ದಮಾತರಂ ಉಪಾಸಿಕಂ ಆಯಸ್ಮಾ ಸಾರಿಪುತ್ತೋ ಏತದವೋಚ – ‘‘ಕೋ ಪನ ತೇ, ನನ್ದಮಾತೇ, ಭಿಕ್ಖುಸಙ್ಘಸ್ಸ ಅಬ್ಭಾಗಮನಂ ಆರೋಚೇಸೀ’’ತಿ?
Atha kho nandamātā upāsikā āyasmantaṃ sāriputtaṃ bhuttāviṃ onītapattapāṇiṃ ekamantaṃ nisīdi. Ekamantaṃ nisinnaṃ kho nandamātaraṃ upāsikaṃ āyasmā sāriputto etadavoca – ‘‘ko pana te, nandamāte, bhikkhusaṅghassa abbhāgamanaṃ ārocesī’’ti?
‘‘ಇಧಾಹಂ, ಭನ್ತೇ , ರತ್ತಿಯಾ ಪಚ್ಚೂಸಸಮಯಂ ಪಚ್ಚುಟ್ಠಾಯ ಪಾರಾಯನಂ ಸರೇನ ಭಾಸಿತ್ವಾ ತುಣ್ಹೀ ಅಹೋಸಿಂ। ಅಥ ಖೋ, ಭನ್ತೇ, ವೇಸ್ಸವಣೋ ಮಹಾರಾಜಾ ಮಮ ಕಥಾಪರಿಯೋಸಾನಂ ವಿದಿತ್ವಾ ಅಬ್ಭಾನುಮೋದಿ – ‘ಸಾಧು, ಭಗಿನಿ, ಸಾಧು, ಭಗಿನೀ’ತಿ! ‘ಕೋ ಪನೇಸೋ, ಭದ್ರಮುಖಾ’ತಿ? ‘ಅಹಂ ತೇ, ಭಗಿನಿ, ಭಾತಾ ವೇಸ್ಸವಣೋ, ಮಹಾರಾಜಾ’ತಿ। ‘ಸಾಧು, ಭದ್ರಮುಖ, ತೇನ ಹಿ ಯೋ ಮೇ ಅಯಂ ಧಮ್ಮಪರಿಯಾಯೋ ಭಣಿತೋ ಇದಂ ತೇ ಹೋತು ಆತಿಥೇಯ್ಯ’ನ್ತಿ। ‘ಸಾಧು, ಭಗಿನಿ, ಏತಞ್ಚೇವ ಮೇ ಹೋತು ಆತಿಥೇಯ್ಯಂ। ಸ್ವೇವ ಸಾರಿಪುತ್ತಮೋಗ್ಗಲ್ಲಾನಪ್ಪಮುಖೋ ಭಿಕ್ಖುಸಙ್ಘೋ ಅಕತಪಾತರಾಸೋ ವೇಳುಕಣ್ಡಕಂ ಆಗಮಿಸ್ಸತಿ, ತಞ್ಚ ಭಿಕ್ಖುಸಙ್ಘಂ ಪರಿವಿಸಿತ್ವಾ ಮಮ ದಕ್ಖಿಣಂ ಆದಿಸೇಯ್ಯಾಸಿ। ಏತಞ್ಚೇವ 9 ಮೇ ಭವಿಸ್ಸತಿ ಆತಿಥೇಯ್ಯ’ನ್ತಿ। ಯದಿದಂ 10, ಭನ್ತೇ, ದಾನೇ 11 ಪುಞ್ಞಞ್ಚ ಪುಞ್ಞಮಹೀ ಚ ತಂ 12 ವೇಸ್ಸವಣಸ್ಸ ಮಹಾರಾಜಸ್ಸ ಸುಖಾಯ ಹೋತೂ’’ತಿ।
‘‘Idhāhaṃ, bhante , rattiyā paccūsasamayaṃ paccuṭṭhāya pārāyanaṃ sarena bhāsitvā tuṇhī ahosiṃ. Atha kho, bhante, vessavaṇo mahārājā mama kathāpariyosānaṃ viditvā abbhānumodi – ‘sādhu, bhagini, sādhu, bhaginī’ti! ‘Ko paneso, bhadramukhā’ti? ‘Ahaṃ te, bhagini, bhātā vessavaṇo, mahārājā’ti. ‘Sādhu, bhadramukha, tena hi yo me ayaṃ dhammapariyāyo bhaṇito idaṃ te hotu ātitheyya’nti. ‘Sādhu, bhagini, etañceva me hotu ātitheyyaṃ. Sveva sāriputtamoggallānappamukho bhikkhusaṅgho akatapātarāso veḷukaṇḍakaṃ āgamissati, tañca bhikkhusaṅghaṃ parivisitvā mama dakkhiṇaṃ ādiseyyāsi. Etañceva 13 me bhavissati ātitheyya’nti. Yadidaṃ 14, bhante, dāne 15 puññañca puññamahī ca taṃ 16 vessavaṇassa mahārājassa sukhāya hotū’’ti.
‘‘ಅಚ್ಛರಿಯಂ, ನನ್ದಮಾತೇ, ಅಬ್ಭುತಂ, ನನ್ದಮಾತೇ! ಯತ್ರ ಹಿ ನಾಮ ವೇಸ್ಸವಣೇನ ಮಹಾರಾಜೇನ ಏವಂಮಹಿದ್ಧಿಕೇನ ಏವಂಮಹೇಸಕ್ಖೇನ ದೇವಪುತ್ತೇನ ಸಮ್ಮುಖಾ ಸಲ್ಲಪಿಸ್ಸಸೀ’’ತಿ।
‘‘Acchariyaṃ, nandamāte, abbhutaṃ, nandamāte! Yatra hi nāma vessavaṇena mahārājena evaṃmahiddhikena evaṃmahesakkhena devaputtena sammukhā sallapissasī’’ti.
‘‘ನ ಖೋ ಮೇ, ಭನ್ತೇ, ಏಸೇವ ಅಚ್ಛರಿಯೋ ಅಬ್ಭುತೋ ಧಮ್ಮೋ। ಅತ್ಥಿ ಮೇ ಅಞ್ಞೋಪಿ ಅಚ್ಛರಿಯೋ ಅಬ್ಭುತೋ ಧಮ್ಮೋ। ಇಧ ಮೇ, ಭನ್ತೇ, ನನ್ದೋ ನಾಮ ಏಕಪುತ್ತಕೋ ಪಿಯೋ ಮನಾಪೋ। ತಂ ರಾಜಾನೋ ಕಿಸ್ಮಿಞ್ಚಿದೇವ ಪಕರಣೇ ಓಕಸ್ಸ ಪಸಯ್ಹ ಜೀವಿತಾ ವೋರೋಪೇಸುಂ। ತಸ್ಮಿಂ ಖೋ ಪನಾಹಂ, ಭನ್ತೇ, ದಾರಕೇ ಗಹಿತೇ ವಾ ಗಯ್ಹಮಾನೇ ವಾ ವಧೇ ವಾ ವಜ್ಝಮಾನೇ ವಾ ಹತೇ ವಾ ಹಞ್ಞಮಾನೇ ವಾ ನಾಭಿಜಾನಾಮಿ ಚಿತ್ತಸ್ಸ ಅಞ್ಞಥತ್ತ’’ನ್ತಿ। ‘‘ಅಚ್ಛರಿಯಂ, ನನ್ದಮಾತೇ, ಅಬ್ಭುತಂ ನನ್ದಮಾತೇ! ಯತ್ರ ಹಿ ನಾಮ ಚಿತ್ತುಪ್ಪಾದಮ್ಪಿ 17 ಪರಿಸೋಧೇಸ್ಸಸೀ’’ತಿ।
‘‘Na kho me, bhante, eseva acchariyo abbhuto dhammo. Atthi me aññopi acchariyo abbhuto dhammo. Idha me, bhante, nando nāma ekaputtako piyo manāpo. Taṃ rājāno kismiñcideva pakaraṇe okassa pasayha jīvitā voropesuṃ. Tasmiṃ kho panāhaṃ, bhante, dārake gahite vā gayhamāne vā vadhe vā vajjhamāne vā hate vā haññamāne vā nābhijānāmi cittassa aññathatta’’nti. ‘‘Acchariyaṃ, nandamāte, abbhutaṃ nandamāte! Yatra hi nāma cittuppādampi 18 parisodhessasī’’ti.
‘‘ನ ಖೋ ಮೇ, ಭನ್ತೇ , ಏಸೇವ ಅಚ್ಛರಿಯೋ ಅಬ್ಭುತೋ ಧಮ್ಮೋ। ಅತ್ಥಿ ಮೇ ಅಞ್ಞೋಪಿ ಅಚ್ಛರಿಯೋ ಅಬ್ಭುತೋ ಧಮ್ಮೋ। ಇಧ ಮೇ, ಭನ್ತೇ, ಸಾಮಿಕೋ ಕಾಲಙ್ಕತೋ ಅಞ್ಞತರಂ ಯಕ್ಖಯೋನಿಂ ಉಪಪನ್ನೋ। ಸೋ ಮೇ ತೇನೇವ ಪುರಿಮೇನ ಅತ್ತಭಾವೇನ ಉದ್ದಸ್ಸೇಸಿ। ನ ಖೋ ಪನಾಹಂ, ಭನ್ತೇ, ಅಭಿಜಾನಾಮಿ ತತೋನಿದಾನಂ ಚಿತ್ತಸ್ಸ ಅಞ್ಞಥತ್ತ’’ನ್ತಿ। ‘‘ಅಚ್ಛರಿಯಂ, ನನ್ದಮಾತೇ, ಅಬ್ಭುತಂ, ನನ್ದಮಾತೇ! ಯತ್ರ ಹಿ ನಾಮ ಚಿತ್ತುಪ್ಪಾದಮ್ಪಿ ಪರಿಸೋಧೇಸ್ಸಸೀ’’ತಿ।
‘‘Na kho me, bhante , eseva acchariyo abbhuto dhammo. Atthi me aññopi acchariyo abbhuto dhammo. Idha me, bhante, sāmiko kālaṅkato aññataraṃ yakkhayoniṃ upapanno. So me teneva purimena attabhāvena uddassesi. Na kho panāhaṃ, bhante, abhijānāmi tatonidānaṃ cittassa aññathatta’’nti. ‘‘Acchariyaṃ, nandamāte, abbhutaṃ, nandamāte! Yatra hi nāma cittuppādampi parisodhessasī’’ti.
‘‘ನ ಖೋ ಮೇ, ಭನ್ತೇ, ಏಸೇವ ಅಚ್ಛರಿಯೋ ಅಬ್ಭುತೋ ಧಮ್ಮೋ। ಅತ್ಥಿ ಮೇ ಅಞ್ಞೋಪಿ ಅಚ್ಛರಿಯೋ ಅಬ್ಭುತೋ ಧಮ್ಮೋ। ಯತೋಹಂ, ಭನ್ತೇ, ಸಾಮಿಕಸ್ಸ ದಹರಸ್ಸೇವ ದಹರಾ ಆನೀತಾ ನಾಭಿಜಾನಾಮಿ ಸಾಮಿಕಂ ಮನಸಾಪಿ ಅತಿಚರಿತಾ 19, ಕುತೋ ಪನ ಕಾಯೇನಾ’’ತಿ! ‘‘ಅಚ್ಛರಿಯಂ, ನನ್ದಮಾತೇ, ಅಬ್ಭುತಂ, ನನ್ದಮಾತೇ! ಯತ್ರ ಹಿ ನಾಮ ಚಿತ್ತುಪ್ಪಾದಮ್ಪಿ ಪರಿಸೋಧೇಸ್ಸಸೀ’’ತಿ।
‘‘Na kho me, bhante, eseva acchariyo abbhuto dhammo. Atthi me aññopi acchariyo abbhuto dhammo. Yatohaṃ, bhante, sāmikassa daharasseva daharā ānītā nābhijānāmi sāmikaṃ manasāpi aticaritā 20, kuto pana kāyenā’’ti! ‘‘Acchariyaṃ, nandamāte, abbhutaṃ, nandamāte! Yatra hi nāma cittuppādampi parisodhessasī’’ti.
‘‘ನ ಖೋ ಮೇ, ಭನ್ತೇ, ಏಸೇವ ಅಚ್ಛರಿಯೋ ಅಬ್ಭುತೋ ಧಮ್ಮೋ। ಅತ್ಥಿ ಮೇ ಅಞ್ಞೋಪಿ ಅಚ್ಛರಿಯೋ ಅಬ್ಭುತೋ ಧಮ್ಮೋ। ಯದಾಹಂ, ಭನ್ತೇ, ಉಪಾಸಿಕಾ ಪಟಿದೇಸಿತಾ ನಾಭಿಜಾನಾಮಿ ಕಿಞ್ಚಿ ಸಿಕ್ಖಾಪದಂ ಸಞ್ಚಿಚ್ಚ ವೀತಿಕ್ಕಮಿತಾ’’ತಿ। ‘‘ಅಚ್ಛರಿಯಂ, ನನ್ದಮಾತೇ, ಅಬ್ಭುತಂ, ನನ್ದಮಾತೇ’’ತಿ!
‘‘Na kho me, bhante, eseva acchariyo abbhuto dhammo. Atthi me aññopi acchariyo abbhuto dhammo. Yadāhaṃ, bhante, upāsikā paṭidesitā nābhijānāmi kiñci sikkhāpadaṃ sañcicca vītikkamitā’’ti. ‘‘Acchariyaṃ, nandamāte, abbhutaṃ, nandamāte’’ti!
‘‘ನ ಖೋ ಮೇ, ಭನ್ತೇ, ಏಸೇವ ಅಚ್ಛರಿಯೋ ಅಬ್ಭುತೋ ಧಮ್ಮೋ। ಅತ್ಥಿ ಮೇ ಅಞ್ಞೋಪಿ ಅಚ್ಛರಿಯೋ ಅಬ್ಭುತೋ ಧಮ್ಮೋ। ಇಧಾಹಂ, ಭನ್ತೇ, ಯಾವದೇವ 21 ಆಕಙ್ಖಾಮಿ ವಿವಿಚ್ಚೇವ ಕಾಮೇಹಿ ವಿವಿಚ್ಚ ಅಕುಸಲೇಹಿ ಧಮ್ಮೇಹಿ ಸವಿತಕ್ಕಂ ಸವಿಚಾರಂ ವಿವೇಕಜಂ ಪೀತಿಸುಖಂ ಪಠಮಂ ಝಾನಂ ಉಪಸಮ್ಪಜ್ಜ ವಿಹರಾಮಿ। ವಿತಕ್ಕವಿಚಾರಾನಂ ವೂಪಸಮಾ ಅಜ್ಝತ್ತಂ ಸಮ್ಪಸಾದನಂ ಚೇತಸೋ ಏಕೋದಿಭಾವಂ ಅವಿತಕ್ಕಂ ಅವಿಚಾರಂ ವಿವೇಕಜಂ ಪೀತಿಸುಖಂ ದುತಿಯಂ ಝಾನಂ ಉಪಸಮ್ಪಜ್ಜ ವಿಹರಾಮಿ। ಪೀತಿಯಾ ಚ ವಿರಾಗಾ ಉಪೇಕ್ಖಿಕಾ ಚ ವಿಹರಾಮಿ ಸತಾ ಚ ಸಮ್ಪಜಾನಾ ಸುಖಞ್ಚ ಕಾಯೇ ಪಟಿಸಂವೇದೇಮಿ, ಯಂ ತಂ ಅರಿಯಾ ಆಚಿಕ್ಖನ್ತಿ – ‘ಉಪೇಕ್ಖಕೋ ಸತಿಮಾ ಸುಖವಿಹಾರೀ’ತಿ ತತಿಯಂ ಝಾನಂ ಉಪಸಮ್ಪಜ್ಜ ವಿಹರಾಮಿ। ಸುಖಸ್ಸ ಚ ಪಹಾನಾ ದುಕ್ಖಸ್ಸ ಚ ಪಹಾನಾ ಪುಬ್ಬೇವ ಸೋಮನಸ್ಸದೋಮನಸ್ಸಾನಂ ಅತ್ಥಙ್ಗಮಾ ಅದುಕ್ಖಮಸುಖಂ ಉಪೇಕ್ಖಾಸತಿಪಾರಿಸುದ್ಧಿಂ ಚತುತ್ಥಂ ಝಾನಂ ಉಪಸಮ್ಪಜ್ಜ ವಿಹರಾಮೀ’’ತಿ। ‘‘ಅಚ್ಛರಿಯಂ, ನನ್ದಮಾತೇ, ಅಬ್ಭುತಂ, ನನ್ದಮಾತೇ’’ತಿ!
‘‘Na kho me, bhante, eseva acchariyo abbhuto dhammo. Atthi me aññopi acchariyo abbhuto dhammo. Idhāhaṃ, bhante, yāvadeva 22 ākaṅkhāmi vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja viharāmi. Vitakkavicārānaṃ vūpasamā ajjhattaṃ sampasādanaṃ cetaso ekodibhāvaṃ avitakkaṃ avicāraṃ vivekajaṃ pītisukhaṃ dutiyaṃ jhānaṃ upasampajja viharāmi. Pītiyā ca virāgā upekkhikā ca viharāmi satā ca sampajānā sukhañca kāye paṭisaṃvedemi, yaṃ taṃ ariyā ācikkhanti – ‘upekkhako satimā sukhavihārī’ti tatiyaṃ jhānaṃ upasampajja viharāmi. Sukhassa ca pahānā dukkhassa ca pahānā pubbeva somanassadomanassānaṃ atthaṅgamā adukkhamasukhaṃ upekkhāsatipārisuddhiṃ catutthaṃ jhānaṃ upasampajja viharāmī’’ti. ‘‘Acchariyaṃ, nandamāte, abbhutaṃ, nandamāte’’ti!
‘‘ನ ಖೋ ಮೇ, ಭನ್ತೇ, ಏಸೇವ ಅಚ್ಛರಿಯೋ ಅಬ್ಭುತೋ ಧಮ್ಮೋ। ಅತ್ಥಿ ಮೇ ಅಞ್ಞೋಪಿ ಅಚ್ಛರಿಯೋ ಅಬ್ಭುತೋ ಧಮ್ಮೋ। ಯಾನಿಮಾನಿ, ಭನ್ತೇ, ಭಗವತಾ ದೇಸಿತಾನಿ ಪಞ್ಚೋರಮ್ಭಾಗಿಯಾನಿ ಸಂಯೋಜನಾನಿ ನಾಹಂ ತೇಸಂ ಕಿಞ್ಚಿ ಅತ್ತನಿ ಅಪ್ಪಹೀನಂ ಸಮನುಪಸ್ಸಾಮೀ’’ತಿ। ‘‘ಅಚ್ಛರಿಯಂ, ನನ್ದಮಾತೇ, ಅಬ್ಭುತಂ, ನನ್ದಮಾತೇ’’ತಿ!
‘‘Na kho me, bhante, eseva acchariyo abbhuto dhammo. Atthi me aññopi acchariyo abbhuto dhammo. Yānimāni, bhante, bhagavatā desitāni pañcorambhāgiyāni saṃyojanāni nāhaṃ tesaṃ kiñci attani appahīnaṃ samanupassāmī’’ti. ‘‘Acchariyaṃ, nandamāte, abbhutaṃ, nandamāte’’ti!
ಅಥ ಖೋ ಆಯಸ್ಮಾ ಸಾರಿಪುತ್ತೋ ನನ್ದಮಾತರಂ ಉಪಾಸಿಕಂ ಧಮ್ಮಿಯಾ ಕಥಾಯ ಸನ್ದಸ್ಸೇತ್ವಾ ಸಮಾದಪೇತ್ವಾ ಸಮುತ್ತೇಜೇತ್ವಾ ಸಮ್ಪಹಂಸೇತ್ವಾ ಉಟ್ಠಾಯಾಸನಾ ಪಕ್ಕಾಮೀತಿ। ದಸಮಂ।
Atha kho āyasmā sāriputto nandamātaraṃ upāsikaṃ dhammiyā kathāya sandassetvā samādapetvā samuttejetvā sampahaṃsetvā uṭṭhāyāsanā pakkāmīti. Dasamaṃ.
ಮಹಾಯಞ್ಞವಗ್ಗೋ ಪಞ್ಚಮೋ।
Mahāyaññavaggo pañcamo.
ತಸ್ಸುದ್ದಾನಂ –
Tassuddānaṃ –
ಠಿತಿ ಚ ಪರಿಕ್ಖಾರಂ ದ್ವೇ, ಅಗ್ಗೀ ಸಞ್ಞಾ ಚ ದ್ವೇ ಪರಾ।
Ṭhiti ca parikkhāraṃ dve, aggī saññā ca dve parā;
ಮೇಥುನಾ ಸಂಯೋಗೋ ದಾನಂ, ನನ್ದಮಾತೇನ ತೇ ದಸಾತಿ॥
Methunā saṃyogo dānaṃ, nandamātena te dasāti.
ಪಠಮಪಣ್ಣಾಸಕಂ ಸಮತ್ತಂ।
Paṭhamapaṇṇāsakaṃ samattaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೧೦. ನನ್ದಮಾತಾಸುತ್ತವಣ್ಣನಾ • 10. Nandamātāsuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೧೦. ನನ್ದಮಾತಾಸುತ್ತವಣ್ಣನಾ • 10. Nandamātāsuttavaṇṇanā
