| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೩. ನನ್ದಿಯಸುತ್ತಂ
3. Nandiyasuttaṃ
೧೩. ಏಕಂ ಸಮಯಂ ಭಗವಾ ಸಕ್ಕೇಸು ವಿಹರತಿ ಕಪಿಲವತ್ಥುಸ್ಮಿಂ ನಿಗ್ರೋಧಾರಾಮೇ। ತೇನ ಖೋ ಪನ ಸಮಯೇನ ಭಗವಾ ಸಾವತ್ಥಿಯಂ ವಸ್ಸಾವಾಸಂ ಉಪಗನ್ತುಕಾಮೋ ಹೋತಿ 1।
13. Ekaṃ samayaṃ bhagavā sakkesu viharati kapilavatthusmiṃ nigrodhārāme. Tena kho pana samayena bhagavā sāvatthiyaṃ vassāvāsaṃ upagantukāmo hoti 2.
ಅಸ್ಸೋಸಿ ಖೋ ನನ್ದಿಯೋ ಸಕ್ಕೋ – ‘‘ಭಗವಾ ಕಿರ ಸಾವತ್ಥಿಯಂ ವಸ್ಸಾವಾಸಂ ಉಪಗನ್ತುಕಾಮೋ’’ತಿ। ಅಥ ಖೋ ನನ್ದಿಯಸ್ಸ ಸಕ್ಕಸ್ಸ ಏತದಹೋಸಿ – ‘‘ಯಂನೂನಾಹಮ್ಪಿ ಸಾವತ್ಥಿಯಂ ವಸ್ಸಾವಾಸಂ ಉಪಗಚ್ಛೇಯ್ಯಂ। ತತ್ಥ ಕಮ್ಮನ್ತಞ್ಚೇವ ಅಧಿಟ್ಠಹಿಸ್ಸಾಮಿ, ಭಗವನ್ತಞ್ಚ ಲಚ್ಛಾಮಿ ಕಾಲೇನ ಕಾಲಂ ದಸ್ಸನಾಯಾ’’ತಿ।
Assosi kho nandiyo sakko – ‘‘bhagavā kira sāvatthiyaṃ vassāvāsaṃ upagantukāmo’’ti. Atha kho nandiyassa sakkassa etadahosi – ‘‘yaṃnūnāhampi sāvatthiyaṃ vassāvāsaṃ upagaccheyyaṃ. Tattha kammantañceva adhiṭṭhahissāmi, bhagavantañca lacchāmi kālena kālaṃ dassanāyā’’ti.
ಅಥ ಖೋ ಭಗವಾ ಸಾವತ್ಥಿಯಂ ವಸ್ಸಾವಾಸಂ ಉಪಗಚ್ಛಿ 3। ನನ್ದಿಯೋಪಿ ಖೋ ಸಕ್ಕೋ ಸಾವತ್ಥಿಯಂ ವಸ್ಸಾವಾಸಂ ಉಪಗಚ್ಛಿ। ತತ್ಥ ಕಮ್ಮನ್ತಞ್ಚೇವ ಅಧಿಟ್ಠಾಸಿ 4, ಭಗವನ್ತಞ್ಚ ಲಭಿ 5 ಕಾಲೇನ ಕಾಲಂ ದಸ್ಸನಾಯ। ತೇನ ಖೋ ಪನ ಸಮಯೇನ ಸಮ್ಬಹುಲಾ ಭಿಕ್ಖೂ ಭಗವತೋ ಚೀವರಕಮ್ಮಂ ಕರೋನ್ತಿ – ‘‘ನಿಟ್ಠಿತಚೀವರೋ ಭಗವಾ ತೇಮಾಸಚ್ಚಯೇನ ಚಾರಿಕಂ ಪಕ್ಕಮಿಸ್ಸತೀ’’ತಿ।
Atha kho bhagavā sāvatthiyaṃ vassāvāsaṃ upagacchi 6. Nandiyopi kho sakko sāvatthiyaṃ vassāvāsaṃ upagacchi. Tattha kammantañceva adhiṭṭhāsi 7, bhagavantañca labhi 8 kālena kālaṃ dassanāya. Tena kho pana samayena sambahulā bhikkhū bhagavato cīvarakammaṃ karonti – ‘‘niṭṭhitacīvaro bhagavā temāsaccayena cārikaṃ pakkamissatī’’ti.
ಅಸ್ಸೋಸಿ ಖೋ ನನ್ದಿಯೋ ಸಕ್ಕೋ – ‘‘ಸಮ್ಬಹುಲಾ ಕಿರ ಭಿಕ್ಖೂ ಭಗವತೋ ಚೀವರಕಮ್ಮಂ ಕರೋನ್ತಿ – ‘ನಿಟ್ಠಿತಚೀವರೋ ಭಗವಾ ತೇಮಾಸಚ್ಚಯೇನ ಚಾರಿಕಂ ಪಕ್ಕಮಿಸ್ಸತೀ’’’ತಿ। ಅಥ ಖೋ ನನ್ದಿಯೋ ಸಕ್ಕೋ ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ। ಏಕಮನ್ತಂ ನಿಸಿನ್ನೋ ಖೋ ನನ್ದಿಯೋ ಸಕ್ಕೋ ಭಗವನ್ತಂ ಏತದವೋಚ – ‘‘ಸುತಂ ಮೇತಂ, ಭನ್ತೇ – ‘ಸಮ್ಬಹುಲಾ ಕಿರ ಭಿಕ್ಖೂ ಭಗವತೋ ಚೀವರಕಮ್ಮಂ ಕರೋನ್ತಿ – ನಿಟ್ಠಿತಚೀವರೋ ಭಗವಾ ತೇಮಾಸಚ್ಚಯೇನ ಚಾರಿಕಂ ಪಕ್ಕಮಿಸ್ಸತೀ’ತಿ। ತೇಸಂ ನೋ, ಭನ್ತೇ, ನಾನಾವಿಹಾರೇಹಿ ವಿಹರತಂ ಕೇನಸ್ಸ ವಿಹಾರೇನ ವಿಹಾತಬ್ಬ’’ನ್ತಿ?
Assosi kho nandiyo sakko – ‘‘sambahulā kira bhikkhū bhagavato cīvarakammaṃ karonti – ‘niṭṭhitacīvaro bhagavā temāsaccayena cārikaṃ pakkamissatī’’’ti. Atha kho nandiyo sakko yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho nandiyo sakko bhagavantaṃ etadavoca – ‘‘sutaṃ metaṃ, bhante – ‘sambahulā kira bhikkhū bhagavato cīvarakammaṃ karonti – niṭṭhitacīvaro bhagavā temāsaccayena cārikaṃ pakkamissatī’ti. Tesaṃ no, bhante, nānāvihārehi viharataṃ kenassa vihārena vihātabba’’nti?
‘‘ಸಾಧು ಸಾಧು, ನನ್ದಿಯ! ಏತಂ ಖೋ, ನನ್ದಿಯ, ತುಮ್ಹಾಕಂ ಪತಿರೂಪಂ ಕುಲಪುತ್ತಾನಂ, ಯಂ ತುಮ್ಹೇ ತಥಾಗತಂ ಉಪಸಙ್ಕಮಿತ್ವಾ ಪುಚ್ಛೇಯ್ಯಾಥ – ‘ತೇಸಂ ನೋ, ಭನ್ತೇ, ನಾನಾವಿಹಾರೇಹಿ ವಿಹರತಂ ಕೇನಸ್ಸ ವಿಹಾರೇನ ವಿಹಾತಬ್ಬ’ನ್ತಿ? ಸದ್ಧೋ ಖೋ, ನನ್ದಿಯ, ಆರಾಧಕೋ ಹೋತಿ, ನೋ ಅಸ್ಸದ್ಧೋ; ಸೀಲವಾ ಆರಾಧಕೋ ಹೋತಿ, ನೋ ದುಸ್ಸೀಲೋ; ಆರದ್ಧವೀರಿಯೋ ಆರಾಧಕೋ ಹೋತಿ, ನೋ ಕುಸೀತೋ; ಉಪಟ್ಠಿತಸ್ಸತಿ ಆರಾಧಕೋ ಹೋತಿ, ನೋ ಮುಟ್ಠಸ್ಸತಿ; ಸಮಾಹಿತೋ ಆರಾಧಕೋ ಹೋತಿ, ನೋ ಅಸಮಾಹಿತೋ; ಪಞ್ಞವಾ ಆರಾಧಕೋ ಹೋತಿ, ನೋ ದುಪ್ಪಞ್ಞೋ। ಇಮೇಸು ಖೋ ತೇ, ನನ್ದಿಯ, ಛಸು ಧಮ್ಮೇಸು ಪತಿಟ್ಠಾಯ ಪಞ್ಚಸು ಧಮ್ಮೇಸು ಅಜ್ಝತ್ತಂ ಸತಿ ಉಪಟ್ಠಾಪೇತಬ್ಬಾ।
‘‘Sādhu sādhu, nandiya! Etaṃ kho, nandiya, tumhākaṃ patirūpaṃ kulaputtānaṃ, yaṃ tumhe tathāgataṃ upasaṅkamitvā puccheyyātha – ‘tesaṃ no, bhante, nānāvihārehi viharataṃ kenassa vihārena vihātabba’nti? Saddho kho, nandiya, ārādhako hoti, no assaddho; sīlavā ārādhako hoti, no dussīlo; āraddhavīriyo ārādhako hoti, no kusīto; upaṭṭhitassati ārādhako hoti, no muṭṭhassati; samāhito ārādhako hoti, no asamāhito; paññavā ārādhako hoti, no duppañño. Imesu kho te, nandiya, chasu dhammesu patiṭṭhāya pañcasu dhammesu ajjhattaṃ sati upaṭṭhāpetabbā.
‘‘ಇಧ ತ್ವಂ, ನನ್ದಿಯ, ತಥಾಗತಂ ಅನುಸ್ಸರೇಯ್ಯಾಸಿ – ‘ಇತಿಪಿ ಸೋ ಭಗವಾ ಅರಹಂ ಸಮ್ಮಾಸಮ್ಬುದ್ಧೋ ವಿಜ್ಜಾಚರಣಸಮ್ಪನ್ನೋ ಸುಗತೋ ಲೋಕವಿದೂ ಅನುತ್ತರೋ ಪುರಿಸದಮ್ಮಸಾರಥಿ , ಸತ್ಥಾ ದೇವಮನುಸ್ಸಾನಂ ಬುದ್ಧೋ ಭಗವಾ’ತಿ। ಇತಿ ಖೋ ತೇ, ನನ್ದಿಯ, ತಥಾಗತಂ ಆರಬ್ಭ ಅಜ್ಝತ್ತಂ ಸತಿ ಉಪಟ್ಠಾಪೇತಬ್ಬಾ।
‘‘Idha tvaṃ, nandiya, tathāgataṃ anussareyyāsi – ‘itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi , satthā devamanussānaṃ buddho bhagavā’ti. Iti kho te, nandiya, tathāgataṃ ārabbha ajjhattaṃ sati upaṭṭhāpetabbā.
‘‘ಪುನ ಚಪರಂ ತ್ವಂ, ನನ್ದಿಯ, ಧಮ್ಮಂ ಅನುಸ್ಸರೇಯ್ಯಾಸಿ – ‘ಸ್ವಾಕ್ಖಾತೋ ಭಗವತಾ ಧಮ್ಮೋ ಸನ್ದಿಟ್ಠಿಕೋ ಅಕಾಲಿಕೋ ಏಹಿಪಸ್ಸಿಕೋ ಓಪನೇಯ್ಯಿಕೋ ಪಚ್ಚತ್ತಂ ವೇದಿತಬ್ಬೋ ವಿಞ್ಞೂಹೀ’ತಿ। ಇತಿ ಖೋ ತೇ, ನನ್ದಿಯ, ಧಮ್ಮಂ ಆರಬ್ಭ ಅಜ್ಝತ್ತಂ ಸತಿ ಉಪಟ್ಠಾಪೇತಬ್ಬಾ।
‘‘Puna caparaṃ tvaṃ, nandiya, dhammaṃ anussareyyāsi – ‘svākkhāto bhagavatā dhammo sandiṭṭhiko akāliko ehipassiko opaneyyiko paccattaṃ veditabbo viññūhī’ti. Iti kho te, nandiya, dhammaṃ ārabbha ajjhattaṃ sati upaṭṭhāpetabbā.
‘‘ಪುನ ಚಪರಂ ತ್ವಂ, ನನ್ದಿಯ, ಕಲ್ಯಾಣಮಿತ್ತೇ ಅನುಸ್ಸರೇಯ್ಯಾಸಿ – ‘ಲಾಭಾ ವತ ಮೇ, ಸುಲದ್ಧಂ ವತ ಮೇ, ಯಸ್ಸ ಮೇ ಕಲ್ಯಾಣಮಿತ್ತಾ ಅನುಕಮ್ಪಕಾ ಅತ್ಥಕಾಮಾ ಓವಾದಕಾ ಅನುಸಾಸಕಾ’ತಿ। ಇತಿ ಖೋ ತೇ, ನನ್ದಿಯ, ಕಲ್ಯಾಣಮಿತ್ತೇ ಆರಬ್ಭ ಅಜ್ಝತ್ತಂ ಸತಿ ಉಪಟ್ಠಾಪೇತಬ್ಬಾ।
‘‘Puna caparaṃ tvaṃ, nandiya, kalyāṇamitte anussareyyāsi – ‘lābhā vata me, suladdhaṃ vata me, yassa me kalyāṇamittā anukampakā atthakāmā ovādakā anusāsakā’ti. Iti kho te, nandiya, kalyāṇamitte ārabbha ajjhattaṃ sati upaṭṭhāpetabbā.
‘‘ಪುನ ಚಪರಂ ತ್ವಂ, ನನ್ದಿಯ, ಅತ್ತನೋ ಚಾಗಂ ಅನುಸ್ಸರೇಯ್ಯಾಸಿ – ‘ಲಾಭಾ ವತ ಮೇ, ಸುಲದ್ಧಂ ವತ ಮೇ, ಯೋಹಂ ಮಚ್ಛೇರಮಲಪರಿಯುಟ್ಠಿತಾಯ ಪಜಾಯ ವಿಗತಮಲಮಚ್ಛೇರೇನ ಚೇತಸಾ ಅಗಾರಂ ಅಜ್ಝಾವಸಾಮಿ ಮುತ್ತಚಾಗೋ ಪಯತಪಾಣಿ ವೋಸ್ಸಗ್ಗರತೋ ಯಾಚಯೋಗೋ ದಾನಸಂವಿಭಾಗರತೋ’ತಿ। ಇತಿ ಖೋ ತೇ, ನನ್ದಿಯ, ಚಾಗಂ ಆರಬ್ಭ ಅಜ್ಝತ್ತಂ ಸತಿ ಉಪಟ್ಠಾಪೇತಬ್ಬಾ।
‘‘Puna caparaṃ tvaṃ, nandiya, attano cāgaṃ anussareyyāsi – ‘lābhā vata me, suladdhaṃ vata me, yohaṃ maccheramalapariyuṭṭhitāya pajāya vigatamalamaccherena cetasā agāraṃ ajjhāvasāmi muttacāgo payatapāṇi vossaggarato yācayogo dānasaṃvibhāgarato’ti. Iti kho te, nandiya, cāgaṃ ārabbha ajjhattaṃ sati upaṭṭhāpetabbā.
‘‘ಪುನ ಚಪರಂ ತ್ವಂ, ನನ್ದಿಯ, ದೇವತಾ ಅನುಸ್ಸರೇಯ್ಯಾಸಿ – ‘ಯಾ ದೇವತಾ ಅತಿಕ್ಕಮ್ಮೇವ ಕಬಳೀಕಾರಾಹಾರಭಕ್ಖಾನಂ 9 ದೇವತಾನಂ ಸಹಬ್ಯತಂ ಅಞ್ಞತರಂ ಮನೋಮಯಂ ಕಾಯಂ ಉಪಪನ್ನಾ, ತಾ ಕರಣೀಯಂ ಅತ್ತನೋ ನ ಸಮನುಪಸ್ಸನ್ತಿ ಕತಸ್ಸ ವಾ ಪತಿಚಯಂ। ಸೇಯ್ಯಥಾಪಿ, ನನ್ದಿಯ, ಭಿಕ್ಖು ಅಸಮಯವಿಮುತ್ತೋ ಕರಣೀಯಂ ಅತ್ತನೋ ನ ಸಮನುಪಸ್ಸತಿ ಕತಸ್ಸ ವಾ ಪತಿಚಯಂ; ಏವಮೇವಂ ಖೋ, ನನ್ದಿಯ, ಯಾ ತಾ ದೇವತಾ ಅತಿಕ್ಕಮ್ಮೇವ ಕಬಳೀಕಾರಾಹಾರಭಕ್ಖಾನಂ ದೇವತಾನಂ ಸಹಬ್ಯತಂ ಅಞ್ಞತರಂ ಮನೋಮಯಂ ಕಾಯಂ ಉಪಪನ್ನಾ, ತಾ ಕರಣೀಯಂ ಅತ್ತನೋ ನ ಸಮನುಪಸ್ಸನ್ತಿ ಕತಸ್ಸ ವಾ ಪತಿಚಯಂ। ಇತಿ ಖೋ ತೇ, ನನ್ದಿಯ, ದೇವತಾ ಆರಬ್ಭ ಅಜ್ಝತ್ತಂ ಸತಿ ಉಪಟ್ಠಾಪೇತಬ್ಬಾ।
‘‘Puna caparaṃ tvaṃ, nandiya, devatā anussareyyāsi – ‘yā devatā atikkammeva kabaḷīkārāhārabhakkhānaṃ 10 devatānaṃ sahabyataṃ aññataraṃ manomayaṃ kāyaṃ upapannā, tā karaṇīyaṃ attano na samanupassanti katassa vā paticayaṃ. Seyyathāpi, nandiya, bhikkhu asamayavimutto karaṇīyaṃ attano na samanupassati katassa vā paticayaṃ; evamevaṃ kho, nandiya, yā tā devatā atikkammeva kabaḷīkārāhārabhakkhānaṃ devatānaṃ sahabyataṃ aññataraṃ manomayaṃ kāyaṃ upapannā, tā karaṇīyaṃ attano na samanupassanti katassa vā paticayaṃ. Iti kho te, nandiya, devatā ārabbha ajjhattaṃ sati upaṭṭhāpetabbā.
‘‘ಇಮೇಹಿ ಖೋ, ನನ್ದಿಯ, ಏಕಾದಸಹಿ ಧಮ್ಮೇಹಿ ಸಮನ್ನಾಗತೋ ಅರಿಯಸಾವಕೋ ಪಜಹತೇವ ಪಾಪಕೇ ಅಕುಸಲೇ ಧಮ್ಮೇ, ನ ಉಪಾದಿಯತಿ। ಸೇಯ್ಯಥಾಪಿ, ನನ್ದಿಯ, ಕುಮ್ಭೋ ನಿಕ್ಕುಜ್ಜೋ 11 ವಮತೇವ ಉದಕಂ, ನೋ ವನ್ತಂ ಪಚ್ಚಾವಮತಿ 12; ಸೇಯ್ಯಥಾಪಿ ವಾ ಪನ, ನನ್ದಿಯ, ಸುಕ್ಖೇ ತಿಣದಾಯೇ ಅಗ್ಗಿ ಮುತ್ತೋ ಡಹಞ್ಞೇವ ಗಚ್ಛತಿ, ನೋ ದಡ್ಢಂ ಪಚ್ಚುದಾವತ್ತತಿ ; ಏವಮೇವಂ ಖೋ, ನನ್ದಿಯ, ಇಮೇಹಿ ಏಕಾದಸಹಿ ಧಮ್ಮೇಹಿ ಸಮನ್ನಾಗತೋ ಅರಿಯಸಾವಕೋ ಪಜಹತೇವ ಪಾಪಕೇ ಅಕುಸಲೇ ಧಮ್ಮೇ, ನ ಉಪಾದಿಯತೀ’’ತಿ। ತತಿಯಂ।
‘‘Imehi kho, nandiya, ekādasahi dhammehi samannāgato ariyasāvako pajahateva pāpake akusale dhamme, na upādiyati. Seyyathāpi, nandiya, kumbho nikkujjo 13 vamateva udakaṃ, no vantaṃ paccāvamati 14; seyyathāpi vā pana, nandiya, sukkhe tiṇadāye aggi mutto ḍahaññeva gacchati, no daḍḍhaṃ paccudāvattati ; evamevaṃ kho, nandiya, imehi ekādasahi dhammehi samannāgato ariyasāvako pajahateva pāpake akusale dhamme, na upādiyatī’’ti. Tatiyaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೩. ನನ್ದಿಯಸುತ್ತವಣ್ಣನಾ • 3. Nandiyasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೧-೪. ಪಠಮಮಹಾನಾಮಸುತ್ತಾದಿವಣ್ಣನಾ • 1-4. Paṭhamamahānāmasuttādivaṇṇanā
