| Library / Tipiṭaka / તિપિટક • Tipiṭaka / ભિક્ખુનીવિભઙ્ગ • Bhikkhunīvibhaṅga |
૯. નવમસિક્ખાપદં
9. Navamasikkhāpadaṃ
૮૨૮. તેન સમયેન બુદ્ધો ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તેન ખો પન સમયેન અઞ્ઞતરસ્સ બ્રાહ્મણસ્સ ભિક્ખુનૂપસ્સયં નિસ્સાય યવખેત્તં હોતિ. ભિક્ખુનિયો ઉચ્ચારમ્પિ પસ્સાવમ્પિ સઙ્કારમ્પિ વિઘાસમ્પિ ખેત્તે છડ્ડેન્તિ. અથ ખો સો બ્રાહ્મણો ઉજ્ઝાયતિ ખિય્યતિ વિપાચેતિ – ‘‘કથઞ્હિ નામ ભિક્ખુનિયો અમ્હાકં યવખેત્તં દૂસેસ્સન્તી’’તિ! અસ્સોસું ખો ભિક્ખુનિયો તસ્સ બ્રાહ્મણસ્સ ઉજ્ઝાયન્તસ્સ ખિય્યન્તસ્સ વિપાચેન્તસ્સ. યા તા ભિક્ખુનિયો અપ્પિચ્છા…પે॰… તા ઉજ્ઝાયન્તિ ખિય્યન્તિ વિપાચેન્તિ – ‘‘કથઞ્હિ નામ ભિક્ખુનિયો ઉચ્ચારમ્પિ પસ્સાવમ્પિ સઙ્કારમ્પિ વિઘાસમ્પિ હરિતે છડ્ડેસ્સન્તી’’તિ…પે॰… સચ્ચં કિર, ભિક્ખવે, ભિક્ખુનિયો ઉચ્ચારમ્પિ પસ્સાવમ્પિ સઙ્કારમ્પિ વિઘાસમ્પિ હરિતે છડ્ડેન્તીતિ? ‘‘સચ્ચં, ભગવા’’તિ. વિગરહિ બુદ્ધો ભગવા…પે॰… કથઞ્હિ નામ, ભિક્ખવે, ભિક્ખુનિયો ઉચ્ચારમ્પિ પસ્સાવમ્પિ સઙ્કારમ્પિ વિઘાસમ્પિ હરિતે છડ્ડેસ્સન્તિ! નેતં, ભિક્ખવે, અપ્પસન્નાનં વા પસાદાય…પે॰… એવઞ્ચ પન, ભિક્ખવે, ભિક્ખુનિયો ઇમં સિક્ખાપદં ઉદ્દિસન્તુ –
828. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññatarassa brāhmaṇassa bhikkhunūpassayaṃ nissāya yavakhettaṃ hoti. Bhikkhuniyo uccārampi passāvampi saṅkārampi vighāsampi khette chaḍḍenti. Atha kho so brāhmaṇo ujjhāyati khiyyati vipāceti – ‘‘kathañhi nāma bhikkhuniyo amhākaṃ yavakhettaṃ dūsessantī’’ti! Assosuṃ kho bhikkhuniyo tassa brāhmaṇassa ujjhāyantassa khiyyantassa vipācentassa. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma bhikkhuniyo uccārampi passāvampi saṅkārampi vighāsampi harite chaḍḍessantī’’ti…pe… saccaṃ kira, bhikkhave, bhikkhuniyo uccārampi passāvampi saṅkārampi vighāsampi harite chaḍḍentīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, bhikkhuniyo uccārampi passāvampi saṅkārampi vighāsampi harite chaḍḍessanti! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
૮૨૯. ‘‘યા પન ભિક્ખુની ઉચ્ચારં વા પસ્સાવં વા સઙ્કારં વા વિઘાસં વા હરિતે છડ્ડેય્ય વા છડ્ડાપેય્ય વા, પાચિત્તિય’’ન્તિ.
829.‘‘Yā pana bhikkhunī uccāraṃ vā passāvaṃ vā saṅkāraṃ vā vighāsaṃ vā harite chaḍḍeyya vā chaḍḍāpeyya vā, pācittiya’’nti.
૮૩૦. યા પનાતિ યા યાદિસા…પે॰… ભિક્ખુનીતિ…પે॰… અયં ઇમસ્મિં અત્થે અધિપ્પેતા ભિક્ખુનીતિ.
830.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
ઉચ્ચારો નામ ગૂથો વુચ્ચતિ. પસ્સાવો નામ મુત્તં વુચ્ચતિ.
Uccāro nāma gūtho vuccati. Passāvo nāma muttaṃ vuccati.
સઙ્કારં નામ કચવરં વુચ્ચતિ.
Saṅkāraṃ nāma kacavaraṃ vuccati.
વિઘાસં નામ ચલકાનિ વા અટ્ઠિકાનિ વા ઉચ્છિટ્ઠોદકં વા.
Vighāsaṃ nāma calakāni vā aṭṭhikāni vā ucchiṭṭhodakaṃ vā.
હરિતં નામ પુબ્બણ્ણં અપરણ્ણં યં મનુસ્સાનં ઉપભોગપરિભોગં રોપિમં .
Haritaṃ nāma pubbaṇṇaṃ aparaṇṇaṃ yaṃ manussānaṃ upabhogaparibhogaṃ ropimaṃ .
છડ્ડેય્યાતિ સયં છડ્ડેતિ, આપત્તિ પાચિત્તિયસ્સ.
Chaḍḍeyyāti sayaṃ chaḍḍeti, āpatti pācittiyassa.
છડ્ડાપેય્યાતિ અઞ્ઞં આણાપેતિ, આપત્તિ દુક્કટસ્સ. સકિં આણત્તા બહુકમ્પિ છડ્ડેતિ, આપત્તિ પાચિત્તિયસ્સ.
Chaḍḍāpeyyāti aññaṃ āṇāpeti, āpatti dukkaṭassa. Sakiṃ āṇattā bahukampi chaḍḍeti, āpatti pācittiyassa.
૮૩૧. હરિતે હરિતસઞ્ઞા છડ્ડેતિ વા છડ્ડાપેતિ વા, આપત્તિ પાચિત્તિયસ્સ. હરિતે વેમતિકા છડ્ડેતિ વા છડ્ડાપેતિ વા, આપત્તિ પાચિત્તિયસ્સ . હરિતે અહરિતસઞ્ઞા છડ્ડેતિ વા છડ્ડાપેતિ વા, આપત્તિ પાચિત્તિયસ્સ.
831. Harite haritasaññā chaḍḍeti vā chaḍḍāpeti vā, āpatti pācittiyassa. Harite vematikā chaḍḍeti vā chaḍḍāpeti vā, āpatti pācittiyassa . Harite aharitasaññā chaḍḍeti vā chaḍḍāpeti vā, āpatti pācittiyassa.
અહરિતે હરિતસઞ્ઞા, આપત્તિ દુક્કટસ્સ. અહરિતે વેમતિકા, આપત્તિ દુક્કટસ્સ. અહરિતે અહરિતસઞ્ઞા, અનાપત્તિ.
Aharite haritasaññā, āpatti dukkaṭassa. Aharite vematikā, āpatti dukkaṭassa. Aharite aharitasaññā, anāpatti.
૮૩૨. અનાપત્તિ ઓલોકેત્વા છડ્ડેતિ, ખેત્તમરિયાદે 1 છડ્ડેતિ સામિકે આપુચ્છિત્વા અપલોકેત્વા છડ્ડેતિ, ઉમ્મત્તિકાય, આદિકમ્મિકાયાતિ.
832. Anāpatti oloketvā chaḍḍeti, khettamariyāde 2 chaḍḍeti sāmike āpucchitvā apaloketvā chaḍḍeti, ummattikāya, ādikammikāyāti.
નવમસિક્ખાપદં નિટ્ઠિતં.
Navamasikkhāpadaṃ niṭṭhitaṃ.
Footnotes:
Related texts:
અટ્ઠકથા • Aṭṭhakathā / વિનયપિટક (અટ્ઠકથા) • Vinayapiṭaka (aṭṭhakathā) / ભિક્ખુનીવિભઙ્ગ-અટ્ઠકથા • Bhikkhunīvibhaṅga-aṭṭhakathā / ૯. નવમસિક્ખાપદવણ્ણના • 9. Navamasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / સારત્થદીપની-ટીકા • Sāratthadīpanī-ṭīkā / ૧. લસુણવગ્ગવણ્ણના • 1. Lasuṇavaggavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વજિરબુદ્ધિ-ટીકા • Vajirabuddhi-ṭīkā / ૯. નવમસિક્ખાપદવણ્ણના • 9. Navamasikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / વિમતિવિનોદની-ટીકા • Vimativinodanī-ṭīkā / ૧. પઠમલસુણાદિસિક્ખાપદવણ્ણના • 1. Paṭhamalasuṇādisikkhāpadavaṇṇanā
ટીકા • Tīkā / વિનયપિટક (ટીકા) • Vinayapiṭaka (ṭīkā) / પાચિત્યાદિયોજનાપાળિ • Pācityādiyojanāpāḷi / ૯. નવમસિક્ખાપદં • 9. Navamasikkhāpadaṃ
