| Library / Tipiṭaka / ཏིཔིཊཀ • Tipiṭaka / བྷིཀྑུནཱིཝིབྷངྒ • Bhikkhunīvibhaṅga |
༩. ནཝམསིཀྑཱཔདཾ
9. Navamasikkhāpadaṃ
༩༢༠. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན ཐུལླནནྡཱཡ བྷིཀྑུནིཡཱ ཨུཔཊྛཱཀཀུལཾ ཐུལླནནྡཾ བྷིཀྑུནིཾ ཨེཏདཝོཙ – ‘‘སཙེ མཡཾ, ཨཡྻེ, སཀྐོམ, བྷིཀྑུནིསངྒྷསྶ ཙཱིཝརཾ དསྶཱམཱ’’ཏི། ཏེན ཁོ པན སམཡེན ཝསྶཾཝུཊྛཱ བྷིཀྑུནིཡོ ཙཱིཝརཾ བྷཱཛེཏུཀཱམཱ སནྣིཔཏིཾསུ། ཐུལླནནྡཱ བྷིཀྑུནཱི ཏཱ བྷིཀྑུནིཡོ ཨེཏདཝོཙ – ‘‘ཨཱགམེཐ, ཨཡྻེ, ཨཏྠི བྷིཀྑུནིསངྒྷསྶ ཙཱིཝརཔཙྩཱསཱ’’ཏི། བྷིཀྑུནིཡོ ཐུལླནནྡཾ བྷིཀྑུནིཾ ཨེཏདཝོཙུཾ – ‘‘གཙྪཱཡྻེ, ཏཾ ཙཱིཝརཾ ཛཱནཱཧཱི’’ཏི། ཐུལླནནྡཱ བྷིཀྑུནཱི ཡེན ཏཾ ཀུལཾ ཏེནུཔསངྐམི; ཨུཔསངྐམིཏྭཱ ཏེ མནུསྶེ ཨེཏདཝོཙ – ‘‘དེཐཱཝུསོ, བྷིཀྑུནིསངྒྷསྶ ཙཱིཝར’’ནྟི། ‘‘ན མཡཾ, ཨཡྻེ, སཀྐོམ བྷིཀྑུནིསངྒྷསྶ ཙཱིཝརཾ དཱཏུ’’ནྟི ། ཐུལླནནྡཱ བྷིཀྑུནཱི བྷིཀྑུནཱིནཾ ཨེཏམཏྠཾ ཨཱརོཙེསི། ཡཱ ཏཱ བྷིཀྑུནིཡོ ཨཔྤིཙྪཱ…པེ॰… ཏཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཨཡྻཱ ཐུལླནནྡཱ དུབྦལཙཱིཝརཔཙྩཱསཱཡ ཙཱིཝརཀཱལསམཡཾ ཨཏིཀྐཱམེསྶཏཱི’’ཏི…པེ॰… སཙྩཾ ཀིར, བྷིཀྑཝེ, ཐུལླནནྡཱ བྷིཀྑུནཱི དུབྦལཙཱིཝརཔཙྩཱསཱཡ ཙཱིཝརཀཱལསམཡཾ ཨཏིཀྐཱམེཏཱིཏི 1? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ, བྷིཀྑཝེ, ཐུལླནནྡཱ བྷིཀྑུནཱི དུབྦལཙཱིཝརཔཙྩཱསཱཡ ཙཱིཝརཀཱལསམཡཾ ཨཏིཀྐཱམེསྶཏི ! ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, བྷིཀྑུནིཡོ ཨིམཾ སིཀྑཱཔདཾ ཨུདྡིསནྟུ –
920. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena thullanandāya bhikkhuniyā upaṭṭhākakulaṃ thullanandaṃ bhikkhuniṃ etadavoca – ‘‘sace mayaṃ, ayye, sakkoma, bhikkhunisaṅghassa cīvaraṃ dassāmā’’ti. Tena kho pana samayena vassaṃvuṭṭhā bhikkhuniyo cīvaraṃ bhājetukāmā sannipatiṃsu. Thullanandā bhikkhunī tā bhikkhuniyo etadavoca – ‘‘āgametha, ayye, atthi bhikkhunisaṅghassa cīvarapaccāsā’’ti. Bhikkhuniyo thullanandaṃ bhikkhuniṃ etadavocuṃ – ‘‘gacchāyye, taṃ cīvaraṃ jānāhī’’ti. Thullanandā bhikkhunī yena taṃ kulaṃ tenupasaṅkami; upasaṅkamitvā te manusse etadavoca – ‘‘dethāvuso, bhikkhunisaṅghassa cīvara’’nti. ‘‘Na mayaṃ, ayye, sakkoma bhikkhunisaṅghassa cīvaraṃ dātu’’nti . Thullanandā bhikkhunī bhikkhunīnaṃ etamatthaṃ ārocesi. Yā tā bhikkhuniyo appicchā…pe… tā ujjhāyanti khiyyanti vipācenti – ‘‘kathañhi nāma ayyā thullanandā dubbalacīvarapaccāsāya cīvarakālasamayaṃ atikkāmessatī’’ti…pe… saccaṃ kira, bhikkhave, thullanandā bhikkhunī dubbalacīvarapaccāsāya cīvarakālasamayaṃ atikkāmetīti 2? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma, bhikkhave, thullanandā bhikkhunī dubbalacīvarapaccāsāya cīvarakālasamayaṃ atikkāmessati ! Netaṃ, bhikkhave, appasannānaṃ vā pasādāya…pe… evañca pana, bhikkhave, bhikkhuniyo imaṃ sikkhāpadaṃ uddisantu –
༩༢༡. ‘‘ཡཱ པན བྷིཀྑུནཱི དུབྦལཙཱིཝརཔཙྩཱསཱཡ ཙཱིཝརཀཱལསམཡཾ ཨཏིཀྐཱམེཡྻ, པཱཙིཏྟིཡ’’ནྟི།
921.‘‘Yā pana bhikkhunī dubbalacīvarapaccāsāya cīvarakālasamayaṃ atikkāmeyya, pācittiya’’nti.
༩༢༢. ཡཱ པནཱཏི ཡཱ ཡཱདིསཱ…པེ॰… བྷིཀྑུནཱིཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏཱ བྷིཀྑུནཱིཏི།
922.Yā panāti yā yādisā…pe… bhikkhunīti…pe… ayaṃ imasmiṃ atthe adhippetā bhikkhunīti.
དུབྦལཙཱིཝརཔཙྩཱསཱ ནཱམ ‘‘སཙེ མཡཾ སཀྐོམ, དསྶཱམ ཀརིསྶཱམཱ’’ཏི ཝཱཙཱ བྷིནྣཱ ཧོཏི།
Dubbalacīvarapaccāsā nāma ‘‘sace mayaṃ sakkoma, dassāma karissāmā’’ti vācā bhinnā hoti.
ཙཱིཝརཀཱལསམཡོ ནཱམ ཨནཏྠཏེ ཀཐིནེ ཝསྶཱནསྶ པཙྪིམོ མཱསོ, ཨཏྠཏེ ཀཐིནེ པཉྩ མཱསཱ།
Cīvarakālasamayo nāma anatthate kathine vassānassa pacchimo māso, atthate kathine pañca māsā.
ཙཱིཝརཀཱལསམཡཾ ཨཏིཀྐཱམེཡྻཱཏི ཨནཏྠཏེ ཀཐིནེ ཝསྶཱནསྶ པཙྪིམཾ དིཝསཾ ཨཏིཀྐཱམེཏི, ཨཱཔཏྟི པཱཙིཏྟིཡསྶ། ཨཏྠཏེ ཀཐིནེ ཀཐིནུདྡྷཱརདིཝསཾ ཨཏིཀྐཱམེཏི, ཨཱཔཏྟི པཱཙིཏྟིཡསྶ།
Cīvarakālasamayaṃ atikkāmeyyāti anatthate kathine vassānassa pacchimaṃ divasaṃ atikkāmeti, āpatti pācittiyassa. Atthate kathine kathinuddhāradivasaṃ atikkāmeti, āpatti pācittiyassa.
༩༢༣. དུབྦལཙཱིཝརེ དུབྦལཙཱིཝརསཉྙཱ ཙཱིཝརཀཱལསམཡཾ ཨཏིཀྐཱམེཏི, ཨཱཔཏྟི པཱཙིཏྟིཡསྶ། དུབྦལཙཱིཝརེ ཝེམཏིཀཱ ཙཱིཝརཀཱལསམཡཾ ཨཏིཀྐཱམེཏི, ཨཱཔཏྟི དུཀྐཊསྶ། དུབྦལཙཱིཝརེ ཨདུབྦལཙཱིཝརསཉྙཱ ཙཱིཝརཀཱལསམཡཾ ཨཏིཀྐཱམེཏི, ཨནཱཔཏྟི།
923. Dubbalacīvare dubbalacīvarasaññā cīvarakālasamayaṃ atikkāmeti, āpatti pācittiyassa. Dubbalacīvare vematikā cīvarakālasamayaṃ atikkāmeti, āpatti dukkaṭassa. Dubbalacīvare adubbalacīvarasaññā cīvarakālasamayaṃ atikkāmeti, anāpatti.
ཨདུབྦལཙཱིཝརེ དུབྦལཙཱིཝརསཉྙཱ, ཨཱཔཏྟི དུཀྐཊསྶ། ཨདུབྦལཙཱིཝརེ ཝེམཏིཀཱ, ཨཱཔཏྟི དུཀྐཊསྶ། ཨདུབྦལཙཱིཝརེ ཨདུབྦལཙཱིཝརསཉྙཱ, ཨནཱཔཏྟི།
Adubbalacīvare dubbalacīvarasaññā, āpatti dukkaṭassa. Adubbalacīvare vematikā, āpatti dukkaṭassa. Adubbalacīvare adubbalacīvarasaññā, anāpatti.
༩༢༤. ཨནཱཔཏྟི ཨཱནིསཾསཾ དསྶེཏྭཱ ནིཝཱརེཏི, ཨུམྨཏྟིཀཱཡ, ཨཱདིཀམྨིཀཱཡཱཏི།
924. Anāpatti ānisaṃsaṃ dassetvā nivāreti, ummattikāya, ādikammikāyāti.
ནཝམསིཀྑཱཔདཾ ནིཊྛིཏཾ།
Navamasikkhāpadaṃ niṭṭhitaṃ.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / བྷིཀྑུནཱིཝིབྷངྒ-ཨཊྛཀཐཱ • Bhikkhunīvibhaṅga-aṭṭhakathā / ༩. ནཝམསིཀྑཱཔདཝཎྞནཱ • 9. Navamasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༣. ནགྒཝགྒཝཎྞནཱ • 3. Naggavaggavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༩. ནཝམསིཀྑཱཔདཝཎྞནཱ • 9. Navamasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༡. པཋམཱདིསིཀྑཱཔདཝཎྞནཱ • 1. Paṭhamādisikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༩. ནཝམསིཀྑཱཔདཾ • 9. Navamasikkhāpadaṃ
