| Library / Tipiṭaka / ཏིཔིཊཀ • Tipiṭaka / ཁུདྡསིཀྑཱ-མཱུལསིཀྑཱ • Khuddasikkhā-mūlasikkhā |
༡༩. ནྷཱནཀཔྤནིདྡེསཝཎྞནཱ
19. Nhānakappaniddesavaṇṇanā
༡༦༨. པུརཏོཏི (ཙཱུལ༹ཝ॰ ༣༧༢) ཐེརཱནཾ པུརཏོ ཨུཔརི ཝཱ ན ཙ ནྷཱཡེཡྻཱཏི ཨཏྠོ།
168.Puratoti (cūḷava. 372) therānaṃ purato upari vā na ca nhāyeyyāti attho.
༡༦༩-༡༧༡. ཀུཊྚཏྠམྦྷཏརུཊྚཱནེཏི ཨེཏྠ (ཙཱུལ༹ཝ॰ ༢༤༣; ཙཱུལ༹ཝ॰ ཨཊྛ॰ ༢༤༣) ཀུཊྚེ ཝཱ ཐམྦྷེ ཝཱ ཏརུམྷི ཝཱ ཨཊྚཱནཕལཀེ ཝཱ ཀཱཡཾ ན གྷཾསཡེཏི ཨཏྠོ། གནྡྷབྦཧཏྠོ ནཱམ མཀྐཊཧཏྠསདིསོ དཱརུཨཱདིམཡོ། ཀུརུཝིནྡཀསུཏྟིཡཱཏི ཀུརུཝིནྡསུཏྟིཡཱ། མལླཀེན ཝཱ ཨཉྙམཉྙཾ ཝཱ། ‘‘ན བྷིཀྑཝེ ཝིགྒཡ྄ཧ པརིཀམྨཾ ཀཱརཱཔེཏབྦཾ། ཡོ ཀཱརཱཔེཡྻ, ཨཱཔཏྟི དུཀྐཊསྶཱ’’ཏི (ཙཱུལ༹ཝ॰ ༢༤༣) ཨེཝཾ ཝུཏྟཾ ཝིགྒཧཔརིཀམྨཾ སནྡྷཱཡ ‘‘ཨཉྙམཉྙཾ ཝཱ’’ཏི ཝུཏྟཾ།
169-171.Kuṭṭatthambhataruṭṭāneti ettha (cūḷava. 243; cūḷava. aṭṭha. 243) kuṭṭe vā thambhe vā tarumhi vā aṭṭānaphalake vā kāyaṃ na ghaṃsayeti attho. Gandhabbahattho nāma makkaṭahatthasadiso dāruādimayo. Kuruvindakasuttiyāti kuruvindasuttiyā. Mallakena vā aññamaññaṃ vā. ‘‘Na bhikkhave viggayha parikammaṃ kārāpetabbaṃ. Yo kārāpeyya, āpatti dukkaṭassā’’ti (cūḷava. 243) evaṃ vuttaṃ viggahaparikammaṃ sandhāya ‘‘aññamaññaṃ vā’’ti vuttaṃ.
ཨིདཱནི ཀཔྤིཡཱནི དསྶེཏུཾ ‘‘ཀཔཱལིཊྛཀཁཎྜཱནཱི’’ཏིཨཱདིམཱཧ། སབྦེསཾ ཝཊྚཏཱིཏི སམྦནྡྷོ ། གིལཱནསྶཔི (ཙཱུལ༹ཝ॰ ཨཊྛ॰ ༢༤༣) ཨགིལཱནསྶཔི ཨིམཱནི ཀཔཱལིཊྛཀཁཎྜཱདཱིནི ཀཱཡགྷཾསནེ ཝཊྚནྟི། པུཐུཔཱཎཱིཏི (ཙཱུལ༹ཝ॰ ༢༤༤) ཧཏྠཔརིཀམྨཾ ཝུཙྩཏི། ཏསྨཱ སབྦེསཾ ཧཏྠེན པིཊྛིཔརིཀམྨཾ ཀཱཏུཾ ཝཊྚཏི། ཨཀཏམལླཀཾ ནཱམ ཨེཀདཱཋིམཾ པརིཙྪིནྡིཏྭཱ ཀཏཾ། པཱསཱཎཱདཡོ པཱདགྷཾསནེ ཨེཝ ཀཔྤིཡཱ། ནྷཱནཀཔྤཝིནིཙྪཡོ།
Idāni kappiyāni dassetuṃ ‘‘kapāliṭṭhakakhaṇḍānī’’tiādimāha. Sabbesaṃ vaṭṭatīti sambandho . Gilānassapi (cūḷava. aṭṭha. 243) agilānassapi imāni kapāliṭṭhakakhaṇḍādīni kāyaghaṃsane vaṭṭanti. Puthupāṇīti (cūḷava. 244) hatthaparikammaṃ vuccati. Tasmā sabbesaṃ hatthena piṭṭhiparikammaṃ kātuṃ vaṭṭati. Akatamallakaṃ nāma ekadāṭhimaṃ paricchinditvā kataṃ. Pāsāṇādayo pādaghaṃsane eva kappiyā. Nhānakappavinicchayo.
ནྷཱནཀཔྤནིདྡེསཝཎྞནཱ ནིཊྛིཏཱ།
Nhānakappaniddesavaṇṇanā niṭṭhitā.
