Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya

೯. ನಿಬ್ಬೇಧಿಕಸುತ್ತಂ

9. Nibbedhikasuttaṃ

೬೩. ‘‘ನಿಬ್ಬೇಧಿಕಪರಿಯಾಯಂ ವೋ, ಭಿಕ್ಖವೇ, ಧಮ್ಮಪರಿಯಾಯಂ ದೇಸೇಸ್ಸಾಮಿ। ತಂ ಸುಣಾಥ, ಸಾಧುಕಂ ಮನಸಿ ಕರೋಥ; ಭಾಸಿಸ್ಸಾಮೀ’’ತಿ। ‘‘ಏವಂ, ಭನ್ತೇ’’ತಿ ಖೋ ತೇ ಭಿಕ್ಖೂ ಭಗವತೋ ಪಚ್ಚಸ್ಸೋಸುಂ। ಭಗವಾ ಏತದವೋಚ –

63. ‘‘Nibbedhikapariyāyaṃ vo, bhikkhave, dhammapariyāyaṃ desessāmi. Taṃ suṇātha, sādhukaṃ manasi karotha; bhāsissāmī’’ti. ‘‘Evaṃ, bhante’’ti kho te bhikkhū bhagavato paccassosuṃ. Bhagavā etadavoca –

‘‘ಕತಮೋ ಚ ಸೋ, ಭಿಕ್ಖವೇ, ನಿಬ್ಬೇಧಿಕಪರಿಯಾಯೋ ಧಮ್ಮಪರಿಯಾಯೋ? ಕಾಮಾ, ಭಿಕ್ಖವೇ, ವೇದಿತಬ್ಬಾ, ಕಾಮಾನಂ ನಿದಾನಸಮ್ಭವೋ ವೇದಿತಬ್ಬೋ, ಕಾಮಾನಂ ವೇಮತ್ತತಾ ವೇದಿತಬ್ಬಾ, ಕಾಮಾನಂ ವಿಪಾಕೋ ವೇದಿತಬ್ಬೋ, ಕಾಮನಿರೋಧೋ ¹ ವೇದಿತಬ್ಬೋ, ಕಾಮನಿರೋಧಗಾಮಿನೀ ² ಪಟಿಪದಾ ವೇದಿತಬ್ಬಾ।

‘‘Katamo ca so, bhikkhave, nibbedhikapariyāyo dhammapariyāyo? Kāmā, bhikkhave, veditabbā, kāmānaṃ nidānasambhavo veditabbo, kāmānaṃ vemattatā veditabbā, kāmānaṃ vipāko veditabbo, kāmanirodho ³ veditabbo, kāmanirodhagāminī ⁴ paṭipadā veditabbā.

‘‘ವೇದನಾ, ಭಿಕ್ಖವೇ, ವೇದಿತಬ್ಬಾ, ವೇದನಾನಂ ನಿದಾನಸಮ್ಭವೋ ವೇದಿತಬ್ಬೋ, ವೇದನಾನಂ ವೇಮತ್ತತಾ ವೇದಿತಬ್ಬಾ, ವೇದನಾನಂ ವಿಪಾಕೋ ವೇದಿತಬ್ಬೋ, ವೇದನಾನಿರೋಧೋ ವೇದಿತಬ್ಬೋ, ವೇದನಾನಿರೋಧಗಾಮಿನೀ ಪಟಿಪದಾ ವೇದಿತಬ್ಬಾ।

‘‘Vedanā, bhikkhave, veditabbā, vedanānaṃ nidānasambhavo veditabbo, vedanānaṃ vemattatā veditabbā, vedanānaṃ vipāko veditabbo, vedanānirodho veditabbo, vedanānirodhagāminī paṭipadā veditabbā.

‘‘ಸಞ್ಞಾ, ಭಿಕ್ಖವೇ, ವೇದಿತಬ್ಬಾ, ಸಞ್ಞಾನಂ ನಿದಾನಸಮ್ಭವೋ ವೇದಿತಬ್ಬೋ, ಸಞ್ಞಾನಂ ವೇಮತ್ತತಾ ವೇದಿತಬ್ಬಾ , ಸಞ್ಞಾನಂ ವಿಪಾಕೋ ವೇದಿತಬ್ಬೋ, ಸಞ್ಞಾನಿರೋಧೋ ವೇದಿತಬ್ಬೋ, ಸಞ್ಞಾನಿರೋಧಗಾಮಿನೀ ಪಟಿಪದಾ ವೇದಿತಬ್ಬಾ।

‘‘Saññā, bhikkhave, veditabbā, saññānaṃ nidānasambhavo veditabbo, saññānaṃ vemattatā veditabbā , saññānaṃ vipāko veditabbo, saññānirodho veditabbo, saññānirodhagāminī paṭipadā veditabbā.

‘‘ಆಸವಾ, ಭಿಕ್ಖವೇ, ವೇದಿತಬ್ಬಾ, ಆಸವಾನಂ ನಿದಾನಸಮ್ಭವೋ ವೇದಿತಬ್ಬೋ, ಆಸವಾನಂ ವೇಮತ್ತತಾ ವೇದಿತಬ್ಬಾ, ಆಸವಾನಂ ವಿಪಾಕೋ ವೇದಿತಬ್ಬೋ, ಆಸವನಿರೋಧೋ ವೇದಿತಬ್ಬೋ, ಆಸವನಿರೋಧಗಾಮಿನೀ ಪಟಿಪದಾ ವೇದಿತಬ್ಬಾ।

‘‘Āsavā, bhikkhave, veditabbā, āsavānaṃ nidānasambhavo veditabbo, āsavānaṃ vemattatā veditabbā, āsavānaṃ vipāko veditabbo, āsavanirodho veditabbo, āsavanirodhagāminī paṭipadā veditabbā.

‘‘ಕಮ್ಮಂ , ಭಿಕ್ಖವೇ, ವೇದಿತಬ್ಬಂ, ಕಮ್ಮಾನಂ ನಿದಾನಸಮ್ಭವೋ ವೇದಿತಬ್ಬೋ, ಕಮ್ಮಾನಂ ವೇಮತ್ತತಾ ವೇದಿತಬ್ಬಾ, ಕಮ್ಮಾನಂ ವಿಪಾಕೋ ವೇದಿತಬ್ಬೋ, ಕಮ್ಮನಿರೋಧೋ ವೇದಿತಬ್ಬೋ, ಕಮ್ಮನಿರೋಧಗಾಮಿನೀ ಪಟಿಪದಾ ವೇದಿತಬ್ಬಾ।

‘‘Kammaṃ , bhikkhave, veditabbaṃ, kammānaṃ nidānasambhavo veditabbo, kammānaṃ vemattatā veditabbā, kammānaṃ vipāko veditabbo, kammanirodho veditabbo, kammanirodhagāminī paṭipadā veditabbā.

‘‘‘ಕಾಮಾ, ಭಿಕ್ಖವೇ, ವೇದಿತಬ್ಬಾ, ಕಾಮಾನಂ ನಿದಾನಸಮ್ಭವೋ ವೇದಿತಬ್ಬೋ, ಕಾಮಾನಂ ವೇಮತ್ತತಾ ವೇದಿತಬ್ಬಾ, ಕಾಮಾನಂ ವಿಪಾಕೋ ವೇದಿತಬ್ಬೋ, ಕಾಮನಿರೋಧೋ ವೇದಿತಬ್ಬೋ, ಕಾಮನಿರೋಧಗಾಮಿನೀ ಪಟಿಪದಾ ವೇದಿತಬ್ಬಾ’ತಿ, ಇತಿ ಖೋ ಪನೇತಂ ವುತ್ತಂ। ಕಿಞ್ಚೇತಂ ಪಟಿಚ್ಚ ವುತ್ತಂ ⁵? ಪಞ್ಚಿಮೇ, ಭಿಕ್ಖವೇ, ಕಾಮಗುಣಾ – ಚಕ್ಖುವಿಞ್ಞೇಯ್ಯಾ ರೂಪಾ ಇಟ್ಠಾ ಕನ್ತಾ ಮನಾಪಾ ಪಿಯರೂಪಾ ಕಾಮೂಪಸಂಹಿತಾ ರಜನೀಯಾ, ಸೋತವಿಞ್ಞೇಯ್ಯಾ ಸದ್ದಾ… ಘಾನವಿಞ್ಞೇಯ್ಯಾ ಗನ್ಧಾ… ಜಿವ್ಹಾವಿಞ್ಞೇಯ್ಯಾ ರಸಾ… ಕಾಯವಿಞ್ಞೇಯ್ಯಾ ಫೋಟ್ಠಬ್ಬಾ ಇಟ್ಠಾ ಕನ್ತಾ ಮನಾಪಾ ಪಿಯರೂಪಾ ಕಾಮೂಪಸಂಹಿತಾ ರಜನೀಯಾ। ಅಪಿ ಚ ಖೋ, ಭಿಕ್ಖವೇ, ನೇತೇ ಕಾಮಾ ಕಾಮಗುಣಾ ನಾಮೇತೇ ⁶ ಅರಿಯಸ್ಸ ವಿನಯೇ ವುಚ್ಚನ್ತಿ –

‘‘‘Kāmā, bhikkhave, veditabbā, kāmānaṃ nidānasambhavo veditabbo, kāmānaṃ vemattatā veditabbā, kāmānaṃ vipāko veditabbo, kāmanirodho veditabbo, kāmanirodhagāminī paṭipadā veditabbā’ti, iti kho panetaṃ vuttaṃ. Kiñcetaṃ paṭicca vuttaṃ ⁷? Pañcime, bhikkhave, kāmaguṇā – cakkhuviññeyyā rūpā iṭṭhā kantā manāpā piyarūpā kāmūpasaṃhitā rajanīyā, sotaviññeyyā saddā… ghānaviññeyyā gandhā… jivhāviññeyyā rasā… kāyaviññeyyā phoṭṭhabbā iṭṭhā kantā manāpā piyarūpā kāmūpasaṃhitā rajanīyā. Api ca kho, bhikkhave, nete kāmā kāmaguṇā nāmete ⁸ ariyassa vinaye vuccanti –

⁹ ‘‘ಸಙ್ಕಪ್ಪರಾಗೋ ಪುರಿಸಸ್ಸ ಕಾಮೋ,

¹⁰ ‘‘Saṅkapparāgo purisassa kāmo,

ನೇತೇ ¹¹ ಕಾಮಾ ಯಾನಿ ಚಿತ್ರಾನಿ ಲೋಕೇ।

Nete ¹² kāmā yāni citrāni loke;

ಸಙ್ಕಪ್ಪರಾಗೋ ಪುರಿಸಸ್ಸ ಕಾಮೋ,

Saṅkapparāgo purisassa kāmo,

ತಿಟ್ಠನ್ತಿ ಚಿತ್ರಾನಿ ತಥೇವ ಲೋಕೇ।

Tiṭṭhanti citrāni tatheva loke;

ಅಥೇತ್ಥ ಧೀರಾ ವಿನಯನ್ತಿ ಛನ್ದ’’ನ್ತಿ॥

Athettha dhīrā vinayanti chanda’’nti.

‘‘ಕತಮೋ ಚ, ಭಿಕ್ಖವೇ, ಕಾಮಾನಂ ನಿದಾನಸಮ್ಭವೋ? ಫಸ್ಸೋ, ಭಿಕ್ಖವೇ, ಕಾಮಾನಂ ನಿದಾನಸಮ್ಭವೋ।

‘‘Katamo ca, bhikkhave, kāmānaṃ nidānasambhavo? Phasso, bhikkhave, kāmānaṃ nidānasambhavo.

‘‘ಕತಮಾ ಚ, ಭಿಕ್ಖವೇ, ಕಾಮಾನಂ ವೇಮತ್ತತಾ? ಅಞ್ಞೋ, ಭಿಕ್ಖವೇ, ಕಾಮೋ ರೂಪೇಸು, ಅಞ್ಞೋ ಕಾಮೋ ಸದ್ದೇಸು, ಅಞ್ಞೋ ಕಾಮೋ ಗನ್ಧೇಸು, ಅಞ್ಞೋ ಕಾಮೋ ರಸೇಸು, ಅಞ್ಞೋ ಕಾಮೋ ಫೋಟ್ಠಬ್ಬೇಸು। ಅಯಂ ವುಚ್ಚತಿ, ಭಿಕ್ಖವೇ, ಕಾಮಾನಂ ವೇಮತ್ತತಾ।

‘‘Katamā ca, bhikkhave, kāmānaṃ vemattatā? Añño, bhikkhave, kāmo rūpesu, añño kāmo saddesu, añño kāmo gandhesu, añño kāmo rasesu, añño kāmo phoṭṭhabbesu. Ayaṃ vuccati, bhikkhave, kāmānaṃ vemattatā.

‘‘ಕತಮೋ ಚ, ಭಿಕ್ಖವೇ, ಕಾಮಾನಂ ವಿಪಾಕೋ? ಯಂ ಖೋ, ಭಿಕ್ಖವೇ, ಕಾಮಯಮಾನೋ ತಜ್ಜಂ ತಜ್ಜಂ ಅತ್ತಭಾವಂ ಅಭಿನಿಬ್ಬತ್ತೇತಿ ಪುಞ್ಞಭಾಗಿಯಂ ವಾ ಅಪುಞ್ಞಭಾಗಿಯಂ ವಾ, ಅಯಂ ವುಚ್ಚತಿ, ಭಿಕ್ಖವೇ, ಕಾಮಾನಂ ವಿಪಾಕೋ।

‘‘Katamo ca, bhikkhave, kāmānaṃ vipāko? Yaṃ kho, bhikkhave, kāmayamāno tajjaṃ tajjaṃ attabhāvaṃ abhinibbatteti puññabhāgiyaṃ vā apuññabhāgiyaṃ vā, ayaṃ vuccati, bhikkhave, kāmānaṃ vipāko.

‘‘ಕತಮೋ ಚ, ಭಿಕ್ಖವೇ, ಕಾಮನಿರೋಧೋ? ಫಸ್ಸನಿರೋಧೋ ¹³, ಭಿಕ್ಖವೇ, ಕಾಮನಿರೋಧೋ। ಅಯಮೇವ ಅರಿಯೋ ಅಟ್ಠಙ್ಗಿಕೋ ಮಗ್ಗೋ ಕಾಮನಿರೋಧಗಾಮಿನೀ ಪಟಿಪದಾ, ಸೇಯ್ಯಥಿದಂ – ಸಮ್ಮಾದಿಟ್ಠಿ, ಸಮ್ಮಾಸಙ್ಕಪ್ಪೋ, ಸಮ್ಮಾವಾಚಾ, ಸಮ್ಮಾಕಮ್ಮನ್ತೋ , ಸಮ್ಮಾಆಜೀವೋ, ಸಮ್ಮಾವಾಯಾಮೋ, ಸಮ್ಮಾಸತಿ, ಸಮ್ಮಾಸಮಾಧಿ।

‘‘Katamo ca, bhikkhave, kāmanirodho? Phassanirodho ¹⁴, bhikkhave, kāmanirodho. Ayameva ariyo aṭṭhaṅgiko maggo kāmanirodhagāminī paṭipadā, seyyathidaṃ – sammādiṭṭhi, sammāsaṅkappo, sammāvācā, sammākammanto , sammāājīvo, sammāvāyāmo, sammāsati, sammāsamādhi.

‘‘ಯತೋ ಖೋ ¹⁵, ಭಿಕ್ಖವೇ, ಅರಿಯಸಾವಕೋ ಏವಂ ಕಾಮೇ ಪಜಾನಾತಿ, ಏವಂ ಕಾಮಾನಂ ನಿದಾನಸಮ್ಭವಂ ಪಜಾನಾತಿ, ಏವಂ ಕಾಮಾನಂ ವೇಮತ್ತತಂ ಪಜಾನಾತಿ, ಏವಂ ಕಾಮಾನಂ ವಿಪಾಕಂ ಪಜಾನಾತಿ, ಏವಂ ಕಾಮನಿರೋಧಂ ಪಜಾನಾತಿ, ಏವಂ ಕಾಮನಿರೋಧಗಾಮಿನಿಂ ಪಟಿಪದಂ ಪಜಾನಾತಿ, ಸೋ ಇಮಂ ನಿಬ್ಬೇಧಿಕಂ ಬ್ರಹ್ಮಚರಿಯಂ ಪಜಾನಾತಿ ಕಾಮನಿರೋಧಂ। ಕಾಮಾ, ಭಿಕ್ಖವೇ, ವೇದಿತಬ್ಬಾ…ಪೇ॰… ಕಾಮನಿರೋಧಗಾಮಿನೀ ¹⁶ ಪಟಿಪದಾ ವೇದಿತಬ್ಬಾತಿ, ಇತಿ ಯಂ ತಂ ವುತ್ತಂ ಇದಮೇತಂ ಪಟಿಚ್ಚ ವುತ್ತಂ।

‘‘Yato kho ¹⁷, bhikkhave, ariyasāvako evaṃ kāme pajānāti, evaṃ kāmānaṃ nidānasambhavaṃ pajānāti, evaṃ kāmānaṃ vemattataṃ pajānāti, evaṃ kāmānaṃ vipākaṃ pajānāti, evaṃ kāmanirodhaṃ pajānāti, evaṃ kāmanirodhagāminiṃ paṭipadaṃ pajānāti, so imaṃ nibbedhikaṃ brahmacariyaṃ pajānāti kāmanirodhaṃ. Kāmā, bhikkhave, veditabbā…pe… kāmanirodhagāminī ¹⁸ paṭipadā veditabbāti, iti yaṃ taṃ vuttaṃ idametaṃ paṭicca vuttaṃ.

‘‘ವೇದನಾ, ಭಿಕ್ಖವೇ, ವೇದಿತಬ್ಬಾ…ಪೇ॰… ವೇದನಾನಿರೋಧಗಾಮಿನೀ ಪಟಿಪದಾ ವೇದಿತಬ್ಬಾತಿ, ಇತಿ ಖೋ ಪನೇತಂ ವುತ್ತಂ। ಕಿಞ್ಚೇತಂ ಪಟಿಚ್ಚ ವುತ್ತಂ? ತಿಸ್ಸೋ ಇಮಾ, ಭಿಕ್ಖವೇ, ವೇದನಾ – ಸುಖಾ ವೇದನಾ, ದುಕ್ಖಾ ವೇದನಾ, ಅದುಕ್ಖಮಸುಖಾ ವೇದನಾ।

‘‘Vedanā, bhikkhave, veditabbā…pe… vedanānirodhagāminī paṭipadā veditabbāti, iti kho panetaṃ vuttaṃ. Kiñcetaṃ paṭicca vuttaṃ? Tisso imā, bhikkhave, vedanā – sukhā vedanā, dukkhā vedanā, adukkhamasukhā vedanā.

‘‘ಕತಮೋ ಚ, ಭಿಕ್ಖವೇ, ವೇದನಾನಂ ನಿದಾನಸಮ್ಭವೋ? ಫಸ್ಸೋ, ಭಿಕ್ಖವೇ, ವೇದನಾನಂ ನಿದಾನಸಮ್ಭವೋ।

‘‘Katamo ca, bhikkhave, vedanānaṃ nidānasambhavo? Phasso, bhikkhave, vedanānaṃ nidānasambhavo.

‘‘ಕತಮಾ ಚ, ಭಿಕ್ಖವೇ, ವೇದನಾನಂ ವೇಮತ್ತತಾ? ಅತ್ಥಿ, ಭಿಕ್ಖವೇ, ಸಾಮಿಸಾ ಸುಖಾ ವೇದನಾ, ಅತ್ಥಿ ನಿರಾಮಿಸಾ ಸುಖಾ ವೇದನಾ, ಅತ್ಥಿ ಸಾಮಿಸಾ ದುಕ್ಖಾ ವೇದನಾ, ಅತ್ಥಿ ನಿರಾಮಿಸಾ ದುಕ್ಖಾ ವೇದನಾ, ಅತ್ಥಿ ಸಾಮಿಸಾ ಅದುಕ್ಖಮಸುಖಾ ವೇದನಾ, ಅತ್ಥಿ ನಿರಾಮಿಸಾ ಅದುಕ್ಖಮಸುಖಾ ವೇದನಾ। ಅಯಂ ವುಚ್ಚತಿ, ಭಿಕ್ಖವೇ, ವೇದನಾನಂ ವೇಮತ್ತತಾ।

‘‘Katamā ca, bhikkhave, vedanānaṃ vemattatā? Atthi, bhikkhave, sāmisā sukhā vedanā, atthi nirāmisā sukhā vedanā, atthi sāmisā dukkhā vedanā, atthi nirāmisā dukkhā vedanā, atthi sāmisā adukkhamasukhā vedanā, atthi nirāmisā adukkhamasukhā vedanā. Ayaṃ vuccati, bhikkhave, vedanānaṃ vemattatā.

‘‘ಕತಮೋ ಚ, ಭಿಕ್ಖವೇ, ವೇದನಾನಂ ವಿಪಾಕೋ ? ಯಂ ಖೋ, ಭಿಕ್ಖವೇ, ವೇದಿಯಮಾನೋ ¹⁹ ತಜ್ಜಂ ತಜ್ಜಂ ಅತ್ತಭಾವಂ ಅಭಿನಿಬ್ಬತ್ತೇತಿ ಪುಞ್ಞಭಾಗಿಯಂ ವಾ ಅಪುಞ್ಞಭಾಗಿಯಂ ವಾ, ಅಯಂ ವುಚ್ಚತಿ, ಭಿಕ್ಖವೇ, ವೇದನಾನಂ ವಿಪಾಕೋ।

‘‘Katamo ca, bhikkhave, vedanānaṃ vipāko ? Yaṃ kho, bhikkhave, vediyamāno ²⁰ tajjaṃ tajjaṃ attabhāvaṃ abhinibbatteti puññabhāgiyaṃ vā apuññabhāgiyaṃ vā, ayaṃ vuccati, bhikkhave, vedanānaṃ vipāko.

‘‘ಕತಮೋ ಚ, ಭಿಕ್ಖವೇ, ವೇದನಾನಿರೋಧೋ? ಫಸ್ಸನಿರೋಧೋ ²¹, ಭಿಕ್ಖವೇ, ವೇದನಾನಿರೋಧೋ। ಅಯಮೇವ ಅರಿಯೋ ಅಟ್ಠಙ್ಗಿಕೋ ಮಗ್ಗೋ ವೇದನಾನಿರೋಧಗಾಮಿನೀ ಪಟಿಪದಾ, ಸೇಯ್ಯಥಿದಂ – ಸಮ್ಮಾದಿಟ್ಠಿ…ಪೇ॰… ಸಮ್ಮಾಸಮಾಧಿ।

‘‘Katamo ca, bhikkhave, vedanānirodho? Phassanirodho ²², bhikkhave, vedanānirodho. Ayameva ariyo aṭṭhaṅgiko maggo vedanānirodhagāminī paṭipadā, seyyathidaṃ – sammādiṭṭhi…pe… sammāsamādhi.

‘‘ಯತೋ ಖೋ, ಭಿಕ್ಖವೇ, ಅರಿಯಸಾವಕೋ ಏವಂ ವೇದನಂ ಪಜಾನಾತಿ, ಏವಂ ವೇದನಾನಂ ನಿದಾನಸಮ್ಭವಂ ಪಜಾನಾತಿ, ಏವಂ ವೇದನಾನಂ ವೇಮತ್ತತಂ ಪಜಾನಾತಿ, ಏವಂ ವೇದನಾನಂ ವಿಪಾಕಂ ಪಜಾನಾತಿ, ಏವಂ ವೇದನಾನಿರೋಧಂ ಪಜಾನಾತಿ, ಏವಂ ವೇದನಾನಿರೋಧಗಾಮಿನಿಂ ಪಟಿಪದಂ ಪಜಾನಾತಿ। ಸೋ ಇಮಂ ನಿಬ್ಬೇಧಿಕಂ ಬ್ರಹ್ಮಚರಿಯಂ ಪಜಾನಾತಿ ವೇದನಾನಿರೋಧಂ। ವೇದನಾ, ಭಿಕ್ಖವೇ, ವೇದಿತಬ್ಬಾ…ಪೇ॰… ವೇದನಾನಿರೋಧಗಾಮಿನೀ ಪಟಿಪದಾ ವೇದಿತಬ್ಬಾತಿ, ಇತಿ ಯಂ ತಂ ವುತ್ತಂ ಇದಮೇತಂ ಪಟಿಚ್ಚ ವುತ್ತಂ।

‘‘Yato kho, bhikkhave, ariyasāvako evaṃ vedanaṃ pajānāti, evaṃ vedanānaṃ nidānasambhavaṃ pajānāti, evaṃ vedanānaṃ vemattataṃ pajānāti, evaṃ vedanānaṃ vipākaṃ pajānāti, evaṃ vedanānirodhaṃ pajānāti, evaṃ vedanānirodhagāminiṃ paṭipadaṃ pajānāti. So imaṃ nibbedhikaṃ brahmacariyaṃ pajānāti vedanānirodhaṃ. Vedanā, bhikkhave, veditabbā…pe… vedanānirodhagāminī paṭipadā veditabbāti, iti yaṃ taṃ vuttaṃ idametaṃ paṭicca vuttaṃ.

‘‘ಸಞ್ಞಾ, ಭಿಕ್ಖವೇ, ವೇದಿತಬ್ಬಾ…ಪೇ॰… ಸಞ್ಞಾನಿರೋಧಗಾಮಿನೀ ಪಟಿಪದಾ ವೇದಿತಬ್ಬಾತಿ, ಇತಿ ಖೋ ಪನೇತಂ ವುತ್ತಂ। ಕಿಞ್ಚೇತಂ ಪಟಿಚ್ಚ ವುತ್ತಂ? ಛಯಿಮಾ, ಭಿಕ್ಖವೇ, ಸಞ್ಞಾ – ರೂಪಸಞ್ಞಾ, ಸದ್ದಸಞ್ಞಾ, ಗನ್ಧಸಞ್ಞಾ, ರಸಸಞ್ಞಾ, ಫೋಟ್ಠಬ್ಬಸಞ್ಞಾ, ಧಮ್ಮಸಞ್ಞಾ।

‘‘Saññā, bhikkhave, veditabbā…pe… saññānirodhagāminī paṭipadā veditabbāti, iti kho panetaṃ vuttaṃ. Kiñcetaṃ paṭicca vuttaṃ? Chayimā, bhikkhave, saññā – rūpasaññā, saddasaññā, gandhasaññā, rasasaññā, phoṭṭhabbasaññā, dhammasaññā.

‘‘ಕತಮೋ ಚ, ಭಿಕ್ಖವೇ, ಸಞ್ಞಾನಂ ನಿದಾನಸಮ್ಭವೋ? ಫಸ್ಸೋ, ಭಿಕ್ಖವೇ, ಸಞ್ಞಾನಂ ನಿದಾನಸಮ್ಭವೋ।

‘‘Katamo ca, bhikkhave, saññānaṃ nidānasambhavo? Phasso, bhikkhave, saññānaṃ nidānasambhavo.

‘‘ಕತಮಾ ಚ, ಭಿಕ್ಖವೇ, ಸಞ್ಞಾನಂ ವೇಮತ್ತತಾ? ಅಞ್ಞಾ, ಭಿಕ್ಖವೇ, ಸಞ್ಞಾ ರೂಪೇಸು, ಅಞ್ಞಾ ಸಞ್ಞಾ ಸದ್ದೇಸು ²³, ಅಞ್ಞಾ ಸಞ್ಞಾ ಗನ್ಧೇಸು, ಅಞ್ಞಾ ಸಞ್ಞಾ ರಸೇಸು, ಅಞ್ಞಾ ಸಞ್ಞಾ ಫೋಟ್ಠಬ್ಬೇಸು, ಅಞ್ಞಾ ಸಞ್ಞಾ ಧಮ್ಮೇಸು । ಅಯಂ ವುಚ್ಚತಿ, ಭಿಕ್ಖವೇ, ಸಞ್ಞಾನಂ ವೇಮತ್ತತಾ।

‘‘Katamā ca, bhikkhave, saññānaṃ vemattatā? Aññā, bhikkhave, saññā rūpesu, aññā saññā saddesu ²⁴, aññā saññā gandhesu, aññā saññā rasesu, aññā saññā phoṭṭhabbesu, aññā saññā dhammesu . Ayaṃ vuccati, bhikkhave, saññānaṃ vemattatā.

‘‘ಕತಮೋ ಚ, ಭಿಕ್ಖವೇ, ಸಞ್ಞಾನಂ ವಿಪಾಕೋ? ವೋಹಾರವೇಪಕ್ಕಂ ²⁵, ಭಿಕ್ಖವೇ, ಸಞ್ಞಂ ²⁶ ವದಾಮಿ। ಯಥಾ ಯಥಾ ನಂ ಸಞ್ಜಾನಾತಿ ತಥಾ ತಥಾ ವೋಹರತಿ, ಏವಂ ಸಞ್ಞೀ ಅಹೋಸಿನ್ತಿ ²⁷। ಅಯಂ ವುಚ್ಚತಿ, ಭಿಕ್ಖವೇ, ಸಞ್ಞಾನಂ ವಿಪಾಕೋ।

‘‘Katamo ca, bhikkhave, saññānaṃ vipāko? Vohāravepakkaṃ ²⁸, bhikkhave, saññaṃ ²⁹ vadāmi. Yathā yathā naṃ sañjānāti tathā tathā voharati, evaṃ saññī ahosinti ³⁰. Ayaṃ vuccati, bhikkhave, saññānaṃ vipāko.

‘‘ಕತಮೋ ಚ, ಭಿಕ್ಖವೇ, ಸಞ್ಞಾನಿರೋಧೋ? ಫಸ್ಸನಿರೋಧೋ, ³¹ ಭಿಕ್ಖವೇ, ಸಞ್ಞಾನಿರೋಧೋ। ಅಯಮೇವ ಅರಿಯೋ ಅಟ್ಠಙ್ಗಿಕೋ ಮಗ್ಗೋ ಸಞ್ಞಾನಿರೋಧಗಾಮಿನೀ ಪಟಿಪದಾ, ಸೇಯ್ಯಥಿದಂ – ಸಮ್ಮಾದಿಟ್ಠಿ…ಪೇ॰… ಸಮ್ಮಾಸಮಾಧಿ।

‘‘Katamo ca, bhikkhave, saññānirodho? Phassanirodho, ³² bhikkhave, saññānirodho. Ayameva ariyo aṭṭhaṅgiko maggo saññānirodhagāminī paṭipadā, seyyathidaṃ – sammādiṭṭhi…pe… sammāsamādhi.

‘‘ಯತೋ ಖೋ, ಭಿಕ್ಖವೇ, ಅರಿಯಸಾವಕೋ ಏವಂ ಸಞ್ಞಂ ಪಜಾನಾತಿ, ಏವಂ ಸಞ್ಞಾನಂ ನಿದಾನಸಮ್ಭವಂ ಪಜಾನಾತಿ, ಏವಂ ಸಞ್ಞಾನಂ ವೇಮತ್ತತಂ ಪಜಾನಾತಿ, ಏವಂ ಸಞ್ಞಾನಂ ವಿಪಾಕಂ ಪಜಾನಾತಿ, ಏವಂ ಸಞ್ಞಾನಿರೋಧಂ ಪಜಾನಾತಿ, ಏವಂ ಸಞ್ಞಾನಿರೋಧಗಾಮಿನಿಂ ಪಟಿಪದಂ ಪಜಾನಾತಿ, ಸೋ ಇಮಂ ನಿಬ್ಬೇಧಿಕಂ ಬ್ರಹ್ಮಚರಿಯಂ ಪಜಾನಾತಿ ಸಞ್ಞಾನಿರೋಧಂ। ಸಞ್ಞಾ, ಭಿಕ್ಖವೇ, ವೇದಿತಬ್ಬಾ…ಪೇ॰… ಸಞ್ಞಾನಿರೋಧಗಾಮಿನೀ ಪಟಿಪದಾ ವೇದಿತಬ್ಬಾತಿ। ಇತಿ ಯಂ ತಂ ವುತ್ತಂ ಇದಮೇತಂ ಪಟಿಚ್ಚ ವುತ್ತಂ।

‘‘Yato kho, bhikkhave, ariyasāvako evaṃ saññaṃ pajānāti, evaṃ saññānaṃ nidānasambhavaṃ pajānāti, evaṃ saññānaṃ vemattataṃ pajānāti, evaṃ saññānaṃ vipākaṃ pajānāti, evaṃ saññānirodhaṃ pajānāti, evaṃ saññānirodhagāminiṃ paṭipadaṃ pajānāti, so imaṃ nibbedhikaṃ brahmacariyaṃ pajānāti saññānirodhaṃ. Saññā, bhikkhave, veditabbā…pe… saññānirodhagāminī paṭipadā veditabbāti. Iti yaṃ taṃ vuttaṃ idametaṃ paṭicca vuttaṃ.

‘‘ಆಸವಾ, ಭಿಕ್ಖವೇ, ವೇದಿತಬ್ಬಾ…ಪೇ॰… ಆಸವನಿರೋಧಗಾಮಿನೀ ³³ ಪಟಿಪದಾ ವೇದಿತಬ್ಬಾತಿ, ಇತಿ ಖೋ ಪನೇತಂ ವುತ್ತಂ। ಕಿಞ್ಚೇತಂ ಪಟಿಚ್ಚ ವುತ್ತಂ? ತಯೋಮೇ, ಭಿಕ್ಖವೇ, ಆಸವಾ – ಕಾಮಾಸವೋ, ಭವಾಸವೋ, ಅವಿಜ್ಜಾಸವೋ।

‘‘Āsavā, bhikkhave, veditabbā…pe… āsavanirodhagāminī ³⁴ paṭipadā veditabbāti, iti kho panetaṃ vuttaṃ. Kiñcetaṃ paṭicca vuttaṃ? Tayome, bhikkhave, āsavā – kāmāsavo, bhavāsavo, avijjāsavo.

‘‘ಕತಮೋ ಚ, ಭಿಕ್ಖವೇ, ಆಸವಾನಂ ನಿದಾನಸಮ್ಭವೋ? ಅವಿಜ್ಜಾ, ಭಿಕ್ಖವೇ, ಆಸವಾನಂ ನಿದಾನಸಮ್ಭವೋ।

‘‘Katamo ca, bhikkhave, āsavānaṃ nidānasambhavo? Avijjā, bhikkhave, āsavānaṃ nidānasambhavo.

‘‘ಕತಮಾ ಚ, ಭಿಕ್ಖವೇ, ಆಸವಾನಂ ವೇಮತ್ತತಾ? ಅತ್ಥಿ, ಭಿಕ್ಖವೇ, ಆಸವಾ ನಿರಯಗಮನೀಯಾ ³⁵, ಅತ್ಥಿ ಆಸವಾ ತಿರಚ್ಛಾನಯೋನಿಗಮನೀಯಾ, ಅತ್ಥಿ ಆಸವಾ ಪೇತ್ತಿವಿಸಯಗಮನೀಯಾ, ಅತ್ಥಿ ಆಸವಾ ಮನುಸ್ಸಲೋಕಗಮನೀಯಾ, ಅತ್ಥಿ ಆಸವಾ ದೇವಲೋಕಗಮನೀಯಾ। ಅಯಂ ವುಚ್ಚತಿ, ಭಿಕ್ಖವೇ, ಆಸವಾನಂ ವೇಮತ್ತತಾ।

‘‘Katamā ca, bhikkhave, āsavānaṃ vemattatā? Atthi, bhikkhave, āsavā nirayagamanīyā ³⁶, atthi āsavā tiracchānayonigamanīyā, atthi āsavā pettivisayagamanīyā, atthi āsavā manussalokagamanīyā, atthi āsavā devalokagamanīyā. Ayaṃ vuccati, bhikkhave, āsavānaṃ vemattatā.

‘‘ಕತಮೋ ಚ, ಭಿಕ್ಖವೇ, ಆಸವಾನಂ ವಿಪಾಕೋ? ಯಂ ಖೋ, ಭಿಕ್ಖವೇ, ಅವಿಜ್ಜಾಗತೋ ತಜ್ಜಂ ತಜ್ಜಂ ಅತ್ತಭಾವಂ ಅಭಿನಿಬ್ಬತ್ತೇತಿ ಪುಞ್ಞಭಾಗಿಯಂ ವಾ ಅಪುಞ್ಞಭಾಗಿಯಂ ವಾ, ಅಯಂ ವುಚ್ಚತಿ, ಭಿಕ್ಖವೇ, ಆಸವಾನಂ ವಿಪಾಕೋ।

‘‘Katamo ca, bhikkhave, āsavānaṃ vipāko? Yaṃ kho, bhikkhave, avijjāgato tajjaṃ tajjaṃ attabhāvaṃ abhinibbatteti puññabhāgiyaṃ vā apuññabhāgiyaṃ vā, ayaṃ vuccati, bhikkhave, āsavānaṃ vipāko.

‘‘ಕತಮೋ ಚ, ಭಿಕ್ಖವೇ, ಆಸವನಿರೋಧೋ? ಅವಿಜ್ಜಾನಿರೋಧೋ, ಭಿಕ್ಖವೇ, ಆಸವನಿರೋಧೋ। ಅಯಮೇವ ಅರಿಯೋ ಅಟ್ಠಙ್ಗಿಕೋ ಮಗ್ಗೋ ಆಸವನಿರೋಧಗಾಮಿನೀ ³⁷ ಪಟಿಪದಾ, ಸೇಯ್ಯಥಿದಂ – ಸಮ್ಮಾದಿಟ್ಠಿ…ಪೇ॰… ಸಮ್ಮಾಸಮಾಧಿ।

‘‘Katamo ca, bhikkhave, āsavanirodho? Avijjānirodho, bhikkhave, āsavanirodho. Ayameva ariyo aṭṭhaṅgiko maggo āsavanirodhagāminī ³⁸ paṭipadā, seyyathidaṃ – sammādiṭṭhi…pe… sammāsamādhi.

‘‘ಯತೋ ಖೋ, ಭಿಕ್ಖವೇ, ಅರಿಯಸಾವಕೋ ಏವಂ ಆಸವೇ ಪಜಾನಾತಿ, ಏವಂ ಆಸವಾನಂ ನಿದಾನಸಮ್ಭವಂ ಪಜಾನಾತಿ, ಏವಂ ಆಸವಾನಂ ವೇಮತ್ತತಂ ಪಜಾನಾತಿ, ಏವಂ ಆಸವಾನಂ ವಿಪಾಕಂ ಪಜಾನಾತಿ, ಏವಂ ಆಸವಾನಂ ನಿರೋಧಂ ಪಜಾನಾತಿ, ಏವಂ ಆಸವಾನಂ ನಿರೋಧಗಾಮಿನಿಂ ಪಟಿಪದಂ ಪಜಾನಾತಿ, ಸೋ ಇಮಂ ನಿಬ್ಬೇಧಿಕಂ ಬ್ರಹ್ಮಚರಿಯಂ ಪಜಾನಾತಿ ಆಸವನಿರೋಧಂ। ಆಸವಾ , ಭಿಕ್ಖವೇ, ವೇದಿತಬ್ಬಾ…ಪೇ॰… ಆಸವನಿರೋಧಗಾಮಿನೀ ³⁹ ಪಟಿಪದಾ ವೇದಿತಬ್ಬಾತಿ। ಇತಿ ಯಂ ತಂ ವುತ್ತಂ ಇದಮೇತಂ ಪಟಿಚ್ಚ ವುತ್ತಂ।

‘‘Yato kho, bhikkhave, ariyasāvako evaṃ āsave pajānāti, evaṃ āsavānaṃ nidānasambhavaṃ pajānāti, evaṃ āsavānaṃ vemattataṃ pajānāti, evaṃ āsavānaṃ vipākaṃ pajānāti, evaṃ āsavānaṃ nirodhaṃ pajānāti, evaṃ āsavānaṃ nirodhagāminiṃ paṭipadaṃ pajānāti, so imaṃ nibbedhikaṃ brahmacariyaṃ pajānāti āsavanirodhaṃ. Āsavā , bhikkhave, veditabbā…pe… āsavanirodhagāminī ⁴⁰ paṭipadā veditabbāti. Iti yaṃ taṃ vuttaṃ idametaṃ paṭicca vuttaṃ.

‘‘ಕಮ್ಮಂ, ಭಿಕ್ಖವೇ, ವೇದಿತಬ್ಬಂ…ಪೇ॰… ಕಮ್ಮನಿರೋಧಗಾಮಿನೀ ⁴¹ ಪಟಿಪದಾ ವೇದಿತಬ್ಬಾತಿ, ಇತಿ ಖೋ ಪನೇತಂ ವುತ್ತಂ। ಕಿಞ್ಚೇತಂ ಪಟಿಚ್ಚ ವುತ್ತಂ? ⁴² ಚೇತನಾಹಂ, ಭಿಕ್ಖವೇ, ಕಮ್ಮಂ ವದಾಮಿ। ಚೇತಯಿತ್ವಾ ಕಮ್ಮಂ ಕರೋತಿ – ಕಾಯೇನ ವಾಚಾಯ ಮನಸಾ।

‘‘Kammaṃ, bhikkhave, veditabbaṃ…pe… kammanirodhagāminī ⁴³ paṭipadā veditabbāti, iti kho panetaṃ vuttaṃ. Kiñcetaṃ paṭicca vuttaṃ? ⁴⁴ Cetanāhaṃ, bhikkhave, kammaṃ vadāmi. Cetayitvā kammaṃ karoti – kāyena vācāya manasā.

‘‘ಕತಮೋ ಚ, ಭಿಕ್ಖವೇ, ಕಮ್ಮಾನಂ ನಿದಾನಸಮ್ಭವೋ? ಫಸ್ಸೋ, ಭಿಕ್ಖವೇ, ಕಮ್ಮಾನಂ ನಿದಾನಸಮ್ಭವೋ।

‘‘Katamo ca, bhikkhave, kammānaṃ nidānasambhavo? Phasso, bhikkhave, kammānaṃ nidānasambhavo.

‘‘ಕತಮಾ ಚ, ಭಿಕ್ಖವೇ, ಕಮ್ಮಾನಂ ವೇಮತ್ತತಾ? ಅತ್ಥಿ, ಭಿಕ್ಖವೇ, ಕಮ್ಮಂ ನಿರಯವೇದನೀಯಂ, ಅತ್ಥಿ ಕಮ್ಮಂ ತಿರಚ್ಛಾನಯೋನಿವೇದನೀಯಂ, ಅತ್ಥಿ ಕಮ್ಮಂ ಪೇತ್ತಿವಿಸಯವೇದನೀಯಂ, ಅತ್ಥಿ ಕಮ್ಮಂ ಮನುಸ್ಸಲೋಕವೇದನೀಯಂ, ಅತ್ಥಿ ಕಮ್ಮಂ ದೇವಲೋಕವೇದನೀಯಂ । ಅಯಂ ವುಚ್ಚತಿ, ಭಿಕ್ಖವೇ, ಕಮ್ಮಾನಂ ವೇಮತ್ತತಾ।

‘‘Katamā ca, bhikkhave, kammānaṃ vemattatā? Atthi, bhikkhave, kammaṃ nirayavedanīyaṃ, atthi kammaṃ tiracchānayonivedanīyaṃ, atthi kammaṃ pettivisayavedanīyaṃ, atthi kammaṃ manussalokavedanīyaṃ, atthi kammaṃ devalokavedanīyaṃ . Ayaṃ vuccati, bhikkhave, kammānaṃ vemattatā.

‘‘ಕತಮೋ ಚ, ಭಿಕ್ಖವೇ, ಕಮ್ಮಾನಂ ವಿಪಾಕೋ? ತಿವಿಧಾಹಂ ⁴⁵, ಭಿಕ್ಖವೇ, ಕಮ್ಮಾನಂ ವಿಪಾಕಂ ವದಾಮಿ – ದಿಟ್ಠೇವ ⁴⁶ ಧಮ್ಮೇ, ಉಪಪಜ್ಜೇ ವಾ ⁴⁷, ಅಪರೇ ವಾ ಪರಿಯಾಯೇ। ಅಯಂ ವುಚ್ಚತಿ, ಭಿಕ್ಖವೇ, ಕಮ್ಮಾನಂ ವಿಪಾಕೋ।

‘‘Katamo ca, bhikkhave, kammānaṃ vipāko? Tividhāhaṃ ⁴⁸, bhikkhave, kammānaṃ vipākaṃ vadāmi – diṭṭheva ⁴⁹ dhamme, upapajje vā ⁵⁰, apare vā pariyāye. Ayaṃ vuccati, bhikkhave, kammānaṃ vipāko.

‘‘ಕತಮೋ ಚ, ಭಿಕ್ಖವೇ, ಕಮ್ಮನಿರೋಧೋ? ಫಸ್ಸನಿರೋಧೋ, ⁵¹ ಭಿಕ್ಖವೇ, ಕಮ್ಮನಿರೋಧೋ। ಅಯಮೇವ ಅರಿಯೋ ಅಟ್ಠಙ್ಗಿಕೋ ಮಗ್ಗೋ ಕಮ್ಮನಿರೋಧಗಾಮಿನೀ ⁵² ಪಟಿಪದಾ, ಸೇಯ್ಯಥಿದಂ – ಸಮ್ಮಾದಿಟ್ಠಿ…ಪೇ॰… ಸಮ್ಮಾಸಮಾಧಿ।

‘‘Katamo ca, bhikkhave, kammanirodho? Phassanirodho, ⁵³ bhikkhave, kammanirodho. Ayameva ariyo aṭṭhaṅgiko maggo kammanirodhagāminī ⁵⁴ paṭipadā, seyyathidaṃ – sammādiṭṭhi…pe… sammāsamādhi.

‘‘ಯತೋ ಖೋ, ಭಿಕ್ಖವೇ, ಅರಿಯಸಾವಕೋ ಏವಂ ಕಮ್ಮಂ ಪಜಾನಾತಿ, ಏವಂ ಕಮ್ಮಾನಂ ನಿದಾನಸಮ್ಭವಂ ಪಜಾನಾತಿ, ಏವಂ ಕಮ್ಮಾನಂ ವೇಮತ್ತತಂ ಪಜಾನಾತಿ, ಏವಂ ಕಮ್ಮಾನಂ ವಿಪಾಕಂ ಪಜಾನಾತಿ, ಏವಂ ಕಮ್ಮನಿರೋಧಂ ಪಜಾನಾತಿ, ಏವಂ ಕಮ್ಮನಿರೋಧಗಾಮಿನಿಂ ಪಟಿಪದಂ ಪಜಾನಾತಿ, ಸೋ ಇಮಂ ನಿಬ್ಬೇಧಿಕಂ ಬ್ರಹ್ಮಚರಿಯಂ ಪಜಾನಾತಿ ಕಮ್ಮನಿರೋಧಂ। ಕಮ್ಮಂ, ಭಿಕ್ಖವೇ, ವೇದಿತಬ್ಬಂ…ಪೇ॰… ಕಮ್ಮನಿರೋಧಗಾಮಿನೀ ಪಟಿಪದಾ ವೇದಿತಬ್ಬಾತಿ, ಇತಿ ಯಂ ತಂ ವುತ್ತಂ ಇದಮೇತಂ ಪಟಿಚ್ಚ ವುತ್ತಂ।

‘‘Yato kho, bhikkhave, ariyasāvako evaṃ kammaṃ pajānāti, evaṃ kammānaṃ nidānasambhavaṃ pajānāti, evaṃ kammānaṃ vemattataṃ pajānāti, evaṃ kammānaṃ vipākaṃ pajānāti, evaṃ kammanirodhaṃ pajānāti, evaṃ kammanirodhagāminiṃ paṭipadaṃ pajānāti, so imaṃ nibbedhikaṃ brahmacariyaṃ pajānāti kammanirodhaṃ. Kammaṃ, bhikkhave, veditabbaṃ…pe… kammanirodhagāminī paṭipadā veditabbāti, iti yaṃ taṃ vuttaṃ idametaṃ paṭicca vuttaṃ.

‘‘ದುಕ್ಖಂ, ಭಿಕ್ಖವೇ, ವೇದಿತಬ್ಬಂ, ದುಕ್ಖಸ್ಸ ನಿದಾನಸಮ್ಭವೋ ವೇದಿತಬ್ಬೋ, ದುಕ್ಖಸ್ಸ ವೇಮತ್ತತಾ ವೇದಿತಬ್ಬಾ, ದುಕ್ಖಸ್ಸ ವಿಪಾಕೋ ವೇದಿತಬ್ಬೋ, ದುಕ್ಖನಿರೋಧೋ ವೇದಿತಬ್ಬೋ, ದುಕ್ಖನಿರೋಧಗಾಮಿನೀ ಪಟಿಪದಾ ವೇದಿತಬ್ಬಾತಿ। ಇತಿ ಖೋ ಪನೇತಂ ವುತ್ತಂ , ಕಿಞ್ಚೇತಂ ಪಟಿಚ್ಚ ವುತ್ತಂ? ಜಾತಿಪಿ ದುಕ್ಖಾ, ಜರಾಪಿ ದುಕ್ಖಾ, ಬ್ಯಾಧಿಪಿ ದುಕ್ಖೋ ⁵⁵, ಮರಣಮ್ಪಿ ದುಕ್ಖಂ, ಸೋಕಪರಿದೇವದುಕ್ಖದೋಮನಸ್ಸುಪಾಯಾಸಾಪಿ ದುಕ್ಖಾ, ಯಮ್ಪಿಚ್ಛಂ ನ ಲಭತಿ ತಮ್ಪಿ ದುಕ್ಖಂ, ಸಂಖಿತ್ತೇನ ಪಞ್ಚುಪಾದಾನಕ್ಖನ್ಧಾ ⁵⁶ ದುಕ್ಖಾ।

‘‘Dukkhaṃ, bhikkhave, veditabbaṃ, dukkhassa nidānasambhavo veditabbo, dukkhassa vemattatā veditabbā, dukkhassa vipāko veditabbo, dukkhanirodho veditabbo, dukkhanirodhagāminī paṭipadā veditabbāti. Iti kho panetaṃ vuttaṃ , kiñcetaṃ paṭicca vuttaṃ? Jātipi dukkhā, jarāpi dukkhā, byādhipi dukkho ⁵⁷, maraṇampi dukkhaṃ, sokaparidevadukkhadomanassupāyāsāpi dukkhā, yampicchaṃ na labhati tampi dukkhaṃ, saṃkhittena pañcupādānakkhandhā ⁵⁸ dukkhā.

‘‘ಕತಮೋ ಚ, ಭಿಕ್ಖವೇ, ದುಕ್ಖಸ್ಸ ನಿದಾನಸಮ್ಭವೋ? ತಣ್ಹಾ, ಭಿಕ್ಖವೇ, ದುಕ್ಖಸ್ಸ ನಿದಾನಸಮ್ಭವೋ ।

‘‘Katamo ca, bhikkhave, dukkhassa nidānasambhavo? Taṇhā, bhikkhave, dukkhassa nidānasambhavo .

‘‘ಕತಮಾ ಚ, ಭಿಕ್ಖವೇ, ದುಕ್ಖಸ್ಸ ವೇಮತ್ತತಾ? ಅತ್ಥಿ, ಭಿಕ್ಖವೇ, ದುಕ್ಖಂ ಅಧಿಮತ್ತಂ, ಅತ್ಥಿ ಪರಿತ್ತಂ, ಅತ್ಥಿ ದನ್ಧವಿರಾಗಿ, ಅತ್ಥಿ ಖಿಪ್ಪವಿರಾಗಿ। ಅಯಂ ವುಚ್ಚತಿ, ಭಿಕ್ಖವೇ, ದುಕ್ಖಸ್ಸ ವೇಮತ್ತತಾ।

‘‘Katamā ca, bhikkhave, dukkhassa vemattatā? Atthi, bhikkhave, dukkhaṃ adhimattaṃ, atthi parittaṃ, atthi dandhavirāgi, atthi khippavirāgi. Ayaṃ vuccati, bhikkhave, dukkhassa vemattatā.

‘‘ಕತಮೋ ಚ, ಭಿಕ್ಖವೇ, ದುಕ್ಖಸ್ಸ ವಿಪಾಕೋ? ಇಧ, ಭಿಕ್ಖವೇ, ಏಕಚ್ಚೋ ಯೇನ ದುಕ್ಖೇನ ಅಭಿಭೂತೋ ಪರಿಯಾದಿನ್ನಚಿತ್ತೋ ⁵⁹ ಸೋಚತಿ ಕಿಲಮತಿ ಪರಿದೇವತಿ, ಉರತ್ತಾಳಿಂ ಕನ್ದತಿ, ಸಮ್ಮೋಹಂ ಆಪಜ್ಜತಿ , ಯೇನ ವಾ ಪನ ದುಕ್ಖೇನ ಅಭಿಭೂತೋ ಪರಿಯಾದಿನ್ನಚಿತ್ತೋ ಬಹಿದ್ಧಾ ಪರಿಯೇಟ್ಠಿಂ ಆಪಜ್ಜತಿ – ‘ಕೋ ⁶⁰ ಏಕಪದಂ ದ್ವಿಪದಂ ಜಾನಾತಿ ⁶¹ ಇಮಸ್ಸ ದುಕ್ಖಸ್ಸ ನಿರೋಧಾಯಾ’ತಿ? ಸಮ್ಮೋಹವೇಪಕ್ಕಂ ವಾಹಂ, ಭಿಕ್ಖವೇ, ದುಕ್ಖಂ ವದಾಮಿ ಪರಿಯೇಟ್ಠಿವೇಪಕ್ಕಂ ವಾ। ಅಯಂ ವುಚ್ಚತಿ, ಭಿಕ್ಖವೇ, ದುಕ್ಖಸ್ಸ ವಿಪಾಕೋ।

‘‘Katamo ca, bhikkhave, dukkhassa vipāko? Idha, bhikkhave, ekacco yena dukkhena abhibhūto pariyādinnacitto ⁶² socati kilamati paridevati, urattāḷiṃ kandati, sammohaṃ āpajjati , yena vā pana dukkhena abhibhūto pariyādinnacitto bahiddhā pariyeṭṭhiṃ āpajjati – ‘ko ⁶³ ekapadaṃ dvipadaṃ jānāti ⁶⁴ imassa dukkhassa nirodhāyā’ti? Sammohavepakkaṃ vāhaṃ, bhikkhave, dukkhaṃ vadāmi pariyeṭṭhivepakkaṃ vā. Ayaṃ vuccati, bhikkhave, dukkhassa vipāko.

‘‘ಕತಮೋ ಚ, ಭಿಕ್ಖವೇ, ದುಕ್ಖನಿರೋಧೋ? ತಣ್ಹಾನಿರೋಧೋ, ⁶⁵ ಭಿಕ್ಖವೇ, ದುಕ್ಖನಿರೋಧೋ। ಅಯಮೇವ ಅರಿಯೋ ಅಟ್ಠಙ್ಗಿಕೋ ಮಗ್ಗೋ ದುಕ್ಖಸ್ಸ ನಿರೋಧಗಾಮಿನೀ ಪಟಿಪದಾ, ಸೇಯ್ಯಥಿದಂ – ಸಮ್ಮಾದಿಟ್ಠಿ…ಪೇ॰… ಸಮ್ಮಾಸಮಾಧಿ।

‘‘Katamo ca, bhikkhave, dukkhanirodho? Taṇhānirodho, ⁶⁶ bhikkhave, dukkhanirodho. Ayameva ariyo aṭṭhaṅgiko maggo dukkhassa nirodhagāminī paṭipadā, seyyathidaṃ – sammādiṭṭhi…pe… sammāsamādhi.

‘‘ಯತೋ ಖೋ, ಭಿಕ್ಖವೇ, ಅರಿಯಸಾವಕೋ ಏವಂ ದುಕ್ಖಂ ಪಜಾನಾತಿ, ಏವಂ ದುಕ್ಖಸ್ಸ ನಿದಾನಸಮ್ಭವಂ ಪಜಾನಾತಿ, ಏವಂ ದುಕ್ಖಸ್ಸ ವೇಮತ್ತತಂ ಪಜಾನಾತಿ, ಏವಂ ದುಕ್ಖಸ್ಸ ವಿಪಾಕಂ ಪಜಾನಾತಿ, ಏವಂ ದುಕ್ಖನಿರೋಧಂ ಪಜಾನಾತಿ, ಏವಂ ದುಕ್ಖನಿರೋಧಗಾಮಿನಿಂ ಪಟಿಪದಂ ಪಜಾನಾತಿ, ಸೋ ಇಮಂ ನಿಬ್ಬೇಧಿಕಂ ಬ್ರಹ್ಮಚರಿಯಂ ಪಜಾನಾತಿ ದುಕ್ಖನಿರೋಧಂ। ದುಕ್ಖಂ, ಭಿಕ್ಖವೇ, ವೇದಿತಬ್ಬಂ, ದುಕ್ಖಸ್ಸ ನಿದಾನಸಮ್ಭವೋ ವೇದಿತಬ್ಬೋ, ದುಕ್ಖಸ್ಸ ವೇಮತ್ತತಾ ವೇದಿತಬ್ಬಾ, ದುಕ್ಖಸ್ಸ ವಿಪಾಕೋ ವೇದಿತಬ್ಬೋ, ದುಕ್ಖನಿರೋಧೋ ವೇದಿತಬ್ಬೋ, ದುಕ್ಖನಿರೋಧಗಾಮಿನೀ ಪಟಿಪದಾ ವೇದಿತಬ್ಬಾತಿ। ಇತಿ ಯಂ ತಂ ವುತ್ತಂ ಇದಮೇತಂ ಪಟಿಚ್ಚ ವುತ್ತಂ।

‘‘Yato kho, bhikkhave, ariyasāvako evaṃ dukkhaṃ pajānāti, evaṃ dukkhassa nidānasambhavaṃ pajānāti, evaṃ dukkhassa vemattataṃ pajānāti, evaṃ dukkhassa vipākaṃ pajānāti, evaṃ dukkhanirodhaṃ pajānāti, evaṃ dukkhanirodhagāminiṃ paṭipadaṃ pajānāti, so imaṃ nibbedhikaṃ brahmacariyaṃ pajānāti dukkhanirodhaṃ. Dukkhaṃ, bhikkhave, veditabbaṃ, dukkhassa nidānasambhavo veditabbo, dukkhassa vemattatā veditabbā, dukkhassa vipāko veditabbo, dukkhanirodho veditabbo, dukkhanirodhagāminī paṭipadā veditabbāti. Iti yaṃ taṃ vuttaṃ idametaṃ paṭicca vuttaṃ.

‘‘ಅಯಂ ಖೋ ಸೋ, ಭಿಕ್ಖವೇ, ನಿಬ್ಬೇಧಿಕಪರಿಯಾಯೋ ಧಮ್ಮಪರಿಯಾಯೋ’’ತಿ। ನವಮಂ।

‘‘Ayaṃ kho so, bhikkhave, nibbedhikapariyāyo dhammapariyāyo’’ti. Navamaṃ.

Next: ೧೦. ಸೀಹನಾದಸುತ್ತಂ • 10. Sīhanādasuttaṃ

Footnotes:

1. ಕಾಮಾನಂ ನಿರೋಧೋ (ಕ॰) ಏವಂ ವೇದನಾನಿರೋಧೋ-ಇಚ್ಚಾದೀಸುಪಿ

2. ಕಾಮಾನಂ ನಿರೋಧಗಾಮಿನೀ (ಕ॰) ಏವಂ ವೇದನಾನಿರೋಧಗಾಮಿನೀ-ಇಚ್ಚಾದೀಸುಪಿ

3. kāmānaṃ nirodho (ka.) evaṃ vedanānirodho-iccādīsupi

4. kāmānaṃ nirodhagāminī (ka.) evaṃ vedanānirodhagāminī-iccādīsupi

5. ಮ॰ ನಿ॰ ೧.೧೬೬; ಸಂ॰ ನಿ॰ ೪.೨೬೮

6. ತೇ ಕಾಮಗುಣಾ ನಾಮ ನೇತೇ ಕಾಮಾ (ಕ॰)

7. ma. ni. 1.166; saṃ. ni. 4.268

8. te kāmaguṇā nāma nete kāmā (ka.)

9. ಕಥಾ॰ ೫೧೪

10. kathā. 514

11. ನ ತೇ (ಸ್ಯಾ॰)

12. na te (syā.)

13. ಫಸ್ಸನಿರೋಧಾ (ಸ್ಯಾ॰)

14. phassanirodhā (syā.)

15. ಯತೋ ಚ ಖೋ (ಬಹೂಸು)

16. ಸಬ್ಬತ್ಥಪಿ ಏವಮೇವ ದಿಸ್ಸತಿ

17. yato ca kho (bahūsu)

18. sabbatthapi evameva dissati

19. ವೇದಯಮಾನೋ (ಸ್ಯಾ॰ ಕಂ॰) ಅ॰ ನಿ॰ ೪.೨೩೩

20. vedayamāno (syā. kaṃ.) a. ni. 4.233

21. ಫಸ್ಸನಿರೋಧಾ (ಸ್ಯಾ॰ ಕಂ॰ ಕ॰)

22. phassanirodhā (syā. kaṃ. ka.)

23. ಅಞ್ಞಾ ಭಿಕ್ಖವೇ ರೂಪೇಸು ಸಞ್ಞಾ ಅಞ್ಞಾ ಸದ್ದೇಸು ಸಞ್ಞಾ (ಕ॰) ಏವಂ ಸೇಸೇಸುಪಿ

24. aññā bhikkhave rūpesu saññā aññā saddesu saññā (ka.) evaṃ sesesupi

25. ವೋಹಾರವೇಪಕ್ಕಾಹಂ (ಸ್ಯಾ॰ ಪೀ॰), ವೋಹಾರಪಕ್ಕಾಹಂ (ಸೀ॰)

26. ಸಞ್ಞಾ (ಸ್ಯಾ॰ ಪೀ॰)

27. ಅಹೋಸೀತಿ (ಕ॰)

28. vohāravepakkāhaṃ (syā. pī.), vohārapakkāhaṃ (sī.)

29. saññā (syā. pī.)

30. ahosīti (ka.)

31. ಫಸ್ಸನಿರೋಧಾ (ಸ್ಯಾ॰ ಕ॰)

32. phassanirodhā (syā. ka.)

33. ಸಬ್ಬತ್ಥಪಿ ಏವಮೇವ ದಿಸ್ಸತಿ

34. sabbatthapi evameva dissati

35. ನಿರಯಗಾಮಿನಿಯಾ (ಸೀ॰ ಕ॰)

36. nirayagāminiyā (sī. ka.)

37. ಸಬ್ಬತ್ಥಪಿ ಏವಮೇವ ದಿಸ್ಸತಿ

38. sabbatthapi evameva dissati

39. ಸಬ್ಬತ್ಥಪಿ ಏವಮೇವ ದಿಸ್ಸತಿ

40. sabbatthapi evameva dissati

41. ಸಬ್ಬತ್ಥಪಿ ಏವಮೇವ ದಿಸ್ಸತಿ

42. ಕಥಾ॰ ೫೩೯

43. sabbatthapi evameva dissati

44. kathā. 539

45. ಇಮಾಹಂ (ಕ॰)

46. ದಿಟ್ಠೇ ವಾ (ಸೀ॰)

47. ಉಪಪಜ್ಜಂ ವಾ (ಕ॰ ಸೀ॰, ಅ॰ ನಿ॰ ೧೦.೨೧೭), ಉಪಪಜ್ಜ ವಾ (?), ಮ॰ ನಿ॰ ೩.೩೦೩ ಪಾಳಿಯಾ ತದತ್ಥವಣ್ಣನಾಯ ಚ ಸಂಸದ್ದೇತಬ್ಬಂ

48. imāhaṃ (ka.)

49. diṭṭhe vā (sī.)

50. upapajjaṃ vā (ka. sī., a. ni. 10.217), upapajja vā (?), ma. ni. 3.303 pāḷiyā tadatthavaṇṇanāya ca saṃsaddetabbaṃ

51. ಫಸ್ಸನಿರೋಧಾ (ಕ॰ ಸೀ॰ ಸ್ಯಾ॰ ಕ॰)

52. ಸಬ್ಬತ್ಥಪಿ ಏವಮೇವ ದಿಸ್ಸತಿ

53. phassanirodhā (ka. sī. syā. ka.)

54. sabbatthapi evameva dissati

55. ಬ್ಯಾಧಿಪಿ ದುಕ್ಖಾ (ಸ್ಯಾ॰ ಪೀ॰ ಕ॰)

56. ಪಞ್ಚುಪಾದಾನಕ್ಖನ್ಧಾಪಿ (ಕ॰)

57. byādhipi dukkhā (syā. pī. ka.)

58. pañcupādānakkhandhāpi (ka.)

59. ಪರಿಯಾದಿಣ್ಣಚಿತ್ತೋ (ಕ॰)

60. ಸೋ ನ (ಕ॰)

61. ಪಜಾನಾತಿ (ಕ॰)

62. pariyādiṇṇacitto (ka.)

63. so na (ka.)

64. pajānāti (ka.)

65. ತಣ್ಹಾನಿರೋಧಾ (ಕ॰ ಸೀ॰ ಸ್ಯಾ॰ ಕ॰)

66. taṇhānirodhā (ka. sī. syā. ka.)

Related texts:

ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೯. ನಿಬ್ಬೇಧಿಕಸುತ್ತವಣ್ಣನಾ • 9. Nibbedhikasuttavaṇṇanā

ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೯. ನಿಬ್ಬೇಧಿಕಸುತ್ತವಣ್ಣನಾ • 9. Nibbedhikasuttavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact