| Library / Tipiṭaka / திபிடக • Tipiṭaka / பஞ்சபகரண-மூலடீகா • Pañcapakaraṇa-mūlaṭīkā |
நிதா³னகதா²வண்ணனா
Nidānakathāvaṇṇanā
அனுபாதி³ஸேஸாய நிப்³பா³னதா⁴துயா பரினிப்³பா³யீதி பரினிப்³பா³னமேவ பரினிப்³பா³னஸ்ஸ பரினிப்³பா³னந்தரதோ விஸேஸனத்த²ங் கரணபா⁴வேன வுத்தங். யாய வா நிப்³பா³னதா⁴துயா அதி⁴க³தாய பச்சி²மசித்தங் அப்படிஸந்தி⁴கங் ஜாதங், ஸா தஸ்ஸ அப்படிஸந்தி⁴வூபஸமஸ்ஸ கரணபா⁴வேன வுத்தாதி. து³ப்³ப³லபக்க²ந்தி ந காளாஸோகங் விய ப³லவந்தங், அத² கோ² ஏகமண்ட³லிகந்தி வத³ந்தி. த⁴ம்மவாதீ³அத⁴ம்மவாதீ³விஸேஸஜனநஸமத்தா²ய பன பஞ்ஞாய அபா⁴வதோ து³ப்³ப³லதா வுத்தா. தேஸங்யேவாதி பா³ஹுலியானமேவ , ப³ஹுஸ்ஸுதிகாதிபி நாமங். பி⁴ன்னகாதி மூலஸங்கீ³திதோ மூலனிகாயதோ வா பி⁴ன்னா, லத்³தி⁴யா ஸுத்தந்தேஹி லிங்கா³கப்பேஹி ச விஸதி³ஸபா⁴வங் க³தாதி அத்தோ².
Anupādisesāya nibbānadhātuyā parinibbāyīti parinibbānameva parinibbānassa parinibbānantarato visesanatthaṃ karaṇabhāvena vuttaṃ. Yāya vā nibbānadhātuyā adhigatāya pacchimacittaṃ appaṭisandhikaṃ jātaṃ, sā tassa appaṭisandhivūpasamassa karaṇabhāvena vuttāti. Dubbalapakkhanti na kāḷāsokaṃ viya balavantaṃ, atha kho ekamaṇḍalikanti vadanti. Dhammavādīadhammavādīvisesajananasamatthāya pana paññāya abhāvato dubbalatā vuttā. Tesaṃyevāti bāhuliyānameva , bahussutikātipi nāmaṃ. Bhinnakāti mūlasaṅgītito mūlanikāyato vā bhinnā, laddhiyā suttantehi liṅgākappehi ca visadisabhāvaṃ gatāti attho.
மூலஸங்க³ஹந்தி பஞ்சஸதிகஸங்கீ³திங். அஞ்ஞத்ர ஸங்க³ஹிதாதிஆதீ³ஸு தீ³கா⁴தீ³ஸு அஞ்ஞத்ர ஸங்க³ஹிததோ ஸுத்தந்தராஸிதோ தங் தங் ஸுத்தங் நிக்கட்³டி⁴த்வா அஞ்ஞத்ர அகரிங்ஸூதி வுத்தங் ஹோதி. ஸங்க³ஹிததோ வா அஞ்ஞத்ர அஸங்க³ஹிதங் ஸுத்தங் அஞ்ஞத்ர கத்த²சி அகரிங்ஸு, அஞ்ஞங் வா அகரிங்ஸூதி அத்தோ². அத்த²ங் த⁴ம்மஞ்சாதி பாளியா அத்த²ங் பாளிஞ்ச. வினயே நிகாயேஸு ச பஞ்சஸூதி வினயே ச அவஸேஸபஞ்சனிகாயேஸு ச.
Mūlasaṅgahanti pañcasatikasaṅgītiṃ. Aññatra saṅgahitātiādīsu dīghādīsu aññatra saṅgahitato suttantarāsito taṃ taṃ suttaṃ nikkaḍḍhitvā aññatra akariṃsūti vuttaṃ hoti. Saṅgahitato vā aññatra asaṅgahitaṃ suttaṃ aññatra katthaci akariṃsu, aññaṃ vā akariṃsūti attho. Atthaṃ dhammañcāti pāḷiyā atthaṃ pāḷiñca. Vinaye nikāyesu ca pañcasūti vinaye ca avasesapañcanikāyesu ca.
‘‘த்³வேபானந்த³ , வேத³னா வுத்தா மயா பரியாயேனா’’திஆதி³ (ம॰ நி॰ 2.89) பரியாயதே³ஸிதங். உபெக்கா²வேத³னா ஹி ஸந்தஸ்மிங் பணீதே ஸுகே² வுத்தா ப⁴க³வதாதி அயஞ்ஹெத்த² பரியாயோ. ‘‘திஸ்ஸோ இமா, பி⁴க்க²வே, வேத³னா ஸுகா² து³க்கா² உபெக்கா² வேத³னா’’திஆதி³ (ஸங்॰ நி॰ 4.249-251) நிப்பரியாயதே³ஸிதங். வேத³னாஸபா⁴வோ ஹி திவிதோ⁴தி அயமெத்த² நிப்பரியாயதா. ‘‘ஸுகா²பி வேத³னா அனிச்சா ஸங்க²தா’’திஆதி³ (தீ³॰ நி॰ 2.123) நீதத்த²ங். ‘‘யங் கிஞ்சி வேத³யிதங், ஸப்³ப³ங் தங் து³க்க²’’ந்திஆதி³ (ஸங்॰ நி॰ 2.32) நெய்யத்த²ங். ‘‘தீஹி, பி⁴க்க²வே, டா²னேஹி ஜம்பு³தீ³பகா மனுஸ்ஸா உத்தரகுருகே ச மனுஸ்ஸே அதி⁴க்³க³ண்ஹந்தி தே³வே ச தாவதிங்ஸே’’திஆதி³கங் (அ॰ நி॰ 9.21) அஞ்ஞங் ஸந்தா⁴ய ப⁴ணிதங் க³ஹெத்வா அஞ்ஞங் அத்த²ங் ட²பயிங்ஸு. ‘‘நத்தி² தே³வேஸு ப்³ரஹ்மசரியவாஸோ’’திஆதி³கங் (கதா²॰ 270) ஸுத்தஞ்ச அஞ்ஞங் ஸந்தா⁴ய ப⁴ணிதங் அத்த²ஞ்ச அஞ்ஞங் ட²பயிங்ஸூதி ஏவமெத்த² அத்தோ² த³ட்ட²ப்³போ³. ‘‘அத்தே²கச்சோ புக்³க³லோ அத்தஹிதாய படிபன்னோ’’திஆதி³ (பு॰ ப॰ மாதிகா 4.24) ப்³யஞ்ஜனச்சா²யாய ஸண்ஹஸுகு²மங் ஸுஞ்ஞதாதி³அத்த²ங் ப³ஹுங் வினாஸயுங்.
‘‘Dvepānanda , vedanā vuttā mayā pariyāyenā’’tiādi (ma. ni. 2.89) pariyāyadesitaṃ. Upekkhāvedanā hi santasmiṃ paṇīte sukhe vuttā bhagavatāti ayañhettha pariyāyo. ‘‘Tisso imā, bhikkhave, vedanā sukhā dukkhā upekkhā vedanā’’tiādi (saṃ. ni. 4.249-251) nippariyāyadesitaṃ. Vedanāsabhāvo hi tividhoti ayamettha nippariyāyatā. ‘‘Sukhāpi vedanā aniccā saṅkhatā’’tiādi (dī. ni. 2.123) nītatthaṃ. ‘‘Yaṃ kiñci vedayitaṃ, sabbaṃ taṃ dukkha’’ntiādi (saṃ. ni. 2.32) neyyatthaṃ. ‘‘Tīhi, bhikkhave, ṭhānehi jambudīpakā manussā uttarakuruke ca manusse adhiggaṇhanti deve ca tāvatiṃse’’tiādikaṃ (a. ni. 9.21) aññaṃ sandhāya bhaṇitaṃ gahetvā aññaṃ atthaṃ ṭhapayiṃsu. ‘‘Natthi devesu brahmacariyavāso’’tiādikaṃ (kathā. 270) suttañca aññaṃ sandhāya bhaṇitaṃ atthañca aññaṃ ṭhapayiṃsūti evamettha attho daṭṭhabbo. ‘‘Atthekacco puggalo attahitāya paṭipanno’’tiādi (pu. pa. mātikā 4.24) byañjanacchāyāya saṇhasukhumaṃ suññatādiatthaṃ bahuṃ vināsayuṃ.
வினயக³ம்பீ⁴ரந்தி வினயே க³ம்பீ⁴ரஞ்ச ஏகதே³ஸங் ச²ட்³டெ³த்வாதி அத்தோ². கிலேஸவினயேன வா க³ம்பீ⁴ரங் ஏகதே³ஸங் ஸுத்தங் ச²ட்³டெ³த்வாதி அத்தோ². பதிரூபந்தி அத்தனோ அதி⁴ப்பாயானுரூபங் ஸுத்தங், ஸுத்தபதிரூபகங் வா அஸுத்தங். ஏகச்சே அட்ட²கதா²கண்ட³மேவ விஸ்ஸஜ்ஜிங்ஸு, ஏகச்சே ஸகலங் அபி⁴த⁴ம்மபிடகந்தி ஆஹ ‘‘அத்து²த்³தா⁴ரங் அபி⁴த⁴ம்மங் ச²ப்பகரண’’ந்தி. கதா²வத்து²ஸ்ஸ ஸவிவாத³த்தேபி அவிவாதா³னி ச²ப்பகரணானி படி²தப்³பா³னி ஸியுங், தானி நப்பவத்தந்தீதி ஹி த³ஸ்ஸனத்த²ங் ‘‘ச²ப்பகரண’’ந்தி வுத்தந்தி. ததியஸங்கீ³திதோ வா புப்³பே³ பவத்தமானானங் வஸேன ‘‘ச²ப்பகரண’’ந்தி வுத்தங் . அஞ்ஞானீதி அஞ்ஞானி அபி⁴த⁴ம்மபகரணாதீ³னி. நாமந்தி யங் பு³த்³தா⁴தி³படிஸங்யுத்தங் ந ஹோதி மஞ்ஜுஸிரீதிஆதி³கங், தங் நிகாயனாமங். லிங்க³ந்தி நிவாஸனபாருபனாதி³விஸேஸகதங் ஸண்டா²னவிஸேஸங். ஸிக்காதி³கங் பரிக்கா²ரங். ஆகப்போ டா²னாதீ³ஸு அங்க³ட்ட²பனவிஸேஸோ த³ட்ட²ப்³போ³. கரணந்தி சீவரஸிப்³ப³னாதி³கிச்சவிஸேஸோ.
Vinayagambhīranti vinaye gambhīrañca ekadesaṃ chaḍḍetvāti attho. Kilesavinayena vā gambhīraṃ ekadesaṃ suttaṃ chaḍḍetvāti attho. Patirūpanti attano adhippāyānurūpaṃ suttaṃ, suttapatirūpakaṃ vā asuttaṃ. Ekacce aṭṭhakathākaṇḍameva vissajjiṃsu, ekacce sakalaṃ abhidhammapiṭakanti āha ‘‘atthuddhāraṃ abhidhammaṃ chappakaraṇa’’nti. Kathāvatthussa savivādattepi avivādāni chappakaraṇāni paṭhitabbāni siyuṃ, tāni nappavattantīti hi dassanatthaṃ ‘‘chappakaraṇa’’nti vuttanti. Tatiyasaṅgītito vā pubbe pavattamānānaṃ vasena ‘‘chappakaraṇa’’nti vuttaṃ . Aññānīti aññāni abhidhammapakaraṇādīni. Nāmanti yaṃ buddhādipaṭisaṃyuttaṃ na hoti mañjusirītiādikaṃ, taṃ nikāyanāmaṃ. Liṅganti nivāsanapārupanādivisesakataṃ saṇṭhānavisesaṃ. Sikkādikaṃ parikkhāraṃ. Ākappo ṭhānādīsu aṅgaṭṭhapanaviseso daṭṭhabbo. Karaṇanti cīvarasibbanādikiccaviseso.
ஸங்கந்திகஸ்ஸபிகேன நிகாயேன வாதே³ன வா பி⁴ன்னா ஸங்கந்திகாதி அத்தோ². ஸங்கந்திகானங் பே⁴தா³ ஸுத்தவாதீ³ அனுபுப்³பே³ன பி⁴ஜ்ஜத² பி⁴ஜ்ஜிங்ஸூதி அத்தோ². பி⁴ன்னவாதே³னாதி பி⁴ன்னா வாதா³ ஏதஸ்மிந்தி பி⁴ன்னவாதோ³, தேன அபி⁴ன்னேன தே²ரவாதே³ன ஸஹ அட்டா²ரஸ ஹொந்தீதி வுத்தங் ஹோதி. பி⁴ன்னவாதே³னாதி வா பி⁴ன்னாய லத்³தி⁴யா அட்டா²ரஸ ஹொந்தி, தே ஸப்³பே³பி ஸஹாதி அத்தோ². தே²ரவாதா³னமுத்தமோதி எத்த² தே²ர-இதி அவிப⁴த்திகோ நித்³தே³ஸோ. தே²ரானங் அயந்தி தே²ரோ. கோ ஸோ? வாதோ³. தே²ரோ வாதா³னமுத்தமோதி அயமெத்த² அத்தோ².
Saṅkantikassapikena nikāyena vādena vā bhinnā saṅkantikāti attho. Saṅkantikānaṃ bhedā suttavādī anupubbena bhijjatha bhijjiṃsūti attho. Bhinnavādenāti bhinnā vādā etasminti bhinnavādo, tena abhinnena theravādena saha aṭṭhārasa hontīti vuttaṃ hoti. Bhinnavādenāti vā bhinnāya laddhiyā aṭṭhārasa honti, te sabbepi sahāti attho. Theravādānamuttamoti ettha thera-iti avibhattiko niddeso. Therānaṃ ayanti thero. Ko so? Vādo. Thero vādānamuttamoti ayamettha attho.
உப்பன்னே வாதே³ ஸந்தா⁴ய ‘‘பரப்பவாத³மத²ன’’ந்தி ஆஹ. ஆயதிங் உப்பஜ்ஜனகவாதா³னங் படிஸேத⁴னலக்க²ணபா⁴வதோ ‘‘ஆயதிலக்க²ண’’ந்தி வுத்தங்.
Uppanne vāde sandhāya ‘‘parappavādamathana’’nti āha. Āyatiṃ uppajjanakavādānaṃ paṭisedhanalakkhaṇabhāvato ‘‘āyatilakkhaṇa’’nti vuttaṃ.
நிதா³னகதா²வண்ணனா நிட்டி²தா.
Nidānakathāvaṇṇanā niṭṭhitā.
