| Library / Tipiṭaka / திபிடக • Tipiṭaka / பேதவத்து²-அட்ட²கதா² • Petavatthu-aṭṭhakathā |
நிக³மனகதா²
Nigamanakathā
எத்தாவதா ச –
Ettāvatā ca –
யே தே பேதேஸு நிப்³ப³த்தா, ஸத்தா து³க்கடகாரினோ;
Ye te petesu nibbattā, sattā dukkaṭakārino;
யேஹி கம்மேஹி தேஸங் தங், பாபகங் கடுகப்ப²லங்.
Yehi kammehi tesaṃ taṃ, pāpakaṃ kaṭukapphalaṃ.
பச்சக்க²தோ விபா⁴வெந்தீ, புச்சா²விஸ்ஸஜ்ஜனேஹி ச;
Paccakkhato vibhāventī, pucchāvissajjanehi ca;
யா தே³ஸனானியாமேன, ஸதங் ஸங்வேக³வட்³ட⁴னீ.
Yā desanāniyāmena, sataṃ saṃvegavaḍḍhanī.
யங் கதா²வத்து²குஸலா, ஸுபரிஞ்ஞாதவத்து²கா;
Yaṃ kathāvatthukusalā, supariññātavatthukā;
பேதவத்தூ²தி நாமேன, ஸங்கா³யிங்ஸு மஹேஸயோ.
Petavatthūti nāmena, saṅgāyiṃsu mahesayo.
தஸ்ஸ அத்த²ங் பகாஸேதுங், போராணட்ட²கதா²னயங்;
Tassa atthaṃ pakāsetuṃ, porāṇaṭṭhakathānayaṃ;
நிஸ்ஸாய யா ஸமாரத்³தா⁴, அத்த²ஸங்வண்ணனா மயா.
Nissāya yā samāraddhā, atthasaṃvaṇṇanā mayā.
யா தத்த² பரமத்தா²னங், தத்த² தத்த² யதா²ரஹங்;
Yā tattha paramatthānaṃ, tattha tattha yathārahaṃ;
பகாஸனா பரமத்த²-தீ³பனீ நாம நாமதோ.
Pakāsanā paramattha-dīpanī nāma nāmato.
ஸம்பத்தா பரினிட்டா²னங், அனாகுலவினிச்ச²யா;
Sampattā pariniṭṭhānaṃ, anākulavinicchayā;
ஸா பன்னரஸமத்தாய, பாளியா பா⁴ணவாரதோ.
Sā pannarasamattāya, pāḷiyā bhāṇavārato.
இதி தங் ஸங்க²ரொந்தேன, யங் தங் அதி⁴க³தங் மயா;
Iti taṃ saṅkharontena, yaṃ taṃ adhigataṃ mayā;
புஞ்ஞங் தஸ்ஸானுபா⁴வேன, லோகனாத²ஸ்ஸ ஸாஸனங்.
Puññaṃ tassānubhāvena, lokanāthassa sāsanaṃ.
ஓகா³ஹெத்வா விஸுத்³தா⁴ய, ஸீலாதி³படிபத்தியா;
Ogāhetvā visuddhāya, sīlādipaṭipattiyā;
ஸப்³பே³பி தே³ஹினோ ஹொந்து, விமுத்திரஸபா⁴கி³னோ.
Sabbepi dehino hontu, vimuttirasabhāgino.
சிரங் திட்ட²து லோகஸ்மிங், ஸம்மாஸம்பு³த்³த⁴ஸாஸனங்;
Ciraṃ tiṭṭhatu lokasmiṃ, sammāsambuddhasāsanaṃ;
தஸ்மிங் ஸகா³ரவா நிச்சங், ஹொந்து ஸப்³பே³பி பாணினோ.
Tasmiṃ sagāravā niccaṃ, hontu sabbepi pāṇino.
ஸம்மா வஸ்ஸது காலேன, தே³வோபி ஜக³தீபதி;
Sammā vassatu kālena, devopi jagatīpati;
ஸத்³த⁴ம்மனிரதோ லோகங், த⁴ம்மேனேவ பஸாஸதூதி.
Saddhammanirato lokaṃ, dhammeneva pasāsatūti.
இதி ப³த³ரதித்த²விஹாரவாஸினா முனிவரயதினா
Iti badaratitthavihāravāsinā munivarayatinā
ப⁴த³ந்தேன ஆசரியத⁴ம்மபாலேன கதா பேதவத்து²அத்த²ஸங்வண்ணனா நிட்டி²தா.
Bhadantena ācariyadhammapālena katā petavatthuatthasaṃvaṇṇanā niṭṭhitā.
பேதவத்து²-அட்ட²கதா² ஸமத்தா.
Petavatthu-aṭṭhakathā samattā.
