| Library / Tipiṭaka / ತಿಪಿಟಕ • Tipiṭaka / ಚೂಳನಿದ್ದೇಸ-ಅಟ್ಠಕಥಾ • Cūḷaniddesa-aṭṭhakathā |
ನಿಗಮನಕಥಾ
Nigamanakathā
ಯೋ ಸೋ ಸುಗತಪುತ್ತಾನಂ, ಅಧಿಪತಿಭೂತೇನ ಹಿತರತಿನಾ।
Yo so sugataputtānaṃ, adhipatibhūtena hitaratinā;
ಥೇರೇನ ಥಿರಗುಣವತಾ, ಸುವಿಭತ್ತೋ ಮಹಾನಿದ್ದೇಸೋ॥
Therena thiraguṇavatā, suvibhatto mahāniddeso.
ತಸ್ಸತ್ಥವಣ್ಣನಾ ಯಾ, ಪುಬ್ಬಟ್ಠಕಥಾನಯಂ ತಥಾ।
Tassatthavaṇṇanā yā, pubbaṭṭhakathānayaṃ tathā;
ಯುತ್ತಿಂ ನಿಸ್ಸಾಯ ಮಯಾರದ್ಧಾ, ನಿಟ್ಠಾನಮುಪಗತಾ ಏಸಾ॥
Yuttiṃ nissāya mayāraddhā, niṭṭhānamupagatā esā.
ಯಂ ಪುರಂ ಪುರುತ್ತಮಂ, ಅನುರಾಧಪುರವ್ಹಯಂ।
Yaṃ puraṃ puruttamaṃ, anurādhapuravhayaṃ;
ಯೋ ತಸ್ಸ ದಕ್ಖಿಣೇ ಭಾಗೇ, ಮಹಾವಿಹಾರೋ ಪತಿಟ್ಠಿತೋ॥
Yo tassa dakkhiṇe bhāge, mahāvihāro patiṭṭhito.
ಯೋ ತಸ್ಸ ತಿಲಕೋ ಭೂತೋ, ಮಹಾಥೂಪೋ ಸಿಲುಚ್ಚಯೋ।
Yo tassa tilako bhūto, mahāthūpo siluccayo;
ಯಂ ತಸ್ಸ ಪಚ್ಛಿಮೇ ಭಾಗೇ, ಲೇಖೋ ಕಥಿಕಸಞ್ಞಿತೋ॥
Yaṃ tassa pacchime bhāge, lekho kathikasaññito.
ಕಿತ್ತಿಸೇನೋತಿ ನಾಮೇನ, ಸಜೀವೋ ರಾಜಸಮ್ಮತೋ।
Kittisenoti nāmena, sajīvo rājasammato;
ಸುಚಿಚಾರಿತ್ತಸಮ್ಪನ್ನೋ, ಲೇಖೋ ಕುಸಲಕಮ್ಮಿಕೋ॥
Sucicārittasampanno, lekho kusalakammiko.
ಸೀತಚ್ಛಾಯತರುಪೇತಂ, ಸಲಿಲಾಸಯಸಮ್ಪದಂ।
Sītacchāyatarupetaṃ, salilāsayasampadaṃ;
ಚಾರುಪಾಕಾರಸಞ್ಚಿತಂ, ಪರಿವೇಣಮಕಾರಯಿ॥
Cārupākārasañcitaṃ, pariveṇamakārayi.
ಉಪಸೇನೋ ಮಹಾಥೇರೋ, ಮಹಾಪರಿವೇಣವಾಸಿಯೋ।
Upaseno mahāthero, mahāpariveṇavāsiyo;
ತಸ್ಸಾದಾಸಿ ಪರಿವೇಣಂ, ಲೇಖೋ ಕುಸಲಕಮ್ಮಿಕೋ॥
Tassādāsi pariveṇaṃ, lekho kusalakammiko.
ವಸನ್ತೇನೇತ್ಥ ಥೇರೇನ, ಥಿರಸೀಲೇನ ತಾದಿನಾ।
Vasantenettha therena, thirasīlena tādinā;
ಉಪಸೇನವ್ಹಯೇನ ಸಾ, ಕತಾ ಸದ್ಧಮ್ಮಜೋತಿಕಾ॥
Upasenavhayena sā, katā saddhammajotikā.
ರಞ್ಞೋ ಸಿರಿನಿವಾಸಸ್ಸ, ಸಿರಿಸಙ್ಘಸ್ಸ ಬೋಧಿನೋ।
Rañño sirinivāsassa, sirisaṅghassa bodhino;
ಛಬ್ಬೀಸತಿಮ್ಹಿ ವಸ್ಸಮ್ಹಿ, ನಿಟ್ಠಿತಾ ನಿದ್ದೇಸವಣ್ಣನಾ॥
Chabbīsatimhi vassamhi, niṭṭhitā niddesavaṇṇanā.
ಸಮಯಂ ಅನುಲೋಮೇನ್ತೀ, ಥೇರಾನಂ ಥೇರವಂಸದೀಪಾನಂ।
Samayaṃ anulomentī, therānaṃ theravaṃsadīpānaṃ;
ನಿಟ್ಠಂ ಗತಾ ಯಥಾಯಂ, ಅಟ್ಠಕಥಾ ಲೋಕಹಿತಜನನೀ॥
Niṭṭhaṃ gatā yathāyaṃ, aṭṭhakathā lokahitajananī.
ಸದ್ಧಮ್ಮಂ ಅನುಲೋಮೇನ್ತಾ, ಅತ್ತಹಿತಂ ಪರಹಿತಞ್ಚ ಸಾಧೇನ್ತಾ।
Saddhammaṃ anulomentā, attahitaṃ parahitañca sādhentā;
ನಿಟ್ಠಂ ಗಚ್ಛನ್ತು ತಥಾ, ಮನೋರಥಾ ಸಬ್ಬಸತ್ತಾನಂ॥
Niṭṭhaṃ gacchantu tathā, manorathā sabbasattānaṃ.
ಸದ್ಧಮ್ಮಪ್ಪಜ್ಜೋತಿಕಾಯ, ಅಟ್ಠಕಥಾಯೇತ್ಥ ಗಣಿತಕುಸಲೇಹಿ।
Saddhammappajjotikāya, aṭṭhakathāyettha gaṇitakusalehi;
ಗಣಿತಾ ತು ಭಾಣವಾರಾ, ಞೇಯ್ಯಾತಿರೇಕಚತ್ತಾರಿಸಾ॥
Gaṇitā tu bhāṇavārā, ñeyyātirekacattārisā.
ಆನುಟ್ಠುಭೇನ ಅಸ್ಸಾ, ಛನ್ದೋ ಬದ್ಧೇನ ಗಣಿಯಮಾನಾ ತು।
Ānuṭṭhubhena assā, chando baddhena gaṇiyamānā tu;
ಅತಿರೇಕದಸಸಹಸ್ಸ-ಸಙ್ಖಾ ಗಾಥಾತಿ ವಿಞ್ಞೇಯ್ಯಾ॥
Atirekadasasahassa-saṅkhā gāthāti viññeyyā.
ಸಾಸನಚಿರಟ್ಠಿತತ್ಥಂ, ಲೋಕಹಿತತ್ಥಞ್ಚ ಸಾದರೇನ ಮಯಾ।
Sāsanaciraṭṭhitatthaṃ, lokahitatthañca sādarena mayā;
ಪುಞ್ಞಂ ಇಮಂ ರಚಯತಾ, ಯಂ ಪತ್ತಮನಪ್ಪಕಂ ವಿಪುಲಂ॥
Puññaṃ imaṃ racayatā, yaṃ pattamanappakaṃ vipulaṃ.
ಪುಞ್ಞೇನ ತೇನ ಲೋಕೋ, ಸದ್ಧಮ್ಮರಸಾಯನಂ ದಸಬಲಸ್ಸ।
Puññena tena loko, saddhammarasāyanaṃ dasabalassa;
ಉಪಭುಞ್ಜಿತ್ವಾ ವಿಮಲಂ, ಪಪ್ಪೋತು ಸುಖಂ ಸುಖೇನೇವಾತಿ॥
Upabhuñjitvā vimalaṃ, pappotu sukhaṃ sukhenevāti.
ಸದ್ಧಮ್ಮಪ್ಪಜ್ಜೋತಿಕಾ ನಾಮ
Saddhammappajjotikā nāma
ಚೂಳನಿದ್ದೇಸ-ಅಟ್ಠಕಥಾ ನಿಟ್ಠಿತಾ।
Cūḷaniddesa-aṭṭhakathā niṭṭhitā.
