| Library / Tipiṭaka / திபிடக • Tipiṭaka / வினயவினிச்ச²ய-டீகா • Vinayavinicchaya-ṭīkā |
நிக³மனகதா²வண்ணனா
Nigamanakathāvaṇṇanā
961-3. மஹேஸினோ திவித⁴ஸ்ஸாபி ஸாஸனஸ்ஸ ஸுசிரட்டி²திகாமேன அதிசிரகாலப்பவத்திங் இச்ச²ந்தேன தீ⁴மதா பஸத்த²தரஞாணேன ஸுத்³த⁴சித்தேன லாப⁴ஸக்காரனிரபெக்க²தாய பரிஸுத்³த⁴ஜ்ஜா²ஸயேன பு³த்³த⁴த³த்தேன பு³த்³த⁴த³த்தாபி⁴தா⁴னேன ஆசரியவரேன ரசிதோ.
961-3. Mahesino tividhassāpi sāsanassa suciraṭṭhitikāmena aticirakālappavattiṃ icchantena dhīmatā pasatthatarañāṇena suddhacittena lābhasakkāranirapekkhatāya parisuddhajjhāsayena buddhadattena buddhadattābhidhānena ācariyavarena racito.
பஜ்ஜவஸேன க³ந்த²தோ, அத்த²தோ சேவ பரமுத்தரோ உத்தரோ வினிச்ச²யோ அந்தராயங் அந்தரேன அஜ்ஜ²த்திகங், பா³ஹிரங் வா அந்தராயங் வினா யதா² ஸித்³தி⁴ங் உபாக³தோ பரினிட்டா²னங் பத்தோ, ததா² ஸத்தானங் த⁴ம்மஸங்யுதா குஸலூபஸங்ஹிதா ஸங்கப்பா மனோரதா² ஸிஜ்ஜ²ந்து அந்தராயங் வினா நிப்பஜ்ஜந்து, ஏதேன உத்தரவினிச்ச²யரசனாமயேன மஹதா புஞ்ஞோத³யேன சதூஹி ஸங்க³ஹவத்தூ²ஹி ஜனங் ரஞ்ஜேதீதி ‘‘ராஜா’’தி ஸங்க²ங் க³தோ மஹீபாலோ மஹிங் பத²விஸன்னிஸ்ஸிதங் ஜனகாயங் ஸம்மா ஞாயேன த³ஸ ராஜத⁴ம்மே அகோபெந்தோ பாலேது. தே³வோ பஜ்ஜுன்னோ காலே தா²வரஜங்க³மானங் உபயோகா³ரஹகாலே ஸம்மா பவஸ்ஸது அவுட்டி²அதிவுட்டி²கங் அகத்வா ஸம்மா பவச்ச²து.
Pajjavasena ganthato, atthato ceva paramuttaro uttaro vinicchayo antarāyaṃ antarena ajjhattikaṃ, bāhiraṃ vā antarāyaṃ vinā yathā siddhiṃ upāgato pariniṭṭhānaṃ patto, tathā sattānaṃ dhammasaṃyutā kusalūpasaṃhitā saṅkappā manorathā sijjhantu antarāyaṃ vinā nippajjantu, etena uttaravinicchayaracanāmayena mahatā puññodayena catūhi saṅgahavatthūhi janaṃ rañjetīti ‘‘rājā’’ti saṅkhaṃ gato mahīpālo mahiṃ pathavisannissitaṃ janakāyaṃ sammā ñāyena dasa rājadhamme akopento pāletu. Devo pajjunno kāle thāvarajaṅgamānaṃ upayogārahakāle sammā pavassatu avuṭṭhiativuṭṭhikaṃ akatvā sammā pavacchatu.
964. ஸேலிந்தோ³ ஸினேருபப்³ப³தராஜா யாவ திட்ட²தி யாவ லோகே பவத்ததி, சந்தோ³ ஸகலஜனபத³னயனஸாயனோ யாவ விரோசதி யாவ அத்தனோ ஸபா⁴வங் ஜோதேதி, தாவ யஸஸ்ஸினோ கோ³தமஸ்ஸ அரஹதோ ஸம்மாஸம்பு³த்³த⁴ஸ்ஸ ஸத்³த⁴ம்மோ பரியத்திபடிபத்திபடிவேத⁴வஸேன திவிதோ⁴ ஸத்³த⁴ம்மோ திட்ட²து பவத்தது.
964.Selindo sinerupabbatarājā yāva tiṭṭhati yāva loke pavattati, cando sakalajanapadanayanasāyano yāva virocati yāva attano sabhāvaṃ joteti, tāva yasassino gotamassa arahato sammāsambuddhassa saddhammo pariyattipaṭipattipaṭivedhavasena tividho saddhammo tiṭṭhatu pavattatu.
965. ஸீஹாதீ³னங், தா³ஹாதீ³னஞ்ச பா³ஹிரஜ்ஜ²த்திகானங் பரிஸ்ஸயானங் க²மனங் ஸஹனங் அபி⁴ப⁴வித்வா பவத்தனங் க²ந்தி. ஸோரச்சந்தி ஸோப⁴னே ரதோதி ஸுரதோ, ஸுரதஸ்ஸ பா⁴வோ ஸோரச்சங். ஸுந்த³ரங் அக²ண்ட³தாதி³கு³ணஸமன்னாக³தங் ஸீலங் அஸ்ஸாதி ஸுஸீலோ. ஸுஸீலஸ்ஸ பா⁴வோ.
965. Sīhādīnaṃ, dāhādīnañca bāhirajjhattikānaṃ parissayānaṃ khamanaṃ sahanaṃ abhibhavitvā pavattanaṃ khanti. Soraccanti sobhane ratoti surato, suratassa bhāvo soraccaṃ. Sundaraṃ akhaṇḍatādiguṇasamannāgataṃ sīlaṃ assāti susīlo. Susīlassa bhāvo.
நிக³மனகதா²வண்ணனா நிட்டி²தா.
Nigamanakathāvaṇṇanā niṭṭhitā.
உத்தரவினிச்ச²யடீகா நிட்டி²தா.
Uttaravinicchayaṭīkā niṭṭhitā.
இதி வினயத்த²ஸாரஸந்தீ³பனீ நாம வினயவினிச்ச²யவண்ணனா,
Iti vinayatthasārasandīpanī nāma vinayavinicchayavaṇṇanā,
லீனத்த²பகாஸனீ நாம உத்தரவினிச்ச²யவண்ணனா ச
Līnatthapakāsanī nāma uttaravinicchayavaṇṇanā ca
ஸமத்தா.
Samattā.
பச்சா² ட²பிதகா³தா²யோ
Pacchā ṭhapitagāthāyo
தே²ரேன தி²ரசித்தேன, ஸாஸனுஜ்ஜோதனத்தி²னா;
Therena thiracittena, sāsanujjotanatthinā;
புஞ்ஞவா ஞாணவா ஸீலீ, ஸுஹஜ்ஜோ முது³கோ ததா².
Puññavā ñāṇavā sīlī, suhajjo muduko tathā.
யோ ஸீஹளாரிமத்³தே³ஸு, சந்தி³மா ஸூரியோ விய;
Yo sīhaḷārimaddesu, candimā sūriyo viya;
பாகடோ ஸீவலித்தே²ரோ, மஹாதேஜோ மஹாயஸோ.
Pākaṭo sīvalitthero, mahātejo mahāyaso.
தேன நீதா ஸீஹளா யா, இத⁴ பத்தா ஸுதீ⁴மதா;
Tena nītā sīhaḷā yā, idha pattā sudhīmatā;
ஏஸா ஸங்வண்ணனா ஸீஹ-ளக்க²ரேன ஸுலிக்கி²தா.
Esā saṃvaṇṇanā sīha-ḷakkharena sulikkhitā.
ரேவதோ இதி நாமேன, தே²ரேன தி²ரசேதஸா;
Revato iti nāmena, therena thiracetasā;
அரிமத்³தி³கே ரக்க²ந்தேன, பரிவத்தெத்வான ஸாது⁴கங்.
Arimaddike rakkhantena, parivattetvāna sādhukaṃ.
லிகா²பிதா ஹிதத்தா²ய, பி⁴க்கூ²னங் அரிமத்³தி³கே;
Likhāpitā hitatthāya, bhikkhūnaṃ arimaddike;
ஏஸா ஸங்வண்ணனா ஸுட்டு², ஸன்னிட்டா²னமுபாக³தா;
Esā saṃvaṇṇanā suṭṭhu, sanniṭṭhānamupāgatā;
ததே²வ ஸப்³ப³ஸத்தானங், ஸப்³ப³த்தோ² ச ஸமிஜ்ஜ²தூதி.
Tatheva sabbasattānaṃ, sabbattho ca samijjhatūti.
