| Library / Tipiṭaka / તિપિટક • Tipiṭaka / અઙ્ગુત્તરનિકાય (ટીકા) • Aṅguttaranikāya (ṭīkā) |
નિગમનકથાવણ્ણના
Nigamanakathāvaṇṇanā
મહાઅટ્ઠકથાય સારન્તિ અઙ્ગુત્તરમહાઅટ્ઠકથાય સારં. એકૂનસટ્ઠિમત્તોતિ થોકં ઊનભાવતો મત્તસદ્દગ્ગહણં. મૂલટ્ઠકથાસારન્તિ પુબ્બે વુત્તઅઙ્ગુત્તરમહાઅટ્ઠકથાય સારમેવ અનુનિગમવસેન વદતિ. અથ વા મૂલટ્ઠકથાસારન્તિ પોરાણટ્ઠકથાસુ અત્થસારં. તેનેદં દસ્સેતિ – અઙ્ગુત્તરમહાઅટ્ઠકથાય અત્થસારં આદાય ઇમં મનોરથપૂરણિં કરોન્તો સેસમહાનિકાયાનમ્પિ મૂલટ્ઠકથાસુ ઇધ વિનિયોગક્ખમં અત્થસારં આદાય એવમકાસિન્તિ. મહાવિહારાધિવાસીનન્તિ ચ ઇદં પુરિમપચ્છિમપદેહિ સદ્ધિં સમ્બન્ધિતબ્બં ‘‘મહાવિહારાધિવાસીનં સમયં પકાસયન્તી, મહાવિહારાધિવાસીનં મૂલટ્ઠકથાસારં આદાયા’’તિ. તેનાતિ પુઞ્ઞેન. હોતુ સબ્બો સુખી લોકોતિ કામાવચરાદિવિભાગો સબ્બો સત્તલોકો યથારહં બોધિત્તયાધિગમવસેન સમ્પત્તેન નિબ્બાનસુખેન સુખી સુખિતો હોતૂતિ સદેવકસ્સ લોકસ્સ અચ્ચન્તં સુખાધિગમાય અત્તનો પુઞ્ઞં પરિણામેતિ.
Mahāaṭṭhakathāyasāranti aṅguttaramahāaṭṭhakathāya sāraṃ. Ekūnasaṭṭhimattoti thokaṃ ūnabhāvato mattasaddaggahaṇaṃ. Mūlaṭṭhakathāsāranti pubbe vuttaaṅguttaramahāaṭṭhakathāya sārameva anunigamavasena vadati. Atha vā mūlaṭṭhakathāsāranti porāṇaṭṭhakathāsu atthasāraṃ. Tenedaṃ dasseti – aṅguttaramahāaṭṭhakathāya atthasāraṃ ādāya imaṃ manorathapūraṇiṃ karonto sesamahānikāyānampi mūlaṭṭhakathāsu idha viniyogakkhamaṃ atthasāraṃ ādāya evamakāsinti. Mahāvihārādhivāsīnanti ca idaṃ purimapacchimapadehi saddhiṃ sambandhitabbaṃ ‘‘mahāvihārādhivāsīnaṃ samayaṃ pakāsayantī, mahāvihārādhivāsīnaṃ mūlaṭṭhakathāsāraṃ ādāyā’’ti. Tenāti puññena. Hotu sabbo sukhī lokoti kāmāvacarādivibhāgo sabbo sattaloko yathārahaṃ bodhittayādhigamavasena sampattena nibbānasukhena sukhī sukhito hotūti sadevakassa lokassa accantaṃ sukhādhigamāya attano puññaṃ pariṇāmeti.
એત્તાવતા સમત્તાવ, સબ્બસો વણ્ણના અયં;
Ettāvatā samattāva, sabbaso vaṇṇanā ayaṃ;
વીસતિયા સહસ્સેહિ, ગન્થેહિ પરિમાણતો.
Vīsatiyā sahassehi, ganthehi parimāṇato.
પોરાણાનં કથામગ્ગ-સારમેત્થ યતો ઠિતં;
Porāṇānaṃ kathāmagga-sāramettha yato ṭhitaṃ;
તસ્મા સારત્થમઞ્જૂસા, ઇતિ નામેન વિસ્સુતા.
Tasmā sāratthamañjūsā, iti nāmena vissutā.
અજ્ઝેસિતો નરિન્દેન, સોહં પરક્કમબાહુના;
Ajjhesito narindena, sohaṃ parakkamabāhunā;
સદ્ધમ્મટ્ઠિતિકામેન, સાસનુજ્જોતકારિના.
Saddhammaṭṭhitikāmena, sāsanujjotakārinā.
તેનેવ કારિતે રમ્મે, પાસાદસતમણ્ડિતે;
Teneva kārite ramme, pāsādasatamaṇḍite;
નાનાદુમગણાકિણ્ણે, ભાવનાભિરતાલયે.
Nānādumagaṇākiṇṇe, bhāvanābhiratālaye.
સીતલૂદકસમ્પન્ને , વસં જેતવને ઇમં;
Sītalūdakasampanne , vasaṃ jetavane imaṃ;
અત્થબ્યઞ્જનસમ્પન્નં, અકાસિં સાધુસમ્મતં.
Atthabyañjanasampannaṃ, akāsiṃ sādhusammataṃ.
યં સિદ્ધં ઇમિના પુઞ્ઞં, યં ચઞ્ઞં પસુતં મયા;
Yaṃ siddhaṃ iminā puññaṃ, yaṃ caññaṃ pasutaṃ mayā;
એતેન પુઞ્ઞકમ્મેન, દુતિયે અત્તસમ્ભવે.
Etena puññakammena, dutiye attasambhave.
તાવતિંસે પમોદેન્તો, સીલાચારગુણે રતો;
Tāvatiṃse pamodento, sīlācāraguṇe rato;
અલગ્ગો પઞ્ચકામેસુ, પત્વાન પઠમં ફલં.
Alaggo pañcakāmesu, patvāna paṭhamaṃ phalaṃ.
અન્તિમે અત્તભાવમ્હિ, મેત્તેય્યં મુનિપુઙ્ગવં;
Antime attabhāvamhi, metteyyaṃ munipuṅgavaṃ;
લોકગ્ગપુગ્ગલં નાથં, સબ્બસત્તહિતે રતં.
Lokaggapuggalaṃ nāthaṃ, sabbasattahite rataṃ.
દિસ્વાન તસ્સ ધીરસ્સ, સુત્વા સદ્ધમ્મદેસનં;
Disvāna tassa dhīrassa, sutvā saddhammadesanaṃ;
અધિગન્ત્વા ફલં અગ્ગં, સોભેય્યં જિનસાસનં.
Adhigantvā phalaṃ aggaṃ, sobheyyaṃ jinasāsanaṃ.
સદા રક્ખન્તુ રાજાનો, ધમ્મેનેવ ઇમં પજં;
Sadā rakkhantu rājāno, dhammeneva imaṃ pajaṃ;
નિરતા પુઞ્ઞકમ્મેસુ, જોતેન્તુ જિનસાસનં.
Niratā puññakammesu, jotentu jinasāsanaṃ.
ઇમે ચ પાણિનો સબ્બે, સબ્બદા નિરુપદ્દવા;
Ime ca pāṇino sabbe, sabbadā nirupaddavā;
નિચ્ચં કલ્યાણસઙ્કપ્પા, પપ્પોન્તુ અમતં પદન્તિ.
Niccaṃ kalyāṇasaṅkappā, pappontu amataṃ padanti.
અઙ્ગુત્તરટીકા સમત્તા.
Aṅguttaraṭīkā samattā.
