| Library / Tipiṭaka / તિપિટક • Tipiṭaka / કઙ્ખાવિતરણી-અભિનવ-ટીકા • Kaṅkhāvitaraṇī-abhinava-ṭīkā |
નિગમનકથાવણ્ણના
Nigamanakathāvaṇṇanā
યં પાતિમોક્ખસ્સ વણ્ણનં આરભિન્તિ સમ્બન્ધો. ‘‘મહાવિહારવાસીન’’ન્તિ ઇદં પુરિમપચ્છિમપદેહિ સદ્ધિં સમ્બન્ધિતબ્બં, મહાવિહારવાસીનં પોરાણટ્ઠકથાહિ વાતિ ચ. પાળિયત્થઞ્ચ કેવલન્તિ સકલં પાળિઅત્થઞ્ચ, ઉભતોવિભઙ્ગઞ્ચાતિ વુત્તં હોતિ. એત્થાતિ એતિસ્સં કઙ્ખાવિતરણિયં. યસ્મા ન હિ અત્થીતિ સમ્બન્ધો. યન્તિ યં પદં. સીહળટ્ઠકથાનયન્તિ સીહળમાતિકટ્ઠકથાનયં. અટ્ઠકથાસારન્તિ સીહળમાતિકટ્ઠકથાયં અત્થસારં, અથ વા વિનયટ્ઠકથાસુ અત્થસારં. તેનેતં દસ્સેતિ – સીહળમાતિકટ્ઠકથાયં અત્થસારં આદાય ઇમં કઙ્ખાવિતરણિં કરોન્તો વિનયટ્ઠકથાસુપિ ઇધ વિનિચ્છયે યોગક્ખમં અત્થસારં આદાયેવ અકાસિન્તિ.
Yaṃ pātimokkhassa vaṇṇanaṃ ārabhinti sambandho. ‘‘Mahāvihāravāsīna’’nti idaṃ purimapacchimapadehi saddhiṃ sambandhitabbaṃ, mahāvihāravāsīnaṃ porāṇaṭṭhakathāhi vāti ca. Pāḷiyatthañca kevalanti sakalaṃ pāḷiatthañca, ubhatovibhaṅgañcāti vuttaṃ hoti. Etthāti etissaṃ kaṅkhāvitaraṇiyaṃ. Yasmā na hi atthīti sambandho. Yanti yaṃ padaṃ. Sīhaḷaṭṭhakathānayanti sīhaḷamātikaṭṭhakathānayaṃ. Aṭṭhakathāsāranti sīhaḷamātikaṭṭhakathāyaṃ atthasāraṃ, atha vā vinayaṭṭhakathāsu atthasāraṃ. Tenetaṃ dasseti – sīhaḷamātikaṭṭhakathāyaṃ atthasāraṃ ādāya imaṃ kaṅkhāvitaraṇiṃ karonto vinayaṭṭhakathāsupi idha vinicchaye yogakkhamaṃ atthasāraṃ ādāyeva akāsinti.
ઇદાનિ સદેવકસ્સ લોકસ્સ અચ્ચન્તસુખાધિગમાય અત્તનો પુઞ્ઞં પરિણામેન્તો ‘‘યથા ચ નિટ્ઠં સમ્પત્તા’’તિઆદિગાથાદ્વયમાહ. કલ્યાણનિસ્સિતાતિ કુસલનિસ્સિતા. સબ્બસત્તાનન્તિ કામાવચરાદિભેદાનં સબ્બેસં સત્તાનં.
Idāni sadevakassa lokassa accantasukhādhigamāya attano puññaṃ pariṇāmento ‘‘yathā ca niṭṭhaṃ sampattā’’tiādigāthādvayamāha. Kalyāṇanissitāti kusalanissitā. Sabbasattānanti kāmāvacarādibhedānaṃ sabbesaṃ sattānaṃ.
નિગમનકથાવણ્ણના નિટ્ઠિતા.
Nigamanakathāvaṇṇanā niṭṭhitā.
