| Library / Tipiṭaka / ತಿಪಿಟಕ • Tipiṭaka / ಕಙ್ಖಾವಿತರಣೀ-ಅಭಿನವ-ಟೀಕಾ • Kaṅkhāvitaraṇī-abhinava-ṭīkā |
ನಿಗಮನಕಥಾವಣ್ಣನಾ
Nigamanakathāvaṇṇanā
ಯಂ ಪಾತಿಮೋಕ್ಖಸ್ಸ ವಣ್ಣನಂ ಆರಭಿನ್ತಿ ಸಮ್ಬನ್ಧೋ। ‘‘ಮಹಾವಿಹಾರವಾಸೀನ’’ನ್ತಿ ಇದಂ ಪುರಿಮಪಚ್ಛಿಮಪದೇಹಿ ಸದ್ಧಿಂ ಸಮ್ಬನ್ಧಿತಬ್ಬಂ, ಮಹಾವಿಹಾರವಾಸೀನಂ ಪೋರಾಣಟ್ಠಕಥಾಹಿ ವಾತಿ ಚ। ಪಾಳಿಯತ್ಥಞ್ಚ ಕೇವಲನ್ತಿ ಸಕಲಂ ಪಾಳಿಅತ್ಥಞ್ಚ, ಉಭತೋವಿಭಙ್ಗಞ್ಚಾತಿ ವುತ್ತಂ ಹೋತಿ। ಏತ್ಥಾತಿ ಏತಿಸ್ಸಂ ಕಙ್ಖಾವಿತರಣಿಯಂ। ಯಸ್ಮಾ ನ ಹಿ ಅತ್ಥೀತಿ ಸಮ್ಬನ್ಧೋ। ಯನ್ತಿ ಯಂ ಪದಂ। ಸೀಹಳಟ್ಠಕಥಾನಯನ್ತಿ ಸೀಹಳಮಾತಿಕಟ್ಠಕಥಾನಯಂ। ಅಟ್ಠಕಥಾಸಾರನ್ತಿ ಸೀಹಳಮಾತಿಕಟ್ಠಕಥಾಯಂ ಅತ್ಥಸಾರಂ, ಅಥ ವಾ ವಿನಯಟ್ಠಕಥಾಸು ಅತ್ಥಸಾರಂ। ತೇನೇತಂ ದಸ್ಸೇತಿ – ಸೀಹಳಮಾತಿಕಟ್ಠಕಥಾಯಂ ಅತ್ಥಸಾರಂ ಆದಾಯ ಇಮಂ ಕಙ್ಖಾವಿತರಣಿಂ ಕರೋನ್ತೋ ವಿನಯಟ್ಠಕಥಾಸುಪಿ ಇಧ ವಿನಿಚ್ಛಯೇ ಯೋಗಕ್ಖಮಂ ಅತ್ಥಸಾರಂ ಆದಾಯೇವ ಅಕಾಸಿನ್ತಿ।
Yaṃ pātimokkhassa vaṇṇanaṃ ārabhinti sambandho. ‘‘Mahāvihāravāsīna’’nti idaṃ purimapacchimapadehi saddhiṃ sambandhitabbaṃ, mahāvihāravāsīnaṃ porāṇaṭṭhakathāhi vāti ca. Pāḷiyatthañca kevalanti sakalaṃ pāḷiatthañca, ubhatovibhaṅgañcāti vuttaṃ hoti. Etthāti etissaṃ kaṅkhāvitaraṇiyaṃ. Yasmā na hi atthīti sambandho. Yanti yaṃ padaṃ. Sīhaḷaṭṭhakathānayanti sīhaḷamātikaṭṭhakathānayaṃ. Aṭṭhakathāsāranti sīhaḷamātikaṭṭhakathāyaṃ atthasāraṃ, atha vā vinayaṭṭhakathāsu atthasāraṃ. Tenetaṃ dasseti – sīhaḷamātikaṭṭhakathāyaṃ atthasāraṃ ādāya imaṃ kaṅkhāvitaraṇiṃ karonto vinayaṭṭhakathāsupi idha vinicchaye yogakkhamaṃ atthasāraṃ ādāyeva akāsinti.
ಇದಾನಿ ಸದೇವಕಸ್ಸ ಲೋಕಸ್ಸ ಅಚ್ಚನ್ತಸುಖಾಧಿಗಮಾಯ ಅತ್ತನೋ ಪುಞ್ಞಂ ಪರಿಣಾಮೇನ್ತೋ ‘‘ಯಥಾ ಚ ನಿಟ್ಠಂ ಸಮ್ಪತ್ತಾ’’ತಿಆದಿಗಾಥಾದ್ವಯಮಾಹ। ಕಲ್ಯಾಣನಿಸ್ಸಿತಾತಿ ಕುಸಲನಿಸ್ಸಿತಾ। ಸಬ್ಬಸತ್ತಾನನ್ತಿ ಕಾಮಾವಚರಾದಿಭೇದಾನಂ ಸಬ್ಬೇಸಂ ಸತ್ತಾನಂ।
Idāni sadevakassa lokassa accantasukhādhigamāya attano puññaṃ pariṇāmento ‘‘yathā ca niṭṭhaṃ sampattā’’tiādigāthādvayamāha. Kalyāṇanissitāti kusalanissitā. Sabbasattānanti kāmāvacarādibhedānaṃ sabbesaṃ sattānaṃ.
ನಿಗಮನಕಥಾವಣ್ಣನಾ ನಿಟ್ಠಿತಾ।
Nigamanakathāvaṇṇanā niṭṭhitā.
