| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
ནིགམནཀཐཱཝཎྞནཱ
Nigamanakathāvaṇṇanā
སཀལརཱུཔཱརཱུཔསམྨསནེ སཎྷསུཁུམཝིསཡཉཱཎཏཱཡ ཝིཔསྶནཱཙཱརནིཔུཎབུདྡྷཱིནཾ སུསཾཡཏཀཱཡཝཙཱིསམཱཙཱརཏཱཡ སམཐཝིཔསྶནཱསུ སམྨདེཝ ཡཏནཏོ ཙ ཡཏཱིནཾ བྷིཀྑཱུནཾ ཁནྡྷཱཡཏནདྷཱཏུསཙྩིནྡྲིཡཔཊིཙྩསམུཔྤཱདབྷེདེ པརམཏྠདྷམྨེ ནཱནཱནཡེཧི ཉཱཎཝིབྷཱགསྶ སནྣིསྶཡེན བཧུཀཱརསྶ སཾཡུཏྟཱགམཝརསྶ ཨཏྠསཾཝཎྞནཾ ཀཱཏུཾ སཱརཏྠཔྤཀཱསནཏོ ཨེཝ ནིཔུཎཱ ཡཱ མཡཱ ཨཊྛཀཐཱ ཨཱརདྡྷཱཏི སམྦནྡྷོ། སཝིསེསཾ པཉྙཱཝཧགུཎཏྟཱ ཨེཝ ཧིསྶ གནྠཱརམྦྷེ ཨཱདིཏོཔི ‘‘པཉྙཱཔབྷེདཛནནསྶཱ’’ཏི ཝུཏྟཾ། མཧཱཨཊྛཀཐཱཡ སཱརནྟི སཾཡུཏྟམཧཱཨཊྛཀཐཱཡ སཱརཾ། ཨེཀཱུནསཊྛིམཏྟོཏི ཐོཀཾ ཨཱུནབྷཱཝཏོ མཏྟ-སདྡགྒཧཎཾ།
Sakalarūpārūpasammasane saṇhasukhumavisayañāṇatāya vipassanācāranipuṇabuddhīnaṃ susaṃyatakāyavacīsamācāratāya samathavipassanāsu sammadeva yatanato ca yatīnaṃ bhikkhūnaṃ khandhāyatanadhātusaccindriyapaṭiccasamuppādabhede paramatthadhamme nānānayehi ñāṇavibhāgassa sannissayena bahukārassa saṃyuttāgamavarassa atthasaṃvaṇṇanaṃ kātuṃ sāratthappakāsanato eva nipuṇā yā mayā aṭṭhakathā āraddhāti sambandho. Savisesaṃ paññāvahaguṇattā eva hissa ganthārambhe āditopi ‘‘paññāpabhedajananassā’’ti vuttaṃ. Mahāaṭṭhakathāya sāranti saṃyuttamahāaṭṭhakathāya sāraṃ. Ekūnasaṭṭhimattoti thokaṃ ūnabhāvato matta-saddaggahaṇaṃ.
མཱུལཊྛཀཐཱཡ སཱརནྟི པུབྦེ ཝུཏྟསཾཡུཏྟམཧཱཨཊྛཀཐཱཡ སཱརམེཝ པུན ནིགམནཝསེན ཝུཏྟནྟི། ཨཐ ཝཱ མཱུལཊྛཀཐཱཡ སཱརནྟི པོརཱཎཊྛཀཐཱསུ ཨཏྠསཱརཾ། ཏེན ཨེཏཾ དསྶེཏི ‘‘སཾཡུཏྟམཧཱཨཊྛཀཐཱཡ ཨཏྠསཱརཾ ཨཱདཱཡ ཨིམཾ སཱརཏྠཔྤཀཱསིནིཾ ཀརོནྟེན སེསམཧཱནིཀཱཡཱནམྤི མཱུལཊྛཀཐཱསུ ཨིདྷ ཝིཡོགཀྑམཾ ཨཏྠསཱརཾ ཨཱདཱཡ ཨཀཱསི’’ནྟི། ‘‘མཧཱཝིཧཱརཱདྷིཝཱསཱིན’’ནྟི ཙ ཨིདཾ པུརིམཔཙྪིམཔདེཧི སདྡྷིཾ སམྦནྡྷིཏབྦཾ ‘‘མཧཱཝིཧཱརཱདྷིཝཱསཱིནཾ སམཡཾ པཀཱསཡནྟིཾ མཧཱཝིཧཱརཱདྷིཝཱསཱིནཾ མཱུལཊྛཀཐཱཡ སཱརཾ ཨཱདཱཡཱ’’ཏི ཙ། ཏེན པུཉྙེན། ཧོཏུ སབྦོ སུཁཱི ལོཀོཏི ཀཱམཱཝཙརཱདིཝིབྷཱགོ སབྦོ སཏྟལོཀོ ཡཐཱརཧཾ བོདྷིཏྟཡཱདྷིགམཝསེན སམྤཡུཏྟེན ནིབྦཱནསུཁེན སུཁིཏོ ཧོཏཱུཏི སདེཝཀསྶ ལོཀསྶ ཨཙྩནྟཾ སུཁཱདྷིགམཱཡ ཨཏྟནོ པུཉྙཾ པརིཎཱམེཏི།
Mūlaṭṭhakathāya sāranti pubbe vuttasaṃyuttamahāaṭṭhakathāya sārameva puna nigamanavasena vuttanti. Atha vā mūlaṭṭhakathāya sāranti porāṇaṭṭhakathāsu atthasāraṃ. Tena etaṃ dasseti ‘‘saṃyuttamahāaṭṭhakathāya atthasāraṃ ādāya imaṃ sāratthappakāsiniṃ karontena sesamahānikāyānampi mūlaṭṭhakathāsu idha viyogakkhamaṃ atthasāraṃ ādāya akāsi’’nti. ‘‘Mahāvihārādhivāsīna’’nti ca idaṃ purimapacchimapadehi saddhiṃ sambandhitabbaṃ ‘‘mahāvihārādhivāsīnaṃ samayaṃ pakāsayantiṃ mahāvihārādhivāsīnaṃ mūlaṭṭhakathāya sāraṃ ādāyā’’ti ca. Tena puññena. Hotu sabbo sukhī lokoti kāmāvacarādivibhāgo sabbo sattaloko yathārahaṃ bodhittayādhigamavasena sampayuttena nibbānasukhena sukhito hotūti sadevakassa lokassa accantaṃ sukhādhigamāya attano puññaṃ pariṇāmeti.
ཨེཏྟཱཝཏཱ སཱརཏྠཔྤཀཱསིནིཡཱ
Ettāvatā sāratthappakāsiniyā
སཾཡུཏྟནིཀཱཡ-ཨཊྛཀཐཱཡ ལཱིནཏྠཔྤཀཱསནཱ ནིཊྛིཏཱ།
Saṃyuttanikāya-aṭṭhakathāya līnatthappakāsanā niṭṭhitā.
སཾཡུཏྟཊཱིཀཱ སམཏྟཱ།
Saṃyuttaṭīkā samattā.
