| Library / Tipiṭaka / તિપિટક • Tipiṭaka / મિલિન્દપઞ્હપાળિ • Milindapañhapāḷi |
નિગમનં
Nigamanaṃ
ઇતિ છસુ કણ્ડેસુ બાવીસતિવગ્ગપતિમણ્ડિતેસુ દ્વાસટ્ઠિઅધિકા દ્વેસતા ઇમસ્મિં પોત્થકે આગતા મિલિન્દપઞ્હા સમત્તા, અનાગતા ચ પન દ્વાચત્તાલીસા હોન્તિ, આગતા ચ અનાગતા ચ સબ્બા સમોધાનેત્વા ચતૂહિ અધિકા તિસતપઞ્હા હોન્તિ, સબ્બાવ મિલિન્દપઞ્હાતિ સઙ્ખં ગચ્છન્તિ.
Iti chasu kaṇḍesu bāvīsativaggapatimaṇḍitesu dvāsaṭṭhiadhikā dvesatā imasmiṃ potthake āgatā milindapañhā samattā, anāgatā ca pana dvācattālīsā honti, āgatā ca anāgatā ca sabbā samodhānetvā catūhi adhikā tisatapañhā honti, sabbāva milindapañhāti saṅkhaṃ gacchanti.
રઞ્ઞો ચ થેરસ્સ ચ પુચ્છાવિસજ્જનાવસાને ચતુરાસીતિસતસહસ્સયોજનબહલા ઉદકપરિયન્તં કત્વા અયં મહાપથવી છધા કમ્પિત્થ, વિજ્જુલ્લતા નિચ્છરિંસુ, દેવતા દિબ્બપુપ્ફવસ્સં પવસ્સિંસુ, મહાબ્રહ્મા સાધુકારમદાસિ, મહાસમુદ્દકુચ્છિયં મેઘત્થનિતનિગ્ઘોસો વિય મહાઘોસો અહોસિ, ઇતિ સો મિલિન્દો રાજા ચ ઓરોધગણા ચ સિરસા અઞ્જલિં પણામેત્વા વન્દિંસુ.
Rañño ca therassa ca pucchāvisajjanāvasāne caturāsītisatasahassayojanabahalā udakapariyantaṃ katvā ayaṃ mahāpathavī chadhā kampittha, vijjullatā nicchariṃsu, devatā dibbapupphavassaṃ pavassiṃsu, mahābrahmā sādhukāramadāsi, mahāsamuddakucchiyaṃ meghatthanitanigghoso viya mahāghoso ahosi, iti so milindo rājā ca orodhagaṇā ca sirasā añjaliṃ paṇāmetvā vandiṃsu.
મિલિન્દો રાજા અતિવિય પમુદિતહદયો સુમથિતમાનહદયો બુદ્ધસાસને સારમતિનો રતનત્તયે સુનિક્કઙ્ખો નિગ્ગુમ્બો નિત્થદ્ધો હુત્વા થેરસ્સ ગુણેસુ પબ્બજ્જાસુ પટિપદાઇરિયાપથેસુ ચ અતિવિય પસન્નો વિસ્સત્થો નિરાલયો નિહતમાનત્થમ્ભો ઉદ્ધટદાઠો વિય ભુજગિન્દો એવમાહ ‘‘સાધુ, ભન્તે નાગસેન, બુદ્ધવિસયો પઞ્હો તયા વિસજ્જિતો, ઇમસ્મિં બુદ્ધસાસને ઠપેત્વા ધમ્મસેનાપતિં સારિપુત્તત્થેરં અઞ્ઞો તયા સદિસો પઞ્હવિસજ્જને નત્થિ, ખમથ, ભન્તે નાગસેન, મમ અચ્ચયં, ઉપાસકં મં, ભન્તે નાગસેન, ધારેથ અજ્જતગ્ગે પાણુપેતં સરણં ગત’’ન્તિ.
Milindo rājā ativiya pamuditahadayo sumathitamānahadayo buddhasāsane sāramatino ratanattaye sunikkaṅkho niggumbo nitthaddho hutvā therassa guṇesu pabbajjāsu paṭipadāiriyāpathesu ca ativiya pasanno vissattho nirālayo nihatamānatthambho uddhaṭadāṭho viya bhujagindo evamāha ‘‘sādhu, bhante nāgasena, buddhavisayo pañho tayā visajjito, imasmiṃ buddhasāsane ṭhapetvā dhammasenāpatiṃ sāriputtattheraṃ añño tayā sadiso pañhavisajjane natthi, khamatha, bhante nāgasena, mama accayaṃ, upāsakaṃ maṃ, bhante nāgasena, dhāretha ajjatagge pāṇupetaṃ saraṇaṃ gata’’nti.
તદા રાજા સહ બલકાયેહિ નાગસેનત્થેરં પયિરુપાસિત્વા મિલિન્દં નામ વિહારં કારેત્વા થેરસ્સ નિય્યાતેત્વા ચતૂહિ પચ્ચયેહિ નાગસેનં કોટિસતેહિ ભિક્ખૂહિ સદ્ધિં પરિચરિ, પુનપિ થેરસ્સ પઞ્ઞાય પસીદિત્વા પુત્તસ્સ રજ્જં નિય્યાતેત્વા અગારસ્મા અનગારિયં પબ્બજિત્વા વિપસ્સનં વડ્ઢેત્વા અરહત્તં પાપુણિ, તેન વુત્તં –
Tadā rājā saha balakāyehi nāgasenattheraṃ payirupāsitvā milindaṃ nāma vihāraṃ kāretvā therassa niyyātetvā catūhi paccayehi nāgasenaṃ koṭisatehi bhikkhūhi saddhiṃ paricari, punapi therassa paññāya pasīditvā puttassa rajjaṃ niyyātetvā agārasmā anagāriyaṃ pabbajitvā vipassanaṃ vaḍḍhetvā arahattaṃ pāpuṇi, tena vuttaṃ –
‘‘પઞ્ઞા પસત્થા લોકસ્મિં, કતા સદ્ધમ્મટ્ઠિતિયા;
‘‘Paññā pasatthā lokasmiṃ, katā saddhammaṭṭhitiyā;
પઞ્ઞાય વિમતિં હન્ત્વા, સન્તિં પપ્પોન્તિ પણ્ડિતા.
Paññāya vimatiṃ hantvā, santiṃ papponti paṇḍitā.
યસ્મિં ખન્ધે ઠિતા પઞ્ઞા, સતિ તત્થ અનૂનકા;
Yasmiṃ khandhe ṭhitā paññā, sati tattha anūnakā;
લઙ્કાયં દોણિનગરે, વસતા દોણિનામિના;
Laṅkāyaṃ doṇinagare, vasatā doṇināminā;
મહાથેરેન લેખિત્વા, સુટ્ઠપિતં યથાસુતં;
Mahātherena lekhitvā, suṭṭhapitaṃ yathāsutaṃ;
મિલિન્દરાજપઞ્હો ચ, નાગસેનવિસજ્જનં;
Milindarājapañho ca, nāgasenavisajjanaṃ;
મિલિન્દો હિ મહાપઞ્ઞો, નાગસેનો સુપણ્ડિતો;
Milindo hi mahāpañño, nāgaseno supaṇḍito;
ઇમિના પુઞ્ઞકમ્મેન, ઇતો ગચ્છામિ તુસ્સિતં;
Iminā puññakammena, ito gacchāmi tussitaṃ;
મેત્તેય્યંનાગતે પસ્સે, સુણેય્યં ધમ્મમુત્તમન્તિ.
Metteyyaṃnāgate passe, suṇeyyaṃ dhammamuttamanti.
મિલિન્દપઞ્હો નિટ્ઠિતો.
Milindapañho niṭṭhito.
Footnotes:
