| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೮. ನಿಗಣ್ಠನಾಟಪುತ್ತಸುತ್ತವಣ್ಣನಾ
8. Nigaṇṭhanāṭaputtasuttavaṇṇanā
೩೫೦. ಆಗತಾಗಮೋತಿ ವಾಚುಗ್ಗತಪರಿಯತ್ತಿಧಮ್ಮೋ। ವಿಞ್ಞಾತಸಾಸನೋತಿ ಪಟಿವಿದ್ಧಸತ್ಥುಸಾಸನೋ। ತೇನಾಹ ‘‘ಅನಾಗಾಮೀ’’ತಿಆದಿ। ನಗ್ಗಭೋಗ್ಗನ್ತಿ ಅವಸನಭಾವೇನ ನಗ್ಗಂ, ಕುಟಿಲಜ್ಝಾಸಯತಾಯ ಭೋಗ್ಗಂ, ತತೋ ಏವ ನಿಸ್ಸಿರಿಕಂ। ನಗ್ಗತಾಯ ಹಿ ಸೋ ರೂಪೇನ ನಿಸ್ಸಿರಿಕೋ, ಭೋಗ್ಗತಾಯ ಚಿತ್ತೇನ। ಭಗವತೋ ಸದ್ಧಾಯಾತಿ ಭಗವತಿ ಸದ್ಧಾಯ। ತಸ್ಮಿಂ ಸದ್ದಹನಾ ಓಕಪ್ಪನಾ ತಸ್ಸ ಸದ್ಧಾತಿಪಿ ವತ್ತಬ್ಬತಂ ಲಭತಿ। ಗಚ್ಛಾಮೀತಿ ಆಗಚ್ಛಾಮಿ, ಬುಜ್ಝಾಮೀತಿ ಅತ್ಥೋ। ಏತಂ ನಿಗಣ್ಠೇನ ಪುಚ್ಛಿತಮತ್ಥಮಾಹ।
350.Āgatāgamoti vācuggatapariyattidhammo. Viññātasāsanoti paṭividdhasatthusāsano. Tenāha ‘‘anāgāmī’’tiādi. Naggabhogganti avasanabhāvena naggaṃ, kuṭilajjhāsayatāya bhoggaṃ, tato eva nissirikaṃ. Naggatāya hi so rūpena nissiriko, bhoggatāya cittena. Bhagavato saddhāyāti bhagavati saddhāya. Tasmiṃ saddahanā okappanā tassa saddhātipi vattabbataṃ labhati. Gacchāmīti āgacchāmi, bujjhāmīti attho. Etaṃ nigaṇṭhena pucchitamatthamāha.
ಕಾಯಂ ಉನ್ನಾಮೇತ್ವಾತಿ ಕಾಯಂ ಅಬ್ಭುನ್ನಾಮೇತ್ವಾ। ಕುಚ್ಛಿಂ ನೀಹರಿತ್ವಾತಿ ಪಿಟ್ಠಿಯಾ ನಿನ್ನಮನೇನ ಕುಚ್ಛಿಂ ಪುರತೋ ನೀಹರಿತ್ವಾ। ಗೀವಂ ಪಸಾರಣವಸೇನ ಪಗ್ಗಯ್ಹ ಪಗ್ಗಹೇತ್ವಾ ಸಬ್ಬಂ ದಿಸಂ ಪೇಕ್ಖಮಾನೋ। ಸಬ್ಬಮಿದಂ ನಿಗಣ್ಠಸ್ಸ ಪಹಟ್ಠಾಕಾರದಸ್ಸನತ್ಥಂ ‘‘ಇದಾನಿ ಸಮಣಸ್ಸ ಗೋತಮಸ್ಸ ಉಪರಿ ವಾದಂ ಆರೋಪೇತುಂ ಲಬ್ಭತೀ’’ತಿ। ತೇನಾಹ ‘‘ವಾತಂ ವಾ ಸೋ’’ತಿಆದಿ। ಸಕಾರಣಾತಿ ಯುತ್ತಿಸಹಿತಾ। ಪಞ್ಹಮಗ್ಗೋತಿ ಪಞ್ಹಸಙ್ಖಾತೋ ವೀಮಂಸಾ, ಏವಂ ಭವಿತಬ್ಬನ್ತಿ ಚಿತ್ತೇನೇವ ಪರಿವೀಮಂಸಾ ಪಞ್ಹಾ। ಏಕೋ ಉದ್ದೇಸೋತಿ ಏಕಂ ಉದ್ದಿಸನಂ ಅತ್ಥಸ್ಸ ಸಂಖಿತ್ತವಚನಂ। ವೇಯ್ಯಾಕರಣನ್ತಿ ನಿದ್ದಿಸನಂ ಅತ್ಥಸ್ಸ ವಿಚಾರೇತ್ವಾ ಕಥನಂ। ಏವನ್ತಿ ಇಮಿನಾ ನಯೇನ। ಸಬ್ಬತ್ಥಾತಿ ಸಬ್ಬೇಸು ಪಞ್ಹುದ್ದೇಸವೇಯ್ಯಾಕರಣೇಸು ಅತ್ಥೋ ವಿತ್ಥಾರತೋ ವೇದಿತಬ್ಬೋ।
Kāyaṃunnāmetvāti kāyaṃ abbhunnāmetvā. Kucchiṃ nīharitvāti piṭṭhiyā ninnamanena kucchiṃ purato nīharitvā. Gīvaṃ pasāraṇavasena paggayha paggahetvā sabbaṃ disaṃ pekkhamāno. Sabbamidaṃ nigaṇṭhassa pahaṭṭhākāradassanatthaṃ ‘‘idāni samaṇassa gotamassa upari vādaṃ āropetuṃ labbhatī’’ti. Tenāha ‘‘vātaṃ vā so’’tiādi. Sakāraṇāti yuttisahitā. Pañhamaggoti pañhasaṅkhāto vīmaṃsā, evaṃ bhavitabbanti citteneva parivīmaṃsā pañhā. Eko uddesoti ekaṃ uddisanaṃ atthassa saṃkhittavacanaṃ. Veyyākaraṇanti niddisanaṃ atthassa vicāretvā kathanaṃ. Evanti iminā nayena. Sabbatthāti sabbesu pañhuddesaveyyākaraṇesu attho vitthārato veditabbo.
ನಿಗಣ್ಠನಾಟಪುತ್ತಸುತ್ತವಣ್ಣನಾ ನಿಟ್ಠಿತಾ।
Nigaṇṭhanāṭaputtasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೮. ನಿಗಣ್ಠನಾಟಪುತ್ತಸುತ್ತಂ • 8. Nigaṇṭhanāṭaputtasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೮. ನಿಗಣ್ಠನಾಟಪುತ್ತಸುತ್ತವಣ್ಣನಾ • 8. Nigaṇṭhanāṭaputtasuttavaṇṇanā
