| Library / Tipiṭaka / તિપિટક • Tipiṭaka / અઙ્ગુત્તરનિકાય (ટીકા) • Aṅguttaranikāya (ṭīkā) |
૪. નિગણ્ઠસુત્તવણ્ણના
4. Nigaṇṭhasuttavaṇṇanā
૭૫. ચતુત્થે હંસવટ્ટકચ્છન્નેનાતિ હંસવટ્ટકપરિચ્છન્નેન, હંસમણ્ડલાકારેનાતિ અત્થો. નત્થિ એતસ્સ પરિસેસન્તિ અપરિસેસં. તેનાહ ‘‘અપ્પમત્તકમ્પિ અસેસેત્વા’’તિ. અપરિસેસધમ્મજાનનતો વા અપરિસેસસઙ્ખાતં ઞાણદસ્સનં પટિજાનાતીતિ એવમ્પેત્થ અત્થો દટ્ઠબ્બો. સતતન્તિ નિચ્ચં. સમિતન્તિ તસ્સેવ વેવચનન્તિ આહ ‘‘સતતં સમિતન્તિ સબ્બકાલં નિરન્તર’’ન્તિ. અથ વા નિચ્ચટ્ઠેન સતત-સદ્દેન અભિણ્હપ્પવત્તિ જોતિતા સિયાતિ ‘‘સમિત’’ન્તિ વુત્તં. તેન નિરન્તરપ્પવત્તિં દસ્સેતીતિ આહ ‘‘સબ્બકાલં નિરન્તર’’ન્તિ.
75. Catutthe haṃsavaṭṭakacchannenāti haṃsavaṭṭakaparicchannena, haṃsamaṇḍalākārenāti attho. Natthi etassa parisesanti aparisesaṃ. Tenāha ‘‘appamattakampi asesetvā’’ti. Aparisesadhammajānanato vā aparisesasaṅkhātaṃ ñāṇadassanaṃ paṭijānātīti evampettha attho daṭṭhabbo. Satatanti niccaṃ. Samitanti tasseva vevacananti āha ‘‘satataṃ samitanti sabbakālaṃ nirantara’’nti. Atha vā niccaṭṭhena satata-saddena abhiṇhappavatti jotitā siyāti ‘‘samita’’nti vuttaṃ. Tena nirantarappavattiṃ dassetīti āha ‘‘sabbakālaṃ nirantara’’nti.
વિસુદ્ધિસમ્પાપનત્થાયાતિ રાગાદીહિ મલેહિ અભિજ્ઝાવિસમલોભાદીહિ ચ ઉપક્કિલિટ્ઠચિત્તાનં સત્તાનં વિસુદ્ધિપાપનત્થાય. સમતિક્કમનત્થાયાતિ સોકસ્સ ચ પરિદેવસ્સ ચ પહાનત્થાય. અત્થં ગમનત્થાયાતિ કાયિકદુક્ખસ્સ ચ ચેતસિકદોમનસ્સસ્સ ચાતિ ઇમેસં દ્વિન્નં અત્થઙ્ગમનાય, નિરોધાયાતિ અત્થો. ઞાયતિ નિચ્છયેન કમતિ નિબ્બાનં. તં વા ઞાયતિ પટિવિજ્ઝતિ એતેનાતિ ઞાયો, અરિયમગ્ગોતિ આહ ‘‘મગ્ગસ્સ અધિગમનત્થાયા’’તિ. અપચ્ચયનિબ્બાનસ્સ સચ્છિકરણત્થાયાતિ પચ્ચયરહિતત્તા અપચ્ચયસ્સ અસઙ્ખતસ્સ તણ્હાવાનવિરહિતત્તા નિબ્બાનન્તિ લદ્ધનામસ્સ અમતસ્સ સચ્છિકિરિયાય, અત્તપચ્ચક્ખતાયાતિ વુત્તં હોતિ. ફુસિત્વા ફુસિત્વાતિ પત્વા પત્વા. સેસમેત્થ સુવિઞ્ઞેય્યમેવ.
Visuddhisampāpanatthāyāti rāgādīhi malehi abhijjhāvisamalobhādīhi ca upakkiliṭṭhacittānaṃ sattānaṃ visuddhipāpanatthāya. Samatikkamanatthāyāti sokassa ca paridevassa ca pahānatthāya. Atthaṃ gamanatthāyāti kāyikadukkhassa ca cetasikadomanassassa cāti imesaṃ dvinnaṃ atthaṅgamanāya, nirodhāyāti attho. Ñāyati nicchayena kamati nibbānaṃ. Taṃ vā ñāyati paṭivijjhati etenāti ñāyo, ariyamaggoti āha ‘‘maggassa adhigamanatthāyā’’ti. Apaccayanibbānassa sacchikaraṇatthāyāti paccayarahitattā apaccayassa asaṅkhatassa taṇhāvānavirahitattā nibbānanti laddhanāmassa amatassa sacchikiriyāya, attapaccakkhatāyāti vuttaṃ hoti. Phusitvā phusitvāti patvā patvā. Sesamettha suviññeyyameva.
નિગણ્ઠસુત્તવણ્ણના નિટ્ઠિતા.
Nigaṇṭhasuttavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / ૪. નિગણ્ઠસુત્તં • 4. Nigaṇṭhasuttaṃ
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / ૪. નિગણ્ઠસુત્તવણ્ણના • 4. Nigaṇṭhasuttavaṇṇanā
