| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) |
੪. ਨਿਗਣ੍ਠਸੁਤ੍ਤવਣ੍ਣਨਾ
4. Nigaṇṭhasuttavaṇṇanā
੭੫. ਚਤੁਤ੍ਥੇ ਹਂਸવਟ੍ਟਕਚ੍ਛਨ੍ਨੇਨਾਤਿ ਹਂਸવਟ੍ਟਕਪਰਿਚ੍ਛਨ੍ਨੇਨ, ਹਂਸਮਣ੍ਡਲਾਕਾਰੇਨਾਤਿ ਅਤ੍ਥੋ। ਨਤ੍ਥਿ ਏਤਸ੍ਸ ਪਰਿਸੇਸਨ੍ਤਿ ਅਪਰਿਸੇਸਂ। ਤੇਨਾਹ ‘‘ਅਪ੍ਪਮਤ੍ਤਕਮ੍ਪਿ ਅਸੇਸੇਤ੍વਾ’’ਤਿ। ਅਪਰਿਸੇਸਧਮ੍ਮਜਾਨਨਤੋ વਾ ਅਪਰਿਸੇਸਸਙ੍ਖਾਤਂ ਞਾਣਦਸ੍ਸਨਂ ਪਟਿਜਾਨਾਤੀਤਿ ਏવਮ੍ਪੇਤ੍ਥ ਅਤ੍ਥੋ ਦਟ੍ਠਬ੍ਬੋ। ਸਤਤਨ੍ਤਿ ਨਿਚ੍ਚਂ। ਸਮਿਤਨ੍ਤਿ ਤਸ੍ਸੇવ વੇવਚਨਨ੍ਤਿ ਆਹ ‘‘ਸਤਤਂ ਸਮਿਤਨ੍ਤਿ ਸਬ੍ਬਕਾਲਂ ਨਿਰਨ੍ਤਰ’’ਨ੍ਤਿ। ਅਥ વਾ ਨਿਚ੍ਚਟ੍ਠੇਨ ਸਤਤ-ਸਦ੍ਦੇਨ ਅਭਿਣ੍ਹਪ੍ਪવਤ੍ਤਿ ਜੋਤਿਤਾ ਸਿਯਾਤਿ ‘‘ਸਮਿਤ’’ਨ੍ਤਿ વੁਤ੍ਤਂ। ਤੇਨ ਨਿਰਨ੍ਤਰਪ੍ਪવਤ੍ਤਿਂ ਦਸ੍ਸੇਤੀਤਿ ਆਹ ‘‘ਸਬ੍ਬਕਾਲਂ ਨਿਰਨ੍ਤਰ’’ਨ੍ਤਿ।
75. Catutthe haṃsavaṭṭakacchannenāti haṃsavaṭṭakaparicchannena, haṃsamaṇḍalākārenāti attho. Natthi etassa parisesanti aparisesaṃ. Tenāha ‘‘appamattakampi asesetvā’’ti. Aparisesadhammajānanato vā aparisesasaṅkhātaṃ ñāṇadassanaṃ paṭijānātīti evampettha attho daṭṭhabbo. Satatanti niccaṃ. Samitanti tasseva vevacananti āha ‘‘satataṃ samitanti sabbakālaṃ nirantara’’nti. Atha vā niccaṭṭhena satata-saddena abhiṇhappavatti jotitā siyāti ‘‘samita’’nti vuttaṃ. Tena nirantarappavattiṃ dassetīti āha ‘‘sabbakālaṃ nirantara’’nti.
વਿਸੁਦ੍ਧਿਸਮ੍ਪਾਪਨਤ੍ਥਾਯਾਤਿ ਰਾਗਾਦੀਹਿ ਮਲੇਹਿ ਅਭਿਜ੍ਝਾવਿਸਮਲੋਭਾਦੀਹਿ ਚ ਉਪਕ੍ਕਿਲਿਟ੍ਠਚਿਤ੍ਤਾਨਂ ਸਤ੍ਤਾਨਂ વਿਸੁਦ੍ਧਿਪਾਪਨਤ੍ਥਾਯ। ਸਮਤਿਕ੍ਕਮਨਤ੍ਥਾਯਾਤਿ ਸੋਕਸ੍ਸ ਚ ਪਰਿਦੇવਸ੍ਸ ਚ ਪਹਾਨਤ੍ਥਾਯ। ਅਤ੍ਥਂ ਗਮਨਤ੍ਥਾਯਾਤਿ ਕਾਯਿਕਦੁਕ੍ਖਸ੍ਸ ਚ ਚੇਤਸਿਕਦੋਮਨਸ੍ਸਸ੍ਸ ਚਾਤਿ ਇਮੇਸਂ ਦ੍વਿਨ੍ਨਂ ਅਤ੍ਥਙ੍ਗਮਨਾਯ, ਨਿਰੋਧਾਯਾਤਿ ਅਤ੍ਥੋ। ਞਾਯਤਿ ਨਿਚ੍ਛਯੇਨ ਕਮਤਿ ਨਿਬ੍ਬਾਨਂ। ਤਂ વਾ ਞਾਯਤਿ ਪਟਿવਿਜ੍ਝਤਿ ਏਤੇਨਾਤਿ ਞਾਯੋ, ਅਰਿਯਮਗ੍ਗੋਤਿ ਆਹ ‘‘ਮਗ੍ਗਸ੍ਸ ਅਧਿਗਮਨਤ੍ਥਾਯਾ’’ਤਿ। ਅਪਚ੍ਚਯਨਿਬ੍ਬਾਨਸ੍ਸ ਸਚ੍ਛਿਕਰਣਤ੍ਥਾਯਾਤਿ ਪਚ੍ਚਯਰਹਿਤਤ੍ਤਾ ਅਪਚ੍ਚਯਸ੍ਸ ਅਸਙ੍ਖਤਸ੍ਸ ਤਣ੍ਹਾવਾਨવਿਰਹਿਤਤ੍ਤਾ ਨਿਬ੍ਬਾਨਨ੍ਤਿ ਲਦ੍ਧਨਾਮਸ੍ਸ ਅਮਤਸ੍ਸ ਸਚ੍ਛਿਕਿਰਿਯਾਯ, ਅਤ੍ਤਪਚ੍ਚਕ੍ਖਤਾਯਾਤਿ વੁਤ੍ਤਂ ਹੋਤਿ। ਫੁਸਿਤ੍વਾ ਫੁਸਿਤ੍વਾਤਿ ਪਤ੍વਾ ਪਤ੍વਾ। ਸੇਸਮੇਤ੍ਥ ਸੁવਿਞ੍ਞੇਯ੍ਯਮੇવ।
Visuddhisampāpanatthāyāti rāgādīhi malehi abhijjhāvisamalobhādīhi ca upakkiliṭṭhacittānaṃ sattānaṃ visuddhipāpanatthāya. Samatikkamanatthāyāti sokassa ca paridevassa ca pahānatthāya. Atthaṃ gamanatthāyāti kāyikadukkhassa ca cetasikadomanassassa cāti imesaṃ dvinnaṃ atthaṅgamanāya, nirodhāyāti attho. Ñāyati nicchayena kamati nibbānaṃ. Taṃ vā ñāyati paṭivijjhati etenāti ñāyo, ariyamaggoti āha ‘‘maggassa adhigamanatthāyā’’ti. Apaccayanibbānassa sacchikaraṇatthāyāti paccayarahitattā apaccayassa asaṅkhatassa taṇhāvānavirahitattā nibbānanti laddhanāmassa amatassa sacchikiriyāya, attapaccakkhatāyāti vuttaṃ hoti. Phusitvā phusitvāti patvā patvā. Sesamettha suviññeyyameva.
ਨਿਗਣ੍ਠਸੁਤ੍ਤવਣ੍ਣਨਾ ਨਿਟ੍ਠਿਤਾ।
Nigaṇṭhasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੪. ਨਿਗਣ੍ਠਸੁਤ੍ਤਂ • 4. Nigaṇṭhasuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) / ੪. ਨਿਗਣ੍ਠਸੁਤ੍ਤવਣ੍ਣਨਾ • 4. Nigaṇṭhasuttavaṇṇanā
