| Library / Tipiṭaka / तिपिटक • Tipiṭaka / अपदानपाळि • Apadānapāḷi |
७. निग्गुण्डिपुप्फियत्थेरअपदानं
7. Nigguṇḍipupphiyattheraapadānaṃ
३९.
39.
‘‘यदा देवो देवकाया, चवते आयुसङ्खया।
‘‘Yadā devo devakāyā, cavate āyusaṅkhayā;
तयो सद्दा निच्छरन्ति, देवानं अनुमोदतं॥
Tayo saddā niccharanti, devānaṃ anumodataṃ.
४०.
40.
‘‘‘इतो भो सुगतिं गच्छ, मनुस्सानं सहब्यतं।
‘‘‘Ito bho sugatiṃ gaccha, manussānaṃ sahabyataṃ;
मनुस्सभूतो सद्धम्मे, लभ सद्धं अनुत्तरं॥
Manussabhūto saddhamme, labha saddhaṃ anuttaraṃ.
४१.
41.
‘‘‘सा ते सद्धा निविट्ठास्स, मूलजाता पतिट्ठिता।
‘‘‘Sā te saddhā niviṭṭhāssa, mūlajātā patiṭṭhitā;
यावजीवं असंहीरा, सद्धम्मे सुप्पवेदिते॥
Yāvajīvaṃ asaṃhīrā, saddhamme suppavedite.
४२.
42.
‘‘‘कायेन कुसलं कत्वा, वाचाय कुसलं बहुं।
‘‘‘Kāyena kusalaṃ katvā, vācāya kusalaṃ bahuṃ;
मनसा कुसलं कत्वा, अब्यापज्जं निरूपधिं॥
Manasā kusalaṃ katvā, abyāpajjaṃ nirūpadhiṃ.
४३.
43.
‘‘‘ततो ओपधिकं पुञ्ञं, कत्वा दानेन तं बहुं।
‘‘‘Tato opadhikaṃ puññaṃ, katvā dānena taṃ bahuṃ;
अञ्ञेपि मच्चे सद्धम्मे, ब्रह्मचरिये निवेसय’॥
Aññepi macce saddhamme, brahmacariye nivesaya’.
४४.
44.
‘‘इमाय अनुकम्पाय, देवादेवं यदा विदू।
‘‘Imāya anukampāya, devādevaṃ yadā vidū;
४५.
45.
कंसु नाम अहं योनिं, गमिस्सामि इतो चुतो॥
Kaṃsu nāma ahaṃ yoniṃ, gamissāmi ito cuto.
४६.
46.
‘‘मम संवेगमञ्ञाय, समणो भावितिन्द्रियो।
‘‘Mama saṃvegamaññāya, samaṇo bhāvitindriyo;
ममुद्धरितुकामो सो, आगच्छि मम सन्तिकं॥
Mamuddharitukāmo so, āgacchi mama santikaṃ.
४७.
47.
‘‘सुमनो नाम नामेन, पदुमुत्तरसावको।
‘‘Sumano nāma nāmena, padumuttarasāvako;
अत्थधम्मानुसासित्वा, संवेजेसि ममं तदा॥
Atthadhammānusāsitvā, saṃvejesi mamaṃ tadā.
द्वादसमं भाणवारं।
Dvādasamaṃ bhāṇavāraṃ.
४८.
48.
‘‘तस्साहं वचनं सुत्वा, बुद्धे चित्तं पसादयिं।
‘‘Tassāhaṃ vacanaṃ sutvā, buddhe cittaṃ pasādayiṃ;
तं धीरं अभिवादेत्वा, तत्थ कालंकतो अहं॥
Taṃ dhīraṃ abhivādetvā, tattha kālaṃkato ahaṃ.
४९.
49.
वसन्तो मातुकुच्छिम्हि, पुन धारेति मातुया॥
Vasanto mātukucchimhi, puna dhāreti mātuyā.
५०.
50.
‘‘तम्हा काया चवित्वान, तिदसे उपपज्जहं।
‘‘Tamhā kāyā cavitvāna, tidase upapajjahaṃ;
एत्थन्तरे न पस्सामि, दोमनस्समहं तदा॥
Etthantare na passāmi, domanassamahaṃ tadā.
५१.
51.
‘‘तावतिंसा चवित्वान, मातुकुच्छिं समोक्कमिं।
‘‘Tāvatiṃsā cavitvāna, mātukucchiṃ samokkamiṃ;
निक्खमित्वान कुच्छिम्हा, कण्हसुक्कं अजानहं॥
Nikkhamitvāna kucchimhā, kaṇhasukkaṃ ajānahaṃ.
५२.
52.
गोतमस्स भगवतो, सक्यपुत्तस्स तादिनो॥
Gotamassa bhagavato, sakyaputtassa tādino.
५३.
53.
अद्दसं सासनकरे, भिक्खवो तत्थ सत्थुनो॥
Addasaṃ sāsanakare, bhikkhavo tattha satthuno.
५४.
54.
‘‘सावत्थि नाम नगरं, राजा तत्थासि कोसलो।
‘‘Sāvatthi nāma nagaraṃ, rājā tatthāsi kosalo;
रथेन नागयुत्तेन, उपेसि बोधिमुत्तमं॥
Rathena nāgayuttena, upesi bodhimuttamaṃ.
५५.
55.
‘‘तस्साहं नागं दिस्वान, पुब्बकम्मं अनुस्सरिं।
‘‘Tassāhaṃ nāgaṃ disvāna, pubbakammaṃ anussariṃ;
अञ्जलिं पग्गहेत्वान, समयं अगमासहं॥
Añjaliṃ paggahetvāna, samayaṃ agamāsahaṃ.
५६.
56.
‘‘जातिया सत्तवस्सोव, पब्बजिं अनगारियं।
‘‘Jātiyā sattavassova, pabbajiṃ anagāriyaṃ;
यो सो बुद्धं उपट्ठासि, आनन्दो नाम सावको॥
Yo so buddhaṃ upaṭṭhāsi, ānando nāma sāvako.
५७.
57.
‘‘गतिमा धितिमा चेव, सतिमा च बहुस्सुतो।
‘‘Gatimā dhitimā ceva, satimā ca bahussuto;
रञ्ञो चित्तं पसादेन्तो, निय्यादेसि महाजुति॥
Rañño cittaṃ pasādento, niyyādesi mahājuti.
५८.
58.
‘‘तस्साहं धम्मं सुत्वान, पुब्बकम्मं अनुस्सरिं।
‘‘Tassāhaṃ dhammaṃ sutvāna, pubbakammaṃ anussariṃ;
तत्थेव ठितको सन्तो, अरहत्तमपापुणिं॥
Tattheva ṭhitako santo, arahattamapāpuṇiṃ.
५९.
59.
‘‘एकंसं चीवरं कत्वा, सिरे कत्वान अञ्जलिं।
‘‘Ekaṃsaṃ cīvaraṃ katvā, sire katvāna añjaliṃ;
सम्बुद्धं अभिवादेत्वा, इमं वाचं उदीरयिं॥
Sambuddhaṃ abhivādetvā, imaṃ vācaṃ udīrayiṃ.
६०.
60.
‘‘‘पदुमुत्तरबुद्धस्स, द्विपदिन्दस्स सत्थुनो।
‘‘‘Padumuttarabuddhassa, dvipadindassa satthuno;
निग्गुण्डिपुप्फं पग्गय्ह, सीहासने ठपेसहं॥
Nigguṇḍipupphaṃ paggayha, sīhāsane ṭhapesahaṃ.
६१.
61.
‘‘‘तेन कम्मेन द्विपदिन्द, लोकजेट्ठ नरासभ।
‘‘‘Tena kammena dvipadinda, lokajeṭṭha narāsabha;
पत्तोम्हि अचलं ठानं, हित्वा जयपराजयं’॥
Pattomhi acalaṃ ṭhānaṃ, hitvā jayaparājayaṃ’.
६२.
62.
‘‘पञ्चवीससहस्सम्हि , कप्पानं मनुजाधिपा।
‘‘Pañcavīsasahassamhi , kappānaṃ manujādhipā;
अब्बुदनिरब्बुदानि, अट्ठट्ठासिंसु खत्तिया॥
Abbudanirabbudāni, aṭṭhaṭṭhāsiṃsu khattiyā.
६३.
63.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा निग्गुण्डिपुप्फियो थेरो इमा गाथायो अभासित्थाति।
Itthaṃ sudaṃ āyasmā nigguṇḍipupphiyo thero imā gāthāyo abhāsitthāti.
निग्गुण्डिपुप्फियत्थेरस्सापदानं सत्तमं।
Nigguṇḍipupphiyattherassāpadānaṃ sattamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / १-१०. उमापुप्फियत्थेरअपदानादिवण्णना • 1-10. Umāpupphiyattheraapadānādivaṇṇanā
