| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೩. ನಿಪನ್ನಞ್ಜಲಿಕತ್ಥೇರಅಪದಾನವಣ್ಣನಾ
3. Nipannañjalikattheraapadānavaṇṇanā
ರುಕ್ಖಮೂಲೇ ನಿಸಿನ್ನೋಹನ್ತಿಆದಿಕಂ ಆಯಸ್ಮತೋ ನಿಪನ್ನಞ್ಜಲಿಕತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ಅನೇಕೇಸು ಭವೇಸು ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ತಿಸ್ಸಸ್ಸ ಭಗವತೋ ಕಾಲೇ ಕುಲಗೇಹೇ ನಿಬ್ಬತ್ತೋ ವುದ್ಧಿಪ್ಪತ್ತೋ ಪಬ್ಬಜಿತ್ವಾ ರುಕ್ಖಮೂಲಿಕಙ್ಗಂ ಪೂರಯಮಾನೋ ಅರಞ್ಞೇ ವಿಹರತಿ। ತಸ್ಮಿಂ ಸಮಯೇ ಖರೋ ಆಬಾಧೋ ಉಪ್ಪಜ್ಜಿ, ತೇನ ಪೀಳಿತೋ ಪರಮಕಾರುಞ್ಞಪ್ಪತ್ತೋ ಅಹೋಸಿ। ತದಾ ಭಗವಾ ತಸ್ಸ ಕಾರುಞ್ಞೇನ ತತ್ಥ ಅಗಮಾಸಿ। ಅಥ ಸೋ ನಿಪನ್ನಕೋವ ಉಟ್ಠಿತುಂ ಅಸಕ್ಕೋನ್ತೋ ಸಿರಸಿ ಅಞ್ಜಲಿಂ ಕತ್ವಾ ಭಗವತೋ ಪಣಾಮಂ ಅಕಾಸಿ। ಸೋ ತತೋ ಚುತೋ ತುಸಿತಭವನೇ ಉಪ್ಪನ್ನೋ ತತ್ಥ ಸಮ್ಪತ್ತಿಮನುಭವಿತ್ವಾ ಏವಂ ಛ ಕಾಮಾವಚರಸಮ್ಪತ್ತಿಯೋ ಅನುಭವಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಏಕಸ್ಮಿಂ ಕುಲಗೇಹೇ ನಿಬ್ಬತ್ತೋ ವುದ್ಧಿಪ್ಪತ್ತೋ ಸತ್ಥರಿ ಪಸೀದಿತ್ವಾ ಪಬ್ಬಜಿತೋ ನಚಿರಸ್ಸೇವ ಅರಹಾ ಅಹೋಸಿ, ಪುರಾಕತಪುಞ್ಞವಸೇನ ನಿಪನ್ನಞ್ಜಲಿಕತ್ಥೇರೋತಿ ಪಾಕಟೋ।
Rukkhamūlenisinnohantiādikaṃ āyasmato nipannañjalikattherassa apadānaṃ. Ayampi purimabuddhesu katādhikāro anekesu bhavesu vivaṭṭūpanissayāni puññāni upacinanto tissassa bhagavato kāle kulagehe nibbatto vuddhippatto pabbajitvā rukkhamūlikaṅgaṃ pūrayamāno araññe viharati. Tasmiṃ samaye kharo ābādho uppajji, tena pīḷito paramakāruññappatto ahosi. Tadā bhagavā tassa kāruññena tattha agamāsi. Atha so nipannakova uṭṭhituṃ asakkonto sirasi añjaliṃ katvā bhagavato paṇāmaṃ akāsi. So tato cuto tusitabhavane uppanno tattha sampattimanubhavitvā evaṃ cha kāmāvacarasampattiyo anubhavitvā imasmiṃ buddhuppāde ekasmiṃ kulagehe nibbatto vuddhippatto satthari pasīditvā pabbajito nacirasseva arahā ahosi, purākatapuññavasena nipannañjalikattheroti pākaṭo.
೧೬. ಸೋ ಅಪರಭಾಗೇ ಅತ್ತನೋ ಪುಞ್ಞಸಮ್ಪತ್ತಿಯೋ ಓಲೋಕೇತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ರುಕ್ಖಮೂಲೇ ನಿಸಿನ್ನೋಹನ್ತಿಆದಿಮಾಹ। ತತ್ಥ ರುಹತಿ ಪಟಿರುಹತಿ ಉದ್ಧಮುದ್ಧಂ ಆರೋಹತೀತಿ ರುಕ್ಖೋ, ತಸ್ಸ ರುಕ್ಖಸ್ಸ ಮೂಲೇ ಸಮೀಪೇತಿ ಅತ್ಥೋ। ಬ್ಯಾಧಿತೋ ಪರಮೇನ ಚಾತಿ ಪರಮೇನ ಅಧಿಕೇನ ಖರೇನ ಕಕ್ಖಳೇನ ಬ್ಯಾಧಿನಾ ರೋಗೇನ ಬ್ಯಾಧಿತೋ, ಬ್ಯಾಧಿನಾ ಅಹಂ ಸಮನ್ನಾಗತೋತಿ ಅತ್ಥೋ। ಪರಮಕಾರುಞ್ಞಪ್ಪತ್ತೋಮ್ಹೀತಿ ಪರಮಂ ಅಧಿಕಂ ಕಾರುಞ್ಞಂ ದೀನಭಾವಂ ದುಕ್ಖಿತಭಾವಂ ಪತ್ತೋಮ್ಹಿ ಅರಞ್ಞೇ ಕಾನನೇತಿ ಸಮ್ಬನ್ಧೋ।
16. So aparabhāge attano puññasampattiyo oloketvā somanassajāto pubbacaritāpadānaṃ pakāsento rukkhamūle nisinnohantiādimāha. Tattha ruhati paṭiruhati uddhamuddhaṃ ārohatīti rukkho, tassa rukkhassa mūle samīpeti attho. Byādhito paramena cāti paramena adhikena kharena kakkhaḷena byādhinā rogena byādhito, byādhinā ahaṃ samannāgatoti attho. Paramakāruññappattomhīti paramaṃ adhikaṃ kāruññaṃ dīnabhāvaṃ dukkhitabhāvaṃ pattomhi araññe kānaneti sambandho.
೨೦. ಪಞ್ಚೇವಾಸುಂ ಮಹಾಸಿಖಾತಿ ಸಿರಸಿ ಪಿಳನ್ಧನತ್ಥೇನ ಸಿಖಾ ವುಚ್ಚತಿ ಚೂಳಾ। ಮಣೀತಿ ಜೋತಮಾನಂ ಮಕುಟಂ ತಸ್ಸ ಅತ್ಥೀತಿ ಸಿಖೋ, ಚಕ್ಕವತ್ತಿನೋ ಏಕನಾಮಕಾ ಪಞ್ಚೇವ ಚಕ್ಕವತ್ತಿನೋ ಆಸುಂ ಅಹೇಸುನ್ತಿ ಅತ್ಥೋ। ಸೇಸಂ ಸಬ್ಬತ್ಥ ಉತ್ತಾನತ್ಥಮೇವಾತಿ।
20.Pañcevāsuṃ mahāsikhāti sirasi piḷandhanatthena sikhā vuccati cūḷā. Maṇīti jotamānaṃ makuṭaṃ tassa atthīti sikho, cakkavattino ekanāmakā pañceva cakkavattino āsuṃ ahesunti attho. Sesaṃ sabbattha uttānatthamevāti.
ನಿಪನ್ನಞ್ಜಲಿಕತ್ಥೇರಅಪದಾನವಣ್ಣನಾ ಸಮತ್ತಾ।
Nipannañjalikattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೩. ನಿಪನ್ನಞ್ಜಲಿಕತ್ಥೇರಅಪದಾನಂ • 3. Nipannañjalikattheraapadānaṃ
