| Library / Tipiṭaka / तिपिटक • Tipiṭaka / धम्मपदपाळि • Dhammapadapāḷi |
२२. निरयवग्गो
22. Nirayavaggo
३०६.
306.
उभोपि ते पेच्च समा भवन्ति, निहीनकम्मा मनुजा परत्थ॥
Ubhopi te pecca samā bhavanti, nihīnakammā manujā parattha.
३०७.
307.
कासावकण्ठा बहवो, पापधम्मा असञ्ञता।
Kāsāvakaṇṭhā bahavo, pāpadhammā asaññatā;
पापा पापेहि कम्मेहि, निरयं ते उपपज्जरे॥
Pāpā pāpehi kammehi, nirayaṃ te upapajjare.
३०८.
308.
सेय्यो अयोगुळो भुत्तो, तत्तो अग्गिसिखूपमो।
Seyyo ayoguḷo bhutto, tatto aggisikhūpamo;
यञ्चे भुञ्जेय्य दुस्सीलो, रट्ठपिण्डमसञ्ञतो॥
Yañce bhuñjeyya dussīlo, raṭṭhapiṇḍamasaññato.
३०९.
309.
चत्तारि ठानानि नरो पमत्तो, आपज्जति परदारूपसेवी।
Cattāri ṭhānāni naro pamatto, āpajjati paradārūpasevī;
अपुञ्ञलाभं न निकामसेय्यं, निन्दं ततीयं निरयं चतुत्थं॥
Apuññalābhaṃ na nikāmaseyyaṃ, nindaṃ tatīyaṃ nirayaṃ catutthaṃ.
३१०.
310.
अपुञ्ञलाभो च गती च पापिका, भीतस्स भीताय रती च थोकिका।
Apuññalābho ca gatī ca pāpikā, bhītassa bhītāya ratī ca thokikā;
राजा च दण्डं गरुकं पणेति, तस्मा नरो परदारं न सेवे॥
Rājā ca daṇḍaṃ garukaṃ paṇeti, tasmā naro paradāraṃ na seve.
३११.
311.
कुसो यथा दुग्गहितो, हत्थमेवानुकन्तति।
Kuso yathā duggahito, hatthamevānukantati;
सामञ्ञं दुप्परामट्ठं, निरयायुपकड्ढति॥
Sāmaññaṃ dupparāmaṭṭhaṃ, nirayāyupakaḍḍhati.
३१२.
312.
यं किञ्चि सिथिलं कम्मं, संकिलिट्ठञ्च यं वतं।
Yaṃ kiñci sithilaṃ kammaṃ, saṃkiliṭṭhañca yaṃ vataṃ;
सङ्कस्सरं ब्रह्मचरियं, न तं होति महप्फलं॥
Saṅkassaraṃ brahmacariyaṃ, na taṃ hoti mahapphalaṃ.
३१३.
313.
सिथिलो हि परिब्बाजो, भिय्यो आकिरते रजं॥
Sithilo hi paribbājo, bhiyyo ākirate rajaṃ.
३१४.
314.
अकतं दुक्कटं सेय्यो, पच्छा तप्पति दुक्कटं।
Akataṃ dukkaṭaṃ seyyo, pacchā tappati dukkaṭaṃ;
कतञ्च सुकतं सेय्यो, यं कत्वा नानुतप्पति॥
Katañca sukataṃ seyyo, yaṃ katvā nānutappati.
३१५.
315.
नगरं यथा पच्चन्तं, गुत्तं सन्तरबाहिरं।
Nagaraṃ yathā paccantaṃ, guttaṃ santarabāhiraṃ;
खणातीता हि सोचन्ति, निरयम्हि समप्पिता॥
Khaṇātītā hi socanti, nirayamhi samappitā.
३१६.
316.
अलज्जिताये लज्जन्ति, लज्जिताये न लज्जरे।
Alajjitāye lajjanti, lajjitāye na lajjare;
मिच्छादिट्ठिसमादाना, सत्ता गच्छन्ति दुग्गतिं॥
Micchādiṭṭhisamādānā, sattā gacchanti duggatiṃ.
३१७.
317.
अभये भयदस्सिनो, भये चाभयदस्सिनो।
Abhaye bhayadassino, bhaye cābhayadassino;
मिच्छादिट्ठिसमादाना, सत्ता गच्छन्ति दुग्गतिं॥
Micchādiṭṭhisamādānā, sattā gacchanti duggatiṃ.
३१८.
318.
अवज्जे वज्जमतिनो, वज्जे चावज्जदस्सिनो।
Avajje vajjamatino, vajje cāvajjadassino;
मिच्छादिट्ठिसमादाना, सत्ता गच्छन्ति दुग्गतिं॥
Micchādiṭṭhisamādānā, sattā gacchanti duggatiṃ.
३१९.
319.
वज्जञ्च वज्जतो ञत्वा, अवज्जञ्च अवज्जतो।
Vajjañca vajjato ñatvā, avajjañca avajjato;
सम्मादिट्ठिसमादाना, सत्ता गच्छन्ति सुग्गतिं॥
Sammādiṭṭhisamādānā, sattā gacchanti suggatiṃ.
निरयवग्गो द्वावीसतिमो निट्ठितो।
Nirayavaggo dvāvīsatimo niṭṭhito.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / धम्मपद-अट्ठकथा • Dhammapada-aṭṭhakathā / २२. निरयवग्गो • 22. Nirayavaggo
