| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
6. நிரோத⁴ஸுத்தவண்ணனா
6. Nirodhasuttavaṇṇanā
166. ச²ட்டே² அத்தே²தங் டா²னந்தி அத்தி² ஏதங் காரணங். நோ சே தி³ட்டே²வ த⁴ம்மே அஞ்ஞங் ஆராதெ⁴ய்யாதி நோ சே இமஸ்மிங்யேவ அத்தபா⁴வே அரஹத்தங் பாபுணெய்ய. கப³ளீகாராஹாரப⁴க்கா²னங் தே³வானந்தி காமாவசரதே³வானங். அஞ்ஞதரங் மனோமயங் காயந்தி ஜா²னமனேன நிப்³ப³த்தங் அஞ்ஞதரங் ஸுத்³தா⁴வாஸப்³ரஹ்மகாயங். உதா³யீதி லாளுதா³யீ. ஸோ ஹி ‘‘மனோமய’’ந்தி ஸுத்வா ‘‘ஆருப்பே ந ப⁴விதப்³ப³’’ந்தி படிபா³ஹி. தே²ரோ ‘‘ஸாரிபுத்தோ கிங் ஜானாதி, யஸ்ஸ ஸம்முகா² ஏவங் பி⁴க்கூ² வசனங் படிக்கோஸந்தீ’’தி ஏவங் பா³லானங் லத்³தி⁴உப்பத்திபடிபா³ஹனத்த²ங் தங் வசனங் அனதி⁴வாஸெத்வா யேன ப⁴க³வா தேனுபஸங்கமி.
166. Chaṭṭhe atthetaṃ ṭhānanti atthi etaṃ kāraṇaṃ. No ce diṭṭheva dhamme aññaṃ ārādheyyāti no ce imasmiṃyeva attabhāve arahattaṃ pāpuṇeyya. Kabaḷīkārāhārabhakkhānaṃ devānanti kāmāvacaradevānaṃ. Aññataraṃ manomayaṃ kāyanti jhānamanena nibbattaṃ aññataraṃ suddhāvāsabrahmakāyaṃ. Udāyīti lāḷudāyī. So hi ‘‘manomaya’’nti sutvā ‘‘āruppe na bhavitabba’’nti paṭibāhi. Thero ‘‘sāriputto kiṃ jānāti, yassa sammukhā evaṃ bhikkhū vacanaṃ paṭikkosantī’’ti evaṃ bālānaṃ laddhiuppattipaṭibāhanatthaṃ taṃ vacanaṃ anadhivāsetvā yena bhagavā tenupasaṅkami.
அத்தி² நாமாதி அமரிஸனத்தே² நிபாதோ. தேனேவ செத்த² ‘‘அஜ்ஜு²பெக்கி²ஸ்ஸதா²’’தி அனாக³தவசனங் கதங். அயஞ்ஹெத்த²த்தோ² – ஆனந்த³, தும்ஹே தே²ரங் பி⁴க்கு²ங் விஹேடி²யமானங் அஜ்ஜு²பெக்க²த², ந வோ ஏதங் மரிஸயாமி ந ஸஹாமி நாதி⁴வாஸேமீதி. கஸ்மா பன ப⁴க³வா ஆனந்த³தே²ரங்யேவ ஏவமாஹாதி? த⁴ம்மப⁴ண்டா³கா³ரிகத்தா. த⁴ம்மப⁴ண்டா³கா³ரிகஸ்ஸ ஹி ஏவங் வத³ந்தோ படிபா³ஹிதுங் பா⁴ரோ. அபிசேஸ ஸாரிபுத்தத்தே²ரஸ்ஸ பியஸஹாயோ, தேனாபிஸ்ஸ ஏஸ பா⁴ரோ. தத்த² கிஞ்சாபி ப⁴க³வா ஆனந்த³த்தே²ரங் க³ரஹந்தோ ஏவமாஹ, ந பனேஸா தஸ்ஸேவ க³ரஹா, ஸம்முகீ²பூ⁴தானங் ஸப்³பே³ஸங்யேவ க³ரஹாதி வேதி³தப்³பா³. விஹாரந்தி க³ந்த⁴குடிங்.
Atthi nāmāti amarisanatthe nipāto. Teneva cettha ‘‘ajjhupekkhissathā’’ti anāgatavacanaṃ kataṃ. Ayañhetthattho – ānanda, tumhe theraṃ bhikkhuṃ viheṭhiyamānaṃ ajjhupekkhatha, na vo etaṃ marisayāmi na sahāmi nādhivāsemīti. Kasmā pana bhagavā ānandatheraṃyeva evamāhāti? Dhammabhaṇḍāgārikattā. Dhammabhaṇḍāgārikassa hi evaṃ vadanto paṭibāhituṃ bhāro. Apicesa sāriputtattherassa piyasahāyo, tenāpissa esa bhāro. Tattha kiñcāpi bhagavā ānandattheraṃ garahanto evamāha, na panesā tasseva garahā, sammukhībhūtānaṃ sabbesaṃyeva garahāti veditabbā. Vihāranti gandhakuṭiṃ.
அனச்ச²ரியந்தி ந அச்ச²ரியங். யதா²தி காரணவசனங். ஆயஸ்மந்தங்யேவெத்த² உபவானங் படிபா⁴ஸெய்யாதி எத்த² ப⁴க³வதா ச ஏவங் ஏததே³வ காரணங் ஆரப்³ப⁴ உதா³ஹடே ஆயஸ்மதோயேவ உபவானஸ்ஸ படிவசனங் படிபா⁴து உபட்டா²தூதி தீ³பேதி. ஸாரஜ்ஜங் ஓக்கந்தந்தி தோ³மனஸ்ஸங் அனுபவிட்ட²ங். ஸீலவாதிஆதீ³ஹி கீ²ணாஸவஸீலாதீ³னியேவ கதி²தானி. க²ண்டி³ச்சேனாதிஆதீ³னி ஸக்காராதீ³னங் காரணபுச்சா²வஸேன வுத்தானி. கிங் க²ண்டி³ச்சாதீ³ஹி காரணேஹி தங் தங் ஸப்³ரஹ்மசாரிங் ஸக்கரெய்யுந்தி அயஞ்ஹெத்த² அதி⁴ப்பாயோ.
Anacchariyanti na acchariyaṃ. Yathāti kāraṇavacanaṃ. Āyasmantaṃyevettha upavānaṃ paṭibhāseyyāti ettha bhagavatā ca evaṃ etadeva kāraṇaṃ ārabbha udāhaṭe āyasmatoyeva upavānassa paṭivacanaṃ paṭibhātu upaṭṭhātūti dīpeti. Sārajjaṃ okkantanti domanassaṃ anupaviṭṭhaṃ. Sīlavātiādīhi khīṇāsavasīlādīniyeva kathitāni. Khaṇḍiccenātiādīni sakkārādīnaṃ kāraṇapucchāvasena vuttāni. Kiṃ khaṇḍiccādīhi kāraṇehi taṃ taṃ sabrahmacāriṃ sakkareyyunti ayañhettha adhippāyo.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. நிரோத⁴ஸுத்தங் • 6. Nirodhasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 6. நிரோத⁴ஸுத்தவண்ணனா • 6. Nirodhasuttavaṇṇanā
