| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
5. நிஸீத³னஸந்த²தஸிக்கா²பத³வண்ணனா
5. Nisīdanasanthatasikkhāpadavaṇṇanā
565. நாஸ்ஸுத⁴ கோசீதி எத்த² அஸ்ஸுத⁴-இதி அவதா⁴ரணத்தே² நிபாதோ. தத்த² கிஞ்சாபி ‘‘ஏவங் ப⁴ந்தேதி கோ² தே பி⁴க்கூ²’’தி ப³ஹுவசனங் வுத்தங், ததா²பி தே பி⁴க்கூ² ப⁴க³வதோ படிஸ்ஸுணித்வா இத⁴ தேஸு பி⁴க்கூ²ஸு கோசி ப⁴க³வந்தங் நாஸ்ஸுத⁴ உபஸங்கமதி அஞ்ஞத்ர ஏகேனாதி அத்தோ² க³ஹேதப்³போ³. தங் ஸுக்³கா³ஹங் ஏகாஹங் ப⁴ந்தே ப⁴க³வந்தங் வரந்திஆதீ³ஸு (மஹாவ॰ 337) விய, அனுஜானாமி…பே॰… யதா²ஸுக²ங் மங் த³ஸ்ஸனாய உபஸங்கமந்தூதி த³ஸ்ஸனத்தா²ய உபஸங்கமந்து.
565.Nāssudha kocīti ettha assudha-iti avadhāraṇatthe nipāto. Tattha kiñcāpi ‘‘evaṃ bhanteti kho te bhikkhū’’ti bahuvacanaṃ vuttaṃ, tathāpi te bhikkhū bhagavato paṭissuṇitvā idha tesu bhikkhūsu koci bhagavantaṃ nāssudha upasaṅkamati aññatra ekenāti attho gahetabbo. Taṃ suggāhaṃ ekāhaṃ bhante bhagavantaṃ varantiādīsu (mahāva. 337) viya, anujānāmi…pe… yathāsukhaṃ maṃ dassanāya upasaṅkamantūti dassanatthāya upasaṅkamantu.
566-7. ‘‘மயங் ஆயஸ்மந்தங் உபஸேன’’ந்தி தஸ்ஸ க³ணபாமொக்க²த்தா வுத்தங். ஆரஞ்ஞிகபிண்ட³பாதிகபங்ஸுகூலிகவஸேன ஸப்³பா³னி வுத்தானி. தேனேவாஹ அட்ட²கதா²யங் ‘‘ஸந்த²தே சதுத்த²சீவரஸஞ்ஞிதாயா’’தி. கிங் ஸப்³பே³பி தே சீவரங் ந பு³ஜ்ஜ²ந்தீதி சே? யதா² ஹோது. கதமங் சீவரங் நாமாதி? ச²ன்னங் அஞ்ஞதரங் விகப்பனுபக³ங் பச்சி²மந்தி. கிஞ்ச வாயிமங் அவாயிமந்தி? வாயிமமேவாதி. கதரஸுத்தேனாதி? அத்³தா⁴ ஸோ ஸுத்தமேவ ந பஸ்ஸதி, ஸிவெய்யகங் து³ஸ்ஸயுக³ங், இத்³தி⁴மயிகஞ்ச தே³வத³த்தியஞ்ச அசீவரங் கரோதி. யதி³ ஏவங் அவாயிமம்பீதி வதா³மீதி. ஏவங் ஸந்தே ஸித்³தா⁴ ஸந்த²தே சீவரஸஞ்ஞிதா கம்ப³லஸீஸேன உண்ணாமயஸாமஞ்ஞதோ. கிங் பன தே ஸந்த²தங் அதி⁴ட்ட²ஹிங்ஸூதி? து³ட்டு² அதி⁴ட்ட²ஹிங்ஸு அசீவரத்தா, ந அதி⁴ட்டா²னுபக³த்தா ச ஸந்த²தஸ்ஸ. அத² நாதி⁴ட்ட²ஹிங்ஸு, புப்³பே³வ தத்த² அசீவரஸஞ்ஞினோ ஏதேதி கத்வா தத்த² சீவரஸஞ்ஞிதாய தது³ப⁴யங் ந யுஜ்ஜதீதி. கிங் பனேதங் அதி⁴ட்டா²னுபக³ங் நத்தீ²தி? தத்தே²வாக³தங் , அபிசேதங் அவிகப்பனுபக³ங் சே, சீவரங் ந ஹோதி, அஞ்ஞதா² ‘‘சீவரங் நாம ச²ன்னங் சீவரானங் அஞ்ஞதர’’ந்தி எத்தாவதா ஸித்³த⁴ங் ‘‘விகப்பனுபக³ங் பச்சி²ம’’ந்தி ந வத்தப்³ப³ங். அத² ந விகப்பனுபக³ம்பி சீவரமேவ ஸித்³த⁴ங், அனதி⁴ட்டா²னுபக³ங் , அவிகப்பனுபக³ஞ்ச ஏகஜ்ஜ²ங் ‘‘சீவர’’ந்தி ஸங்க்²யங் க³ச்ச²தி. தேனேவாஹ ‘‘தேசீவரிகஸ்ஸ சதுத்த²சீவரங் வத்தமானங் அங்ஸகாஸாவமேவ வட்டதீ’’தி.
566-7. ‘‘Mayaṃ āyasmantaṃ upasena’’nti tassa gaṇapāmokkhattā vuttaṃ. Āraññikapiṇḍapātikapaṃsukūlikavasena sabbāni vuttāni. Tenevāha aṭṭhakathāyaṃ ‘‘santhate catutthacīvarasaññitāyā’’ti. Kiṃ sabbepi te cīvaraṃ na bujjhantīti ce? Yathā hotu. Katamaṃ cīvaraṃ nāmāti? Channaṃ aññataraṃ vikappanupagaṃ pacchimanti. Kiñca vāyimaṃ avāyimanti? Vāyimamevāti. Katarasuttenāti? Addhā so suttameva na passati, siveyyakaṃ dussayugaṃ, iddhimayikañca devadattiyañca acīvaraṃ karoti. Yadi evaṃ avāyimampīti vadāmīti. Evaṃ sante siddhā santhate cīvarasaññitā kambalasīsena uṇṇāmayasāmaññato. Kiṃ pana te santhataṃ adhiṭṭhahiṃsūti? Duṭṭhu adhiṭṭhahiṃsu acīvarattā, na adhiṭṭhānupagattā ca santhatassa. Atha nādhiṭṭhahiṃsu, pubbeva tattha acīvarasaññino eteti katvā tattha cīvarasaññitāya tadubhayaṃ na yujjatīti. Kiṃ panetaṃ adhiṭṭhānupagaṃ natthīti? Tatthevāgataṃ , apicetaṃ avikappanupagaṃ ce, cīvaraṃ na hoti, aññathā ‘‘cīvaraṃ nāma channaṃ cīvarānaṃ aññatara’’nti ettāvatā siddhaṃ ‘‘vikappanupagaṃ pacchima’’nti na vattabbaṃ. Atha na vikappanupagampi cīvarameva siddhaṃ, anadhiṭṭhānupagaṃ , avikappanupagañca ekajjhaṃ ‘‘cīvara’’nti saṅkhyaṃ gacchati. Tenevāha ‘‘tecīvarikassa catutthacīvaraṃ vattamānaṃ aṃsakāsāvameva vaṭṭatī’’ti.
அபிச ஸந்த²தே சீவரஸஞ்ஞிதா ந கேவலங் தேஸங்யேவ, அஞ்ஞேஸம்பி அனுப³ந்த⁴தி ஏவ ‘‘புராணஸந்த²தங் நாம ஸகிங் நிவத்த²ம்பி ஸகிங் பாருதம்பீ’’தி வசனதோ. அட்ட²கதா²சரியோ பனஸ்ஸ அசீவரதங் ஸந்தா⁴யபா⁴ஸிதத்த²தீ³பனேன தீ³பேதி. நிவத்த²பாருதந்தி ஏதேஸங் நிஸின்னஞ்சேவ நிபன்னஞ்சாதி அத்தோ². அபிச ஏவங் ஸந்தேபி ஸந்த²தே சீவரஸஞ்ஞிதா அனுப³ந்த⁴தி ஏவ. க²ந்த⁴கே (மஹாவ॰ 358) ஹி ‘‘நிஸீத³னங் அதி⁴ட்டா²துங் ந விகப்பேது’’ந்தி ச, பரிவாரே (பரி॰ 329) ‘‘நவ சீவரானி அதி⁴ட்டா²தப்³பா³னீ’’தி ச நிஸீத³னஸிக்கா²பதே³ ‘‘த³ஸா வித³த்தீ²’’தி ச இத⁴ ‘‘நிஸீத³னங் நாம ஸத³ஸங் வுச்சதீ’’தி ச வுத்தங், அட்ட²கதா²யஞ்சஸ்ஸ ‘‘ஸந்த²தஸதி³ஸங் ஸந்த²ரித்வா ஏகஸ்மிங் அந்தே ஸுக³தவித³த்தி²யா வித³த்தி²மத்தபதே³ஸே த்³வீஸு டா²னேஸு பா²லெத்வா திஸ்ஸோ த³ஸா கரீயந்தி, தாஹி த³ஸாஹி ஸத³ஸங் நாம வுச்சதீ’’தி ச ‘‘நிஸீத³னங் வுத்தனயேன அதி⁴ட்டா²தப்³ப³மேவ, தஞ்ச கோ² பமாணயுத்தங் ஏகமேவ, த்³வே ந வட்டந்தீ’’தி ச வுத்தங், தஸ்மா நிஸீத³னங் நாம நவன்னங் சீவரானங் அஞ்ஞதரங் சீவரங் அதி⁴ட்டா²தப்³ப³ங், தஞ்ச ஸந்த²தஸதி³ஸங் ஏளகலோமமயஸந்த²தவிஸேஸந்தி ஸித்³த⁴ங், ததா² நிஸீத³னமேவ நிஸீத³னஸந்த²தஞ்ச ஸித்³த⁴ங். போராணக³ண்டி²பதே³ ச ‘‘ஏகமேவா’’தி வுத்தங். தஸ்மிங் ஸித்³தே⁴ ஸித்³தா⁴ ஸந்த²தே சீவரஸஞ்ஞிதாதி அத்தோ². கஸ்மா? ஸந்த²தஸாமஞ்ஞதோ.
Apica santhate cīvarasaññitā na kevalaṃ tesaṃyeva, aññesampi anubandhati eva ‘‘purāṇasanthataṃ nāma sakiṃ nivatthampi sakiṃ pārutampī’’ti vacanato. Aṭṭhakathācariyo panassa acīvarataṃ sandhāyabhāsitatthadīpanena dīpeti. Nivatthapārutanti etesaṃ nisinnañceva nipannañcāti attho. Apica evaṃ santepi santhate cīvarasaññitā anubandhati eva. Khandhake (mahāva. 358) hi ‘‘nisīdanaṃ adhiṭṭhātuṃ na vikappetu’’nti ca, parivāre (pari. 329) ‘‘nava cīvarāni adhiṭṭhātabbānī’’ti ca nisīdanasikkhāpade ‘‘dasā vidatthī’’ti ca idha ‘‘nisīdanaṃ nāma sadasaṃ vuccatī’’ti ca vuttaṃ, aṭṭhakathāyañcassa ‘‘santhatasadisaṃ santharitvā ekasmiṃ ante sugatavidatthiyā vidatthimattapadese dvīsu ṭhānesu phāletvā tisso dasā karīyanti, tāhi dasāhi sadasaṃ nāma vuccatī’’ti ca ‘‘nisīdanaṃ vuttanayena adhiṭṭhātabbameva, tañca kho pamāṇayuttaṃ ekameva, dve na vaṭṭantī’’ti ca vuttaṃ, tasmā nisīdanaṃ nāma navannaṃ cīvarānaṃ aññataraṃ cīvaraṃ adhiṭṭhātabbaṃ, tañca santhatasadisaṃ eḷakalomamayasanthatavisesanti siddhaṃ, tathā nisīdanameva nisīdanasanthatañca siddhaṃ. Porāṇagaṇṭhipade ca ‘‘ekamevā’’ti vuttaṃ. Tasmiṃ siddhe siddhā santhate cīvarasaññitāti attho. Kasmā? Santhatasāmaññato.
எத்தா²ஹ – கத²ங் அத³ஸமேவ ஸந்த²தங் சீவரஸங்க்²யங் ந க³ச்ச²தி. அனேகம்பி அனதி⁴ட்டி²தம்பி மஹந்தம்பி வட்டதி, யதோ ஸத³ஸமேவ ஸந்த²தங் சீவரஸங்க்²யங் க³ச்ச²தி, ததோ அதி⁴ட்டா²னஞ்ச உபக³ச்ச²தீதி. அஸந்த²தபரியாபன்னத்தா ஓரேன ச ச²ன்னங் வஸ்ஸானங் வினாபி ஸம்முதிங், தஞ்ச போராணங் விஸ்ஸஜ்ஜெத்வா ஏவ, ந அவிஸ்ஸஜ்ஜெத்வா ‘‘தஞ்ச கோ² பமாணயுத்தங் ஏகமேவ, த்³வே ந வட்டந்தீ’’தி (பாரா॰ அட்ட²॰ 2.469) வசனதோதி. அதா²பி ஸியா ஸந்த²தங் ஸயனத்த²மேவ கரீயதி, நிஸீத³னங் அஸந்த²தமேவாதி. தஞ்ச ந நியமதோ ‘‘புராணஸந்த²தங் நாம ஸகிங் நிவத்த²ங் ஸகிங் பாருதம்பீ’’தி வுத்தத்தாதி. எத்த² வுச்சதி, ந எத்த² காரணங் பரியேஸிதப்³ப³ங் வினயபஞ்ஞத்தியா அனஞ்ஞவிஸயத்தா.
Etthāha – kathaṃ adasameva santhataṃ cīvarasaṅkhyaṃ na gacchati. Anekampi anadhiṭṭhitampi mahantampi vaṭṭati, yato sadasameva santhataṃ cīvarasaṅkhyaṃ gacchati, tato adhiṭṭhānañca upagacchatīti. Asanthatapariyāpannattā orena ca channaṃ vassānaṃ vināpi sammutiṃ, tañca porāṇaṃ vissajjetvā eva, na avissajjetvā ‘‘tañca kho pamāṇayuttaṃ ekameva, dve na vaṭṭantī’’ti (pārā. aṭṭha. 2.469) vacanatoti. Athāpi siyā santhataṃ sayanatthameva karīyati, nisīdanaṃ asanthatamevāti. Tañca na niyamato ‘‘purāṇasanthataṃ nāma sakiṃ nivatthaṃ sakiṃ pārutampī’’ti vuttattāti. Ettha vuccati, na ettha kāraṇaṃ pariyesitabbaṃ vinayapaññattiyā anaññavisayattā.
ஸந்த²தஸ்ஸ பன அசீவரபா⁴வே அயங் யுத்தி – ஆதி³தோ ‘‘தீணி ஸந்த²தானி பன வினயகம்மங் கத்வா படிலபி⁴த்வா பரிபு⁴ஞ்ஜிதுங் ந வட்டந்தீ’’தி அட்ட²கதா²வசனதோ தானி அகப்பியானீதி ஸித்³த⁴ங், ப⁴க³வதா ச கோ²மாதீ³னி ச² அனுஞ்ஞாதானீதி கோஸெய்யங் கப்பியந்தி ஸித்³த⁴ங். ஏவங் ஸந்தே ஸுத்³த⁴கோஸெய்யம்பி சீவரங் கப்பியங் ஜாதங், பகே³வ கோஸியமிஸ்ஸகஸந்த²தசீவரந்தி ஆபஜ்ஜதி. ததா² கம்ப³லஞ்ச அனுஞ்ஞாதங், தஞ்ச ஸுத்³தி⁴கம்பி ஹோதி ஜாதிகாளகபா⁴வேன, பகே³வ ஓதா³தகோ³சரியமிஸ்ஸகஸந்த²தசீவரந்தி ஆபஜ்ஜதி. ததோ ச அஞ்ஞமஞ்ஞவிரோதோ⁴, தஸ்மா ந ஸந்த²தங் சீவரங் நாம ஹோதி, நிஸீத³னங் பன ஹோதி தஸ்ஸ பமாணஸண்டா²னபரிச்சே²த³ஸம்ப⁴வதோ. எத்தா²ஹு கேசி ஆசரியா ‘‘து³வித⁴ங் நிஸீத³னங் ஸந்த²தங், அஸந்த²தஞ்ச. தத்த² ஸந்த²தங் ஸந்த²தமேவ. அஸந்த²தங் கோ²மாதி³ச²ப்³பி³த⁴ங், தத³னுலோமங் வா ஹோதி, அயமேதேஸங் விஸேஸோ’’தி.
Santhatassa pana acīvarabhāve ayaṃ yutti – ādito ‘‘tīṇi santhatāni pana vinayakammaṃ katvā paṭilabhitvā paribhuñjituṃ na vaṭṭantī’’ti aṭṭhakathāvacanato tāni akappiyānīti siddhaṃ, bhagavatā ca khomādīni cha anuññātānīti koseyyaṃ kappiyanti siddhaṃ. Evaṃ sante suddhakoseyyampi cīvaraṃ kappiyaṃ jātaṃ, pageva kosiyamissakasanthatacīvaranti āpajjati. Tathā kambalañca anuññātaṃ, tañca suddhikampi hoti jātikāḷakabhāvena, pageva odātagocariyamissakasanthatacīvaranti āpajjati. Tato ca aññamaññavirodho, tasmā na santhataṃ cīvaraṃ nāma hoti, nisīdanaṃ pana hoti tassa pamāṇasaṇṭhānaparicchedasambhavato. Etthāhu keci ācariyā ‘‘duvidhaṃ nisīdanaṃ santhataṃ, asanthatañca. Tattha santhataṃ santhatameva. Asanthataṃ khomādichabbidhaṃ, tadanulomaṃ vā hoti, ayametesaṃ viseso’’ti.
எத்தா²ஹ – கஸ்மா பனெத்த² ‘‘ஸந்த²தங் பன பி⁴க்கு²னா’’தி ஸிக்கா²பத³ங் அபஞ்ஞாபெத்வா ‘‘நிஸீத³னஸந்த²த’’ந்தி பஞ்ஞத்தந்தி? சீவரஸஞ்ஞிதாய ஸந்த²தானங் உஜ்ஜி²தத்தா தேஸங் அசீவரபா⁴வத³ஸ்ஸனத்த²ங் ததா² பஞ்ஞத்தந்தி வுத்தங் ஹோதி, தஸ்மா தே பி⁴க்கூ² து⁴தங்க³பே⁴த³ப⁴யா தானி உஜ்ஜி²த்வா தேரஸாபி து⁴தங்கா³னி ஸமாதி³யிங்ஸு, ஸீஸத³ஸ்ஸனவஸேன தீணேவ வுத்தானி, ப⁴க³வா ச தேஸங் ஸந்த²தங் அனுஜானி, ததோ நேஸங் ஏவங் ஹோதி ‘‘நிஸீத³னசீவரஸண்டா²னம்பேதங் நிஸீத³னஸந்த²தங் நோ அனுஞ்ஞாதங், சதுத்த²சீவரபா⁴வேன பகே³வ கதஸந்த²தங் வா’’தி. ததோ ஸந்த²தே நேஸங் சீவரஸஞ்ஞிதா ந ப⁴விஸ்ஸதீதி தத³த்த²ங் ப⁴க³வதா நிஸீத³னஸந்த²தந்தி பஞ்ஞத்தந்தி அதி⁴ப்பாயோ. ‘‘பச்சி²மானி த்³வே வட்டந்தீ’’தி கத²ங் பஞ்ஞாயதீதி சே? ‘‘அனாபத்தி அஞ்ஞேன கதங் படிலபி⁴த்வா பரிபு⁴ஞ்ஜதீ’’தி வசனதோதி.
Etthāha – kasmā panettha ‘‘santhataṃ pana bhikkhunā’’ti sikkhāpadaṃ apaññāpetvā ‘‘nisīdanasanthata’’nti paññattanti? Cīvarasaññitāya santhatānaṃ ujjhitattā tesaṃ acīvarabhāvadassanatthaṃ tathā paññattanti vuttaṃ hoti, tasmā te bhikkhū dhutaṅgabhedabhayā tāni ujjhitvā terasāpi dhutaṅgāni samādiyiṃsu, sīsadassanavasena tīṇeva vuttāni, bhagavā ca tesaṃ santhataṃ anujāni, tato nesaṃ evaṃ hoti ‘‘nisīdanacīvarasaṇṭhānampetaṃ nisīdanasanthataṃ no anuññātaṃ, catutthacīvarabhāvena pageva katasanthataṃ vā’’ti. Tato santhate nesaṃ cīvarasaññitā na bhavissatīti tadatthaṃ bhagavatā nisīdanasanthatanti paññattanti adhippāyo. ‘‘Pacchimāni dve vaṭṭantī’’ti kathaṃ paññāyatīti ce? ‘‘Anāpatti aññena kataṃ paṭilabhitvā paribhuñjatī’’ti vacanatoti.
நிஸீத³னஸந்த²தஸிக்கா²பத³வண்ணனா நிட்டி²தா.
Nisīdanasanthatasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 5. நிஸீத³னஸந்த²தஸிக்கா²பத³ங் • 5. Nisīdanasanthatasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 5. நிஸீத³னஸந்த²தஸிக்கா²பத³வண்ணனா • 5. Nisīdanasanthatasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 5. நிஸீத³னஸந்த²தஸிக்கா²பத³வண்ணனா • 5. Nisīdanasanthatasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 5. நிஸீத³னஸந்த²தஸிக்கா²பத³வண்ணனா • 5. Nisīdanasanthatasikkhāpadavaṇṇanā
