| Library / Tipiṭaka / ཏིཔིཊཀ • Tipiṭaka / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā |
༥. ནིསཱིདནསནྠཏསིཀྑཱཔདཝཎྞནཱ
5. Nisīdanasanthatasikkhāpadavaṇṇanā
༥༦༥. ཏེན སམཡེནཱཏི ནིསཱིདནསནྠཏསིཀྑཱཔདཾ། ཏཏྠ ཨིཙྪཱམཧཾ བྷིཀྑཝེཏི བྷགཝཱ ཀིར ཏཾ ཏེམཱསཾ ན ཀིཉྩི བོདྷནེཡྻསཏྟཾ ཨདྡས, ཏསྨཱ ཨེཝམཱཧ། ཨེཝཾ སནྟེཔི ཏནྟིཝསེན དྷམྨདེསནཱ ཀཏྟབྦཱ སིཡཱ། ཡསྨཱ པནསྶ ཨེཏདཧོསི – ‘‘མཡི ཨོཀཱསཾ ཀཱརེཏྭཱ པཊིསལླཱིནེ བྷིཀྑཱུ ཨདྷམྨིཀཾ ཀཏིཀཝཏྟཾ ཀརིསྶནྟི, ཏཾ ཨུཔསེནོ བྷིནྡིསྶཏི། ཨཧཾ ཏསྶ པསཱིདིཏྭཱ བྷིཀྑཱུནཾ དསྶནཾ ཨནུཛཱནིསྶཱམི, ཏཏོ མཾ པསྶིཏུཀཱམཱ བཧཱུ བྷིཀྑཱུ དྷུཏངྒཱནི སམཱདིཡིསྶནྟི, ཨཧཉྩ ཏེཧི ཨུཛ྄ཛྷིཏསནྠཏཔཙྩཡཱ སིཀྑཱཔདཾ པཉྙཔེསྶཱམཱི’’ཏི, ཏསྨཱ ཨེཝམཱཧ། ཨེཝཾ བཧཱུནི ཧི ཨེཏྠ ཨཱནིསཾསཱནཱིཏི།
565.Tena samayenāti nisīdanasanthatasikkhāpadaṃ. Tattha icchāmahaṃ bhikkhaveti bhagavā kira taṃ temāsaṃ na kiñci bodhaneyyasattaṃ addasa, tasmā evamāha. Evaṃ santepi tantivasena dhammadesanā kattabbā siyā. Yasmā panassa etadahosi – ‘‘mayi okāsaṃ kāretvā paṭisallīne bhikkhū adhammikaṃ katikavattaṃ karissanti, taṃ upaseno bhindissati. Ahaṃ tassa pasīditvā bhikkhūnaṃ dassanaṃ anujānissāmi, tato maṃ passitukāmā bahū bhikkhū dhutaṅgāni samādiyissanti, ahañca tehi ujjhitasanthatapaccayā sikkhāpadaṃ paññapessāmī’’ti, tasmā evamāha. Evaṃ bahūni hi ettha ānisaṃsānīti.
སཔརིསོ ཡེན བྷགཝཱ ཏེནུཔསངྐམཱིཏི ཐེརོ ཀིར ‘‘ན, བྷིཀྑཝེ, ཨཱུནདསཝསྶེན ཨུཔསམྤཱདེཏབྦོ, ཡོ ཨུཔསམྤཱདེཡྻ, ཨཱཔཏྟི དུཀྐཊསྶཱ’’ཏི (མཧཱཝ॰ ༧༥) ཨིམསྨིཾ ཁནྡྷཀསིཀྑཱཔདེ ‘‘ཀཐཉྷི ནཱམ ཏྭཾ མོགྷཔུརིས ཨཉྙེཧི ཨོཝདིཡོ ཨནུསཱསིཡོ ཨཉྙཾ ཨོཝདིཏུཾ ཨནུསཱསིཏུཾ མཉྙིསྶསཱི’’ཏི ཨེཝམཱདིནཱ ནཡེན གརཧཾ ལབྷིཏྭཱ ‘‘སཏྠཱ མཡ྄ཧཾ པརིསཾ ནིསྶཱཡ གརཧཾ ཨདཱསི, སོ དཱནཱཧཾ བྷགཝནྟཾ ཏེནེཝ པུཎྞཙནྡསསྶིརཱིཀེན སབྦཱཀཱརཔརིཔུཎྞེན མུཁེན བྲཧྨགྷོསཾ ནིཙྪཱརེཏྭཱ པརིསཾཡེཝ ནིསྶཱཡ སཱདྷུཀཱརཾ དཱཔེསྶཱམཱི’’ཏི སུཧདཡོ ཀུལཔུཏྟོ ཨཏིརེཀཡོཛནསཏཾ པཊིཀྐམིཏྭཱ པརིསཾ ཙིནིཏྭཱ པཉྩམཏྟེཧི བྷིཀྑུསཏེཧི པརིཝུཏོ པུན བྷགཝནྟཾ ཨུཔསངྐམནྟོ། ཏེན ཝུཏྟཾ – ‘‘སཔརིསོ ཡེན བྷགཝཱ ཏེནུཔསངྐམཱི’’ཏི། ན ཧི སཀྐཱ བུདྡྷཱནཾ ཨཉྙཐཱ ཨཱརཱདྷེཏུཾ ཨཉྙཏྲ ཝཏྟསམྤཏྟིཡཱ།
Sapariso yena bhagavā tenupasaṅkamīti thero kira ‘‘na, bhikkhave, ūnadasavassena upasampādetabbo, yo upasampādeyya, āpatti dukkaṭassā’’ti (mahāva. 75) imasmiṃ khandhakasikkhāpade ‘‘kathañhi nāma tvaṃ moghapurisa aññehi ovadiyo anusāsiyo aññaṃ ovadituṃ anusāsituṃ maññissasī’’ti evamādinā nayena garahaṃ labhitvā ‘‘satthā mayhaṃ parisaṃ nissāya garahaṃ adāsi, so dānāhaṃ bhagavantaṃ teneva puṇṇacandasassirīkena sabbākāraparipuṇṇena mukhena brahmaghosaṃ nicchāretvā parisaṃyeva nissāya sādhukāraṃ dāpessāmī’’ti suhadayo kulaputto atirekayojanasataṃ paṭikkamitvā parisaṃ cinitvā pañcamattehi bhikkhusatehi parivuto puna bhagavantaṃ upasaṅkamanto. Tena vuttaṃ – ‘‘sapariso yena bhagavā tenupasaṅkamī’’ti. Na hi sakkā buddhānaṃ aññathā ārādhetuṃ aññatra vattasampattiyā.
བྷགཝཏོ ཨཝིདཱུརེ ནིསིནྣོཏི ཝཏྟསམྤཏྟིཡཱ པརིསུདྡྷབྷཱཝེན ནིརཱསངྐོ སཱིཧོ ཝིཡ ཀཉྩནཔབྦཏསྶ བྷགཝཏོ ཨཝིདཱུརེ ནིསིནྣོ། ཨེཏདཝོཙཱཏི ཀཐཱསམུཊྛཱཔནཏྠཾ ཨེཏཾ ཨཝོཙ། མནཱཔཱནི ཏེ བྷིཀྑུ པཾསུཀཱུལཱནཱིཏི བྷིཀྑུ ཏཝ ཨིམཱནི པཾསུཀཱུལཱནི མནཱཔཱནི, ཨཏྟནོ རུཙིཡཱ ཁནྟིཡཱ གཧིཏཱནཱིཏི ཨཏྠོ། ན ཁོ མེ, བྷནྟེ, མནཱཔཱནཱིཏི, བྷནྟེ ན མཡཱ ཨཏྟནོ རུཙིཡཱ གཧིཏཱནི, གལགྒཱཧེན ཝིཡ མཏྠཀཏཱལ༹ནེན ཝིཡ ཙ གཱཧིཏོམྷཱིཏི དསྶེཏི།
Bhagavatoavidūre nisinnoti vattasampattiyā parisuddhabhāvena nirāsaṅko sīho viya kañcanapabbatassa bhagavato avidūre nisinno. Etadavocāti kathāsamuṭṭhāpanatthaṃ etaṃ avoca. Manāpāni te bhikkhu paṃsukūlānīti bhikkhu tava imāni paṃsukūlāni manāpāni, attano ruciyā khantiyā gahitānīti attho. Na kho me, bhante, manāpānīti, bhante na mayā attano ruciyā gahitāni, galaggāhena viya matthakatāḷanena viya ca gāhitomhīti dasseti.
པཉྙཱཡིསྶཏཱིཏི པཉྙཱཏོ ཨབྷིཉྙཱཏོ བྷཝིསྶཏི, ཏཏྠ སནྡིསྶིསྶཏཱིཏི ཝུཏྟཾ ཧོཏི། ན མཡཾ ཨཔཉྙཏྟཾ པཉྙཔེསྶཱམཱཏི མཡཾ སཱཝཀཱ ནཱམ ཨཔཉྙཏྟཾ ན པཉྙཔེསྶཱམ, བུདྡྷཝིསཡོ ཧི ཨེསོ ཡདིདཾ ‘‘པཱཙིཏྟིཡཾ དུཀྐཊ’’ནྟིཨཱདིནཱ ནཡེན ཨཔཉྙཏྟསིཀྑཱཔདཔཉྙཔནཾ པཉྙཏྟསམུཙྪིནྡནཾ ཝཱ། སམཱདཱཡཱཏི ཏཾ ཏཾ སིཀྑཱཔདཾ སམཱདིཡིཏྭཱ, ‘‘སཱདྷུ སུཊྛཱུ’’ཏི སམྤཊིཙྪིཏྭཱ ཡཐཱཔཉྙཏྟེསུ སབྦསིཀྑཱཔདེསུ སིཀྑིསྶཱམཱཏི དསྶེཏི། ཏསྶ ཨཱརདྡྷཙིཏྟོ པུནཔི ‘‘སཱདྷུ སཱདྷཱུ’’ཏི སཱདྷུཀཱརམདཱསི།
Paññāyissatīti paññāto abhiññāto bhavissati, tattha sandississatīti vuttaṃ hoti. Na mayaṃ apaññattaṃ paññapessāmāti mayaṃ sāvakā nāma apaññattaṃ na paññapessāma, buddhavisayo hi eso yadidaṃ ‘‘pācittiyaṃ dukkaṭa’’ntiādinā nayena apaññattasikkhāpadapaññapanaṃ paññattasamucchindanaṃ vā. Samādāyāti taṃ taṃ sikkhāpadaṃ samādiyitvā, ‘‘sādhu suṭṭhū’’ti sampaṭicchitvā yathāpaññattesu sabbasikkhāpadesu sikkhissāmāti dasseti. Tassa āraddhacitto punapi ‘‘sādhu sādhū’’ti sādhukāramadāsi.
༥༦༦. ཨནུཉྙཱཏཱཝུསོཏི ཨནུཉྙཱཏཾ, ཨཱཝུསོ། པིཧེནྟཱཏི པིཧཡནྟཱ། སནྠཏཱནི ཨུཛ྄ཛྷིཏྭཱཏི སནྠཏེ ཙཏུཏྠཙཱིཝརསཉྙིཏཱཡ སབྦསནྠཏཱནི ཨུཛ྄ཛྷིཏྭཱ། དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསཱིཏི བྷགཝཱ སནྠཏཱནི ཝིཔྤཀིཎྞཱནི དིསྭཱ ‘‘སདྡྷཱདེཡྻཝིནིཔཱཏནེ ཀཱརཎཾ ནཏྠི, པརིབྷོགུཔཱཡཾ ནེསཾ དསྶེསྶཱམཱི’’ཏི དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི།
566.Anuññātāvusoti anuññātaṃ, āvuso. Pihentāti pihayantā. Santhatāni ujjhitvāti santhate catutthacīvarasaññitāya sabbasanthatāni ujjhitvā. Dhammiṃ kathaṃ katvā bhikkhū āmantesīti bhagavā santhatāni vippakiṇṇāni disvā ‘‘saddhādeyyavinipātane kāraṇaṃ natthi, paribhogupāyaṃ nesaṃ dassessāmī’’ti dhammiṃ kathaṃ katvā bhikkhū āmantesi.
༥༦༧. སཀིཾ ནིཝཏྠམྤི སཀིཾ པཱརུཏམྤཱིཏི སཀིཾ ནིསིནྣཉྩེཝ ནིཔནྣཉྩ། སཱམནྟཱཏི ཨེཀཔསྶཏོ ཝཊྚཾ ཝཱ ཙཏུརསྶཾ ཝཱ ཚིནྡིཏྭཱ གཧིཏཊྛཱནཾ ཡཐཱ ཝིདཏྠིམཏྟཾ ཧོཏི, ཨེཝཾ གཧེཏབྦཾ, སནྠརནྟེན པན པཱལི༹ཡཾ ཝུཏྟནཡེནེཝ ཨེཀདེསེ ཝཱ སནྠརིཏབྦཾ, ཝིཛཊེཏྭཱ ཝཱ མིསྶཀཾ ཀཏྭཱ སནྠརིཏབྦཾ, ཨེཝཾ ཐིརཏརཾ ཧོཏཱིཏི། སེསཾ ཨུཏྟཱནཏྠམེཝ།
567.Sakiṃ nivatthampi sakiṃ pārutampīti sakiṃ nisinnañceva nipannañca. Sāmantāti ekapassato vaṭṭaṃ vā caturassaṃ vā chinditvā gahitaṭṭhānaṃ yathā vidatthimattaṃ hoti, evaṃ gahetabbaṃ, santharantena pana pāḷiyaṃ vuttanayeneva ekadese vā santharitabbaṃ, vijaṭetvā vā missakaṃ katvā santharitabbaṃ, evaṃ thirataraṃ hotīti. Sesaṃ uttānatthameva.
སམུཊྛཱནཱདཱིནི ཀིརིཡཱཀིརིཡཏྟཱ ཨིམསྶ སིཀྑཱཔདསྶ དྭེབྷཱགསིཀྑཱཔདསདིསཱནཱིཏི།
Samuṭṭhānādīni kiriyākiriyattā imassa sikkhāpadassa dvebhāgasikkhāpadasadisānīti.
ཨིམེསུ པན པཉྩསུ སནྠཏེསུ པུརིམཱནི ཏཱིཎི ཝིནཡཀམྨཾ ཀཏྭཱ པཊིལབྷིཏྭཱ པརིབྷུཉྫིཏུཾ ན ཝཊྚནྟི, པཙྪིམཱནི དྭེ ཝཊྚནྟཱིཏི ཝེདིཏབྦཱནཱིཏི།
Imesu pana pañcasu santhatesu purimāni tīṇi vinayakammaṃ katvā paṭilabhitvā paribhuñjituṃ na vaṭṭanti, pacchimāni dve vaṭṭantīti veditabbānīti.
ནིསཱིདནསནྠཏསིཀྑཱཔདཝཎྞནཱ ནིཊྛིཏཱ།
Nisīdanasanthatasikkhāpadavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / མཧཱཝིབྷངྒ • Mahāvibhaṅga / ༥. ནིསཱིདནསནྠཏསིཀྑཱཔདཾ • 5. Nisīdanasanthatasikkhāpadaṃ
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / ༥. ནིསཱིདནསནྠཏསིཀྑཱཔདཝཎྞནཱ • 5. Nisīdanasanthatasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / ༥. ནིསཱིདནསནྠཏསིཀྑཱཔདཝཎྞནཱ • 5. Nisīdanasanthatasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༥. ནིསཱིདནསནྠཏསིཀྑཱཔདཝཎྞནཱ • 5. Nisīdanasanthatasikkhāpadavaṇṇanā
