| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
8. நிஸ்ஸயபச்சயனித்³தே³ஸவண்ணனா
8. Nissayapaccayaniddesavaṇṇanā
8. நிஸ்ஸயபச்சயனித்³தே³ஸே ஸஹஜாதபச்சயனித்³தே³ஸஸ்ஸ புரிமானங் பஞ்சன்னங் கொட்டா²ஸானங் வஸேன ஸஹஜாதனிஸ்ஸயனயங் த³ஸ்ஸெத்வா புன ச²ட்டே²ன கொட்டா²ஸேன புரேஜாதனிஸ்ஸயனயங் த³ஸ்ஸேதுங் சக்கா²யதனங் சக்கு²விஞ்ஞாணதா⁴துயாதிஆதி³ ஆரத்³த⁴ங். தத்த² யங் ரூபங் நிஸ்ஸாயாதி வத்து²ரூபங் ஸந்தா⁴ய வுத்தங். தஞ்ஹி நிஸ்ஸாய திவிதா⁴ மனோதா⁴து, ட²பெத்வா அரூபவிபாகங் த்³வாஸத்ததிவிதா⁴ மனோவிஞ்ஞாணதா⁴தூதி இமானி பஞ்சஸத்ததி சித்தானி வத்தந்தீதி அயங் தாவெத்த² பாளிவண்ணனா. அயம்பி நிஸ்ஸயபச்சயோ ஜாதிவஸேன குஸலாதி³பே⁴த³தோ பஞ்சதா⁴வ பி⁴ஜ்ஜதி. தத்த² குஸலோ பூ⁴மிதோ சதுப்³பி³தோ⁴வ அகுஸலோ ஏகவிதோ⁴ விபாகோ சதுப்³பி³தோ⁴, கிரியஸங்கா²தோ திவிதோ⁴, ரூபங் ஏகவித⁴மேவாதி ஏவமெத்த² நானப்பகாரபே⁴த³தோ விஞ்ஞாதப்³போ³ வினிச்ச²யோ.
8. Nissayapaccayaniddese sahajātapaccayaniddesassa purimānaṃ pañcannaṃ koṭṭhāsānaṃ vasena sahajātanissayanayaṃ dassetvā puna chaṭṭhena koṭṭhāsena purejātanissayanayaṃ dassetuṃ cakkhāyatanaṃ cakkhuviññāṇadhātuyātiādi āraddhaṃ. Tattha yaṃ rūpaṃ nissāyāti vatthurūpaṃ sandhāya vuttaṃ. Tañhi nissāya tividhā manodhātu, ṭhapetvā arūpavipākaṃ dvāsattatividhā manoviññāṇadhātūti imāni pañcasattati cittāni vattantīti ayaṃ tāvettha pāḷivaṇṇanā. Ayampi nissayapaccayo jātivasena kusalādibhedato pañcadhāva bhijjati. Tattha kusalo bhūmito catubbidhova akusalo ekavidho vipāko catubbidho, kiriyasaṅkhāto tividho, rūpaṃ ekavidhamevāti evamettha nānappakārabhedato viññātabbo vinicchayo.
ஏவங் பி⁴ன்னே பனெத்த² சதுபூ⁴மகம்பி குஸலங் பஞ்சவோகாரே ஸம்பயுத்தக்க²ந்தா⁴னஞ்சேவ சித்தஸமுட்டா²னரூபஸ்ஸ ச நிஸ்ஸயபச்சயேன பச்சயோ ஹோதி. ததா² அகுஸலங் . யங் பனெத்த² ஆருப்பே உப்பஜ்ஜதி, தங் அரூபத⁴ம்மானஞ்ஞேவ நிஸ்ஸயபச்சயோ ஹோதி. காமாவசரரூபாவசரவிபாகங் பவத்தே ஸம்பயுத்தத⁴ம்மானஞ்சேவ சித்தஸமுட்டா²னரூபஸ்ஸ ச, படிஸந்தி⁴யங் கடத்தாரூபஸ்ஸாபி நிஸ்ஸயபச்சயோ ஹோதி. அரூபாவசரவிபாகங் ஸம்பயுத்தக்க²ந்தா⁴னங்யேவ ஹோதி. லோகுத்தரவிபாகங் பஞ்சவோகாரே; ஸம்பயுத்தகானஞ்சேவ சித்தஸமுட்டா²னரூபஸ்ஸ ச, சதுவோகாரே அரூபஸ்ஸேவ நிஸ்ஸயபச்சயோ ஹோதி. காமாவசரஅரூபாவசரகிரியா பஞ்சவோகாரே ஸம்பயுத்தகானஞ்சேவ சித்தஸமுட்டா²னரூபஸ்ஸ ச நிஸ்ஸயபச்சயோ ஹோதி, சதுவோகாரே அரூபானஞ்ஞேவ. ரூபாவசரகிரியா ஸம்பயுத்தகானஞ்சேவ சித்தஸமுட்டா²னரூபஸ்ஸ ச ஏகந்தேன நிஸ்ஸயபச்சயோ ஹோதி.
Evaṃ bhinne panettha catubhūmakampi kusalaṃ pañcavokāre sampayuttakkhandhānañceva cittasamuṭṭhānarūpassa ca nissayapaccayena paccayo hoti. Tathā akusalaṃ . Yaṃ panettha āruppe uppajjati, taṃ arūpadhammānaññeva nissayapaccayo hoti. Kāmāvacararūpāvacaravipākaṃ pavatte sampayuttadhammānañceva cittasamuṭṭhānarūpassa ca, paṭisandhiyaṃ kaṭattārūpassāpi nissayapaccayo hoti. Arūpāvacaravipākaṃ sampayuttakkhandhānaṃyeva hoti. Lokuttaravipākaṃ pañcavokāre; sampayuttakānañceva cittasamuṭṭhānarūpassa ca, catuvokāre arūpasseva nissayapaccayo hoti. Kāmāvacaraarūpāvacarakiriyā pañcavokāre sampayuttakānañceva cittasamuṭṭhānarūpassa ca nissayapaccayo hoti, catuvokāre arūpānaññeva. Rūpāvacarakiriyā sampayuttakānañceva cittasamuṭṭhānarūpassa ca ekantena nissayapaccayo hoti.
சதுஸமுட்டா²னிகரூபஸ்ஸ ச கம்மஸமுட்டா²னரூபே ஏகங் மஹாபூ⁴தங் திண்ணங், தீணி ஏகஸ்ஸ, த்³வே த்³வின்னங் மஹாபூ⁴தானங், மஹாபூ⁴தா உபாதா³ரூபானங், வத்து²ரூபங் பஞ்சவோகாரப⁴வே சதுபூ⁴மககுஸலஸ்ஸ, அகுஸலஸ்ஸ, ட²பெத்வா ஆருப்பவிபாகஞ்சேவ த்³வே பஞ்சவிஞ்ஞாணானி ச ஸேஸதேபூ⁴மகவிபாகஸ்ஸ, தேபூ⁴மககிரியஸ்ஸாதி இமேஸங் சதுன்னங் த⁴ம்மராஸீனங் நிஸ்ஸயபச்சயோ ஹோதி. சக்கா²யதனாதீ³னி பஞ்ச ஸஸம்பயுத்தானங் சக்கு²விஞ்ஞாணாதீ³னங் நிஸ்ஸயபச்சயோ ஹோதி. உதுசித்தாஹாரஸமுட்டா²னேஸு பன மஹாபூ⁴தா மஹாபூ⁴தானஞ்சேவ உபாதா³ரூபஸ்ஸ ச நிஸ்ஸயபச்சயேன பச்சயோதி ஏவமெத்த² பச்சயுப்பன்னதோபி விஞ்ஞாதப்³போ³ வினிச்ச²யோதி.
Catusamuṭṭhānikarūpassa ca kammasamuṭṭhānarūpe ekaṃ mahābhūtaṃ tiṇṇaṃ, tīṇi ekassa, dve dvinnaṃ mahābhūtānaṃ, mahābhūtā upādārūpānaṃ, vatthurūpaṃ pañcavokārabhave catubhūmakakusalassa, akusalassa, ṭhapetvā āruppavipākañceva dve pañcaviññāṇāni ca sesatebhūmakavipākassa, tebhūmakakiriyassāti imesaṃ catunnaṃ dhammarāsīnaṃ nissayapaccayo hoti. Cakkhāyatanādīni pañca sasampayuttānaṃ cakkhuviññāṇādīnaṃ nissayapaccayo hoti. Utucittāhārasamuṭṭhānesu pana mahābhūtā mahābhūtānañceva upādārūpassa ca nissayapaccayena paccayoti evamettha paccayuppannatopi viññātabbo vinicchayoti.
நிஸ்ஸயபச்சயனித்³தே³ஸவண்ணனா.
Nissayapaccayaniddesavaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / பட்டா²னபாளி • Paṭṭhānapāḷi / (2) பச்சயனித்³தே³ஸோ • (2) Paccayaniddeso
