| Library / Tipiṭaka / തിപിടക • Tipiṭaka / അപദാന-അട്ഠകഥാ • Apadāna-aṭṭhakathā |
൨. നിസ്സേണിദായകത്ഥേരഅപദാനവണ്ണനാ
2. Nisseṇidāyakattheraapadānavaṇṇanā
കോണ്ഡഞ്ഞസ്സ ഭഗവതോതിആദികം ആയസ്മതോ നിസ്സേണിദായകത്ഥേരസ്സ അപദാനം. അയമ്പി പുരിമജിനവരേസു കതാധികാരോ അനേകാസു ജാതീസു വിവട്ടൂപനിസ്സയാനി പുഞ്ഞാനി ഉപചിനന്തോ കോണ്ഡഞ്ഞസ്സ ഭഗവതോ കാലേ വഡ്ഢകികുലേ നിബ്ബത്തോ സദ്ധോ പസന്നോ ഭഗവതോ ധമ്മദേസനം സുത്വാ പസന്നമാനസോ ഭഗവതോ വസനപാസാദസ്സാരോഹനത്ഥായ സാരകട്ഠമയം നിസ്സേണിം കത്വാ ഉസ്സാപേത്വാ ഠപേസി. ഭഗവാ തസ്സ പസാദസംവഡ്ഢനത്ഥായ പസ്സന്തസ്സേവ ഉപരിപാസാദം ആരുഹി. സോ അതീവ പസന്നോ തേനേവ പീതിസോമനസ്സേന കാലം കത്വാ ദേവലോകേ നിബ്ബത്തോ തത്ഥ ദിബ്ബസമ്പത്തിം അനുഭവിത്വാ മനുസ്സേസു ജായമാനോ നിസ്സേണിദാനനിസ്സന്ദേന ഉച്ചകുലേ നിബ്ബത്തോ മനുസ്സസുഖം അനുഭവിത്വാ ഇമസ്മിം ബുദ്ധുപ്പാദേ ഏകസ്മിം കുലേ നിബ്ബത്തോ സത്ഥു ധമ്മദേസനം സുത്വാ സദ്ധാജാതോ പബ്ബജിതോ നചിരസ്സേവ അരഹാ അഹോസി.
Koṇḍaññassabhagavatotiādikaṃ āyasmato nisseṇidāyakattherassa apadānaṃ. Ayampi purimajinavaresu katādhikāro anekāsu jātīsu vivaṭṭūpanissayāni puññāni upacinanto koṇḍaññassa bhagavato kāle vaḍḍhakikule nibbatto saddho pasanno bhagavato dhammadesanaṃ sutvā pasannamānaso bhagavato vasanapāsādassārohanatthāya sārakaṭṭhamayaṃ nisseṇiṃ katvā ussāpetvā ṭhapesi. Bhagavā tassa pasādasaṃvaḍḍhanatthāya passantasseva uparipāsādaṃ āruhi. So atīva pasanno teneva pītisomanassena kālaṃ katvā devaloke nibbatto tattha dibbasampattiṃ anubhavitvā manussesu jāyamāno nisseṇidānanissandena uccakule nibbatto manussasukhaṃ anubhavitvā imasmiṃ buddhuppāde ekasmiṃ kule nibbatto satthu dhammadesanaṃ sutvā saddhājāto pabbajito nacirasseva arahā ahosi.
൯. സോ അത്തനോ പുബ്ബകമ്മം സരിത്വാ സോമനസ്സജാതോ പുബ്ബചരിതാപദാനം പകാസേന്തോ കോണ്ഡഞ്ഞസ്സ ഭഗവതോതിആദിമാഹ. തത്ഥ കോണ്ഡഞ്ഞസ്സാതി കുച്ഛിതോ ഹുത്വാ ഡേതി പവത്തതീതി കോണ്ഡോ, ലാമകസത്തോ, കോണ്ഡതോ അഞ്ഞോതി കോണ്ഡഞ്ഞോ, അലാമകോ ഉത്തമപുരിസോതി അത്ഥോ. അഥ വാ ബ്രാഹ്മണഗോത്തേസു കോണ്ഡഞ്ഞഗോത്തേ ഉപ്പന്നത്താ ‘‘കോണ്ഡഞ്ഞോ’’തി ഗോത്തവസേന തസ്സ നാമം, തസ്സ കോണ്ഡഞ്ഞസ്സ. സേസം പാകടമേവാതി.
9. So attano pubbakammaṃ saritvā somanassajāto pubbacaritāpadānaṃ pakāsento koṇḍaññassa bhagavatotiādimāha. Tattha koṇḍaññassāti kucchito hutvā ḍeti pavattatīti koṇḍo, lāmakasatto, koṇḍato aññoti koṇḍañño, alāmako uttamapurisoti attho. Atha vā brāhmaṇagottesu koṇḍaññagotte uppannattā ‘‘koṇḍañño’’ti gottavasena tassa nāmaṃ, tassa koṇḍaññassa. Sesaṃ pākaṭamevāti.
നിസ്സേണിദായകത്ഥേരഅപദാനവണ്ണനാ സമത്താ.
Nisseṇidāyakattheraapadānavaṇṇanā samattā.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / ഖുദ്ദകനികായ • Khuddakanikāya / അപദാനപാളി • Apadānapāḷi / ൨. നിസ്സേണിദായകത്ഥേരഅപദാനം • 2. Nisseṇidāyakattheraapadānaṃ
