| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
6. ச²ட்ட²வக்³கோ³
6. Chaṭṭhavaggo
1. நியாமகதா²வண்ணனா
1. Niyāmakathāvaṇṇanā
445-447. இதா³னி நியாமகதா² நாம ஹோதி. தத்த² நியாமோதி ‘‘ப⁴ப்³போ³ நியாமங் ஓக்கமிதுங் குஸலேஸு த⁴ம்மேஸு ஸம்மத்த’’ந்தி (பு॰ ப॰ 13) வசனதோ அரியமக்³கோ³ வுச்சதி. யஸ்மா பன தஸ்மிங் உப்பஜ்ஜித்வா நிருத்³தே⁴பி புக்³க³லோ அனியதோ நாம ந ஹோதி, தஸ்மா ‘‘ஸோ நியாமோ நிச்சட்டே²ன அஸங்க²தோ’’தி யேஸங் லத்³தி⁴, ஸெய்யதா²பி அந்த⁴கானங்; தே ஸந்தா⁴ய புச்சா² ஸகவாதி³ஸ்ஸ, படிஞ்ஞா இதரஸ்ஸ. ததோ ‘‘யதி³ ஸோ அஸங்க²தோ, ஏவரூபேன தேன ப⁴விதப்³ப³’’ந்தி தீ³பெந்தோ நிப்³பா³னந்திஆதி³மாஹ. ஸங்ஸந்த³னபுச்சா² உத்தானத்தா²யேவ.
445-447. Idāni niyāmakathā nāma hoti. Tattha niyāmoti ‘‘bhabbo niyāmaṃ okkamituṃ kusalesu dhammesu sammatta’’nti (pu. pa. 13) vacanato ariyamaggo vuccati. Yasmā pana tasmiṃ uppajjitvā niruddhepi puggalo aniyato nāma na hoti, tasmā ‘‘so niyāmo niccaṭṭhena asaṅkhato’’ti yesaṃ laddhi, seyyathāpi andhakānaṃ; te sandhāya pucchā sakavādissa, paṭiññā itarassa. Tato ‘‘yadi so asaṅkhato, evarūpena tena bhavitabba’’nti dīpento nibbānantiādimāha. Saṃsandanapucchā uttānatthāyeva.
அத்தி² கேசீதிஆதி³ நியாமஸ்ஸ ஸங்க²தபா⁴வதீ³பனத்த²ங் வுத்தங். மக்³கோ³ அஸங்க²தோதிபஞ்ஹே தஸ்ஸ உப்பாத³னிரோத⁴பா⁴வதோ படிக்கி²பதீதி. நியாமோ ஸங்க²தோதிபஞ்ஹே நிருத்³தே⁴பி மக்³கே³ நியாமஸ்ஸ அத்தி²தங் ஸந்தா⁴ய படிக்கி²பதி. ஸோதாபத்தினியாமோதிஆதி³பஞ்ஹேஸுபி அனுலோமதோ ச படிலோமதோ ச இமினாவ நயேன அத்தோ² வேதி³தப்³போ³. பஞ்ச அஸங்க²தானீதி புட்டோ² பஞ்சன்னங் அஸங்க²தானங் ஆக³தட்டா²னங் அபஸ்ஸந்தோ படிக்கி²பதி. து³தியங் புட்டோ² சதுன்னங் ஸம்மத்தனியாமானங் நியாமவசனதோ நிப்³பா³னஸ்ஸ ச அஸங்க²தபா⁴வதோ படிஜானாதி. மிச்ச²த்தனியாமபஞ்ஹோ நியாமவசனமத்தேன அஸங்க²ததாய அயுத்தபா⁴வதீ³பனத்த²ங் வுத்தோதி.
Atthikecītiādi niyāmassa saṅkhatabhāvadīpanatthaṃ vuttaṃ. Maggo asaṅkhatotipañhe tassa uppādanirodhabhāvato paṭikkhipatīti. Niyāmo saṅkhatotipañhe niruddhepi magge niyāmassa atthitaṃ sandhāya paṭikkhipati. Sotāpattiniyāmotiādipañhesupi anulomato ca paṭilomato ca imināva nayena attho veditabbo. Pañca asaṅkhatānīti puṭṭho pañcannaṃ asaṅkhatānaṃ āgataṭṭhānaṃ apassanto paṭikkhipati. Dutiyaṃ puṭṭho catunnaṃ sammattaniyāmānaṃ niyāmavacanato nibbānassa ca asaṅkhatabhāvato paṭijānāti. Micchattaniyāmapañho niyāmavacanamattena asaṅkhatatāya ayuttabhāvadīpanatthaṃ vuttoti.
நியாமகதா²வண்ணனா.
Niyāmakathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (53) 1. நியாமகதா² • (53) 1. Niyāmakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 1. நியாமகதா²வண்ணனா • 1. Niyāmakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 1. நியாமகதா²வண்ணனா • 1. Niyāmakathāvaṇṇanā
