| Library / Tipiṭaka / တိပိဋက • Tipiṭaka / နေတ္တိဝိဘာဝိနီ • Nettivibhāvinī |
၁၂. ဩတရဏဟာရသမ္ပာတဝိဘာဝနာ
12. Otaraṇahārasampātavibhāvanā
၇၄. ယေန ယေန ပညတ္တိဟာရသမ္ပာတေန ပညတ္တိပ္ပဘေဒာ နိဒ္ဓာရိတာ, သော ပညတ္တိဟာရသမ္ပာတော ပရိပုဏ္ဏော, ‘‘ကတမော ဩတရဏော ဟာရသမ္ပာတော’’တိ ပုစ္ဆိတဗ္ဗတ္တာ ‘‘တတ္ထ ကတမော ဩတရဏော ဟာရသမ္ပာတော’’တိအာဒိမာဟ။
74. Yena yena paññattihārasampātena paññattippabhedā niddhāritā, so paññattihārasampāto paripuṇṇo, ‘‘katamo otaraṇo hārasampāto’’ti pucchitabbattā ‘‘tattha katamo otaraṇo hārasampāto’’tiādimāha.
‘‘တတ္ထ တိသ္သံ ဂာထာယံ ကတမာနိ ဣန္ဒ္ရိယာနိ နိဒ္ဓာရေတ္ဝာ ကတမေဟိ နိဒ္ဓာရိတေဟိ ဓမ္မေဟိ ဩတရတီ’’တိ ပုစ္ဆိတဗ္ဗတ္တာ ‘‘တသ္မာ’’တိအာဒိ ဝုတ္တံ။ ယာ ‘‘တသ္မာ ရက္ခိတစိတ္တသ္သာ’’တိအာဒိဂာထာ ဝုတ္တာ, တိသ္သံ ဂာထာယံ ‘‘တသ္မာ။ပေ.။ ပုရေက္ခာရော’’တိ သုတ္တပ္ပဒေသေန သမ္မာဒိဋ္ဌိ ဂဟိတာ, သမ္မာဒိဋ္ဌိယာ ဂဟိတာယ ပဉ္စိန္ဒ္ရိယာနိ သဒ္ဓာဒိပဉ္စိန္ဒ္ရိယာနိ ဂဟိတာနိ ဘဝန္တိ။
‘‘Tattha tissaṃ gāthāyaṃ katamāni indriyāni niddhāretvā katamehi niddhāritehi dhammehi otaratī’’ti pucchitabbattā ‘‘tasmā’’tiādi vuttaṃ. Yā ‘‘tasmā rakkhitacittassā’’tiādigāthā vuttā, tissaṃ gāthāyaṃ ‘‘tasmā…pe… purekkhāro’’ti suttappadesena sammādiṭṭhi gahitā, sammādiṭṭhiyā gahitāya pañcindriyāni saddhādipañcindriyāni gahitāni bhavanti.
တာနိယေဝ သဒ္ဓာဒိပဉ္စိန္ဒ္ရိယာနိ ဝိဇ္ဇာယ ဥပကာရတ္တာ ဝာ ပဒဋ္ဌာနတ္တာ ဝာ ဝိဇ္ဇာ ဘဝန္တိ, ဝိဇ္ဇုပ္ပာဒာ တာဒိသာယ ဝိဇ္ဇာယ ဥပ္ပာဒာ ဥပ္ပာဒဟေတုတော အဝိဇ္ဇာနိရောဓော သမ္ဘဝတိ, အဝိဇ္ဇာနိရောဓာ သင္ခာရနိရောဓော သမ္ဘဝတိ။ပေ.။ ဇာတိနိရောဓာ ဇရာမရဏနိရောဓော သမ္ဘဝတီတိ။ အယံ ဩတရဏာ ပဋိစ္စသမုပ္ပာဒေန ပဉ္စိန္ဒ္ရိယာနံ ဩတရဏာ နာမ။
Tāniyeva saddhādipañcindriyāni vijjāya upakārattā vā padaṭṭhānattā vā vijjā bhavanti, vijjuppādā tādisāya vijjāya uppādā uppādahetuto avijjānirodho sambhavati, avijjānirodhā saṅkhāranirodho sambhavati…pe… jātinirodhā jarāmaraṇanirodho sambhavatīti. Ayaṃ otaraṇā paṭiccasamuppādena pañcindriyānaṃ otaraṇā nāma.
တာနိယေဝ ပဉ္စိန္ဒ္ရိယာနိ သီလက္ခန္ဓေန သမာဓိက္ခန္ဓေန ပညာက္ခန္ဓေန တီဟိ ခန္ဓေဟိ သင္ဂဟိတာနိ ဘဝန္တိ သဒ္ဓာဝီရိယေဟိ သီလသမ္ဘဝတော, သတိယာ စ ပညာနုဝတ္တကတ္တာ။ အယံ ဩတရဏာ ခန္ဓေဟိ ပဉ္စိန္ဒ္ရိယာနံ ဩတရဏာ နာမ။
Tāniyeva pañcindriyāni sīlakkhandhena samādhikkhandhena paññākkhandhena tīhi khandhehi saṅgahitāni bhavanti saddhāvīriyehi sīlasambhavato, satiyā ca paññānuvattakattā. Ayaṃ otaraṇā khandhehi pañcindriyānaṃ otaraṇā nāma.
တာနိယေဝ ပဉ္စိန္ဒ္ရိယာနိ သင္ခာရပရိယာပန္နာနိ ဘဝန္တိ။ ယေ သင္ခာရာ အနာသဝာ ဘဝန္တိ, ဘဝင္ဂာ ဘဝဟေတူ နော ဘဝန္တိ, တေ အနာသဝာ သင္ခာရာ ဓမ္မဓာတုသင္ဂဟိတာ ဘဝန္တိ ဓမ္မဓာတုယာ အန္တောဂဓတ္တာ။ အယံ ဩတရဏာ ဓာတူဟိ ပဉ္စိန္ဒ္ရိယာနံ ဩတရဏာ နာမ။
Tāniyeva pañcindriyāni saṅkhārapariyāpannāni bhavanti. Ye saṅkhārā anāsavā bhavanti, bhavaṅgā bhavahetū no bhavanti, te anāsavā saṅkhārā dhammadhātusaṅgahitā bhavanti dhammadhātuyā antogadhattā. Ayaṃ otaraṇā dhātūhi pañcindriyānaṃ otaraṇā nāma.
သာ အနာသဝာ ဓမ္မဓာတု ဓမ္မာယတနပရိယာပန္နာ ဘဝတိ, ယံ အာယတနံ အနာသဝံ ဘဝတိ, ဘဝင္ဂံ ဘဝဟေတု နော ဘဝတိ။ အယံ ဩတရဏာ အာယတနေဟိ ဓမ္မဓာတုယာ ဩတရဏာ နာမ။
Sā anāsavā dhammadhātu dhammāyatanapariyāpannā bhavati, yaṃ āyatanaṃ anāsavaṃ bhavati, bhavaṅgaṃ bhavahetu no bhavati. Ayaṃ otaraṇā āyatanehi dhammadhātuyā otaraṇā nāma.
‘‘ဧတ္တကောဝ ဩတရဏော ဟာရသမ္ပာတော ပရိပုဏ္ဏော’’တိ ဝတ္တဗ္ဗတ္တာ ‘‘နိယုတ္တော ဩတရဏော ဟာရသမ္ပာတော’’တိ ဝုတ္တံ။ ယေန ယေန သံဝဏ္ဏနာဝိသေသဘူတေန ဩတရဏဟာရသမ္ပာတေန သုတ္တပ္ပဒေသတ္ထာ ဩတရိတဗ္ဗာ, သော သော သံဝဏ္ဏနာဝိသေသဘူတော ဩတရဏော ဟာရသမ္ပာတော နိယုတ္တော ယထာရဟံ နိဒ္ဓာရေတ္ဝာ ယုဇ္ဇိတဗ္ဗောတိ အတ္ထော ဂဟေတဗ္ဗောတိ။
‘‘Ettakova otaraṇo hārasampāto paripuṇṇo’’ti vattabbattā ‘‘niyutto otaraṇo hārasampāto’’ti vuttaṃ. Yena yena saṃvaṇṇanāvisesabhūtena otaraṇahārasampātena suttappadesatthā otaritabbā, so so saṃvaṇṇanāvisesabhūto otaraṇo hārasampāto niyutto yathārahaṃ niddhāretvā yujjitabboti attho gahetabboti.
ဣတိ ဩတရဏဟာရသမ္ပာတေ သတ္တိဗလာနုရူပာ ရစိတာ
Iti otaraṇahārasampāte sattibalānurūpā racitā
ဝိဘာဝနာ နိဋ္ဌိတာ။
Vibhāvanā niṭṭhitā.
ပဏ္ဍိတေဟိ ပန။ပေ.။ ဂဟေတဗ္ဗောတိ။
Paṇḍitehi pana…pe… gahetabboti.
ဣတော ပဋ္ဌာယ ‘‘တတ္ထ ကတမော’’တိအာဒိအနုသန္ဓ္ယတ္ထော စ ပရိယောသာနေ ‘‘နိယုတ္တော’’တိအာဒိအနုသန္ဓ္ယတ္ထော စ ဝုတ္တနယာနုသာရေနေဝ ဝိညာတဗ္ဗော။ ကတ္ထစိ ကတ္ထစိ ပာဌေ အပာကဋံယေဝ ယထာဗလံ ကထယိသ္သာမ။
Ito paṭṭhāya ‘‘tattha katamo’’tiādianusandhyattho ca pariyosāne ‘‘niyutto’’tiādianusandhyattho ca vuttanayānusāreneva viññātabbo. Katthaci katthaci pāṭhe apākaṭaṃyeva yathābalaṃ kathayissāma.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / နေတ္တိပ္ပကရဏပာဠိ • Nettippakaraṇapāḷi / ၁၂. ဩတရဏဟာရသမ္ပာတော • 12. Otaraṇahārasampāto
