| Library / Tipiṭaka / တိပိဋက • Tipiṭaka / နေတ္တိပ္ပကရဏပာဠိ • Nettippakaraṇapāḷi |
၁၂. ဩတရဏဟာရသမ္ပာတော
12. Otaraṇahārasampāto
၇၄. တတ္ထ ကတမော ဩတရဏော ဟာရသမ္ပာတော?
74. Tattha katamo otaraṇo hārasampāto?
‘‘တသ္မာ ရက္ခိတစိတ္တသ္သ, သမ္မာသင္ကပ္ပဂောစရော’’တိ ဂာထာ။ ‘‘တသ္မာ ရက္ခိတစိတ္တသ္သ, သမ္မာသင္ကပ္ပဂောစရော’’ ။ ‘‘သမ္မာဒိဋ္ဌိပုရေက္ခာရော’’တိ သမ္မာဒိဋ္ဌိယာ ဂဟိတာယ ဂဟိတာနိ ဘဝန္တိ ပဉ္စိန္ဒ္ရိယာနိ, အယံ ဣန္ဒ္ရိယေဟိ ဩတရဏာ။
‘‘Tasmā rakkhitacittassa, sammāsaṅkappagocaro’’ti gāthā. ‘‘Tasmā rakkhitacittassa, sammāsaṅkappagocaro’’ . ‘‘Sammādiṭṭhipurekkhāro’’ti sammādiṭṭhiyā gahitāya gahitāni bhavanti pañcindriyāni, ayaṃ indriyehi otaraṇā.
တာနိယေဝ ဣန္ဒ္ရိယာနိ ဝိဇ္ဇာ, ဝိဇ္ဇုပ္ပာဒာ အဝိဇ္ဇာနိရောဓော, အဝိဇ္ဇာနိရောဓာ သင္ခာရနိရောဓော, သင္ခာရနိရောဓာ ဝိညာဏနိရောဓော, ဧဝံ သဗ္ဗံ, အယံ ပဋိစ္စသမုပ္ပာဒေန ဩတရဏာ။
Tāniyeva indriyāni vijjā, vijjuppādā avijjānirodho, avijjānirodhā saṅkhāranirodho, saṅkhāranirodhā viññāṇanirodho, evaṃ sabbaṃ, ayaṃ paṭiccasamuppādena otaraṇā.
တာနိယေဝ ပဉ္စိန္ဒ္ရိယာနိ တီဟိ ခန္ဓေဟိ သင္ဂဟိတာနိ – သီလက္ခန္ဓေန သမာဓိက္ခန္ဓေန ပညာက္ခန္ဓေန။ အယံ ခန္ဓေဟိ ဩတရဏာ။
Tāniyeva pañcindriyāni tīhi khandhehi saṅgahitāni – sīlakkhandhena samādhikkhandhena paññākkhandhena. Ayaṃ khandhehi otaraṇā.
တာနိ ယေဝ ပဉ္စိန္ဒ္ရိယာနိ သင္ခာရပရိယာပန္နာနိ။ ယေ သင္ခာရာ အနာသဝာ နော စ ဘဝင္ဂာ, တေ သင္ခာရာ ဓမ္မဓာတုသင္ဂဟိတာ, အယံ ဓာတူဟိ ဩတရဏာ။
Tāni yeva pañcindriyāni saṅkhārapariyāpannāni. Ye saṅkhārā anāsavā no ca bhavaṅgā, te saṅkhārā dhammadhātusaṅgahitā, ayaṃ dhātūhi otaraṇā.
သာ ဓမ္မဓာတု ဓမ္မာယတနပရိယာပန္နာ, ယံ အာယတနံ အနာသဝံ နော စ ဘဝင္ဂံ, အယံ အာယတနေဟိ ဩတရဏာ။
Sā dhammadhātu dhammāyatanapariyāpannā, yaṃ āyatanaṃ anāsavaṃ no ca bhavaṅgaṃ, ayaṃ āyatanehi otaraṇā.
နိယုတ္တော ဩတရဏော ဟာရသမ္ပာတော။
Niyutto otaraṇo hārasampāto.
Related texts:
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / ခုဒ္ဒကနိကာယ (ဋီကာ) • Khuddakanikāya (ṭīkā) / နေတ္တိဝိဘာဝိနီ • Nettivibhāvinī / ၁၂. ဩတရဏဟာရသမ္ပာတဝိဘာဝနာ • 12. Otaraṇahārasampātavibhāvanā
